Ho Matha ka Mamello Peisong
“A re matheng ka mamello peisong e behiloeng ka pel’a rōna.”—BA-HEBERU 12:1, NW.
1. (a) Ha re inehela ho Jehova Molimo ke eng e behoang ka pel’a rōna? (b) Mokreste o tlameha ho itokisetsa peiso ea mofuta ofe?
HA RE inehela ho Jehova ka Jesu Kreste, ho bile joalokaha eka Molimo o behile peiso ka pel’a rōna. Qetellong ea peiso ena, bohle ba tlang ho e phetha ka katleho ba tla fuoa moputso. Ke moputso oa eng? Oa bophelo bo sa feleng! Hore semathi sa Mokreste se hape moputso ona o tsotehang, ho hlokahala hore se itokisetse ho matha lebelo la mokoka, e seng lebelo feela la sekhahla, le lekhutšoaane. Kahoo ho tla hlokahala hore se be le mamello. Se tla lokela ho mamella mokhathala oa lebelo le litšitiso tse hlahang nakong ea lebelo leo.
2, 3. (a) Ke eng se tla re thusa ho matha peisong ea Bokreste ho fihlela qetellong? (b) Thabo e ile ea thusa Jesu joang ho matha ka mamello peisong?
2 Ke eng se tla re thusa ho matha lebelo le joalo ho fihlela qetellong? Ke eng se ileng sa thusa Jesu ho mamella ha e sa le motho lefatšeng? Tšoaneleho ea thabo ke eona e ileng ea mo fa matla a ka hare. Ba-Heberu 12:1-3, (NW) e baleha tjena: “Kahoo, kaha re pota-potiloe ke leru le leholo joalo la lipaki, le rōna a re lahleng boima bohle le sebe se re tšoasang habonolo, ’me a re matheng ka mamello peisong e behiloeng ka pel’a rōna, re ntse re talimile ka hloko ho Moemeli e Moholo le Mophethahatsi oa tumelo ea rōna, Jesu. O ile a mamella thupa ea tlhokofatso, ho nyelisoa ho hlabisang lihlong, ka baka la thabo e neng e behiloe ka pel’a hae, ’me o lutse ka letsohong le letona la terone ea Molimo. Ka sebele, nahanisisang ka hloko ea mamelletseng puo e hanyetsang joalo ea baetsalibe ka baka la lithahasello tsa bona, le tle le se ke la khathala ’me la nyahama liphefumolohing tsa lōna.”
3 Tšebeletsong ea hae eohle ea phatlalatsa, Jesu o ile a khona ho tsoela pele a matha peisong ka baka la thabo ea Jehova. (Bapisa le Nehemia 8:10.) Thabo ea hae e ile ea mo thusa ho mamella le lefu le hlabisang lihlong thupeng ea tlhokofatso, leo ka mor’a lona a ileng a fumana thabo e khaphatsehang ea ho tsoha bafung le ho nyolohela ka letsohong le letona la Ntate oa hae, moo a tlang ho bona mosebetsi oa Molimo o phethoa ho fihlela qetellong. Ka mamello ea hae e le motho ka lehlakoreng la Molimo, o ile a ema a tiile tokelong ea hae ea bophelo bo sa feleng. E, joalokaha Luka 21:19, (NW) e bolela: “Le tla boloka liphefumolohi tsa lōna ha le mamella.”
4. Jesu o behetse ba mathang hammoho le eena mohlala oa mofuta ofe, ’me re lokela ho tsepamisa likelello tsa rōna ho eng?
4 Jesu Kreste o behile mehlala e metle ka ho fetisisa bakeng sa ba mathang hammoho le eena, ’me mohlala oa hae o re kholisa hore le rōna re ka ba bahlōli. (1 Petrose 2:21) Seo Jesu a re kōpang ho se etsa, re ka khona ho se etsa. Joalokaha a ile a mamella, le rōna ka ho tšoanang re ka mamella. Ha re ntse re tsoela pele re mo etsisa ka ho tiisetsa, re tlameha ho tsepamisa likelello tsa rōna mabakeng a hore re thabe. (Johanne 15:11, 20, 21) Thabo e tla re matlafatsa hore re tiisetse ho matha peisong ea tšebeletso ea Jehova ho fihlela re fumana moputso o khanyang oa bophelo bo sa feleng.—Ba-Kolosse 1:10, 11, NW.
5. Re ka thaba ’me ra matlafala joang bakeng sa peiso e leng ka pel’a rōna?
5 Ho re thusa ho tiisetsa peisong, Jehova o fana ka matla a fetang a tloaelehileng. Ha re hlorisoa, matla ao le tsebo ea hore na ke hobane’ng ha re fumana tokelo ea ho hlorisoa aa re matlafatsa. (2 Ba-Korinthe 4:7-9, NW) Ntho leha e le efe e re hlahelang molemong oa ho hlompha lebitso la Molimo le ho tšehetsa bobusi ba oona ke lebaka la thabo eo ho seng ea ka re amohang eona. (Johanne 16:22) Sena se hlalosa lebaka leo ka lona baapostola, ka mor’a hore Lekhotla le Phahameng la Bajode le laele hore ba shapuoe ka baka la ho paka lintho tse tsotehang tseo Jehova Molimo a li finyelletseng ka Jesu, ba ileng ba thaba “kahobane ba entsoe ba tšoaneloang ke ho hlabisoa lihlong ka baka la lebitso la Jesu.” (Liketso 5:41, 42) Hase mahloriso a neng a etsa hore ba thabe empa ke khotsofalo e tebileng ea ka hare ea ho tseba hore ba khahlisa Jehova le Jesu.
6, 7. Ke hobane’ng ha semathi sa Mokreste se lokela ho thaba leha se na le matšoenyeho, hona phello e tla ba efe?
6 Matla a mang a re tšehetsang bophelong ba rōna ke tšepo eo Molimo o e behileng ka pel’a rōna. Joalokaha Pauluse a boletse: “Re na le khotso le Molimo ka Morena oa rōna Jesu Kreste. Ke ka eena re bileng le hona ho amoheloa ka baka la tumelo mohaung ona oo re leng ho oona, ’me re motlōtlō ka ho ba le tšepo ea ho abeloa tlōtla ea Molimo. Ho feta mona, re motlōtlō le har’a matšoenyeho, ka ho tseba hore matšoenyeho a hlahisa mamello, mamello ke bopaki ba hore re amohelehile, ho amoheleha hoo ho hlahisa tšepo, ’me tšepo eo ha e soabise.”—Ba-Roma 5:1-5, BPN.
7 Matšoenyeho ka booona ha a thabise, empa litholoana tsa khotso tseo a li hlahisang ka mor’a moo ke tsona tse thabisang. Litholoana tsena ke mamello, boemo bo amohelehang, tšepo, le phethahatso ea tšepo eo. Mamello ea rōna e tla etsa hore re amoheloe ke Molimo. Ha re amohetsoe ke Molimo, ka kholiseho re ka ba le tšepo ea ho phethahatsoa ha litšepiso tseo o li entseng. Tšepo ena e re boloka tseleng e nepahetseng ’me ea re matlafatsa ha re le tlas’a matšoenyeho ho fihlela ha tšepo eo e phethahatsoa.—2 Ba-Korinthe 4:16-18.
Ho Thabile ba Mamellang!
8. Ke hobane’ng ha nako eo re e emetseng e se tšenyo ea nako ho rōna?
8 Ha re ntse re emetse nako e behiloeng ke Molimo ea ho fana ka meputso ho limathi, ho na le liphetoho tseo re li etsang. Liphetoho tsena ke tseo re li etsang ka hare ho rōna ’me li etsa hore re tobane le liteko ka katleho, ebile li etsa hore re amoheloe ke Molimo haholoanyane. Li paka seo re leng sona ’me li re fa monyetla oa ho sebelisa litšoaneleho tse ntle tse tšoanang le tse ileng tsa bonahatsoa ke batho ba tšepahalang ba boholo-holo, haholo-holo tse ileng tsa bonahatsoa ke Ea re Behetseng Mohlala, Jesu Kreste. Morutuoa Jakobo o re: “Banab’eso, le ke le lekanye hobane ke thabo feela ha le hlaheloa ke meleko e mengata; le ntse le tseba hobane ho lekoa ha tumelo ea lōna ho hlahisa mamello; ’me mamello e ka khona e phethehe tšebetsong ea eona, le tle le be ba phethehileng, ba hōlileng ruri, bao ho sa hlokoeng letho ho bona.” (Jakobo 1:2-4) E, re ka ’na ra lebella ho hlaheloa ke liteko tse sa tšoaneng, empa liteko tsena li tla re boloka re ntse re hlaolela litšoaneleho tse nepahetseng. Ka ho etsa joalo re tla be re bontša hore re tla tiisetsa peisong ena ho fihlela re hapa moputso, ho sa tsotellehe hore na re tobana le litšitiso tsa mofuta ofe.
9, 10. (a) Ke hobane’ng ha ba mamellang liteko ba thabile, ’me re lokela ho talima liteko joang? (b) Batho ba boholo-holo ba thabileng e ne e le bo-mang, ’me ke joang re ka akarelletsoang har’a bona?
9 Ka hona, ha ho makatse ha Jakobo a itse: “Ho lehlohonolo motho ea mamellang moleko; hobane etlare hobane a hlōle moleko, o tla neoa moqhaka oa bophelo, oo Morena a o baletseng ba mo ratang”! (Jakobo 1:12) Ka linako tsohle a re talimaneng le liteko ka katleho, re itlhomelletse ka litšoaneleho tsa bomolimo tse tla re matlafatsa bakeng sa ho li hlōla.—2 Petrose 1:5-8.
10 Hopola hore tsela eo Molimo o sebelisanang le rōna ka eona ha se tsela e ncha kapa e sa tloaelehang. Molimo o ile oa sebelisana le ‘leru la lipaki’ tsa boholo-holo tse tšepahalang ka tsela e tšoanang ha li ne li ipaka li tšepahala ho oona. (Ba-Heberu 12:1, NW) Ka Lentsoeng la Molimo ho tlalehiloe hore oa li amohela, ’me kaofela ha tsona re li nka li thabile hobane li ile tsa ema li tiile tlas’a teko. Jakobo o re: “Banab’eso, nkang mohlala oa mahlomola le oa sebete [“tiisetso,” NW] ho baprofeta ba buileng ka lebitso la Morena. Bonang, re rorisa lehlohonolo la ba mameletseng [“re re ho thabile ba mamelletseng,” NW]; le utloile mamello ea Jobo, ’me le bone tsa qetello ea Morena; hobane Morena o tletse mohau le lereko.” (Jakobo 5:10, 11) Ho ile ha boleloa esale pele hore mehleng ea qetello e mahlonoko, lefatšeng ho ne ho tla ba le batho ba sebeletsang Jehova ka botšepehi, joalokaha baprofeta bao ba entse makholong a lilemo a fetileng. Na ha re thabe hore ebe ke rōna ba etsang joalo?—Daniele 12:3; Tšenolo 7:9.
Ho Tšehetsoa ke Lentsoe la Jehova le Khothatsang
11. Lentsoe la Molimo le ka re thusa ho mamella joang, ’me ke hobane’ng ha re sa lokela ho tšoana le libaka tse tletseng majoe tsa setšoantšo sa Jesu?
11 Pauluse o ile a supa thuso e ’ngoe hape ea mamello ha a re “ka mamello e nang le tiisetso, le ka khothatso e fumanoang ka Mangolong, re ka ema re tiile tšepong ea rōna.” (Ba-Roma 15:4, The Twentieth Century New Testament) ’Nete, e leng Lentsoe la Molimo, e tlameha ho mela ka metso ka hare ho rōna e le hore e ka re susumelletsa ho arabela ka tsela e nepahetseng ka linako tsohle. Re ke ke ra rua molemo ho hang ha re tšoana le mobu o tletseng majoe o hlalositsoeng setšoantšong sa Jesu sa mojali: “Ba amohetseng peō majoeng; ke bao ereng ha ba utloile lentsoe, ba phakise ba le amohele ka thabo; ba mpa ba se na motso ka ho bona, e le ba motsotso o se okae feela; ’me ha tšoenyeho le hloriso li hlaha ka baka la lentsoe, ba phakise ba khopjoe.” (Mareka 4:16, 17) ’Nete e tsoang ka har’a Lentsoe la Molimo ha e mele ka metso ka har’a batho ba joalo; ka hona, linakong tsa matšoenyeho, ha le khone ho ba khothatsa joaloka mohloli oa matla le tšepo.
12. Ke eng se sa lokelang ho re thetsa ha re amohela litaba tse molemo?
12 Mang le mang ea amohelang litaba tse molemo tsa ’Muso ha aa lokela ho ithetsa ka se tlang ho latela. O nka tsela e tla etsa hore a be matšoenyehong kapa a hlorisoe. (2 Timothea 3:12, NW) Empa o lokela ho nka hore ke “thabo feela” ho ba le tokelo ea ho hlaheloa ke liteko tse sa tšoaneng ka baka la ho itšoarella ka tieo Lentsoeng la Molimo le ho bua ka lona ho ba bang.—Jakobo 1:2, 3.
13. Pauluse o ile a thabela Bakreste ba leng Thessalonika joang hona hobane’ng?
13 Lekholong la pele la lilemo, bahanyetsi Thessalonika ba ile ba etsa morusu ka baka la boboleli ba Pauluse. Ha Pauluse a ea Berea, bahlorisi bana ba ile ba mo sala morao e le hore ba ka tsosa morusu o eketsehileng ha a fihla moo. Moapostola ea hlorisoang o ile a ngolla ba tšepahalang ba setseng Thessalonika, a re: “Re tšoanetse ho leboha Molimo ka mehla ka baka la lōna, banab’eso, kamoo ho lokelang kateng, ka baka la hobane tumelo ea lōna e ntse e hōla ka ho fetisa, le lerato la lōna bohle ho e mong le e mong le ntse le eketseha. Ke hona re ithorisang ka lōna likerekeng tsa Molimo, ka baka la sebete [“mamello,” NW] sa lōna le la tumelo ea lōna lihlorisong le matšoenyehong ao le a mamellang; ao e leng pontšo ea kahlolo e lokileng ea Molimo, le tle le etsoe ba lokelang ’muso oa Molimo, oo le utloisoang bohloko ka baka la oona.” (2 Ba-Thessalonika 1:3-5) Ho sa tsotellehe ho utloisoa bohloko ke sera, Bakreste ba Thessalonika ba ile ba hōla bothong bo kang ba Kreste ’me ba eketseha ka palo. Seo se ile sa tlisoa ke eng? Hobane ba ile ba fumana matla Lentsoeng la Jehova le khothatsang. Ba ile ba utloa litaelo tsa Morena ’me ba matha ka mamello peisong.—2 Ba-Thessalonika 2:13-17.
Molemong oa Polokeho ea ba Bang
14. (a) Ke ka mabaka afe re tiisetsang tšebeletsong ka thabo ho sa tsotellehe mathata? (b) Re rapella eng, hona hobane’ng?
14 Haholo-holo re mamella mathata le mahloriso ka botšepehi ebile re sa tletlebe molemong oa ho tlotlisoa ha Molimo. Empa ho boetse ho na le lebaka le leng le hlokang boithati leo ka lona re ikokobeletsang lintho tse joalo: molemong oa ho fetisetsa litaba tsa ’Muso ho ba bang e le hore ho ka ba le bahoeletsi ba eketsehileng ba ’Muso oa Molimo bakeng sa ho etsa “polelo ea phatlalatsa bakeng sa poloko.” (Ba-Roma 10:10, NW) Ba sebetsang tšebeletsong ea Molimo ba lokela ho rapela hore Morena oa kotulo a hlohonolofatse mosebetsi oa bona ka ho fana ka bahoeletsi ba eketsehileng ba ’Muso. (Mattheu 9:38) Pauluse o ile a ngolla Timothea: “Litaba tseo u li utloileng ho ’na pel’a lipaki tse ngata, u li bee ho batho ba tšepehang, ba lokelang ho ruta ba bang le bona. Ha e le uena, mamella bothata ka mokhoa oa mohlabani ea molemo oa Jesu Kreste.”—2 Timothea 2:2, 3.
15. Ke hobane’ng ha re lokela ho itšoara joaloka bahlabani le batho ba kenelang phehisano ea “lipapali”?
15 Mohlabani o ikarola bophelong ba bolokolohi ba batho feela bao e seng bahlabani. Ka ho tšoanang, ha rea tlameha ho tšoaseha litabeng tsa batho ba seng lebothong la Morena empa ha e le hantle ba le ka lehlakoreng la bahanyetsi. Ka hona, Pauluse o ile a tsoela pele ho ngolla Timothea: “Ha ho ea hlabanang ea ka itšitisang ka litaba tsa bophelo bona, haeba a rata ho khahlisa molaoli ea mo thotseng. Ea kenelang phehisano ea lipapali le eena a ke ke a fumana moqhaka oa tlhōlo, haeba a sa bapale ho ea ka melao ea teng.” (2 Timothea 2:4, 5, BPN) Ha limathi li loanela ho hlōla peisong ea “moqhaka oa bophelo,” li tlameha ho sebelisa boitšoaro ’me li qobe boima le ho tšoaseha linthong tse se nang thuso. Ka tsela ena li ka lebisa tlhokomelo ho tlisetseng ba bang litaba tse molemo tsa poloko.—Jakobo 1:12; bapisa le 1 Ba-Korinthe 9:24, 25.
16. Ke eng e ke keng ea tlangoa, ’me re mamella molemong oa mang?
16 Kaha re rata Molimo le batho ba kang linku ba batlang ho o fumana, ka thabo re mamella lintho tse ngata e le hore re ka finyella ba bang ka litaba tse molemo tsa poloko. Lira li ka ’na tsa re tlama ka baka la ho bolela ka Lentsoe la Molimo. Empa Lentsoe la Molimo lona le ke ke la tlangoa, ’me ho bua ka lona molemong oa polokeho ea ba bang ho ke ke ha tlangoa. Pauluse o ile a hlalosetsa Timothea lebaka leo ka lona a neng a ikemiselitse ho tobana le teko: “Hopola hobane Jesu Kreste, e leng oa leloko la Davida, o tsohile bafung, kamoo Evangeli ea ka e bolelang kateng; e leng Evangeli eo ke mamellang bothata bo boholo, ’me ke bile ke tlangoa ka baka la eona, joale ka hola ke le sehlola; empa lentsoe la Molimo lona ha lea tlangoa. Ke mamella tsohle ke hona ka baka la bakhethoa, hore le bona ba ke ba rue poloko e ho Jesu Kreste, le khanya e sa feleng.” (2 Timothea 2:8-10) Kajeno ha re hopole masala a fokolang feela a ba leng mocheng oa ho kena ’Musong oa leholimo empa hape re hopola bongata bo boholo ba linku tse ling tsa Molisa ea Molemo, Jesu Kreste, bongata bo boholo ba batho ba tlang ho rua lefatše la Paradeise tlas’a ’Muso oa Kreste.—Tšenolo 7:9-17.
17. Ke hobane’ng ha re sa lokela ho ngala peisong, ’me haeba re tsoela pele peisong ho fihlela qetellong phello e tla ba efe?
17 Hoja re ne re le mengala, re ne re ke ke ra ithusa ho fumana poloko kapa ho thusa motho leha e le ofe hore a e fumane. Ka ho mamella peisong ea Bokreste, ho sa tsotellehe litšitiso tseo re tobanang le tsona, re ipoloka re le mocheng oa ho fumana moputso ka mehla ’me re ka thusa ba bang ka ho toba hore le bona ba fumane poloko, ’me ka nako e tšoanang re behela ba bang mohlala o matla oa ho ba matla. Ho sa tsotellehe hore na tšepo ea rōna ke efe, ebang ke ea leholimo kapa ea lefatše, boikutlo ba Pauluse ba “ho hahamalla ho finyella pakane ea moputso” ke boikutlo bo botle boo re lokelang ho bo etsisa.—Ba-Filippi 3:14, 15, NW.
Ho Tsoela Pele ka Tieo Peisong
18. Ho hapa moputso ho itšetlehile ka eng, empa re tlameha ho qoba eng e le hore re ka tiisetsa ho fihlela qetellong?
18 Ho phetha tsela ea rōna ea Bokreste ka tlhōlo e tlotlisang Jehova le ho hapa moputso oo a re boloketseng oona ho itšetlehile ka hore re tsoele pele re tiile ho fihlela peiso e fela. Ka hona, re ke ke ra tiisetsa ho fihlela qetellong haeba re ikimetsa ka lintho tse sa sebeletseng ho loka. Esita leha re lahlile lintho tse joalo, lintho tse hlokahalang li ntse li hloka hore re ikitlaetse ka hohle kamoo re ka khonang. Ka hona, Pauluse oa eletsa: “A re lahleng boima bohle le sebe se re tšoasang habonolo, ’me a re matheng ka mamello peisong e behiloeng ka pel’a rōna.” (Ba-Heberu 12:1, NW) Joaloka Jesu ha rea lokela ho hōlisa haholo lintho tse utloisang bohloko tseo re lokelang ho li mamella empa re lokela ho li nka e le tefello e nyenyane eo re lokelang ho e lefa bakeng sa moputso o thabisang.—Bapisa le Ba-Roma 8:18.
19. (a) Ke kholiseho efe eo Pauluse a ileng a ba le eona ho ea qetellong ea bophelo ba hae? (b) Ha re ntse re atamela moo peiso ea mamello e fellang teng, re lokela ho ba le kholiseho efe ka moputso oo re o tšepisitsoeng?
19 Ho ea qetellong ea bophelo ba hae, Pauluse o ile a khona ho re: “Ke loanne ntoa e molemo, ke titimile ka qeta sebaka, ke bolokile tumelo. Ho setseng e se e le ho amohela moqhaka oa ho loka oo ke o behetsoeng.” (2 Timothea 4:7, 8) Re peisong ena ea mamello e le hore re ka fumana moputso oa bophelo bo sa feleng. Haeba mamello ea rōna e fela hobane feela ho bonahala eka peiso e telele ho feta kamoo re neng re lebelletse ka teng ha re qala, re tla hlōleha ha re se re atametse ho fumana moputso o tšepisitsoeng. U lokela ho kholiseha. Ha ho na pelaelo hore moputso oona o teng.
20. Boikemisetso ba rōna e lokela ho ba bofe ho fihlela re fihla moo peiso e fellang teng?
20 Kahoo e se eka mahlo a rōna a ke ke a khathala ho letela ho qalisa ha mahlomola a maholo, a tlang ho felisa Babylona e Moholo pele a ntano felisa mokhatlo o hlophisitsoeng oa Diabolose ka kakaretso. (2 Petrose 3:11, 12) Ka baka la lipontšo tsohle tse kholisang tse re potolohileng, e se eka re ka talima pele ka tumelo. E se eka re ka tiea matla ’me re mamelle, ’me e se eka ka sebete re ka tsoela pele peisong eo Jehova Molimo a e behileng ka pel’a rōna, ho fihlela qetellong ’me re fumane moputso o thabisang, tlotlisong ea Jehova ka Jesu Kreste.
U ne U Tla Arabela Joang?
◻ Mokreste o tlameha ho itokisetsa peiso ea mofuta ofe?
◻ Ke hobane’ng ha thabo e le ea bohlokoa ha re matha peisong?
◻ Ke ka mabaka afe a maholo re tiisetsang tšebeletsong ho sa tsotellehe mathata?
◻ Ke hobane’ng ha re sa lokela ho ngala peisong eo Molimo o e behileng ka pel’a rōna?
[Setšoantšo se leqepheng la 15]
Bakreste ba tlameha ho mamella joalokaha eka ba peisong ea mokoka
[Setšoantšo se leqepheng la 17]
Limathi li tlameha ho sebelisa boitšoaro ha li hahamalla “moqhaka oa bophelo”