KHAOLO EA 40
Re ka Etsa’ng Hore Molimo a re Nke re Hloekile?
Nahana ka ’mè ea lokisetsang mora oa hae eo a mo ratang ho ea sekolong. O etsa bonnete ba hore o hlapile le hore liaparo tsa hae li makhethe ebile li hloekile. Ha a lula a hloekile o khona ho phela hantle ’meleng hape hoa bonahala hore batsoali ba hae baa mo hlokomela. Ka tsela e tšoanang, Ntate oa rona ea lerato Jehova, o batla hore re be makhethe hape re itšoare hantle. Ho molemong oa rona hore re lule re hloekile, hape ho tlisetsa Jehova thoriso.
1. Re ka etsa’ng hore re be batho ba makhethe?
Jehova o re ho rona: “Le halalele.” (1 Petrose 1:16) E le hore re halalele re lokela ho ba makhethe hape re itšoare hantle. Re tla be re le makhethe haeba re hlapa kamehla, re hlatsoa liaparo tsa rona, re hloekisa matlo a rona hammoho le likoloi tsa rona. Re ka boela ra hloekisa Liholo Tsa ’Muso. Ha re lula re hloekile re isa thoriso ho Jehova.—2 Bakorinthe 6:3, 4.
2. Re lokela ho qoba mekhoa efe e le hore re lule re hloekile?
Bibele e re khothaletsa hore ‘re itlhatsoe litšila tsohle tsa nama le tsa moea.’ (2 Bakorinthe 7:1) Kahoo, re lokela ho qoba ntho e ’ngoe le e ’ngoe e ka bang kotsi ’meleng kapa likelellong tsa rona. Re lokela ho nahana lintho tse khahlisang Jehova. Kahoo, re lokela ho etsa sohle se matleng a rona ho qoba ho nahana lintho tse fosahetseng. (Pesaleme ea 104:34) Hape re lokela ho qoba ho bua lintho tse hlohlontšang litsebe.—Bala Bakolose 3:8.
Ke’ng hape e ka etsang hore re be batho ba sa hloekang? Ho na le lintho tse ka silafatsang ’mele ea rona. Kahoo, re qoba ho sebelisa koae le lithethefatsi ho itlhabolla. Ha re qoba lintho tsena re tla phela hantle hape re tla be re bontša hore re ananela mpho ea bophelo. Re lokela ho sebetsa ka thata hore re lule re hloekile boitšoarong ka hore re qobe mekhoa e litšila e kang ho ipholla litho tsa botona kapa tsa botšehali le ho shebella pornography. (Pesaleme ea 119:37; Baefese 5:5) Ho ka ba thata ho tlohela mekhoa ena, empa Jehova a ka re thusa.—Bala Esaia 41:13.
ITHUTE LINTLHA TSE LING
Bona hore na ho lula re le makhethe ho ka tlisetsa Jehova thoriso joang, le hore na re ka hlola mekhoa e litšila joang.
3. Ha re le makhethe re rorisa Jehova
Ha re bala ka melao eo Jehova a neng a e file sechaba sa Iseraele, rea bona hore na o nka bohloeki e le ntho ea bohlokoa hakae. Bala Exoda 19:10 le 30:17-19 ebe le buisana ka lipotso tsena:
Litemana tsee li bontša hore Jehova o ikutloa joang ka bohloeki?
Re ka itloaetsa ho etsa’ng e le hore re lule re le makhethe?
Re hloka nako le boikitlaetso hore re be batho ba makhethe. Re ka khona ho etsa joalo ho sa tsotellehe hore na re lula hokae le hore na re na le chelete e kae. Bapala VIDEO ebe le buisana ka lipotso tse latelang.
Ha re etsa hore lintho tsa rona li lule li le makhethe, re etsa hore mosebetsi oa ho ruta batho Bibele o be le seriti joang?
4. Khaotsa mekhoa e litšila
Jehova a ka re thusa ho hlola mekhoa eohle e litšila
Haeba oa tsuba kapa u sebelisa lithethefatsi ho itlhabolla, e ka ’na eaba oa tseba hore na ho thata hakae ho tlohela lintho tsena. U ka thusoa ke’ng? Nahana hore na ntho ena eo u tloaetseng ho e etsa e u ama joang. Bala Matheu 22:37-39. Ka mor’a moo le buisane ka hore na ho tsuba koae le ho sebelisa lithethefatsi hampe ho ka ama . . .
kamano ea motho le Jehova joang.
kamano ea motho le lelapa la hae le batho ba bang joang.
Rera hore na u tla etsa joang e le hore u hlole tloaelo e litšila.a Bapala VIDEO.
Bala Bafilipi 4:13 ebe le buisana ka potso ena:
Re ka hlola mekhoa e mebe joang haeba re rapela, re ithuta Bibele ebile re ea libokeng kamehla?
5. Loantša menahano le liketso tse litšila
Bala Bakolose 3:5 ebe le buisana ka lipotso tsena:
Re tseba joang hore pornography, ho romellana melaetsa e tsosang takatso le ho ipholla litho tsa botona kapa tsa botšehali ho fosahetse ho Jehova?
Na ke ntho e utloahalang hore ebe Jehova o batla hore re itšoare hantle? Ke hobane’ng ha u cho joalo?
Bona hore na ke’ng e ka u thusang ho loantša menahano e litšila. Bapala VIDEO.
Jesu o ile a etsa papiso e bontšang hore re lokela ho ikemisetsa ho etsa eng kapa eng e hlokahalang hore re lule re hloekile. Bala Matheu 5:29, 30 ebe le buisana ka potso ena:
Jesu o ne a sa bolele hore re lokela ho itematsa, empa o ne a bolela hore re lokela ho nka bohato. Motho a ka nka mohato ofe ho qoba ho nahana ka lintho tse litšila?b
Haeba u loanela ho khaotsa ho nahana lintho tse litšila, Jehova o ananela boiteko ba hao. Bala Pesaleme ea 103:13, 14 ebe le buisana ka potso ena:
Haeba u thatafalloa ho tlohela mokhoa o itseng o litšila, lengolo lee le u thusa joang hore u se ke oa tela?
U se ke oa tela
U ka ’na oa re: ‘Ke hlolehile, ke hore fela ke tele.’ Nahana ka taba ena: Ha semathi se ka khoptjoa eaba sea oa, ha ho bolele hore se hlotsoe peisong kapa hore se lokela ho qala qalong. Ka tsela e tšoanang, haeba u ka etsa ntho eo u ntseng u loanela ho e tlohela ha ho bolele hore u hlotsoe. Hape ha ho bolele hore boiteko boo u seng u bo entse bo ile le metsi. E khoptjoa e le maoto mane, u se ke oa tela. U ka khona ho tlohela mekhoa e mebe ha Jehova a u thusa.
BATHO BA BANG BA RE: “Ke lekhoba la ntho ena. Nke ke ka khona ho e tlohela.”
U ka balla motho ea chong joalo lengolo lefe le tla mo thusa hore a bone hore ha Jehova a mo thusa a ka khona ho khaotsa mekhoa e mebe?
KAKARETSO
Re thabisa Jehova haeba re lula re hloekile ’meleng, maikutlong le boitšoarong.
Re Ithutile’ng?
Ke hobane’ng ha ho le bohlokoa hore re lule re hloekile?
Re ka etsa’ng hore re be batho ba makhethe?
Re ka etsa’ng hore re lule re hloekile maikutlong le boitšoarong?
BATLA
Ke lintho life tseo u ka li etsang hore u lule u le makhethe le haeba u se na chelete?
Bona hore na u ka etsa’ng e le hore u khaotse ho tsuba.
Bona litla-morao tsa ho shebella pornography.
“Litšoantšo Tsa Bootsoa—Na li Kotsi Kapa Che?” (Molula-Qhooa, August 1, 2013)
Bona hore na monna e mong o ile a thusoa ke’ng hore a hlole bothata ba ho shebella pornography.
“Ke Ile ka Hlōleha ka Makhetlo Empa Qetellong ka Atleha!” (Molula-Qhooa No. 4 2016)
a Tlas’a karolo ea Batla khaolong ena, bala sehlooho se reng “Kamoo U ka Khaotsang ho Tsuba,” se bontšang mehato eo re lokelang ho e latela ho hlola mekhoa eo ho leng thata ho e tlohela.
b E le hore u bone hore na u ka hlola tloaelo ea ho ipholla litho tsa botona kapa tsa botšehali joang, bala sehlooho se reng: “Nka Etsa’ng ho Hlōla Tloaelo ea ho Ipholla Litho Tsa Botona Kapa Botšehali?” bukeng ea Lipotso Bacha Baa Botsa—Likarabo Tse Sebetsang, Buka ea 1, khaolong ea 25.