Ho Fumana Matlotlo a ‘Patiloeng ka Hloko ho Eena’
“Ho eena ho patiloe ka hloko matlotlo ’ohle a bohlale le a tsebo.”—BAKOL. 2:3.
1, 2. (a) Ke lintho life tse ileng tsa fumanoa ka 1922, hona li ile tsa qetella li le hokae? (b) Lentsoe la Molimo le khothalletsa motho e mong le e mong hore a etse’ng?
HANGATA ha ho fumanoe matlotlo a patiloeng, sena e ba ntho e ka sehloohong litabeng. Ka mohlala, ka 1922, ka mor’a ho sehla ka thata ka lilemo tse mashome tlas’a maemo a boima, moepolli oa lintho tsa khale oa Brithani ea bitsoang Howard Carter, o ile a fumana ntho e tsotehang. O ile a fumana lebitla la marena la Faro Tutankhamen, le neng le batla le sa senyeha ’me le ne le e-na le lintho tse ka bang 5 000.
2 Le hoja lintho tseo Carter a ileng a li fumana li ne li tsoteha hakaalo, boholo ba tsona li ile tsa qetella li bolokiloe limusiamong kapa batho ba ipoloketse tsona. Ho ka etsahala hore ebe ke tsa bohlokoa historing kapa litabeng tsa bonono, empa hase tsa bohlokoa kapa ha li re ame bophelong ba rōna ba letsatsi le letsatsi. Leha ho le joalo, Lentsoe la Molimo le re khothalletsa hore re batle matlotlo a re amang e le kannete. Molimo o mema motho e mong le e mong ho etsa joalo, ’me moputso oa teng ke oa bohlokoa ho feta matlotlo afe kapa afe.—Bala Liproverbia 2:1-6.
3. Matlotlo ao Jehova a khothalletsang barapeli ba hae hore ba a batle a molemo ka litsela life?
3 Nahana ka bohlokoa ba matlotlo ao Jehova a khothalletsang barapeli ba hae hore ba a batle. Le leng la matlotlo ao ke “ho tšaba Jehova,” ho ka re sireletsang linakong tsena tse mahlonoko. (Pes. 19:9) Ho fumana “tsebo ea Molimo” ho ka etsa hore motho a be le tlotla e khōlō ka ho fetisisa eo motho a ka bang le eona, ea ho ba le kamano le Ea Phahameng ka ho Fetisisa. Kahoo, ha re e-na le matlotlo a bohlale, tsebo le temoho, e leng lintho tseo Molimo a fanang ka tsona, re tla tseba ho hlōla mathata le matšoenyeho ao re bang le ’ona bophelong, letsatsi le letsatsi. (Liprov. 9:10, 11) Ebe re ka fumana matlotlo ao a bohlokoa joang?
Ho Fumana Matlotlo a Moea
4. Re ka fumana matlotlo ao Molimo a a tšepisang joang?
4 Ho fapana le baepolli ba lintho tsa khale le babatlisisi ba bang bao hangata ba lokelang ho batla matlotlo hohle, rōna re tseba hantle hore na matlotlo a moea a ka fumanoa hokae. Joaloka ’mapa oa matlotlo o bontšang moo matlotlo a leng hona teng, Lentsoe la Molimo le re bontša sebaka se nepahetseng seo ho sona re ka fumanang matlotlo ao Molimo a a tšepisitseng. Ha a bua ka Kreste, moapostola Pauluse o ile a ngola a re: “Ho eena ho patiloe ka hloko matlotlo ’ohle a bohlale le a tsebo.” (Bakol. 2:3) Ha re bala mantsoe ao, re ka ’na ra ipotsa: ‘Ke hobane’ng ha re lokela ho batla matlotlo ao? A “patiloe” ho Kreste joang? Hona re a fumana joang?’ E le hore re fumane likarabo, a re ke re hlahlobeng mantsoe ao a moapostola Pauluse ka hloko.
5. Ke hobane’ng ha Pauluse a ile a ngola ka matlotlo a moea?
5 Mantsoe ao, Pauluse o ile a a ngolla Bakreste-’moho le eena ba Kolose. O ile a ba bolella hore o ne a ba loanela e le hore ‘lipelo tsa bona li ka tšeliseha, le hore ba ka kopanngoa hammoho ka tumellano leratong.’ (Bala Bakolose 2:1, 2.) Ke hobane’ng ha a ne a khathatsehile hakaalo? Ho hlakile hore Pauluse o ne a hlokomela hore mohlomong barab’abo ba moo, ba ne ba susumelitsoe ke ba bang har’a bona ba neng ba buella lifilosofi tsa Bagerike kapa ba khothalletsa hore ho boele ho bolokoe Molao oa Moshe. O ile a lemosa barab’abo ka matla a re: “Hlokomelang: mohlomong ho ka ba le e mong ea tla le nka joaloka phofu ea hae ka filosofi le thetso ea lefeela ho ea ka neano ea batho, ho ea ka lintho tsa motheo tsa lefatše eseng ho ea ka Kreste.”—Bakol. 2:8.
6. Ke hobane’ng ha re lokela ho thahasella keletso ea Pauluse?
6 Kajeno, re tobane le tšusumetso e tšoanang e tsoang ho Satane le tsamaiso ea hae e khopo. Lifilosofi tsa lefatše tse akarelletsang khopolo ea ho iphetola ha lintho le ea hore batho ba ka thaba ntle ho bolumeli, li susumetsa tsela eo batho ba nahanang ka eona, eo ba itšoarang ka eona, eo ba phelang ka eona le merero ea bona. Bolumeli ba bohata bo phetha karolo e khōlō meketeng e mengata e tloaelehileng ea matsatsi a phomolo. Bahlahisi ba mefuta e sa tšoaneng ea boithabiso ba e etsetsa ho khotsofatsa litakatso tsa boetsalibe, ’me lintho tse ngata tse hlahang Inthaneteng li kotsi ho bana le batho ba baholo ka tsela e tšoanang. Ho lula re shebeletse ’me re mametse lintho tsena le mekhoa e meng ea lefatše, habonolo feela ho ka ama tsela eo re ikutloang ka eona le eo re shebang litaba ka eona le eo re nkang tataiso eo Jehova a fanang ka eona, ’me ha etsa hore re khoehlise tabeng ea ho tšoara ka tieo bophelo ba sebele. (Bala 1 Timothea 6:17-19.) Ho hlakile hore re lokela ho utloisisa mantsoe ao Pauluse a ileng a a ngolla Bakolose ’me re nke keletso ea hae ka ho teba e le hore re tle re se ke ra oela marabeng a Satane.
7. Pauluse o ile a re ke lintho life tse peli tse neng li tla thusa Bakolose?
7 Ha re khutlela mantsoeng ao Pauluse a neng a a ngoletse Bakolose, rea hlokomela hore ka mor’a hore a bolele seo a neng a khathatsehile ka sona, o ile bolela lintho tse peli tse neng li tla ba thusa hore ba khothale le hore ba kopanngoe ke lerato. Pele, o ile a bua ka “kholiseho e feletseng ea kutloisiso ea bona.” Ba ne ba lokela ho kholiseha ka ho feletseng hore ba utloisisa Mangolo ka nepo, e le hore tumelo ea bona e ne e ka thehoa motheong o tiileng. (Baheb. 11:1) Ka mor’a moo, o ile a bua ka “tsebo e nepahetseng ea sephiri se halalelang sa Molimo.” Ho ne ho hlokahala hore ba se ke ba tseba feela linnete tsa motheo, empa ba ne ba lokela hore ba be le kutloisiso e hlakileng ea lintho tse tebileng tsa Molimo. (Baheb. 5:13, 14) Ruri ena e ne e le keletso e matla ho Bakolose le ho rōna kajeno! Leha ho le joalo, re ka fumana kholiseho e joalo le tsebo e nepahetseng joang? Pauluse o bontšitse hore na sena se ka etsoa joang mantsoeng a hae a bohlokoa ha a ne a bua ka Jesu Kreste a re: “Ho eena ho patiloe ka hloko matlotlo ’ohle a bohlale le a tsebo.”
Matlotlo a ‘Patiloeng’ ho Kreste
8. Hlalosa hore na poleloana e reng ‘a patiloe ho’ Kreste e bolela’ng.
8 Ho bolela hore matlotlo ’ohle a bohlale le a tsebo a “patiloe” ho Kreste, ha ho bolele hore a patiloe moo ho seng motho ea ka a fumanang. Ho e-na le hoo, ho bolela feela hore e le hore re fumane matlotlo ao, re lokela ho ikitlaetsa, re be re ele Jesu Kreste hloko. Sena se lumellana le seo Jesu a ileng a itlhalosa hore o sona ha a ne a re: “Ke ’na tsela le ’nete le bophelo. Ha ho ea tlang ho Ntate haese ka ’na.” (Joh. 14:6) Ka sebele, e le hore re tsebe Molimo, re hloka thuso le tataiso ea Jesu.
9. Jesu o filoe mesebetsi efe?
9 Ho phaella tabeng ea hore ke “tsela,” Jesu o ile a bolela hore ke “’nete le bophelo.” Sena se bolela hore mosebetsi oo a o etsang o moholo, hase feela hore ke tsela eo re atamelang Ntate ka eona. Jesu o boetse o etsa mesebetsi ea bohlokoa e re thusang ho utloisisa ’nete ea Bibele le ho fumana bophelo bo sa feleng. Ka sebele, ho Jesu ho patiloe matlotlo a moea a bohlokoa bo ke keng ba lekanngoa, a emetseng hore liithuti tsa Bibele tse hlokolosi li a fumane. A re ke re hlahlobeng matlotlo a mang a hlileng a amanang le tšepo eo re nang le eona ka bokamoso le kamano ea rōna le Molimo.
10. Bakolose 1:19 le 2:9 e re ruta’ng ka Jesu?
10 “Ke ho eena botlalo bohle ba tšobotsi ea bomolimo bo lulang ka ’mele.” (Bakol. 1:19; 2:9) Kaha Jesu o ne a bile le Ntate oa hae ea leholimong ka nako e telele haholo, o tseba thato ea hae le hore na ke Molimo oa mofuta ofe, ho feta mang kapa mang. Nakong eohle ea bophelo ba hae lefatšeng, Jesu o ile a ruta batho ba bang seo Ntate oa hae a neng a mo rutile sona ’me liketso tsa hae li ne li bontša makhabane ao Ntate oa hae a neng a mo rutile hore a be le ’ona. Ke ka lebaka leo Jesu a neng a ka re: “Ea mponeng o bone le Ntate.” (Joh. 14:9) Bohlale bohle le tsebo eohle ea Molimo e patiloe, kapa e lutse ho Kreste, ’me ha ho tsela e ’ngoe e molemo eo re ka ithutang ka Jehova ka eona ntle le hore re ithute ka hloko sohle seo re ka khonang ho ithuta sona ka Jesu.
11. Jesu o amana joang le boprofeta ba Bibele?
11 “Ho paka Jesu ke hona ho bululelang ho profeta.” (Tšen. 19:10) Mantsoe ana a bontša hore Jesu o phetha karolo ea bohlokoa phethahatsong ea boprofeta bo bongata ba Bibele. Ho tloha ka polelo ea pele ea Jehova ea boprofeta e tlalehiloeng ho Genese 3:15, ho fihlela liponong tse hlollang tsa buka ea Tšenolo, boprofeta ba Bibele bo ka utloisisoa ka tsela e nepahetseng hafeela re ela hloko hore na karolo ea Jesu ke efe mabapi le ’Muso oa Bomesia. Sena sea bontša hore na ke hobane’ng ha boprofeta bo bongata bo ka Mangolong a Seheberu bo makatsa batho ba sa amoheleng hore Jesu ke Mesia ea tšepisitsoeng. Seo se boetse se bontša hore na ke hobane’ng ha batho ba sa ananeleng Mangolo a Seheberu, a nang le boprofeta bo bongata bo buang ka Mesia, ba nka hore Jesu e mpa e le motho e moholo feela. Ho tseba Jesu ho thusa batho ba Molimo hore ba utloisise boprofeta ba Bibele boo e leng hona bo tla phethahala.—2 Bakor. 1:20.
12, 13. (a) Jesu ke “leseli la lefatše” joang? (b) Kaha ba lokolotsoe lefifing la bolumeli, balateli ba Kreste ba tlameha ho etsa’ng?
12 “Ke ’na leseli la lefatše.” (Bala Johanne 8:12; 9:5.) Nako e telele pele Jesu a hlaha mona lefatšeng, moprofeta Esaia o ile a bolela esale pele a re: “Batho ba neng ba tsamaea lefifing ba bone leseli le leholo. Ha e le ba lulang naheng ea moriti o lefifi, ba chabetsoe ke leseli.” (Esa. 9:2) Moapostola Matheu o ile a hlalosa hore Jesu o ile a phethahatsa boprofeta boo ha a ne A qala ho bolela a re: “Bakang, kaha ’muso oa maholimo o atametse.” (Mat. 4:16, 17) Mosebetsi oa Jesu oa boboleli o ile oa fa batho leseli la moea oa ba oa ba lokolla bokhobeng ba lithuto tsa bolumeli ba bohata. Jesu o ile a re: “Ke tlile joaloka leseli lefatšeng, e le hore e mong le e mong ea behang tumelo ho ’na a se ke a lula lefifing.”—Joh. 1:3-5; 12:46.
13 Lilemo tse ngata hamorao, moapostola Pauluse o ile bolella Bakreste-’moho le eena a re: “Le kile la ba lefifi, empa joale le leseli mabapi le Morena. Tsoelang pele ho tsamaea joaloka bana ba leseli.” (Baef. 5:8) Kaha Bakreste ba lokolotsoe bokhobeng ba lefifi la bolumeli, ba tlameha ho tsamaea joaloka bana ba leseli. Sena se tsamaisana le seo Jesu a ileng a se bolella balateli ba hae Thutong ea Thabeng: “Leseli la lōna le ke le khanye ka pel’a batho, e le hore ba ka bona mesebetsi ea lōna e metle ’me ba tlotlisa Ntat’a lōna ea maholimong.” (Mat. 5:16) Na u ananela matlotlo a moea ao u a fumaneng ho Jesu hoo u ka a buellang ho batho ba bang ka lipolelo le ka boitšoaro ba hao bo botle ba Bokreste?
14, 15. (a) Linku le liphoofolo tse ling li ne li sebelisoa joang borapeling ba ’nete mehleng ea ha ho ne ho ngoloa Bibele? (b) Ke hobane’ng ha Jesu e le letlotlo le ke keng la bapisoa karolong eo a e phethang e le “Konyana ea Molimo”?
14 Jesu ke “Konyana ea Molimo.” (Joh. 1:29, 36) Ka hare ho Bibele, ho boleloa hore linku li ne li sebelisetsoa hore batho ba tšoareloe libe ba be ba bue le Molimo. Ka mohlala, ha Abrahama a se a bontšitse hore o ne a ikemiselitse ho nyehela Isaka, o ile a bolelloa hore a se ke a ntša Isaka kotsi ’me a fuoa pheleu hore a nyehele eona. (Gen. 22:12, 13) Ha Baiseraele ba ne ba lopolloa Egepeta, ba ile ba boela ba sebelisa linku ’me lekhetlong lena ba ile ba li sebelisa e le karolo ea “paseka ea Jehova.” (Ex. 12:1-13) Ho feta moo, Molao oa Moshe o ne o entse tokisetso ea hore ho nyeheloe liphoofolo tsa mefuta-futa, tse neng li akarelletsa linku le lipōli.—Ex. 29:38-42; Lev. 5:6, 7.
15 Lihlabelo tseo, esita le lihlabelo life kapa life tse neng li etsoa ke batho, li ne li ke ke tsa lokolla batho sebeng le lefung ka ho sa feleng. (Baheb. 10:1-4) Empa Jesu eena ke “Konyana ea Molimo e tlosang sebe sa lefatše.” Sena se etsa hore Jesu e be motho oa bohlokoa ho feta matlotlo ’ohle a kileng a fumanoa. Ka lebaka leo, re lokela ho ipha nako ea hore ka hloko, re ithute ka thekollo re be re bontše tumelo tokisetsong eo e babatsehang. Ha re etsa joalo, re ba le tšepo ea ho hlohonolofatsoa le ho fumana moputso—e leng khanya le tlotla ea ho ba le Kreste leholimong haeba re le ba “mohlatsoana” kapa bophelo bo sa feleng lefatšeng la Paradeise haeba re le ba “linku tse ling.”—Luka 12:32; Joh. 6:40, 47; 10:16.
16, 17. Ke hobane’ng ha e le habohlokoa hore re utloisise karolo e phethoang ke Jesu e le “Moemeli ea ka Sehloohong le Mophethahatsi oa tumelo ea rōna”?
16 Jesu ke “Moemeli ea ka Sehloohong le Mophethahatsi oa tumelo ea rōna.” (Bala Baheberu 12:1, 2.) Ho Baheberu khaolo ea 11, re fumana puo ea Pauluse e matla moo a tšohlang tumelo, ’me e akarelletsa le tlhaloso e tobileng ea tumelo le lethathamo la banna le basali ba ileng ba beha mohlala oa tumelo ba kang Noe, Abrahama, Sara le Rahaba. A nahanne ka sena sohle, Pauluse o ile a khothalletsa Bakreste-’moho le eena hore ba ‘talime ka hloko Moemeli ea ka Sehloohong le Mophethahatsi oa tumelo ea rōna, Jesu.’ Hobane’ng?
17 Le hoja banna le basali bao ba tšepahalang ba tumelo ba thathamisitsoeng ho Baheberu khaolo ea 11, ba ne ba e-na le tumelo e matla litšepisong tsa Molimo, ba ne ba sa tsebe lintlha tsohle tsa kamoo Molimo a neng a tla phethahatsa tšepiso ea hae a sebelisa Mesia le ’Muso. Ka tsela eo, ho ka boleloa hore tumelo ea bona e ne e sa fella. Ha e le hantle, esita le ba ileng ba sebelisoa ke Jehova hore ba ngole boprofeta bo bongata bo buang ka Mesia, ba ne ba sa utloisise ka botlalo bohlokoa ba seo ba neng ba se ngola. (1 Pet. 1:10-12) Ke ka Jesu feela tumelo e ka etsoang hore e be e phethahetseng kapa e feletseng. Ke habohlokoa haholo hore re utloisise ka ho hlaka re be re hlokomele karolo ea Jesu e le “Moemeli ea ka Sehloohong le Mophethahatsi oa tumelo ea rōna”!
Le ’ne le Batle
18, 19. (a) Bolela matlotlo a mang a moea a patiloeng ho Kreste. (b) Ke hobane’ng ha re lokela ho tsoela pele ho batla matlotlo a moea ho Jesu?
18 Re sa tsoa tšohla likarolo tse seng kae tsa bohlokoa tseo Jesu a li phethang morerong oa Molimo oa ho pholosa batho. Ho sa ntse ho e-na le matlotlo a mang a moea a patiloeng ho Kreste. Ha re a fumana, re tla thaba re be re rue molemo. Ka mohlala, moapostola Petrose o ile a re Jesu ke “Moemeli ea ka Sehloohong oa bophelo” le “naleli ea meso” e hlahang. (Lik. 3:15; 5:31; 2 Pet. 1:19) ’Me Bibele e sebelisa lentsoe “Amen” ho Jesu. (Tšen. 3:14) Na u tseba se boleloang ke likarolo tsee le hore na ke tsa bohlokoa hakae? Joalokaha Jesu a boletse, “le ’ne le batle, ’me le tla fumana.”—Mat. 7:7.
19 Historing eohle, ha ho na motho eo bophelo ba hae e bileng bo nang le morero le bo amanang haholo le boiketlo ba rōna ba ka ho sa feleng joaloka ba Jesu. Ho eena ho na le matlotlo a moea ao mang kapa mang ea a batlang ka pelo eohle, a ka a fumanang habonolo. E se eka u ka thabela ho fumana katleho hammoho le matlotlo a ‘patiloeng ho eena ka hloko.’
Na U sa Hopola?
• Bakreste ba khothalletsoa hore ba batle matlotlo a mofuta ofe?
• Ke hobane’ng ha keletso eo Pauluse a ileng a e fa Bakolose e ntse e re loketse kajeno?
• Bolela matlotlo a mang a moea a ‘patiloeng ho’ Kreste u be u a hlalose.
[Litšoantšo tse leqepheng la 5]
Bibele e tšoana le ’mapa oa matlotlo o re isang matlotlong a ‘patiloeng ka hloko ho’ Kreste