Taeo E Ka Hlahisang Litholoana tsa Khotso

“Hona joale ha ho bonahale ho e-na le taeo e thabisang, empa e utloisa bohloko; empa hamorao ho ba koetlisitsoeng ka eona e hlahisa litholoana tsa khotso, e leng, ho loka.”—BA-HEBERU 12:11, NW.

1, 2. (a) Ho latela Ba-Heberu 12:9-11, NW, ke eng seo ka lerato Molimo o fanang ka sona? (b) Mohlala o mong oa taeo ke ofe, ’me liphello tsa oona e ka ba life?

NAHANA ka matsatsi a ha u sa le ngoana. Na u sa hopola ha batsoali ba hao ba u laea? Boholo ba rōna re ka hopola. Moapostola Pauluse o sebelisitse seo e le mohlala ha a bua ka taeo e tsoang ho Molimo, joalokaha re bala ho Ba-Heberu 12:9-11.

² Taeo ea bontate ea Molimo, e ka amang bophelo ba rōna ba moea, e ka tla ka mekhoa e mengata. Tokisetso e ’ngoe ea hae ke ho leleka phuthehong ea Bokreste motho ea seng a sa batle ho phelela litekanyetso tsa Molimo kapa ea li hanang. Motho ea filoeng khalemelo e matla joalo kapa taeo a ka ’na a baka ’me a sokoloha. Khabareng, phutheho ea ba tšepahalang le eona e-ea lauoa kahobane e ithuta bohlokoa ba ho khomarela litekanyetso tsa Molimo tse phahameng.—1 Timothea 1:20.

 3. Ba bang ba itšoara joang ka khopolo ea ho khaola?

³ Motho a ka ’na a botsa, ‘empa na ha se ntho e sehlōhō ho leleka motho ebe joale le hana ho buisana le motho ea lelekiloeng?’ Pono e joalo e ile ea hlaha nyeoeng ea lekhotla e neng e ama mosali ea hōlisitsoeng ke batsoali bao e neng e le Lipaki tsa Jehova. Batsoali ba hae ba ne ba ile ba khaoloa. Eena ha aa ka a khaoloa, empa o ile a ikarola ka boomo ka ho ngola lengolo la ho ikhula phuthehong. Tumellanong le hoo, phutheho e ile ea tsebisoa feela hore ha e sa le e mong oa Lipaki tsa Jehova. O ile a fallela sebakeng se seng, empa lilemo hamorao a khutla ’me a fumana hore Lipaki tsa sebaka seo li ne li hana ho buisana le eena. Eaba o isa taba ka lekhotleng. Phello e ile ea e-ba efe, ’me sena se ka ’na sa u ama joang? E le hore re ka utloisisa taba ka ho nepahetseng, a re boneng seo Bibele e se bolelang ka sehlooho sa ho khaola.

Ho Nkoa Boemo Bo Tiileng Hakaale Hobane’ng?

 4. Ka linako tse ling ho etsahala joang ka ba bang phuthehong? (Ba-Galata 6:1; Juda 23)

⁴ Bakreste ba bangata ba ’nete ka botšepehi ba tšehetsa Molimo le melao ea oona e lokileng. (1 Ba-Thessalonika 1:2-7; Ba-Heberu 6:10) Leha ho le joalo, ka linako tse ling motho e mong o kheloha tsela ea ’nete. Ka mohlala, ho sa tsotellehe thuso e tsoang ho baholo ba Bakreste, a ka ’na a tlōla melao ea Molimo a sa bake. Kapa a ka ’na a latola tumelo ka ho ruta lithuto tsa bohata kapa ka ho ikarola phuthehong. Joale ke eng se lokelang ho etsoa? Lintho tse joalo li ile tsa etsahala le ha baapostola ba sa ntsane ba phela; kahoo, a re boneng seo ba se ngotseng ka sena.

5, 6. (a) Re na le keletso efe e bohlale mabapi le ho sebetsana le ba etsang libe tse tebileng ’me ba sa bontše pako? (Mattheu 18:17) (b) Ke lipotso life tseo re talimaneng le tsona?

⁵ Ha motho e mong a ne a le boitšoaro bo bobe a bile a sa bake Korinthe, Pauluse o ile a bolella phutheho hore: “Le se ke la kopana le ea ipitsang moena, e leng mofebi, kapa ea lakatsang leruo, leha e le ea rapelang melimo, leha e le moetselletsi, kapa letahoa, kapa lesholu; ea joalo, le ho ja, le se n’o ja le eena.” (1 Ba-Korinthe 5:11-13) Ho ne ho tla etsahala ntho e tšoanang ka bakoenehi, joaloka Hymenea: “Suthisa motho ea hlahisang thuto e khelohileng, ha u se u kile ua mo tsosa ka la pele le ka la bobeli; u tle u tsebe hobane ea joalo, o se a senyehile, ’me o etsa sebe.” (Tite 3:10, 11; 1 Timothea 1:19, 20) Hape, ho nena ho joalo e ne e tla ba ho loketseng, bakeng sa leha e le ofe ea latolang phutheho: “Ba tsoile ho rōna, empa e ne e se ba rōna; hobane hoja e be e le ba rōna, ba ka be ba setse ho rōna; empa hoo ho hlahile hore ho tle ho bonahale hobane bohle hase ba rōna.”—1 Johanne 2:18, 19.

⁶ Re tšepa hore motho ea joalo o tla baka e le hore a ka amoheloa hape. (Liketso 3:19) Empa mothating oo, na Bakreste ba ka ba le botsoalle bo lekanyelitsoeng le eena, kapa ho hlokahala hore ba mo qobe ka ho feletseng? ’Me haeba ho joalo, lebaka ke lefe?

Ho Khaola ka ho Feletseng?

 7. Boitšoaro ba rōna bo tla fapana joang mabapi le lihlopha tse peli tsa baetsalibe?

⁷ Bakreste ha ba ikhethe ho batho ba bang. Re kopana ka ho tloaelehileng le baahisani ba rōna, basebetsi-’moho, bao re kenang sekolo le bona, le ba bang, le ho ba pakela esita le haeba ba bang e le ‘bafebi, ba lakatsang leruo, masholu, kapa ba rapelang litšoantšo.’ Pauluse o ngotse hore re ke ke ra ba qoba ka ho feletseng, ‘ho seng joalo, re ne re tla tlameha ho tsoa lefatšeng.’ Leha ho le joalo, o bontšitse hore e ne e tla ba taba e fapaneng ka “moena” ea neng a phela joalo: “Le se ke la kopana le ea ipitsang moena [ea khutletseng litseleng tse joalo], ea joalo, le ho ja, le se n’o ja le eena.”—1 Ba-Korinthe 5:9-11; Mareka 2:13-17.

 8. Ke keletso efe eo moapostola Johanne a faneng ka eona mabapi le ho qoba ba joalo?

⁸ Mangolong a moapostola Johanne, re fumana keletso e tšoanang e hatellang kamoo Bakreste ba lokelang ho qoba batho ba joalo ka ho feletseng: “Mang le mang ea khelohang, ea sa tiisetseng thutong ea Kreste, ha a na Molimo . . . Ha e mong a e-tla ho lōna, ’me a sa tlise thuto eo, le se ke la mo amohela matlung a lōna, ’me le se ke la mo lumelisa! Hobane ea mo lumelisang [khaiʹro, ka Segerike] o kopana le eena ketsong tsa hae tse mpe.”a—2 Johanne 9-11.

9, 10. (a) Ho ne ho etsahala joang ka bafosi ba sa bakeng Iseraeleng, hona hobane’ng? (b) Re lokela ho ikutloa joang ka tokisetso ea mehleng ena ea ho leleka batho ba sa bakeleng sebe sa bona tšoanang kajeno? (2 Petrose 2:20-22)

⁹ Ke hobane’ng ha boemo bo tiileng joalo bo loketse le kajeno? Koana, nahana ka ho khaola ho bohloko ho neng ho laetsoe Molaong oa Molimo ho Iseraele. Litabeng tse fapanenng tse tebileng, bafosi ba ka boomo ba ne ba ahlōleloa lefu. (Levitike 20:10; Numere 15:30, 31) Ha seo se ne se etsahala, ba bang, esita le beng ka motho eo, ba ne ba ke ke ba hlola ba buisana le motlōli oa molao ea shoeleng. (Levitike 19:1-4; Deuteronoma 13:1-5; 17:1-7) Le hoja Baiseraele ba tšepahalang morao koo e ne e le batho ba tloaelehileng ba nang le maikutlo a tšoanang le a rōna, ba ne ba tseba hore Molimo o lokile ebile o lerato le hore Molao oa oona o ne o sireletsa bohloeki ba bona boitšoarong le moeeng. Kahoo ba ne ba lumela hore tokisetso ea oona ea ho khaola bafosi ha e le hantle e ne e le molemo e bile e le ntho e nepahetseng.—Jobo 34:10-12.

¹⁰ Le rōna re ka kholiseha ka ho tšoanang hore tokisetso ea Molimo ea hore Bakreste ba se ke ba e-ba le botsoalle le motho ea lelekiloeng ka baka la sebe seo a sa se bakeleng ke tšireletso e bohlale bakeng sa rōna. “A le ke le tlose ho lōna litomoso tsa khale, le tle le be hlama e ncha, ha e le moo le le ba sa lomosoang.” (1 Ba-Korinthe 5:7) Ka hore hape ba qobe batho ba ikarotseng ka boomo, Bakreste ba sirelelitsoe maikutlong a nyatsa-nyatsang, a hlokang kananelo, kapa esita le a bokoenehi.—Ba-Heberu 12:15, 16.

Ho Thoe’ng ka Beng ka Motho?

11, 12. (a) Phello e ne e e-ba efe ho beng ka motho oa Moiseraele ha mofosi a ne a khaoloa? (b) Bontša melemo ea kutlo.

¹¹ Ka sebele Molimo oa tseba hore ho phethahatsa melao ea oona e lokileng ka ho khaola bafosi hangata ho kopanyelletsa beng ka motho kapa hoa ba ama. Joalokaha ho boletsoe kaholimo, ha mofosi oa Moiseraele a ahlōleloa lefu, kopano ea lelapa e ne e fela. Ha e le hantle, haeba mora e ne e le letahoa a bile a le meharo, batsoali ba hae ba ne ba lokela ho mo tlisa pel’a baahlōli, ’me haeba a ne a sa bake, batsoali ba ne ba lokela ho kopanela polaong ea hae e neng e tla be e etsoa ka tōka, ‘ho tlosa bobe har’a Baiseraele.’ (Deuteronoma 21:18-21) U ka utloisisa hore ketso ena e ne e ke ke ea e-ba bonolo ho bona. Hape, nahana kamoo baena ba mofosi, likhaitselie, kapa ntat’ae-moholo le nkhono’ae ba neng ba ikutloa kateng. Empa ho bea ha bona ho tšepahala ho Molimo oa bona o lokileng kapele ho kamano ea lelapa ho ne ho ka boloka bophelo ba bona.

¹² Hopola taba ea Kore, eo e neng e le moetapele oa borabele khahlanong le boetapele ba Molimo ka Moshe. Tōkeng ea hae e phethahetseng, Jehova o ile a bona hore Kore o ne a tlameha ho shoa. Empa bohle ba tšepahalang ba ile ba lemosoa: “Tlohang pel’a litente tsa banna bao ba babe, ’me le se ke la ama letho la bona, e se re la timeletsoa ka baka la libe tsohle tsa bona.” Beng ka bona ba sa kang ba amohela temoso ea Molimo ba ile ba bolaoa le marabele ao. Empa beng ka Kore ba bang ka bohlale ba ile ba khetha ho tšepahala ho Jehova, e leng ho ileng ha pholosa bophelo ba bona ’me ha lebisa mahlohonolong a nako e tlang.—Numere 16:16-33; 26:9-11; 2 Likronike 20:19.

13. Bakreste ba tšepahalang ba tla itšoara joang ha setho se haufi sa lelapa se khaoloa kapa se ikarola?

¹³ Ho khaoloa phuthehong ea Bokreste ha ho kopanyelletse lefu la hona hoo, ka baka leo litlamo tsa lelapa li tsoela pele li ntse li le teng. Kahoo, monna ea khaotsoeng kapa ea ikarolang a ka ’na a tsoela pele ho lula lapeng le mosali oa hae oa Mokreste le bana ba tšepahalang. Ho hlompha likahlōlo tsa Molimo le bohato ba phutheho ho ne ho tla susumelletsa mosali le bana ho hlokomela hore ka tsela eo monna eo a e nkileng, o felisitse kamano ea moea e neng e le teng mahareng a bona. Empa kaha ho khaoloa ha hae ha hoa ka ha felisa litlamo tsa bona tsa mali le tsa lenyalo, kameho e lerato le litšebelisano tse tloaelehileng tsa lelapa li ka ’na tsa tsoela pele.

14. Ke keletso efe ea bomolimo e lokelang ho susumetsa kopano ea rōna le mong ka rōna ea khaotsoeng kapa ea ikarotseng ea sa luleng lapeng?

¹⁴ Boemo bo fapane haeba motho ea khaotsoeng kapa ea ikarotseng e le mong ka motho ea sa luleng lapeng. Ho ka etsahala hore u se be le kamano ho hang le mong ka uena eo. Esita le haeba ho ne ho e-na le litaba tsa lelapa tse batlang hore le kopane, ka sebele ho kopana hona ho ne ho tla khutsufatsoa, tumellanong le molao-motheo oa Molimo: “Khaotsang ho kopana le mang kapa mang ea bitsoang moena eo e leng sehlola kapa motho ea meharo [kapa ea leng molato oa sebe se seng se tebileng], . . . le ho ja le se je le motho ea joalo.”—1 Ba-Korinthe 5:11, NW.

15. Beng ka motho ba ka laola tšusumetso ea maikutlo joang maemong a joalo? (Pesaleme ea 15:1-5; Mareka 10:29, 30)

¹⁵ Ka ho utloahalang sena se ne se tla ba boima ka lebaka la maikutlo le litlamo tsa lelapa, joaloka lerato la ntate-moholo le nkhono ho litloholo tsa bona. Empa sena ke teko ea botšepehi bo nang le boitelo ho Molimo, joalokaha ho boletse khaitseli ea qotsitsoeng leqepheng la 26. E mong le e mong ea utloang masoabi le bohloko tse bakiloeng ke mong ka eena ea khaotsoeng a ka tšelisoa le ho khothatsoa ke mohlala oa beng ka Kore.—Pesaleme ea 84:10-12.b

Qeto ea Lekhotla

16-18. Ho ile ha fihleloa qeto efe nyeoeng ea lekhotla e boletsoeng pelenyana, ’me ke maikutlo afe a eketsehileng a fanoeng ke lekhotla?

¹⁶ Mohlomong u tla rata ho tseba liphello tsa nyeoe ea lekhotla mabapi le mosali ea neng a halefisitsoe ke hobane metsoalle ea hae ea pele e ne e se e sa ’muise hoba a khethe ho furalla tumelo, ho ikarola phuthehong.

¹⁷ Pele taba e isoa nyeoeng, lekhotla le kopaneng la setereke le ile la mo ahlōla ka bokhutšoanyane. Kahlōlo eo e ne e theiloe khopolong ea hore makhotla ha a kenelle litabeng tsa kereke tsa ho khalemela. O ile a etsa boipiletso. Kahlōlo e entsoeng ka tumellano ea lekhotla le kopaneng la maipiletsoc e ne e theiloe mabakeng a maholoanyane a litokelo tsa Molao oa Pele (oa Molao oa Motheo oa U.S.): “Kahobane mokhoa oa ho nena motho ke karolo ea tumelo ea Lipaki tsa Jehova, re fumana hore ‘tokoloho ea bolumeli’ e entsoeng ke Molao oa Motheo oa United States . . . e [mo] thibela hore a ka hlōla nyeoe. Baqosuoa ba na le tokelo e sirelelitsoeng ke Molao oa Motheo ea ho sebelisa mokhoa oa ho nena motho. Tumellanong le hoo, re tiisa” kahlōlo e entsoeng pele ea lekhotla la setereke.

¹⁸ Maikutlo a lekhotla a tsoela pele: “Ho nena motho ke mokhoa o sebelisoang ke Lipaki tsa Jehova ho latela tlhaloso ea tsona ea mangolo a halalelang, ’me rōna ha re na tokelo ea ho hlalosa mangolo ao hape . . . Baqosuoa ba na le tokelo ea ho sebelisa litumelo tsa bona tsa bolumeli ka bolokolohi . . . Hangata makhotla ha a hlahlobisise kamano mahareng a litho (kapa bao e neng e le litho pele) tsa kereke. Likereke li neiloe bolokolohi bo boholo ha li laea litho kapa bao e neng e le litho pele. Re lumellana le pono ea Moahlōli Jackson [eo nakong e fetileng e neng e le moahlōli ka Lekhotleng le Phahameng la U.S.] ea hore ‘mesebetsi ea [b]olumeli e amang feela litho tsa tumelo eo e tšoanela ho etsoa ka bolokolohi—e be e lokolohileng ka ho feletseng.’ . . . Litho tsa Kereke eo [a] ikhethetseng ho ikarola ho eona li fihletse qeto ea hore ha li sa batla ho ba le botsoalle le eena. Re lumela hore li lokolohile ho etsa khetho e joalo.”

19, 20. Ke hobane’ng ha motho ea khaotsoeng phuthehong a se boemong ba ho fumana matšeliso a chelete ka lekhotleng bakeng sa likotsi tseo a li ntšitsoeng?

¹⁹ Lekhotla la maipiletso le lumetse hore le hoja mosali eo a ne a utloa bohloko kahobane metsoalle ea hae ea pele e ne e khethile ho se buisane le eena, “ho mo lumella hore a fumane matšeliso maqebeng a kelello le a maikutlo ho ne ho tla thibela Lipaki tsa Jehova ho sebelisa tokoloho ea bolumeli ho latela Molao oa Motheo . . . Ho tiisa ha Molao oa Motheo tokoloho ea bolumeli ho hloka hore sechaba se mamelle mofuta oa bohloko oo [a] o utloileng e le moputso o loketseng ho lefshoa oa ho sireletsa tokelo ea ho se tšoane ka bolumeli eo baahi bohle ba e thabelang.” Ka kutloisiso e itseng, qeto ena e fumane tšehetso e khōloanyane ha e sa le e etsoa. Joang? Hamorao mosali eo o ile a ipiletsa ka lekhotleng le kaholimo-limo kahar’a naha hore le mamele nyeoe eo, mohlomong le be le etsolle qeto e entsoeng khahlanong le eena. Empa ka Pulungoana 1987, Lekhotla le Phahameng la United States le ile la hana ho etsa joalo.

²⁰ Kahoo qeto ena ea bohlokoa e ile ea rera hore motho ea khaotsoeng kapa ea ikarotseng a ke ke a fumana matšeliso ka lekhotleng bakeng sa likotsi tse entsoeng ke Lipaki tsa Jehova ka ho mo nena.d Kaha phutheho e ne e arabela likeletsong tse phethahetseng tseo bohle re ka li balang ka Lentsoeng la Molimo le ho li sebelisa, motho eo o utloa tahlehelo e tlisitsoeng ke liketso tsa hae ka boeena.

Taeo—Ba Bangata ba Rua Molemo

21. Ke hobane’ng ha ho hlokahala teka-tekano ha re talima ho khaola?

²¹ Batho ba bang ba kantle, ha ba utloa ka ho khaola, ba sekamela ho qenehela mofosi ea seng a ke ke a buisana le litho tsa phutheho ea Bokreste. Empa na qenehelo eo ha e sebelisoe hampe? Nahana ka molemo oo mofosi eo le ba bang ba ka ’nang ba o rua.

22, 23. Bontša bohlokoa le molemo tsa ho utloa Molimo mabapi le boikutlo ba rōna ka batho ba khaotsoeng.

²² Ka mohlala, leqepheng 26 re hlokometse mantsoe a Lynette ka khetho ea hae ea ho ‘ikhaola ka ho feletseng botsoalleng bofe kapa bofe’ le ngoan’abo Margaret ea neng a khaotsoe. Eena le beng ka eena ba Bakreste ‘ba ne ba lumela hore tsela ea Jehova e molemohali.’ ’Me ho joalo!

²³ Hamorao ngoana eo oabo Lynette o ile a ’molella hore: ‘Hoja u ile ua nka ho khaola hasesaane, kea tseba hore nka be ke sa ka ka nka mehato ea ho khutlela ka phuthehong kapele joalokaha ke entse. Ho khaoloa ka ho feletseng ho baratuoa ba ka le kamanong e haufi le phutheho ho ile ha etsa hore ke be le takatso e matla ea ho baka. Ke ile ka hlokomela kamoo tsela ea ka e neng e fosahetse kateng le kamoo e leng taba e tebileng kateng ho furalla Jehova.’

24. Boitšoaro ba khaitseli e mong ka ho khaola bo ile ba mo ama joang ’me ba ama le ba bang joang?

²⁴ Tabeng e ’ngoe, batsoali ba Laurie ba ile ba khaoloa. Empa o re: ‘Botsoalle ba ka le bona ha boa ka ba khaotsa empa ba eketseha. Ha nako e ntse e-ea, ke ile ka ’na ka khathala ho ea ho ile moeeng. Ke ile ka fihla ntlheng eo ke neng ke se ke sa ee le libokeng.’ Eaba o bala boitsebiso ba Molula-Qhooa oa la 15 Tlhakola, le oa la 1 Tlhakubele, 1982, bo neng bo hatella keletso ea 1 Ba-Korinthe 5:11-13 le 2 Johanne 9-11. O ngotse: “E ne e ka ke khantšelitsoe lebone.” ‘Ke ne ke tseba hore ke lokela ho etsa liphetoho tse itseng. Joale ka utloisisa hamolemonyana se boleloang ke Mattheu 10:34-36. Ho ne ho se bonolo hore lelapa leso le amohele qeto ea ka, hobane mora oa ka, ea lilemo li hlano, ke eena feela moshanyana, ’me ba mo rata haholo.’ Re tšepa hore ho lahla botsoalle bo joalo ho tla ama lipelo tsa batsoali bao, joalokaha ho ile ha ama pelo ea Margaret. Ho ntse ho le joalo, taeo e amehang e thusitse Laurie: ‘Ke khutletse tšebeletsong ea tšimo. Lenyalo la ka le lelapa la ka li matla haholo ka baka la phetoho ea ka, ’me le ’na ke matla.’

25. Motho ea khutliselitsoeng o bile le pono efe ka taeo ea Molimo?

²⁵ Kapa nahana ka boikutlo ba motho ea kileng a khaoloa ’me hamorao a khutlisetsoa ka phuthehong. Sandi o ngotse: ‘Ke rata ho le leboha ka lihlooho tse thusang haholo le tse rutang [tse boletsoeng kaholimo] tse mabapi le ho khalemela le ho khaola. Ke thabetse hore Jehova o rata batho ba hae haholo hoo a hlokomelang hore mokhatlo oa hae o hlophisitsoeng o bolokoa o hloekile. Ntho e ka ’nang ea bonahala e le ketso e sehlōhō ho batho ba kantle ea hlokahala e bile ke ntho e lerato e ka etsoang. Ke leboha hore Ntate oa rōna oa leholimo ke Molimo o lerato le o tšoarelang.’

26. Ke litholoana life tsa ho loka tse ka tlisoang ke ho amohela taeo? (Pesaleme ea 94:10, 12)

²⁶ Kahoo Molimo oa rōna o batla hore mofosi ea sa bakeng a lelekoe phuthehong ’me ka lerato o boetse o bontša hore haeba moetsalibe a baka ’me a sokoloha a ka boela a khutlisetsoa ka phuthehong. (Ka ho tšoanang motho ea ikarotseng le eena a ka kōpa ho ba setho sa phutheho hape.) Moo a ka tšelisoa ke Bakreste ba tla mo tiisetsa lerato la bona. (2 Ba-Korinthe 2:5-11; 7:8-13) Ka sebele, ho joalokaha Pauluse a ngotse: “Hona joale ha ho bonahale ho e-na le taeo e thabisang, empa e utloisa bohloko; empa hamorao ho ba koetlisitsoeng ka eona e hlahisa litholoana tsa khotso, e leng, ho loka.”—Ba-Heberu 12:11, NW.

[Mongolo o botlaaseng ba leqephe]

Lintlha tse ka Hopoloang

◻ Ke ka litsela life ho khaola e ka bang mofuta o mong oa taeo?

◻ Ke hobane’ng ha boitšoaro ba Mokreste mabapi le batho ba khaotsoeng bo fapana le boitšoaro ba hae ka baetsalibe ba lefatše?

◻ Ke tataiso efe ea Mangolo e lokelang ho hopoloa le haeba mong ka motho a khaotsoe?

◻ Lekhotla la maipiletso le fihletse qeto efe nyeoeng e neng e hlahletsoe ke motho ea ikarotseng?

◻ Re ka ithuta eng mantsoeng a buuoeng ke batho ka ho khaola?

Ntlha e Qolotsoeng e leqepheng la 26]

“Ho ikhaola ha rōna ka ho feletseng botsoalleng bofe kapa bofe le [ngoan’eso ea khaotsoeng] Margaret ho ile ha leka botšepehi ba rōna bo nang le boitelo ka tokisetso ea Jehova. Ho ile ha nea lelapa la rōna monyetla oa ho bontša hore ruri re lumela hore tsela ea Jehova ke e molemohali.”—Lynette.

[Lebokose le leqepheng la 30]

Ho Amohuoa Litokelo tsa ho ba Setho sa Kereke—Ka Phello Efe?

Rahistori oa Lenyesemane Edward Gibbon o ngotse ka ho lokela ha ho khaola le phello ea hona haufi le nako ea baapostola:

“Ke tokelo e ke keng ea hanyetsoa ea mokhatlo o mong le o mong ho qhelela kathōko litšebeletsong tsa oona le melemong ea oona litho tse furallang kapa tse tlōlang melao e behiloeng ka tumellano ea litho ka kakaretso. . . . Liphello tsa ho amohuoa litokelo tsa ho ba setho sa kereke e ne e le tse amanang le lintho tsa lefatšeng hammoho le tsa moea. Mokreste eo ho neng ho tsebisitsoe hore o amohiloe litokelo tse joalo o ne a amohuoa karolo leha e le efe ea linyehelo tsa ba tšepahalang. Litlamo tsa bolumeli le tsa setsoalle se kathōko li ne li fela.”