Hlokomela Mesuoe ea Bohata!
“Ho tla boela ho be le mesuoe ea bohata har’a lōna.”—2 PETROSE 2:1.
1. Jude o ne a rerile ho ngola ka eng, ’me ke hobane’ng ha a ile a fetola taba ea hae?
KE NTHO e tšosang hakaakang! Mesuoe ea bohata ka phuthehong ea Bokreste ea lekholong la pele la lilemo! (Matheu 7:15; Liketso 20:29, 30) Mor’abo Jesu ka ’mè oa bona, Jude, o ile a lemoha ketsahalo ena. O ile a bolela hore o ne a rerile ho ngolla balumeli-’moho le eena “ka poloko eo re nang le eona bohle,” empa o ile a hlalosa: “Ke ile ka fumana ho hlokahala ho le ngolla ho le eletsa hore le loane ntoa e thata bakeng sa tumelo.” Ke hobane’ng ha Jude a ile a fetola taba eo a neng a bua ka eona? O ile a re ke hobane, “batho ba itseng ba kene ka sekhukhu [ka phuthehong] . . . ba fetolang mosa o sa tšoanelang oa Molimo oa rōna boikemelo bakeng sa boitšoaro bo hlephileng.”—Jude 3, 4.
2. Ke hobane’ng ha 2 Petrose khaolo ea 2 le Jude li tšoana hakaale?
2 Kamoo ho bonahalang kateng, Jude o ile a ngola kapele ka mor’a hore Petrose a ngole lengolo la hae la bobeli. Ha ho pelaelo hore Jude o ne a tloaelane le lengolo lena. Ka sebele, o ile a bua ka mehopolo e mengata e tšoanang le ena lengolong la hae la khothatso le matla. Ka lebaka leo, ha re hlahloba 2 Petrose khaolo ea 2, re tla hlokomela kamoo e tšoanang le lengolo la Jude kateng.
Liphello Tsa Lithuto Tsa Bohata
3. Ho ile ha etsahala eng nakong e fetileng eo Petrose a reng e tla etsahala hape?
3 Ka mor’a hore Petrose a phehelle barab’abo ho ela hloko boprofeta, o re: “Leha ho le joalo, ho ile ha boela ha e-ba le baprofeta ba bohata [Iseraeleng ea boholo-holo], joalokaha ho tla boela ho be le mesuoe ea bohata har’a lōna.” (2 Petrose 1:14–2:1) Batho ba Molimo mehleng ea boholo-holo ba ile ba amohela boprofeta ba ’nete, empa hape ba ne ba lokela ho loantša lithuto tse bolileng tsa baprofeta ba bohata. (Jeremia 6:13, 14; 28:1-3, 15) Jeremia o ile a ngola: ‘Baprofeteng ba Jerusalema ke bone manyala, ho feba le ho tsamaea leshanong.’—Jeremia 23:14.
4. Ke hobane’ng ha mesuoe ea bohata e lokeloa ke timetso?
4 Ha a hlalosa seo mesuoe ea bohata e neng e tla se etsa ka phuthehong ea Bokreste, Petrose o re: “Eona ena e tla tlisa ka lenyele lihlopha tsa bokhelohi tse timetsang ’me e tla latola esita le monghali [Jesu Kreste] ea e rekileng, e itlisetsa timetso e potlakileng.” (2 Petrose 2:1; Jude 4) Tholoana ea ho qetela ea bokhelohi bo joalo ba lekholong la pele la lilemo ke Bokreste-’mōtoana joalokaha re bo tseba kajeno. Petrose o bontša lebaka leo ka lona mesuoe ea bohata e lokeloang ke timetso ka ho feletseng: “Ba bangata ba tla latela liketso tsa eona tsa boitšoaro bo hlephileng, ’me ka lebaka la eona ho tla buuoa ka ho nyefola ka tsela ea ’nete.”—2 Petrose 2:2.
5. Mesuoe ea bohata e ne e ikarabella bakeng sa eng?
5 Nahana ka sena! Ka lebaka la tšusumetso ea mesuoe ea bohata, ba bangata ka liphuthehong ba ne ba tla kopanela boitšoarong bo hlephileng. Lentsoe la Segerike le fetoletsoeng e le “boitšoaro bo hlephileng” le bolela ho hloka boitšoaro, ho se ithibe, ho se itlhomphe, boitšoaro bo litšila, boitšoaro bo hlabisang lihlong. Pejana Petrose o ile a bolela hore Bakreste ba ne ba “phonyohile ho boleng ho leng lefatšeng ka takatso e feteletseng.” (2 Petrose 1:4) Empa ba bang ba ne ba tla khutlela ho boleng hoo, ’me mesuoe ea bohata ka liphuthehong e ne e tla ikarabella haholo! Kahoo tsela ea ’nete e ne e tla nyelisoa. Ho bohloko hakaakang! Ka sebele, ena ke taba eo Lipaki tsa Jehova kaofela li lokelang ho e ela hloko ka ho fetisisa kajeno. Le ka mohla ha rea lokela ho lebala hore, ka boitšoaro ba rōna, re ka tlisetsa Jehova Molimo le batho ba hae tlotla kapa thohako.—Liproverbia 27:11; Baroma 2:24.
Ho Kenya Lithuto Tsa Bohata
6. Mesuoe ea bohata e susumetsoa ke’ng, hona ke joang e lekang ho fumana seo e se batlang?
6 Ka bohlale, re hlokomela kamoo mesuoe ea bohata e kenyang mohopolo oa eona o bolileng. Petrose o qala ka ho bolela hore ba ho etsa ka lenyele, kapa ka tsela e sa hlahellang, e poteletseng. Oa eketsa: “Ka ho chacheha ka mohono e tla le hanyapetsa ka mantsoe a iqapetsoeng.” Takatso ea boithati e susumetsa mesuoe ea bohata, joalokaha ho totobalitsoe ke phetolelo e ho The Jerusalem Bible: “Ka tabatabelo e tla leka ho ithekela lōna ka lipolelo tsa bolotsana.” Ka ho tšoanang, phetolelo ea James Moffatt mona e re: “Takatsong ea bona e feteletseng ba tla le hanyapetsa ka likhang tse mano.” (2 Petrose 2:1, 3) Lipolelo tsa mesuoe ea bohata li ka ’na tsa bonahala e le tse kholisang ho motho ea sa falimehang moeeng, empa mantsoe a eona a hlophisitsoe ka hloko “ho ithekela” batho, ho ba hohela hore ba sebeletse merero ea boithati ea bathetsi.
7. Ke filosofi efe e ileng ea ata lekholong la pele la lilemo?
7 Ha ho pelaelo hore lekholong la pele la lilemo mesuoe ea bohata e ne e susumetsoa ke monahano oa lefatše o neng o tloaelehile ka nako eo. Hoo e ka bang nakong eo Petrose a neng a ngola ka eona, filosofi e bitsoang Bognostic e ne e ntse e ata. Bagnostic ba ne ba lumela hore lintho tsohle tsa nama li mpe ’me lintho tsa moea ke tsona feela tse molemo. Kahoo, ba bang ba bona ba ne ba re ha ho tsotellehe hore na motho o etsa’ng ka ’mele oa hae oa nama. Qetellong, ba ile ba pheha khang ea hore motho o ne a ke ke a ba le ’mele ona. Ka lebaka leo, ba ile ba etsa qeto ea hore libe tsa ’mele—ho akarelletsa le tsa likamano tsa botona le botšehali—hase tsa bohlokoa. Kamoo ho bonahalang kateng, lipono tse joalo li ile tsa qala ho susumetsa ba bang ba neng ba ipolela hore ke Bakreste.
8, 9. (a) Ba bang ba Bakreste ba pele ba ile ba angoa ke monahano ofe o sothehileng? (b) Ho latela Jude, ba bang ka liphuthehong ba ne ba etsa eng?
8 Setsebi se seng sa Bibele se ile sa bontša hore “ho ne ho e-na le ba bang ka Kerekeng ba neng ba khopamisa thuto ea mohau o sa tšoanelang,” kapa “mosa o sa tšoanelang.” (Baefese 1:5-7) Ho ea ka sona, ba bang ba ne ba pheha khang ka tsela ena: “Le bolela hore [mosa o sa tšoanelang] oa Molimo o mongata ka ho lekaneng hore o ka koahela sebe se seng le se seng? . . . Joale a re tsoeleng pele ho etsa libe, hobane [mosa o sa tšoanelang] oa Molimo o ka hlakola sebe se seng le se seng. Ha e le hantle ha re ntse re etsa libe ka ho eketsehileng menyetla ea hore [mosa o sa tšoanelang] oa Molimo o tla sebetsa ea eketseha.” Na u kile ua utloa monahano o sothehileng ho feta oo?
9 Moapostola Pauluse o ile a hanyetsa monahano o fosahetseng mabapi le mohau oa Molimo ha a ne a botsa: “Na re tla tsoela pele sebeng, e le hore mosa o sa tšoanelang o ka ata?” O ile a boela a botsa: “Na re tla etsa sebe hobane ha re tlas’a molao empa re tlas’a mosa o sa tšoanelang?” Potsong ka ’ngoe Pauluse o ile a araba ka ho hatisa: “Le ka mohla hoo ho se etsahale!” (Baroma 6:1, 2, 15) Ka ho hlakileng, joalokaha Jude a hlokomela, ba itseng ba ne ba ‘fetola mosa o sa tšoanelang oa Molimo oa rōna boikemelo bakeng sa boitšoaro bo hlephileng.’ Leha ho le joalo, Petrose o bontša hore bakeng sa ba joalo ‘timetso ha e otsele.’—Jude 4; 2 Petrose 2:3.
Mehlala e Lemosang
10, 11. Petrose o fana ka mehlala efe e meraro e lemosang?
10 Ho hatisa hore Molimo o tla nka bohato khahlanong le bafosi ba ka boomo, Petrose o fana ka mehlala e meraro e lemosang e tsoang ka Mangolong. O ngola oa pele: ‘Molimo ha aa ka a ithiba ho faneng ka kotlo ho mangeloi a ileng a etsa sebe.’ Jude o re ’ona ana, ‘ha aa ka a boloka sebaka sa ’ona sa pele empa a furalla sebaka sa ’ona sa bolulo se loketseng’ maholimong. A ile a tla lefatšeng pele ho Moroallo ’me a ipha ’mele ea nama e le hore a ka kopanela likamanong tsa botona le botšehali le barali ba batho. E le kotlo bakeng sa boitšoaro ba ’ona bo sa lokelang, boo e seng ba tlhaho, a ile a lahleloa “Tartarase,” kapa joalokaha tlaleho ea Jude e bolela, a ile a ‘bolokoa ka litlamo tsa ka ho sa feleng tlas’a lefifi le letšo-letšo bakeng sa kahlolo ea letsatsi le leholo.’—2 Petrose 2:4; Jude 6; Genese 6:1-3.
11 Ka mor’a moo, Petrose o bua ka batho ba mehleng ea Noe. (Genese 7:17-24) O re mehleng ea Noe Molimo ‘ha aa ka a ithiba ho faneng ka kotlo ho lefatše la boholo-holo, ha a tlisa moroallo holim’a lefatše la batho ba se nang bomolimo.’ Qetellong, Petrose o tlaleha hore Molimo o ile a behela “batho ba se nang bomolimo mohlala oa lintho tse tlang ho tla” ka ho “fetola metse ea Sodoma le Gomora molora.” Jude o fana ka boitsebiso bo eketsehileng ba hore batho bao ba ‘ne ba etsa bohlola ka mokhoa o feteletseng ’me ba sala nama morao bakeng sa tšebeliso eo e seng ea tlhaho.’ (2 Petrose 2:5, 6; Jude 7) Hase feela hore banna ba ne ba e-ba le likamano tsa botona le botšehali tse sa lokelang le basali empa ba ne ba e-na le takatso e feteletseng bakeng sa banna ba bang, mohlomong esita le bakeng sa libatana.—Genese 19:4, 5; Levitike 18:22-25.
12. Ho latela Petrose, boitšoaro bo lokileng bo putsoa joang?
12 Empa, ka nako e tšoanang, Petrose o bontša hore Jehova ke moputsi oa ba mo sebeletsang ka botšepehi. Ka mohlala, o bolela kamoo Molimo a ileng “a boloka Noe, ’moleli oa ho loka, a sireletsehile hammoho le ba bang ba supileng” ha A ne a tlisa Moroallo. O boetse o bua ka ho lopolloa ha “Lota ea lokileng” ke Jehova mehleng ea Sodoma, o phetha ka ho re: “Jehova o tseba ho lopolla batho ba boinehelo ba bomolimo tekong, empa ho bolokela batho ba sa lokang letsatsi la kahlolo hore ba khaoloe.”—2 Petrose 2:5, 7-9.
Liketso Tse Lokeloang ke Kotlo
13. Ke bo-mang bao ka ho khetheha ba boloketsoeng kahlolo, ’me ba bonahala ba inehella litoro life?
13 Petrose o qoolla bao ka ho khetheha ba boloketsoeng kahlolo ea Molimo, e leng, “ba tsoelang pele ho latela nama ka takatso ea ho e silafatsa le ba khellang borena tlaase.” Re batla re utloa khalefo ea Petrose ha a re: “Ba iteta sefuba, ba ngangella thato ea bona, ha ba thothomelle ba khanyang empa ba bua ka ho nyefola.” Ha a ngola Jude o re “batho bana, . . . ba inehella litoro, ba silafatsa nama . . . le ho bua ka ho nyefola ka ba khanyang.” (2 Petrose 2:10; Jude 8) Litoro tsa bona li ka ’na tsa akarelletsa ho nkeha maikutlo ka likamano tsa botona le botšehali tse sa hloekang ho khothalletsang ho phehella ho ikhotsofatsa ka likamano tsa botona le botšehali. Leha ho le joalo, ke ka kutloisiso efe ba “khellang borena tlaase” le ho bua “ka ho nyefola ka ba khanyang”?
14. Mesuoe ea bohata e ‘khella borena tlaase’ le ho bua “ka ho nyefola ka ba khanyang” ka kutloisiso efe?
14 Ba etsa joalo ka hore ba nyelise bao Molimo a ba fileng matla a ho laela. Baholo ba Bakreste ba emela ba khanyang e leng Jehova Molimo le Mora oa hae ’me, ka lebaka leo, ba na le khanya e itseng eo ba e nehiloeng. Ke ’nete hore ba etsa liphoso, joalokaha Petrose ka boeena a ile a li etsa, empa Mangolo a phehella litho tsa phutheho ho ikokobelletsa ba joalo ba khanyang. (Baheberu 13:17) Mefokolo ea bona hase lebaka la ho bua ka bona ka ho nyefola. Petrose o bolela hore mangeloi ha a “tlise qoso khahlanong le [mesuoe ea bohata] ka mantsoe a nyefolang,” le hoja e ne e ka ba tšoanela ka ho feletseng. Petrose o tsoela pele: “Empa batho bana, joaloka liphoofolo tse sa nahaneng tseo ka tlhaho li tsoaletsoeng ho tšoaroa le ho timetsoa, linthong tseo ho tsona ba hlokang tsebo ’me ba bua ka ho nyefola, ba tla be ba timele.”—2 Petrose 2:10-13.
“Ha ba Ntse ba Keteka . . . le Lōna”
15. Mekhoa ea mesuoe ea bohata ke efe, hona ke hokae moo e tsoelang pele ka ho khelosa ha eona?
15 Le hoja banna bana ba bolileng “ba nka bophelo ba menono nakong ea motšehare e le monyaka” ’me e le “matheba le likoli,” ba boetse ba bolotsana. Ba etsa lintho “ka lenyele,” ba sebelisa “mantsoe a iqapetsoeng,” joalokaha Petrose a bontšitse pejana. (2 Petrose 2:1, 3, 13) Kahoo ba ka ’na ba se ke ba phephetsa ka ho totobetseng boiteko ba baholo ba ho khomarela litekanyetso tsa Molimo tsa boitšoaro kapa ba phehella ho ikhotsofatsa ka likamano tsa botona le botšehali pepenene. Ho e-na le hoo, Petrose o bolela hore ba inehella “ka thabo e se nang boithibo lithutong tsa bona tse thetsang ha ba ntse ba keteka hammoho le lōna.” ’Me Jude oa ngola: “Bana ke mafika a patiloeng ka tlas’a metsi meketeng ea lōna ea lerato.” (Jude 12) E, joalokaha majoe a sehang a ka tlas’a metsi a ka petsola bokatlaase ba sekepe, a etsa hore basesisi ba sa falimehang ba khangoe ke metsi, mesuoe ea bohata e ne e senya ba sa falimehang bao ka boikaketsi e neng e etsa eka ea ba rata ‘meketeng ea lerato.’
16. (a) ‘Mekete ea lerato’ e ne e le eng, ’me ke maemong a mofuta ofe a tšoanang le ao moo ho ka etsahalang hore ba itšoereng hampe ba etse mesebetsi ea bona? (b) Mesuoe ea bohata e lebisa tlhokomelo ea eona ho bo-mang, ka hona ba joalo ba tlameha ho etsa’ng?
16 Ho bonahala hore ‘mekete ena ea lerato’ e ne e le liketsahalo tsa boithabiso ha Bakreste ba lekholong la pele la lilemo ba ne ba bokana hammoho ho thabela lijo le botsoalle. Kajeno Lipaki tsa Jehova le tsona ka linako tse ling li bokana hammoho ho ithabisa, mohlomong lijong tsa machato, lipikiniking kapa bakeng sa ’moka oa mantsiboea. Batho ba bolileng ba ne ba ka sebelisa liketsahalo tse joalo joang ho khelosa liphofu? Petrose oa ngola: “Ba na le mahlo a tletseng bofebe . . . , ’me ba eka lisoule tse sa tsitsang.” Ba beha mehopolo ea “lipelo tse koetliselitsoeng ho chacheha” ho ba sa tsitsang moeeng ba hlōlehileng ho etsa hore ’nete e be ea bona ka ho feletseng. Kahoo lemosoa esale pele ke se ileng sa etsahala mehleng ea Petrose, ’me u lebele! Hanela lefereho lefe kapa lefe le sa hloekang, ’me u se ke ua thetsoa ke khoheli kapa khahleho ea ’mele ea motho e mong ea u ferehang bakeng sa boitšoaro bo bobe!—2 Petrose 2:14.
“Tsela ea Balame”
17. “Tsela ea Balame” e ne e le efe, ’me e ile ea ama Baiseraele ba 24 000 joang?
17 Bana “ba bitselitsoeng bomalimabe” ba tsebile ’nete ka nako e itseng. Ho ka etsahala hore ba ’ne ba bonahale ba le mafolofolo ka phuthehong. Empa Petrose o re: “Ha ba tlohela tsela e otlolohileng, ba khelositsoe. Ba latetse tsela ea Balame, mora oa Beore, ea ileng a rata moputso oa ho etsa phoso.” (2 Petrose 2:14, 15) Tsela ea moprofeta Balame e ne e le ho buella mokhoa oa ho khelosetsa motho boitšoarong bo litšila molemong oa hae. O ile a bolella Morena Balake oa Moabe hore Molimo o ne a tla rohaka Iseraele haeba batho ba ne ba ka hoheloa hore ba etse bohlola. Ka lebaka leo, bongata ba batho ba Molimo bo ile ba khelosoa ke basali ba Moabe, ’me ba 24 000 ba ile ba bolaeloa boitšoaro ba bona bo bobe.—Numere 25:1-9; 31:15, 16; Tšenolo 2:14.
18. Balame o ne a le leqoophe hakae, ’me phello e bolela eng esale pele ka mesuoe ea bohata?
18 Petrose o bontša hore Balame o ile a sitisoa ha esele ea hae e ne e bua le eena, empa Balame o ne “a rata moputso oa ho etsa phoso” hoo esita leha seo se etsahala, a sa kang a khaotsa ‘tsela ea hae ea bohlanya.’ (2 Petrose 2:15, 16) Ke bokhopo bo bokaakang! Ho malimabe mang kapa mang ea tšoanang le Balame ea lekang ho senya batho ba Molimo ka ho ba hohela hore ba etse boitšoaro bo bobe! Balame o ile a shoa ka lebaka la bobe ba hae, e leng ponelo-pele ea se tla etsahalla bohle ba latelang tsela ea hae.—Numere 31:8.
Ho Khelosa ha Bona ha Bodiabolose
19, 20. (a) Batho ba kang Balame ba tšoantšoa le eng, hona hobane’ng? (b) Ba eka bo-mang, hona joang? (c) Ke hobane’ng ha re ka bolela hore ho khelosa ha bona ke ha bodiabolose, ’me re ka itšireletsa le ho sireletsa ba bang joang ho bona?
19 Ha a hlalosa ba kang Balame, Petrose oa ngola: “Bana ke liliba tse se nang metsi, le meholi [kapa, maru] e khannoang ke sefefo se befileng.” Ho motsamai ea nyoriloeng lehoatateng, seliba se ommeng se ka ’na sa bolela lefu. Hase feela ‘botšo ba lefifi bo boloketsoeng’ ba tšoanang le lintho tse joalo! Petrose o tsoela pele: “Etsoe ba bua lipolelo tsa boikhohomoso tse sa ruiseng letho, ’me ka litakatso tsa nama le ka mekhoa e hlephileng ba eka bao e leng hona ba phonyohang ho batho ba itšoereng ka mokhoa o fosahetseng.” Petrose o re ba khelosa ba se nang phihlelo ka ho “ba tšepisa tokoloho, bona ka bobona ba phela e le makhoba a ho bola.”—2 Petrose 2:17-19; Bagalata 5:13.
20 Ho khelosa ha mesuoe e joalo e bolileng ke ha bodiabolose. Ka mohlala, ba ka ’na ba re: ‘Molimo oa tseba hore rea fokola ’me re na le takatso e matla. Ka hona haeba re inehella litakatso tsa rōna tsa likamano tsa botona le botšehali le ho li khotsofatsa, Molimo o tla re hauhela. Haeba re ipolela libe, o tla re tšoarela joalokaha a ile a re tšoarela ha re kena ’neteng ka lekhetlo la pele.’ Hopola hore Diabolose o ile a sebelisa katamelo e batlang e tšoana le eo ho Eva, a mo tšepisa hore o ne a ka etsa sebe ho se kotlo ea letho. Tabeng ea Eva, o ile a bolela hore ho etsa sebe khahlanong le Molimo ho ne ho tla mo beha leseling le ho mo fa bolokolohi. (Genese 3:4, 5) Haeba ho ka etsahala hore re teane le motho ea bolileng joalo ea kopanelang le phutheho, re na le boikarabelo ba ho itšireletsa esita le ho sireletsa ba bang ka ho mo tlaleha ho ba ikarabellang ka phuthehong ea Bokreste.—Levitike 5:1.
Ba Sirelelitsoe ke Tsebo e Nepahetseng
21-23. (a) Liphello tsa ho hlōleha ho sebelisa tsebo e nepahetseng ke life? (b) Ke bothata bofe bo bong boo Petrose a buang ka bona bo tla hlahlojoa hamorao?
21 Petrose o phetha karolo ena ea lengolo la hae ka ho hlalosa liphello tsa ho hlōleha ho sebelisa tsebo eo pejana a ileng a re ke ea bohlokoa bakeng sa “bophelo le boinehelo ba bomolimo.” (2 Petrose 1:2, 3, 8) Oa ngola: “Ka sebele haeba, ka mor’a ho phonyoha litšilafatsong tsa lefatše ka tsebo e nepahetseng ea Morena le Mopholosi Jesu Kreste, ba kena hape linthong tsona tsena ’me ba hlōleha, maemo a ho qetela a fetohile a mabe bakeng sa bona ho feta a pele.” (2 Petrose 2:20) Ho bohloko hakaakang! Ba joalo mehleng ea Petrose ba ne ba lahlile tšepo ea bohlokoa ea bophelo ba leholimo ba ho se shoe bakeng sa nako e khutšoanyane ea ho ikhotsofatsa ka likamano tsa botona le botšehali.
22 Ka hona Petrose o re: “Ho ka be ho bile molemo ho bona ha ba ne ba sa tseba ka mokhoa o nepahetseng tsela ea ho loka ho e-na le hore ka mor’a ho e tseba ka mokhoa o nepahetseng ba furalle taelo e halalelang eo ba e nehiloeng. Polelo ea maele a ’nete e ba etsahaletse: ‘Ntja e khutletse mahlatseng a eona, le kolobe e tšehali e ileng ea hlatsuoa e khutletse ho ipitikeng seretseng.’”—2 Petrose 2:21, 22; Liproverbia 26:11.
23 Bothata bo bong boo ka sebele bo neng bo qalile ho ama Bakreste ba pele bo ne bo tšoana le bo amang ba bang kajeno. Morao koo, ka sebele ba bang ba ne ba belaela ka ho bonahalang eka ke ho se fihle ha ho ba teng ha Kreste ho tšepisitsoeng. A re hlahlobeng kamoo Petrose a sebetsanang le taba ena kateng.
Na U sa Hopola?
◻ Petrose o bua ka mehlala efe e meraro e lemosang?
◻ Mesuoe ea bohata e ‘khella borena tlaase’ joang?
◻ Tsela ea Balame ke efe, ’me ba e latelang ba ka ’na ba leka ho khelosa ba bang joang?
◻ Liphello tsa ho hlōleha ho sebelisa tsebo e nepahetseng ke life?
[Setšoantšo se leqepheng la 17]
Balame o sebeletsa e le mohlala o lemosang