Tšepa Jehova ka ho Feletseng Linakong Tsa Mahlomola

“Molimo ke setšabelo le matla a rōna, thuso e fumanoang hang-hang nakong ea mahlomola.”—PESALEME EA 46:1.

1, 2. (a) Ke mohlala ofe o bontšang hore ha hoa lekana ho bolela hore re tšepile Molimo? (b) Ke hobane’ng ha re sa lokela ho bolela ka molomo feela hore re tšepile Jehova?

HO BONOLO ho bolela hore re tšepile Molimo ho feta ho bontša seo ka liketso. Ka mohlala, ka nako e telele mantsoe a reng, “Re Tšepile Molimo” a ’nile a hlaha licheleteng tsa pampiri le tsa tšepe United States.a Ka 1956, Lekhotla le Etsang Melao la United States le ile la fetisa molao o phatlalatsang hore mantsoe ao e lokela ho ba lepetjo la sechaba la United States. Ho makatsang ke hore, batho ba bangata—eseng feela naheng eo empa lefatšeng lohle—ba tšepile chelete le maruo haholo ho feta Molimo.—Luka 12:16-21.

² Joaloka Bakreste ba ’nete, ha rea lokela ho bolela ka molomo feela hore re tšepile Jehova. Feela joalokaha “tumelo e se nang mesebetsi e shoele,” boipolelo leha e le bofe ba hore re tšepile Molimo le bona ha bo na thuso haeba re sa bo bontše ka liketso tsa rōna. (Jakobo 2:26) Sehloohong se ka pele ho sena, re ithutile hore re bontša hore re tšepile Jehova ha re retelehela ho eena ka thapelo, ha re batla tataiso Lentsoeng la hae le ha re batla tataiso mokhatlong oa hae o hlophisitsoeng. Joale a re tšohleng kamoo re ka sebelisang mehato eo e meraro kateng linakong tsa mahlomola.

Ha Motho a Feletsoe ke Mosebetsi Kapa a Fumana Moputso o Monyenyane

 3. Ke mathata afe a lichelete ao bahlanka ba Jehova ba bang le ’ona ‘linakong tsee tse mahlonoko,’ hona re tseba joang hore Molimo o ikemiselitse ho re thusa?

³ ‘Linakong tsena tse mahlonoko,’ rōna joaloka Bakreste re ba le mathata a lichelete a tšoanang le a batho ba bang. (2 Timothea 3:1) Kahoo, re sa lebella, re ka iphumana re se re feletsoe ke mosebetsi. Kapa re ka iphumana re se re tlameha ho sebetsa lihora tse telele bakeng sa moputso o monyenyane. Tlas’a maemo a joalo, re ka fumana ho le thata ho ‘lokisetsa hore ho be le lintho tse hlokahalang bakeng sa malapa a rōna.’ (1 Timothea 5:8) Na Molimo ea Phahameng ka ho Fetisisa o ikemiselitse ho re thusa linakong tse joalo? E, ka sebele! Ke ’nete hore Jehova ha a re sireletse mathateng ’ohle a bophelo tsamaisong ena ea lintho. Leha ho le joalo haeba re mo tšepile, mantsoe a Pesaleme ea 46:1 a tla sebetsa ho rōna: “Molimo ke setšabelo le matla a rōna, thuso e fumanoang hang-hang nakong ea mahlomola.” Leha ho le joalo, re ka bontša joang hore re tšepile Jehova ka ho feletseng ha re le mathateng a lichelete?

 4. Ha re le mathateng a lichelete, re ka rapella eng, ’me Jehova o arabela lithapelo tse joalo joang?

⁴ Tsela e ’ngoe eo re ka bontšang hore re tšepile Jehova ka eona ke ka ho retelehela ho eena ka thapelo. Empa ke lintho life tseo re ka li rapellang? Hona joale ho feta leha e le neng pele, ho ka ’na ha hlokahala hore re be le bohlale bo sebetsang ha re le mathateng a lichelete. Ka sebele, re lokela ho bo rapella! Lentsoe la Jehova lea re tiisetsa le re: “Haeba mang kapa mang oa lōna a haelloa ke bohlale, a ’ne a kōpe Molimo, hobane o fana ka seatla se bulehileng ho bohle a bile a sa nyelise; ’me o tla bo fuoa.” (Jakobo 1:5) E, kōpa Jehova hore a u fe bohlale—e leng bokhoni ba ho sebelisa tsebo, kutloisiso le temohisiso hamolemo—e le hore u etse liqeto tse bohlale le ho khetha lintho tse nepahetseng. Ntate oa rōna ea lerato oa leholimo o re tiisetsa hore o tla mamela lithapelo tse joalo. O lula a ikemiselitse ho otlolla litsela tsa ba mo tšepang ka lipelo tsohle.—Pesaleme ea 65:2; Liproverbia 3:5, 6.

5, 6. (a) Ke hobane’ng ha re ka leba Lentsoeng la Molimo ha re batla thuso ea ho sebetsana le mathata a lichelete? (b) Ha re feletsoe ke mosebetsi, ke eng seo re ka ’nang ra se etsa ho fokotsa ho tšoenyeha?

⁵ Tsela e ’ngoe ea ho bontša hore re tšepile Jehova ke ka ho batla tataiso Lentsoeng la Molimo. Likhopotso tsa hae tse bohlale tse fumanoang ka Bibeleng li ipakile li ‘tšepahala haholo.’ (Pesaleme ea 93:5) Le hoja buka eo e bululetsoeng e ngotsoe lilemo tse fetang 1 900 tse fetileng, e ntse e fupere keletso e tšepahalang le temohisiso e tebileng e ka re thusang ho sebetsana hamolemo le mathata a lichelete. Nahana ka mehlala e meng ea bohlale bo tsoang ka Bibeleng.

⁶ Khale-khale Morena ea bohlale Solomone o ile a re: “Boroko ba ea sebeletsang bo monate, ho sa tsotellehe hore na ke ho honyenyane kapa ho hongata hoo a ho jang; empa lintho tse ngata tsa morui ha li mo lumelle ho robala.” (Moeklesia 5:12) Ho hloka nako le chelete ho lokisa lintho tsa rōna tse bonahalang, ho li hloekisa, ho li hlokomela, le ho li sireletsa. Kahoo ha re feletsoe ke mosebetsi, re ka ’na ra sebelisa monyetla oo ho hlahloba bocha mokhoa oa rōna oa bophelo, re leke ho khetholla pakeng tsa lintho tseo re li hlokang le tseo re li batlang. E le hore re fokotse ho tšoenyeha, ho ka ba bohlale hore re etse liphetoho tse itseng. Ka mohlala, na ho ka khoneha hore re nolofatse bophelo ba rōna, mohlomong re fallele ntlong e nyenyane kapa re tlose lintho tse bonahalang tse sa hlokahaleng?—Matheu 6:22.

7, 8. (a) Jesu o bontšitse joang hore oa tseba hore batho ba sa phethahalang ba na le tšekamelo ea ho tšoenyeha ka ho feteletseng ka lintho tse bonahalang (Bona hape le mongolo o botlaaseng ba leqephe.) (b) Jesu o fane ka keletso efe e bohlale mabapi le ho qoba ho tšoenyeha ho sa lokelang?

⁷ Thutong ea Thabeng, Jesu o ile a eletsa a re: “Khaotsang ho tšoenyeha ka meea ea lōna hore na le tla ja’ng kapa le tla noa’ng, kapa ka ’mele ea lōna hore na le tla apara’ng.”b (Matheu 6:25) Jesu o ne a tseba hore ka tlhaho batho ba sa phethahalang ba tšoenyeha ka ho fumana lintho tsa motheo tsa ho iphelisa. Leha ho le joalo, re ka etsa joang hore re ‘khaotse ho tšoenyeha’ ka lintho tse joalo? Jesu o itse: “Le ’ne le batle ’muso pele.” Ho sa tsotellehe hore na re tobana le mathata afe, re lokela ho tsoela pele ho etsa hore borapeli ba Jehova bo nke sebaka sa pele bophelong ba rōna. Haeba re etsa joalo, Ntate oa rōna oa leholimo o tla re ‘ekeletsa’ litlhoko tsohle tsa rōna tsa letsatsi le letsatsi. Ka tsela e itseng, o tla etsa hore re khone ho fumana lintho tseo re li hlokang.—Matheu 6:33.

⁸ Jesu o ile a fana ka keletso e ’ngoe hape ha a ne a re: “Le ka mohla le se ke la tšoenyeha ka letsatsi le hlahlamang, etsoe letsatsi le hlahlamang le tla ba le matšoenyeho a lona.” (Matheu 6:34) Ha ho bohlale ho tšoenyeha ka ho sa hlokahaleng ka se ka ’nang sa etsahala hosasane. Setsebi se seng se itse: “Hangata seo re tšohileng hore se tla etsahala kamoso hase kamehla se etsahalang.” Ho mamela ka boikokobetso keletso ea Bibele ea ho tsepamisa mehopolo ea rōna linthong tsa bohlokoa ka ho fetisisa bophelong le ho phela letsatsi ka leng ka nako, ho ka re thusa ho qoba ho tšoenyeha ho sa lokelang.—1 Petrose 5:6, 7.

 9. Ha re e-ba le mathata a lichelete, re ka fumana thuso efe likhatisong tsa “lekhoba le tšepahalang le le masene”?

⁹ Ha re e-ba le mathata a lichelete, re ka boetse ra bontša hore re tšepa Jehova ka ho batla thuso likhatisong tsa “lekhoba le tšepahalang le le masene.” (Matheu 24:45) Nako le nako, makasine ea Tsoha! e ’nile ea hlahisa lihlooho tse molemo hammoho le litlhahiso tsa kamoo ho ka sebetsanoang le mathata a lichelete kateng. Sehlooho se reng “Ho Felloa ke Mosebetsi—Ho na le Litharollo Life?” tokollong ea August 8, 1991, se ile sa thathamisa lintlha tse robeli tse tataisang tse thusitseng ba bangata ho tsitsa licheleteng le maikutlong ha ba feletsoe ke mosebetsi.c Ho hlakile hore lintlha tseo tse tataisang li lokela ho leka-lekanngoa le ho ba le pono e loketseng ea hore na chelete ehlile e bohlokoa hakae. Sena se tšohliloe sehloohong se reng “Ntho ea Bohlokoa Haholo ho Feta Chelete,” se hlahileng tokollong eona eo.—Moeklesia 7:12.

Ha re Sithabelitsoe ke ho Kula

10. Mohlala oa Morena Davida o bontša joang hore hoa utloahala ho tšepa Jehova ha re kula haholo?

¹⁰ Na hoa utloahala ho tšepa Jehova ha re kula haholo? E, ka sebele! Jehova o utloela batho ba hae ba kulang bohloko. Ho feta moo, o ikemiselitse ho ba thusa. Ka mohlala, nahana ka Morena Davida. E ka ’na eaba eena ka boeena o ne a kula haholo ha a ne a ngola mabapi le kamoo Molimo a tšoarang motho ea kulang kateng. O itse: “Jehova o tla mo tšehetsa holim’a setulo sa hae se kang moalo sa ho kula; ka sebele u tla fetola liphate tsohle tsa hae nakong ea boloetse ba hae.” (Pesaleme ea 41:1, 3, 7, 8) Tšepo ea Davida ho Molimo e ile ea lula e le matla, ’me qetellong morena enoa o ile a fola. Leha ho le joalo, re ka bontša joang hore re tšepile Molimo ha re sithabelitsoe ke ho kula?

11. Ha re kula, ke eng seo re ka se kōpang ho Ntate oa rōna oa leholimo?

¹¹ Ha re kula, tsela e ’ngoe eo re ka bontšang hore re tšepile Jehova ka eona ke ka ho mo kōpa ka tieo ka thapelo hore a re thuse ho mamella. Re ka mo kōpa hore a re thuse ho sebelisa “bohlale bo sebetsang” e le hore ho ea ka maemo a rōna, re ka batla mekhoa ea phekolo eo re ka khonang ho e finyella bakeng sa ho ba le bophelo bo botle. (Liproverbia 3:21) Hape re ka mo kōpa hore a re thuse hore re se fele pelo le ho sebelisa mamello e le hore re khone ho mamella ho kula ha rōna. Ka holim’a tsohle, re lokela ho kōpa Jehova hore a re tšehetse, a re fe matla a ho lula re tšepahala ho eena ’me re se ke ra lahleheloa ke botsitso, ho sa tsotellehe se ka ’nang sa hlaha. (Bafilipi 4:13) Ho boloka ha rōna botšepehi ho Molimo ho bohlokoa haholo ho feta ho sireletsa bophelo ba rōna ba hona joale. Haeba re lula re bolokile botšepehi, Moputsi e Moholo o tla re fa bophelo bo sa feleng bo phethahetseng re phela hantle ’meleng.—Baheberu 11:6.

12. Ke melao-motheo efe ea Mangolo e ka re thusang ho etsa liqeto tse bohlale tabeng ea phekolo ea meriana?

¹² Ho tšepa ha rōna Jehova ho boetse ho re susumelletsa ho batla tataiso e sebetsang Lentsoeng la hae, Bibele. Melao-motheo e fumanoang ka Mangolong e ka re thusa ho etsa liqeto tse bohlale tabeng ea phekolo ea meriana. Ka mohlala, kaha rea tseba hore Bibele e nyatsa “tšebelisano le meea,” re tla qoba mokhoa leha e le ofe oa ho hlahloba lefu kapa oa phekolo o amanang le tšebelisano le meea. (Bagalata 5:19-21; Deuteronoma 18:10-12) Mohlala o mong oa bohlale ba Bibele bo ka tšeptjoang ke ona: “Mang kapa mang ea se nang phihlelo o beha tumelo lentsoeng le leng le le leng, empa ea masene o nahana ka mehato ea hae.” (Liproverbia 14:15) Kahoo, ha re nahana ka phekolo ea meriana, re tla be re etsa ka bohlale haeba re batla boitsebiso bo tšepahalang ho e-na le ho “beha tumelo lentsoeng le leng le le leng.” “Ho hlaphoheloa kelellong” ho joalo ho ka re thusa ho sekaseka ka hloko lintho tseo re li khethang e le hore re etse qeto e thehiloeng tsebong.—Tite 2:12.

13, 14. (a) Ho ’nile ha hatisoa lihlooho life tse molemo litabeng tsa bophelo bo botle limakasineng tsa Molula-Qhooa le Tsoha!? (Bona lebokose leqepheng la 17.) (b) Tsoha! ea February 8,  2001 e ile ea fana ka keletso efe mabapi le ho sebetsana le maloetse a sa foleng?

¹³ Hape re ka bontša hore re tšepile Jehova ka ho etsa lipatlisiso likhatisong tsa lekhoba le tšepahalang. Nako le nako limakasine tsa Molula-Qhooa le Tsoha! li ’nile tsa hatisa lihlooho tse molemo tse buang ka mathata a sa tšoaneng a tobileng a amanang le bophelo bo botle le maloetse.d Ka linako tse ling, likoranta tsena li ile tsa hlahisa lihlooho tse buang ka batho ba ileng ba sebetsana ka katleho le maloetse a fapa-fapaneng, ho kula le ho holofala ho itseng. Ho phaella moo, lihlooho tse itseng li ile tsa fana ka litlhahiso tsa Mangolo hammoho le keletso e sebetsang e mabapi le kamoo motho a ka mamellang ho kula ho sa foleng kateng.

¹⁴ Ka mohlala, tokollo ea Tsoha! ea February 8, 2001, e ile ea e-ba le letoto la lihlooho tse tlas’a sehlooho se ka ntle makasineng eo se reng “Matšeliso ho ba Kulang.” Lihlooho tsena li ile tsa fana ka melao-motheo ea Bibele e molemo hammoho le boitsebiso bo tobileng bo fumanoeng lipuisanong tse ileng tsa tšoaroa le batho ba nang le phihlelo ba mameletseng bokuli bo holofatsang ka lilemo-lemo. Sehlooho se reng “Ho Phela ka Katleho le Boloetse ba Hao—Joang?” se fane ka keletso e latelang: Ithute sohle seo u ka se khonang ka boloetse ba hao. (Liproverbia 24:5) Ipehele lipakane tseo u ka li finyellang, ho akarelletsa le lipakane tsa ho thusa ba bang, empa u hlokomele hore ho ka ’na ha etsahala hore u se ke ua khona ho finyella lipakane tse tšoanang le tsa ba bang. (Liketso 20:35; Bagalata 6:4) Qoba ho itšehla thajana. (Liproverbia 18:1) Etsa hore ba bang ba thabele ho u etela. (Liproverbia 17:22) Ka holim’a tsohle, e-ba le kamano e haufi le Jehova le phutheho. (Nahume 1:7; Baroma 1:11, 12) Na ha re lebohe tataiso e tšepahalang eo Jehova a fanang ka eona ka mokhatlo oa hae o hlophisitsoeng?

Ha Bofokoli ba Nama bo Ntse bo Phehella

15. Moapostola Pauluse o ile a khona joang ho hlōla ntoeng ea hae khahlanong le mefokolo ea nama e sa phethahalang, ’me re ka kholiseha ka eng?

¹⁵ Moapostola Pauluse o ile a ngola a re: “Nameng ea ka, ha ho lule letho le molemo.” (Baroma 7:18) Pauluse o ne a tseba ho tsoa phihlelong hore na ho thata hakae ho loantša litakatso le mefokolo ea nama e sa phethahalang. Leha ho le joalo, Pauluse o ne a boetse a kholisehile hore a ka hlōla. (1 Bakorinthe 9:26, 27) Joang? Ka ho tšepa Jehova ka ho feletseng. Ke ka lebaka leo Pauluse a neng a ka re: “Ke monna ea sōtō hakaakang! Ke mang ea tla mpholosa ’meleng ona o fetang lefung lee? Ho lebohuoe Molimo ka Jesu Kreste Morena oa rōna!” (Baroma 7:24, 25) Ho thoe’ng ka rōna? Le rōna re ntse re loana le mefokolo ea nama. Ho bonolo hore re felloe ke tšepo ha re ntse re loantša mefokolo e joalo, re ipolelle hore re ke ke ra atleha le ka mohla. Empa Jehova o tla re thusa haeba, ho tšoana le Pauluse, re hlile re itšetlehile ka Eena ’me re sa itšetleha ka matla a rōna feela.

16. Ha bofokoli ba nama bo ntse bo phehella, re lokela ho rapella eng, hona re lokela ho etsa’ng haeba re iphumana re se re khutletse bofokoling ba rōna ba pele?

¹⁶ Ha bofokoli ba nama bo ntse bo phehella, re ka bontša hore re tšepile Jehova ka ho mo rapela ka tieo. Re lokela ho kōpa, esita le ho qela Jehova hore a re thuse ka moea oa hae o halalelang. (Luka 11:9-13) Ka ho toba, re ka kōpa hore re be le boitšoaro, e leng karolo ea litholoana tsa moea oa Molimo. (Bagalata 5:22, 23) Re lokela ho etsa’ng haeba re iphumana re se re khutletse bofokoling ba rōna ba pele? Ho hang ha rea lokela ho tela. Le ka mohla a re se keng ra khathala ho rapela Molimo oa rōna ea mohau ka boikokobetso, re kōpe hore a re tšoarele le ho re thusa. Le ka mohla Jehova a ke ke a khesa kapa a lahla pelo e ‘robehileng le e sithabelitsoeng’ ke ho imeloa ke letsoalo le molato. (Pesaleme ea 51:17) Haeba re kōpa Jehova ka tieo, ka lipelo tse soabileng, o tla re thusa ho hanela liteko.—Bafilipi 4:6, 7.

17. (a) Ke hobane’ng ha ho le molemo ho nahanisisa kamoo Jehova a ikutloang kateng ka bofokoli bo itseng boo e ka ’nang eaba re ntse re bo loantša? (b) Ke mangolo afe ao re ka ’nang ra a tšoara ka hlooho haeba re ntse re leka ka matla ho laola mokhoa oa ho halefa feela? ho lebela leleme? ho hanela tšekamelo ea ho ithabisa ka lintho tse sa lokang?

¹⁷ Hape re ka bontša hore re tšepile Jehova ka ho batla thuso Lentsoeng la hae. Re sebelisa k’honk’hodense ea Bibele kapa Watch Tower Publications Index, re ka batla karabo ea potso e reng, ‘Jehova o ikutloa joang ka bofokoli bo itseng boo ke ntseng ke bo loantša?’ Ho nahanisisa kamoo Jehova a ikutloang kateng ka taba eo ho ka matlafatsa takatso ea rōna ea ho mo khahlisa. Kahoo, re ka qala ho ikutloa kamoo a ikutloang kateng, re hloee seo a se hloileng. (Pesaleme ea 97:10) Ba bang ba fumane ho le molemo ho tšoara ka hlooho litemana tsa Bibele tse buang ka bofokoli bo tobileng boo ba ntseng ba bo loantša. Na re ntse re leka ka matla ho laola mokhoa oa ho halefa feela? Joale re ka ’na ra tšoara ka hlooho litemana tse kang Liproverbia 14:17 le Baefese 4:31. Na re fumana ho le thata ho lebela maleme a rōna? Re ka ’na ra tšoara ka hlooho litemana tse kang Liproverbia 12:18 le Baefese 4:29. Na re na le tšekamelo ea ho ithabisa ka lintho tse sa lokang? Re ka ’na ra leka ho hopola litemana tse kang Baefese 5:3 le Bakolose 3:5.

18. Ke hobane’ng ha re sa lokela ho lumella lihlong ho re thibela ho kōpa baholo hore ba re thuse ho hlōla bofokoli ba rōna?

¹⁸ Ho batla thuso ho baholo ba khethiloeng ke moea ka phuthehong ke tsela e ’ngoe ea ho bontša hore re itšetlehile ka Jehova. (Liketso 20:28) Etsoe, ‘limpho tsena tseo e leng banna’ ke tokisetso e tsoang ho Jehova ka Kreste bakeng sa ho sireletsa le ho hlokomela linku tsa hae. (Baefese 4:7, 8, 11-14) Ke ’nete hore, mohlomong ho ke ke ha e-ba bonolo ho kōpa thuso ea ho loantša bofokoli bo itseng. Re ka ’na ra ba lihlong, re tšaba hore baholo ba tla re nka hampe. Empa ha ho pelaelo hore banna bana ba hōlileng moeeng ba tla re hlompha ka lebaka la ho ba le sebete sa ho kōpa thuso. Ho feta moo, baholo ba leka ho bonahatsa makhabane a Jehova ha ba sebetsana le mohlape. Keletso ea bona e tšelisang, le e sebetsang, le thuto e tsoang Lentsoeng la Molimo e ka ’na ea e-ba sona seo re se hlokang ho matlafatsa boikemisetso ba rōna ba ho hlōla bofokoli ba rōna.—Jakobo 5:14-16.

19. (a) Satane o batla ho sebelisa ho hloka morero ha bophelo tsamaisong ee ka tsela efe? (b) Ho ba le tšepo ho akarelletsa eng, ’me re lokela ho ikemisetsa ka tieo ho etsa’ng?

¹⁹ Le ka mohla u se ke ua lebala hore Satane oa tseba hore nako ea hae e se e le khutšoanyane. (Tšenolo 12:12) O batla ho sebelisa ho hloka morero ha bophelo lefatšeng lena ho re nyahamisa le ho etsa hore re behe meja fatše. E se eka re ka tšepa ka ho feletseng se boletsoeng ho Baroma 8:35-39: “Ke mang ea tla re arohanya le lerato la Kreste? Na e tla ba matšoenyeho kapa mahlomola kapa mahloriso kapa tlala kapa tlhobolo kapa kotsi kapa sabole? . . . Ho fapana le hoo, linthong tsena tsohle re hlaha re hlōtse ka ho feletseng ka ea ileng a re rata. Etsoe ke kholisehile hore leha e le lefu kapa bophelo kapa mangeloi kapa mebuso kapa lintho tse teng hona joale kapa lintho tse tlang ho tla kapa matla kapa bophahamo kapa botebo kapa pōpo leha e le efe e ’ngoe li ke ke tsa khona ho re arohanya le lerato la Molimo le leng ho Kreste Jesu Morena oa rōna.” Ao ke mantsoe a bontšang ho tšepa Jehova hakaakang! Leha ho joalo, tšepo e joalo, hase boikutlo feela tjee. Ho e-na le hoo, ke tšepo e akarelletsang liqeto tse nahannoeng hantle tseo re li etsang bophelong ba rōna ba letsatsi le letsatsi. Kahoo, a re ikemisetseng ka tieo ho tšepa Jehova ka ho feletseng linakong tsa mahlomola.

[Mongolo o botlaaseng ba leqephe]

Na Ua Hopola?

• Ha re le mathateng a lichelete, re ka bontša ka litsela life hore re tšepile Jehova?

• Re ka bontša joang hore re tšepile Molimo ha re sithabelitsoe ke ho kula?

• Ha bofokoli ba nama bo ntse bo phehella, re ka bontša joang hore re hlile re itšetlehile ka Jehova?

[Lebokose le leqepheng la 17]

Na U Hopola Lihlooho Tsee?

Ha re sithabelitsoe ke ho kula, hoa khothatsa ho bala ka ba bang ba ileng ba sebetsana ka katleho le ho kula, maloetse, kapa ho holofala ho itseng. Tse ling tsa lihlooho tse hatisitsoeng limakasineng tsa Molula-Qhooa le Tsoha! ke tsena.

Sehlooho se reng “Ho Sebetsana le Mefokolo ea Ka” se ne se bua ka ho sebetsana ka katleho le ho nahana lintho tse nyahamisang le ho imeloa kelellong.—Molula-Qhooa oa May 1, 1990.

“Ho Sebeletsa ba Bang ho Thethefatsa Bohloko.”—Molula-Qhooa oa la July 1, 2003.

Sehlooho se reng “Kulo e Ile ea Fetola Bophelo ba Ka” se ne se bua kamoo motho a ka sebetsanang ka katleho le boemo ba ho holofala.—Tsoha! ea November 8, 1995.

Sehlooho se reng “Ha le Tsebe Hore na Bophelo ba Lōna bo Tla ba Joang Hosasane” se ne se tšohla kamoo motho a ka sebetsanang ka katleho le boloetse ba kelello ba ho thaba le ho hlonama ka linako tse sa tšoaneng.—Molula-Qhooa oa December 1, 2000.

Sehlooho se reng “Loida o Qetella a Tseba ho Bua” se ne se bua ka ho sebetsana ka katleho le letoope.—Tsoha! ea May 8, 2000.

“Batho ba Holofetseng Bao e Leng Baboleli ba Matla.”—Molula-Qhooa oa November 15, 1986.

“Ke Leboha Tšehetso e sa Hlōleheng ea Jehova.”—Molula-Qhooa oa June 1, 1993.

“Kamoo ho Holofala ho Fetotseng Bophelo ba ka Kateng.”—Tsoha! ea May 8, 2003.

[Setšoantšo se leqepheng la 15]

Haeba re feletsoe ke mosebetsi, ho ka ba bohlale hore re hlahlobe bocha mokhoa oa rōna oa bophelo

[Setšoantšo se leqepheng la 16]

Pale ea Loida e bontša kamoo ho tšepa Jehova ho thusang motho ho mamella kateng. (Bona lebokose le leqepheng la 17)

[Setšoantšo se leqepheng la 18]

Ha rea lokela ho ba lihlong ho kōpa thuso ea ho hlōla mefokolo ea rōna