“Atamelang ho Molimo”

“Atamelang ho Molimo, ’me o tla atamela ho lōna.”—JAKOBO 4:8.

1, 2. (a) Ho tloaelehile hore batho ba re’ng? (b) Ke keletso efe eo Jakobo a faneng ka eona, ’me ke hobane’ng ha e ne e hlokahala?

“MOLIMO o na le rōna.” Mantsoe ao a khabisitse liemahale tsa sechaba esita le lijunifomo tsa masole. Mantsoe a reng “Re tšepile Molimo” a ngotsoe licheleteng tsa kajeno tse ngata haholo tsa tšepe le tsa pampiri. Ho tloaelehile hore batho ba bolele hore ba na le kamano e haufi le Molimo. Leha ho le joalo, na ha u lumele hore ho ba le kamano e joalo ho feta ho e bolela kapa ho e ngola?

² Bibele e bontša hore ke ntho e ka etsahalang ho ba le kamano le Molimo. Leha ho le joalo, ho hlokahala boiteko. Ho ne ho hlokahala hore Bakreste ba bang ba tlotsitsoeng ba lekholong la pele la lilemo ba matlafatse kamano ea bona le Jehova Molimo. Molebeli oa Mokreste Jakobo o ile a tlameha ho lemosa ba bang ka tloaelo ea bona ea nama le ho silafala moeeng. Keletsong eo o ile a fana ka keletso ena e matla e reng: “Atamelang ho Molimo, ’me o tla atamela ho lōna.” (Jakobo 4:1-12) Jakobo o ne a bolela’ng ha a re “atamelang”?

3, 4. (a) Ho ka etsahala hore ebe babali ba lekholong la pele la lilemo ba Jakobo ba ile ba hopotsoa’ng ka poleloana e reng “atamelang ho Molimo”? (b) Ke hobane’ng ha re ka kholiseha hore re ka atamela ho Molimo?

³ Jakobo o ile a bua ntho e neng e ka utloisisoa ke babali ba bangata ba mehleng ea hae. Molao oa Moshe o ile oa fa baprista litaelo tse tobileng tsa kamoo ba neng ba lokela ho “tla,” kapa ho atamela Jehova molemong oa batho ba hae. (Exoda 19:22) Ka hona e tlameha ebe babali ba Jakobo ba ne ba hopolitsoe hore ho atamela Jehova ha hoa lokela ho nkoa habobebe. Jehova o phahame ka ho fetisisa bokahohleng.

⁴ Ka lehlakoreng le leng, setsebi se seng sa Bibele se re “khothatso ena [e ho Jakobo 4:8] e bontša tšepo e matla.” Jakobo o ne a tseba hore kamehla Jehova o mema ka lerato batho ba sa phethahalang hore ba atamele ho Eena. (2 Likronike 15:2) Sehlabelo sa Jesu se ile sa fana ka monyetla oa ho atamela Jehova ka botlalo. (Baefese 3:11, 12) Kajeno, ba bangata ba filoe monyetla oa ho atamela Molimo! Leha ho le joalo, re ka etsa’ng ho sebelisa monyetla oo o babatsehang? Ka bokhutšoanyane re tla hlahloba litsela tse tharo tseo ka tsona re ka atamelang ho Jehova Molimo.

Le ’ne le ‘Tsoele Pele le Rua Tsebo’ ka Molimo

5, 6. Mohlala oa Samuele e monyenyane o bontša se amehang tabeng ea ‘ho tsoela pele ho rua tsebo’ ka Molimo joang?

⁵ Ho ea ka Johanne 17:3, Jesu o itse: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” Libibele tse ngata li fetolela temana ena ka tsela e sa tšoaneng le ea Phetolelo ea Lefatše le Lecha. Ho e-na le hore li re “ho tsoela pele ba rua tsebo” ka Molimo, tsona li fetolela leetsi lena e le “ho tseba” Molimo. Leha ho le joalo, litsebi tse ngata li bolela hore moelelo oa lentsoe le sebelisitsoeng Segerikeng sa pele o tebile ho feta moo—ke mohato o sa khaotseng o bileng o ka qetellang ka setsoalle se haufi-ufi.

⁶ Ho tseba Molimo haufi-ufi e ne e se ntho e ncha mehleng ea Jesu. Ka mohlala, Mangolong a Seheberu, re bala hore ha Samuele e sa le moshanyana, “o ne a e-s’o tsebe Jehova.” (1 Samuele 3:7) Na see se bolela hore Samuele o ne a sa tsebe hakaalo ka Molimo oa hae? Che. Ha ho pelaelo hore batsoali ba hae le baprista ba ne ba mo rutile lintho tse ngata. Leha ho le joalo, ho latela setsebi se seng, lentsoe la Seheberu le sebelisitsoeng temaneng ena le ka “sebelisetsoa setsoalle se haufi-ufi.” Samuele o ne a e-s’o tsebe Jehova haufi-ufi joaloka nakong ea ha a se a sebeletsa e le ’muelli oa Jehova. Ha Samuele a ntse a hōla, o ile a tseba Jehova e le kannete, a ba le kamano e haufi le eena.—1 Samuele 3:19, 20.

7, 8.(a) Ke hobane’ng ha re sa lokela ho khathatsoa matla ke lithuto tse tebileng tsa Bibele? (b) Ke linnete life tse ling tsa Lentsoe la Molimo tse tebileng tseo re lokelang ho ithuta tsona?

⁷ Na u tsoela pele u rua tsebo ka Jehova e le hore e be motsoalle oa hao ea haufi? E le hore u ka etsa joalo ho hlokahala hore u “hlaolele tabatabelo” ea lijo tsa moea tse fanoang ke Molimo. (1 Petrose 2:2) U se ke ua khotsofalla ho fumana lithuto tsa motheo feela. Etsa boiteko ba ho ithuta lithuto tse ling tsa Bibele tse tebileng. (Baheberu 5:12-14) Na u khathatsoa matla ke lithuto tse joalo, u nka hore li thata? Haeba ho joalo, hopola hore Jehova ke ‘Morupeli e Moholo.’ (Esaia 30:20) O tseba ho fetisetsa linnete tse tebileng likelellong tse sa phethahalang tsa batho. ’Me a ka hlohonolofatsa boiteko ba hao bo tiileng ba ho utloisisa seo a u rutang sona.—Pesaleme ea 25:4.

⁸ Ke hobane’ng ha u sa hlahlobe maikutlo a hao mabapi le “lintho tse tebileng tsa Molimo”? (1 Bakorinthe 2:10) Tsena hase litaba tse tenang tse kang tseo baruti ba phehisanang khang ka tsona. Ke lithuto tse nang le molemo tse ka re rutang lintho tsa bohlokoa mabapi le kelello le pelo ea Ntate oa rōna ea lerato. Ka mohlala, thekollo, ‘sephiri se halalelang’ le lilekane tse fapaneng tseo Jehova a li sebelisitseng ho hlohonolofatsa batho ba hae le ho phetha merero ea hae—ke litaba tse thabisang le tse putsang ha motho a etsa lipatlisiso le ho ithuta ka tsona.—1 Bakorinthe 2:7.

9, 10.(a) Ke hobane’ng ha boikhohomoso bo le kotsi, ’me re tla thusoa ke’ng ho bo qoba? (b) Tabeng ea tsebo ka Jehova, ke hobane’ng ha re lokela ho ikokobetsa?

⁹ Ha u ntse u hōla tsebong ea linnete tse tebileng tsa moea, hlokomela kotsi e ka bakoang ke tsebo—e leng boikhohomoso. (1 Bakorinthe 8:1) Boikhohomoso bo kotsi, kaha bo arola batho ho Molimo. (Liproverbia 16:5; Jakobo 4:6) Hopola hore ha ho motho ea lokelang ho ikhohomosa ka lebaka la tsebo eo a nang le eona. Ka mohlala, nahana ka mantsoe a kenyelletso ea buka e babatsang khatelo-pele eo batho ba e entseng saenseng morao tjena: “Ha re ntse re ithuta haholo, re fumana hore tsebo ea rōna ea fokola. . . . Sohle seo re ithutileng sona hase letho ha se bapisoa le seo e leng hona re tla ithuta sona.” Boikokobetso bo joalo boa babatseha. Joale, ha re tla tsebong ea bohlokoahali—e leng tsebo ka Jehova Molimo—re na le lebaka le leholo le ho feta la hore re ikokobetse kamehla. Hobane’ng?

¹⁰ Hlokomela tse ling tsa lintho tseo Bibele e li buang ka Jehova. “Menahano ea hao e tebile haholo.” (Pesaleme ea 92:5) “Kutloisiso ea [Jehova] e ke ke ea lokolisoa.” (Pesaleme ea 147:5) “Kutloisiso ea [Jehova] e ke ke ea batlisisoa.” (Esaia 40:28) “O! botebo ba maruo le bohlale le tsebo ea Molimo!” (Baroma 11:33) Ho hlakile hore le ka mohla re ke ke ra tseba sohle ka Jehova. (Moeklesia 3:11) O re rutile lintho tse ngata tse babatsehang, leha ho le joalo, kamehla ho ntse ho e-na le tsebo e pharaletseng eo re ka ithutang ho eona. Na re fumana see se thabisa ebile se etsa hore re ikokobetse? Ka hona, ha re ntse re ithuta, e se eka re ka sebelisa tsebo ea rōna ho re thusa hore re atamele ho Jehova le ho thusa ba bang hore ba etse joalo—le ka mohla re se ke ra e sebelisetsa ho iphahamisetsa ba bang.—Matheu 23:12; Luka 9:48.

Bontša Hore U Rata Jehova

11, 12. (a) Tsebo eo re tsoelang pele ho e rua ka Jehova e lokela ho re ama joang? (b) Ke’ng se rerang hore na lerato la motho ho Molimo ke la sebele?

¹¹ Ka ho loketseng, moapostola Pauluse o ile a hokahanya tsebo le lerato. O ile a ngola a re: “Sena ke seo ke tsoelang pele ho se rapella, hore lerato la lōna le ka ata ka ho eketsehileng ka tsebo e nepahetseng le temoho e feletseng.” (Bafilipi 1:9) Ho e-na le ho etsa hore re ikhohomose ka boikakaso, linnete tsohle tsa bohlokoa tseo re ithutang tsona ka Jehova le ka merero ea hae li lokela ho eketsa lerato la rōna ho Ntate oa rōna oa leholimo.

¹² Ha e le hantle, ba bangata ba bolelang hore ba rata Molimo, ha ba mo rate e le kannete. Ho ka etsahala hore ebe ka botšepehi lipelo tsa bona lia ba susumetsa. Maikutlo a joalo a matle e bile aa babatseha, hafeela a lumellana le tsebo e nepahetseng. Empa ha e le ’ona feela ha aa lekana ho bontša lerato la ’nete ho Molimo. Hobane’ng? Hlokomela kamoo Lentsoe la Molimo le hlalosang lerato la ’nete kateng: “Se boleloang ke lerato la Molimo ke sena, hore re boloke litaelo tsa hae.” (1 Johanne 5:3) Kahoo, ho rata Jehova ke ha sebele hafeela ho tsamaea le liketso tse bontšang kutlo.

13. Ho tšaba Molimo ho tla re thusa joang ho bontša hore re rata Jehova?

¹³ Ho tšaba Molimo ho tla re thusa hore re mamele Jehova. Tšabo ena e matla le tlhompho e tebileng bakeng sa Jehova e tlisoa ke ho tsoela pele re rua tsebo ka eena, re ithuta ka khalalelo ea hae, khanya ea hae, matla a hae, toka ea hae, bohlale ba hae le lerato la hae, tse se nang moeli. Tšabo e joalo ke ea bohlokoa hore re atamele ho eena. Ha e le hantle, hlokomela seo Pesaleme ea 25:14 e se bolelang: “Kamano e haufi-ufi le Jehova ke ea ba mo tšabang.” Kahoo, haeba re e-na le tšabo e molemo ea hore re se ke ra halefisa Ntate oa rōna oa leholimo, re ka atamela ho eena. Ho tšaba Molimo ho tla re thusa hore re ele hloko keletso e tlalehiloeng ho Liproverbia 3:6: “U mo ele hloko litseleng tsohle tsa hao, ’me o tla otlolla litsela tsa hao.” See se bolela’ng?

14, 15. (a) Tse ling tsa liqeto tseo re lokelang ho li etsa letsatsi le leng le le leng ke life? (b) Re ka etsa liqeto joang ka tsela e bontšang hore re tšaba Molimo?

¹⁴ U tlameha ho etsa liqeto letsatsi le leng le le leng, tse khōlō le tse nyenyane. Ka mohlala, u qoqa ka’ng le basebetsi-’moho le uena, le bao u kenang sekolo le bona hammoho le baahelani? (Luka 6:45) Na u tla sebetsa ka thata mesebetsing eo u lokelang ho e etsa, kapa u tla etsa hlaahlaafethe mosebetsi ha o etsetsoe makhethe? (Bakolose 3:23) Na u tla khema le batho ba sa tsotelleng Jehova kapa ba sa mo rateng, kapa u tla rata ho matlafatsa kamano ea hao le batho ba sekametseng linthong tsa moea? (Liproverbia 13:20) U tla etsa’ng, le linthong tse nyenyane, ho ntšetsa pele lithahasello tsa ’Muso oa Molimo? (Matheu 6:33) Haeba u sebelisa melao-motheo ea Mangolo e kang e boletsoeng mona ha u etsa liqeto letsatsi le leng le le leng, ka sebele u tla be u ela Jehova hloko “litseleng tsohle tsa hao.”

¹⁵ Ha e le hantle, qetong e ’ngoe le e ’ngoe eo u e etsang, u lokela ho ipotsa: ‘Jehova o batla ha ke etsa’ng? O tla thabisoa ke ha ke etsa’ng?’ (Liproverbia 27:11) Ho bontša hore re tšaba Molimo ka tsela ena ke tsela e molemo ea ho bontša hore re rata Jehova. Ho tšaba Molimo ho tla boela ho re susumetse hore re lule re hloekile—moeeng, boitšoarong le ’meleng. Hopola hore temaneng eona eo ho eona Jakobo a khothalletsang Bakreste hore ba ‘atamele ho Molimo,’ o boetse oa khothatsa o re: “Hloekisang matsoho a lōna, lōna baetsalibe, ’me le hloekise lipelo tsa lōna, lōna ba hlōlehang ho etsa qeto.”—Jakobo 4:8.

16. Ha re fa Jehova, ke’ng seo re ke keng ra se phetha, leha ho le joalo, ke’ng seo re ka atlehang ho se etsa kamehla?

¹⁶ Ha e le hantle, ho bontša hore re rata Jehova hase feela ho qoba bobe. Lerato le boetse le re susumelletsa ho etsa se nepahetseng. Ka mohlala, re ikutloa joang ka lintho tse ngata tseo Jehova a re fileng tsona? Jakobo o ile a ngola a re: “Mpho e ’ngoe le e ’ngoe e molemo le neo e ’ngoe le e ’ngoe e phethahetseng e tsoa holimo, kaha e theoha ho Ntate oa maseli a leholimo.” (Jakobo 1:17) Ke ’nete hore ha re fa Jehova matlotlo a rōna ha re mo ruise kaha o se a ntse a e-na le lintho tsohle. (Pesaleme ea 50:12) ’Me ha re fa Jehova nako ea rōna le matla a rōna, ha re mo etsetse seo a ke keng a se khona. Esita leha re ne re ka hana ho bolela litaba tse molemo tsa ’Muso oa Molimo, o ne a ka etsa hore majoe a bue! Joale ke hobane’ng ha re fa Jehova matlotlo a rōna, nako ea rōna le matla a rōna? Lebaka le ka sehloohong ke hore ka ho etsa joalo re bontša hore re mo rata ka pelo eohle, moea oohle, kelello eohle le matla ’ohle.—Mareka 12:29, 30.

17. Ke’ng se ka re susumetsang hore re fe Jehova re nyakaletse?

¹⁷ Ha re fa Jehova, re lokela ho mo fa ka thabo, “kaha Molimo o rata ea fanang a nyakaletse.” (2 Bakorinthe 9:7) Molao-motheo o tlalehiloeng ho Deuteronoma 16:17 o ka re thusa hore re fane re nyakaletse: “Mpho ea letsoho la e mong le e mong e lokela ho lekana le tlhohonolofatso eo Jehova Molimo oa hao a u fileng eona.” Ha re nahana hore na Jehova o bile seatla se bulehileng hakaakang ho rōna, re ikutloa re rata ho mo fa re nyakaletse. Ho fana ho joalo hoa mo thabisa, feela joalokaha mpho e nyenyane ea ngoana ea ratoang e thabisa motsoali. Ha re bontša lerato la rōna ka tsela ena, re tla atamela ho Jehova.

Iketsetse Setsoalle ka Thapelo

18. Ke hobane’ng ha e le habohlokoa ho nahana hore na re ka ntlafatsa lithapelo tsa rōna joang?

¹⁸ Ha re rapela boinotšing re fumana monyetla oa bohlokoa oa ho buisana le Ntate oa rōna oa leholimo re mo phetlela sefuba. (Bafilipi 4:6) Kaha thapelo ke mokhoa oa bohlokoa oa ho atamela Molimo, ke habohlokoa ho imamela le ho nahana hore na lithapelo tsa rōna ke tsa mofuta ofe. Ha lia lokela ho etsoa ka bokheleke empa li lokela ho etsoa ka botšepehi ho tloha pelong. Re ka ntlafatsa lithapelo tsa rōna joang?

19, 20. Ke hobane’ng ha re lokela ho thuisa pele re rapela, ’me ke lintho life tse loketseng tseo re ka thuisang ka tsona?

¹⁹ Re ka ’na ra leka ho thuisa pele re rapela. Haeba re thuisa esale pele, lithapelo tsa rōna e ka ba tse tobileng le tse utloahalang, ka hona re ka qoba ho ’na re pheta-pheta lipolelo tse tloaelehileng. (Liproverbia 15:28, 29) Mohlomong ho ka thusa ho nahanisisa ka litaba tsa sehlooho tseo Jesu a buileng ka tsona thapelong ea hae ea mohlala ebe re nahana hore na li amana joang le maemo a rōna. (Matheu 6:9-13) Ka mohlala, re ka ipotsa hore na re ka etsa eng e fokolang ho phetha thato ea Jehova mona lefatšeng. Na re ka bolella Jehova takatso ea rōna ea hore a re sebelise ka hohle kamoo a ratang kateng ’me re kōpe hore a re thuse ho phetha kabelo efe kapa efe eo a re fileng eona? Na re imetsoe ke ho ngongoreha ka lintho tseo re li hlokang? Ho hlokahala hore re tšoareloe libe life, hona ke bo-mang bao ho hlokahalang hore re ba tšoarele haholoanyane? Re khathatsoa ke liteko life, ’me na rea elelloa hore ho potlakile hore re fumane tšireletso ea Jehova ho tsona?

²⁰ Ntle ho moo, re ka nahana ka batho bao re ba tsebang ba nang le mathata a itseng ba hlokang thuso ea Jehova ka ho khethehileng. (2 Bakorinthe 1:11) Leha ho le joalo, ha rea lokela ho lebala ho leboha. Ka sebele haeba re ipha nako ea ho nahana ka sena, re tla ba le mabaka a ho leboha Jehova le ho mo rorisa letsatsi le leng le le leng ka lebaka la molemo oa hae o moholo. (Deuteronoma 8:10; Luka 10:21) Ho etsa sena ho na le molemo o mong—ho ka re thusa hore re be le pono e nepahetseng le e bontšang kananelo bophelong.

21. Re ka ithuta mehlala efe ea Mangolo e ka re thusang ha re rapela Jehova?

²¹ Ho ithuta le hona ho ka ntlafatsa lithapelo tsa rōna. Ka Lentsoeng la Molimo ho tlalehiloe lithapelo tseo re ka li etsisang tsa banna le basali ba tšepahalang. Ka mohlala, haeba re tobane le bothata bo boholo bo re tšoenyang le bo re tšosang hore na ho tla etsahala eng ka rōna kapa ka baratuoa ba rōna, re ka ’na ra bala thapelo eo Jakobo a ileng a e etsa pele a kopana le mor’abo ea tletseng boiphetetso, Esau. (Genese 32:9-12) Kapa re ka ithuta thapelo e ileng ea etsoa ke Morena Asa ha lebotho la Baethiopia ba ka bang milione le ne le sokela batho ba Molimo. (2 Likronike 14:11, 12) Haeba re tšoenngoa ke bothata bo ka ’nang ba tlisetsa lebitso la Jehova thohako, joale re ka ’na ra nahana ka thapelo ea Elia ka pel’a barapeli ba Baale Thabeng ea Karmele, joalokaha re ka nahana ka thapelo ea Nehemia mabapi le boemo bo utloisang bohloko ba Jerusalema. (1 Marena 18:36, 37; Nehemia 1:4-11) Ho bala le ho thuisa ka lithapelo tse joalo ho ka matlafatsa tumelo ea rōna ha ba ha re hlomella hore na re ka rapela Jehova joang ka mathata a re imelang.

22. Temana ea selemo ea 2003 e re’ng, ’me selemong see kaofela re ka ipotsa’ng?

²² Ka sebele, ha ho ntho e hlomphehang, kapa pakane e molemo ho feta ea ho ela hloko keletso ea Jakobo ea hore re ‘atamele ho Molimo.’ (Jakobo 4:8) E se eka re ka etsa joalo ka ho tsoela pele tsebong ea rōna ka Molimo, ka ho batla ho bontša hore re mo rata ka ho eketsehileng le ka ho ntlafatsa katamelano ea rōna le eena lithapelong tsa rōna. Selemong sa 2003, ha re ntse re hopotse Jakobo 4:8 joalokaha e le temana ea selemo, a re tsoeleng pele ho itlhahloba hore na ka sebele re atamela ho Jehova. Re re’ng ka mantsoe a qetellang a temana ee? Jehova “o tla atamela ho lōna” joang, ’me a tlise melemo efe? Sehlooho se latelang se tla tšohla taba ena.

“O Tla Atamela ho Lōna”

“[Molimo ha a] hōle le e mong le e mong oa rōna.”—LIKETSO 17:27.

1, 2. (a) Ha re lahlela mahlo leholimong le tletseng linaleli, re ka ’na ra ipotsa potso efe ka ’Mōpi? (b) Bibele e re tiisetsa joang hore batho ke ba bohlokoa mahlong a Jehova?

NA U kile ua lahlela mahlo leholimong le tletseng linaleli bosiung bo elileng ’me ua hlolloa haholo? Boieane ba linaleli le bophara ba sepakapaka li etsa hore u hlolloe. Bokahohleng bona bo boholo, lefatše ke lethebanyana feela. Na see se bolela hore ’Mōpi “Ea Phahameng ka ho Fetisisa holim’a lefatše lohle,” o phahame haholo hoo a ke keng a ameha ka batho kapa o hōle haholo ’me ba ke ke ba mo batla e le hore ba mo tsebe?—Pesaleme ea 83:18.

² Bibele e re tiisetsa hore batho ke ba bohlokoa mahlong a Jehova. Ha e le hantle Lentsoe la Molimo le re khothalletsa hore re mo batle, le re: ‘Ha a hōle le e mong le e mong oa rōna.’ (Liketso 17:27; 1 Likronike 28:9) Ka sebele, haeba re nka mehato ea ho atamela ho Molimo, o tla re thusa boitekong ba rōna. Ka tsela efe? Mantsoe a temana ea rōna ea selemo ea 2003 a re fa karabo e thabisang: “O tla atamela ho lōna.” (Jakobo 4:8) A re hlahlobeng a mang a mahlohonolo ao Jehova a a tšollelang ho ba haufi le eena.

Mpho e Khethehileng e Tsoang ho Jehova

 3. Ke mpho efe eo Jehova a e fang ba atamelang ho eena?

³ Taba ea pele, bahlanka ba Jehova ba na le mpho ea bohlokoa eo Jehova a e boloketseng batho ba hae. Matla ’ohle, leruo le thuto tsa tsamaiso ena ea lintho li ke ke tsa re fa mpho ena. Ke mpho e khethehileng, eo Jehova a e fang feela ba haufi le eena. Ke efe? Lentsoe la Molimo le re: “Haeba . . . u bitsa temoho, haeba u ntse u [e] batla joaloka silevera, ’me u ntse u [e] batlisisa joaloka matlotlo a patiloeng, tabeng eo u tla utloisisa ho tšaba Jehova, ’me u tla fumana tsebo ea Molimo. Etsoe Jehova o fana ka bohlale.” (Liproverbia 2:3-6) Nahana ha batho ba sa phethahalang ba se ba fumana “tsebo ea Molimo”! Mpho eo—e leng tsebo e fumanoang Lentsoeng la Molimo—e tšoantšoa le “matlotlo a patiloeng.” Hobane’ng?

4, 5. Ke hobane’ng ha “tsebo ea Molimo” e ka tšoantšoa le “matlotlo a patiloeng”? Etsa mohlala.

⁴ Har’a tse ling, tsebo ea Molimo ke ea bohlokoa ka ho fetisisa. O mong oa meputso ea eona ea bohlokoa ke tšepo ea bophelo bo sa feleng. (Johanne 17:3) Empa tsebo ena e entša bophelo ba rōna esita le hona joale. Ka mohlala, ka lebaka la ho ithuta Lentsoe la Molimo ka hloko re fumane likarabo lipotsong tsa bohlokoa tse kang: Lebitso la Molimo ke mang? (Pesaleme ea 83:18) Ha e le hantle, ho etsahala’ng ka bafu? (Moeklesia 9:5, 10) Morero oa Molimo ke ofe ka lefatše le batho? (Esaia 45:18) Hape re tseba hore tsela e molemo ka ho fetisisa ea ho phela ke ho sebelisa keletso e bohlale ea Bibele. (Esaia 30:20, 21; 48:17, 18) Kahoo, re na le tataiso e molemo e re thusang ho loana ka katleho le matšoenyeho a bophelo le ho phela ka tsela e tlisang thabo ea ’nete le khotsofalo. Ka holim’a tsohle, ho ithuta Lentsoe la Molimo ho re thusitse ho tseba litšoaneleho tse babatsehang tsa Jehova le ho atamela ho eena. Ke’ng ea bohlokoa ho feta ho ba le kamano e haufi le Jehova e thehiloeng ‘tsebong ea Molimo’?

⁵ Ho na le lebaka le leng leo ka lona tsebo ea Molimo e ka tšoantšoang le “matlotlo a patiloeng.” Joaloka matlotlo a mangata, le eona e fumaneha seoelo lefatšeng lena. Ho baahi ba lefatše ba limilione tse likete tse tšeletseng, ba ka bang limilione tse tšeletseng ke barapeli ba Jehova ba fumaneng “tsebo ea Molimo,” e leng hoo e ka bang motho a le mong ho ba 1 000. Ho bontša hore na ho tseba ’nete ea Lentsoe la Molimo ke letlotlo le fumanehang seoelo hakaakang, nahana ka potso e le ’ngoe feela ea Bibele: Ho etsahala’ng ha batho ba e-shoa? Mangolo a re tsebisa hore moea oa shoa le hore bafu ha ba tsebe letho. (Ezekiele 18:4) Leha ho le joalo, tumelo e fosahetseng ea hore ka hare ho motho ho na le ntho e tsoelang pele e phela ha a se a shoele e amoheloa ke malumeli a mangata a lefatše. Ke thuto ea motheo malumeling a Bokreste-’mōtoana. E boetse e atile Bobuddheng, Bohindung, Boislamong, Bojaineng, Bojudeng, Boshintong, Bosikheng le Botaong. Nahana feela—batho ba limilione tse likete ba khelositsoe ke thuto ena e le ’ngoe ea bohata!

6, 7. (a) Ke bo-mang feela ba ka fumanang “tsebo ea Molimo”? (b) Ke mohlala ofe o bontšang hore Jehova o entse hore re lemohe seo “ba bohlale le ba nang le kelello” ba sa se tsebeng?

⁶ Ke hobane’ng ha e se batho ba bangata ba fumaneng “tsebo ea Molimo”? Hobane ntle ho thuso ea hae, re ke ke ra utloisisa ka botlalo se boleloang ke Lentsoe la Molimo. Hopola hore tsebo ena ke mpho. Jehova o e fa feela ba ikemiselitseng ho batlisisa ka Lentsoeng la hae ka botšepehi le ka boikokobetso. Ho ka ’na ha etsahala hore ebe ha ba “bohlale ka tsela ea nama.” (1 Bakorinthe 1:26) Ba bangata har’a bona ho ka etsahala hore ba nkoe e le “ba sa rutehang le ba tloaelehileng” ho ea ka litekanyetso tsa lefatše. (Liketso 4:13) Empa, seo hase sa bohlokoa. Jehova o re putsa ka “tsebo ea Molimo” ka lebaka la seo lipelo tsa rōna li leng sona.

⁷ Nahana ka mohlala ona. Litsebi tse ngata tsa Bokreste-’mōtoana li ngotse libuka tse ngata tse hlalosang Bibele. Libuka tse joalo li ka ’na tsa hlalosa semelo sa lintho, mantsoe a Seheberu le a Segerike le lintho tse ling. Ka thuto e ngata eo li nang le eona, na ka sebele litsebi li fumane “tsebo ea Molimo”? Na ebe li utloisisa sehlooho sa Bibele ka ho hlaka—e leng ho tlosa qoso bobusing ba Jehova ka ’Muso oa hae oa leholimo? Na lia tseba hore Jehova Molimo hase karolo ea Boraro-bo-bong? Rōna rea tseba. Hobane’ng? Hobane Jehova o entse hore re lemohe lintho tsa ’nete tsa moea tseo ba bangata “ba bohlale le ba nang le kelello” ba sa li tsebeng. (Matheu 11:25) Jehova o putsa ba atametseng ho eena hakaakang!

“Jehova o Lebela Bohle ba mo Ratang”

8, 9. (a) Davida o hlalositse tlhohonolofatso e ’ngoe ea ba atamelang ho Jehova joang? (b) Ke hobane’ng ha Bakreste ba ’nete ba hloka tšireletso ea Molimo?

⁸ Ba atametseng ho Jehova ba thabela tlhohonolofatso e ’ngoe—e leng ho sireletsoa ke Eena. Mopesaleme Davida ea ileng a feta litsietsing tse ngata o ile a ngola, a re: “Jehova o haufi le bohle ba ipiletsang ho eena, bohle ba ipiletsang ho eena ka ’nete. O tla khotsofatsa takatso ea ba mo tšabang, o tla utloa mohoo oa bona o kōpang thuso, ’me o tla ba pholosa. Jehova o lebela bohle ba mo ratang.” (Pesaleme ea 145:18-20) E, Jehova o haufi le ba mo ratang kahoo a ka utloa ka potlako mehoo ea bona ha ba kōpa thuso.

⁹ Ke hobane’ng ha re hloka tšireletso ea Molimo? Ntle le ho utloa liphello tsa ho phela ‘linakong tsena tse mahlonoko tseo ho leng thata ho sebetsana le tsona,’ Bakreste ba ’nete ba hlaseloa ka ho khetheha ke Sera se seholo sa Jehova e leng Satane Diabolose. (2 Timothea 3:1) Sera sena se maqiti se ikemiselitse ho re “harola.” (1 Petrose 5:8) Satane oa re hlorisa, oa re hatella ebile oa re leka. O boetse o sheba litšekamelo tsa kelello le tsa pelo tseo a ka li sebelisang. O na le pakane eo a e habileng: e leng ho fokolisa tumelo ea rōna le ho senya bomoea ba rōna. (Tšenolo 12:12, 17) Kaha re na le sera se matla haholo seo re loanang le sona, na ha ho re khothatse ho tseba hore “Jehova o lebela bohle ba mo ratang”?

10. (a) Jehova o lebela batho ba hae joang? (b) Tšireletso ea bohlokoa ka ho fetisisa ke efe, hona hobane’ng?

¹⁰ Empa Jehova o lebela batho ba hae joang? Tšepiso ea hore o tla re sireletsa ha e bolele hore ha re sa tla ba le mathata tsamaisong ena; hape ha e bolele hore o tlamehile ho etsa mehlolo molemong oa rōna. Ho sa tsotellehe seo, Jehova o sireletsa batho ba hae nameng e le sehlopha. Ha e le hantle, a ke ke a lumella Diabolose hore a felise barapeli ba ’nete lefatšeng! (2 Petrose 2:9) Ka holim’a tsohle, Jehova o re sireletsa moeeng. O re fa seo re se hlokang hore re mamelle liteko le ho sireletsa kamano ea rōna le eena. Qetellong, ho sireletsoa moeeng ke tšireletso ea bohlokoa ka ho fetisisa. Hobane’ng? Hobane ha re e-na le kamano le Jehova, ha ho letho—esita le lefu—le ka re ntšang kotsi ka ho sa feleng.—Matheu 10:28.

11. Jehova o fane ka litokisetso life ho sireletsa batho ba hae moeeng?

¹¹ Jehova o entse litokisetso tse ngata tsa ho sireletsa moeeng ba atametseng ho eena. Lentsoeng la hae, Bibele, o re fa bohlale ba ho sebetsana ka katleho le liteko tse sa tšoaneng. (Jakobo 1:2-5) Ho sebelisa keletso e thusang e fumanoang ka Mangolong, ke tšireletso. Ntle ho moo, Jehova o “fana ka moea o halalelang . . . ho ba mo kōpang.” (Luka 11:13) Moea ona ke matla a maholo ka ho fetisisa bokahohleng, kahoo, ka sebele o ka re thusa ho tobana ka katleho le teko efe kapa efe e ka re oelang. Ka Kreste, Jehova o fana ka “limpho tseo e leng banna.” (Baefese 4:8) Banna bana ba nang le litšoaneleho tsa moea ba leka ho bonahatsa qenehelo e tebileng ea Jehova ha ba thusa barapeli-’moho le bona.—Jakobo 5:14, 15.

12, 13. (a) Jehova o sebelisa’ng ho re fa lijo tsa moea ka nako e tšoanetseng? (b) U ikutloa joang ka litokisetso tsa Jehova tse bolokang bomoea ba rōna?

¹² Jehova o fane ka ho hong hape ho re sireletsang: e leng lijo tsa moea ka nako e tšoanetseng. (Matheu 24:45) Jehova o re fa seo re se hlokang ka nako eo re se hlokang ka eona ka lingoliloeng, ho akarelletsa le koranta ea Molula-Qhooa le Tsoha!, esita le liboka, likopano tse khōlō le tse nyenyane. Na u hopola lekhetlo leo ka lona u ileng ua utloa ntho e ileng ea u ama maikutlo, ea u matlafatsa kapa ea u tšelisa sebokeng sa Bokreste, kopanong e khōlō kapa e nyenyane? Na u kile ua bala sehlooho ho e ’ngoe ea likoranta tse boletsoeng ka holimo ’me ua ikutloa hore e ngoletsoe uena?

¹³ Sebetsa se sebetsang haholo sa Satane ke ho nyahama, ’me hoa re ama. Oa tseba hore ha re nyahama ka nako e telele re tla felloa ke matla, ebile re tla hlaseloa habonolo. (Liproverbia 24:10) Kaha Satane o leka ho sebelisa maikutlo a ho nyahama, re hloka thuso. Nako le nako makasine ea Molula-Qhooa le ea Tsoha! li hatisa lihlooho tse re thusang ho loantša ho nyahama. Ha a bua ka se seng sa lihlooho tseo, morali e mong oabo rōna oa Mokreste o ile a ngola, a re: “Ke bala sehlooho seo hoo e ka bang letsatsi le leng le le leng, ’me meokho e sa ntsane e keleketla. Ke beha makasine eo pel’a bethe e le hore nka e bala neng le neng ha ke utloa ke nyahama. Ka lihlooho tse kang sena, ke utloa Jehova a nkopa ka liatla tsa hae tse sireletsang.”a Na ha re lebohe Jehova hore ebe o re fa lijo tsa moea tse nakong? Hopola hore litokisetso tsa hae tse bolokang bomoea ba rōna ke bopaki ba hore o haufi le rōna, ’me o re sirelelitse ka tlhokomelo.

Ho Bua le “Ea Utloang Thapelo”

14, 15. (a) Ke tlhohonolofatso efe eo Jehova a e fang ba mo atamelang? (b) Ke hobane’ng ha ho bua le Jehova ka bolokolohi ka thapelo e le mpho e babatsehang?

¹⁴ Na u hlokometse hore ha batho ba fumana matla le bolaoli, hangata ha ba sa atameleha ho bafo ba bona? Na Jehova Molimo le eena o joalo? Na le eena o phahame hoo a ke keng a natsa seo batho feela ba mo bolellang sona? Ha a joalo ho hang! Tlhohonolofatso e ’ngoe eo Jehova a e fang ba mo atamelang ke mpho ea thapelo. Ho bua ka bolokolohi le “Ea Utloang thapelo” ke mpho e babatsehang e le kannete. (Pesaleme ea 65:2) Hobane’ng?

¹⁵ Ka mohlala: Motsamaisi oa feme e khōlō o na le mesebetsi e mengata. O etsa qeto hore na ke mesebetsi efe e tla etsoa ke eena ka ho toba le e tla etsoa ke ba bang. Ka ho tšoanang, Morena ’Musi oa bokahohle a ka khetha ho etsa qeto ea hore na ke lintho life tse tla etsoa ke eena le hore na ke life tse tla etsoa ke ba bang. Nahana ka sohle seo Jehova a se fileng Mora oa hae ea ratoang, Jesu, hore a se etse. Mora o filoe “matla a ho ahlola.” (Johanne 5:27) Mangeloi a ‘behiloe tlas’a hae.’ (1 Petrose 3:22) Jesu o filoe moea o halalelang o matla oa Jehova hore a o sebelise habonolo ho mo thusa hore a etelle pele barutuoa ba hae lefatšeng. (Johanne 15:26; 16:7) Ke kahoo Jesu a neng a ka re: “Ke filoe matla ’ohle leholimong le lefatšeng.” (Matheu 28:18) Empa tabeng ea lithapelo tsa rōna, Jehova o ikhethetse hore li mameloe ke eena ka ho toba. Ke ka lebaka leo Bibele e re laetseng ho lebisa lithapelo tsa rōna ho Jehova feela, ka lebitso la Jesu.—Pesaleme ea 69:13; Johanne 14:6, 13.

16. Ke hobane’ng ha re ka kholiseha hore ehlile Jehova o mamela lithapelo tsa rōna?

¹⁶ Na ehlile Jehova o mamela lithapelo tsa rōna? Haeba a ne a sa thahaselle kapa a sa tsotelle, o ne a ke ke a re khothalletsa hore re ‘phehelle thapelong’ kapa hore re lahlele meroalo ea rōna le matšoenyeho a rōna ho eena. (Baroma 12:12; Pesaleme ea 55:22; 1 Petrose 5:7) Bahlanka ba tšepahalang ba mehleng ea Bibele ba ne ba kholisehile ka ho feletseng hore Jehova o mamela thapelo. (1 Johanne 5:14) Ka hona, mopesaleme Davida o ile a re: “[Jehova] o utloa lentsoe la ka.” (Pesaleme ea 55:17) Le rōna re na le mabaka a utloahalang a ho kholiseha hore Jehova o haufi, o ikemiselitse ho utloa sohle seo re se nahanang le se re amang.

Jehova o Putsa Bahlanka ba Hae

17, 18. (a) Jehova o ikutloa joang ka tšebeletso e etsoang ka botšepehi ke libōpuoa tsa hae tse bohlale? (b) Hlalosa kamoo Liproverbia 19:17 e bontšang kateng hore Jehova o lemoha mohau oo re o etsetsang ba bang.

¹⁷ Boemo ba Jehova e le ’Musi oa Bokahohle ha bo angoe ke seo batho feela ba ka se etsang kapa ba ka hanang ho se etsa. Ho sa tsotellehe seo, Jehova ke Molimo ea nang le kananelo. Ha e le hantle, o nka tšebeletso ea libōpuoa tsa hae tse tšepahalang le tse bohlale e le ea bohlokoa, ebile oa e ananela. (Pesaleme ea 147:11) Ka lebaka leo, ona ke molemo o mong o thabeloang ke ba atametseng ho Jehova: O putsa bahlanka ba hae.—Baheberu 11:6.

¹⁸ Bibele e bontša ka ho hlaka hore Jehova o nka seo barapeli ba hae ba se etsang e le sa bohlokoa. Ka mohlala, rea bala: “Ea bontšang mohau ho ea tlaase o alima Jehova, ’me O tla mo buseletsa tšoaro ea hae.” (Liproverbia 19:17) Molao oa Moshe o ile oa bontša hore Jehova o nahanela ba tlaase ka mohau. (Levitike 14:21; 19:15) Jehova o ikutloa joang ha re etsisa mohau oa hae ha re sebelisana le ba tlaase? Ha re fa ba tlaase, re sa lebella hore ba re buseletse, Jehova o nka sena e le ho Mo alima. Jehova o tšepisa hore o tla re buseletsa ka ho re fa mohau le litlhohonolofatso. (Liproverbia 10:22; Matheu 6:3, 4; Luka 14:12-14) E, Jehova o ameha maikutlo haeba re bontša kutloelo-bohloko ho morapeli-’moho le rōna ea hlokang. Re motlotlo hakaakang ho tseba hore Ntate oa rōna oa leholimo o lemoha mohau oo re o etsetsang ba bang!—Matheu 5:7.

19. (a) Ke hobane’ng ha re ka kholiseha hore Jehova o ananela seo re se etsang mosebetsing oa ho bolela le oa ho etsa barutuoa? (b) Jehova o putsa tšebeletso e etsoang bakeng sa ho tšehetsa ’Muso oa hae joang?

¹⁹ Haholo-holo Jehova o ananela seo re se etsang molemong oa ’Muso oa hae. Ha re atamela ho Jehova, ho ke ke ha e-ba thata hore re batle ho sebelisa nako ea rōna, matla a rōna le matlotlo a rōna hore re kopanele ka hohle kamoo re ka khonang mosebetsing oa ho bolela ka ’Muso le oa ho etsa barutuoa. (Matheu 28:19, 20) Ka linako tse ling, re ka ’na ra bona eka re etsa ho honyenyane haholo. Lipelo tsa rōna tse sa phethahalang li ka ba tsa etsa hore re ipotse hore na ebe Jehova o thabela boiteko ba rōna. (1 Johanne 3:19, 20) Empa Jehova o nka mpho e ’ngoe le e ’ngoe e le ea bohlokoa ho sa tsotellehe hore na e nyenyane hakae, hafeela e tloha pelong e susumetsoang ke lerato. (Mareka 12:41-44) Bibele ea re tiisetsa e re: “Molimo hase ea sa lokang hoo a ka lebalang mosebetsi oa lōna le lerato leo le ileng la le bontša bakeng sa lebitso la hae.” (Baheberu 6:10) Ka sebele, Jehova o hopola esita le tšebeletso e nyenyane ka ho fetisisa e etsoang ho tšehetsa ’Muso oa hae ebile oa e putsa. Ntle ho litlhohonolofatso tse enneng tsa moea hona joale, re ka lebella bophelo bo thabileng lefatšeng le lecha le tlang moo Jehova a tla fana ka seatla se bulehileng ’me a khotsofatse takatso e lokileng ea bohle ba atamelang ho eena!—Pesaleme ea 145:16; 2 Petrose 3:13.

20. Selemong sa 2003, re ka hopola mantsoe a temana ea rōna ea selemo joang, ’me liphello e tla ba life?

²⁰ Selemong sa 2003, a re ipotseng hore na ebe re etsa boiteko bo tsoelang pele ba ho atamela ho Ntate oa rōna oa leholimo. Haeba re etsa joalo, re ka kholiseha hore o tla etsa seo a se tšepisitseng. Etsoe, ‘Molimo a ke ke a bua leshano.’ (Tite 1:2) Haeba u atamela ho eena, le eena o tla atamela ho uena. (Jakobo 4:8) Liphello e tla ba life? E tla ba mahlohonolo a enneng hona joale le tebello ea ho ’na re atamela ho Jehova ka ho sa feleng!

[Mongolo o botlaaseng ba leqephe]