Ho Sebeletsa Jehova ka Moea oa Boitelo
“Haeba motho ofe kapa ofe a batla ho ntatela, a ke a tele ho ba pusong ea hae ’me a ipelese thupa ea hae ea tlhokofatso ’me a ntatele a sa khaotse.”—MATTHEU 16:24, NW.
1. Jesu o ile a bolella barutuoa ba hae joang ka lefu la hae le tlang?
JESU KRESTE o ile a finyella ketsahalo ea bohlokoahali bophelong ba hae a le sebakeng sa Thaba ea Hermone, eo tlhōrō ea eona e koahetsoeng ke lehloa. O saletsoe ke nako e ka tlaase ho selemo a phela. O tseba taba ena; barutuoa ba hae ha ba e tsebe. Ke nako ea hore ba tsebe. Ke ’nete, Jesu o ’nile a bua ka mokhoa o sa tobang ka lefu la hae le atamelang, empa lena ke lekhetlo la pele a bua ka lona ka mokhoa o tobileng. (Mattheu 9:15; 12:40) Tlaleho ea Mattheu ea baleha: “Ho tloha mohlang oo, Jesu a qala ho hlalosetsa barutuoa ba hae hore e ka khona a ee Jerusalema, a utloisoe bohloko bo boholo ke baholo le baprista ba baholo le bangoli, ’me a bolaoe, a ntoo tsoha ka letsatsi la boraro.”—Mattheu 16:21; Mareka 8:31, 32.
2. Petrose o ile a arabela joang mantsoe a Jesu a ho utloa bohloko ha Hae ho tlang, ’me Jesu o ile a arabela joang?
2 Ho setse nako e fokolang pele ho lefu la Jesu. Leha ho le joalo, Petrose o halefisoa ke mohopolo oo o sa bontšeng ho inahanela. O sitoa ho amohela hore Messia o hlile o tla bolaoa. Ka lebaka leo, ka sebete Petrose o hanyetsa Mong’a hae. A susumetsoa ke boikutlo bo botle, o mo eletsa ka qenehelo: “Morena, u ikutloele bohloko: tse joalo li ke ke tsa u hlahela.” Empa hang-hang Jesu o hanyetsa mosa o sa lokelang oa Petrose, joalokaha ka tieo motho a ne a ka khoba hlooho ea noha e chefu. “Tloha ho ’na, Satane, u khopiso ho ’na, hobane ha u utloe tsa Molimo, u utloa tsa batho feela.”—Mattheu 16:22, 23.
3. (a) Petrose o ile a iketsa moemeli oa Satane joang a sa hlokomele? (b) Petrose e ne e le khopiso joang tseleng ea boitelo?
3 Petrose o ikentse moemeli oa Satane a sa hlokomele. Karabelo ea Jesu ke e sa qea-qeeng joalokaha a ne a araba Satane lefeelleng. Moo Diabolose o ile a leka ho eka Jesu ka bophelo bo mabotho-botho, borena bo se nang matšoenyeho. (Mattheu 4:1-10) Joale Petrose o mo eletsa hore a iqenehele. Jesu oa tseba hore hoo hase thato ea Ntate oa hae. Bophelo ba hae e tlameha ho ba ba boitelo, eseng ba ho ikhotsofatsa. (Mattheu 20:28) Petrose o fetoha lejoe la khopiso tseleng e joalo; mohau oa hae o nang le sepheo se setle e ba sefi.a Leha ho le joalo, Jesu o bona ka ho hlakileng hore haeba a ka nahana ka khopolo ea bophelo ba ho se be sehlabelo, a ka lahleheloa ke lerato la Molimo ka ho tšoasoa litleneng tsa lefu tsa sefi sa Satane.
4. Ke hobane’ng ha Jesu a ne a sa batle bophelo ba ho ikhotsofatsa ’me a sa bo batlele le barutuoa ba hae?
4 Ka lebaka leo, monahano oa Petrose o ne o hloka ho lokisoa. Mantsoe a hae ho Jesu a ne a bonahatsa maikutlo a motho, eseng a Molimo. Jesu o ne a sa batle bophelo ba ho ikhotsofatsa, ba ho balehela bohloko; ’me o ne a sa batle bophelo bo joalo bakeng sa balateli ba hae, hobane Jesu o tsoela pele ho bolella Petrose le barutuoa ba hae ba bang sena: “Haeba motho ofe kapa ofe a batla ho ntatela, a ke a tele ho ba pusong ea hae, ’me a ipelese thupa ea hae ea tlhokofatso ’me a ntatele a sa khaotse.”—Mattheu 16:24, NW.
5. (a) Phephetso ea ho phela bophelo ba Bokreste ke efe? (b) Mokreste o lokela ho itokisetsa lintho life tse tharo tsa bohlokoa?
5 Khafetsa, Jesu o khutlela sehloohong sena sa bohlokoa: phephetso ea ho phela bophelo ba Bokreste. E le hore Bakreste e be balateli ba Jesu, joaloka Moeta-pele oa bona, ba tlameha ho sebeletsa Jehova ka moea oa boitelo. (Mattheu 10:37-39) Kahoo, o thathamisa lintho tse tharo tse hlokahalang tseo Mokreste a tlamehang ho ikemisetsa ho li etsa: (1) a itele, (2) a ipelese thupa ea hae ea tlhokofatso, ’me (3) a Mo latele a sa khaotse.
“Haeba Motho Ofe Kapa Ofe a Batla ho Ntatela”
6. (a) Motho o itela joang? (b) Ke mang eo re lokelang ho mo thabisa ho feta ho ithabisa?
6 Ho itela ho bolela eng? Ho bolela hore motho a itatole ka ho feletseng, e leng ho kang ho shoa bouena. Moelelo oa motheo oa lentsoe la Segerike le fetoletsoeng e le “ho itela” ke “ho re che”; le bolela “ho latola ka ho feletseng.” Ka lebaka leo, haeba u amohela phephetso ea bophelo ba Bokreste, ka boikhethelo u nehela lithahasello tsa hao, boiketlo, litakatso, thabo, monyaka. Ka kakaretso, u fa Jehova Molimo bophelo ba hao bo feletseng le sohle se amehang ka ho sa feleng. Ho itela ha ho bolele feela ho itima menyaka e itseng ka linako tse itseng. Ho e-na le hoo, ho bolela hore motho o tlameha ho ipeha tlas’a taolo ea Jehova. (1 Ba-Korinthe 6:19, 20) Motho ea itetseng ha a phelele ho ikhahlisa, empa ho khahlisa Molimo. (Ba-Roma 14:8; 15:3) Ho bolela hore motsotso o mong le o mong oa bophelo ba hae, o re che litakatsong tsa boithati ’me o re e ho Jehova.
7. Thupa ea tlhokofatso ea Mokreste ke eng, ’me o e jara joang?
7 Ka lebaka leo, ho ipelesa thupa ea hao ea tlhokofatso, ho na le moelelo o tebileng. Ho jara thupa ke sekhobo ’me ke letšoao la lefu. Mokreste o ikemiselitse ho utloa bohloko ha ho hlokahala, kapa ho tlotlolleha kapa ho hlokofatsoa kapa leha e le ho bolaoa ka lebaka la ho ba molateli oa Jesu Kreste. Jesu o itse: “Motho leha e le ofe ea sa amoheleng thupa ea hae ea tlhokofatso le ho ntatela ha aa ntšoanela.” (Mattheu 10:38, NW) Hase hore bohle ba utloang bohloko ba jere thupa ea tlhokofatso. Ba khopo ba na le “mahlomola” a mangata empa ha ba na thupa ea tlhokofatso. (Pesaleme ea 32:10) Leha ho le joalo, bophelo ba Mokreste ke bophelo ba ho jara thupa ea tlhokofatso ea tšebeletso ea boitelo ho Jehova.
8. Jesu o ile a behela balateli ba hae mohlala ofe oa bophelo?
8 Boemo ba ho qetela boo Jesu a ileng a bo hlalosa ke ba ho mo latela re sa khaotse. Jesu ha a hloke hore feela re amohele le ho lumela seo a se rutileng empa hape o hloka hore bophelong ba rōna bohle re tsoele pele ho latela mohlala oo a o behileng. Litšobotsi tse ling tsa sehlooho tse ka bonoang mohlaleng oa hae oa bophelo ke life? Ha a fa balateli ba hae thōmo ea bona ea ho qetela, o ile a re: “E-eang ke hona ’me le etse barutuoa . . , le ba rute ho boloka lintho tsohle tseo ke le laetseng tsona.” (Mattheu 28:19, 20, NW) Jesu o ne a bolela le ho ruta litaba tse molemo tsa ’Muso. Le barutuoa ba hae ba haufi le eena ba ile ba etsa joalo, ha e le hantle, le phutheho eohle ea pele ea Bokreste. Tšebeletso ena e mafolo-folo ho phaella ho se be karolo ea lefatše ho ile ha ba tlisetsa lehloeo le khanyetso ea lefatše, ho ileng ha fella ka hore thupa ea tlhokofatso e be boima le ho feta.—Johanne 15:19, 20; Liketso 8:4.
9. Jesu o ne a tšoara batho ba bang joang?
9 Mohlala o mong o tsebahalang o ileng oa bonoa bophelong ba Jesu ke tsela eo a neng a tšoara batho ba bang ka eona. O ne a le mosa “le pelo e nolo.” Kahoo, bamameli ba hae ba ne ba khatholoha moeeng ’me ba khothatsoa ke boteng ba hae. (Mattheu 11:29) Ha aa ka a ba tšosa hore ba mo latele kapa ho beha melao e mengata ea hore na ba etse joalo joang; leha e le hore ba ikutloe ba le molato ka sepheo sa ho ba qobella ho ba barutuoa ba hae. Ho sa tsotellehe bophelo ba bona ba boitelo, ba ne ba bonahatsa thabo ea sebele. Ho fapana hakaakang le ba nang le moea oa lefatše oa ho inehela ho khotsofatsa litakatso o tšoaeang ‘mehla ea qetello’!—2 Timothea 3:1-4.
Hōlisa Moea oa Boitelo o Kang oa Jesu ’me U o Boloke
10. (a) Ho ea ka Ba-Filippi 2:5-8, Kreste o ile a itela joang? (b) Haeba re le balateli ba Kreste, ke boikutlo bofe ba kelello boo re lokelang ho bo bonahatsa?
10 Jesu o ile a beha mohlala ka ho itela. O ile a nka thupa ea hae ea tlhokofatso ’me a tsoela pele ho e jara ka ho etsa thato ea Ntate oa hae. Pauluse o ile a ngolla Bakreste ba Filippi: “Bolokang boikutlo bona ba kelello bo ho lōna bo neng bo le le ho Kreste Jesu, eo, le hoja a ne a le teng ka sebopeho sa Molimo, a sa kang a nahana ho inkela matla, e leng, hore a lekane le Molimo. Che, empa o ile a iketsa lefeela ’me a nka sebopeho sa lekhoba a ba ea tšoanang le batho. Ho feta moo, ha a iphumana a e-na le sebopeho sa motho, o ikokobelitse ’me a mamela ho isa lefung, e, lefung thupeng ea tlhokofatso.” (Ba-Filippi 2:5-8, NW) Ke mang ea neng a ka itela ka ho feletseng ho feta moo? Haeba u oa Kreste Jesu ’me u e mong oa balateli ba hae, u tlameha ho boloka boikutlo bo tšoanang ba kelello.
11. Ho phela bophelo ba boitelo ho bolela ho phelela thato ea mang?
11 Petrose, moapostola e mong, o re bolella hore kaha Jesu o ile a utloa bohloko le ho shoa bakeng sa rōna, Bakreste ba lokela ho hlomela, joaloka masole a leng malala-a-laotsoe, ka moea o tšoanang le oo Kreste a neng a e-na le ’ona. Oa ngola: “Ereka ha Kreste a utloisitsoe bohloko nameng ka baka la rōna, hlomelang khopolo ena le lōna; hobane ea utloisitsoeng bohloko nameng o hlobohane le libe; a tle a se ke a hlola a sa phela ka litakatso tsa batho, mehleng e sa setseng ho eena ho phela nameng ka eona, e mpe e be ka ho rata ha Molimo.” (1 Petrose 3:18; 4:1, 2) Bophelo ba Jesu ba boitelo bo bontša ka ho hlakileng boikutlo boo a neng a e-na le bona ka hona. O ne a sa qea-qee boinehelong ba hae, ka linako tsohle a etelletsa thato ea Ntate oa hae ka pele ho ea hae, esita le ho isa lefung le lihlong.—Mattheu 6:10; Luka 22:42.
12. Na bophelo ba boitelo bo ne bo nyatseha ho Jesu? Hlalosa.
12 Le hoja bophelo ba Jesu ba boitelo e ne e le tsela e boima le e phephetsang hore a e latele, ha aa ka a e fumana e nyatseha. Leha ho le joalo, Jesu o ile a fumana monyaka ka ho ikokobeletsa ho etsa thato ea bomolimo. Ho eena, ho etsa mosebetsi oa Ntate oa hae ho ne ho tšoana le lijo. Ho ne ho mo fa khotsofalo ea sebele, joalokaha motho a ka khotsofatsoa ke lijo tse hlabosang. (Mattheu 4:4; Johanne 4:34) Kahoo, haeba u batla ho ikutloa u hlile u khotsofetse bophelong ba hao, ha ho letho leo u ka le etsang le molemo ho feta ho latela mohlala oa Jesu ka ho hlaolela boikutlo ba hae ba kelello.
13. Ke joang lerato e bang matla a susumetsang moea oa boitelo?
13 Ha e le hantle, ke eng e susumetsang moea oa boitelo? Ka lentsoe le le leng, ke lerato. Jesu o ile a re: “‘U tlameha ho rata Jehova Molimo oa hao ka pelo ea hao eohle le ka sephefumolohi sa hao sohle le ka khopolo ea hao eohle.’ Molao oo ke o moholo oa pele. Oa bobeli, o tšoanang le oona, ke ona, ‘U tlameha ho rata moahelani oa hao joalokaha u ithata.’” (Mattheu 22:37-39, NW) Mokreste a ke ke a batla ho ikhotsofatsa, eaba, ka nako e tšoanang, o mamela mantsoe ao. Thabo ea hae le thahasello ea hae li tlameha ho laoloa pele ke lerato la hae ho Jehova hape le lerato la hae ho moahelani. Ke kamoo Jesu a ileng a phela bophelo ba hae, ’me ke sona seo a se lebeletseng ho balateli ba hae.
14. (a) Boikarabelo bo hlalositsoeng ho Ba-Heberu 13:15, 16 ke bofe? (b) Ke eng e re susumeletsang ho bolela litaba tse molemo ka cheseho?
14 Moapostola Pauluse o ne a utloisisa molao ona oa lerato. O ile a ngola: “A re hlahiseng ka mehla ho Molimo ka eena sehlabelo sa poko, e leng tholoana ea melomo e bolelang lebitso la hae. Le se ke la lebala ho etsa batho hantle, le ho fana; hobane Molimo o khahlisoa ke mahlabelo a joalo.” (Ba-Heberu 13:15, 16) Bakreste ha ba nyehele Jehova mahlabelo a liphoofolo kapa a lintho tse joalo; ka hona, ha ba hloke litšebeletso tsa baprista ba batho tempeleng ea sebele bakeng sa borapeli ba bona. Sehlabelo sa rōna sa poko se etsoa ka Kreste Jesu. ’Me haholo-holo ke ka sehlabelo seo sa poko, polelo eo ea phatlalatsa ea lebitso la hae, re bontšang lerato la rōna ho Molimo. Haholo-holo moea oa rōna o se nang boithati o theiloeng leratong o re susumeletsa ho bolela litaba tse molemo ka cheseho, re hahamalla hore ka linako tsohle re chesehele ho nehela Molimo litholoana tsa melomo ea rōna. Hape ka tsela ena re boetse re bontša lerato ho moahelani.
Boitelo bo Tlisa Litlhohonolofatso tse Enneng
15. Ke lipotso life tse hlahlobisisang tse mabapi le boitelo tseo re ka ipotsang tsona?
15 Ak’u khutse ka motsotsoana ’me u nahanisise lipotso tse latelang: Na mokhoa oa ka oa bophelo hona joale o bonahatsa tsela ea boitelo? Na lipakane tsa ka li bontša bophelo bo joalo? Na litho tsa lelapa la ka li kotula melemo ea moea mohlaleng oa ka? (Bapisa le 1 Timothea 5:8.) Ho thoe’ng ka likhutsana le bahlolohali? Na le bona ba kotula molemo moeeng oa ka oa boitelo? (Jakobo 1:27) Na nka eketsa nako eo ke e qetang sehlabelong sa ka sa poko sa phatlalatsa? Na ke khona ho hahamalla tokelo ea ho bula maliboho, Bethele, kapa tšebeletso ea boromuoa, kapa na nka fallela sebakeng seo ho nang le tlhokahalo e khōloanyane ea baboleli ba ’Muso?
16. Ke joang bohlale bo ka re thusang ho phela bophelo ba boitelo?
16 Ka linako tse ling ho ka hlokahala bohlale bo fokolang feela bakeng sa ho fihlela matla a rōna a feletseng ho sebeletsa Jehova ka moea oa boitelo. Ka mohlala, Janet, pula-maliboho ea ka mehla ea Ecuador, o ne a e-na le mosebetsi oa boipheliso oa nako e tletseng. Kapele, kemiso ea hae e ile ea etsa hore ho be boima ho eena ho finyella litlhokahalo tsa lihora tsa bopula-maliboho ba nako e tletseng ka moea o thabileng. O ile a etsa qeto ea ho hlalosetsa mohiri oa hae bothata bona ’me a kōpa ho sebetsa lihora tse fokolitsoeng. Kaha mohiri o ne a sa ikemisetsa ho fokotsa nako ea hae ea mosebetsi, o ile a ea le Maria, ea neng a batla mosebetsi oa nakoana hore a khone ho bula maliboho. Ka bobeli ba ile ba bolela hore ba ka sebetsa karolo ea letsatsi, ba arola mosebetsi oa letsatsi lohle. Mohiri o ile a amohela kōpo eo. Hona joale bo-khaitseli bao ka bobeli ke bo-pula-maliboho ba ka mehla. Ha Kaffa eo le eena a neng a khathalitsoe ke ho sebeletsa k’hamphani e tšoanang ka nako e tletseng ’me ho se bonolo hore a finyelle nako ea hae ea bopula-maliboho a bona phello ena e hlollang, o ile a ea le Magali ’me a etsa kōpo e tšoanang. Le eona e ile ea amoheloa. Kahoo, bo-khaitseli ba bane ba bula maliboho ho e-na le ba babeli ba neng ba se ba le haufi le ho tlohela tšebeletso ea nako e tletseng. Bohlale le boiteko bo bile le liphello tse molemo.
17-21. Banyalani ba bang ba ile ba boela ba nahanisisa morero oa bona bophelong joang, ’me ka phello efe?
17 Ho feta moo, nahana ka tsela ea boitelo eo Evonne a ileng a e latela nakong ea lilemo tse leshome tse fetileng. Ka May 1991 o ile a ngolla Mokhatlo oa Watch Tower se latelang:
18 “Ka October 1982, re ile ra etela Bethele e Brooklyn re le lelapa. Ho e bona ho ile ha ntšusumeletsa hore ke batle ho ithaopela ho sebeletsa teng. Ke ile ka bala foromo ea ho kōpa ho sebeletsa teng, ’me ho ne ho na le potso e ’ngoe ea bohlokoa, ‘Karolelano ea lihora tsa hao tsa tšebeletso ea tšimo ka likhoeli tse tšeletseng tse fetileng ke bokae? Haeba karolelano ea lihora tsa hao e le ka tlaase ho leshome, hlalosa hore na ke hobane’ng.’ Ke ne ke sitoa ho nahana lebaka le utloahalang la hore ebe lihora tsa ka li tlaase, kahoo ke ile ka ipehela pakane ’me ka e finyella ka likhoeli tse hlano.
19 “Le hoja ke ne nka khona ho beha mabaka a seng makae a boikemelo a ho se bule maliboho, ha ke bala 1983 Yearbook of Jehovah’s Witnesses, ke ile ka kholiseha hore ba bang ba hlōtse litšitiso tse khōlō ho feta tsa ka hore ba bule maliboho. Kahoo, ka April 1, 1983, ke ile ka tlohela mosebetsi oa ka o lefang chelete e ntle oa nako e tletseng ’me ka ba pula-maliboho e thusang, ’me ke ile ka qala bopula-maliboho ba nako e tletseng ka September 1, 1983.
20 “Ka April 1985 ke ile ka thabela ho nyaloa ke mohlanka ea sebeletsang. Lilemo tse tharo hamorao, puo ea kopano ea setereke e mabapi le ho bula maliboho e ile ea susumeletsa monna oa ka ho mpotsa a hoeshetsa, ‘Na u bona eka ho na le lebaka le etsang hore ka September 1 ke se qale bopula-maliboho?’ O ile a etsa mosebetsi ona le ’na ka lilemo tse peli tse latelang.
21 “Hape monna oa ka o ile a ithaopela ho etsa mosebetsi oa kaho ka libeke tse peli Bethele e Brooklyn ’me a kenya kōpo bakeng sa Lenaneo la ho Haha la Machaba. Kahoo ka May 1989 re ile ra ea Nigeria khoeli bakeng sa kaho ea lekala. Hosesane re tla be re ea Jeremane, moo re tla lokisetsoa litumello tsa ho kena Poland. Re thabela ho nka karolo mosebetsing ona oa kaho oa bohlokoa le ho ba karolo ea mofuta ona o mocha oa tšebeletso ea nako e tletseng.”
22. (a) Joaloka Petrose, ke joang re ka bang khopiso re sa hlokomele? (b) Ho sebeletsa Jehova ka moea oa boitelo ha hoa itšetleha ka eng?
22 Haeba uena u sa khone ho bula maliboho, na u ka khothaletsa ba tšebeletsong ea nako e tletseng ho tšoarella tokelong ea bona ’me mohlomong le ho ba thusa ho etsa joalo? Kapa na u tla tšoana le litho tse ling tsa lelapa tse nang le boikutlo bo botle kapa metsoalle eo, joaloka Petrose, e ka bolellang mosebeletsi oa nako e tletseng ho hata butle, a iqenehele, u sa hlokomele kamoo seo e ka bang khopiso ka teng? Ke ’nete, haeba bophelo ba pula-maliboho bo le kotsing ea sebele kapa haeba a hlokomoloha litlamo tsa Bokreste, a ka lokela ho tlohela tšebeletso ea nako e tletseng ka nakoana. Ho sebeletsa Jehova ka moea oa boitelo ha hoa itšetleha ka letšoao, joaloka pula-maliboho, mosebeletsi oa Bethele, kapa a mang. Ho e-na le hoo, ho itšetlehile ka hore na re batho ba mofuta ofe—kamoo re nahanang, seo re se etsang, kamoo re tšoarang ba bang, kamoo re phelang bophelo ba rōna ka teng.
23. (a) Re ka tsoela pele ho fumana thabo ea ho ba basebetsi-’moho le Molimo joang? (b) Re fumana tiiso efe ho Ba-Heberu 6:10-12?
23 Haeba kannete re e-na le moea oa boitelo, re tla thabela ho ba basebetsi-’moho le Molimo. (1 Ba-Korinthe 3:9) Re tla khotsofatsoa ke ho tseba hore re thabisa pelo ea Jehova. (Liproverbia 27:11) ’Me re na le tiiso ea hore Jehova a ke ke a re lebala kapa a re lahla hafeela re ntse re tšepahala ho eena.—Ba-Heberu 6:10-12.
[Mongolo o botlaaseng ba leqephe]
a Ka Segerike, “lejoe la khopiso” (σκάνδαλον, skanʹda·lon) pele “e ne e le lebitso la karolo ea sefi eo lijo tse sebelisetsoang ho cheha li hakoang ho eona, kahoo, e le sefi kapa leraba ka bolona.”—Vine’s Expository Dictionary of Old and New Testament Words.
Maikutlo a Hao ke Afe?
◻ Ke joang Petrose e ileng ea e-ba khopiso tseleng ea boitelo a sa hlokomele?
◻ Ho itela ho bolela eng?
◻ Mokreste o jara thupa ea hae ea tlhokofatso joang?
◻ Re ka hōlisa le ho boloka moea oa boitelo joang?
◻ Ke eng e susumetsang moea oa boitelo?
[Setšoantšo se leqepheng la 10]
Na u ikemiselitse ho itela, ho nka thupa ea hao ea tlhokofatso, le ho latela Jesu u sa khaotse?