Pono ea Bibele

Na Bakreste e Lokela ho ba Mafutsana?

KA LEKHETLO le leng Jesu o ile a bolella ’musi e mong e mocha oa morui hore o lokela ho rekisetsa mafutsana lintho tsohle tsa hae. Tlaleho e re monna eo o ile a nyahamisoa ke mantsoe ao a Jesu ’me a tloha a saretsoe, “kaha o ne a e-na le matlotlo a mangata.” Ka mor’a moo Jesu a re ho barutuoa ba hae: “E tla ba ntho e thata hakaakang bakeng sa ba nang le chelete ho kena ’musong oa Molimo!” Jesu a phaella: “Ho bonolo hore kamele e tsoe lesobeng la nale ho e-na le hore morui a kene ’musong oa Molimo.”—Mareka 10:21-23; Matheu 19:24.

Jesu o ne a bolela’ng? Na ho rua ha ho tsamaisane le borapeli ba ’nete? Na Bakreste ba lokela ho ikutloa ba le molato haeba ba e-na le chelete? Na Molimo o batla hore ba phele bophelo bo seng mabothobotho?

Molimo o Amohela “Batho ba Mefuta Eohle”

Mehleng ea boholo-holo Molimo ha aa ka a laela hore Baiseraele ba phele ka tšotleho. Nahana ka sena: Ka mor’a hore ba lule naheng eo ba neng ba e abetsoe, batho ba ile ba lema le ho etsa khoebo e le hore ba iphelise le ho phelisa baratuoa ba bona. Katleho boitekong boo ba bo etsang e ne e tla angoa ke maemo a kang a moruo, a boemo ba leholimo, a matla a bophelo, kapa a tsebo ea mosebetsi. Molao oa Moshe o ne o laela Baiseraele hore ba qenehele motho leha e le ofe haeba a e-ba le mathata a lichelete ’me a futsaneha. (Levitike 25:35-40) Ka lehlakoreng le leng, ba bang ba ne ba rua. Boaze, monna ea neng a e-na le tumelo ’me a tšepahala ea ileng a fetoha moholo-holo oa Jesu Kreste, o ile a hlalosoa e le “monna ea nang le leruo le lengata.”—Ruthe 2:1.

Boemo bo ne bo ntse bo tšoana le mehleng ea Jesu. Ha a ne a bua le monna oa morui ea boletsoeng sethathong, Jesu o ne a sa leke ho khothalletsa ho phela ka thata. Ho e-na le hoo, o ne a ruta thuto ea bohlokoa. Ho ea ka pono ea batho, ho ka ’na ha bonahala eka ho ke ke ha khoneha hore batho ba ruileng ba bonahatse boikokobetso le ho amohela tokisetso ea Molimo ea poloko. Leha ho le joalo, Jesu o ile a re: “Ho batho hona ho ke ke ha khoneha, empa lintho tsohle lia khoneha ho Molimo.”—Matheu 19:26.

Phutheho ea Bakreste ba lekholong la pele la lilemo e ile ea amohela “batho ba mefuta eohle.” (1 Timothea 2:4) Ba ne ba akarelletsa ba ruileng, ba iphelelang ka tsela e itekanetseng le bang ba bangata ba neng ba futsanehile. Mohlomong ba bang ba ile ba e-ba le maruo ao pele e e-ba Bakreste. Maemong a mang mohlomong ho atleheloa ke khoebo le ho etsa liqeto tse bohlale tsa khoebo ho ile ha ba tlisetsa leruo hamorao.

Ka ho tšoanang le kajeno mokhatlo oa bara ba motho ba Bakreste o akarelletsa batho ba maemo a sa tšoaneng a lichelete. Kaofela ha bona ba leka ho latela tataiso ea Bibele litabeng tsa lichelete, kaha lerato la lintho tse bonahalang le ka ama leha e le mang. Thuto eo Jesu a neng a e ruta ka ’musi e mocha oa morui e lemosa Mokreste e mong le e mong ka tšusumetso e matla eo chelete le leruo li ka bang le eona ho motho.—Mareka 4:19.

Temoso ho ba Ruileng

Le hoja Bibele e sa nyatse leruo, e nyatsa lerato la chelete. Mongoli oa Bibele Pauluse o ile a re: “Lerato la chelete ke motso oa mefuta eohle ea lintho tse mpe.” O ile a bontša hore “ba bang ba khelositsoe tumelong ’me ba itlhabile hohle ka bohloko bo boholo,” ka ho hlokomoloha lithahasello tsa moea ka lebaka la ho lakatsa ho rua.—1 Timothea 6:10.

Ho thahasellisang ke hore Pauluse o ile a fa ba ruileng litaelo tse tobileng. O ile a re: “Fana ka litaelo ho ba ruileng tsamaisong ea hona joale ea lintho hore ba se ke ba iphahamisa, le hore ba se ke ba beha tšepo ea bona maruong a sa tsitsang, empa ba e behe ho Molimo, ea re fang lintho tsohle ka ho enneng hore re li thabele.” (1 Timothea 6:17) Ho hlakile hore batho ba ruileng ba ka ’na ba ba kotsing ea ho ikhohomosa le ea ho inahana hore ba phahametse batho ba bang. Ba ka ’na ba boela ba hoheloa ke ho nahana hore maruo a ka fana ka tšireletseho ea sebele—eo e leng Molimo feela ea ka fanang ka eona ka ho feletseng.

Bakreste ba ruileng ba ka itebela likotsing tsena ka hore e be ‘ba ruileng mesebetsing e metle.’ Mesebetsi ena e akarelletsa ho ba ‘ba seatla se bulehileng, ba itokisetsang ho arolelana,’ ba fanang ka thuso ka seatla se bulehileng ho ba hlokang. (1 Timothea 6:18) Bakreste—ba ruileng le ba futsanehileng—ba ka boela ba sebelisa matlotlo a bona ho ntšetsa pele litaba tse molemo tsa ’Muso oa Molimo, e leng ntho e ka sehloohong eo Bakreste ba ’nete ba amehileng ka eona kajeno. Moea ona oa ho fana ka seatla se bulehileng o senola boikutlo bo loketseng ka lintho tse bonahalang ’me o etsa hore motho e be ea ratehang ho Jehova Molimo le ho Jesu Kreste, ba ratang ba fanang ba nyakaletse.—Matheu 24:14; Luka 16:9; 2 Bakorinthe 9:7.

Lintho Tsa Bohlokoa Haholoanyane

Ho hlakile hore Bakreste ha baa laeloa hore ba futsanehe. Empa ha baa lokela ho ‘ikemisetsa ho rua.’ (1 Timothea 6:9) Ba mpa ba sebetsa ka thata e le hore ba tsebe ho phela ka tsela e itekanetseng. Ho itšetlehile ka maemo a sa tšoaneng le tsamaiso ea moruo eo ba phelang tlas’a eona, boiteko ba bona bo tla atleha ka litsela tse sa tšoaneng.—Moeklesia 11:6.

Ho sa tsotellehe hore na maemo a bona a lichelete ke afe, Bakreste ba lokela ho ikitlaelletsa ho “nepisisa lintho tsa bohlokoa haholo.” (Bafilipi 1:10) Ka ho etelletsa pele lithahasello tsa moea, ‘ba ipolokela ka mokhoa o sireletsehileng motheo o motle bakeng sa ka moso, e le hore ba ka tšoara ka tieo bophelo ba sebele.’—1 Timothea 6:19.