Ho Nyarela ka Litabeng

Ha ea Siuoa ke Nako

Batho ba bangata ba ’nile ba khomarela maikutlo a hore melao-metheo e molemo ea bophelo bo botle e thathamisitsoeng ka Bibeleng e siuoe ke nako ’me hape ha e sebetse. Leha ho le joalo, litlhahlobo tsa morao tjena li entse hore lingaka tse ling li nahane hape ka molemo oa keletso ea Bibele tabeng ea ho etsetsa batho ba bang lintho tse molemo.

Ho ea ka American Health, lingaka tse peli li boletse hore “ho etsa mesebetsi e molemo ho ka ba molemo bakeng sa pelo ea hao, tsamaiso ea ’mele ea ho itšireletsa mafung—Ie ho u nea matla.” Michigan sehlopha se seng sa lingaka se ile sa etsa tlhahlobo e nkileng lilemo tse leshome hore se fumane hore na ke ka tekanyo e kae likamano tsa sechaba li amang bophelo bo botle ba ’mele. Taba e hlollang e senotsoeng ke tlhahlobo eo e bile hore mosebetsi oa boithaopo oa sechaba o ile oa hōlisa haholo tekanyetso ea lilemo tsa bophelo hammoho le matla a batho. Phuputso e senotse hore ka ho khethehileng sena se ne se ama haholo banna. Ba neng ba sa ithaopele mosebetsi ba ne ba na le menyetla e ’meli le halofo ea hore ba shoe nakong e lekanyelitsoeng ke tlhahlobo ho feta banna ba neng ba etsa mosebetsi o itseng oa boithaopo bonyane hanngoe ka beke.

Ngaka ea California e tlalehile hore e ile ea lokisetsa hore bakuli ba babeli ba neng ba hloeane ba hlatsoetsane liaparo ’me phello ea hona e bile ho fokotseha ha tekanyo ea cholesterol le mahlaba sefubeng.

Makholo a lilemo a fetileng moapostola Pauluse o ile a bolella Timothea ho “Iaela ba ruileng tsa mehla ea joale hore ba se ke ba ikhohomosa, ba se ke ba tšepa moruo o sa tieang,” empa hore “ba sebetse se molemo, ba ateloe ke mesebetsi e molemo, ba abele ba bang, ba fane.” Hape a hopotsa Bakreste ba Baheberu hore ba se lebale ‘ho etsetsa batho hantle, le ho fana.’ Lebaka? “Khanya le hlompheho le khotso li be teng ho motho ka mong ea etsang hantle.” Bakreste ba ’nete ke khale ba tseba hore ho ela hloko keletso ena e nakong ho ruisa melemo bobeli ’meleng le moeeng.—1 Timothea 6:17, 18; Ba-Heberu 13:16; Ba-Roma 2:10.

“Kahlolo e Fetisang”

Litho tsa Lekhotla-kakaretso la Kereke ea Chache li sa tsoa kena bothateng bo boholo. Li bile ntsoe-leng tšisinyong ea “ho ruta boitšoaro bo hloekileng le botšepehi likamanong tsa batho.” Leha ho le joalo, ha moprista Tony Higton a hlahisa tšisinyo e kōpang lekhotla ho bolela hore baruti ba tlameha “ho beha mohlala likarolong tsohle tsa boitšoaro bo botle, ho akarelletsa le boitšoaro bo botle litabeng tsa botona le botšehali, e le tekanyetso ea ho khetheloa setulo kapa ho tsoela pele ba sebeletsa ho sona,” tšisinyo eo e ile ea hanoa. Lebaka? Ecumenical Press Service e tlaleha hore litho tsa lekhotla la kereke li fumane hore tšisinyo eo “e batla e le matla haholo,” ’me tsa eketsa ka hore “Michael Baughen, mobishopo oa Chester, o hlahisitse hore ho amohela tšisinyo eo ho ne ho tla hloka hore kapele-pele babishopo bohle ba kereke le baruti ba bang ba tlohelisoe litulo.”

Ho e-na le hoo, tšisinyo ea Higton e ile ea bebofatsoa ka hore e ipiletse ho Bakreste bohle, “haholo-holo . . . baetapele ba Bokreste,” ho beha mehlala “likarolong tsohle tsa boitšoaro bo botle, ho akarelletsa boitšoaro bo botle litabeng tsa botona le botšehali.” Press Service e boetse ea tlaleha hore lekhotla la kereke le ile la hana kōpo ea ho nka “bohato bo loketseng ba khalemelo” har’a baruti ba sa itšoareng hantle likamanong tsa botona le botšehali.

Le hoja mehato e joalo ea khalemelo e ka ’na ea e-ba “matla haholo” bakeng sa baruti ba bangata kajeno, Lentsoe la Molimo le beha taba ka ho hlakileng: “Tlosang e mobe har’a Iōna.” (1 Ba-Korinthe 5:13) Molimo o laela hore bohato bo tiileng bo nkuoe ka bohle ba tsoelang pele ho etsa bobe ba sa bake e le hore ho ka sireletsoa bohloeki ba boitšoaro le ba moea ba phutheho ea Bokreste. Ka sebele, taeo e loketse, haholo-holo baetapele ba Bokreste, hobane morutuoa Jakobo o ngotse: “Banab’eso, le se ke la ipea baruti kaofela, le tsoe le tseba hobane ke moo le tla hlaheloa ke kahlolo e fetisang ka bothata.”—Jakobo 3:1.

Ho Tlotlisa Molimo

“Tsela eo semathi se phethang mosebetsi ka eona e ka senola boleng ba lerato la sona ho Molimo.” Na polelo ena ea Wes Neal, mopresidente oa IAP (Institute for Athletic Perfection), joaloka ha e tlalehiloe ho Christianity Today, ke ’nete? IAP, lefapha la boemeli la kereke ea evangeli le “halaletsang lipapali tse tletseng tlhōlisano,” le buella khopolo ea hore limathi tse leng lebaleng li lokela ho etsisa cheseho eo Jesu a bileng le eona ha a “phethahatsa morero oa Ntat’ae.” Khopolo ena ea baevangeli e fetohile thuto e tloaelehileng ea “bolumeli kamoreng eo libapali li itokisetsang ho eona,” ho boletse Christianity Today. Ha e le hantle, sehlooho seo se qotsitse mohlala oa sebapali sa bolo se lefuoang se neng se “ferefile litšoantšo tsa sefapano lieteng tsa sona le mabanteng a matsoho e le khopotso ea hore se ne se bapalla ho tlotlisa Kreste.”

Leha ho le joalo, na ho ka boleloa hore ho ba le seabo papaling e tletseng tlhōlisano kapa e nang le pefo ho tlotlisa Molimo? Che! Joaloka ha Psychology Today e hlokomelisitse: “Tlhōlisano ka boeona e hloka hore semathi se bontše boithati ka nakoana e le hore se phehelle ho hlōla.” Empa leha ho le joalo Bibele e bolella Bakreste hore ‘ba se ke ba hlokomela tsee e leng tsa bona feela, ba mpe ba hlokomele le tsee e leng tsa ba bang.’ (Ba-Filippi 2:3, 4) Bakreste ba ’nete ba tlotlisa Molimo ka ho etsa thato ea oona, e seng ea bona.—Bapisa Esaia 58:13, 14.