Khaolo ea Leshome
’Muso “o ke Keng oa Senngoa le ka Mohla”
1. Ke ’nete efe e ’nileng ea hatisoa ke liketsahalo tsa lefatše ho pholletsa le histori ea moloko oa batho?
LIKETSAHALO tsa lefatše letsatsi le leng le le leng li hatisa ’nete ea hore batho ha ba e-s’o fumane thabo ka ho lahla bobusi ba Jehova le ho leka ho ipusa. Ha ho tsamaiso ea puso ea motho e tliselitseng moloko oa batho melemo ntle ho khethollo. Le hoja batho ba ntlafalitse tsebo ea bona saenseng ho feta neng kapa neng, ba ntse ba sitoa ho hlōla ho kula le ho felisa lefu, esita le ho motho a le mong feela. Puso ea motho ha e e-s’o felise ntoa, pefo, tlōlo ea molao, bobolu, kapa bofutsana. Mebuso ea bohatelli e ntse e hatella batho linaheng tse ngata. (Moeklesia 8:9) Theknoloji, meharo le ho hloka tsebo li kopane ho silafatsa naha, metsi le moea. Tsamaiso e mpe ea moruo e etsoang ke ba boholong e etsa hore ba bangata ba thatafalloe ke ho fumana lintho tse hlokahalang bophelong. Lilemo tse likete tsa puso ea motho li entse hore taba ena e totobale: “Tsela ea motho oa lefatše ha e matleng a hae. Ha ho matleng a motho ea tsamaeang hore a tsamaise mehato ea hae.”—Jeremia 10:23.
2. Tharollo ke efe feela mathateng a moloko oa batho?
2 Tharollo ke efe? ’Muso oa Molimo, oo Jesu a rutileng balateli ba hae ho o rapella: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Matheu 6:9, 10) ’Muso oa Molimo oa leholimo o hlalositsoe ho 2 Petrose 3:13 e le “maholimo a macha,” a tlang ho busa holim’a “lefatše le lecha,” e leng mokhatlo o lokileng oa batho. ’Muso oa Molimo oa leholimo ke oa bohlokoa hoo Jesu a ileng a tsepamisa boboleli ba hae ho oona. (Matheu 4:17) O bontšitse hore na o lokela ho ba le sebaka sefe bophelong ba rōna, a khothalletsa: “Joale, le ’ne le batle ’muso pele le ho loka ha hae.”—Matheu 6:33.
3. Ke hobane’ng ha ho ithuta ka ’Muso oa Molimo e le ntho e potlakileng haholo hona joale?
3 Ho ithuta ka ’Muso oa Molimo ho potlakile haholo hona joale, kaha haufinyane ’Muso oo o tla nka bohato hore o fetole ho busoa ha lefatše lena ka ho sa feleng. Daniele 2:44 e bolela esale pele: “Matsatsing a marena ao [mebuso e busang hona joale] Molimo oa leholimo o tla emisa ’muso [leholimong] o ke keng oa senngoa le ka mohla. ’Muso oo o ke ke oa fetisetsoa ho batho leha e le bafe ba bang [le ka mohla batho ba ke ke ba hlola ba busa lefatše]. O tla silakanya o felise mebuso ena [e teng] kaofela, ’me o tla ema ho isa linakong tse sa lekanyetsoang.” Kahoo ’Muso o tla felisa mehla ena ea qetello ka ho felisa tsamaiso ena eohle e khopo ea lintho. Ka nako eo ho busoa ha lefatše ke ’Muso oa leholimo ho ke ke ha hanyetsoa. Re lokela ho thaba hakaakang hore ebe ho imoloha ho tla tlisoa ke ’Muso oo ho haufi haholo!
4. Mabapi le ’Muso, ho ile ha etsahala eng leholimong ka 1914, hona ke hobane’ng ha hoo e le habohlokoa ho rōna?
4 Ka 1914, Kreste Jesu o ile a hlomamisoa e le Morena ’me o ile a fuoa matla a ho “qala ho busa har’a lira tsa [hae].” (Pesaleme ea 110:1, 2) Hape hona selemong sona seo, ho ile ha qaleha ‘matsatsi a ho qetela’ a tsamaiso ena ea hona joale ea lintho e khopo. (2 Timothea 3:1-5, 13) Ka nako e tšoanang, liketsahalo tseo Daniele a li boneng ponong ea boprofeta ha e le hantle li etsahetse leholimong. “Moholo-holo oa Matsatsi,” Jehova Molimo, o ile a neha Mor’a motho, Jesu Kreste, “bobusi le ho hlompheha le ’muso, hore batho, lichaba le lipuo kaofela ba mo sebeletse.” Ha a tlaleha ka pono eo, Daniele o ile a ngola: “Bobusi ba hae ke bobusi bo hlolang ka nako e sa lekanyetsoang bo ke keng ba feta, ’me ’muso oa hae ke o ke keng oa senngoa.” (Daniele 7:13, 14) Ke ka ’Muso ona oa leholimo o matsohong a Kreste Jesu Molimo a tlang ho nolofalletsa ba ratang ho loka hore ba thabele lintho tse molemo tse se nang palo tseo a neng a li rerile ha a beha batsoali ba rōna ba pele ba batho Paradeiseng.
5. Ke makolopetso afe ka ’Muso ao re a thahasellang haholo, hona hobane’ng?
5 Na ke takatso ea hao ho ba mofo ea tšepahalang oa ’Muso oo? Kahoo, u tla thahasella haholo kaheho le tšebetso ea puso ena ea leholimo. U tla rata ho tseba hore na o etsa eng hona joale, hore na o tla finyella eng nakong e tlang le hore na o hloka eng ho uena. Ha u hlahlobela ’Muso ona haufi, kananelo ea hao ka oona e lokela ho hōla. Haeba u arabela hantle pusong ea oona, u tla be u itlhomelletse hamolemo ho bolella ba bang ka lintho tse babatsehang tseo ’Muso oa Molimo o tlang ho li etsetsa moloko oa batho ba mamelang.—Pesaleme ea 48:12, 13.
Babusi ba ’Muso oa Molimo
6. (a) Mangolo a bontša joang hore na ke bobusi ba mang bo bonahatsoang ke ’Muso oa Bomesia? (b) Re lokela ho angoa joang ke seo re ithutang sona ka ’Muso?
6 Ntho e ’ngoe ea pele eo tlhahlobo e joalo e e senolang ke hore ’Muso ona oa Bomesia ke ponahatso ea bobusi ba Jehova ka boeena. Ke Jehova ea fileng Mora oa hae “bobusi le ho hlompheha le ’muso.” Ka mor’a hore Mora oa Molimo a fuoe matla a ho qala ho busa e le Morena, ka nepo mantsoe a tsoang leholimong a ile a phatlalatsa: “’Muso oa lefatše o fetohile ’muso oa Morena oa rōna [Jehova Molimo] le oa Kreste oa hae, ’me [Jehova] o tla busa e le morena ka ho sa feleng le kamehla.” (Tšenolo 11:15) Kahoo ntho e ’ngoe le e ’ngoe eo re e hlokomelang ka ’Muso ona le seo o se finyellang e re atametsa haufi le Jehova. Seo re ithutang sona se lokela ho kenya ka ho rōna takatso ea ho ikokobelletsa bobusi ba hae ka ho sa feleng.
7. Ke hobane’ng ha e le hoo re ho thahasellang haholo hore Jesu Kreste ke Letsoho la Jehova Pusong?
7 Hape, nahana ka taba ea hore Jehova o behile Jesu Kreste teroneng e le Letsoho la hae Pusong. E le Mosebetsi ea Hloahloa eo Molimo a mo sebelisitseng ho etsa lefatše le batho, Jesu o tseba seo re se hlokang hamolemo ho re feta. Ho feta moo, ho tloha qalehong ea histori ea batho, o bontšitse ‘hore o rata bara ba batho.’ (Liproverbia 8:30, 31; Bakolose 1:15-17) Lerato la hae ho batho le leholo hoo a ileng a tla lefatšeng ’me a tela bophelo ba hae e le topollo molemong oa rōna. (Johanne 3:16) Kahoo o ile a re nolofalletsa ho lokolloa sebeng le lefung le ho fumana monyetla oa bophelo bo sa feleng.—Matheu 20:28.
8. (a) Ha ho bapisoa le mebuso ea batho, ke hobane’ng ha puso ea Molimo e ke ke ea fela? (b) “Lekhoba le tšepahalang le le masene” le na le kamano efe le puso ea leholimo?
8 ’Muso oa Molimo ke puso e tsitsitseng, e sa feleng. Tšoaneleho ea oona e sa feleng e tiisoa ke ’nete ea hore Jehova ka boeena ha a shoe. (Habakuke 1:12) Ha a bapisoa le marena a batho, Jesu Kreste, eo Molimo a mo fileng borena, le eena ha a shoe. (Baroma 6:9; 1 Timothea 6:15, 16) Ba nang le Kreste literoneng tsa leholimo e tla ba ba bang ba 144 000, bao e leng bahlanka ba tšepahalang ba Molimo ba nkiloeng “molokong o mong le o mong le lelemeng le leng le le leng le bathong ba bang le ba bang le sechabeng se seng le se seng.” Bana, le bona, ba fuoa bophelo ba ho se shoe. (Tšenolo 5:9, 10; 14:1-4; 1 Bakorinthe 15:42-44, 53) Boholo ba bona bo se bo le maholimong, ’me masala a bona a sa leng lefatšeng a etsa sehlopha sa kajeno sa “lekhoba le tšepahalang le le masene” leo ka botšepehi le ntšetsang pele lithahasello tsa ’Muso oo mona.—Matheu 24:45-47.
9, 10. (a) Ke litšusumetso life tse arolang le tse silafatsang tseo ’Muso o tla li tlosa? (b) Haeba re sa batle ho ba lira tsa ’Muso oa Molimo, re lokela ho qoba ho tšoasoa ke eng?
9 Haufinyane, ka nako e behiloeng, Jehova o tla romela makhotla a hae a lihang likahlolo ho kena mosebetsing oa ho hloekisa lefatše. A tla timetsa ka ho sa feleng batho ba ikhethetseng ho hana bobusi ba hae le ba nyefolang litokisetso tse lerato tseo a li etsang ka Jesu Kreste. (2 Bathesalonika 1:6-9) Leo e tla ba letsatsi la Jehova, nako eo e leng khale e letetsoe ea hore ho tlosoe qoso ho eena e le ’Musi oa Bokahohle. “Bonang! Letsatsi la Jehova lea tla, le sehlōhō ka lebaka la khalefo le bohale bo tukang, . . . le hore le ka felisa baetsalibe ba naha eo.” (Esaia 13:9) “Letsatsi leo ke letsatsi la khalefo, letsatsi la mahlomola le la bohloko bo boholo, letsatsi la sefefo le la lesupi, letsatsi la lefifi le la botšo, letsatsi la maru le la botšo bo boholo.”—Sofonia 1:15.
10 Bolumeli bohle ba bohata le mebuso eohle ea batho le makhotla a eona, tse ’nileng tsa tsamaisoa ke ’musi ea khopo ea sa bonahaleng oa lefatše lena, li tla felisoa ka ho sa feleng. Bohle ba ikamahanyang le lefatše lena ka ho phehella tsela ea lona ea bophelo ea boithati, ho se tšepahale le boitšoaro bo bobe ba tla timetsoa. Satane le bademona ba hae ba tla tlosoa hore ba se ke ba kopana le baahi ba lefatše, ba koalloe sekoting lilemo tse sekete. Joale ’Muso oa Molimo o tla ba le taolo e feletseng ea litaba tsohle tsa lefatše. Hoo e tla ba topollo e kaakang ho bohle ba ratang ho loka!—Tšenolo 18:21, 24; 19:11-16, 19-21; 20:1, 2.
Sepheo sa ’Muso—Kamoo se Finyelloang Kateng
11. (a) ’Muso oa Bomesia o tla finyella morero oa Jehova ka lefatše joang? (b) Puso ea ’Muso e tla bolela eng ho batho ba tla beng ba phela lefatšeng ka nako eo?
11 ’Muso oa Bomesia o tla phethahatsa ka botlalo morero oa Molimo oa tšimolohong ka lefatše. (Genese 1:28; 2:8, 9, 15) Ho tla fihlela kajeno, moloko oa batho o hlōlehile ho tšehetsa morero oo. Leha ho le joalo, “lefatše leo ho ahiloeng ho lona le tlang ho tla” le tla busoa ke Mor’a motho, Jesu Kreste. Bohle ba pholohang ho phethahatsoa ha kahlolo ea Jehova tsamaisong ena ea khale ba tla sebetsa ba kopane tlas’a Kreste Morena, ka thabo ba etsa eng kapa eng eo a e laelang e le hore lefatše le ka fetoha paradeise e akaretsang. (Baheberu 2:5-9) Batho bohle ba tla thabela mosebetsi oa matsoho a bona le ho rua molemo o feletseng naleng e tla hlahisoa ke lefatše.—Pesaleme ea 72:1, 7, 8, 16-19; Esaia 65:21, 22.
12. Bafo ba ’Muso ba tlisoa joang phethahalong ea kelello le ea ’mele?
12 Ha Adama le Eva ba ne ba bōptjoa, ba ne ba phethahetse, ’me e ne e le morero oa Molimo hore lefatše le tlale bana ba bona, kaofela ba thabela likelello le ’mele tse phethahetseng. Tlas’a puso ea ’Muso, morero oo o tla phethahatsoa ka ho hlollang. Hona ho hloka hore ho tlosoe liphello tsohle tsa sebe, ’me e le ho phethahatsa sena, Kreste ha a sebeletse e le Morena feela empa hape o sebeletsa e le Moprista ea Phahameng. Ka mamello o tla thusa bafo ba hae ba mamelang hore ba rue molemo ka bohlokoa bo phekolang libe ba sehlabelo sa bophelo ba hae ba botho.
13. Ke melemo efe ea nama e tlang ho phethahala tlas’a puso ea ’Muso?
13 Tlas’a puso ea ’Muso, baahi ba lefatše ba tla latsoa melemo e babatsehang ’meleng. “Ka nako eo mahlo a lifofu a tla tutuboloha, ’me litsebe tsa ba sa utloeng litsebeng li tla buleha. Ka nako eo ea holofetseng o tla tlōla joalokaha khama e tona e tlōla, ’me leleme la ea sa khoneng ho bua le tla hooa ka nyakallo.” (Esaia 35:5, 6) Nama e sentsoeng sebōpeho ke botsofali kapa ho kula e tla nchafala ho feta ea ngoana le mefokolo e sa phekoleheng e tla nkeloa sebaka ke bophelo bo mahlahahlaha. “Nama ea hae e ke e nchafale ho feta bocheng; a ke a khutlele matsatsing a mahlahahlaha a hae a bocha.” (Jobo 33:25) Nako ea tla eo ka eona ho seng ea tla ba le lebaka la ho re, “Kea kula.” Hobane’ng? Hobane batho ba tšabang Molimo ba tla be ba imolotsoe mojaro oa sebe le liphello tsa sona tse bohloko. (Esaia 33:24; Luka 13:11-13) E, Molimo “o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:4.
14. Ho phethahala ha batho ho akarelletsa eng?
14 Leha ho le joalo, hore motho e be ea phethahetseng ho akarelletsa lintho tse ngata ho feta ho phela hantle ’meleng le ho hlaphoheloa kelellong. Ho akarelletsa ho bonahatsa ka nepo litšoaneleho tsa Jehova, kaha re entsoe ‘ka setšoantšo sa Molimo, ho ea ka sebōpeho sa hae.’ (Genese 1:26) Hore ho finyelloe seo, ho tla hlokahala thuto e ngata. “Ho loka ho tla aha” lefatšeng le lecha. Kahoo, joalokaha Esaia a boletse esale pele, “ka sebele baahi ba naha e behang ba tla ithuta ho loka.” (2 Petrose 3:13; Esaia 26:9) Tšoaneleho ena e isa khotsong—pakeng tsa batho ba merabe eohle, har’a metsoalle e haufi, lapeng la motho ’me, holim’a tsohle, le Molimo ka boeena. (Pesaleme ea 85:10-13; Esaia 32:17) Ba ithutang ho loka butle-butle ba tla rutoa hore na thato ea Molimo ke efe bakeng sa bona. Ha lerato ho Jehova le ntse le teba lipelong tsa bona, ba tla latela litsela tsa hae karolong e ’ngoe le e ’ngoe ea bophelo ba bona. Ba tla bua joaloka Jesu ha a ne a re, ‘Kamehla ke etsa lintho tse khahlisang Ntate.’ (Johanne 8:29) Bophelo e tla ba bo thabisang hakaakang ha batho bohle ba etsa joalo!
Lintho Tse Seng li Finyeletsoe Lia Bonahala
15. U sebelisa lipotso tse serapeng sena, totobatsa se finyeletsoeng ke ’Muso oo ’me u bontše seo re lokelang hore ebe rea se etsa hona joale.
15 Lintho tse hlollang tse finyeletsoeng ke ’Muso oa Molimo le bafo ba oona lia totobala. Lipotso tse latelang le mangolo li tla u hopotsa tse ling tsa lintho tsena tse seng li finyeletsoe, hammoho le lintho tseo bafo bohle ba ’Muso ba ka li etsang le tseo ba lokelang hore ebe baa li etsa hona joale.
’Muso o qalile ho nka bohato khahlanong le bo-mang, hona e le ka liphello life? (Tšenolo 12:7-10, 12)
Ke ho bokelloa ha litho tse setseng tsa sehlopha sefe ho behiloeng leihlo ho tloha ha Kreste a behoa teroneng? (Tšenolo 14:1-3)
Ke mosebetsi ofe oo Jesu a boletseng hore o ne a tla o etsa ka mor’a ho qhoma ha matšoenyeho a maholo, joalokaha ho tlalehiloe ho Matheu 25:31-33?
Ke mosebetsi ofe oa selelekela o finyelloang kajeno? Ke bo-mang ba kopanelang ho oona? (Pesaleme ea 110:3; Matheu 24:14; Tšenolo 14:6, 7)
Ke hobane’ng ha bahanyetsi ba lipolotiki le ba bolumeli ba sitiloe ho thibela mosebetsi oa ho bolela? (Zakaria 4:6; Liketso 5:38, 39)
Ke liphetoho life tse etsahetseng bophelong ba ba ikokobelletsang puso ea ’Muso? (Esaia 2:4; 1 Bakorinthe 6:9-11)
’Muso oa Lilemo Tse Sekete
16. (a) Kreste o tla busa halelele hakae? (b) Ke lintho life tse babatsehang tse tla etsoa nakong eo le ka mor’a eona?
16 Ka mor’a hore Satane le bademona ba hae ba koalloe sekoting, Jesu Kreste le majalefa-’moho le eena a 144 000 ba tla busa e le marena le baprista ka lilemo tse sekete. (Tšenolo 20:6) Nakong eo, batho ba tla tlisoa phethehong, sebe le lefu le bakiloeng ke Adama li tla be li felisitsoe ka ho sa feleng. Qetellong ea Puso ea Lilemo tse Sekete, ka mor’a hore Jesu a atlehe ho phethahatsa kabelo ea hae e le Morena le Moprista oa Bomesia, o “nehelana ka ’muso” ho Ntate oa hae, “e le hore Molimo e ka ba lintho tsohle ho e mong le e mong.” (1 Bakorinthe 15:24-28) Mothating oo, Satane o lokolloa ka nakoana hore a leke batho ba lopolotsoeng hore na ba fela ba tšehetsa bobusi ba Jehova ba bokahohleng kapa che. Ka mor’a hore teko eo ea ho qetela e fele, Jehova o tla timetsa Satane le marabele a mo tšehelitseng. (Tšenolo 20:7-10) Ba tšehetsang bobusi ba Jehova—tokelo ea hae ea ho busa—ba tla be ba bontšitse ka botlalo botšepehi ba bona bo sa thekeseleng. Joale ba tla ba kamanong e nepahetseng le Jehova, a ba amohele e le bara le barali ba hae, ba amoheloe ke Molimo hore ba fumane bophelo bo sa feleng.—Baroma 8:21.
17. (a) Ho tla etsahala eng ka ’Muso qetellong ea lilemo tse sekete? (b) Ke ka kutloisiso efe e leng ’nete hore ’Muso ‘o ke ke oa senngoa le ka mohla’?
17 Ka lebaka leo, karolo eo Jesu le ba 144 000 ba e phethang lefatšeng e tla fetoha. Mosebetsi oa bona nakong e tlang e tla ba ofe? Bibele ha e bolele. Empa haeba ka botšepehi re tšehetsa bobusi ba Jehova, re tla be re ntse re phela qetellong ea Puso ea Lilemo tse Sekete hore re bone hore na Jehova o ba reretse eng hammoho le bokahohle ba hae bo hlollang. Leha ho le joalo, puso ea Kreste ea lilemo tse sekete e tla ba e “hlolang ka nako e sa lekanyetsoang” ’me ’Muso oa hae e tla ba “o ke keng oa senngoa.” (Daniele 7:14) Ka kutloisiso efe? Ka hore matla a puso a ke ke a fetela matsohong a ba nang le sepheo se fapaneng, kaha Jehova e tla be e le eena ’Musi. Hape, ’Muso ‘o ke ke oa senngoa le ka mohla’ hobane seo o se finyeletseng se tla ba teng ka ho sa feleng. (Daniele 2:44) ’Me Morena le Moprista oa Bomesia le marena le baprista hammoho le eena ba tla hlomphuoa ka ho sa feleng ka lebaka la tšebeletso ea bona e tšepahalang ho Jehova.
Tlhahlobo
• Ke hobane’ng ha ’Muso oa Molimo e le oona feela tharollo mathateng a batho? Morena oa ’Muso oa Molimo o qalile ho busa neng?
• Ke eng e hlileng e ipiletsang ho uena ka ’Muso oa Molimo le seo o tlang ho se finyella?
• Ke lintho life tse seng li finyeletsoe ke ’Muso tseo re ka li bonang, hona re na le karolo efe ho see?
[Setšoantšo se leqepheng la 92, 93]
Tlas’a ’Muso oa Molimo, batho bohle ba tla ithuta ho loka