A Re Tšoarelleng ka Tieo Tumelong ea Rōna ea Bohlokoa!
‘Ho ba fumaneng tumelo, eo re filoeng tokelo e lekanang ea ho ba le eona.’—2 PETROSE 1:1.
1. Jesu o ile a re’ng ha a lemosa baapostola ba hae, empa Petrose o ile a ithorisa ka eng?
MANTSIBOEENG a pele ho lefu la Jesu, o ile a re baapostola ba hae kaofela ba ne ba tla mo tlohela. E mong oa bona, e leng Petrose, o ile a ithorisa: “Le haeba ba bang kaofela ba khoptjoa mabapi le uena, le ka mohla ha nka ke ka khoptjoa!” (Matheu 26:33) Empa Jesu o ne a tseba se fapaneng le seo. Ke ka lebaka leo a ileng a bolella Petrose ka nako eona eo a re: “Ke u etselitse thapeli hore tumelo ea hao e se ke ea fela; ’me uena, hang feela ha u khutlile, u matlafatse barab’eno.”—Luka 22:32.
2. Ho sa tsotellehe ho itšepa ho tlōlisa ha Petrose, o ile a etsa eng e neng e bontša hore tumelo ea hae ea fokola?
2 Petrose, ea neng a se a itšepa ho tlōlisa mabapi le tumelo ea hae, o ile a latola Jesu bosiung bona boo. Ka makhetlo a mararo o ile a hana esita le hore o ne a tseba Kreste! (Matheu 26:69-75) Ha a “khutlile,” e tlameha ebe mantsoe a Monghali oa hae a reng, “u matlafatse barab’eno,” a ile a utloahala ka ho hlaka khafetsa litsebeng tsa hae. Karolo e setseng ea bophelo ba Petrose e ile ea angoa ka ho teba ke keletso eo, joalokaha ho paka mangolo a mabeli ao a ileng a a ngola, a bolokiloeng ka Bibeleng.
Lebaka Leo ka Lona Petrose a Ileng a Ngola Mangolo a Hae
3. Ke hobane’ng ha Petrose a ile a ngola lengolo la hae la pele?
3 Lilemo tse ka bang 30 ka mor’a lefu la Jesu, Petrose o ile a ngola lengolo la hae la pele, a le lebisitse ho barab’abo ba Pontase, Galatia, Kapadosia, Asia le Bithynia, e leng libaka tseo hona joale li bōpang Turkey e ka leboea le e ka bophirimela. (1 Petrose 1:1) Bajuda, bao e ka ’nang eaba ba bang ba bona ba ile ba fetoha Bakreste ka Pentekonta ea 33 C.E., ha ho pelaelo hore ba ne ba le har’a bao Petrose a ileng a ba ngolla. (Liketso 2:1, 7-9) Ba bangata e ne e le Balichaba ba neng ba feta litekong tse kang mollo matsohong a bahanyetsi. (1 Petrose 1:6, 7; 2:12, 19, 20; 3:13-17; 4:12-14) Ka hona Petrose o ile a ngolla bara bana babo ho ba khothatsa. Sepheo sa hae e ne e le ho ba thusa ho amohela “pheletso ea tumelo ea [bona], poloko ea lisoule tsa [bona].” Kahoo, keletsong eo a ileng a khaohana le bona ka eona, o ile a phehella: “Emang khahlanong le [Diabolose], le tiile tumelong.”—1 Petrose 1:9; 5:8-10.
4. Petrose o ile a ngola lengolo la hae la bobeli ka lebaka lefe?
4 Hamorao, Petrose o ile a ngolla Bakreste bana lengolo la bobeli. (2 Petrose 3:1) Hobane’ng? Hobane ho ne ho e-na le tšokelo e bileng e leng khōloanyane. Batho ba itšoereng hampe ba ne ba tla leka ho khothalletsa boitšoaro ba bona bo silafatsang har’a balumeli ’me ba ne ba tla khelosa ba bang! (2 Petrose 2:1-3) Ho feta moo, Petrose o ile a lemosa ka basomi. Lengolong la hae la pele o ne a ngotse a re “bofelo ba lintho tsohle bo atametse,” ’me joale ho ne ho bonahala eka ba bang ba soma mohopolo o joalo. (1 Petrose 4:7; 2 Petrose 3:3, 4) A re hlahlobeng lengolo la bobeli la Petrose ’me re bone kamoo le ileng la matlafatsa barab’abo hore ba lule ba tiile tumelong. Sehloohong sena sa pele, re tla hlahloba 2 Petrose khaolo ea 1.
Morero oa Khaolo ea 1
5. Petrose o lokisetsa babali ba hae puisano e mabapi le mathata joang?
5 Petrose ha a sebetsane hang-hang le mathata a tebileng a hlahileng. Ho e-na le hoo, o lokisa tsela bakeng sa ho tšohla mathata ana ka ho eketsa kananelo ea babali ba hae bakeng sa seo ba ileng ba se fumana ha ba fetoha Bakreste. O ba hopotsa ka litšepiso tse hlollang tsa Molimo le ka ho tšepahala ha boprofeta ba Bibele. O etsa sena ka ho pheta pono eo a bileng le eona ea ho fetoha sebōpeho, ha Kreste a le matleng a ’Muso.—Matheu 17:1-8; 2 Petrose 1:3, 4, 11, 16-21.
6, 7. (a) Re ka ithuta thuto efe kenyelletsong ea lengolo la Petrose? (b) Haeba re fana ka keletso, ka linako tse ling ho ka ba molemo hore re lumele eng?
6 Na ho na le thuto eo re ka ithutang eona kenyelletsong ea Petrose? Na keletso ha e amohelehe haholoanyane haeba re qala ka hore re hlahlobe le ba e mametseng litšobotsi tsa tšepo ea rōna ea ’Muso e hlollang eo rōna hammoho le bona re e nkang e le ea bohlokoa? Ho thoe’ng ka ho sebelisa phihlelo ea botho? Ho ka etsahala hore ebe ka mor’a lefu la Jesu, Petrose o ne a atisa ho bua ka ho bona pono ela ea Kreste a le khanyeng ea ’Muso.—Matheu 17:9.
7 Hape, hopola hore ho ne ho ka etsahala hore ebe nakong eo Petrose a neng a ngola lengolo la hae la bobeli ka eona, Kosepele ea Matheu le lengolo la moapostola Pauluse le eang ho Bagalata li ne li se li abiloe hohle. Ka hona e ka ’na eaba mefokolo ea Petrose ea botho esita le tlaleho ea hae ea tumelo li ne li tsebahala har’a batho ba mehleng ea hae. (Matheu 16:21-23; Bagalata 2:11-14) Leha ho le joalo, sena ha sea ka sa mo tima bolokolohi ba puo. Ka sebele, e ka ’na eaba se entse hore lengolo la hae le ipiletse haholoanyane ho ba neng ba ela hloko liphoso tsa bona. Ka lebaka leo, ha re thusa ba nang le mathata, na e ke ke ea e-ba ho sebetsang ho lumela hore le rōna re sekametse ho etseng liphoso?—Baroma 3:23; Bagalata 6:1.
Tumeliso e Matlafatsang
8. Ho ka etsahala hore ebe Petrose o ile a sebelisa lentsoe “tumelo” ka kutloisiso efe?
8 Joale nahana ka tumeliso ea Petrose. Hang-hang o bua ka taba ea tumelo, a bua le babali ba hae e le ‘ba fumaneng tumelo, eo re filoeng tokelo e lekanang ea ho ba le eona.’ (2 Petrose 1:1) Mona lentsoe “tumelo” mohlomong le bolela “tšusumetso e tiileng” ’me le supa litumelo kapa lithuto tsa Bokreste ka kakaretso, tseo ka Mangolong ka linako tse ling li bitsoang “’nete.” (Bagalata 5:7; 2 Petrose 2:2; 2 Johanne 1) Lentsoe “tumelo” hangata le sebelisoa ka kutloisiso ena ho e-na le ka kutloisiso e akaretsang ea tšepo kapa kholiseho e behiloeng mothong ea itseng kapa nthong e itseng.—Liketso 6:7; 2 Bakorinthe 13:5; Bagalata 6:10; Baefese 4:5; Jude 3.
9. Ke hobane’ng ha e tlameha ebe tumeliso ea Petrose e ile ea utloahala e le mofuthu ka ho khetheha ho Balichaba?
9 E tlameha ebe tumeliso ea Petrose e ile ea utloahala e le mofuthu ka ho khethehileng ho babali ba Balichaba. Bajuda ba ne ba sa sebelisane le Balichaba, ba bile ba ba nyelisa, ’me leeme khahlanong le Balichaba le ile la tsoela pele har’a Bajuda ba neng ba fetohile Bakreste. (Luka 10:29-37; Johanne 4:9; Liketso 10:28) Empa, Petrose, eo e neng e le Mojuda ka tlhaho ebile e le moapostola oa Jesu Kreste, o ile a bolela hore babali ba hae—Bajuda le Balichaba—ba ne ba kopanela tumelo e tšoanang ba bile ba thabela tokelo e lekanang le ea hae.
10. Re ka ithuta lithuto life tumelisong ea Petrose?
10 Nahana ka lithuto tse molemo tseo tumeliso ea Petrose e re rutang tsona kajeno. Molimo ha a leeme; ha a rate morabe o mong ho feta o mong kapa sechaba se seng ho feta se seng. (Liketso 10:34, 35; 11:1, 17; 15:3-9) Joalokaha Jesu ka boeena a ile a ruta, Bakreste kaofela ke bara ba motho, ’me ha ho le ea mong ho rōna ea lokelang ho ikutloa a phahametse ba bang. Ho feta moo, litumeliso tsa Petrose li hatisa hore ka sebele re mokhatlo oa bara ba motho lefatšeng ka bophara, ba filoeng ‘tokelo e lekanang’ ea ho ba le tumelo eo Petrose le baapostola ba habo ba neng ba e-na le eona.—Matheu 23:8; 1 Petrose 5:9.
Tsebo le Litšepiso Tsa Molimo
11. Ka mor’a tumeliso ea hae, Petrose o hatisa lintho life tsa bohlokoahali?
11 Ka mor’a tumeliso ea hae, Petrose oa ngola: “E se eka le ka ekeletsoa mosa o sa tšoanelang le khotso.” Re lokela ho ekeletsoa mosa o sa tšoanelang le khotso joang? Petrose oa araba: “Ka tsebo e nepahetseng ea Molimo le ea Jesu Morena oa rōna.” Joale o re: “Matla . . . a bomolimo a re file ka bolokolohi lintho tsohle tse malebana le bophelo le boinehelo ba bomolimo.” Empa re fumana lintho tsee tsa bohlokoahali joang? “Ka tsebo e nepahetseng ea ea re bitsitseng ka khanya le bokhabane.” Kahoo Petrose o ile a hatisa habeli hore tsebo e nepahetseng ea Molimo le Mora oa hae ea hlokahala.—2 Petrose 1:2, 3; Johanne 17:3.
12. (a) Ke hobane’ng ha Petrose a hatisa bohlokoa ba tsebo e nepahetseng? (b) Ho thabela litšepiso tsa Molimo, re tlameha hore re be re entse eng pele?
12 “Mesuoe ea bohata” eo Petrose a lemosang ka eona khaolong ea 2 e sebelisa “mantsoe a iqapetsoeng” ho thetsa Bakreste. Ka tsela ena e leka ho ba qekela hore ba khutlele boitšoarong bo bobe boo ba lopolotsoeng ho bona. Liphello ho bafe kapa bafe ba pholositsoeng ka “tsebo e nepahetseng ea Morena le Mopholosi Jesu Kreste,” bao hamorao ba inehelang thetsong e joalo ke tse bohloko. (2 Petrose 2:1-3, 20) Ka sebele, kaha o ne a lebeletse ho tšohla bothata bona hamorao, qalong feela ea lengolo la hae Petrose o hatisa karolo ea tsebo e nepahetseng tabeng ea ho lula re hloekile ho Molimo. Petrose o hlokomela hore Molimo “o re file ka bolokolohi litšepiso tsa bohlokoa le tse khōlō haholo, e le hore ka tsena le ka ba ba nang le karolo sebōpehong sa bomolimo.” Empa, ho thabela litšepiso tsena, tseo e leng karolo ea bohlokoahali ea tumelo ea rōna, Petrose o re, re tlameha hore pele re be re “phonyohile ho boleng ho leng lefatšeng ka takatso e feteletseng.”—2 Petrose 1:4.
13. Bakreste ba tlotsitsoeng le “linku tse ling” ka bobeli ba ikemiselitse ho tšoarella ka tieo ho eng?
13 U talima litšepiso tsa Molimo joang? Na u li talima ka tsela eo masala a batlotsuoa a Bakreste a li talimang ka eona? Ka 1991, Frederick Franz, eo ka nako eo e neng e le mopresidente oa Watch Tower Bible and Tract Society, ea neng a bile tšebeletsong ea nako e tletseng ka lilemo tse fetang 75, o ile a akaretsa maikutlo a ba nang le tšepo ea ho busa le Kreste ka tsela ena: “Ho fihlela nakong ena re tšoere ka tieo, ’me re tla tšoara ka tieo ho fihlela Molimo a se a hlile a ipakile e le oa ’nete mabapi le ‘litšepiso tsa hae tsa bohlokoa le tse khōlō haholo.’” Mor’abo rōna Franz o ile a lula a kholisehile ka tšepiso ea Molimo ea tsoho ea leholimo, ’me o ile a tšoarella ka tieo tumelong ho fihlela lefung la hae ha a le lilemo li 99. (1 Bakorinthe 15:42-44; Bafilippi 3:13, 14; 2 Timothea 2:10-12) Ka ho tšoanang, ba limilione ba tšoareletse ka tieo tumelong, ba lebisitse tlhokomelo ea bona tšepisong ea Molimo ea lefatše la paradeise leo ho lona batho ba tla phela ka ho sa feleng ka thabo. Na u e mong oa baa?—Luka 23:43; 2 Petrose 3:13; Tšenolo 21:3, 4.
Karabelo Litšepisong Tsa Molimo
14. Ke hobane’ng ha Petrose a thathamisa bokhabane e le tšoaneleho ea pele e lokelang ho ekelletsoa tumelong?
14 Na re leboha Molimo ka seo a se tšepisitseng? Haeba ho joalo, Petrose o bontša hore re lokela ho ho bontša. “E, ka lebaka lona lena” (hobane Molimo o re tšepisitse lintho tsa bohlokoa haholo), re lokela ho etsa boiteko ba sebele ba ho etsa ho hong. Re ke ke ra khotsofalla feela ho ba tumelong kapa feela ho tloaelana le ’nete ea Bibele. Hoo ha hoa lekana! Mohlomong mehleng ea Petrose ba bang ka har’a liphutheho ba ne ba bua haholo ka tumelo empa ba kopanela boitšoarong bo bobe. Ho ne ho hlokahala hore boitšoaro ba bona bo be khabane, ka hona Petrose oa phehella: ‘Tumelong ea lōna le eketse bokhabane.’—2 Petrose 1:5; Jakobo 2:14-17.
15. (a) Ke hobane’ng ha tsebo e thathamisoa ka mor’a bokhabane e le tšoaneleho e lokelang ho ekelletsoa tumelong? (b) Ke litšoaneleho life tse ling tse tla re hlomella ho tšoarella ka tieo tumelong?
15 Ka mor’a ho bua ka bokhabane, Petrose o thathamisa litšoaneleho tse ling tse tšeletseng tse lokelang ho ekelletsoa kapa ho tlatselletsoa tumelong ea rōna. E ’ngoe le e ’ngoe ea tsona ea hlokahala e le hore re “eme [re] tiile tumelong.” (1 Bakorinthe 16:13) Kaha bakoenehi ba ne ba ‘sotha Mangolo’ ba bile ba buella ‘lithuto tse thetsang,’ ka mor’a moo Petrose o thathamisa tsebo e le ea bohlokoahali, ha a re: “Bokhabaneng ba lōna [eketsang] tsebo.” Joale o tsoela pele: “Tsebong ea lōna [eketsang] boitšoaro, boitšoarong ba lōna mamello, mamellong ea lōna boinehelo ba bomolimo, boinehelong ba lōna ba bomolimo boikutlo bo mofuthu ba bara ba motho, boikutlong ba lōna bo mofuthu ba bara ba motho lerato.”—2 Petrose 1:5-7; 2:12, 13; 3:16.
16. Ho tla etsahala’ng haeba litšoaneleho tseo Petrose a li thathamisang li ekelletsoa tumelong, empa ho tla etsahala eng haeba li sa ekelletsoe?
16 Ho tla etsahala eng haeba lintho tsee tse supileng li ekelletsoa tumelong ea rōna? Petrose oa araba: “Haeba lintho tsena li le teng ho lōna ’me li khaphatseha, li tla le thibela ho ba ba sa sebetseng kapa ba sa beheng mabapi le tsebo e nepahetseng ea Morena oa rōna Jesu Kreste.” (2 Petrose 1:8) Ka lehlakoreng le leng, Petrose o re: “Haeba lintho tsena li le sieo ho mang kapa mang, o foufetse, o koalla mahlo a hae leseli, ’me o fetohile ea lebalang ho hloekisoa ha hae libeng tsa hae tsa khale.” (2 Petrose 1:9) Hlokomela hore Petrose o tloha tšebelisong ea “lōna” le “rōna” o fetohela tšebelisong ea “mang kapa mang,” “o” le “hae.” Le hoja, ka masoabi, ba bang ba foufetse, ba lebala ba bile ba sa hloeka, Petrose ka mosa ha a bolele hore ’mali ke e mong oa bana.—2 Petrose 2:2.
Ho Matlafatsa Barab’abo
17. E ka ’na eaba boipiletso bo bonolo ba Petrose bakeng sa ho etsa “lintho tsena” bo susumelitsoe ke’ng?
17 Mohlomong ha a hlokomela hore ka ho khethehileng ba bacha ba ka thetsoa habonolo, Petrose o ba khothatsa ka bonolo: “Barab’eso, le etse haholoanyane sohle se matleng a lōna ho itiisetsa ho bitsoa le ho khethoa ha lōna; etsoe haeba le ntse le tsoela pele ho etsa lintho tsena ho hang ha le na ho hlōleha le ka mohla.” (2 Petrose 1:10; 2:18) Bakreste ba tlotsitsoeng ba ekelletsang lintho tsena tse supileng tumelong ea bona ba tla thabela moputso o moholo, joalokaha Petrose a re: “Le tla ekeletsoa ka ho enneng ho kena ’musong o sa feleng oa Morena le Mopholosi oa rōna Jesu Kreste.” (2 Petrose 1:11) “Linku tse ling” li tla fumana lefa le sa feleng karolong ea lefatšeng ea ’Muso oa Molimo.—Johanne 10:16; Matheu 25:33, 34.
18. Ke hobane’ng ha Petrose a sekamela ‘kamehla ho hopotseng’ barab’abo?
18 Petrose ka tieo o batlela barab’abo moputso oo o moholo. Oa ngola: “Ka lebaka lena ke tla sekamela ka mehla ho le hopotseng lintho tsena, le hoja le li tseba ’me le tsepame ’neteng.” (2 Petrose 1:12) Petrose o sebelisa lentsoe la Segerike ste·riʹzo, leo mona le fetoletsoeng e le “le tsepame” empa le fetoletsoeng e le “matlafatse” keletsong ea Jesu ea pejana ho Petrose e reng: “U matlafatse barab’eno.” (Luka 22:32) Tšebeliso ea lentsoe leo e ka ’na ea bolela hore Petrose o hopola keletso e matla eo a e fumaneng ho Morena oa hae. Joale Petrose o re: “Ke ho nka ho nepahetse, hafeela ke le tabernakeleng ena [’mele oa botho], ho le tsosa ka ho le hopotsa, joalokaha ke hlile ke tseba hore ho tlosoa ha tabernakele ea ka ho tla tloha ho etsahala.”—2 Petrose 1:13, 14.
19. Re hloka lithuso life kajeno?
19 Le hoja ka mosa Petrose a bolela hore babali ba hae ba “tsepame ’neteng,” o hlokomela hore tumelo ea bona e ne e ka ’na ea senyeha. (1 Timothea 1:19) Kaha oa tseba hore o se a tla shoa, o matlafatsa barab’abo ka ho bolela lintho tsena tseo ba ka li hopolang hamorao ho ipoloka ba le matla moeeng. (2 Petrose 1:15; 3:12, 13) Ka ho tšoanang, rōna kajeno re hloka likhopotso tse sa khaotseng ho lula re le matla tumelong. Ho sa tsotellehe hore na re bo-mang kapa re bile ’neteng ka nako e kae, re ke ke ra hlokomoloha ’malo oa Bibele oa kamehla, thuto ea botho le ho ba teng libokeng tsa phutheho. Ba bang baa ikemela bakeng sa ho se kopanele, ba bolela hore ba khathetse haholo kapa hore liboka li pheta-pheta lintho tse tšoanang kapa ha li thahasellise, empa Petrose o ne a tseba hore na mang kapa mang ho rōna a ka lahleheloa ke tumelo kapele hakae haeba a itšepa ho tlōlisa.—Mareka 14:66-72; 1 Bakorinthe 10:12; Baheberu 10:25.
Mabaka a Matla Bakeng sa Tumelo ea Rōna
20, 21. Ho fetoha sebōpeho ha Jesu ho ile ha matlafatsa tumelo ea Petrose le babali ba mangolo a hae joang, ho akarelletsa le rōna kajeno?
20 Na tumelo ea rōna e thehiloe feela litšōmong tse iqapetsoeng ka bohlale? Petrose o arabela ka ho hatisa: “Che, e ne e se ka ho latela lipale tsa bohata tse qapiloeng ka bomene-mene re ileng ra le tsebisa matla le ho ba teng tsa Morena oa rōna Jesu Kreste, empa e ne e le ka hore re bile lipaki tse boneng ka mahlo tsa botle ba hae bo hlollang.” Petrose, Jakobo le Johanne ba ne ba e-na le Jesu ha ba bona pono ea hae a le matleng a ’Muso. Petrose oa hlalosa: “O ile a amohela ho Molimo Ntate tlhompho le khanya, ha mantsoe a kang ana a ne a fetisetsoa ho eena ka khanya e hlollang: ‘Enoa ke mora oa ka, moratuoa oa ka, eo ’na ka bonna ke mo amohetseng.’ E, re ile ra utloa mantsoe ana a fetisoa ho tsoa leholimong ha re ntse re e-na le eena thabeng e halalelang.”—2 Petrose 1:16-18.
21 Ha Petrose, Jakobo le Johanne ba bona pono eo, ka sebele ’Muso e ile ea e-ba oa sebele ho bona! Petrose oa hlokomela: “Ka lebaka leo re na le lentsoe la boprofeta le tiisitsoeng haholoanyane; ’me le etsa hantle ha le le ela hloko.” E, babali ba lengolo la Petrose, ho akarelletsa le rōna kajeno, ba na le lebaka le matla la ho ela hloko boprofeta bo buang ka ’Muso oa Molimo. Ho hlokahala hore re bo ele hloko ka tsela efe? Petrose oa araba: “Joaloka lebone le khanyang sebakeng se lefifi, ho fihlela letsatsi le chaba le naleli ea motšehare e hlaha, ka lipelong tsa lōna.”—2 Petrose 1:19; Daniele 7:13, 14; Esaia 9:6, 7.
22. (a) Ho hlokahala hore lipelo tsa rōna li lule li falimehetse eng? (b) Re ela hloko lentsoe la boprofeta joang?
22 Lipelo tsa rōna li ne li tla ba lefifi ntle ho leseli la lentsoe la boprofeta. Empa ka ho le ela hloko, lipelo tsa Bakreste li lula li falimehetse ho chaba ha letsatsi la ha “naleli ea motšehare,” Jesu Kreste, a hlaha khanyeng ea ’Muso. (Tšenolo 22:16) Rōna kajeno re ela hloko lentsoe la boprofeta joang? Ka thuto ea Bibele, ka ho lokisetsa liboka le ka ho nka karolo ho tsona le ka ho ‘nahanisisa ka lintho tsena; le ka ho ikakhela ka setotsoana ho tsona.’ (1 Timothea 4:15) E le hore lentsoe la boprofeta le be joaloka lebone le khanyang “sebakeng se lefifi” (lipelong tsa rōna), re tlameha ho le lumella ho re ama ka ho teba—litakatso, maikutlo, litšusumetso le lipakane tsa rōna. Ho hlokahala hore re be liithuti tsa Bibele, hobane Petrose o phetha khaolo ea 1 tjena: “Ha ho boprofeta ba Lengolo bo hlahang tlhalosong leha e le efe ea botho. Etsoe ha ho nako eo ka eona boprofeta bo ileng ba tlisoa ke thato ea motho, empa batho ba ile ba bua ho tsoa ho Molimo ha ba ntse ba khannoa ke moea o halalelang.”—2 Petrose 1:20, 21.
23. Khaolo ea pele ea 2 Petrose e lokiselitse babali eng?
23 Khaolong ea pele ea lengolo la hae la bobeli, Petrose o ile a re fa khothatso e matla ea ho tšoarella ka tieo tumelong ea rōna ea bohlokoa. Joale re itokiselitse ho nahanela litaba tse tebileng tse latelang. Sehlooho se latelang se tla tšohla khaolo ea 2 ea 2 Petrose, moo moapostola enoa a sebetsanang le phephetso ea litšusumetso tsa boitšoaro bo bobe tse neng li khukhunetse liphuthehong.
Na U sa Hopola?
◻ Ke hobane’ng ha Petrose a hatisa bohlokoa ba tsebo e nepahetseng?
◻ E ka ’na eaba ke ka lebaka lefe bokhabane bo thathamisitsoeng e le tšoaneleho ea pele e lokelang ho ekelletsoa tumelong?
◻ Ke hobane’ng ha kamehla Petrose a sekamela ho hopotseng barab’abo?
◻ Petrose o fana ka lebaka lefe le matla bakeng sa tumelo ea rōna?
[Setšoantšo se leqepheng la 9]
Mefokolo ea Petrose ha ea ka ea etsa hore a tlohele tumelo ea hae