Ho Khetholla Sebata le Letšoao la Sona

NA U rata ho rarolla selotho? E le hore u se rarolle, u sheba lintlha tse ka u thusang ho fumana tharollo. Ka Lentsoeng la hae le bululetsoeng, Molimo o fana ka lintlha tse hlokahalang ho re thusa ho utloisisa palo ea 666, e leng lebitso kapa letšoao la sebata se ho Tšenolo khaolo ea 13.

Sehloohong sena, re tla sekaseka mabaka a mane a sehlooho—e leng lintlha tsa bohlokoa tse thusang—a tla senola se boleloang ke letšoao la sebata. Re tla hlahloba (1) kamoo ka linako tse ling mabitso a Bibele a khethoang kateng, (2) hore na sebata ke eng, (3) se boleloang ke hore 666 ke “palo ea motho” le (4) se boleloang ke palo 6 le hore na ke hobane’ng ha e phetiloe ka makhetlo a mararo, ke hore 600 ha e kopanngoa le 60 e boetse e kopanngoa le 6, kapa 666.—Tšenolo 13:18.

Mabitso a Bibele—Hase Mabitso Feela Tjee

Mabitso a Bibele a atisa ho ba le moelelo o ikhethang, haholo-holo ha a fanoa ke Molimo. Ka mohlala, kaha Abrame e ne e tla ba ntate oa lichaba, Molimo o ile a fetola lebitso la mopatriareka eo hore e be Abrahama, e bolelang “Ntat’a Letšoele.” (Genese 17:5) Molimo o ile a bolella Josefa le Maria hore ba rehe ngoana eo Maria a neng a tla ba le eena lebitso la Jesu, e bolelang hore “Jehova ke Poloko.” (Matheu 1:21; Luka 1:31) Tumellanong le lebitso leo le nang le moelelo o khethehileng, Jehova o ile a sebelisa tšebeletso ea Jesu le lefu la hae la sehlabelo ho etsa hore re khone ho bolokeha.—Johanne 3:16.

Ka hona, palo ea lebitso eo Molimo a faneng ka eona ea 666 e tlameha e be e tšoantšetsa seo Molimo a bonang e le litšobotsi tse hlalosang sebata seo. Ka ho utloahalang, e le hore re utloisise litšobotsi tseo, re lokela ho khetholla sebata ka bosona le ho tseba lintho tseo se li etsang.

Sebata Sea Senoloa

Buka ea Bibele ea Daniele e fana ka leseli le lengata ka se boleloang ke libata tsa tšoantšetso. Khaolo ea 7 e hlalosa ka ho hlaka “libata tse ’nè tsa litonanahali”—e leng tau, bere, lengau le sebata se seng se tšosang se nang le meno a maholo a tšepe. (Daniele 7:2-7) Daniele o re bolella hore libata tsena li emela “marena,” kapa mebuso ea lipolotiki, e busang ka ho hlahlamana e le mebuso e meholo.—Daniele 7:17, 23.

Mabapi le sebata se ho Tšenolo 13:1, 2, The Interpreter’s Dictionary of the Bible e re “se kopantse litšobotsi tsohle tsa libata tse ’nè tse ponong ea Daniele . . . Ka hona, sebata sena sa pele [se ho Tšenolo] se emela mebuso eohle ea lipolotiki e khahlanong le Molimo e lefatšeng.” Sena se tiisoa ke Tšenolo 13:7, e reng ka sebata sena: “Sa fuoa matla holim’a moloko o mong le o mong le batho ba bang le ba bang le leleme le leng le le leng le sechaba se seng le se seng.”a

Ke hobane’ng ha Bibele e sebelisa libata ho tšoantšetsa puso ea motho? Bonyane ka mabaka a mabeli. La pele, ka lebaka la tlaleho ea bobatana eo mebuso e iketselitseng eona ka lilemo tse makholo tsa tšollo ea mali. Bo-rahistori Will le Ariel Durant ba ile ba ngola: “Ntoa ke e ’ngoe ea lintho tse lulang li le teng historing, ’me ha ea ka ea bobisoa ke tsoelo-pele kapa puso ea sechaba ka sechaba.” Ke ’nete hore ‘motho o busitse motho ho mo ntša kotsi’! (Moeklesia 8:9) Lebaka la bobeli ke hobane ‘drakone [Satane] e file sebata matla a sona le terone ea sona le bolaoli bo boholo.’ (Tšenolo 12:9; 13:2) Ka hona, puso ea motho e tsoa ho Diabolose, kahoo e bonahatsa botho ba hae ba bobatana le ba bodrakone.—Johanne 8:44; Baefese 6:12.

Leha ho le joalo, sena ha se bolele hore ’musi e mong le e mong oa motho o sebelisoa ke Satane ka ho toba. Ha e le hantle, ka kutloisiso e itseng, mebuso ea batho e sebeletsa e le “mosebeletsi oa Molimo,” e fa sechaba botsitso bo itseng, hoo ha e se ka eona ho neng ho tla tlala pherekano feela hohle. ’Me baeta-pele ba bang ba ’nile ba sireletsa litokelo tsa batho tsa mantlha, ho akarelletsa tokelo ea ho kopanela borapeling ba ’nete—e leng ntho eo Satane a sa e batleng. (Baroma 13:3, 4; Esdrase 7:11-27; Liketso 13:7) Leha ho le joalo, ka lebaka la tšusumetso ea Diabolose, ha ho motho kapa mokhatlo oa batho o kileng oa khona ho tlisetsa batho khotso le tšireletso tse tšoarellang.b—Johanne 12:31.

“Palo ea Motho”

Ntlha ea boraro e thusang ho fumana se boleloang ke 666 ke hore e bitsoa “palo ea motho.” Mantsoe ana a ke ke a buuoa ka motho ea itseng, kaha ke Satane ea nang le matla holim’a sebata, eseng motho leha e le ofe e mong. (Luka 4:5, 6; 1 Johanne 5:19; Tšenolo 13:2, 18) Ho e-na le hoo, hore sebata se na le “palo ea motho,” kapa letšoao, ho fana ka maikutlo a hore ke mokhatlo oa batho, hase oa moea kapa oa bademona, ’me kahoo se bonahatsa litšobotsi tse itseng tsa motho. E ka ’na eaba litšobotsi tsee ke life? Bibele ea araba, e re: “[Batho] bohle ba entse sebe ’me ba haelloa ke khanya ea Molimo.” (Baroma 3:23) Ka hona, hore sebata se na le “palo ea motho” ho bontša hore mebuso e bonahatsa boemo ba batho ba boetsalibe, e leng letšoao la sebe le ho se phethahale.

Histori e paka sena. Eo e kileng ea e-ba Mongoli oa Naha, United States, Henry Kissinger o ile a re: “Tsoelo-pele e ’ngoe le e ’ngoe e kileng ea e-ba teng e qeteletse e putlame. Histori ke tlaleho ea boiteko bo hlōlehileng, litakatso tse sa kang tsa phethahala . . . Kahoo, motho ha e le rahistori o tlameha ho amohela hore joang kapa joang ho tla hlaha koluoa.” Mantsoe a Kissinger a tsoang botebong ba pelo a pakahatsa ’nete ena ea motheo ea Bibele: “Tsela ea motho oa lefatše ha e matleng a hae. Ha ho matleng a motho ea tsamaeang hore a tsamaise mehato ea hae.”—Jeremia 10:23.

Kaha joale re se re fumane hore na sebata ke eng ’me re hlokometse hore na Molimo o se talima joang, re boemong ba ho hlahloba karolo e qetellang ea selotho sa rōna—palo tšelela le hore na ke hobane’ng ha e phetiloe ka makhetlo a mararo—ke hore 666, kapa 600 ha e kopanngoa le 60 e boetse e kopanngoa le 6.

Ke Hobane’ng ha Tšelela e Phetiloe ka Makhetlo a Mararo?

Ka Mangolong, lipalo tse ling li tšoantšetsa ho itseng. Ka mohlala, palo supa e atisa ho sebelisetsoa ho tšoantšetsa ntho e feletseng kapa e phethahetseng ponong ea Molimo. Ka mohlala, beke ea Molimo ea pōpo e na le ‘matsatsi’ a supileng, kapa linako tse telele, tseo ka tsona Molimo a phethang morero oa hae oa pōpo mabapi le lefatše. (Genese 1:3–2:3) “Lipolelo” tsa Molimo li joaloka silevera e “tšekiloeng ka makhetlo a supileng,” ke hore e hloekisitsoeng ka ho phethahetseng. (Pesaleme ea 12:6; Liproverbia 30:5, 6) Molepera Naamane o ile a bolelloa hore a itlhatsoe ka makhetlo a supileng Nōkeng ea Jordane, ’me ka mor’a moo o ile a fola ka ho feletseng.—2 Marena 5:10, 14.

Tšelela e haella ka ’ngoe hore e fihle ho supa. Na hase tšoantšetso e loketseng ea ntho e sa phethahalang, kapa e haellang ponong ea Molimo? E, ka sebele! (1 Likronike 20:6, 7) Ho feta moo, ho pheta tšelela ka makhetlo a mararo, e le 666, ho hatisa ka matla ho se phethahale hoo. Hore pono ena e nepahetse ho tšehetsoa ke ’nete ea hore 666 ke “palo ea motho,” joalokaha re se re bone. Kahoo, tlaleho ea sebata, ‘palo ea sona ea motho’ le palo ea 666 kaofela li lebisa qetong e le ’ngoe feela—e leng ea ho haelloa le ho hlōleha ho feletseng ponong ea Jehova.

Tsela eo sebata se hlalosoang se haella ka eona e re hopotsa se ileng sa buuoa ka Morena Belshatsare oa Babylona ea boholo-holo. A sebelisa Daniele, Jehova o ile a re ho ’musi eo: “U lekantsoe sekaleng ’me u fumanoe u haelloa.” Bosiung bona boo Belshatsare o ile a bolaoa, ’me ’Muso o matla oa Babylona oa oa. (Daniele 5:27, 30) Ka ho tšoanang, kahlolo ea Molimo ho sebata seo sa lipolotiki le ho ba nang le letšoao la sona e bolela ho felisoa ha mokhatlo oo le batšehetsi ba oona. Leha ho le joalo, lekhetlong lena Molimo ha a na ho felisa tsamaiso e le ’ngoe feela ea lipolotiki empa o tla tlosa mesaletsa leha e le efe ea puso ea motho. (Daniele 2:44; Tšenolo 19:19, 20) Ka hona, ke habohlokoa hakaakang hore re qobe ho ba le letšoao le bolaeang la sebata!

Letšoao Lea Hlalosoa

Tšenolo ha e qeta ho senola palo ea 666, e bua ka balateli ba 144 000 ba Konyana, e leng Jesu Kreste, bao liphatleng tsa bona ho ngotsoeng lebitso la hae le lebitso la Ntat’ae, Jehova. Mabitso ana a khetholla beng ba ’ona e le batho ba Jehova le Mor’a hae, bao ba ba pakelang ka sebete. Ka ho tšoanang, ba nang le letšoao la sebata ba bolela phatlalatsa hore ba sebeletsa sebata. Ka hona, ebang letšoao le letsohong le letona kapa le phatleng, ke letšoao leo ka tsela ea tšoantšetso le khethollang ea nang le lona e le ea tšehetsang ka tsela ea borapeli litsamaiso tsa lefatše tsa lipolotiki tse kang libata. Ba nang le letšoao ba fa “Cesare” se lokelang ho fuoa Molimo. (Luka 20:25; Tšenolo 13:4, 8; 14:1) Ka tsela efe? Ka ho hlompha ka tsela ea borapeli mebuso ea lipolotiki, matšoao a eona le mabotho a eona a sesole, tseo ba tšepang hore li tla ba tlisetsa se molemo le ho ba pholosa. Ntho leha e le efe ea borapeli eo ba e etsetsang Molimo oa ’nete ke puo feela ea molomo.

Ka lehlakoreng le leng, Bibele ea re phehella: “Le se ke la tšepa bahlomphehi, kapa mora oa motho oa lefatše, eo ho seng poloko ho eena. Moea oa hae oa tsoa, eena o khutlela lerōleng la hae; ka letsatsi leo menahano ea hae ea timela.” (Pesaleme ea 146:3, 4) Ba elang hloko keletso eo e bohlale ha ba soetsehe ha mebuso e hlōleha ho phethahatsa litšepiso tsa eona kapa ha baeta-pele ba ipiletsang ba oa maemong a bona a phahameng.—Liproverbia 1:33.

Sena ha se bolele hore Bakreste ba ’nete ba qhanolotse ha ba etse letho ka mathata a hlahelang moloko oa batho. Ho e-na le hoo, ba phatlalatsa ka mafolofolo puso e le ’ngoe feela e tla rarolla mathata a moloko oa batho—e leng ’Muso oa Molimo, oo ba o emelang.—Matheu 24:14.

’Muso oa Molimo—Tšepo Feela Bakeng sa Moloko oa Batho

Ha Jesu a le lefatšeng, taba e ka sehloohong eo a neng a bua ka eona boboleling ba hae e ne e le ’Muso oa Molimo. (Luka 4:43) Thapelong ea hae ea mohlala, eo ka nako e ’ngoe e bitsoang Thapelo ea Morena, Jesu o ile a ruta balateli ba hae ho rapella hore ’Muso o tle ’me thato ea Molimo e etsoe mona lefatšeng. (Matheu 6:9, 10) ’Muso ke puso e tla busa lefatše lohle, eseng ho tsoa motse-moholo o itseng oa lefatše, empa ho tsoa leholimong. Kahoo, Jesu o ile a o bitsa “’muso oa maholimo.”—Matheu 11:12.

Ke mang ea loketseng hore e be Morena oa ’Muso oo haese Jesu Kreste, ea ileng a shoela bafo ba hae ba nakong e tlang? (Esaia 9:6, 7; Johanne 3:16) Haufinyane ’Musi enoa ea phethahetseng, eo hona joale e leng motho ea matla oa moea, o tla lahlela sebata, marena a sona le mabotho a sona “ka letšeng la mollo le tukang sebabole,” le tšoantšetsang timetso e feletseng. Empa ha ho felle moo. Jesu o tla boela a felise Satane, e leng ntho eo ho seng motho ea ka khonang ho e etsa.—Tšenolo 11:15; 19:16, 19-21; 20:2, 10.

’Muso oa Molimo o tla tlisetsa bafo bohle ba oona ba bontšang kutlo khotso. (Pesaleme ea 37:11, 29; 46:8, 9) Esita le masoabi, bohloko le lefu li ke ke tsa hlola li e-ba teng. Eo ke tebello e khanyang hakaakang ho ba lulang ba se na letšoao la sebata!—Tšenolo 21:3, 4.

[Mongolo o botlaaseng ba leqephe]

[Lebokose le leqepheng la 5]

Lintlha Tse Thusang ho Fumana se Boleloang ke 666

 1. Hangata mabitso a Bibele a senola ho itseng ka mong’a lebitso kapa tsela eo a phelang ka eona, joaloka tabeng ea Abrahama, Jesu le ba bang ba bangata. Ka ho tšoanang, palo ea lebitso la sebata e emela litšobotsi tse itseng tsa sona.

 2. Bukeng ea Bibele ea Daniele, libata tse sa tšoaneng li emela mebuso ea batho e hlahlamanang. Sebata se ho Tšenolo 13:1, 2 se nang le likarolo tse ngata se tšoantšetsa tsamaiso ea lefatše lohle ea lipolotiki, e fuoang matla ke Satane le e laoloang ke eena.

 3. Hore ebe sebata se na le “palo ea motho,” ho bontša hore ke mokhatlo oa batho, hase oa bademona. Kahoo, se bonahatsa mefokolo ea botho e tlisoang ke sebe le ho se phethahale.

 4. Ponong ea Molimo, palo tšelela, eo ho ea ka Bibele e haellang ho fihla ho palo supa e feletseng, kapa e phethahetseng, e bontša ho se phethahale. Letšoao la 666 le totobatsa ho haella hoo ka ho pheta palo eo ka makhetlo a mararo.

[Litšoantšo tse leqepheng la 6]

Puso ea motho e ipakile e hlōleha, e tšoantšetsoa ka ho loketseng ke palo ea 666

[Tlhaloso ea Moo Setšoantšo se Nkiloeng Teng]

Starving child: UNITED NATIONS/Photo by F. GRIFFING

[Litšoantšo tse leqepheng la 7]

Jesu Kreste o tla tlisa puso e phethahetseng lefatšeng