Na U Etsisa Jehova ka ho Tsotella ba Bang?

‘LAHLELANG matšoenyeho ’ohle a lōna ho [Molimo], hobane oa le tsotella.’ (1 Petrose 5:7) Ke memo e mofuthu hakaakang! Jehova Molimo o amehile ka e mong le e mong oa batho ba hae. Re ka ikutloa re sireletsehile tlhokomelong ea hae.

Re lokela ho ithuta ho ameha ka lerato joalo ka batho ba bang, ’me re bontše seo ka liketso. Kaha ha rea phethahala, ho hlokahala hore re hlokomele mathata a itseng a ka hlahang ha re bontša ba bang thahasello. Pele re hlahloba a mang a ’ona, a re boneng litsela tse ling tseo ka tsona Jehova a tsotellang batho ba hae.

Ha mopesaleme Davida a etsa mohlala oa molisa, o ile a hlalosa tlhokomelo ea Molimo tjena: “Jehova ke Molisa oa ka. Nke ke ka hloka letho. O nthobatsa makhulong a tletseng joang; o ntsamaisa haufi le libaka tsa phomolo tse noselitsoeng hantle. O khatholla moea oa ka. . . . Esita le haeba ke tsamaea phuleng ea moriti o lefifi, ha ke tšabe letho le lebe, kaha u na le ’na.”—Pesaleme ea 23:1-4.

Kaha Davida e ne e le molisa, o ne a tseba hore na mohlape o hlokomeloa joang. Molisa o sireletsa linku tsa hae libataneng tse kang litau, liphiri le libere. O bokella mohlape e le hore o se ke oa phasalla, o batla linku tse lahlehileng, o beha likonyana tse khathetseng sefubeng sa hae, ’me o hlokomela tse kulang le tse lemetseng. O noesa mohlape ka matsatsi ’ohle. Sena ha se bolele hore molisa o laola linku nthong e ’ngoe le e ’ngoe eo li e etsang. Linku li lokolohile empa li sireletsehile.

Ena ke eona tsela eo Jehova a hlokomelang batho ba hae ka eona. Moapostola Petrose o ile a re: ‘Le sireletsoa ke matla a Molimo.’ Ha e le hantle ho “sireletsoa” ho bolela “ho lula u lebetsoe.” (1 Petrose 1:5, NW, mongolo o botlaaseng ba leqephe) Kaha Jehova o ameha ka rōna e le kannete, o lula a re lebetse, a ikemiselitse ho re thusa neng kapa neng ha re kōpa thuso. Leha ho le joalo, Jehova o re bōpile re e-na le bolokolohi ba ho ikhethela, kahoo ha a kena-kenane le liketso le liqeto tsohle tsa rōna. Re ka etsisa Jehova joang tabeng ee?

Etsisa Molimo ha U Hlokomela Bana ba Hao

“Bara ke lefa le tsoang ho Jehova.” Kahoo, batsoali ba lokela ho sireletsa bana ba bona le ho ba hlokomela. (Pesaleme ea 127:3) Seo se ka ’na sa akarelletsa ho khothalletsa bana hore ba ntše maikutlo a bona, ebe batsoali baa a nahanela ha ba sebelisana le bona. Haeba batsoali ba leka ho laola bana ba bona nthong e ’ngoe le e ’ngoe eo ba e etsang, ba sa re letho ka maikutlo a bona, ho ne ho tla tšoana le molisa ea lekang ho laola linku tsa hae ka liropo. Ha ho na molisa ea ka lisang mohlape oa hae ka tsela eo; le Jehova ha a re lise ka tsela eo.

Marikoa o re: “Ka lilemo tse ngata ke ne ke re feela ho bana ba ka: ‘Etsang tjena’ ’me ‘Le se ke la etsa tjena.’ Ke ne ke lumela hore ke boikarabelo ba ka ke le motsoali. Ke ne ke sa ba babatse, ke bile ke sa ba phetlele sefuba.” Le hoja morali oa Mariko a ne a qeta nako e telele fonong a bua le metsoalle ea hae, meqoqo ea hae le ’mè oa hae e ne e e-ba mekhutšoanyane. Mariko o tsoela pele o re: “Eaba ke hlokomela phapang. Ha morali oa ka a bua le metsoalle ea hae, o ne a sebelisa mantsoe a bontšang kutloelo-bohloko, a kang ‘Ke ’nete,’ kapa ‘Kea utloisisa.’ Ke ile ka qala ho sebelisa mantsoe a joalo e le hore ke khothalletse morali oa ka ho ntša maikutlo a hae, ’me kapele ra qala ho qeta nako e teletsana re qoqa hamonate.” Taba ena e totobatsa bohlokoa ba puisano e molemo, eo hangata e akarelletsang ho fapanyetsana maikutlo, ho e-na le hore ho bue motho a le mong feela.

Batsoali ba lokela ho khothalletsa bana ba bona hore ba ntše maikutlo a bona, empa ho hlokahala hore bana ba utloisise hore batsoali ba amehile ka tšireletseho ea bona. Bibele e eletsa bana hore ba mamele batsoali ba bona; e ntan’o bolela lebaka la seo ha e re: “E le hore u ka tsoella hantle le hore u ka phela ka nako e telele lefatšeng.” (Baefese 6:1, 3) Ho ba bonolo hore bana ba mamele ha ba kholisehile e le kannete hore ho mamela ho molemo.

Ha U Hlokomela Mohlape oa Jehova

Kameho ea Jehova e lerato e bonahala phuthehong ea Bokreste. Jesu Kreste e le Hlooho ea phutheho o tataisa baholo hore ba hlokomele mohlape oa hae. (Johanne 21:15-17) Lentsoe la Segerike bakeng sa molebeli le amana le leetsi le bolelang “lebela ka hloko.” Ha Petrose a hatisa kamoo sena se lokelang ho etsoa kateng, o laela baholo o re: “Lisang mohlape oa Molimo o tlhokomelong ea lōna, eseng ka ho qobelloa, empa ka ho rata; eseng ka lebaka la lerato la leruo la ho se tšepahale, empa ka tabatabelo; eseng ka ho rena ka thata holim’a bao e leng lefa la Molimo, empa le e-ba mehlala ho mohlape.”—1 Petrose 5:2, 3.

E, mosebetsi oa baholo o tšoana le oa balisa. Baholo ba Bakreste ba lokela ho hlokomela ba kulang moeeng ’me ba ba khutlisetse tseleng e le hore ba phele ka melao e lokileng. Baholo ba na le boikarabelo ba ho hlophisa mesebetsi ea phutheho, ho lokisetsa liboka le ho etsa hore taolo e be teng ka phuthehong.—1 Bakorinthe 14:33.

Leha ho le joalo, mantsoe a Petrose a ka holimo a re hlokomelisa ka kotsi e itseng—ea baholo ba ‘renang ka thata holim’a’ phutheho. Sena se ka etsahala ha baholo ba etsa melao e sa hlokahaleng. Ha moholo a ikutloa a tlamehile ho sireletsa mohlape, a ka ’na a fetelletsa litaba. Phuthehong e ’ngoe ea Bochabela, baholo ba ile ba etsa melao mabapi le tsela ea ho lumelisana Holong ea ’Muso—e kang ea hore na ke mang ea lokelang ho bua pele—ba lumela hore ho latela melao ena ho ne ho tla tlatsetsa khotsong ea phutheho. Le hoja ho se potang hore baholo bao ba ne ba e-na le sepheo se setle, na ba ne ba etsisa tsela eo Jehova a hlokomelang batho ba hae ka eona? Boikutlo ba Pauluse bo ile ba totobala mantsoeng a hae a reng: “Eseng hore re laola tumelo ea lōna, empa re basebetsi-’moho bakeng sa thabo ea lōna, kaha ke ka tumelo ea lōna le emeng.” (2 Bakorinthe 1:24) Jehova o tšepa batho ba hae.

Hase feela hore baholo ba tsotellang ba qoba ho etsa melao e sa thehoang Mangolong, empa ba boetse ba bontša hore ba tsotella mohlape e le kannete ka ho se ntše litaba tsa lekunutu. Ba ela hloko temoso ea bomolimo e reng: “U se ke ua senola lekunutu la e mong.”—Liproverbia 25:9.

Moapostola Pauluse o ile a tšoantša phutheho ea Bakreste ba tlotsitsoeng le ’mele oa motho a re: “Molimo o ile a kopanya ’mele . . . e le hore ho se ke ha e-ba le karohano ’meleng, empa hore litho tsa oona li hlokomelane ka tsela e tšoanang.” (1 Bakorinthe 12:12, 24-26) Polelo ea Segerike bakeng sa “li hlokomelane ka tsela e tšoanang” ka ho toba e bolela hore ‘setho se seng se tšoenyehe ka se seng.’ Litho tsa phutheho ea Bokreste li lokela ho thahasellana haholo.—Bafilipi 2:4.

Bakreste ba ’nete ba ka bontša joang hore ‘e mong o tšoenyeha ka e mong’? Ba ka ’na ba bontša hore ba tsotella litho tse ling tsa phutheho ka ho li rapella le ka ho ithaopela ho thusa ba hlokang. Sena se thusa ba bang hore ba hlahise makhabane a bona. Hlokomela hore na Tadataka o ile a thusoa joang ka kameho e joalo e lerato. Ha a ne a kolobetsoa a le lilemo li 17, e ne e le eena feela lapeng labo ea neng a sebeletsa Jehova. O re: “Lelapa le leng ka phuthehong le ne le atisa ho ’memela lijong le ’mokeng. Ke ne ke fapohela teng hoo e ka bang hoseng ho hong le ho hong ha ke e-ea sekolong e le hore ke kopanele le lona puisanong ea temana ea letsatsi ea Bibele. Ke ile ka fumana keletso ea kamoo nka thulanang ka katleho le mathata sekolong, ’me re ne re rapela ka ’ona hammoho. Ke ile ka ithuta moea oa ho fana lelapeng lena.” Hona joale Tadataka o sebeletsa ofising e ’ngoe ea lekala ea Lipaki Tsa Jehova moo a sebelisang seo a ithutileng sona.

Moapostola Pauluse o ile a lemosa ka bothata bo sa hlokomeleheng bo mabapi le ho thahasella ba bang. O ile a bua ka basali ba itseng bao e neng e le “basebi le ba kena-kenanang le litaba tsa batho ba bang, ba [buang] ka lintho tseo ba sa tšoanelang ho bua ka tsona.” (1 Timothea 5:13) Le hoja e le ntho e ntle ho thahasella ba bang, re lokela ho ba hlokolosi hore re se ke ra ea bohōleng ba ho itšunya-tšunya litabeng tsa bona tsa lekunutu. Ho thahasella ba bang ho feta tekano ho ka iponahatsa ka ‘ho bua ka lintho tseo re sa tšoanelang ho bua ka tsona,’ tse kang ho tšoaea-tšoaea liphoso.

Re lokela ho hopola hore Bakreste ba ka ’na ba fapana tseleng ea bona ea ho sebetsana le litaba tsa botho, khethong ea bona ea lijo le ea boikhathollo. E mong le e mong o lokolohile hore a ikhethele seo a tla se etsa hafeela a sa tlōle melao-motheo ea Bibele. Pauluse o ile a eletsa Bakreste ba Roma a re: “A re se keng ra hlola re ahlolana. . . . A re phehelleng lintho tse tlisang khotso le lintho tseo re ka hahanang ka tsona.” (Baroma 14:13, 19) Re lokela ho bontša hore re tsotellana e le kannete ka phuthehong ka hore re ikemisetse ho thusa, eseng ka ho itšunya-tšunya litabeng tsa ba bang. Ha re tsotellana ka tsela ena, ho rena lerato le bonngoe ka lapeng le ka phuthehong.

[Mongolo o botlaaseng ba leqephe]

[Setšoantšo se leqepheng la 19]

Babatsa bana ba hao le ho ba utloela bohloko ha u ntse u ba khothalletsa hore ba ntše maikutlo a bona