Meputso ea ho Hlompha Batsoali ba Hōlileng
BARAPELI ba ’nete ba Molimo ba hlompha batsoali ba bona ba hōlileng ’me baa ba hlokomela le ho ba baballa hobane baa ba rata. Ke karolo ea borapeli ba bona. Bibele e re: “[Bana kapa litloholo] a ba ithute pele ho tloaela ho sebelisa boinehelo ba bomolimo ho ba ntlo ea bona le ho ’na ba lefa puseletso e loketseng ho batsoali le batsoali ba batsoali ba bona, kaha hona hoa khahlisa mahlong a Molimo.” (1 Timothea 5:4) Ebang re bacha kapa re hōlile, hoa tšoaneleha hore re fane ka “puseletso e loketseng” ho batsoali le batsoali ba batsoali ba rōna. Ka tsela ena, re bontša hore re ananela lerato la bona, ho sebetsa ka thata le ho re hlokomela ha bona ka lilemo tse ngata. Ka sebele, batsoali ba rōna ba re tlamme kaha re teng ka lebaka la bona!
Hlokomela hore ho lefa puseletso e loketseng ho batsoali le ho batsoali ba batsoali ba rōna hoa “khahlisa mahlong a Molimo.” Ho amahanngoa le “boinehelo [ba rōna] ba bomolimo.” Ka lebaka leo, ha re latela keletso ena, rea putsoa, re tseba hore re etsa se thabisang Molimo. Seo sea re thabisa.
Ho fa ba bang hoa thabisa, haholo-holo ha re fa ba ’nileng ba re fa ka seatla se bulehileng. (Liketso 20:35) Joale, ho na le moputso o mokaakang ka ho etsa lintho tumellanong le molao-motheo oa Bibele: “Thabisa ntate oa hao le ’mè oa hao, etsa hore ea u belehileng a nyakalle”!—Liproverbia 23:25, The New English Bible.
Ke joang re ka fanang ka puseletso e loketseng ho batsoali le ho batsoali ba batsoali ba rōna? Ka litsela tse tharo: nameng, maikutlong le moeeng. Karolo ka ’ngoe e tlisa meputso.
Ho ba fa se Hlokahalang Nameng
Ba sebeletsang Molimo baa tseba hore ke habohlokoa ho fana ka lintho tse hlokahalang nameng bakeng sa litho tsa lelapa tse haufi. Moapostola Pauluse o lemositse: “Haeba leha e le mang a sa lokisetse hore ho be le lintho tse hlokahalang bakeng sa bao e leng ba hae, ’me haholo-holo bakeng sa bao e leng litho tsa lelapa la hae, o latotse tumelo ’me o mobe ho feta motho ea se nang tumelo.”—1 Timothea 5:8.
Tunji le Joy ba lula Afrika Bophirimela. Le hoja ba hula ka thata licheleteng, ba ile ba kōpa batsoali ba hōlileng ba Joy hore ba lule le bona. Ntate oa Joy o ne a kula ’me qetellong o ile a shoa. Tunji oa hopola: “Ha Ntate a e-shoa, ’Mè o ile a haka mosali oa ka ’me a re: ‘U entse sohle seo motho a neng a ka se etsa. Ha ua lokela ho ikutloa u le molato ka tsela leha e le efe ka lefu la Ntate oa hao.’ Le hoja re hloloheloa Ntate, rea tseba hore re ne re mo rekela meriana e molemo ka ho fetisisa ’me kamehla re ne re leka ho etsa hore a ikutloe a ratoa ’me a hlokoa; re entse sohle se matleng a rōna ho phetha boikarabelo ba rōna boo re bo filoeng ke Molimo. Ka tsela eo, re ikutloa re khotsofetse.”
Ke ’nete hore hase e mong le e mong ea boemong ba ho thusa ba bang ka se hlokahalang nameng. Monna e mong oa Nigeria o ile a re: “Haeba motho a sa khone ho ikhoantlella, ke joang a ka khoantlellang motho e mong?” Linaheng tse ngata boemo bo ka ’na ba mpefala le ho feta lilemong tse tlang. Ho ea ka ponelo-pele ea Machaba a Kopaneng, halofo ea batho ba lulang Afrika e ka boroa ho Sahara e tla be e phela bofumeng bo phethahetseng haufinyane.
Haeba u iphumana u le boemong ba ho kolla ntsi hanong, u ka ’na ua tšelisoa ke pale ea sebele ea mohlolohali e mong ea neng a hloka. Ha Jesu a ne a le lefatšeng, o ile a bona mohlolohali a ntša monehelo o monyenyane sebakeng sa polokelo ea matlotlo a tempele. O ile a fana ka “licheletana tsa tšepe tse peli [feela] tsa bohlokoa bo bonyenyane haholo.” Leha ho le joalo, a tseba boemo ba mosali eo, Jesu o ile a re: “Kannete kea le bolella, Mohlolohali enoa, le hoja e le mofutsana, o akhetse ho hoholoanyane ho feta hoo bohle ba ho akhetseng. Etsoe bana bohle ba akhetse limpho ho tsoa botlallong ba bona, empa mosali enoa ho tsoa bohloking ba hae o akhetse mokhoa oohle oa ho iphelisa oo a neng a e-na le oona.”—Luka 21:1-4.
Ka mokhoa o tšoanang, haeba re etsa sohle se matleng a rōna ho hlokomela batsoali kapa batsoali ba batsoali ba rōna ka seo ba se hlokang nameng, le haeba e ka ba ho fokolang, Jehova o hlokomela seo ’me oa se ananela. Ha aa lebella hore re etse se fetang seo re ka khonang ho se etsa. Mohlomong batsoali kapa batsoali ba batsoali ba rōna le bona ba tla ikutloa ka tsela eo.
Ho ba Tšehetsa Maikutlong
Ho fa batsoali le batsoali ba batsoali ba rōna seo ba se hlokang ho ama ho fetang feela ho hlokomela litlhoko tsa bona tsa nama. Kaofela ha rōna re na le litlhoko tsa maikutlo. Motho e mong le e mong, ho kopanyelletsa le ba hōlileng, o na le takatso ea ho ratoa, ho ikutloa hore oa hlokoa le ho ba setho se ananeloang ke lelapa.
Mary oa Kenya o ’nile a hlokomela ’mè matsale oa hae ea hōlileng ka lilemo tse tharo. Mary o re: “Ntle le ho mo neha lintho tseo a li hlokang nameng, kamehla re qoqa le eena. ’Mè ha a khone ho etsa ho hongata ka tlung, empa rea qoqa ’me re fetohile metsoalle e haufi. Ka linako tse ling re bua ka Molimo, ka linako tse ling ka batho ba ha habo rōna. Le hoja a le lilemo tse ka holimo ho 90, o sa hopola lintho habonolo. O sa ntsane a hopola ’me a qoqa ka bophelo ba ha e sa le ngoananyana, mehleng ea pele ho 1914.”
Mary o tsoela pele: “Ha ho bonolo ho hlokomela motho ea hōlileng, empa ho lula ha hae le rōna ho re tliselitse meputso e enneng. Re na le khotso le kutloano ka lapeng. Hore ebe ke iteletse eena ho entse hore le ba bang lapeng ba bontše moea oa boitelo. Monna oa ka o ntlhompha ka ho eketsehileng. ’Me haeba ’Mè a utloa e mong a mpuisa hampe, ka potlako oa nkemela. Ha ho ea ka buang lentsoe le ntlhabang ha a le haufi!”
Ho ba fa se Hlokahalang Moeeng
Joalokaha ho fana ka se hlokahalang nameng le maikutlong ho tlisa meputso ho ea fanang, ho joalo le litabeng tsa moea. Moapostola Pauluse o ile a ngolla phutheho ea Bakreste ea Roma: “Ke hlolohetsoe ho le bona, e le hore nka le fa mpho e ’ngoe ea moea e le hore le tiisoe; kapa, ho e-na le hoo, e le hore ho ka ba le phapanyetsano ea khothatso har’a lōna, e mong le e mong ka tumelo ea e mong, ka bobeli ea lōna le ea ka.”—Baroma 1:11, 12.
Ka tsela e tšoanang, ha ho tluoa tabeng ea ho fa ba hōlileng ba sebeletsang Molimo seo ba se hlokang moeeng, hangata mahlakore ka bobeli aa khothatsana. Osondu oa Nigeria, oa bolela: “Se nkhahlang ka ho fetisisa ka batsoali ba Ntate ke monyetla oo ba mphang oona oa ho ba le tlhasenyana ea bophelo ba nakong e fetileng. Ka mahlo a phatsimang, Ntate-moholo o tla mphetela litaba tsa tšimo eo a neng a e sebetsa e le mosebeletsi oa nako e tletseng lilemong tsa bo-1950 le bo-1960. O bapisa tsamaiso ea phutheho hona joale le kamoo e neng e le kateng ha a qala ho ba Paki. Liphihlelo tsena lia nthusa tšebeletsong ea ka ea bopula-maliboho.”
Ba bang ka phuthehong ea Bokreste le bona ba ka kenya letsoho ho itelleng ba seng ba hōlile. Tunji ea boletsoeng pejana, o ile a hlalosa se ileng sa etsahala phuthehong ea hae: “Mor’abo rōna e mocha oa pula-maliboho ea neng a e-na le kabelo ea ho fana ka puo ea phatlalatsa o ile a tla le kemiso ea puo ho Ntate e le hore ba e lokisetse hammoho. Motsamaisi oa Thuto ea Molula-Qhooa o ile a tla ho Ntate ’me a re: ‘U na le phihlelo. U ka nthusa joang hore ke ntlafatse?’ Ntate o ile a khona ho fa moholo eo likeletso tse molemo. Barab’abo rōna ba kenyelletsa lebitso la Ntate hangata ha ba rapela phuthehong. Lintho tsena kaofela li ne li etsa hore a ikutloe a ratoa.”
Boitšoaro bo Botle bo Hulela Batho ho Molimo
Ka linako tse ling, ha re hlompha le ho rata batsoali le batsoali ba batsoali ba rōna, re hulela batho ho Molimo. Moapostola Petrose o ngotse: “Bolokang boitšoaro ba lōna bo le botle har’a lichaba, e le hore, nthong eo ho eona li buang khahlanong le lōna joaloka baetsi ba bobe, ka lebaka la mesebetsi ea lōna e metle eo tsona e leng lipaki tsa eona tse boneng ka mahlo li ka tlotlisa Molimo.”—1 Petrose 2:12.
Andrew, moholo e mong oa Mokreste oa Afrika Bophirimela, o ne a tsamaea lik’hilomithara tse 95 habeli ka beke bakeng sa ho hlokomela ntate oa hae ea neng a kula, eo e neng e se molumeli. Oa hlalosa: “Ha ke qala ho ba Paki ea Jehova, Ntate o ile a nkhanyetsa ka matla. Empa ha a lemoha kamoo ke neng ke mo hlokomela kateng ha a kula, o ile a lula a khothalletsa baena ba ka le likhaitseli tsa ka, ‘Le lokela ho kena bolumeling ba moholoane oa lōna!’ Seo se ile sa ba susumetsa ’me hona joale, bana bohle ba Ntate ba robong ke Lipaki tsa Jehova.”
Ho hlompha le ho hlokomela batsoali ba hōlileng e ka ba phephetso, haholo-holo linakong tsena tseo ho leng thata moruong. Empa ha Bakreste ba leka ka matla ho etsa sena, ba kotula meputso e mengata. Ka holim’a tsohle, ba fumana thabo ea ho fana, hammoho le khotsofalo ea ho tseba hore ba thabisa Jehova Molimo eo ka boeena e leng “Ntate oa batho bohle.”—Baefese 4:6.
[Lebokose le leqepheng la 6]
Keletso ea Bomolimo ho ba Hlokomeloang le ba Hlokomelang
E-ba ea Khothatsang: “E mong le e mong oa rōna a a khahlise moahelani oa hae ho se leng molemo bakeng sa ho mo haha.”—Baroma 15:2.
Ema U Tiile: “A re se keng ra tela ho etsa se setle, kaha ka nako e loketseng re tla kotula haeba re sa khathale.”—Bagalata 6:9. Ikokobetse: ‘Le se etse letho ka lebaka la ho rata likhang kapa ka lebaka la ho ipolelisa, empa ka ho ikokobetsa kelellong nkang hore ba bang ba le phahametse.’—Bafilippi 2:3.
E-ba Moetsi oa se Molemo: “E mong le e mong a a ’ne a batle, eseng se molemo ho eena, empa se molemo ho motho e mong.”—1 Bakorinthe 10:24.
E-ba le Kahlolo e Molemo: “Ho ba le kahlolo e molemo ha lōna a ho tsejoe ke batho bohle.”—Bafilippi 4:5. E-ba le Kutloelo-bohloko: “Le be mosa e mong ho e mong, le e-na le qenehelo e bonolo, le tšoarelana ka bolokolohi.”—Baefese 4:32.
[Setšoantšo se leqepheng la 7]
Baholo ba banyenyane ba ka rua molemo phihlelong ea ba hōlileng