Rorisang Morena oa Bosafeleng!
“Jehova ke Morena ho isa nakong e sa tsejoeng, esita le ka ho sa feleng.”—PESALEME EA 10:16, NW.
1. Ho hlaha lipotso life mabapi le bosafeleng?
BOSAFELENG—u ne u tla re ke eng? Na u nahana hore nako e ka hla ea tsoela pele ka ho sa feleng? Ha e le hantle, ha ho pelaelo hore nako e atolohela nakong e fetileng ka ho sa feleng. Ka hona, ke eng e ka hanang hore e atolohele nakong e tlang ka ho sa feleng? Ka sebele, Bibele e bua ka Molimo e le ea rorisoang “ho tloha ho bo sa qaleng, ho isa ho bo sa feleng.” (Pesaleme ea 41:13) Polelo ee e bolela eng? Re ka ’na ra thusoa ho utloisisa polelo ena haeba re ka bua ka taba e amanang le eona—e leng sepaka-paka.
2, 3. (a) Ke lipotso life tse amanang le sepaka-paka, tse re thusang ho utloisisa bosafeleng? (b) Ke hobane’ng ha re lokela ho batla ho rapela Morena oa bosafeleng?
2 Sepaka-paka se boholo bo bokae? Na se na le moeli? Ho fihlela lilemong tse 400 tse fetileng, ho ne ho nahanoa hore lefatše la rōna le bohareng ba bokahohle. Eaba Galileo o qapa telescope, e fanang ka pono e batsi haholoanyane ea sepaka-paka. Joale Galileo o ne a ka bona linaleli tse ngata haholo ’me o ile a khona ho bontša hore lefatše le lipolanete tse ling li potoloha letsatsi. Molala o Mosoeu o ne o se o sa bonahale o le mosoeu. O ile oa ipaka ho ba sehlopha sa linaleli, tse ka bang limilione tse likete tse lekholo. Le ka mohla re ne re ke ke ra tseba ho bala lenane le leholo hakaalo la linaleli tsa sebele, esita le nakong eohle ea bophelo ba rōna. Hamorao, litsebi tsa linaleli li ile tsa tsoela pele ho fumana lihlopha tse ling tsa linaleli tse limilione tse likete. Linaleli tsena li atoloha le sepaka-paka ho ea moo ho sa tsejoeng, ho ea bohōleng boo li-telescope tse matla ka ho fetisisa li ka finyellang. Ho bonahala hore sepaka-paka ha se na moeli. Ho joalo le ka bosafeleng—ha bo na moeli.
3 Ho bonahala khopolo ea bosafeleng e phahametse kutloisiso ea boko ba rōna ba botho bo nang le likhaello. Leha ho le joalo, ho na le Motho e Mong ea bo utloisisang ka ho feletseng. A ka bala, e, esita le ho bitsa ka mabitso linaleli tse libilione tse likete lihlopheng tsa tsona tse limilione tse likete! Enoa o re: “Lelalang holimo, le talime! O tsamaisa makhotla a tsona ka lenaneo, o li thonya [“bitsa,” NW] kaofela ka mabitso a tsona ka matla a hae a maholo, matla a hae a sa sitoeng ke letho; ha ho le e ’ngoe ho tsona e hlokahalang. Na ha u tsebe, na ha ua ka ua utloa hobane Jehova ke Molimo oa ka mehla eohle, ’Mōpi oa lipheletso tsa lefatše? Ha a khathale, ha a fokole, kelello ea hae ha e lekanngoe.” (Esaia 40:26, 28) Ke Molimo ea hlollang hakaakang! Ka sebele, ke Molimo eo re lokelang ho batla ho mo rapela!
“Morena ho Isa Nakong e sa Tsejoeng”
4. (a) Davida o ile a bontša kananelo joang bakeng sa Morena oa bosafeleng? (b) E mong oa bo-rasaense ba baholo ka ho fetisisa historing o ile a etsa qeto efe mabapi le tšimoloho ea bokahohle?
4 Ho Pesaleme ea 10:16 (NW), Davida o re ka ’Mōpi, Molimo: “Jehova ke Morena ho isa nakong e sa tsejoeng, esita le ka ho sa feleng.” ’Me ho Pesaleme ea 29:10 (NW), o boetse o re: “Jehova o lula e le morena ho isa nakong e sa tsejoeng.” E, Jehova ke Morena oa bosafeleng! Ho feta moo, Davida o tiisa hore Morena enoa ea phahameng ke Moqapi le Moetsi oa lintho tsohle tseo re li bonang sepaka-pakeng, ha a re ho Pesaleme ea 19:1: “Maholimo a bolela khanya ea Molimo, ’me sebaka sa leholimo se bonahatsa mosebetsi oa liatla tsa oona.” Lilemo tse ka bang 2 700 hamorao, rasaense ea tummeng Monghali Isaac Newton o ile a lumellana le Davida ha a ne a ngola: “Tsamaiso ena e babatsehang haholo ea matsatsi, lipolanete le mechochonono e ne e ka hlaha feela morerong le bobusing ba motho ea nang le tsebo le ea matla.”
5. Esaia le Pauluse ba ile ba ngola eng mabapi le Mohloli oa bohlale?
5 Ho tseba hore ’Musi Morena Jehova, eo esita le ‘maholimo le maholimo a maholimo a ke keng a mo kopa,’ o phela ka ho sa feleng, ho lokela ho re kokobetsa hakaakang! (1 Marena 8:27) Jehova, eo ho Esaia 45:18 a hlalosoang e le “’mōpi oa maholimo, . . . [Ea] bōpileng lefatše, moetsi oa lona,” ke Mohloli oa bohlale bo pharaletseng ho feta kutloisiso ea boko ba motho ea shoang. Joalokaha ho totobalitsoe ho 1 Bakorinthe 1:19, Jehova o itse: “Ke tla timetsa bohlale ba banna ba bohlale, ’me ho ba kelello ha banna ba kelello ka sebele ke tla ho qhelela ka thōko.” Temaneng ea 20 moapostola Pauluse o ile a phaella ho sena: “Monna ea bohlale o kae? Mongoli o kae? Mopheha-khang oa tsamaiso ee ea lintho o kae? Na Molimo ha aa ka a etsa bohlale ba lefatše lee booatla?” E, joalokaha Pauluse a ile a tsoela pele ho bolela khaolong ea 3, temaneng ea 19, “bohlale ba lefatše lena ke booatla ho Molimo.”
6. Moeklesia 3:11 e bontša’ng mabapi le “nako e sa tsejoeng”?
6 Lihloliloeng tsa leholimo ke karolo ea pōpo eo Morena Solomone a buileng ka eona: “Ntho e ’ngoe le e ’ngoe o [Molimo] e entse e le ntle ka nako ea eona. Esita le nako e sa tsejoeng o e kentse lipelong tsa bona, e le hore le ka mohla moloko oa batho o se ke oa fihlela kutloisiso ea mosebetsi oo Molimo oa ’nete a o entseng ho tloha qalong ho isa qetellong.” (Moeklesia 3:11, NW) Ka sebele, ho kentsoe ka ho tebileng pelong ea motho hore a leke ho fumana se boleloang ke “nako e sa tsejoeng,” ke hore, bosafeleng. Empa na a ka fumana tsebo e joalo le ka mohla?
Tebello ea Bophelo e Hlollang
7, 8. (a) Ke tebello efe ea bophelo e hlollang e larileng ka pel’a moloko oa batho, ’me e ka finyelloa joang? (b) Ke hobane’ng ha re lokela ho thabela hore thuto ea bomolimo e tla tsoela pele ka ho sa feleng?
7 Jesu Kreste ha a rapela Jehova o ile a re: “Sena se bolela bophelo bo sa feleng, ho tsoela pele ba ithuisa tsebo ka uena, Molimo eo e leng eena feela oa ’nete, le ka eo u mo romileng, Jesu Kreste.” (Johanne 17:3) Re ka fumana tsebo e joalo joang? Ho hlokahala hore re ithute Lentsoe la Molimo, Bibele e Halalelang. Ka ho etsa joalo re ka fumana tsebo e nepahetseng ka merero e meholo ea Molimo, ho akarelletsa le tokisetso e entsoeng ka Mora oa hae ea bophelo bo sa feleng lefatšeng la paradeise. Boo e tla ba “bophelo ba sebele” boo ho buuoang ka bona ho 1 Timothea 6:19. Sena se tla ba tumellanong le seo Baefese 3:11 e se hlalosang e le “morero oa ka ho sa feleng oo [Molimo] a ileng a o etsa mabapi le Kreste, Jesu Morena oa rōna.”
8 E, rōna batho ba baetsalibe re ka fumana bophelo bo sa feleng ka thuto ea bomolimo le ka tumelo sehlabelong sa thekollo sa Jesu. Thuto ee e tla tsoela pele halelele hakae? E tla tsoela pele ka ho sa feleng ha moloko oa batho o tsoela pele ho rutoa bohlale ba ’Mōpi oa rōna. Bohlale ba Jehova ha bo na moeli. Moapostola Pauluse ha a hlokomela sena, o ile a khotsa: “O! botebo ba maruo le bohlale le tsebo tsa Molimo! Likahlolo tsa hae ke tse ke keng tsa batlisisoa hakaakang ’me litsela tsa hae ke tse ke keng tsa fuputsoa hakaakang!” (Baroma 11:33) Ka sebele ke ho loketseng hakaakang hore ebe 1 Timothea 1:17 e bitsa Jehova “Morena oa bosafeleng”!
Bohlale ba Jehova Pōpong
9, 10. (a) Ke mesebetsi efe e meholo eo Jehova a ileng a e finyella ha a lokisa lefatše e le mpho ea hae ho moloko oa batho? (b) Bohlale bo fetisisang ba Jehova bo bontšoa joang pōpong ea hae? (Bona lebokose.)
9 Nahana ka lefa le babatsehang leo Morena oa bosafeleng a re fileng lona rōna batho. Pesaleme ea 115:16 ea re bolella: “Ha e le maholimo, ke maholimo a Jehova, ’me lefatše o le neile bana ba batho.” Na ha le nahane hore leo ke letlotlo la bohlokoa le behiloeng tlhokomelong ea rōna? Ka sebele ho joalo! ’Me re ananela haholo hakaakang ponelo-pele e ikhethang ea ’Mōpi oa rōna ka ho lokisetsa lefatše hore e be lehae la rōna!—Pesaleme ea 107:8.
10 Ho bile le tsoelo-pele e babatsehang hakaakang lefatšeng ‘matsatsing’ a tšeletseng a pōpo a Genese khaolo ea 1, moo letsatsi ka leng le neng le le bolelele ba lilemo tse likete. Qetellong lintho tsena tseo Molimo a li bōpileng li ne li tla koahela lefatše lohle ka kobo e talana ea joang, meru e meholo le lipalesa tse mebala-bala. ’Me le ne le tla tlala boieane ba libōpuoa tse fapaneng tsa leoatle, linonyana tse ngata tse ratehang tse fofang le mefuta e mengata e sa tšoaneng ea liphoofolo tse thapileng le tse hlaha, e ’ngoe le e ’ngoe e tsoala ea ‘mofuta oa eona.’ Ka mor’a tlhaloso ea pōpo ea monna le mosali, Genese 1:31 e re: “Molimo oa bona tsohle tseo o li entseng hoba li molemo haholo.” Ke tikoloho e nyakallisang hakaakang e neng e potolohile batho bao ba pele! Na ha re lemohe bohlale, ponelo-pele le tlhokomelo ea ’Mōpi ea lerato linthong tsee tsohle tse bōpiloeng?—Esaia 45:11, 12, 18.
11. Solomone o ile a hōlisa bohlale ba Jehova ba pōpo joang?
11 E mong ea ileng a hlolloa ke bohlale ba Morena oa bosafeleng ke Solomone. O ile a lebisa tlhokomelo bohlaleng ba ’Mōpi khafetsa. (Liproverbia 1:1, 2; 2:1, 6; 3:13-18) Solomone o re tiisetsa hore “lefatše le hlola ka ho sa feleng.” O ne a ananela limakatso tsa pōpo tse ngata, ho akarelletsa le karolo e phethoang ke maru a pula ea ho pholisa lefatše la rōna. Kahoo, o ile a ngola: “Melatsoana eohle ea mariha e phallela leoatleng, athe leoatle ka bolona ha le tlale. Sebaka seo melatsoana ea mariha e phallelang ho sona, ke moo e khutlang e le hore e ka boela ea phalla.” (Moeklesia 1:4, 7, bapisa le NW.) Ho etsahalang ke hore ka mor’a hore lipula le linōka li pholise lefatše, metsi a tsona a fetoha ’muoane maoatleng ’me e e-ba maru hape. Lefatše lee le ka be le le joang, hona rōna re ka be re le hokae, hoja ho hloekisoa ha metsi le ho boela e e-ba pula ho ne ho le sieo?
12, 13. Re ka bontša kananelo joang bakeng sa pōpo ea Molimo?
12 Kananelo ea rōna ka ho leka-lekana ha kamano ea lintho tse phelang le tikoloho ea tsona e tlameha ho tšehetsoa ke ho nka khato joalokaha Morena Solomone a ngotse mantsoeng a qetellang a Moeklesia: “Bofello ba taba tseo kaofela ke jona: Tšaba Molimo, u boloke litaelo tsa oona, hobane, ke eona tšoanelo eohle ea motho; hobane Molimo o sa tla isa mesebetsi eohle kahlolong, le tse patiloeng kaofela, leha e le tse ntle, leha e le tse mpe.” (Moeklesia 12:13, 14) Re lokela ho tšaba ho etsa ntho leha e le efe e sa thabiseng Molimo. Ho e-na le hoo, re lokela ho batla ho mo utloa ka tšabo e nang le tlhompho.
13 Ka sebele re lokela ho batla ho rorisa Morena oa bosafeleng bakeng sa mesebetsi ea hae ea pōpo e ikhethang! Pesaleme ea 104:24 e re: “Jehova, mesebetsi ea hao e mengata hakakang! U e entse kaofela ka bohlale; lefatše le tletse matlotlo a hao.” Ka thabo, ha re tšehetseng temana ea ho qetela ea pesaleme ena ka hore re ipolelle re be re bolelle ba bang re re: “Boka Jehova, moea oa [“soule ea,” NW] ka! Bokang Jehova!”
Pōpo ea Lefatšeng e ka Sehloohong
14. Libōpuoa tsa Molimo tse batho li phahametse liphoofolo haholo ka litsela life?
14 Pōpo eohle ea Jehova ke e tsoileng matsoho. Empa pōpo e tsotehang ka ho fetisisa ea lefatšeng ke rōna—moloko oa batho. Adama, e ntan’o ba Eva, ba ile ba hlahisoa e le tlhōrō ea letsatsi la pōpo la botšelela la Jehova—pōpo e phahametseng litlhapi, linonyana le liphoofolo! Le hoja bongata ba tsona li le bohlale ka tlhaho, moloko oa batho o filoe matla a ho nahana, letsoalo le ka khethollang pakeng tsa se nepahetseng le se fosahetseng, matla a ho lokisetsa bokamoso le takatso ea tlhaho ea borapeli. Lintho tsena tsohle li etsahetse joang? Ho e-na le ho fetoha a e-tsoa liphoofolong tse sa nahaneng, motho o ile a bōptjoa ka setšoantšo sa Molimo. Ka ho loketseng, ke motho feela ea ka bonahatsang litšoaneleho tsa ’Mōpi, ea ileng a itsebahatsa e le “Jehova‚ Jehova‚ Molimo o mohau, o lereko‚ o liehang ho halefa, o tletseng mohau le ’nete.”—Exoda 34:6.
15. Ke hobane’ng ha ka boikokobetso re lokela ho rorisa Jehova?
15 A re roriseng le ho leboha Jehova ka tsela e babatsehang eo ’mele ea rōna e entsoeng ka eona. Mali a phallang tsamaisong ea rōna ea mali, a leng bohlokoa bakeng sa bophelo, a potoloha ’mele metsotsoana e meng le e meng e 60. Joalokaha Deuteronoma 12:23 (NW) e bolela, “mali ke soule”—bophelo ba rōna—a bohlokoa mahlong a Molimo. Masapo a tiileng, mesifa e tenyetsehang le tsamaiso ea methapo e arabelang li tlatselletsoa ke boko bo phahametseng hōle ba phoofolo leha e le efe ’me bo na le matla a ho boloka boitsebiso bo fetang bo ka bolokoang ke k’homputha e lekanang le mohaho o molelele haholo. Na see ha se etse hore u ikutloe u nyenyefetse? Se lokela ho etsa joalo. (Liproverbia 22:4) Hape nahana ka sena: Matšoafo a rōna, qoqotho, leleme, meno le molomo lia sebelisana e le hore motho a ka bua ka puo leha e le efe ho tse likete-kete. Ka ho loketseng Davida o ile a binela Jehova lipina tsa thoriso, a re: “Ke tla u rorisa hobane ka tsela e susumetsang tšabo ke entsoe ka mokhoa o hlollang. Mesebetsi ea hao ea hlolla, joalokaha soule ea ka e hlokomelisisa.” (Pesaleme ea 139:14, NW) Ha re kopaneleng le Davida ka hore ka teboho re rorise Jehova, Moetsi le Molimo oa rōna ea hlollang!
16. Sebini se seng se tummeng se ile sa bina pina efe thorisong ho Jehova, ’me re ka arabela memong efe e susumetsang?
16 Ka hona, mantsoe a pina e telele ea lekholong la bo18 la lilemo ea Joseph Haydn ha e rorisa Jehova e re: “Mo leboheng, lōna kaofela mesebetsi ea Hae e hlollang haholo! Binang bokhabane ba Hae, binang khanya ea Hae, rorisang le be le tlotlise Lebitso la Hae! Thoriso ea Jehova e tsoela pele ka ho sa feleng, Amen, Amen!” Se babatsehang haholoanyane ke lipolelo tse bululetsoeng tse phetoang hangata Lipesalemeng, tse kang memo e entsoeng ka makhetlo a mane Pesalemeng ea bo107, 15, 21, 31: “A ba ke ba lebohe Jehova ka mohau oa hae, le ka mehlolo ea hae ho bana ba batho.” Na u kopanela thorisong eo? U lokela ho kopanela ho eona, hobane ntho e ’ngoe le e ’ngoe eo ka sebele e ratehang e tsoa ho Jehova, Morena oa bosafeleng.
Mesebetsi e Matla Haholoanyane
17. ‘Pina ea Moshe le ea Konyana’ li tlotlisa Jehova joang?
17 Lilemong tse likete tse tšeletseng tse fetileng, Morena oa bosafeleng o qalisitse mesebetsi e meng e matla haholoanyane. Bukeng ea ho qetela ea Bibele, ho Tšenolo 15:3, 4, re bala ka ba leng leholimong ba hlōtseng lira tsa bademona: “Ba bina pina ea Moshe lekhoba la Molimo le pina ea Konyana, ba re: ‘E meholo ’me ea hlolla mesebetsi ea hao, Jehova Molimo, ea Matla ’Ohle. Litsela tsa hao li lokile ’me ke tsa ’nete, Morena oa bosafeleng. Ke mang eo ka sebele a se nang ho u tšaba, Jehova, le ho tlotlisa lebitso la hao, hobane ke uena feela ea tšepahalang ka ho sa sekisetseng? Etsoe lichaba kaofela li tla tla ’me li rapele ka pel’a hao, hobane melao-taelo ea hao e lokileng e bonahalitsoe.’” Ke hobane’ng ha pina ee e bitsoa ‘pina ea Moshe le ea Konyana’? A re boneng.
18. Ke mosebetsi ofe o moholo o ileng oa hopoloa ka pina ho Exoda khaolo ea 15?
18 Lilemong tse ka bang 3 500 tse fetileng, ha lebotho le matla la Faro le ne le timela Leoatleng le Lefubelu, ka thabo Baiseraele ba ile ba rorisa Jehova ka pina. Ho Exoda 15:1, 18 rea bala: “Eaba Moshe le bana ba Iseraele ba binela Jehova thoko ena; ba bina, ba re: Ke tla binela Jehova, hobane o itlotlisitse le ho itlotlisa; pere le mokalli oa eona o li lihetse leoatleng. Jehova o tla rena ka mehla e sa feleng.” Melao-taelo e lokileng ea Morena enoa oa bosafeleng e ile ea bonahala ha a ahlola le ho timetsa lira tse neng li hanyetsa bobusi ba hae.
19, 20. (a) Ke hobane’ng ha Jehova a ile a theha sechaba sa Iseraele? (b) Konyana le ba bang ba arabetse phephetso ea Satane joang?
19 Ke hobane’ng ha sena se ile sa hlokahala? Ke tšimong ea Edene moo Noha e mano e ileng ea lihela batsoali ba rōna ba pele sebeng. Sena se ile sa fella ka ho se phethahale ha boetsalibe ho ileng ha fetisetsoa ho moloko oohle oa batho. Leha ho le joalo, kapele-pele Morena oa bosafeleng o ile a nka khato tumellanong le morero oa hae oa tšimolohong, o neng o tla etsa hore lira tsohle tsa hae li tlosoe lefatšeng le hore maemo a paradeise a tsosolosoe. Morena oa bosafeleng o ile a theha sechaba sa Iseraele ’me a fana ka Molao oa hae ho tšoantšetsa hore na o ne a tla finyella sena joang.—Bagalata 3:24.
20 Leha ho le joalo, qetellong, Baiseraele ba ile ba hloka botšepehi, ’me boemo bona bo soabisang bo ile ba fihla sehlohlolong ha baeta-pele ba bona ba nehelana ka Mora oa Molimo ea tsoetsoeng a ’notši ho Baroma hore a hlokofatsoe ka sehlōhō le ho bolaoa. (Liketso 10:39; Bafilippi 2:8) Leha ho le joalo, ho tšepahala ha Jesu ho fihlela lefung, e le “Konyana ea Molimo” ea sehlabelo ho ile ha shanofatsa ka ho ikhethang phephetso e ileng ea etsoa ke Sera sa Molimo sa boholo-holo, Satane—ea hore lefatšeng ha ho motho ea ka lulang a tšepahala ho Molimo ha a le tlas’a teko e matla. (Johanne 1:29, 36; Jobo 1:9-12; 27:5) Le hoja ba futsitse ho se phethahale ho Adama, batho ba bang ba limilione ba tšabang Molimo ba latetse mehato ea maoto a Jesu ka ho boloka botšepehi ho sa tsotellehe litlhaselo tsa bosatane.—1 Petrose 1:18, 19; 2:19, 21.
21. Tumellanong le Liketso 17:29-31, ho tla hlahlojoa eng nakong e tlang?
21 Joale letsatsi la hore Jehova a putse batho bao ba tšepahalang le ho ahlola lira tsohle tsa ’nete le ho loka, le fihlile. (Liketso 17:29-31) Le tla tla joang? Sehlooho sa rōna se latelang se tla bolela.
Lebokose la Tlhahlobo
◻ Ke hobane’ng ha ka nepo Jehova a bitsoa “Morena oa bosafeleng”?
◻ Bohlale ba Jehova bo bontšoa joang pōpong ea hae?
◻ Moloko oa batho ke mosebetsi oa pōpo o tsoileng matsoho ka litsela life?
◻ Ke mesebetsi efe e lokelang ‘pina ea Moshe le ea Konyana’?
[Lebokose le leqepheng la 12]
BOHLALE BA JEHOVA BO FETISISANG
Bohlale ba Morena oa bosafeleng bo bontšoa ka litsela tse ngata haholo mesebetsing ea hae ea lefatšeng. Hlokomela mantsoe a Agure: “Mantsoe ’ohle a Molimo a hloekile; ke thebe ho ba o tšepang.” (Liproverbia 30:5) Eaba Agure o bua ka pōpo ea Molimo linthong tse ngata tse phelang, tse khōlō le tse nyenyane. Ka mohlala, temaneng ea 24 ho isa ho ea 28, o hlalosa ‘lintho tse ’nè tse nyenyane, empa li le [bohlale ba tlhaho, NW].’ Ke bohloa, pela, tsie le mokholutsoane.
“Bohlale ba tlhaho”—e, liphoofolo li entsoe ka tsela eo. Ha li nahane joaloka batho empa li itšetlehile ka bohlale ba tlhaho. Na u kile ua hlolloa ke see? Ke pōpo e hlophisehileng hakaakang! Ka mohlala, bohloa bo itlhophisitse ka lihlopha, tse akarelletsang mofumahali, basebetsi ba maqhalaha le bo botona. Mefuteng e meng, bohloa ba basebetsi bo bile bo khannela hoaba ho kena ka mekotjaneng eo bo e ahileng. Mona bo hama hoaba ena ha bohloa ba masole bo leleka lira leha e le life tse hlaselang. Ho fanoa ka keletso ho Liproverbia 6:6: “Hela sekhoba! e-ea ho bohloa, u qamake mekhoa ea bona, u tle u hlalefe.” Na mehlala e joalo ha ea lokela ho re susumelletsa ho ‘etsa ho hongata mosebetsing oa Morena’?—1 Bakorinthe 15:58.
Motho o hahile lifofane tse khōlōhali. Empa linonyana li fofela holimo le tlaase habonolo haholoanyane, ho akarelletsa le nonyana ea mofuta oa lefokotsane e boima ba ligrama tse ka tlaase ho 30! Sefofane sa Boeing 747 se tlameha ho tšela lilithara tsa peterole tse 180 000, se khannoe ke basebetsi ba koetlisitsoeng le ho sebelisa thepa ea ho fofisa e ka se nolofaletsang ho tšela leoatle. Empa, nonyana e nyenyane ea mofuta oa lefokotsane e itšetlehile feela ka grama e le ’ngoe ea mafura hore e khone ho fofa ho tloha Amerika Leboea, ho tšela Kou ea Mexico, ho ea Amerika Boroa. Ha e hloke mojaro o boima oa peterole, ho koetlisetsoa ho fofa, lichate tse rarahaneng kapa lik’homputha! Na matla aa a hlahile ketsahalong ea tšohanyetso ea ho iphetola ha lintho? Le hanyenyane! Nonyana ena e nyenyane e na le bohlale ba tlhaho bo kentsoeng hore bo sebetse ka tsela eo ke ’Mōpi oa eona, Jehova Molimo.
[Setšoantšo se leqepheng la 10]
Pōpo ea mefuta-futa ea “Morena oa bosafeleng” e tlotlisa khanya ea hae
[Setšoantšo se leqepheng la 15]
Joalokaha Moshe le Baiseraele bohle ba ile ba keteka tlhōlo ea Jehova Leoatleng le Lefubelu, ho tla ba le thabo e khōlō ka mor’a Armagedone