Molaetsa oo re Lokelang ho o Phatlalatsa

Jehova o re file boikarabelo le tokelo e khōlō, ha a re: “Le lipaki tsa ka, . . . ’me ke ’na Molimo.” (Esa. 43:12) Ha re balumeli feela. Re lipaki tse pakang phatlalatsa linnete tsa bohlokoa tse fuperoeng ke Lentsoe la Molimo le bululetsoeng. Ke molaetsa ofe oo Jehova a laetseng hore re fane ka oona mehleng ea rōna? O bua ka Jehova Molimo, Jesu Kreste le ’Muso oa Bomesia.

“TŠABA MOLIMO OA ’NETE ’ME U BOLOKE LITAELO TSA HAE”

KHALE pele ho mehla ea Bokreste, Jehova o ile a bolella Abrahama ea tšepahalang ka tokisetso ea hore “lichaba tsohle tsa lefatše” li tla itlhohonolofatsa. (Gen. 22:18) Hape o ile a bululela Solomone ho ngola mabapi le tlhokahalo ea motheo e tlamang batho bohle: “Tšaba Molimo oa ’nete ’me u boloke litaelo tsa hae. Etsoe sena ke sohle seo motho a tlamehang ho se etsa.” (Moek. 12:13) Empa batho ba phelang lichabeng tsohle ba ne ba tla ithuta lintho tsee joang?

Le hoja ho ’nile ha e-ba le batho ba itseng ba lumelang lentsoe la Molimo, Bibele e bontša hore bopaki bo matla ba lefatše lohle bo neng bo tla finyella lichaba tsohle ka litaba tse molemo bo ne bo boloketsoe ‘letsatsi la Morena.’ Letsatsi lena le qalile ka 1914. (Tšen. 1:10) Mabapi le nako ena, Tšenolo 14:6, 7 e boletse esale pele hore ho ne ho tla etsoa phatlalatso ea bohlokoa tlas’a tataiso ea lengeloi ‘sechabeng se seng le se seng le molokong o mong le o mong le lelemeng le leng le le leng le bathong ba bang le ba bang.’ Ba ne ba tla phehelloa: “Tšabang Molimo ’me le mo tlotlise, hobane hora ea ho ahlola ha hae e fihlile, kahoo le rapele Ea entseng leholimo le lefatše le leoatle le liliba tsa metsi.” Ke thato ea Molimo hore molaetsa ona o boleloe. Re na le tokelo ea ho kopanela mosebetsing oo.

“Molimo oa ’Nete.” Ha Jehova a ne a re, “Le lipaki tsa ka,” e ne e le ha ho phehoa khang ka tseko ea Bomolimo. (Esa. 43:10) Molaetsa o lokelang ho boleloa hase feela hore batho ba lokela ho ba le bolumeli kapa ba lumele ho molimo ea itseng. Ho e-na le hoo, ba lokela ho fuoa monyetla oa ho ithuta hore ’Mōpi oa leholimo le lefatše ke eena Molimo a le mong feela oa ’nete. (Esa. 45:5, 18, 21, 22; Joh. 17:3) Ke Molimo oa ’nete feela ea ka bolelang bokamoso esale pele ka ho tšepahalang. Re na le tokelo ea ho bontša hore ho phethahala ha lentsoe la Jehova nakong e fetileng ho fana ka bopaki bo tiileng ba hore re tšepe hore ntho e ’ngoe le e ’ngoe eo a e tšepisitseng bakeng sa nako e tlang e tla etsahala.—Josh. 23:14; Esa. 55:10, 11.

Ho hlakile hore batho ba bangata bao re ba pakelang ba rapela melimo e meng kapa ba bolela hore ho hang ha ba rapele molimo leha e le ofe. E le hore ba re mamele, ho ka ’na ha hlokahala hore re qale ka ho bua ntho e ’ngoe eo re e thahasellang hammoho. Re ka rua molemo mohlaleng o tlalehiloeng ho Liketso 17:22-31. Hlokomela hore le hoja moapostola Pauluse a ne a le masene, o ile a bolela ka ho hlaka hore batho bohle ba ikarabella ho Molimo eo e leng ’Mōpi oa leholimo le lefatše.

Ho Tsebahatsa Lebitso la Molimo. U se ke ua hlokomoloha ho tsebahatsa Molimo oa ’nete ka lebitso. Jehova o rata lebitso la hae. (Ex. 3:15; Esa. 42:8) O batla hore batho ba tsebe lebitso leo. O ile a etsa hore lebitso la hae le khanyang le kenngoe ka Bibeleng ka makhetlo a fetang 7 000. Ke boikarabelo ba rōna ho etsa hore batho ba le tloaele.—Deut. 4:35.

Litebello tsa nako e tlang tsa moloko oohle oa batho li itšetlehile ka hore ba tsebe Jehova le ho ipiletsa ho eena ka tumelo. (Joe. 2:32; Mal. 3:16; 2 Bathes. 1:8) Leha ho le joalo, batho ba bangata ha ba tsebe Jehova. Ba akarelletsa ba bangata ba ipolelang hore ba rapela Molimo oa Bibele. Esita le haeba ba e-na le Bibele ’me ba e bala, ho ka etsahala hore ebe ba ntse ba sa tsebe lebitso la Molimo kaha le tlositsoe liphetolelong tse ngata tsa kajeno. Batho ba bang ba tsebile lebitso Jehova kahobane feela baeta-pele ba bona ba bolumeli ba ba boleletse hore ba se ke ba le sebelisa.

Re ka etsa joang hore batho ba tloaele lebitso la Molimo? Ha ho letho le ka atlehang ho tšoana le ho ba bontša lona ka Libibeleng tsa bona haeba ho khoneha. Liphetolelong tse ling, lebitso leo le hlaha ka makhetlo a likete. Ho tse ling, le ka ’na la hlaha feela ho Pesaleme ea 83:18 kapa ho Exoda 6:3-6, kapa le ka fumanoa mantsoeng a botlaaseng ba leqephe ho Exoda 3:14, 15 kapa Ex 6:3. Liphetolelong tse ngata, mantsoe a nkelang a mang sebaka, a kang “Morena” le “Molimo,” a ngotsoe ka mokhoa o ikhethang ha taba e ngotsoeng puong ea mathomo e e-na le lebitso la Molimo. Libakeng tseo ho tsona bafetoleli ba kajeno ba tlositseng lebitso la Molimo ka ho feletseng, ho ka ’na ha hlokahala hore u sebelise phetolelo ea khalenyana ea Bibele ho bontša batho hore na ho entsoe’ng. Linaheng tse ling u ka ’na ua hlokomelisa ka lebitso la Molimo lifeleng tsa bolumeli kapa mantsoeng a ngotsoeng mohahong oa sechaba.

Esita le ho ba rapelang melimo e meng, Jeremia 10:10-13 ka Phetolelo ea Lefatše le Lecha e ka sebelisoa ka katleho. Ha e bolele lebitso la Molimo feela empa hape e hlalosa ka ho hlaka hore na ke mang.

U se ke ua pata lebitso Jehova ka mantsoe a kang “Molimo” le “Morena,” joalokaha Bokreste-’mōtoana bo etsa. Sena ha se bolele hore lebitso lena le lokela ho sebelisoa qalong ea moqoqo o mong le o mong. Ka lebaka la leeme, batho ba bang ba ka felisa puisano. Empa ka mor’a ho rala motheo oa puisano, u se ke ua tlohela ho sebelisa lebitso la Molimo.

Ke habohlokoa ho hlokomela hore Bibele e sebelisa lebitso la Molimo khafetsa ho feta makhetlo kaofela ao ka ’ona e sebelisang litlotla tse kang “Morena” le “Molimo.” Leha ho le joalo, bangoli ba Bibele ha baa ka ba kenyelletsa lebitso la Molimo polelong e ’ngoe le e ’ngoe. Ba entse joalo ka tsela ea tlhaho feela, ka bolokolohi le ka tlhompho. Oo ke mohlala o motle o lokelang ho lateloa.

Motho ea Khetholloang ka Lebitso Leo. Le hoja taba ea hore Molimo o na le lebitso e le ’nete ea bohlokoa, e mpa e le qalo feela.

E le hore batho ba rate Jehova le ho ipiletsa ho eena ka tumelo, ba lokela ho tseba hore na ke Molimo oa mofuta ofe. Ha Jehova a ne a tsebisa Moshe lebitso la hae Thabeng ea Sinai, Ha aa ka a pheta feela lentsoe “Jehova.” O ile a lebisa tlhokomelo ho tse ling tsa litšoaneleho tsa Hae tse ikhethang. (Ex. 34:6, 7) Oo ke mohlala oo re lokelang ho o etsisa.

Ho sa tsotellehe hore na u pakela batho ba sa tsoa thahasella kapa u fana ka lipuo phuthehong, ha u bua ka litlhohonolofatso tsa ’Muso, hlalosa hore na li bontša eng ka Molimo ea etsang litšepiso tse joalo. Ha u bua ka litaelo tsa hae, hatisa bohlale le lerato tseo li li bontšang. Hlakisa hore seo Molimo a se hlokang hase moroalo ho rōna empa, ho e-na le hoo, se etselitsoe ho re ruisa molemo. (Esa. 48:17, 18; Mik. 6:8) Bontša kamoo pontšo ka ’ngoe ea matla a Jehova e senolang ho hong ka botho ba hae, litekanyetso tsa hae, morero oa hae. Bontša kamoo Jehova a bonahatsang litšoaneleho tsa hae ka teka-tekano kateng. Etsa hore batho ba u utloe ha u hlahisa maikutlo a hao ka Jehova. Ho rata ha hao Jehova ho ka thusa ba bang hore ba mo rate ka ho tšoanang.

Molaetsa o potlakileng bakeng sa mehla ea rōna ke oa ho khothalletsa batho bohle hore ba tšabe Molimo. Ka seo re se buang, re lokela ho tsosa tšabo e joalo ea bomolimo. Tšabo ena ke tšabo e loketseng, tšabo e nang le tlhompho ho Jehova, ho mo hlompha ka ho tebileng. (Pes. 89:7) E akarelletsa ho elelloa hore Jehova ke Moahloli ea phahameng ka ho fetisisa le hore litebello tsa rōna tsa bophelo nakong e tlang li itšetlehile ka kamohelo ea hae. (Luka 12:5; Bar. 14:12) Ka hona, tšabo e joalo e tsamaisana le ho mo rata ka ho tebileng ’me, ka lebaka leo, re ba le takatso e matla ea ho mo khahlisa. (Deut. 10:12, 13) Hape tšabo ea bomolimo e re susumelletsa ho hloea bobe, ho mamela litaelo tsa Molimo le ho mo rapela ka pelo e feletseng. (Deut. 5:29; 1 Likron. 28:9; Liprov. 8:13) E re sireletsa hore re se ke ra leka ho sebeletsa Molimo empa ka nako e tšoanang re rata lintho tsa lefatše.—1 Joh. 2:15-17.

Lebitso la Molimo—“Tora e Matla.” Batho ba tsebang Jehova kannete ba fumana tšireletso e khōlō. Sena ha se etsahale hobane feela ba sebelisa lebitso la hae kapa hobane ba khona ho lokolisa tse ling tsa litšoaneleho tsa hae. Ke hobane ba tšepa Jehova. Liproverbia 18:10 e re ka bona: “Lebitso la Jehova ke tora e matla. Ea lokileng o balehela ho lona ’me o fuoa tšireletso.”

Sebelisa hamolemo menyetla ea ho khothalletsa ba bang ho tšepa Jehova. (Pes. 37:3; Liprov. 3:5, 6) Tšepo e joalo e bontša tumelo ho Jehova le litšepisong tsa hae. (Baheb. 11:6) Ha batho ba ‘ipiletsa lebitsong la Jehova’ hobane ba tseba hore ke ’Musi oa Bokahohle, ba rata litsela tsa hae ’me ba lumela ka ho feletseng hore poloko ea sebele e ka tsoa ho eena feela, joale Lentsoe la Molimo le re tiisetsa hore ba tla bolokeha. (Bar. 10:13, 14) Ha u ntse u ruta ba bang, ba thuse ho hōlisa tumelo ea mofuta oo litšobotsing tsohle tsa bophelo.

Batho ba bangata ba talimana le mathata a botho a sithabetsang. Mohlomong ha ba bone pheko. Ba phehelle hore ba ithute litsela tsa Jehova, ba mo tšepe le ho sebelisa seo ba ithutang sona. (Pes. 25:5) Ba khothalletse ho rapela Molimo ka tieo hore a ba thuse ’me ba mo lebohe ka litlhohonolofatso tsa hae. (Bafil. 4:6, 7) Ha ba se ba tseba Jehova, eseng feela ka ho bala lipolelo tse itseng ka Bibeleng empa hape le ka ho bona ho phethahala ha litšepiso tsa hae bophelong ba bona, ba tla qala ho thabela tšireletso e tlisoang ke ho ba le kutloisiso ea sebele ea seo lebitso la Jehova le se emelang.—Pes. 34:8; Jer. 17:7, 8.

Sebelisa hantle monyetla o mong le o mong ho thusa batho ho utloisisa bohlale ba ho tšaba Molimo oa ’nete, Jehova, le ho boloka litaelo tsa hae.

“HO PAKA KA JESU”

KA MOR’A tsoho ea hae le pele a khutlela leholimong, Jesu Kreste o ile a laela barutuoa ba hae, a re: “Le tla ba lipaki tsa ka . . . ho isa karolong e hōle-hōle ea lefatše.” (Lik. 1:8) Mehleng ea rōna bahlanka ba tšepahalang ba Molimo ba hlalosoa e le ‘ba nang le mosebetsi oa ho paka ka Jesu.’ (Tšen. 12:17) U khothetse hakae ho faneng ka bopaki boo?

Batho ba bangata bao ka sebele ba bolelang hore ba lumela ho Jesu ha ba tsebe letho ka ho ba teng ha hae pele e e-ba motho. Ha ba hlokomele hore e ne e le motho oa sebele ha a ne a le lefatšeng. Ha ba utloisise hore na taba ea hore ke Mora oa Molimo e bolela’ng. Ba tseba ho honyenyane haholo ka karolo ea hae phethahatsong ea morero oa Molimo. Ha ba tsebe seo a se etsang hona joale ebile ha ba hlokomele hore na seo a tla se etsa nakong e tlang se tla ama bophelo ba bona joang. E ka ’na eaba ka phoso ba bile ba nahana hore Lipaki tsa Jehova ha li lumele ho Jesu. Ke tokelo ea rōna hore re leke ho tsebahatsa ’nete ka litaba tsena.

Ho sa ntsane ho e-na le batho ba bang ba sa lumeleng hore motho ea tšoanang le Jesu ea boleloang ka Bibeleng o kile a phela. Ba bang ba nka Jesu e le motho feela e moholo. Ba bangata ba hana khopolo ea hore ke Mor’a Molimo. “Ho paka ka Jesu” har’a batho ba joalo ho hloka boiteko bo boholo, mamello le ho ba masene.

Ho sa tsotellehe hore na bamameli ba hao ba na le maikutlo afe, ba lokela ho amohela tsebo e mabapi le Jesu Kreste haeba ba batla ho amohela tokisetso ea Molimo ea bophelo bo sa feleng. (Joh. 17:3) Thato ea Molimo e boletsoeng ka ho hlaka ke hore bohle ba phelang ba ‘bolele pepenene hore ba ela hloko hore Jesu Kreste ke Morena’ le hore ba lokela ho ikokobelletsa bolaoli ba hae. (Bafil. 2:9-11) Kahoo, re ke ke ra hlokomoloha taba ena ha re teana le batho ba nang le maikutlo a matla empa e le a fosahetseng kapa a bontšang leeme le totobetseng. Le hoja maemong a mang re ka khona ho bua ka Jesu Kreste ka bolokolohi—esita le ketelong ea rōna ea pele—maemong a mang, ho ka ’na ha hlokahala hore re bue ho hong ka masene ho thusang bamameli ba rōna hore ba qale ho nahana hantle ka eena. Hape ho ka ’na ha hlokahala hore re nahane ka litsela tsa ho kenyelletsa litšobotsi tse eketsehileng tsa taba eo maetong a rōna a nakong e tlang. Leha ho le joalo, mohlomong ho ke ke ha khoneha hore re bue ka sohle se amehang ho fihlela re khannela motho eo thuto ea lehae ea Bibele.—1 Tim. 2:3-7.

Karolo ea Jesu ea Bohlokoa Morerong oa Molimo. Re lokela ho thusa batho ho utloisisa hore kaha Jesu ke eena “tsela” le hore ‘ha ho ea tlang ho Ntate haese ka eena,’ ho ke ke ha khoneha hore motho a be le kamano e ntle le Molimo ntle le hore a lumele ho Jesu Kreste. (Joh. 14:6) Ho ke ke ha khoneha hore motho a utloisise Bibele ntle le hore a lemohe karolo ea bohlokoa eo Jehova a e abetseng Mora oa hae oa letsibolo. Hobane’ng? Hobane Jehova o entse hore Mora enoa e be eena motho ea ka sehloohong ho phethahaleng ha merero ea Hae kaofela. (Bakol. 1:17-20) Boprofeta ba Bibele bo thehiloe ’neteng ena. (Tšen. 19:10) Ke ka Jesu Kreste ho fanoang ka pheko bakeng sa mathata ’ohle a hlahisitsoeng ke borabele ba Satane le sebe sa Adama.—Baheb. 2:5-9, 14, 15.

Hore motho a utloisise karolo ea Kreste, o lokela ho lemoha hore batho ba boemong bo utloisang bohloko boo ba ke keng ba itokolla ho bona. Kaofela ha rōna re tsoaletsoe sebeng. Sena se ka re ama ka litsela tse sa tšoaneng bophelong ba rōna. Leha ho le joalo, qetellong se fella ka lefu. (Bar. 3:23; 5:12) Behelana mabaka le batho bao u ba pakelang ka taba eo. ’Me u bontše hore ka sehlabelo sa thekollo sa Jesu Kreste, ka lerato Jehova o entse hore ba bontšang tumelo tokisetsong eo ba khone ho lopolloa sebeng le lefung. (Mar. 10:45; Baheb. 2:9) Sena se ba bulela tsela ea ho thabela bophelo bo sa feleng ba phethahetse. (Joh. 3:16, 36) Sena se ke ke sa khoneha ka tsela leha e le efe e ’ngoe. (Lik. 4:12) Joaloka mosuoe, ebang u etsa sena ka thōko kapa ka phuthehong, u se ke ua bua feela ka lintlha tsena. Ka mosa le ka mamello etsa hore bamameli ba hao ba be le boikutlo ba teboho bakeng sa karolo ea Kreste joaloka Molopolli oa rōna. Ho ananela tokisetso ena ho ka ba le liphello tse matla boikutlong, boitšoarong le lipakaneng tsa motho eo bophelong.—2 Bakor. 5:14, 15.

Ke ’nete hore Jesu o ile a nehelana ka bophelo ba hae hanngoe feela e le sehlabelo. (Baheb. 9:28) Leha ho le joalo, hona joale o sebeletsa e le Moprista ea Phahameng ea mafolofolo. Thusa ba bang ho utloisisa hore na seo se bolela’ng. Na ba thulana le khatello ea kelello, ho soetseha, ho utloa bohloko kapa mathata a bakoang ke ho hloka mosa ha batho ba ba potolohileng? Ha Jesu e ne e le motho oa nama, o ile a thulana le lintho tsena kaofela. Oa tseba hore na re ikutloa joang. Ka lebaka la ho se phethahale, na re ikutloa re hloka mohau oa Molimo? Haeba re rapela Molimo hore a re tšoarele motheong oa sehlabelo sa Jesu, Jesu o sebeletsa e le “mothusi ho Ntate.” Ka kutloelo-bohloko, o ‘re kōpela ka tieo.’ (1 Joh. 2:1, 2; Bar. 8:34) Motheong oa sehlabelo sa Jesu le ka litšebeletso tsa hae joaloka Moprista ea Phahameng, re khona ho atamela “teroneng [ea Jehova] ea mosa o sa tšoanelang” ho fumana thuso ka nako e nepahetseng. (Baheb. 4:15, 16) Le hoja re sa phethahala, thuso eo Jesu a fanang ka eona joaloka Moprista ea Phahameng e re nolofalletsa ho sebeletsa Molimo ka letsoalo le hloekileng.—Baheb. 9:13, 14.

Ho phaella moo, Jesu o na le matla a maholo a ho laela joaloka ea khethiloeng ke Molimo ho ba Hlooho ea phutheho ea Bokreste. (Mat. 28:18; Baef. 1:22, 23) Ka lebaka leo, o fana ka tataiso e hlokahalang tumellanong le thato ea Molimo. Ha u ruta ba bang, ba thuse ho utloisisa hore Jesu Kreste ke eena Hlooho ea phutheho, eseng motho leha e le ofe. (Mat. 23:10) Ho tloha ha u qala ho kopana le batho ba thahasellang, ba memele libokeng tsa phutheho ea lōna, moo re ithutang Bibele teng ka thuso ea boitsebiso bo fanoeng ke “lekhoba le tšepahalang le le masene.” U se ke ua ba hlalosetsa feela hore na “lekhoba” leo ke mang empa hape u ba hlalosetse le hore na Mong’a lona ke mang e le hore ba ele hloko bohlooho ba Jesu. (Mat. 24:45-47) Ba tsebise baholo ’me u hlalose litšoaneleho tsa Mangolo tseo baholo ba lokelang ho li finyella. (1 Tim. 3:1-7; Tit. 1:5-9) Ba hlalosetse hore phutheho hase ea baholo empa ba re thusa ho tsamaea mehlaleng ea Jesu Kreste. (Lik. 20:28; Baef. 4:16; 1 Pet. 5:2, 3) Thusa batho bana ba thahasellang ho bona hore ho na le mokhatlo oa lefatše ka bophara o hlophisitsoeng, o sebetsang tlas’a bohlooho ba Kreste.

Likosepeleng, re ithuta hore ha Jesu a ne a kena Jerusalema pejana ho lefu la hae, barutuoa ba hae ba ile ba mo thoholetsa e le “Ea tlang e le Morena ka lebitso la Jehova!” (Luka 19:38) Ha batho ba ntse ba ithuta Bibele ka botebo, ba ithuta hore hona joale Jehova o se a file Jesu bolaoli bo amang batho ba lichaba tsohle. (Dan. 7:13, 14) Ha u fana ka lipuo phuthehong kapa u khanna lithuto, hōlisa kananelo bakeng sa seo bobusi ba Jesu bo lokelang ho se bolela ho rōna kaofela.

Hatisa hore tsela eo re phelang ka eona e bontša hore na re hlile re lumela hore Jesu Kreste ke Morena le hore na re rata ho ikokobelletsa bobusi ba hae kapa che. Totobatsa mosebetsi oo Jesu a ileng a abela balateli ba hae hore ba o etse ka mor’a hore a tlotsoe joaloka Morena. (Mat. 24:14; 28:18-20) Bua ka seo Jesu, Moeletsi ea Hlollang, a se boletseng mabapi le lintho tse lokelang ho tla pele bophelong. (Esa. 9:6, 7; Mat. 6:19-34) Lebisa tlhokomelo moeeng oo Khosana ea Khotso e itseng balateli ba eona ba lokela ho o bontša. (Mat. 20:25-27; Joh. 13:35) Hlokomela hore u se ke ua itjarisa boikarabelo ba ho ahlola ba bang ka hore na ebe ba etsa sohle seo ba ka se khonang kapa che, empa ba khothalletse ho nahana ka hore na liketso tsa bona li bontša’ng mabapi le ho ikokobelletsa bobusi ba Kreste. Ha u ntse u etsa joalo, amohela hore le uena u lokela ho etsa joalo.

Ho Rala Motheo ho Kreste. Bibele e tšoantša mosebetsi oa ho etsa morutuoa oa Mokreste le ho haha mohaho oo Jesu Kreste e leng motheo oa oona. (1 Bakor. 3:10-15) Ho finyella sena, thusa batho ho tseba Jesu kamoo a hlalosoang kateng ka Bibeleng. U hlokomele hore u se ke ua etsa hore ba nahane hore ba latela uena. (1 Bakor. 3:4-7) Lebisa tlhokomelo ea bona ho Jesu Kreste.

Haeba motheo o raliloe hantle, liithuti li tla utloisisa hore Kreste o ile a re siela mohlala “hore [re] latele mehato ea hae haufi-ufi.” (1 Pet. 2:21) E le hore u hahe holim’a oona, khothalletsa liithuti hore li se ke tsa bala Likosepele e le pale feela ea ’nete empa e le mohlala o lokelang ho lateloa. Li thuse ho tebisetsa pelong maikutlo le litšoaneleho tseo Jesu a neng a e-na le tsona. Li khothalletse ho hlokomela kamoo Jesu a neng a ikutloa kateng ka Ntat’ae, kamoo a ileng a mamella liteko kateng, kamoo a ileng a ikokobelletsa Molimo kateng le kamoo a ileng a sebetsana le batho kateng tlas’a maemo a sa tšoaneng. Totobatsa mosebetsi oo Jesu a neng a o phelela. Joale, ha seithuti se talimane le liqeto le liteko bophelong, se tla ipotsa: ‘Ebe Jesu o ne a tla etsa joang boemong boo? Na tsela ea ka e tla bontša hore ke na le kananelo e loketseng ka seo a nketselitseng sona?’

Ha u bua ka pel’a phutheho, u se ke ua phetha ka hore kaha barab’eno ba se ba ntse ba lumela ho Jesu, ha ho hlokahale hore u lebise tlhokomelo e khethehileng ho eena. Seo u se buang se tla ba le moelelo o moholoanyane haeba u haha holim’a tumelo eo. Ha u bua ka liboka, li hokahanye le karolo eo Jesu a e phethang joaloka Hlooho ea phutheho. Ha u bua ka tšebeletso ea tšimo, lebisa tlhokomelo moeeng oo Jesu a ileng a o bontša ha a ntse a phetha tšebeletso ea hae ’me u buelle tšebeletso leseling la seo Kreste joaloka Morena a se etsang ho bokella batho hore ba sireletsoe ho kena lefatšeng le lecha.

Ho totobetse hore ho hlokahala ho fetang feela ho ithuta linnete tsa motheo ka Jesu. Hore batho e be Bakreste ba ’nete, ba lokela ho bontša tumelo ho eena ’me ba mo rate e le kannete. Lerato le joalo le susumetsa kutlo e tšepahalang. (Joh. 14:15, 21) Le nolofalletsa batho ho ema ba tiile tumelong ha ba thulana le litsietsi, ho tsoela pele ba tsamaea mehatong ea Kreste matsatsing ’ohle a bophelo ba bona, ho ipaka e le Bakreste ba hōlileng tsebong ba “[metseng] ka metso le ho tiea motheong.” (Baef. 3:17) Tsela e joalo e tlotlisa Jehova, Molimo le Ntate oa Jesu Kreste.

“LITABA TSENA TSE MOLEMO TSA ’MUSO”

HA A fana ka makolopetso mabapi le pontšo ea ho ba teng ha hae le ea bofelo ba tsamaiso ea lintho, Jesu o ile a bolela esale pele a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.”—Mat. 24:14.

Hantle-ntle molaetsa oo o lokelang ho phatlalatsoa ka ho pharaletseng hakaale ke ofe? O mabapi le ’Muso oo Jesu a re rutileng hore re o rapelle ho Molimo, ha a re: “’Muso oa hao o ke o tle.” (Mat. 6:10) Tšenolo 11:15 e o hlalosa e le “’muso oa Morena oa rōna [Jehova] le oa Kreste oa hae” hobane matla a ho laela a simoloha ho Jehova ’me a fetisetsoa ho Kreste joaloka Morena. Leha ho le joalo, hlokomela hore molaetsa oo Jesu a itseng o tla boleloa mehleng ea rōna o pharaletse ho feta oo balateli ba hae ba ileng ba o bolela lekholong la pele la lilemo. Ba ile ba bolella batho ba re: “’Muso oa Molimo o atametse ho lōna.” (Luka 10:9) Jesu, e leng eena ea neng a tlotsitsoe hore e be Morena, o ne a le har’a bona ka nako eo. Empa joalokaha ho tlalehiloe ho Matheu 24:14, Jesu o ile a bolela esale pele ka phatlalatso ea lefatše ka bophara ea ketsahalo e ’ngoe e phethahatsang morero oa Molimo.

Moprofeta Daniele o ile a bontšoa ketsahalo ena ponong. O ile a bona “e mong ea joaloka mor’a motho,” Jesu Kreste, a amohela ho “Moholo-holo oa Matsatsi,” Jehova Molimo, “bobusi le ho hlompheha le ’muso, hore batho, lichaba le lipuo kaofela ba mo sebeletse.” (Dan. 7:13, 14) Ketsahalo eo ea bohlokoa bokahohleng e etsahetse leholimong ka selemo sa 1914. Hamorao, Diabolose le bademona ba hae ba ile ba liheloa lefatšeng. (Tšen. 12:7-10) Tsamaiso ea khale ea lintho e ne e kene matsatsing a eona a ho qetela. Pele e tlosoa ka ho feletseng, ho phatlalatsoa lefatšeng ka bophara hore Morena oa Jehova oa Bomesia o se a busa a le teroneng ea hae ea leholimo. Batho ba ntse ba tsebisoa hohle. Karabelo ea bona e bonahatsa boikutlo ba bona ka Ea Phahameng ka ho Fetisisa e le ’Musi “’musong oa moloko oa batho.”—Dan. 4:32.

’Nete ke hore liholo li sa tla! Re sa ntse re rapela re re, “’Muso oa hao o ke o tle,” empa hase ka kutloisiso ea hore ho thehoa ha ’Muso oa Molimo ke hona ho sa ntseng ho tla. Ho e-na le hoo, ke ka kutloisiso ea hore ’Muso oa leholimo o tla nka khato ea makhaola-khang ho phethahatsa boprofeta bo kang ba Daniele 2:44 le Tšenolo 21:2-4. O tla fetola lefatše hore e be paradeise e tletseng batho ba ratang Molimo le ba ratang batho ba bang. Ha re ntse re bolela “litaba tsena tse molemo tsa ’muso,” re lebisa tlhokomelo litebellong tseo tsa nako e tlang. Empa hape re bolela ka kholiseho hore Jehova o se a fetiselitse bolaoli bo feletseng ho Mora oa hae. Na u hatisa litaba tsee tse molemo ha u paka ka ’Muso?

Ho Hlalosa ’Muso. Re ka phethahatsa thōmo ea rōna ea ho tsebahatsa ’Muso oa Molimo joang? Re ka tsosa thahasello ka ho qalisa meqoqo ka litaba tse fapa-fapaneng, empa re lokela ho hlakisa kapele hore molaetsa oa rōna o mabapi le ’Muso oa Molimo.

Karolo ea bohlokoa ea mosebetsi ona e akarelletsa ho bala mangolo a buang ka ’Muso oo kapa ho a qotsa. Ha u bua ka ’Muso, tiisa hore bao u buang le bona baa utloisisa hore na ke eng. Ho ka ’na ha hlokahala ho fetang feela ho bolela hore ’Muso oa Molimo ke puso. Batho ba bang ba ka ’na ba thatafalloa ke ho nahana hore ntho e sa bonahaleng e ka ba puso. U ka ’na ua behelana mabaka le bona ka litsela tse sa tšoaneng. Ka mohlala, matla a khoheli ha a bonahale, empa a na le liphello tse matla bophelong ba rōna. Re ke ke ra bona Ea entseng molao oa matla a khoheli, empa ho totobetse hore o na le matla a maholo. Bibele e mo bitsa “Morena oa bosafeleng.” (1 Tim. 1:17) Kapa u ka ’na ua re naheng e khōlō, batho ba bangata ha ho mohla ba kileng ba ea motse-moholo oa naha ea habo bona kapa ba bona ’musi oa bona ka seqo. Ba tseba lintho tsena ho tsoa litlalehong tsa litaba. Ka ho tšoanang, Bibele, e hatisitsoeng ka lipuo tse fetang 2 200, e re bolella ka ’Muso oa Molimo; e re tsebisa hore na ke mang ea filoeng bolaoli le hore na ’Muso oo o etsa’ng. Molula-Qhooa, o hatisoang ka lipuo tse ngata ho feta makasine leha e le efe e ’ngoe, o lebisa tlhokomelo tabeng ea ho “Tsebahatsa ’Muso oa Jehova,” joalokaha ho boletsoe sekoahelong sa oona.

Hore u thuse batho ho utloisisa hore na ’Muso oo ke eng, u ka ’na ua bua ka lintho tse ling tseo ba batlang hore mebuso e li etse: tšireletseho moruong, khotso, ho fela ha tlōlo ea molao, ho tšoara batho ba merabe eohle ka ho hloka leeme, thuto le tlhokomelo ea bophelo bo botle. Bontša hore ke ka ’Muso oa Molimo feela lintho tsena tsohle le litakatso tse ling kaofela tsa moloko oa batho li tlang ho khotsofatsoa ka ho feletseng.—Pes. 145:16.

Leka ho susumetsa batho hore ba rate ho ba bafo ba ’Muso oo, oo ho oona Jesu Kreste a tla beng a busa joaloka Morena. Bua ka mehlolo eo a ileng a e etsa e le ponelo-pele ea seo a tla se etsa joaloka Morena oa leholimo. Khafetsa bua ka litšoaneleho tseo a ileng a li bonahatsa. (Mat. 8:2, 3; 11:28-30) Hlalosa hore o ile a tela bophelo ba hae bakeng sa rōna le hore hamorao Molimo o ile a mo tsosetsa bophelong ba ho se shoe maholimong. O busa a le hona teng joaloka Morena.—Lik. 2:29-35.

Hatisa hore hona joale ’Muso oa Molimo o busa o le maholimong. Leha ho le joalo, u elelloe hore batho ba bangata ha ba bone maemo ao ba nahanang hore e ne e ka ba bopaki ba puso e joalo. Lumela seo ’me u botse hore na baa tseba hore na Jesu Kreste o itse e ne e tla bonahala ka eng. Totobatsa likarolo tse ling tsa pontšo e nang le likarolo tse ngata tse fumanoang ho Matheu khaolo ea 24, Mareka khaolo ea 13 kapa Luka khaolo ea 21. Joale botsa hore na ke hobane’ng ha ho behoa ha Kreste teroneng leholimong ho ne ho tla lebisa maemong a joalo lefatšeng. Lebisa tlhokomelo ho Tšenolo 12:7-10, 12.

E le bopaki ba sebele ba seo ’Muso oa Molimo o se etsang, bala Matheu 24:14 ’me u hlalose lenaneo la lefatše ka bophara la thuto ea Bibele le ntseng le tsoela pele hona joale. (Esa. 54:13) Bolella batho ka likolo tse sa tšoaneng tseo Lipaki tsa Jehova li ruang molemo ho tsona—tseo kaofela li thehiloeng Bibeleng, ’me kaofela ha tsona li tšoaroa ntle ho tefiso. Hlalosa hore ho phaella tšebeletsong ea rōna ea ntlo le ntlo, re fana ka thupelo ea lehae e sa lefelloeng ea Bibele ho batho le ho malapa linaheng tse fetang 230. Ke ’muso ofe oa batho o khonang ho fana ka lenaneo le pharaletseng joalo la thuto, eseng bakeng sa bafo ba oona feela, empa bakeng sa batho lefatšeng lohle? Memela batho Holong ea ’Muso, hore ba be teng likopanong tse nyenyane le tse khōlō tsa Lipaki tsa Jehova, e le hore ba bone kamoo thuto e joalo e amang bophelo ba batho kateng.—Esa. 2:2-4; 32:1, 17; Joh. 13:35.

Empa na mong’a ntlo o tla lemoha kamoo bophelo ba hae bo amehang kateng? Ka masene u ka ’na ua bontša hore morero oa ketelo ea hao ke ho tšohla monyetla o bulehetseng bohle oa hore ba ikhethele bophelo e le bafo ba ’Muso oa Molimo. Joang? Ka ho ithuta seo Molimo a se hlokang le ho phela tumellanong le sona hona joale.—Deut. 30:19, 20; Tšen. 22:17.

Ho Thusa ba Bang ho Etelletsa ’Muso Pele. Esita leha motho a se a amohetse molaetsa oa ’Muso, ho na le liqeto tseo a lokelang ho li etsa. O tla etelletsa ’Muso oa Molimo pele hakae bophelong ba hae? Jesu o ile a phehella balateli ba hae hore ‘ba ’ne ba batle ’muso pele.’ (Mat. 6:33) Re ka thusa Bakreste-’moho le rōna ho etsa seo joang? Ka hore rōna ka borōna re behe mohlala o motle le ka ho tšohla menyetla e ba bulehetseng. Ka linako tse ling, re ka etsa sena ka ho botsa motho hore na o kile a nahana ka menyetla e itseng le ka ho arolelana le eena liphihlelo ho bontša seo ba bang ba se etsang. Ka ho bua ka litlaleho tsa Bibele ka tsela e etsang hore li hōlise lerato la motho ho Jehova. Ka ho hatisa hore ’Muso ke ntho ea sebele. Ka ho hatisa kamoo mosebetsi oa ho bolela ka ’Muso e leng oa bohlokoa kateng. Hangata molemo o moholohali ha o finyelloe ka ho bolella batho seo ba lokelang ho se etsa empa ka ho ba susumelletsa ho ba le takatso ea ho se etsa.

Ntle ho pelaelo, molaetsa oa bohlokoa oo kaofela ha rōna re lokelang ho o bolela o lebisa tlhokomelo e khōlō ho Jehova Molimo, Jesu Kreste le ’Muso. Linnete tsa bohlokoa mabapi le lintho tsena li lokela ho hatisoa boboleling ba rōna ba phatlalatsa, liphuthehong tsa rōna le bophelong ba rōna. Ha re etsa joalo, re bontša hore ka sebele re rua molemo thutong ea rōna ea Sekolo sa Tšebeletso sa Puso ea Molimo.

BATHO BOHLE BA LOKELA HO UTLOA . . . 

Hore Jehova ke ’Mōpi oa leholimo le lefatše.

Hore Jehova ke eena Molimo a le mong feela oa ’nete.

Hore Jehova ke Molimo ea nang le lerato le ikhethang, bohlale bo fetisisang, toka e phethahetseng le matla ’ohle.

Hore re ikarabella ho Jehova ka seo re se etsang.

BORAPELI BA RŌNA HO JEHOVA . . . 

Bo lokela ho susumetsoa ke ho mo rata.

Bo lokela ho tsoa pelong e feletseng, eseng pelong e ratang le lintho tsa lefatše.

Bo lokela ho fana ka bopaki ba kamoo ho ba le kamano e amohelehang le eena e leng habohlokoa kateng ho rōna.

THUSA BATHO HO UTLOISISA . . . 

Hore ho ba le kamano e amohelehang le Molimo ho ka khoneha feela ka Jesu Kreste.

Hore ho lopolloa sebeng le lefung ho ka khoneha feela ka ho ba le tumelo ho Jesu Kreste.

Hore thato ea Molimo ke hore bohle ba lumele hore Jesu ke Morena, eseng feela ka ho mo bitsa Morena empa ka ho boloka litaelo tsa hae.

Hore seo Bibele e se bolelang ka Jesu Kreste ke ’nete le hore boholo ba seo Bokreste-’mōtoana bo se rutang ka eena bo sotha linnete.

IPOTSE:

Na ke fana ka bopaki ba hore ke utloisisa hantle karolo eo Jesu Kreste a e phethang joaloka Hlooho e khethiloeng ea phutheho?

Na ho ananela sehlabelo sa Kreste ke tšusumetso e matla bophelong ba ka?

Nka etsa joang hore liketso tsa ka le maikutlo a ka li lumellane ka ho feletseng le mohlala o behiloeng ke Mor’a Molimo?

TSEBISA BATHO . . . 

Hore hona joale ’Muso oa Molimo o busa o le maholimong le hore haufinyane o tla nkela mebuso eohle ea batho sebaka.

Hore ’Muso o tla fetola lefatše hore e be paradeise e tletseng batho ba ratang Molimo le ba ratang batho ba bang.

Hore ke ka ’Muso feela litakatso tsohle tse molemo tsa batho li tlang ho khotsofatsoa ka ho feletseng.

Hore seo re se etsang hona joale se bontša hore na re batla ho ba bafo ba ’Muso oa Molimo kapa che.

IPOTSE:

Na tsela eo ke phelang ka eona e bontša hore ke batla ’Muso pele?

Na ho na le liphetoho tseo nka li etsang e le hore ke etse see ka botlalo?

Nka etsa’ng ho susumelletsa ba bang hore ba be le takatso ea ho batla ’Muso pele?