Ho Sebelisa Bolumeli bo Hloekileng Bakeng sa Poloko

“Bolumeli bo hloekileng le ba ’nete mahlong a Molimo Ntate bo tla iponahatsa ka lintho tse kang . . . ho ipoloka motho a sa silafatsoa ke lefatše.”—JAKOBO 1:27, Phillips.

 1. Bolumeli bo ’nile ba hlalosoa joang, ’me ke mang eo ka nepo a nang le tokelo ea ho bontša phapang pakeng tsa bolumeli ba bohata le ba ’nete?

BOLUMELI bo ’nile ba hlalosoa e le “pontšo ea tumelo eo motho a nang le eona matleng a phahametseng a motho le pontšo ea ho a hlompha ha hae ebile a a hlokomela e le ’mōpi le ’musi oa bokahohle.” Ka hona, ke mang eo ka nepo a nang le tokelo ea ho bontša phapang pakeng tsa bolumeli ba ’nete le bolumeli ba bohata? Ka sebele e tlameha ho ba eo ho lumeloang ho Eena le ea hlomphuoang, e leng ’Mōpi. Jehova o boletse ka ho hlaka boemo ba hae ka bolumeli ba ’nete le ba bohata.

Tšebeliso ea Lentsoe “Bolumeli” ka Bibeleng

 2. Libuka tse hlalosang mantsoe li hlalosa lentsoe la pele-pele la Segerike le fetoletsoeng e le “mofuta oa borapeli” kapa “bolumeli” joang, ’me le ka sebelisoa borapeling ba mefuta efe?

² Lentsoe la Segerike le fetoletsoeng e le “mofuta oa borapeli,” kapa “bolumeli,” ke thre·skeiʹa. A Greek-English Lexicon of the New Testament e hlalosa lentsoe lena e le “ho rapela Molimo, bolumeli, haholo-holo joalokaha ho iponahatsa tšebeletsong ea bolumeli kapa borapeling.” Theological Dictionary of the New Testament e fana ka boitsebiso bo eketsehileng, e re: “Histori ea kamoo lentsoe lena le neng le sebelisoa ka teng qalehong ea belaelloa; . . . litsebi tsa kajeno li khetha ho le hokahanya le therap- (‘ho sebeletsa’). . . . Ho fapana ha seo le se bolelang le hona ho lokela ho hlokomeloa. Khopolo e ntle ke ‘ho chesehela bolumeli’ . . . , ‘ho rapela Molimo,’ ‘bolumeli.’ . . . Empa ho boetse ho na le khopolo e mpe, e leng, ‘bolumeli bo fetelletseng,’ ‘borapeli bo fosahetseng.’” Ka hona, lentsoe thre·skeiʹa le ka fetoleloa e le “bolumeli” kapa la fetoleloa e le “mofuta oa borapeli,” bo botle kapa bo bobe.

 3. Moapostola Pauluse o ile a sebelisa lentsoe le fetoletsoeng e le “mofuta oa borapeli” joang, ’me ho fanoa ka tlhaloso efe e thahasellisang mabapi le ho fetoleloa ha Ba-Kolosse 2:18? (NW)

³ Lentsoe lena le hlaha ka makhetlo a mane feela ka Mangolong a Segerike a Bokreste. Moapostola Pauluse o le sebelisitse habeli ha a khetholla bolumeli ba bohata. Ho Liketso 26:5, (NW) o tlalehoa a re pele a fetoha Mokreste, “ke phetse ke le Mofarisi ho latela mokha o nang le litaelo tse thata ka ho fetisisa oa mofuta oa rōna oa borapeli [“bolumeli,” Phillips].” Lengolong la hae le eang ho Bakolosse, o ile a lemosa: “Le se ke la amohuoa moputso oa lōna ke motho ea thabelang boikokobetso ba boikaketsi le mofuta oa borapeli ba mangeloi.” (Ba-Kolosse 2:18, NW) Kamoo ho bonahalang ka teng borapeli bo joalo ba mangeloi bo ne bo atile Frygia mehleng eo, empa e ne e le mofuta oa bolumeli ba bohata.a Ka ho thahasellisang, le hoja liphetolelo tse ling tsa Bibele li fetolela thre·skeiʹa e le “bolumeli,” ho Ba-Kolosse 2:18 bongata ba tsona li sebelisa lentsoe “borapeli.” New World Translation e fetolela lentsoe thre·skeiʹa ka mokhoa o lumellanang e le “mofuta oa borapeli,” ’me nako le nako mongolo o botlaaseng ba leqephe ho Reference Bible o bolela hore liphetolelong tsa Selatine ho sebelisitsoe phetolelo ea mofuta o mong e reng “bolumeli.”

‘Ho Hloeka le ho se Silafale’ ho Latela Pono ea Molimo

4, 5. (a) Ho latela seo Jakobo a se boletseng, ke boemo ba mang ka bolumeli boo e leng ba bohlokoa? (b) Ke eng se ka etsang hore mofuta oa borapeli ba motho ea itseng e be oa lefeela, ’me lentsoe le fetoletsoeng e le “lefeela” le bolela eng?

⁴ Libaka tse ling tse peli tseo lentsoe thre·skeiʹa le hlahang ho tsona ke lengolong le ngotsoeng ke morutuoa Jakobo, setho sa sehlopha se busang sa phutheho ea Bokreste ea lekholo la pele la lilemo. O ngotse: “Haeba ho bonahala motho leha e le ofe e le morapeli oa mofuta o itseng [“e le ‘ea sekametseng bolumeling,’” Phillips] empa a sa laole leleme la hae, a mpa a tsoela pele ho thetsa pelo ea hae, mofuta oa borapeli [“bolumeli,” Phillips] ba motho ea joalo ke oa lefeela. Mofuta oa borapeli [“bolumeli,” Phillips] bo hloekileng le bo sa silafalang ho latela pono ea Molimo le Ntate oa rōna ke ona: ho hlokomela likhutsana le bahlolohali mahlomoleng a bona, le ho ipoloka motho a se na letheba lefatšeng.”—Jakobo 1:26, 27, NW.

⁵ E, ho hlokomela boemo ba Jehova ka bolumeli ke habohlokoa haeba re batla hore a re amohele ’me re pholohele lefatšeng le lecha leo a le tšepisitseng. (2 Petrose 3:13) Jakobo o bontša hore motho a ka ’na a bonahala e le ea sekametseng bolumeling ka matla empa ho ntse ho le joalo mofuta oa borapeli ba hae e ka ba oa lefeela. Lentsoe la Segerike leo mona le fetoletsoeng e le “lefeela” le boetse le bolela “ntho e hlokang molemo, e lephaka, e sa hlahiseng litholoana, e hlokang thuso, e hlokang matla, e hlokang ’nete.” Ho ka ba joalo haeba motho ea ipolelang hore ke Mokreste a sa laole leleme la hae le ho le sebelisa ho rorisa Molimo le ho haha Bakreste ba bang. O ne a tla be a “thetsa pelo ea hae” ’me o ne a tla be a sa sebelise “bolumeli bo hloekileng le ba ’nete mahlong a Molimo.” (Phillips) Pono ea Jehova ke eona ea bohlokoa.

 6. (a) Moko-taba oa lengolo la Jakobo ke ofe? (b) Jakobo o ile a hatisa tlhokahalo efe ea borapeli bo hloekileng, ’me Sehlopha se Busang sa kajeno se ’nile sa re’ng tabeng ee?

⁶ Jakobo ha a lokolise lintho tsohle tseo Jehova a li hlokang mabapi le borapeli bo hloekileng. Tumellanong le moko-taba o akaretsang oa lengolo la hae, e leng tumelo e pakoang ke mesebetsi le tlhokahalo ea ho ikarola botsoalleng ba lefatše la Satane, o totobatsa litlhokahalo tse peli feela. Ea pele ke “ho hlokomela likhutsana le bahlolohali mahlomoleng a bona.” Sena se akarelletsa lerato la ’nete la Bokreste. Ka mehla Jehova o ’nile a bontša kameho e lerato ho likhutsana le bahlolohali. (Deuteronoma 10:17, 18; Malakia 3:5) E ’ngoe ea liketso tsa pele tsa sehlopha se busang sa phutheho ea Bokreste sa lekholo la pele la lilemo e ile ea ba ho thusa bahlolohali ba Bakreste. (Liketso 6:1-6) Moapostola Pauluse o ile a fana ka litaelo tse qaqileng bakeng sa ho fana ka tlhokomelo e lerato ho bahlolohali ba hōlileng ba hlokang ba neng ba ipakile ba tšepahala ka lilemo tse telele ’me ba se na lelapa le ka ba thusang. (1 Timothea 5:3-16) Sehlopha se Busang sa Lipaki tsa Jehova sa kajeno le sona ka ho tšoanang se ile sa fana ka litaelo tse tobileng tse buang ka “Ho Hlokomela Bafumanehi,” sa re: “Borapeli ba ’nete bo akarelletsa ho hlokomela ba tšepahalang le ba khabane bao mohlomong ba hlokang thuso ea nama.” (Bona buka ea Ho Hlophisetsoa ho Phetha Tšebeletso ea Rōna, maqephe 122-3.) Lihlopha tsa baholo kapa Bakreste ka bomong ba bonahalang ba sa tsotelle tabeng ena ba tla be ba hlokomoloha tšobotsi ea bohlokoa ea mofuta oa borapeli bo hloekileng le bo sa silafalang ho latela pono ea Molimo le Ntate oa rōna.

‘Ho se be le Letheba Lefatšeng’

7, 8. (a) Jakobo o boletse tlhokahalo efe ea bobeli bakeng sa bolumeli ba ’nete? (b) Na baruti le baprista ba finyella tlhokahalo ee? (c) Ho ka thoe’ng ka Lipaki tsa Jehova?

⁷ Tlhokahalo ea bobeli ea bolumeli ba ’nete e boletsoeng ke Jakobo ke “ho ipoloka motho a se na letheba lefatšeng.” Jesu o itse: “’Muso oa ka hase karolo ea lefatše lena”; tumellanong le sena, balateli ba hae ba ’nete le bona e ne e ke ke ea e-ba “karolo ea lefatše lena.” (Johanne 15:19; 18:36, NW) Na ho ka boleloa seo ka baruti le baprista ba malumeli leha e le afe a lefatše lee? Ba tšehetsa Machaba a Kopaneng. Baeta-pele ba bangata ba ’ona ba ile ba amohela memo ea mopapa ea hore ba kopane Assisi, Italy, ka October 1986 hore ba kopane lithapelong tsa bona tsa ho rapella hore “Selemo sa Machaba sa Khotso” se tšehelitsoeng ke Machaba a Kopaneng se atlehe. Leha ho le joalo, boiteko ba bona e bile ba lefeela, ha ho hakanngoa ka batho ba limillione ba bolailoeng lintoeng tsa selemo seo le lilemo tse ileng tsa latela ho tloha nakong eo. Hangata baruti ke li-ea-thoteng-li-bapile le mokha oa lipolotiki o busang, ha ka nako e tšoanang ka bolotsana ba ntse ba sebelisana ka lenyele le mokha oa bohanyetsi e le hore mang le mang ea busang a ba talime e le “metsoalle.”—Jakobo 4:4.

⁸ Lipaki tsa Jehova li iketselitse botumo ba hore ke Bakreste ba lulang ba sa nke lehlakore litabeng tsa lipolotiki le likhohlanong tsa lefatše lena. Li boloka boemo bona linaheng tsohle le lichabeng tsohle, joalokaha ho tiisoa ke litlaleho tsa likoranta le litlaleho tsa kajeno tsa histori likarolong tsohle tsa lefatše. Ka sebele ha li “na letheba lefatšeng.” Bolumeli ba tsona ke “bo hloekileng le ba ’nete mahlong a Molimo.”—Jakobo 1:27, Phillips.

Matšoao a Mang a Bolumeli ba ’Nete

 9. Tlhokahalo ea boraro ea bolumeli ba ’nete ke efe, hona hobane’ng?

⁹ Haeba bolumeli ke “pontšo ea tumelo eo motho a nang le eona matleng a phahametseng a motho le pontšo ea ho a hlompha ha hae ebile a a hlokomela e le ’mōpi le ’musi oa bokahohle,” ka sebele bolumeli ba ’nete bo tlameha ho lebisa borapeli ho Molimo o le mong oa ’nete, Jehova. Ha boa tlameha ho sitisa batho ho utloisisa Molimo ka ho ruta likhopolo tsa bohedene tse kang tsa molimo oa boraro-bo-bong oo ho oona Ntate a arolelanang matla a hae a maholo, khanya ea hae, le ho ba teng ha hae ka ho sa feleng le batho ba bang ba babeli ba leng ho Boraro-bo-bong boo e leng sephiri. (Deuteronoma 6:4; 1 Ba-Korinthe 8:6) Hape bo tlameha ho tsebahatsa lebitso la Molimo leo ho seng le lekanang le lona, e leng Jehova, ’me bo hlomphe lebitso leo, ha e le hantle bo jare lebitso la Molimo joaloka batho ba hlophisitsoeng. (Pesaleme ea 83:18; Liketso 15:14) Ho sena, batho ba bo sebelisang ba tlameha ho latela mohlala oa Kreste Jesu. (Johanne 17:6) Kajeno ke batho bafe ba finyellang tlhokahalo ee ntle ho Lipaki tsa Jehova tsa Bakreste?

10. E le hore bolumeli bo ka re pholosa ho kena lefatšeng le lecha la Molimo, bo tlameha ho etsa eng, hona hobane’ng?

¹⁰ Moapostola Petrose o itse: “’Me ha ho poloko ho e mong; hobane ha ho lebitso le leng [Jesu Kreste] tlas’a leholimo, leo batho ba le neiloeng, leo re ka bolokehang ka lona.” (Liketso 4:8-12) Ka hona, bolumeli bo hloekileng bo tlang ho etsa hore batho ba pholohele lefatšeng le lecha la Molimo bo tlameha ho ba susumelletsa ho bontša tumelo ho Kreste le molemong oa sehlabelo sa thekollo. (Johanne 3:16, 36; 17:3; Ba-Efese 1:7) Ho feta moo, bo tlameha ho thusa barapeli ba ’nete ho ikokobeletsa Kreste joaloka Morena ea busang le Moprista ea Phahameng ea tlotsitsoeng ea behiloeng ke Jehova.—Pesaleme ea 2:6-8; Ba-Filippi 2:9-11; Ba-Heberu 4:14, 15.

11. Bolumeli ba ’nete bo tlameha ho thehoa holim’a eng, ’me boemo ba Lipaki tsa Jehova ke bofe tabeng ee?

¹¹ Bolumeli bo hloekileng bo tlameha ho thehoa thatong e senotsoeng ea Molimo o le mong oa ’nete eseng lineanong kapa lifilosofing tse entsoeng ke batho. Re ne re ke ke ra tseba letho ka Jehova le ka merero ea hae e babatsehang, ebile re ne re ke ke ra tseba letho ka Jesu le ka sehlabelo sa thekollo, hoja e se ka Bibele. Lipaki tsa Jehova li kenya ka ho batho kholiseho e sa sisinyeheng Bibeleng. Li boetse li paka ka bophelo ba tsona ba letsatsi le letsatsi hore li lumellana le mantsoe ana a moapostola Pauluse: “Lengolo lohle le bulutsoeng ke Moea oa Molimo, le na le molemo oa ho ruta, oa ho kholisa, oa ho laea, . . . motho oa Molimo a tle a phethehe, ’me a rutehele ruri mesebetsing eohle e molemo.”—2 Timothea 3:16, 17.

Bolumeli ba ’Nete—Tsela ea Bophelo

12. Ho phaella tumelong, ho hlokahala eng e le hore borapeli e ka ba ba ’nete, ’me bolumeli ba ’nete ke tsela ea bophelo ka litsela life?

¹² Jesu o itse: “Molimo ke Moea: ba o rapelang e ka khona ba rapele ka moea le ka ’nete.” (Johanne 4:24) Ka hona, bolumeli ba ’nete, kapa mofuta oa borapeli, hase pontšo e ka ntle ea bomolimo e etsoang ho phetha molao, kapa e fetohileng tloaelo. Borapeli bo hloekileng ke ba moea, bo thehiloeng tumelong. (Ba-Heberu 11:6) Leha ho le joalo, tumelo eo e tlameha ho tšehetsoa ke mesebetsi. (Jakobo 2:17) Bolumeli ba ’nete bo lahla litšekamelo tse tloaelehileng. Bo khomarela litekanyetso tsa Bibele tsa boitšoaro le lipuo tse hloekileng. (1 Ba-Korinthe 6:9, 10; Ba-Efese 5:3-5) Ka tieo batho ba bo sebelisang ba loanela ho hlahisa litholoana tsa moea oa Molimo bophelong ba bona ba lelapa, mosebetsing oa bona oa boipheliso, sekolong, haesita le boithabisong ba bona. (Ba-Galata 5:22, 23) Lipaki tsa Jehova li leka hore le ka mohla li se ke tsa lebala keletso ea moapostola Pauluse: “Empa leha le e-ja, leha le e-noa, leha le etsa ntho efe le efe, etsang tsohle ho tlotlisa Molimo ka tsona.” (1 Ba-Korinthe 10:31) Bolumeli ba tsona hase ntho feela e etsoang ho latela mokhoa o itseng; ke tsela ea bophelo.

13. Borapeli ba ’nete bo akarelletsa eng, ’me ke hobane’ng ha ho ka thoe ka sebele Lipaki tsa Jehova ke batho ba sekametseng bolumeling?

¹³ Ha e le hantle, bolumeli ba ’nete bo akarelletsa mesebetsi ea moea. Mesebetsi ena e akarelletsa ho rapela ka bomong le ho rapela joaloka lelapa, ho ithuta Lentsoe la Molimo le lithuso tsa ho ithuta Bibele ka mehla, le ho ba teng libokeng tsa phutheho ea ’nete ea Bokreste. Liboka tsena li buloa ka lipina tse lebisang thoriso ho Jehova le ka thapelo ’me li phethoa ka tsona. (Mattheu 26:30; Ba-Efese 5:19) Ho buisanoa ka litaba tsa moea tse hahang ka lipuo le lipuisano tsa lipotso le likarabo tse likhatisong tseo bohle ba nang le tsona. Hangata liboka tse joalo li tšoareloa Liholong tsa ’Muso tse makhethe le hoja e se tse majaba-jaba, tse sebelisoang bakeng sa merero ea bolumeli ka ho khetheha: liboka tse tloaelehileng, manyalo, litšebeletso tsa sehopotso. Lipaki tsa Jehova li hlompha Liholo tsa tsona tsa ’Muso le Liholo tse khōloanyane tsa Likopano joaloka libaka tse nehetsoeng bakeng sa borapeli ba Jehova. Liholo tsa ’Muso ha li tšoane le likereke tsa Bokreste-’mōtoana, hase libaka tsa mekhatlo ea sechaba.

14. Borapeli bo ne bo bolela eng ho batho ba buang Seheberu, ’me ke mosebetsi ofe o khethollang Lipaki tsa Jehova kajeno?

¹⁴ Pejana re bone hore litsebi li hokahanya lentsoe la Segerike le fetoletsoeng e le “mofuta oa borapeli” kapa “bolumeli” le leetsi “ho sebeletsa.” Ka ho thahasellisang, lentsoe la Seheberu le tšoanang le lona, ‛avo·dhahʹ, le ka fetoleloa e le “tšebeletso” kapa “borapeli.” (Bapisa le mengolo e botlaaseng ba leqephe ho Exoda 3:12 le 10:26 ho NW.) Ho Baheberu, borapeli bo ne bo bolela tšebeletso. ’Me ke sona seo bo se bolelang ho barapeli ba ’nete kajeno. Letšoao la bohlokoa haholo, le khethollang bolumeli ba ’nete ke hore bohle ba bo sebelisang ba kopanela tšebeletsong ea bomolimo ea ho bolela “litaba tsena tse molemo tsa ’muso . . . lefatšeng lohle leo ho ahiloeng ho lona bakeng sa bopaki ho lichaba tsohle.” (Mattheu 24:14, NW; Liketso 1:8, NW; 5:42, NW) Ke bolumeli bofe bo tsejoang lefatšeng ka bophara ka bopaki ba bona ba phatlalatsa bakeng sa ’Muso oa Molimo joaloka tšepo feela ea batho?

Matla a Sebele le a Kopanyang

15. Letšoao le ikhethang la bolumeli ba ’nete ke lefe?

¹⁵ Bolumeli ba bohata boa arohanya. Bo ’nile ba baka lehloeo le tšollo ea mali ’me bo sa ntse bo li baka. Ka lehlakoreng le leng, bolumeli ba ’nete boa kopanya. Jesu o itse: “Seo bohle ba tla tseba hobane le barutuoa ba ka ka sona, ke ha le ratana.” (Johanne 13:35) Lerato le kopantseng Lipaki tsa Jehova le hlōla likarohano tsa bochaba, tsa tulisano, tsa moruo, le tsa morabe tse arohanyang batho ka kakaretso. Lipaki li ‘ema li tiile moeeng o le mong, li loanela tumelo ea litaba tse molemo li le hammoho.’—Ba-Filippi 1:27, NW.

16. (a) “Litaba tse molemo” tseo Lipaki tsa Jehova li li bolelang ke life? (b) Ke boprofeta bofe bo phethahalang ho batho ba Jehova, ’me ho ’nile ha latela mahlohonolo afe?

¹⁶ “Litaba tse molemo” tseo li li bolelang ke tsa hore haufinyane morero oa Molimo o sa fetoheng o tla phethahatsoa. Thato ea oona e tla phethahatsoa, “lefatšeng joaloka leholimong.” (Mattheu 6:10, BPN) Lebitso le khanyang la Jehova le tla halaletsoa, ’me lefatše e tla ba paradeise, eo ho eona barapeli ba ’nete ba tlang ho phela ka ho sa feleng. (Pesaleme ea 37:29) Hoo e ka bang batho ba limillione linaheng tsohle ba kopanela le Lipaki tsa Jehova, phethahatsong ea boprofeta ba Bibele, ba re: “Re tla ea le lōna, hobane re utloile hoba Jehova o na le lōna.” (Zakaria 8:23) Jehova o hlohonolofatsa batho ba hae. Ka sebele “e monyenyane” o fetohile “sechaba se matla,” e leng phutheho ea lefatše ka bophara e kopaneng ka ho felletseng litšobotsing tsohle—mohopolong, mosebetsing, borapeling. (Esaia 60:22, NW) Ena ke ntho eo bolumeli ba bohata bo sa khonang ho e finyella.

Ho Hlōla ha Bolumeli bo Hloekileng

17. Babylona e Moholo e letetsoe ke eng, ’me see se tla etsahala joang?

¹⁷ Lentsoe la Molimo le boletse esale pele ka ho felisoa ha ’muso oa lefatše oa bolumeli ba bohata, oo ka tšoantšetso o bitsoang “Babylona e moholo.” Bibele e boetse e tšoantša “marena,” kapa babusi ba lipolotiki, ba lefatše ka letšoao la linaka tsa sebata. E re bolella hore Molimo o tla kenya lipelong tsa babusi bana morero oa ho timetsa le ho felisa ka ho felletseng mokhatlo ona oa Satane Diabolose o kang seotsoa.—Bona Tšenolo 17:1, 2, 5, 6, 12, 13, 15-18.b

18. Bibele e fana ka lebaka lefe la bohlokoa la ho felisoa ha Babylona e Moholo, ’me bolumeli ba bohata bo qalile ho kena neng tseleng ee e tšosang?

¹⁸ Ke hobane’ng ha Babylona e Moholo e tšoanela ho felisoa? Bibele ea arabela: “Ke ho [eona] ho fumanoeng mali a baprofeta, le a bahalaleli, le a bohle ba bolailoeng lefatšeng.” (Tšenolo 18:24) Ho bontša hore molato ona oa mali o ikarabellang ho bolumeli ba bohata o hlahile khale le pele Babylona e thehoa, Jesu o ile a nyatsa baeta-pele ba bolumeli ba Sejode, bo neng bo imatahantse le Babylona e Moholo, ha a re: “Linoha, malinyane a marabe! le ka phema kahlolo ea lihele [“Gehenna,” NW] joang? . . . Mali ’ohle a lokileng, a tšolletsoeng lefatšeng, a [tla bokana] ho lōna, ho qala ka mali a Abele ea lokileng.” (Mattheu 23:33-35) E, bolumeli ba bohata, bo qalileng lefatšeng ha ho ba le bofetoheli Edene, bo tlameha ho ikarabella ka molato oa bona oa mali o sisimosang.

19, 20. (a) Barapeli ba ’nete ba tla etsa eng ka mor’a hore ho lihuoe kahlolo holim’a Babylona e Moholo? (b) Joale ho tla etsahala eng, ’me barapeli bohle ba ’nete ba tla buleheloa ke tebello efe?

¹⁹ Ka mor’a ho felisoa ha Babylona e Moholo, barapeli ba ’nete ba lefatšeng ba tla kopanya mantsoe a bona le libini tsa leholimo tse binang ka lentsoe le phahameng: “Lōna batho, rorisang Jehova! . . . Hobane o lihile kahlolo holim’a seotsoa se seholo . . . , ’me o phetelitse mali a bahlanka ba hae ao se a tšollotseng. . . . ’Me mosi o tsoang ho sona o ntse o tsoela pele ho nyoloha ka ho sa feleng.”—Tšenolo 19:1-3, NW.

²⁰ Joale ho tla felisoa likarolo tse ling tse bōpang mokhatlo o bonahalang oa Satane. (Tšenolo 19:17-21) Ka mor’a moo, Satane, mothehi oa bolumeli bohle ba bohata, le bademona ba hae ba tla akheloa sekoting. Ha ba sa tla hlola ba lokoloha ho hlorisa barapeli ba ’nete ba Jehova. (Tšenolo 20:1-3) Bolumeli bo hloekileng bo tla be bo hlōtse bolumeli ba bohata. Banna le basali ba tšepahalang ba elang hloko temoso ea Molimo ea hore hona joale ba balehe ho Babylona e Moholo ba tla ba le monyetla oa ho pholohela lefatšeng le lecha la Molimo le ho kena ho lona. Lefatšeng leo, ba tla khona ho sebelisa bolumeli ba ’nete ’me ba sebeletse Jehova ka tsela ea borapeli ka ho sa feleng.

[Mongolo o botlaaseng ba leqephe]

Hlahloba Khopolo ea Hao

◻ Ke boemo ba mang boo e leng ba bohlokoa ka ho fetisisa mabapi le bolumeli, hona hobane’ng?

◻ Jakobo o hatisitse litlhokahalo life tse peli tsa bolumeli ba ’nete?

◻ Litlhokahalo tse ling tsa borapeli bo hloekileng ke life?

◻ “Litaba tse molemo” tseo Lipaki tsa Jehova li li bolelang ke life?

◻ Bolumeli ba ’nete bo tla hlōla bolumeli ba bohata joang?

[Setšoantšo se leqepheng la 17]

Baeta-pele ba bolumeli ba ile ba bokana Assisi, Italy, ka October 1986

[Setšoantšo se leqepheng la 19]

Bolumeli ba ’nete bo akarelletsa ho bokana ’moho bakeng sa borapeli