Boloka Tumelo le Letsoalo le Letle

Lintlha tse Khōlō tsa Timothea oa Pele

HOO e ka bang ka selemo sa 56 C.E., moapostola Pauluse o ile a lemosa baholo ba phutheho ea Efese hore “liphiri tse hatellang” li tla hlaha har’a bona ’me li tla “bolela lintho tse sothehileng, ho ikhulela barutuoa.” (Liketso 20:29, 30, NW) Lilemong tse ’maloa, thuto ea bokoenehi e ne e tiile hoo Pauluse a ileng a phehella Timothea ho loana ntoa ea moea ka har’a phutheho ho sireletsa bohloeki ba eona le ho thusa balumeli-’moho ho lula tumelong. Leo ke lona lebaka le leholo la hore Pauluse a ngolle Timothea lengolo la hae la pele a le Macedonia hoo e ka bang ka 61-64 C.E.

Timothea o ile a rutoa ka mesebetsi ea baholo, sebaka sa basali seo ba se abetsoeng ke Molimo, litšoaneleho tsa baholo le bahlanka ba sebeletsang, le litaba tse ling. Thuto e joalo e boetse e molemo kajeno.

Khothatso Tumelong

Pauluse o butse ka keletso ea ho boloka tumelo le letsoalo le letle. (1:1-20) O ile a khothalletsa Timothea ho lula Efese le hore a ‘laele ba bang, hore ba se ke ba ruta thuto esele.’ Pauluse o ne a leboha tšebeletso eo a e abetsoeng, a lumela hore o entse ka ho se tsebe le ho hloka tumelo ha a ne a hlorisa balateli ba Jesu. Moapostola o laetse Timothea ho tsoela pele a loana ntoa ea moea, a ntse a “bolokile tumelo le letsoalo le letle” ’me a se tšoane le ba ‘ileng ba senyeheloa ke tumelo ea bona.’

Keletso Borapeling

Joale, Pauluse o fane ka keletso joaloka “tichere ea balichaba tabeng ea tumelo le ’nete.” (2:1-15, NW) Lithapelo li ne li lokela ho etsetsoa ba maemong a phahameng hore Bakreste ba ka phela ka khotso. Ke thato ea Molimo hore batho ba mefuta eohle ba bolokehe, ’me thuto ea bohlokoahali ke hore Kreste ke “ea ineetseng ho ba topollo e lekanang bakeng sa bohle.” Pauluse o bontšitse hore mosali o lokela ho itlhopha ka boikokobetso ’me ha aa tšoanela ho laola monna.

Phutheho e tlameha ho hlophisoa hantle. (3:1-16) Kahoo Pauluse o boletse litšoaneleho tsa balebeli le bahlanka ba sebeletsang. Ho tsoa linthong tseo moapostola a li ngotseng, Timothea o ne a tla tseba hore o lokela ho itšoara joang ka phuthehong, “tšiea le motheo oa ’nete.”

Pauluse o ile a fa Timothea keletso ea botho ho mo thusa ho lebela thuto ea bohata. (4:1-16) Nakong e tlang ba bang ba ne ba tla koenehela tumelo. Empa ka ho itebela ka mehla le ka ho lebela thuto ea hae, Timothea o ne a tla ‘ipholosa, a pholose le ba mo utloang.’

Hape Timothea o ile a fumana le keletso ea ho sebetsana le batho ka bomong, ba banyenyane le ba baholo. (5:1-25) Ka mohlala, ho ne ho lokela hore ho etsoe litokisetso tse loketseng bakeng sa bahlolohali ba hōlileng ba nang le botumo bo botle ba Bokreste. Ho e-na le ho seba, bahlolohali ba bacha ba lokela ho nyaloa le ho ba le bana. Banna ba hōlileng ba okamelang ka tsela e ntle ba ne ba lokela ho nkoa e le ba tšoaneloang ke tlhompho e imenneng habeli.

Boinehelo ba Bomolimo le Khotsofalo

Lengolo la Pauluse le ile la phethoa ka keletso e mabapi le boinehelo ba bomolimo. (6:1-21, NW) “Boinehelo ba bomolimo le khotsofalo ke leruo le leholo,” empa boikemisetso ba ho rua bo lebisa tšenyehong le timetsong. Pauluse o phehelletse Timothea ho loana ntoa e ntle ea tumelo le ho ‘itšoarella ka matla bophelong bo sa feleng.’ Ho finyella bophelo boo ba sebele, barui ba ne ba lokela hore “ba se ke ba tšepa moruo o sa tieang, ba mpe ba tšepe Molimo.”

[Lebokose/Setšoantšo se leqepheng la 30]

Ba Bolokiloe ke ho Beleha Bana: Pauluse o ne a sa bue ka poloko e isang bophelong bo sa feleng empa o ne a bua ka karolo e loketseng ea mosali ea tšabang Molimo ha a ne a ngola: “O tla bolokeha ha a beleha bana, hafeela ba tsoela pele tumelong le leratong le khalalelong ba e-na le kelello e nang le kahlolo e molemo.” (1 Timothea 2:11-15, NW) Ka ho beleha bana, le ho hlokomela bana ba hae, le ho tsamaisa mesebetsi ea ntlo, mosali o ne a tla “bolokeha” hore a se fetohe mosebi ea hlokang mosebetsi le ho ikenya litabeng tsa batho ba bang. (1 Timothea 5:11-15) Mesebetsi ea hae ea lelapa e tla tlatsetsa tšebeletso ea hae ho Jehova. Bonneteng, Bakreste bohle ba lokela ho lebela boitšoaro ba bona ’me ba sebelise nako ea bona ka bohlale.—Ba-Efese 5:15, 16.