Batsoali le Bana: Etelletsang Molimo Pele!
“Tšaba Molimo, u boloke litaelo tsa oona.”—MOEKLESIA 12:13.
1. Batsoali le bana ba lokela ho hlaolela tšabo efe, ’me e tla ba tlisetsa eng?
BOPROFETA bo mabapi le Jesu Kreste bo ile ba bolela hore o ne a tla “thabela ho tšaba Jehova.” (Esaia 11:3) Tšabo ea hae ka ho khetheha e ne e le tlhompho e tebileng le tšabo ea Molimo e nang le tlhompho, tšabo ea ho khopisa Molimo hobane a ne a mo rata. Ho hlokahala hore batsoali le bana ba hlaolele tšabo ea Molimo e tšoanang le ea Kreste, e tla ba tlisetsa thabo joalokaha e ile ea tlisetsa Jesu thabo. Ho hlokahala hore ba etelletse Molimo pele bophelong ba bona ka ho utloa litaelo tsa hae. Ho latela mongoli e mong oa Bibele, “ke eona tšoanelo eohle ea motho.”—Moeklesia 12:13.
2. Taelo ea Molao ea bohlokoa ka ho fetisisa ke efe, hona e ne e fuoe bo-mang ka ho khetheha?
2 Taelo ea Molao ea bohlokoa ka ho fetisisa, e leng, hore re lokela ho ‘rata Jehova ka pelo tsa rōna tsohle, le ka moea [soule] oa rōna oohle, le ka matla a rōna ’ohle,’ e ile ea fuoa batsoali ka ho khetheha. Sena se bontšoa ke mantsoe a tsoelang pele a Molao: “U tlo u . . . rute bana ba hao [litaba tsena tse buang ka ho rata Jehova], ’me u bue ka tsona, ha u lutse tlung ea hao, leha u le tseleng u tsamaea, leha u ea robala, leha u tsoha.” (Deuteronoma 6:4-7; Mareka 12:28-30) Ka tsela ena batsoali ba ile ba laeloa ho etelletsa Molimo pele ka hore ka bobona ba mo rate le ka ho ruta bana ba bona ho etsa se tšoanang.
Boikarabelo ba Mokreste
3. Jesu o ile a bontša bohlokoa ba ho lebisa tlhokomelo ho bana joang?
3 Jesu o ile a bontša bohlokoa ba ho lebisa tlhokomelo esita le ho bana ba banyenyane. Lekhetlong le leng ho ella qetellong ea tšebeletso ea Jesu ea lefatšeng, batho ba ile ba qala ho tlisa masea a bona ho eena. Ho hlakile hore barutuoa ba Jesu ba ile ba leka ho thibela batho bana hobane ba ne ba lumela hore o tšoarehile haholo hore a ka tšoenngoa. Empa Jesu o ile a khalemela barutuoa ba hae ka thata: “Lesang bana ba tle ho ’na, ’me le se ke la ba thibela.” Jesu o ile a ba “a beha bana matsohong a hae,” kahoo a bontša ka tsela e amang maikutlo bohlokoa ba ho lebisa tlhokomelo ho bana ba banyenyane.—Luka 18:15-17; Mareka 10:13-16.
4. Taelo ea ho ‘ruta lichaba tsohle’ e ile ea fuoa bo-mang, hona see se ne se tla ba hloka hore ba etse eng?
4 Jesu o ile a boela a hlakisa hore balateli ba hae ba na le boikarabelo ba ho ruta ba bang ntle ho bana ba bona. Ka mor’a lefu la hae le tsoho, Jesu o ile a “bonoa ka nako e le ’ngoe ke baena ba fetisang makholo a mahlano”—ho akarelletsa le batsoali ba bang. (1 Ba-Korinthe 15:6) Ho bonahala hore sena se ile sa etsahala thabeng ea Galilea moo baapostola ba hae ba 11 le bona ba neng ba bokane teng. Moo Jesu o ile a ba phehella kaofela ha bona: “E-eang ke hona, le rute lichaba tsohle, . . . le ba rute, ho boloka tsohle tseo [ke] le laetseng tsona.” (Mattheu 28:16-20, mongolo o tšekaletseng ke oa rōna.) Ha ho Mokreste eo ka nepo a ka hlokomolohang taelo ena! E le hore bo-ntate le bo-’mè ba ka e phetha ho hlokahala hore ba hlokomele bana ba bona esita le ho nka karolo mosebetsing oa boboleli ba phatlalatsa le ho ruta.
5. (a) Ke’ng se bontšang hore boholo ba baapostola, haeba e ne e se bona kaofela, bo ne bo nyetse ’me ka hona ho ka etsahala hore bo ne bo e-na le bana? (b) Ho ne ho hlokahala hore lihlooho tsa malapa li nke ka ho teba keletso efe?
5 Hoa hlokomeleha hore esita le baapostola ba ne ba tšoanela ho leka-lekanya boikarabelo ba bona ba lelapa le tlamo ea ho bolela esita le ho alosa mohlape oa Molimo. (Johanne 21:1-3, 15-17; Liketso 1:8) Ho ne ho le joalo hobane boholo ba bona bo ne bo nyetse, haeba e ne e se bona kaofela. Kahoo moapostola Pauluse o ile a hlalosa: “Na ha re na tokelo ea ho tsamaea re e-na le khaitseli, e leng mohatsa oa rōna, joalo ka baapostola ba bang, le banab’abo Morena, le Kefase na?” (1 Ba-Korinthe 9:5, mongolo o tšekaletseng ke oa rōna; Mattheu 8:14.) E ka ’na eaba baapostola ba bang le bona ba ne ba ile ba e-ba le bana. Bo-rahistori ba pele, ba kang Eusebius, ba re Petrose o ne a e-na le bona. Ho ne ho hlokahala hore batsoali bohle ba Bakreste ba pele ba ele hloko keletso ena ea Mangolo: “Ekare ha e mong a sa baballe bahabo, haholo ba ntlo ea hae, eo o latotse tumelo, ’me o fetisoa ke ea sa lumelang.”—1 Timothea 5:8.
Boikarabelo bo ka Sehloohong
6. (a) Ke phephetso efe eo baholo ba Bakreste ba nang le malapa ba talimaneng le eona? (b) Boikarabelo ba moholo bo ka sehloohong ke bofe?
6 Baholo ba Bakreste ba nang le malapa kajeno ba boemong bo tšoanang le ba baapostola. Ba tlameha ho leka-lekanya boikarabelo ba bona ba ho hlokomela litlhoko tsa malapa a bona tsa moea le tsa nama le tlamo ea bona ea ho bolela phatlalatsa le ho alosa mohlape oa Molimo. Ke mosebetsi ofe o lokelang ho tla pele? The Watchtower ea March 15, 1964, e ile ea bontša: “Boikarabelo ba pele [ba ntate] bo mabapi le lelapa la hae, ’me ha e le hantle, o ne a ke ke a sebeletsa ka ho loketseng haeba a ne a sa hlokomele boikarabelo bona.”
7. Bo-ntate ba Bakreste ba etelletsa Molimo pele joang?
7 Ka hona bo-ntate ba tlameha ho etelletsa Molimo pele ka ho ela hloko taelo ea ho ‘ba hōlisa ka ho ba laea le ka ho ba rutela Moreneng.’ (Ba-Efese 6:4) Boikarabelo boo bo ke ke ba fetisetsoa ho motho e mong osele, le hoja ho ka etsahala hore ebe ntate o na le kabelo ea ho hlokomela mesebetsi e itseng ka phuthehong ea Bokreste. Ke joang bo-ntate ba joalo ba ka hlokomelang boikarabelo ba bona—ba hlokomela litho tsa lelapa nameng, moeeng, le maikutlong—’me ka nako e tšoanang, ba okamela le ho lebela ka phuthehong?
Ho Fana ka Tšehetso e Hlokahalang
8. Mosali oa moholo a ka mo tšehetsa joang?
8 Ho hlakile hore baholo ba nang le boikarabelo ba lelapa ba ka fumana molemo ka ho tšehetsoa. The Watchtower e qotsitsoeng ka holimo e ile ea bontša hore mosali oa Mokreste a ka tšehetsa monna oa hae. E itse: “A ka etsa hore ho finyellehe kahohle kamoo ho ka khonehang hore a lokisetse likabelo tsa hae tse sa tšoaneng, le ho thusa ho mo bolokela nako ea bohlokoa le ho ipolokela eona ka ho ba le kemiso e ntle ka lapeng, ho lokisa lijo ka nako, ho lokela ho ea libokeng tsa phutheho kapele-pele. . . . Tlas’a tataiso ea monna oa hae, mosali oa Mokreste a ka etsa ho hongata ho koetlisa bana ka tsela eo ba lokelang ho tsamaea ka eona ho thabisa Jehova.” (Liproverbia 22:6) E, mosali o bōpetsoe ho ba “mothusi,” ’me monna oa hae ka bohlale o tla thabela thuso ea hae. (Genese 2:18, NW) Tšehetso ea hae e ka mo nolofalletsa ho hlokomela boikarabelo ba hae ba lelapa le ba phutheho ka katleho.
9. Phuthehong ea Thessalonika ke bo-mang ba neng ba khothalletsoa ho thusa litho tse ling tsa phutheho?
9 Leha ho le joalo, basali ba baholo ba Bakreste hase bona feela ba ka nkang karolo mosebetsing o tšehetsang molebeli ea tlamehang ho ‘alosa mohlape oa Molimo’ le ho hlokomela lelapa la hae. (1 Petrose 5:2) Ke bo-mang hape ba ka ho etsang? Moapostola Pauluse o ile a phehella baena ba Thessalonika ho hlompha ba ba “busang.” Empa ha a tsoela pele ho buisana le baena bona bana—ka ho khetheha ba sa aloseng—Pauluse o ile a ngola: “Rea le rapela, hore le ke le lokise ba sa eeng ka molao, le tšelise ba pelo li tepeletseng, le tiise ba fokolang, ’me le be le mamello ho bohle.”—1 Ba-Thessalonika 5:12-14.
10. Thuso e lerato ea baena bohle e na le phello efe e ntle phuthehong?
10 Ho hotle hakaakang ha baena ka phuthehong ba e-na le lerato le ba susumelletsang ho tšelisa ba tepeletseng maikutlo, ho tšehetsa ba fokolang, ho khalemela ba sa laoleheng le ho mamella bohle! Baena ba Thessalonika, ba neng ba sa tsoa amohela ’nete ea Bibele ho sa tsotellehe mahloriso a maholo, ba ile ba sebelisa keletso ea Pauluse ea hore ba etse sena. (Liketso 17:1-9; 1 Ba-Thessalonika 1:6; 2:14; 5:11) Nahana ka phello e ntle eo tšebelisano ea bona e lerato e bileng le eona ea ho matlafatsa le ho kopanya phutheho kaofela! Ka ho tšoanang, kajeno ha baena ba tšelisana, ba tšehetsana ba bile ba khalemelana, ho etsa hore baholo, bao hangata ba nang le malapa ao ba lokelang ho a hlokomela, ba jare boikarabelo ba bolisa habonolo haholoanyane.
11. (a) Ke hobane’ng ha ho utloahala ho fihlela qeto ea hore lentsoe “baena” le ne le kopanyelletsa basali? (b) Mosali oa Mokreste ea hōlileng tsebong a ka fana ka thuso efe ho basali ba banyenyane kajeno?
11 Na basali ba ne ba kopanyelletsoa har’a “baena” bao moapostola Pauluse a neng a bua le bona? E, ba ne ba kopanyelletsoa, kaha basali ba bangata e ile ea e-ba balumeli. (Liketso 17:1, 4; 1 Petrose 2:17, NW; 5:9) Basali ba joalo ba ne ba ka fana ka thuso ea mofuta ofe? Ha e le hantle, ho ne ho e-na le basali ba banyenyane ka liphuthehong ba neng ba e-na le bothata ba ho laola “litakatso” kapa ba ileng ba fetoha “ba pelo li tepeletseng.” (1 Timothea 5:11-13) Kajeno basali ba bang ba na le mathata a tšoanang. Seo e ka ’nang eaba ba se hloka haholo ke motho ea ka mamelang mathata a bona ’me a ba utloela bohloko. Hangata mosali oa Mokreste ea hōlileng tsebong ke motho ea molemohali ea ka fanang ka thuso e joalo. Ka mohlala, a ka buisana le mosali e mong ka mathata a botho ao monna oa Mokreste ka boeena a neng a ke ke a sebetsana le ’ona ka nepo. Ha Pauluse a totobatsa bohlokoa ba ho fana ka thuso e joalo o ile a ngola: “Basali ba hōlileng . . . ba rute tse ntle, ba tle ba hlalefise ba bacha, ba ba rute ho rata banna ba bona, le ho rata bana, ho phela ka kelello, le ho hloeka, le ho itulela mahae a bona; e be basali ba molemo, ba utloang banna ba bona, hore lentsoe la Molimo le se ke la nyefoloa.”—Tite 2:3-5.
12. Ke habohlokoa hore bohle ba ka har’a phutheho ba latele tataiso ea mang?
12 Bo-khaitseli ba ikokobelitseng ke tlhohonolofatso e kaakang ka phuthehong ha ka moea oa tšebelisano ba tšehetsa banna ba bona le baholo! (1 Timothea 2:11, 12; Ba-Heberu 13:17) Baholo ba nang le boikarabelo ba lelapa ka ho khethehileng ba rua molemo ha bohle ba kopanya matsoho bakeng sa ho thusana ka moea oa lerato le ha bohle ba ikokobelletsa tataiso ea balisa ba khethiloeng.—1 Petrose 5:1, 2.
Batsoali, le Etelletsa Eng Pele?
13. Bo-ntate ba bangata ba hlōleha ho etsa mosebetsi oa bona joang malapeng a bona?
13 Nakong e fetileng motho ea lokisetsang boithabiso ea tummeng o ile a hlokomela: “Ke bona banna ba atlehileng ba hlokomela lik’hamphani tse nang le banna ba makholo; ba tseba kamoo ba ka sebetsanang le boemo bo bong le bo bong, kamoo ba ka laeang le ho putsa kateng lefatšeng la khoebo. Empa mosebetsi oa motonana oo ba o hlokomelang ke malapa a bona ’me ba hlōleha ho o phetha.” Hobane’ng? Na hase hobane ba etelletsa khoebo le lithahasello tse ling pele ’me ba hlokomoloha keletso ea Molimo? Lentsoe la hae le re: “Litaelo tseo ke u laelang tsona . . . , u li rute bana ba hao.” ’Me sena se ne se lokela ho etsoa letsatsi le letsatsi. Ho hlokahala hore batsoali ba fane ka nako ea bona ba sa e lekanyetse—’me ka ho khetheha lerato la bona le kameho e tebileng.—Deuteronoma 6:6-9.
14. (a) Batsoali ba lokela ho hlokomela bana ba bona joang? (b) Koetliso e loketseng ea bana e kopanyelletsa eng?
14 Bibele e re hopotsa hore bana ke lefa le tsoang ho Jehova. (Pesaleme ea 127:3) Na u hlokomela bana ba hao joaloka thepa ea Molimo, mpho eo a e behileng tlhokomelong ea hao? Mohlomong ngoana oa hao o tla arabela haeba u mo sika, ka tsela eo u bontša hore ua mo tsotella u bile u mo hlokomela ka lerato. (Mareka 10:16) Empa ho ‘ruta ngoana tsela eo a tšoanetseng ho e tsamaea’ ho hloka ho fetang feela ho mo kopa le ho mo aka. Bakeng sa ho ba ea hlomeletsoeng ka bohlale ba ho qoba maraba a bophelo, ngoana o boetse o hloka taeo e lerato. Motsoali o bontša lerato la sebele ka ho ‘laea ngoana oa hae.’—Liproverbia 13:1, 24; 22:6.
15. Ke’ng se bontšang hore ho hlokahala taeo ea botsoali?
15 Tlhokahalo ea taeo ea botsoali e ka bonoa tlhalosong ea moeletsi oa sekolo mabapi le bana ba tlang ofising ea hae: “Baa haulana, ba tepeletse maikutlo, ’me ba ha baa sireletseha. Baa lla ha ba ntse ba pheta kamoo lintho li hlileng li leng kateng. Ba bangata—ba bangata ho feta kamoo motho a ka nahanang kateng—ba lekile ho ipolaea, e seng ka lebaka la thabo e tlōlisang; ke hobane ba ikutloa ho hang ba sa thaba, ba sa tsotelloe, ba bile ba sithabetse hobane ba sa le banyenyane joalo ba ‘laola lintho’ ’me ho boima ho bona hore ba sebetsane le tsona.” O ile a eketsa: “Ke ntho e tšosang hore ebe motho e monyenyane o ikutloa hore o laola lintho.” Ke ’nete hore bana ba ka ’na ba leka ho qoba taeo kapa ho e hana, empa ha e le hantle ba ananela tataiso ea botsoali le lithibelo. Ba thabetse hore ebe batsoali ba bona ba tsotella ka ho lekaneng hoo ba ba behelang meeli. Mocha e mong ea ka tlaase ho lilemo tse 20 eo batsoali ba hae ba ileng ba etsa sena o itse: “Ho tlositse moroalo o fetang o tloaelehileng kelellong ea ka.”
16. (a) Ho etsahala’ng ka bana ba bang ba hōliselitsoeng malapeng a Bakreste? (b) Ke hobane’ng ha ho tsoa tseleng ha ngoana ho sa bolele hakaalo hore koetliso eo batsoali ba faneng ka eona e ne e se ntle?
16 Empa, ho sa tsotellehe ho ba le batsoali ba ba ratang le ba ba koetlisang hamolemo, bacha ba bang, joaloka ngoana ea lehlasoa setšoantšong sa Jesu, ba hana tataiso ea botsoali ’me ba tsoa tseleng. (Luka 15:11-16) Leha ho le joalo, seo ka bosona se ka ’na sa se bolele hore batsoali ha baa ka ba phetha boikarabelo ba bona ba ho ruta ngoana oa bona hantle, joalokaha Liproverbia 22:6 e laela. Polelo e mabapi le ho ‘ruta ngoana tsela eo a tšoanetseng ho e tsamaea; ’me a ke ke a e kheloha’ e ne e fanoa e le molao o akaretsang. Ka masoabi, joaloka ngoana ea lehlasoa, bana ba bang ba tla ‘nyelisa thuto ea bo-’m’a bona.’—Liproverbia 30:17.
17. Batsoali ba bana ba tsoileng tseleng ba ka ’na ba fumana matšeliso hokae?
17 Ntate oa mora ea tsoileng tseleng o ile a tletleba: “Ke lekile ke sa khaotse ho finyella pelo ea hae. Ha ke tsebe hore ke lokela ho etsa eng hobane ke lekile lintho tse ngata haholo. Ha ho letho le sebelitseng.” Re tšepa hore ha nako e ntse e feta, bana ba joalo ba tsoileng tseleng, ba tla hopola koetliso e lerato eo ba ileng ba e fumana ’me ba khutle joalokaha ngoana ea lehlasoa a ile a etsa. Leha ho le joalo, ’nete e-ea sala, bana ba bang baa rabela ba bile ba itšoara hampe ’me sena se etsa hore batsoali ba utloe bohloko haholo. Batsoali ba ka ’na ba fumana matšeliso ka ho tseba hore esita le mosuoe e moholo ka ho fetisisa ea kileng a phela lefatšeng o ile a bona ha seithuti sa hae sa khale Judase Iskariota se mo eka. ’Me ha ho pelaelo hore Jehova ka boeena o ile a soaba ha bongata ba bara ba hae ba moea bo hana keletso ea hae ’me bo ipaka e le marabele e se ka lebaka la molato oa Hae.—Luka 22:47, 48; Tšenolo 12:9.
Bana—Le Tla Thabisa Mang?
18. Bana ba ka bontša joang hore ba etelletsa Molimo pele?
18 Jehova o-oa le phehella lōna bacha: “Bana, utloang batsoali ba lōna Moreneng hobane ke ntho e lokileng.” (Ba-Efese 6:1) Bacha ba etelletsa Molimo pele ka ho etsa sena. Le se ke la ba maoatla! Lentsoe la Molimo le re: “Lehlanya le nyelisa thuto ea ntat’a lona.” Ha lea lokela le hore ka boikakaso le nke hore le ka tsoella ntle ho taeo. ’Nete ke hore “ho na le moloko o hloekileng mahlong a oona, empa o sa hlatsuoa litšila tsa oona.” (Liproverbia 15:5; 30:12, American Standard Version) Ka hona elang hloko tataiso ea bomolimo—‘mamelang,’ ‘hlokomelang joaloka letlotlo,’ ‘le se ke la lebala,’ ‘lebisang tlhokomelo’ ho, ‘bolokang,’ ’me le ‘se ke la furalla’ litaelo le taeo tsa batsoali.—Liproverbia 1:8; 2:1; 3:1; 4:1; 6:20, bapisa le NW.
19. (a) Bana ba na le mabaka afe a matla a ho utloa Jehova? (b) Ba banyenyane ba ka bontša teboho joang ho Molimo?
19 Le na le mabaka a matla a ho utloa Jehova. O-oa le rata, ’me o fane ka melao ea hae, ho akarelletsa le molao oa hore bana ba utloe batsoali ba bona, bakeng sa ho le sireletsa le ho le thusa ho thabela bophelo bo thabileng. (Esaia 48:17) O boetse o fane ka Mora oa hae hore a le shoele e le hore le ka pholoha sebe le lefu ’me la thabela bophelo bo sa feleng. (Johanne 3:16) Na le bontša teboho? Molimo o shebeletse a le maholimong, o lekola lipelo tsa lōna ho bona haeba le hlile lea mo rata le bile le ananela litokisetso tsa hae. (Pesaleme ea 14:2) Le Satane o shebeletse, ’me o soma Molimo, o bolela hore le ke ke la Mo utloa. Ha le sa utloe Molimo, le thabisa Satane ’me Jehova o-oa ‘halefa.’ (Pesaleme ea 78:40, 41) Jehova o ipiletsa ho lōna: “Mora oa ka, hlalefa, u nthabise pelo [ka ho nkutloa], ’me ke tla ba le puo ho fetola ba nkomanyang.” (Liproverbia 27:11) E, potso ke hore, Le tla thabisa mang, Satane kapa Jehova?
20. Mocha e mong o ile a tsoela pele joang ho ba sebete sa ho sebeletsa Jehova esita leha a tšohile?
20 Ho etsa thato ea Molimo ha ho bonolo ha le talimane le likhatello tseo Satane le lefatše la hae ba le tlisetsang tsona. E ka ba ho tšosang. Mocha e mong o ile a bontša: “Ho tšoha ho tšoana le ho hatsela. U ka etsa ho hong ka hona.” O ile a hlalosa: “Ha u hatsetse, u apara jesi. Haeba u ntse u hatsetse, u apara e ’ngoe. ’Me u tsoela pele ho apara ho hong ho fihlela ha mohatsela o fela ’me u se u sa hatsela. Kahoo ho rapela Jehova ha u tšohile ho tšoana le ho apara jesi ha u hatsetse. Haeba ka mor’a thapelo e le ’ngoe ke ntse ke tšohile, ke rapela hape, le hape, le hape, ho fihlela ke se ke sa ikutloe ke tšohile. ’Me hoa sebetsa. Ho ’ntšitse matšoenyehong!”
21. Jehova o tla re tšehetsa joang haeba re hlile re leka ho mo etelletsa pele bophelong ba rōna?
21 Haeba re hlile re leka ho etelletsa Molimo pele bophelong ba rōna, Jehova o tla re tšehetsa. O tla re matlafatsa, a fane ka thuso ea mangeloi ha e hlokahala, joalokaha a ile a etsa bakeng sa Mora oa hae. (Mattheu 18:10; Luka 22:43) Lōna kaofela batsoali le bana e-bang sebete. E-bang le tšabo e kang ea Kreste, ’me e tla le tlisetsa thabo. (Esaia 11:3) E, “tšaba Molimo, u boloke litaelo tsa oona, hobane, ke eona tšoanelo eohle ea motho.”—Moeklesia 12:13.
Na U ka Araba?
◻ Ho ne ho hlokahala hore balateli ba Jesu ba pele ba leka-lekanye boikarabelo bofe?
◻ Batsoali ba Bakreste ba tlameha ho phetha boikarabelo bofe?
◻ Baholo ba Bakreste ba nang le malapa ba ka fumana thuso efe?
◻ Bo-khaitseli ba ka etsa tšebeletso efe ea bohlokoa ka phuthehong?
◻ Ke habohlokoa hore bana ba ele hloko keletso le tataiso life?
[Setšoantšo se leqepheng la 15]
Hangata mosali oa Mokreste ea hōlileng tsebong a ka fana ka thuso e hlokahalang ho mosali e monyenyane
[Setšoantšo se leqepheng la 17]
Batsoali ba bana ba tsoileng tseleng ba ka fumana matšeliso afe Mangolong?