Na U Tseba ‘ho Leta’?

“Le tšoanela ho ba batho ba mofuta ofe liketsong tse halalelang tsa boitšoaro le liketsong tsa boinehelo ba bomolimo, le letile ’me le lutse le hopola ho ba teng ha letsatsi la Jehova!”—2 PETROSE 3:11, 12.

1, 2. Re ka bapisa taba ea ho ‘letela’ letsatsi la Jehova joang?

AK’U nahane ka lelapa le letetseng baeti ba tlang lijong. Nako eo ba lebeletsoeng ka eona e atamela ka potlako. ’Mè oa lelapa o phathahane ka litokisetso tsa ho qetela tsa lijo. Monna oa hae le bana baa mo thusa hore lintho tsohle li loke. E mong le e mong o nyakaletse. E, lelapa lohle le letetse baeti ka cheseho ’me le lebeletse ho ja lijo tse hlabosang le botsoalle bo khathollang.

² Re le Bakreste, re letetse ntho ea bohlokoa haholoanyane. Re letetse eng? Kaofela re letetse “letsatsi la Jehova”! Ho fihlela le fihla, re lokela ho tšoana le moprofeta Mikea ea ileng a re: “Ke tla ’ne ke lebelle Jehova. Ke tla letela Molimo oa poloko ea ka.” (Mikea 7:7) Na hoo ho bolela ho phutha matsoho? Che. Ho na le mosebetsi o mongata o lokelang ho etsoa.

 3. Ho latela 2 Petrose 3:11, 12, Bakreste ba lokela ho ba le boikutlo bofe?

³ Moapostola Petrose o re thusa hore ha re ntse re letile, re be le boikutlo bo nepahetseng. O re: “Le tšoanela ho ba batho ba mofuta ofe liketsong tse halalelang tsa boitšoaro le liketsong tsa boinehelo ba bomolimo, le letile ’me le lutse le hopola ho ba teng ha letsatsi la Jehova!” (2 Petrose 3:11, 12) Hlokomela hore mona Petrose o ne a sa botse potso, empa o ne a khotsa. Mangolong a hae a mabeli a bululetsoeng ke Molimo, o hlalositse hore na Bakreste e lokela ho ba batho ba mofuta ofe. O ile a boela a ba khothalletsa hore ba tsoele pele ka ‘liketso tse halalelang tsa boitšoaro le liketso tsa boinehelo ba bomolimo.’ Le hoja ho ne ho fetile lilemo tse ka bang 30 Jesu Kreste a ile a fana ka pontšo ea “qetello ea tsamaiso ea lintho,” Bakreste ba ne ba sa lokela ho qhoaolla. (Matheu 24:3) Ba ne ba lokela ho ‘leta le ho lula ba hopola’ ho ba teng ha letsatsi la Jehova.

 4. Ho ‘lula re hopotse ho ba teng ha letsatsi la Jehova’ ho akarelletsa eng?

⁴ Lentsoe la Segerike le fetoletsoeng e le “le lutse le hopola” mona, le bolela “ho potlakisa.” Ha e le hantle, re ke ke ra “potlakisa” letsatsi la Jehova ka tsela ea sebele. Hape, ha re ‘tsebe letsatsi kapa hora’ tsa ha Jesu Kreste a tla tla ahlola lira tsa Ntat’ae. (Matheu 24:36; 25:13) Buka e ’ngoe e hlalosang mantsoe e re motso oa leetsi lena “ho potlakisa” mona o bolela “‘ho akofa’ ’me kahoo le amana haufi le ‘ho cheseha, ho ba mafolofolo le ho ameha ka ho hong.’” Kahoo, Petrose o ne a khothalletsa balumeli-’moho le eena hore ba be le tabatabelo e matla bakeng sa ho ba teng ha letsatsi la Jehova. Sena ba ne ba ka se etsa ka ho le hopola kamehla. (2 Petrose 3:12) Kaha “letsatsi le leholo le le tšosang la Jehova” le haufi haholo, le rōna re lokela ho ba le boikutlo bo tšoanang.—Joele 2:31.

Letang le Ntse le Etsa ‘Liketso Tse Halalelang Tsa Boitšoaro’

 5. Re ka bontša joang hore re na le tabatabelo e matla ea ho bona “letsatsi la Jehova”?

⁵ Haeba re e-na le tabatabelo e matla ea ho pholoha letsatsi la Jehova, re tla totobatsa seo ka ‘liketso [tsa rōna] tse halalelang tsa boitšoaro le tsa boinehelo ba bomolimo.’ Polelo e reng ‘liketso tse halalelang tsa boitšoaro’ e ka ’na ea re hopotsa keletso ena ea Petrose e reng: “Joaloka bana ba mamelang, le khaotse ho ba ka sebōpeho sa litakatso tseo le neng le e-na le tsona pele ho hlokeng tsebo ha lōna, empa, tumellanong le Mohalaleli ea le bitsitseng, le lōna le fele le halalele boitšoarong bohle ba lōna, hobane ho ngoliloe: ‘Le halalele, hobane kea halalela.’”—1 Petrose 1:14-16.

 6. Haeba re batla ho halalela, re lokela ho etsa’ng?

⁶ Haeba re batla ho halalela, re lokela ho hloeka ’meleng, kelellong, boitšoarong le moeeng. Na re lokisetsa “letsatsi la Jehova” ka ho halalela re le batho ka bomong ba bitsoang ka lebitso la Jehova? Kajeno ha ho bonolo ho lula re hloekile kaha boitšoaro ba lefatše lena bo ntse bo hlepha. (1 Bakorinthe 7:31; 2 Timothea 3:13) Na re bona boitšoaro ba rōna bo ntse bo phahamela ba lefatše ka ho eketsehileng? Haeba ha ho joalo, seo se tla bontša hore re na le bothata. Na ho ka etsahala hore ebe boitšoaro ba rōna, le hoja bo le botle ho feta ba lefatše, bo ntse bo senyeha? Haeba ho joalo, re lokela ho ikitlaetsa hore re bo lokise e le hore re thabise Molimo.

7, 8. (a) Re ka ’na ra hlokomoloha bohlokoa ba ho etsa ‘liketso tse halalelang tsa boitšoaro’ joang? (b) Ho ka ’na ha hlokahala hore ho lokisoe eng?

⁷ Ka ho kena ha litšoantšo tsa boitšoaro bo bobe Interneteng le ka lebaka la hore motho a ka li shebella boinotšing, ba bang ba neng ba sa fumane monyetla oa boitsebiso ba boitšoaro bo bobe “ba na le menyetla e mengata ea ho bo shebella hona joale,” kamoo ho bolelang ngaka e ’ngoe. Haeba re ka batla boitsebiso bo joalo bo sa hloekang Interneteng, ka sebele re tla be re hlokomoloha taelo ea Bibele ea hore ‘re se ke ra ama letho le sa hloekang.’ (Esaia 52:11) Na re tla be re hlile re “lutse re hopola ho ba teng ha letsatsi la Jehova”? Kapa na re tla be re chechisa letsatsi leo likelellong tsa rōna, re nahana hore le haeba re silafatsa likelello tsa rōna ka lintho tse litšila, re sa ntsane re e-na le nako ea ho itlhoekisa? Haeba re e-na le bothata ntlheng ee, ho potlakile hakaakang hore re kōpe Jehova ka tieo hore a ‘phemise mahlo a rōna hore a se ke a bona se se nang thuso le hore a re boloke re phela tseleng ea hae’!—Pesaleme ea 119:37.

⁸ Ba bangata haholo har’a Lipaki Tsa Jehova, ba bacha le ba hōlileng, ba khomaretse melao e phahameng ea boitšoaro ea Molimo ’me ba qoba maraba a lefatše lena a ho hloka boitšoaro. Ba hlokomela hore nako e ile hape ba hlokomela temoso ea Petrose ea hore “letsatsi la Jehova le tla tla joaloka lesholu,” ba tsoela pele ho etsa ‘liketso tse halalelang tsa boitšoaro.’ (2 Petrose 3:10) Liketso tsa bona li bontša hore ba “lutse [ba] hopola ho ba teng ha letsatsi la Jehova.”a

Letang le Ntse le Etsa ‘Liketso Tsa Boinehelo ba Bomolimo’

 9. Boinehelo ba bomolimo bo lokela ho re susumelletsa ho etsa eng?

⁹ Ho hopola letsatsi la Jehova ho boetse ho hloka ‘liketso tsa boinehelo ba bomolimo. “Boinehelo ba bomolimo” bo akarelletsa ho hlompha Molimo ho re susumelletsang ho etsa se mo thabisang. Liketso tse joalo tsa boinehelo ba bomolimo li susumetsoa ke ho khomarela Jehova ka botšepehi. Ke thato ea hae hore “batho ba mefuta eohle ba pholohe ’me ba fihle tsebong e nepahetseng ea ’nete.” (1 Timothea 2:4) Molimo “ha a lakatse hore leha e le mang a timetsoe empa o lakatsa hore bohle ba fihle pakong.” (2 Petrose 3:9) Kahoo, boinehelo ba rōna ba bomolimo bo lokela ho re susumelletsa ho ikitlaelletsa ho thusa batho ba bang ho ithuta ka Jehova le ho mo etsisa.—Baefese 5:1.

10. Ke hobane’ng ha re lokela ho itebela khahlanong le “matla a thetsang a maruo”?

¹⁰ Haeba re batla ’Muso oa Molimo pele, bophelo ba rōna bo tla laoloa haholo ke liketso tsa boinehelo ba bomolimo. (Matheu 6:33) Sena se akarelletsa ho ba le pono e nepahetseng ka lintho tse bonahalang. Jesu o ile a lemosa a re: “Lulang le butse mahlo ’me le itebele khahlanong le ho chacheha ka mohono ha mofuta o mong le o mong, hobane esita le ha motho a e-na le ho hongata haholo bophelo ba hae ha bo hlahe linthong tseo a nang le tsona.” (Luka 12:15) Le hoja re ke ke ra nahana hore lerato la chelete le ka re koala kelello, ke hantle ha re ka hlokomela hore “matšoenyeho a tsamaiso ena ea lintho le matla a thetsang a maruo” li ka “bipetsa lentsoe” la Molimo. (Matheu 13:22) Ho ka ’na ha e-ba thata ho fumana mokhoa oa ho phela. Likarolong tse ling tsa lefatše, ba bangata ba nahana hore ka lebaka lena bophelo bo molemo haholoanyane bo ka fumanoa ka ho fallela naheng e ’ngoe e tsoetseng pele, mohlomong ba siea malapa ka lilemo tse seng kae. Esita le ba bang ba batho ba Molimo ba ’nile ba beha lebaka lena. Ha ba e-ea naheng e ’ngoe, ba ka ’na ba khona ho fa malapa a bona lintho tsa sejoale-joale tse majabajaba. Leha ho le joalo, ke eng e ka ’nang ea etsahala ka bomoea ba baratuoa ba bona ba setseng hae? Ha ntate a le sieo ka lapeng, na bomoea ba bona e tla ba bo hlokahalang hore ba pholohe letsatsi la Jehova?

11. Monna e mong ea neng a sebetsa naheng esele o ile a bontša joang hore liketso tsa boinehelo ba bomolimo ke tsa bohlokoa ho feta maruo?

¹¹ Monna e mong oa Philippines ea neng a sebetsa naheng esele o ile a ithuta ’nete ea Bibele ho Lipaki Tsa Jehova Japane. Ha a ithuta boikarabelo ba Mangolo ba hore ntate ke hlooho, o ile a hlokomela hore o lokela ho thusa litho tsa lelapa la hae hore e be barapeli ba Jehova. (1 Bakorinthe 11:3) Mosali oa hae ea neng a setse hae o ile a hanyetsa ka matla bolumeli ba hae bo bocha ’me o ne a batla hore ho e-na le hore a khutlele hae ho tla ruta lelapa ka tumelo ea hae e thehiloeng Bibeleng, ho molemo hore a ’ne a romelle chelete feela. Ho sa tsotellehe seo, ka lebaka la ho khannoa ke nako le ho ameha ka baratuoa ba hae, o ile a ea hae. Mamello ea hae ha a sebelisana le litho tsa lelapa la hae e ile ea tsoala katleho. Ka mor’a nako, lelapa la hae le ile la momahana borapeling ba ’nete, ’me mosali oa hae ea e-ba pula-maliboho.

12. Ke hobane’ng ha re lokela ho etelletsa pele lintho tsa moea bophelong?

¹² Boemo ba rōna bo ka tšoantšoa le ba batho ba ka mohahong o chang. Na e ka ba ntho e bohlale ho hlaphasela u leka ho pholosa thepa e ka mohahong o tukang malakabe, o tla tloha o putlama? Ho e-na le hoo, na ho ke ke ha e-ba molemo haholo ho pholosa bophelo—ba rōna le ba malapa a rōna le ba ba bang ba ka mohahong oo? Ha e le hantle, tsamaiso ena e khopo ea lintho e tla tloha e putlama, ’me bophelo bo kotsing. Ka lebaka la ho hlokomela sena, re lokela ho etelletsa lintho tsa moea pele ’me ka cheseho re lebise tlhokomelo e feletseng mosebetsing o pholosang bophelo oa ho bolela ka ’Muso.—1 Timothea 4:16.

Re Lokela ho Hloka “Letheba”

13. Ha letsatsi la Jehova le fihla re batla hore le re fumane re le boemong bofe?

¹³ Petrose o hatisa bohlokoa ba ho tseba ho leta o re: “Baratuoa, kaha le letetse lintho tsena, le etse sohle se matleng a lōna hore qetellong [Molimo] a le fumane le se na letheba ebile le se na sekoli ’me le le khotsong.” (2 Petrose 3:14) Petrose o phaella khothatso ea hae ea hore re etse liketso tse halalelang tsa boitšoaro le liketso tsa boinehelo ba bomolimo ka ho hatisa bohlokoa ba hore qetellong Jehova a re fumane re le batho ba hloekisitsoeng ka mali a bohlokoa a Jesu. (Tšenolo 7:9, 14) Sena se hloka hore motho a bontše tumelo sehlabelong sa Jesu le hore e be mohlanka oa Jehova ea inehetseng le ea kolobelitsoeng.

14. Ho hloka “letheba” ho akarelletsa eng?

¹⁴ Petrose o re khothalletsa hore re ikitlaelletse hore re fumanoe re hloka “letheba.” Na re boloka liaparo tsa rōna tsa boitšoaro ba Bokreste le botho ba rōna ba Bokreste li se na letheba, li sa silafatsoa ke lefatše? Ha re bona letheba liaparong tsa rōna, re potlakela ho leka ho le tlosa. Haeba le le seaparong seo re se ratang haholo, re le tlosa ka makhethe ’ohle. Na re ikutloa ka tsela e tšoanang haeba, ka tsela ea tšoantšetso, liaparo tsa rōna tsa Bokreste li silafetse, ka lebaka la bofokoli bo itseng bothong ba rōna kapa boitšoarong ba rōna?

15. (a) Ke hobane’ng ha Baiseraele ba ne ba lokela ho etsa mophetho o litjellane molekeng oa liaparo tsa bona? (b) Ke hobane’ng ha bahlanka ba Jehova ba mehleng ee ba khethollehile ho batho ba bang?

¹⁵ Baiseraele ba ne ba lokela ho etsa “mophetho o litjellane molekeng oa liaparo tsa bona” le ho ‘kenya khoele e putsoa holim’a mophetho o litjellane oa moleka.’ Hobane’ng? E le hore ba hopole litaelo tsa Jehova, ba li mamele, ’me ‘ba halalele’ ho Molimo oa bona. (Numere 15:38-40) Joaloka bahlanka ba Jehova ba mehleng ena, re khethollehile ho batho ba bang kahobane re boloka melao le melao-motheo ea Molimo. Ka mohlala, re itšoara hantle, re hlompha mali hobane aa halalela, hape re qoba borapeli ba litšoantšo ka mefuta eohle ea bona. (Liketso 15:28, 29) Batho ba bangata baa re hlompha hobane re ikemiselitse ho lula re sa silafala.—Jakobo 1:27.

Re Lokela ho Hloka “Sekoli”

16. Ho lula re hloka “sekoli” ho akarelletsa eng?

¹⁶ Petrose o boetse o re re lokela ho fumanoa re hloka “sekoli.” See se ka etsahala joang? Hangata letheba le ka phumoloa kapa la hlatsuoa empa ha ho joalo ka sekoli. Sekoli se bontša hore ho na le se phoso botebong. Moapostola Pauluse o ile a khothatsa Bakreste ba habo ba Filipi a re: “Le ’ne le etse lintho tsohle le sa korotle ’me le se na likhang, e le hore le ka ba ba sa tšoauoeng phoso le ba hlokang molato, bana ba Molimo ba se nang sekoli har’a moloko o khopameng le o sothehileng, oo har’a oona le khanyang le le maseli lefatšeng.” (Bafilipi 2:14, 15) Haeba re latela keletso eo, re tla qoba ho korotla le ho etsa likhang ’me re tla sebeletsa Molimo ka boikemisetso bo botle. Re tla susumetsoa ke ho rata Jehova le baahelani ba rōna ha re bolela “litaba tsena tse molemo tsa ’muso.” (Matheu 22:35-40; 24:14) Ho feta moo, re tla tsoela pele ho bolela litaba tse molemo le haeba ho ka etsahala hore ebe batho ba bangata ha ba utloisise hore na ke hobane’ng ha re tela nako ea rōna ha re leka ho thusa batho ba bang ho ithuta ka Molimo le Lentsoe la hae, Bibele.

17. Ke ka sepheo sefe re lokelang ho hahamalla litokelo tsa tšebeletso ka phuthehong ea Bokreste?

¹⁷ Kaha re lakatsa ho fumanoa re hloka “sekoli,” ke hantle hore re hlahlobe hore na re etsa lintho ka sepheo sefe. Re tlohetse tsela ea lefatše ea ho etsa lintho ka mabaka a boithati, e kang ho hahamalla maruo le ho laola batho ba bang. Haeba re hahamalla litokelo tsa tšebeletso ka phuthehong ea Bokreste, e se eka re ka etsa joalo ka sepheo se setle ’me e se eka kamehla re ka susumetsoa ke ho rata Jehova le batho ba bang. Hoa thabisa ho bona banna ba moea ba “hahamalla boemo ba molebeli” ka thabo le ka boikokobetso ba ho lakatsa ho sebeletsa Jehova le balumeli-’moho le bona. (1 Timothea 3:1; 2 Bakorinthe 1:24) Ke ’nete hore ba tšoanelehang ho sebeletsa e le baholo ba ‘lisa mohlape oa Molimo . . . ka ho rata; eseng ka lebaka la lerato la leruo la ho se tšepahale, empa ka tabatabelo; eseng ka ho rena ka thata holim’a bao e leng lefa la Molimo, empa ka ho ba mehlala ho mohlape.’—1 Petrose 5:1-4.

Re Lokela ho ba “Khotsong”

18. Lipaki Tsa Jehova li tsebahala ka litšobotsi life?

¹⁸ Qetellong, Petrose o re bolella hore re fumanoe re le “khotsong.” E le hore re phelele taelo ena, re lokela ho ba khotsong le Jehova le baahelani ba rōna. Petrose o hatella bohlokoa ba hore re “bontšane lerato le matla haholo” le ba hore re phelisane ka khotso le Bakreste-’moho le rōna. (1 Petrose 2:17; 3:10, 11; 4:8; 2 Petrose 1:5-7) E le hore re be khotsong, re lokela ho ratana. (Johanne 13:34, 35; Baefese 4:1, 2) Lerato la rōna le khotso ea rōna li totobala ka ho khethehileng ha re tšoere likopano tsa rōna tsa machaba. Kopanong e khōlō e neng e le Costa Rica ka 1999, morekisi e mong ea sebeletsang boema-fofane o ile a koata hobane ka ho se hlokomele, Lipaki tsa moo li ile tsa sira karolo e ’ngoe ea sebaka seo a rekisetsang ho sona, ha li amohela baeti ba neng ba tlile kopanong. Leha ho le joalo, letsatsing la bobeli, o ile a bona lerato le khotso tse ileng tsa bontšoa kamohelong e mofuthu ea baeti, le hoja Lipaki tsa moo li ne li qala ho bona baeti bana. Letsatsing la ho qetela, morekisi enoa o ile a kopanela tumelisong ’me a kōpa thuto ea Bibele.

19. Ke hobane’ng ha ho hlokahala hore re phehelle ho ba khotsong le balumeli-’moho le rōna?

¹⁹ Haeba re sa phelisane ka khotso le ka botšepehi le ba bang ka phuthehong, re ka ’na ra bontša hore ha rea letela ka tieo letsatsi la Jehova le lefatše la hae le lecha leo a re tšepisitseng lona. (Pesaleme ea 37:11; 2 Peter 3:13) A re re mohlomong re thatafalloa ke ho phela ka khotso le molumeli-’moho le rōna e mong. Na re ka ipona re phela ka khotso le eena Paradeiseng? Haeba mor’abo rōna a re koatetse, re lokela ho potlakela ho ‘etsa khotso le eena.’ (Matheu 5:23, 24) Sena ke sa bohlokoa e le hore re be khotsong le Jehova.—Pesaleme ea 35:27; 1 Johanne 4:20.

20. Ho tseba ho “leta” ho ka bontšoa ka litsela life?

²⁰ Re le batho ka bomong, na re “letile ’me re lutse re hopola ho ba teng ha letsatsi la Jehova”? Ka ho lula re halalela lefatšeng lena la boitšoaro bo bobe, re ka bontša hore re labalabela ka matla ho bona bokhopo bo fela. Ho feta moo, tabatabelo ea rōna e matla ea hore letsatsi la Jehova le tle le ea ho phela pusong ea ’Muso, e totobatsoa ke liketso tsa rōna tsa boinehelo ba bomolimo. Ka ho phelisana ka khotso le barapeli-’moho le rōna hona joale, re ka bontša hore re batla ho phela lefatšeng le lecha la khotso. Ha re etsa joalo, re bontša hore re tseba ho “leta” ebile re “lutse [re] hopola ho ba teng ha letsatsi la Jehova.”

[Mongolo o botlaaseng ba leqephe]

Na Ua Hopola?

• Ho ‘lula re hopotse ho ba teng ha letsatsi la Jehova’ ho bolela eng?

• Ho tseba ho “leta” ho bonahala joang boitšoarong ba rōna?

• Ke hobane’ng ha ‘liketso tsa boinehelo ba bomolimo’ e le tsa bohlokoa?

• Re lokela ho etsa eng e le hore Jehova a re fumane ‘re se na letheba ebile re se na sekoli ’me re le khotsong’?

[Setšoantšo se leqepheng la 11]

Ho tseba ho “leta” ho bontšoa ka liketso tse halalelang tsa boitšoaro

[Litšoantšo tse leqepheng la 12]

Mosebetsi oa ho bolela ka ’Muso oa phelisa

[Setšoantšo se leqepheng la 14]

Ha re ntse re letetse letsatsi la Jehova, a re phelisaneng ka khotso le batho ba bang