Jehova o Rata Toka

“’Na, Jehova, ke rata toka.”—ESAIA 61:8.

1, 2. (a) Ho boleloa eng ka mantsoe a reng “toka” le “ho hloka toka”? (b) Bibele e re’ng ka Jehova le ka tšobotsi ea hae ea toka?

TOKA e hlalosoa e le ‘ho se ee ka leeme, ho se khetholle, ho itšoara ka tsela e lokileng le e nepahetseng.’ Ho hloka toka ho akarelletsa ho ba leeme, ho khetholla, ho ba khopo, ho ntša batho ba bang kotsi ntle ho mabaka.

² Lilemong tse ka bang 3 500 tse fetileng, Moshe o ile a ngola tjena ka ’Musi oa Bokahohle, Jehova: “Litsela tsohle tsa hae ke toka. Molimo oa botšepehi, eo ho eena ho se nang ho hloka toka.” (Deuteronoma 32:4) Lilemong tse fetang makholo a supileng hamorao, Molimo o ile a bululela Esaia hore a tlalehe mantsoe ana: “’Na, Jehova, ke rata toka.” (Esaia 61:8) Lekholong la pele la lilemo, Pauluse eena o ile a re: “Na ho hloka toka ho teng ho Molimo? Le ka mohla hoo ho se ke ha e-ba joalo!” (Baroma 9:14) Lekholong lona leo la lilemo, Petrose o ile a re: “Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.” (Liketso 10:34, 35) Ka sebele, “Jehova o rata toka.”—Pesaleme ea 37:28; Malakia 3:6.

Ho Hloka Toka ho Jele Setsi

 3. Ho hloka toka ho ile ha qala joang lefatšeng?

³ Matsatsing ana ke ka seoelo toka e bontšoang. Re ka tšoaroa ka tsela e hlokang toka likarolong tsohle tsa sechaba—mosebetsing oa rōna oa boipheliso, sekolong, litšebelisanong tsa rōna le ba boholong, le ka litsela tse ling—esita le ka lapeng. Ke ’nete hore ke khale ho hloka toka ho joalo ho le teng. Ho ile ha hlahela moloko oa batho ha batsoali ba rōna ba pele ba fetoha marabele ’me ba tlōla molao, ka tlhohlelletso ea sebōpuoa sa moea sa lerabele se ileng sa fetoha Satane Diabolose. Ka sebele e bile ho hloka toka hore Adama, Eva le Satane ba sebelise hampe mpho e babatsehang ea boikhethelo eo Jehova a neng a ba file eona. Liketso tsa bona tse mpe li ne li tla tlisetsa moloko oohle oa batho mahlomola a maholo le lefu.—Genese 3:1-6; Baroma 5:12; Baheberu 2:14.

 4. Ho hloka toka ho ’nile ha e-ba teng ka nako e kae historing ea batho?

⁴ Ho hloka toka ho ’nile ha e-ba teng molokong oa batho ka lilemo tse ka bang 6 000 ho tloha ha borabele bo qala ho ba teng Edene. Ruri ena ke ntho e neng e ka lebelloa hobane Satane ke molimo oa lefatše lena. (2 Bakorinthe 4:4) O leshano ebile ke ntate oa leshano, ke moetselletsi le mohanyetsi oa Jehova. (Johanne 8:44) Haesale a ntse a hlohlelletsa liketso tse tšabehang tsa ho hloka toka. Ka mohlala, tšusumetso e mpe eo Satane a neng a e-na le eona pele ho Moroallo oa mehleng ea Noe, ke e ’ngoe ea lintho tse ileng tsa etsa hore Molimo a re ‘bobe ba motho bo ne bo le bongata lefatšeng ’me tšekamelo eohle ea menahano ea pelo ea hae e le mpe feela ka linako tsohle.’ (Genese 6:5) Boemo bo joalo bo ne bo ntse bo jele setsi le nakong ea Jesu. O ile a re: “Letsatsi ka leng le lekanoa ke bobe ba lona,” e leng litsietsi tsa lona, tse kang ho hloka toka. (Matheu 6:34) Ka sebele Bibele e nepile ha e re: “Pōpo eohle e ntse e tsoela pele ho bobola hammoho le ho ba bohlokong hammoho ho fihlela joale.”—Baroma 8:22.

 5. Ke hobane’ng ha mehleng ee liketso tsa ho hloka toka li atile ho feta leha e le neng pele?

⁵ Ka lebaka leo, ho pholletsa le histori ea batho ho ’nile ha etsahala lintho tse mpe tse etsang hore ho be le ho hloka toka ho tšabehang. Hona joale lintho li senyehile ho feta leha e le neng pele. Hobane’ng? Hobane e se e le ka lilemo tse mashome-shome tsamaiso ena e khopo ea lintho e kene ‘matsatsing a eona a ho qetela,’ ’me joalokaha e habile bofelong ba eona, e fihlile ‘linakong tse mahlonoko tseo ho leng thata ho sebetsana le tsona.’ Bibele e ile ea bolela esale pele hore nakong ena ea histori, batho e ne e tla ba “baithati, ba ratang chelete, ba ikhopolang ho tlōla, ba ikhohomosang, banyefoli, . . . ba se nang teboho, ba sa tšepahaleng, ba se nang lerato la tlhaho, ba sa bulehelang tumellano leha e le efe, baetselletsi, ba hlokang boitšoaro, ba bohale bo tšosang, ba hlokang lerato la se molemo, baeki, ba hlooho li thata, ba ikhohomosang ka boikakaso.” (2 Timothea 3:1-5) Litšobotsi tse mpe joaloka tseo li baka mefuta eohle ea ho hloka toka.

6, 7. Mehleng ea kajeno, moloko oa batho o ’nile oa hlaheloa ke liketso life tsa ho hloka toka?

⁶ Lilemong tse lekholo tse fetileng, ho bile le liketso tsa ho hloka toka tse ngata ho feta leha e le neng pele. Lebaka le leng la seo ke hore lilemong tsena ho bile le lintoa tse ngata ka ho fetisisa. Ka mohlala, bo-rahistori ba bang ba hakanya hore Ntoeng ea II ea Lefatše feela, ho ile ha shoa batho ba limilione tse ka bang 50 ho ea ho tse 60, ’me bongata ba bona e le baahi—banna, basali le bana ba se nang molato. Ho tloha ha ntoa eo e lala, ho ’nile ha bolaoa batho ba bang ba limilione lintoeng tse sa tšoaneng, ’me bongata ba bona e le baahi. Satane o hlohlelletsa liketso tse joalo tsa ho hloka toka hobane o halefile haholo, oa tseba hore haufinyane Jehova o tla mo hlōla ka ho feletseng. Boprofeta ba Bibele bo re: “Diabolose o theohetse ho lōna, a halefile haholo, a tseba hore o na le nako e khutšoanyane.”—Tšenolo 12:12.

⁷ Hona joale chelete e sebelisoang sesoleng lefatšeng lohle e ka ba liranta tse libilione tse 7,4 selemo ka seng. Batho ba makholo a limilione ha ba na lintho tse hlokahalang bophelong, kahoo nahana hore na chelete eo e ne e tla finyella lintho tse molemo hakaakang ha e ne e ka sebelisetsoa merero ea khotso. Batho ba ka bang limilione tse sekete ha ba na lijo tse lekaneng, ha ba bang ba na le matletsetletse. Tlaleho e ’ngoe ea Machaba a Kopaneng e bontša hore bana ba ka bang limilione tse hlano ba bolaoa ke tlala selemo le selemo. Ke ho hloka toka ho hokaakang! Ntle le moo, nahana ka bana ba bangata ba se nang molato ba bolaoang ka ho ntšoa ha limpa. Likhakanyo li bontša hore selemo le selemo ho ntšoa limpa tse ka bang limilione tse 40 ho ea ho tse 60 lefatšeng ka bophara! Ke ho hloka toka ho tšabehang hakaakang!

 8. Ke ka tsela efe feela moloko oa batho o ka bang le toka ea sebele?

⁸ Babusi ba batho ha ba fumane tharollo mathateng a mangata a hlahelang moloko oa batho kajeno; ebile boemo bo ke ke ba ntlafatsoa ke boiteko ba batho. Lentsoe la Molimo le ile la bolela esale pele hore mehleng ea rōna “batho ba khopo le baikhakanyi ba tla tsoela pele ho tloha bobeng ho ea bobeng bo fetisisang, ba khelosa ebile ba ntse ba khelosoa.” (2 Timothea 3:13) Liketso tsa ho hloka toka ke karolo ea bophelo ba letsatsi le letsatsi hoo batho ba ke keng ba khona ho li felisa. Ke Molimo oa toka feela ea ka li felisang. Ke eena feela ea ka felisang Satane, bademona le batho ba khopo.—Jeremia 10:23, 24.

Mabaka a Utloahalang a ho Khathatseha

9, 10. Ke hobane’ng ha Asafe a ile a nyahama?

⁹ Nakong e fetileng, esita le bangoli ba bang ba Bibele ba ne ba ipotsa hore na ke hobane’ng ha Molimo a ne a e-s’o kenelle litabeng tsa batho ebe o tlisa toka le ho loka ha ’nete. Ka mohlala, nahana ka monna e mong oa mehleng ea Bibele. Sehloohoana sa Pesaleme ea 73 se bua ka Asafe, mohlomong e le ha se bua ka sebini sa Molevi se neng se hlaheletse nakong ea puso ea Morena Davida kapa se bua ka libini tsa lelapa leo Asafe e neng e le hlooho ea lona. Asafe le litloholo tsa hae ba ile ba ngola lipina tse ngata tse neng li sebelisoa borapeling ba sechaba. Leha ho le joalo, neng-neng bophelong ba hae, mongoli oa pesaleme ena o ile a nyahama moeeng. O ile a bona kamoo batho ba khopo ba neng ba atlehile kateng linthong tse bonahalang, ’me a hlokomela hore hangata ba ne ba bonahala ba khotsofaletse bophelo, ba sa kotule litholoana leha e le life tse babang.

¹⁰ Rea bala: “Ke ile ka honohela baithorisi, ha ke ne ke bona khotso ea batho ba khopo. Etsoe ha ba na bohloko ba lefu; limpa tsa bona li tenya. Ha ba khathatsong ea motho ea shoang, ha ba otloe ho tšoana le batho ba bang.” (Pesaleme ea 73:2-8) Empa ka mor’a nako mongoli eo oa Bibele o ile a hlokomela hore maikutlo a joalo a mo nyahamisang a fosahetse. (Pesaleme ea 73:15, 16) Mopesaleme o ile a leka ho fetola tsela eo a nahanang ka eona, leha ho le joalo o ne a sitoa ho utloisisa ka ho feletseng hore na ke hobane’ng ha ho ne ho bonahala eka batho ba khopo ba etsa lintho tse mpe ba sa hlaheloe ke letho empa hangata batho ba ratang ho loka ba hlaheloa ke lintho tse bohloko.

11. Mopesaleme Asafe o ile a utloisisa eng?

¹¹ Qetellong, monna eo oa boholo-holo ea tšepahalang o ile a utloisisa hore na ba khopo ba ne ba tla hlaheloa ke eng—a utloisisa hore qetellong Jehova o ne a tla lokisa litaba. (Pesaleme ea 73:17-19) Davida o ile a ngola mantsoe a reng: “Tšepa Jehova ’me u boloke tsela ea hae, o tla u phahamisa hore u rue lefatše. Ha ba khopo ba felisoa, u tla ho bona.”—Pesaleme ea 37:9, 11, 34.

12. (a) Morero oa Jehova ke ofe mabapi le bokhopo le ho hloka toka? (b) U ikutloa joang ka tsela ee ea ho rarolla bothata ba ho hloka toka?

¹² Ka sebele, morero oa Jehova ke hore ka nako ea hae e loketseng a felise bokhopo bo tsamaisanang le ho hloka toka lefatšeng lena. Ena ke taba eo esita le Bakreste ba tšepahalang ba lokelang ho lula ba ikhopotsa eona. Jehova o tla felisa ba hanyetsang thato ea hae, ’me o tla putsa ba phelang tumellanong le eona. “Mahlo a hae aa bona, mahlo a hae a khanyang a hlahloba bara ba batho. Jehova o hlahloba ea lokileng hammoho le ea khopo, ka sebele moea oa Hae o hloile mang kapa mang ea ratang pefo. O tla nesetsa ba khopo lifi, mollo le sebabole le moea o chesang . . . Etsoe Jehova o lokile; o rata liketso tse lokileng.”—Pesaleme ea 11:4-7.

Lefatše le Lecha la Toka

13, 14. Ke hobane’ng ha ho tla rena ho loka le toka lefatšeng le lecha?

¹³ Ha Jehova a felisa tsamaiso ena ea lintho e laoloang ke Satane, O tla tlisa lefatše le lecha le khanyang. Le tla laoloa ke ’Muso oa leholimo oa Molimo oo Jesu a rutileng balateli ba hae hore ba o rapelle. Bokhopo le ho hloka toka li tla nkeloa sebaka ke ho loka le toka, hobane ka nako eo thapelo ena e tla arajoa ka ho feletseng: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”—Matheu 6:10.

¹⁴ Bibele ea re bolella hore na re ka lebella puso ea mofuta ofe, e leng puso eo hona joale batho bohle ba lipelo li ntle ba e labalabelang. Ka nako eo Pesaleme ea 145:16 e tla phethahala ka botlalo ha e re: “[Jehova Molimo] u fuparolla seatla sa hao u khotsofatsa takatso ea ntho e ’ngoe le e ’ngoe e phelang.” Ho feta moo, Esaia 32:1 e re: “Bonang! Morena [Kreste Jesu a le leholimong] o tla busa ka ho loka; ha e le likhosana [baemeli ba Kreste lefatšeng], li tla busa e le likhosana ka toka.” Esaia 9:7 e profeta sena mabapi le Morena Jesu Kreste: “Ho ke ke ha e-ba le bofelo bongateng ba puso ea bohosana le khotso, teroneng ea Davida le ’musong oa hae e le ho o tiisa ka thata le ho o tšehetsa ka toka le ka ho loka, ho tloha joale ho isa nakong e sa lekanyetsoang. Cheseho ea Jehova oa mabotho e tla etsa sena.” Na u ipona u phela tlas’a puso eo e nang le toka?

15. Jehova o tla etsetsa moloko oa batho eng lefatšeng le lecha?

¹⁵ Lefatšeng le lecha la Molimo, ha ho sa tla hlokahala hore re bue mantsoe a ho Moeklesia 4:1, a reng: “Ke ile ka khutla e le hore nka bona liketso tsohle tsa khatello tse ntseng li etsoa tlas’a letsatsi, ’me, bonang! meokho ea ba ntseng ba hatelloa, empa ba ne ba se na motšelisi; bahatelli ba bona ba ne ba e-na le matla, hoo ba neng ba se na motšelisi.” Ke ’nete hore ka lebaka la likelello tsa rōna tse sa phethahalang, ho thata hore re utloisise hantle hore na lefatše leo le lecha la ho loka e tla ba le hlollang hakae. Bokhopo bo ke ke ba hlola bo e-ba teng; ho e-na le hoo, letsatsi le leng le le leng le tla tlala lintho tse molemo. Ruri, Jehova o tla felisa lintho tsohle tse mpe, a etse joalo ka tsela eo ho hang re neng re sa e lebella. Ka sebele ke ho loketseng hore ebe Jehova Molimo o ile a bululela moapostola Petrose hore a ngole mantsoe a reng: “Ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho loka ho tla aha ho tsona”!—2 Petrose 3:13.

16. Ke hobane’ng ha ho ka thoe “maholimo a macha” a se a ntse a thehiloe, hona ke ka kutloisiso efe ho ntseng ho lokisetsoa “lefatše le lecha” kajeno?

¹⁶ Ka sebele, “maholimo a macha,” e leng puso ea leholimo ea Molimo e laoloang ke Kreste, a se a ntse a thehiloe. Matsatsing ana a bofelo, ho ntse ho bokelloa batho bao e tla ba motheo oa “lefatše le lecha,” e leng mokhatlo o mocha oa lefatše oa batho ba ratang ho loka. Ba se ba le limilione tse ka bang tse supileng, linaheng tse ka bang 235 le liphuthehong tse ka bang 100 000. Batho bana ba limilione ba ’nile ba ithuta litsela tsa Jehova tse lokileng le tsa toka, ’me ka lebaka leo, lefatšeng ka bophara ba na le bonngoe bo thehiloeng leratong la Bokreste. Bonngoe ba bona bo pepeneneng ’me bo bile teng ho pholletsa le histori ea lefatše, e leng bonngoe bo fetang eng kapa eng eo mahlahana a Satane a nang le eona. Lerato le bonngoe bo joalo ke selelekela sa nako e tsotehang e tla ba teng lefatšeng le lecha la Molimo, le tla busoa ka ho loka le ka toka.—Esaia 2:2-4; Johanne 13:34, 35; Bakolose 3:14.

Ha Satane a Hlasela, A ke ke a o Besa o Tuke

17. Ke hobane’ng ha Satane a ke ke a o besa o tuke ha a hlasela batho ba Jehova ka lekhetlo la ho qetela?

¹⁷ Haufinyane Satane le balateli ba hae ba tla hlasela barapeli ba Jehova moo ba lekang ho ba felisa. (Ezekiele 38:14-23) Eo e tla be e le karolo ea seo Jesu a itseng ke “matšoenyeho a maholo ao a kang ’ona a e-s’o ka a e-ba teng ho tloha tšimolohong ea lefatše ho fihlela joale, che, leha e le hore a tla ba teng hape.” (Matheu 24:21) Na ha Satane a hlasela o tla o besa o tuke? Le khale! Lentsoe la Molimo le re tiisetsa ho re: “Jehova o rata toka, a ke ke a tlohela ba tšepahalang ba hae. Ka sebele ba tla lebeloa ho isa nakong e sa lekanyetsoang; empa ha e le bana ba ba khopo, ba tla felisoa. Ba lokileng ba tla rua lefatše, ba tla lula ho lona ka ho sa feleng.”—Pesaleme ea 37:28, 29.

18. (a) Molimo o tla nka khato efe ha Satane a hlasela batho ba Hae haufinyane? (b) U ruile molemo joang ka ho hlahloba boitsebiso boo bo thehiloeng Bibeleng bo bolelang kamoo toka e tla hlōla kateng?

¹⁸ Ha Satane le makhotla a hae ba hlasela bahlanka ba Jehova ba tla be ba khoathile linotši tsa semana. Jehova o ile a profeta tjena ka Zakaria: “Ea le amang o ama leihlo la ka.” (Zakaria 2:8) Ho tla ba joalokaha eka motho o khoatha leihlo la Jehova ka monoana. O tla nka khato hang-hang ’me a timetse linokoane tseo. Bahlanka ba Jehova ke batho ba lerato, ba momahaneng, ba nang le khotso, ba bolokang molao ka ho fetisisa lefatšeng. Kahoo ho hang ho tla be ho se na mabaka a utloahalang a hore ba hlaseloe, e tla be e le ho hloka toka. Jehova ea ‘ratang toka’ ka ho fetisisa a ke ke a mamella seo. Khato eo a tla e nka ha a ba sireletsa e tla fella ka hore lira tsa batho ba hae li timetsoe ka ho sa feleng, e felle ka hore toka e hlōle ’me batho ba rapelang Molimo a le mong feela oa ’nete ba fumane poloko. Ka sebele liketsahalo tse larileng ka pel’a rōna ke tse tsotehang le tse hlollang.—Liproverbia 2:21, 22.

U ka Araba Joang?

• Ke hobane’ng ha ho hloka toka ho jele setsi hakaale?

• Ke joang Jehova a tlang ho rarolla bothata ba ho hloka toka lefatšeng?

• U thabetse ho ithuta eng thutong ee e mabapi le kamoo toka e tla hlōla kateng?

[Setšoantšo se leqepheng la 23]

Bokhopo bo ne bo jele setsi pele ho Moroallo, ’me le ‘matsatsing ana a ho qetela’ bo atile

[Setšoantšo se leqepheng la 24, 25]

Lefatšeng le lecha la Molimo, bokhopo bo tla nkeloa sebaka ke toka le ho loka