Ithabeleng Tšepong ea ’Muso!

“Ithabeleng tšepong. Mamellang mahlomoleng.”—BA-ROMA 12:12, NW.

 1. Ke hobane’ng ha re ka fumana thabo ka ho ba le kamano ea botsoalle le Jehova, ’me moapostola Pauluse o ile a phehella Bakreste ho etsa eng?

“MOLIMO o thabileng.” (1 Timothea 1:11, NW) Mantsoe aa a hlalosa Jehova hantle hakaakang! Hobane’ng? Hobane mesebetsi ea hae kaofela e mo thabisa haholo. Kaha Jehova ke eena Mohloli oa lintho tsohle tse molemo le tse thabisang, libōpuoa tsa hae tsohle tse bohlale li ka fumana thabo ka ho ba le kamano e nang le botsoalle le eena. Ka ho loketseng, moapostola Pauluse o ile a phehella Bakreste ho ananela tokelo ea bona e thabisang ea ho tseba Jehova Molimo, ho bontša teboho bakeng sa lintho tsohle tse hlollang tseo A faneng ka tsona tsa pōpo, le ho thabela mosa o lerato oo A ba bontšang oona. Pauluse o ngotse: “Ithabeleng Moreneng ka mehla; ke boela ke rialo, ke re: Ithabeleng.”—Ba-Filippi 4:4; Pesaleme ea 104:31.

 2. Ke tšepo ea mofuta ofe e tlisang thabo e khōlō, ’me Bakreste ba khothalletsoa ho etsa eng mabapi le tšepo ee?

² Na Bakreste ba utloa khothatso ee eo Pauluse a faneng ka eona? Ka sebele ho joalo! Baena ba moea ba Jesu Kreste ba ithabela tšepong e khanyang eo Molimo o ba fileng eona. (Ba-Roma 8:19-21; Ba-Filippi 3:20, 21) E, baa tseba hore ba tla kopanela ho phethahatsoeng ha tšepo e khōlō molemong oa bokamoso ba batho, ba phelang le ba shoeleng, ka ho sebeletsa hammoho le Kreste pusong ea hae ea ’Muso oa leholimo. Ak’u inahanele feela hore ba tla thabela litokelo tsa bona hakaakang tsa ho ba majalefa hammoho le eena, a sebeletsang joaloka marena le baprista! (Tšenolo 20:6) Ba tla thaba hakaakang ha ba thusa batho ba tšepahalang ho finyella phetheho le ho thusa ka ho etella pele ho khutlisetsoeng ha Paradeise lefatšeng la rōna! Kannete, bahlanka bohle ba Molimo ba na le “tšepo ea bophelo bo sa feleng, boo Molimo o sa thetseng o bo baletseng batho, lefatše ha le ne le e-so ho be teng.” (Tite 1:2) Ka baka la tšepo ena e hlollang, moapostola Pauluse o khothatsa Bakreste bohle: “Ithabeleng tšepong.”—Ba-Roma 12:12, NW.a

Thabo ea ’Nete—Ke Tšoaneleho ea Pelo

3, 4. (a) Lentsoe “ho thaba” le bolela eng, ’me Bakreste ba lokela ho thaba hangata hakae? (b) Thabo ea ’nete ke eng, ’me e itšetlehile ka eng?

³ “Ho thaba” ho bolela ho ba le boikutlo ba thabo le ho e bonahatsa; ha ho bolele ho ba boemong bo sa fetoheng ba ho ba motlōtlō, kapa ho khotsofala. Maetsi a tšoanang le mantsoe a Seheberu le Segerike a sebelisitsoeng ka Bibeleng bakeng sa “thabo,” “thabo e khaphatsehang,” le “nyakallo” a hlalosa boikutlo bo ka hare le ponahatso e ka ntle ea thabo. Bakreste ba khothalletsoa sena, “tsoelang pele le thabile,” “thabang ka mehla.”—2 Ba-Korinthe 13:11, NW; 1 Ba-Thessalonika 5:16.

⁴ Empa ke joang motho a ka lulang a thabile ka mehla? Sena se ka etsahala hobane thabo ea ’nete ke tšoaneleho ea pelo, ke tšoaneleho e ka hare e tebileng, ea moea. (Deuteronoma 28:47; Liproverbia 15:13; 17:22) Ke tholoana ea moea oa Molimo, eo Pauluse a e thathamisitseng hang-hang ka mor’a lerato. (Ba-Galata 5:22) Joaloka tšoaneleho e ka hare, ha ea itšetleha ka lintho tse ka ntle, leha e le hona hore e itšetlehile ka baena ba rōna. Empa e itšetlehile ka moea o halalelang oa Molimo. ’Me e hlahisoa ke khotsofalo e tebileng e ka hare ea ho tseba hore u na le ’nete, tšepo ea ’Muso, le hore u etsa se khahlisang Jehova. Ka hona, thabo hase tšobotsi ea botho feela tjee eo re tsoaloang re e-na le eona; ke karolo ea “botho bo bocha,” e leng pokello ea litšoaneleho tse neng li khetholla Jesu Kreste.—Ba-Efese 4:24, NW; Ba-Kolosse 3:10, NW.

 5. Ke neng hona joang ho ka bang le lipontšo tse ka ntle tsa thabo?

⁵ Le hoja thabo e le tšoaneleho ea pelo, ho ntse ho le joalo ka linako tse ling e ka bonahatsoa ka ponahalo ea ka ntle. Lipontšo tsee tsa thabo tse ka ntle tse hlahang ka linako tse ling ke life? E ka ba eng kapa eng, ebang ke ho ela ha sefahleho kapa ho tlōla ke thabo. (1 Marena 1:40; Luka 1:44; Liketso 3:8; 6:15) Ka hona, na see se bolela hore batho ba sa bueng haholo kapa ba sa atiseng ho bososela ha ba na thabo? Che! Thabo ea ’nete ha e iponahatse ka ho bua mocha-o-chele, ho tšeha, ho bososela, kapa ho betla meno. Maemo ke ’ona a etsang hore thabo e iponahatse ka litsela tse sa tšoaneng. Hase thabo feela e etsang hore re be le botsoalle ha re le Holong ea ’Muso empa, ho fapana le hoo, ke kameho ea rōna e mofuthu ea boena le lerato.

 6. Ke hobane’ng ha Bakreste ba ka thaba ka linako tsohle esita le ha ba hlaheloa ke maemo a sa thabiseng?

⁶ Tšobotsi e sa fetoheng ea thabo ke ho ba teng ha eona ho ka hare le ho sa feleng joaloka tšobotsi e tiileng ea botho bo bocha ba Mokreste. Sena ke sona se nolofalletsang motho ho lula a thabile ka linako tsohle. Ke ’nete hore ka linako tse ling re ka ’na ra tšoenngoa ke ntho e itseng, kapa mohlomong re ka ’na ra hlaheloa ke maemo a sa thabiseng. Empa re ntse re ka ba le thabo ka lipelong tsa rōna. Bakreste ba bang ba pele e ne e le makhoba, a nang le benghali bao ho leng thata ho ba khotsofatsa. Na Bakreste ba joalo ba ne ba ka lula ba ntse ba thabile? E, ka baka la tšepo ea bona ea ’Muso le thabo e ka lipelong tsa bona.—Johanne 15:11; 16:24; 17:13.

 7. (a) Jesu o itse’ng ka ho ba le thabo mahlomoleng? (b) Ke eng se re thusang ho mamella mahlomoleng, ’me ke mang ea behileng mohlala o motle ka ho fetisisa tabeng ee?

⁷ Hoba moapostola Pauluse a re: “Ithabeleng tšepong,” o ile a phaella: “Mamellang mahlomoleng.” (Ba-Roma 12:12, NW) Jesu le eena o buile ka ho ba le thabo mahlomoleng ha a re ho Mattheu 5:11, 12: “Le thabile ha batho ba le nyefola ’me ba le hlorisa . . . Thabang ’me le tlōle ke thabo, kaha moputso oa lōna o moholo maholimong.” Ha ho hlokahale hore ho thaba le ho tlōla ke thabo ho boleloang mona e be pontšo e ka ntle le e bonahalang; haholo-holo ke khotsofalo e ka hare e tebileng eo motho a bang le eona ea ho khahlisa Jehova le Jesu Kreste ka ho ema a tiile tlas’a teko. (Liketso 5:41) Ha e le hantle, thabo ke eona e re thusang ho mamella ha re le mahlomoleng. (1 Ba-Thessalonika 1:6) Tabeng ena, Jesu o behile mohlala o motle ka ho fetisisa. Mangolo aa re bolella: ‘O ile a mamella thupa ea tlhokofatso ka baka la thabo e neng e behiloe ka pel’a hae.’—Ba-Heberu 12:2, NW.

Ho Ithabela Tšepong ho sa Tsotellehe Mathata

 8. Bakreste ba ka ’na ba talimana le mathata afe, empa ke hobane’ng ha mathata a sa amohe Mokreste thabo?

⁸ Ho ba mohlanka oa Jehova ha ho sireletse motho mathateng. Ho ka ’na ha hlaha mathata ka lapeng, mathata a lichelete, ho fokolloa ke bophelo, kapa lefu la batho ba ratoang. Le hoja lintho tse joalo li utloisa bohloko, ha li re amohe motheo oa ho ithabela tšepong ea ’Muso, e leng thabo e ka hare eo re nang le eona lipelong tsa rōna.—1 Ba-Thessalonika 4:13.

 9. Abrahama o ne a e-na le mathata a mofuta ofe, ’me re tseba joang hore o ne a e-na le thabo pelong ea hae?

⁹ Ka mohlala, nahana ka Abrahama. Hase ka mehla bophelo bo neng bo le monate ho eena. O ne a e-na le mathata ka lapeng. Serethe sa hae, Agare, le mosali oa hae, Sara, ba ne ba sa kapelane mathe. Ba ne ba betsana ka mantsoe. (Genese 16:4, 5) Ishmaele o ne a soma Isaaka a bile a mo hlorisa. (Genese 21:8, 9; Ba-Galata 4:29) Qetellong, mosali oa Abrahama ea ratehang, Sara, o ile a shoa. (Genese 23:2) Ho sa tsotellehe mathata ana, o ile a ithabela tšepong ea Peō ea ’Muso, Peō ea Abrahama, eo malapa ’ohle a lefatše a neng a tla itlhohonolofatsa ka eona. (Genese 22:15-18) A tletse thabo pelong, o ile a mamella tšebeletsong ea Jehova ka lilemo tse lekholo ka mor’a ho tloha motseng oa habo oa Ure. Ka hona, ho ngotsoe sena ka eena: “O ne a lebelletse motse o nang le metheo ea sebele, motse oo seahi le moetsi oa oona e leng Molimo.” Ka baka la tumelo ea Abrahama ho tleng ha ’Muso oa Bomessia, Morena Jesu, ha Molimo o se o mo khethile hore e be Morena, o ne a ka re: “Abrahama . . . o nyakalletse ho bona letsatsi la ka, ’me o le bone, a ba a thaba.”—Ba-Heberu 11:10, NW; Johanne 8:56.

10, 11. (a) Joaloka Bakreste, re loana ntoa ea mofuta ofe, ’me re pholosoa joang ho eona? (b) Ke eng se re tšehetsang ha re hlōleha ho loana ka ho phethahetseng ntoa e khahlanong le nama ea rōna ea boetsalibe?

¹⁰ Joaloka batho ba sa phethahalang, re boetse re lokela ho loantša nama ea rōna ea boetsalibe, ’me ntoa ena ea ho etsa se nepahetseng e ka ba e tšoenyang haholo. Leha ho le joalo, ntoa ea rōna khahlanong le mefokolo ea rōna ha e bolele hore ha re na tšepo. Pauluse o ile a ikutloa e le motho ea soto ka baka la ntoa ena, ’me o ile a re: “Ke mang ea tla nkholla ’meleng ona oa lefu? Ke leboha Molimo ka Jesu Kreste, Morena oa rōna!” (Ba-Roma 7:24, 25) Re lopolloa ka Jesu Kreste le ka thekollo eo a faneng ka eona.—Ba-Roma 5:19-21.

¹¹ Sehlabelo sa thekollo sa Kreste sea re tšehetsa ha re hlōleha ho loana ntoa ka ho phethahetseng. Re ka ithabela thekollong ena hobane e etsa hore re fumane letsoalo le hloekisitsoeng le tšoarelo ea libe. Ho Ba-Heberu 9:14, Pauluse o bua ka “mali a Kreste” a nang le matla a ho ‘hlatsoa matsoalo a rōna mesebetsing e shoeleng.’ Ka hona, ha ho hlokahale hore letsoalo la Bakreste le sithabetsoe ke ho ikahlola le letsoalo le molato. Sena, hammoho le tšepo eo re nang le eona, se re neha matla a maholo a ho nyakalla ke thabo. (Pesaleme ea 103:8-14; Ba-Roma 8:1, 2, 32) Ha re nahanisisa ka tšepo ea rōna, kaofela ha rōna re tla khothatsoa hore re loane ntoa ka katleho.

Ho Hopola Tšepo ea Rōna ka Mehla

12. Bakreste ba tlotsitsoeng ba ka nahanisisa ka tšepo efe?

¹² Ke habohlokoa hore masala a tlotsitsoeng ka moea le linku tse ling a ’ne a hopole ‘tšepo ea ’ona ea poloko,’ ka linako tsohle a e roale joaloka heleme e sireletsang. (1 Ba-Thessalonika 5:8) Bakreste ba tlotsitsoeng ba ka nahanisisa ka tokelo e hlollang ea ho fumana bophelo ba ho se shoe leholimong, ho khona ho bona Jehova Molimo, le ho thabela botsoalle bo haufi-ufi le Jesu Kreste ea tlotlisitsoeng le baapostola le ba bang kaofela ho ba 144 000, ba ’nileng ba boloka botšepehi ba bona ho theosa le makholo a lilemo. Leo ke letlotlo le leholo hakaakang la botsoalle bo ke keng ba hlalosoa!

13. Batlotsuoa ba ntseng ba le lefatšeng ba ikutloa joang ka tšepo ea bona?

¹³ Batlotsuoa ba seng bakae ba sa ntsaneng ba le lefatšeng ba ikutloa joang ka tšepo ea bona ea ’Muso? Sena se ka akaretsoa ka mantsoe a F. W. Franz, mopresidente oa Mokhatlo oa Watch Tower, ea ileng a kolobetsoa ka 1913: “Tšepo ea rōna ke ntho ea sebele, ’me e tla phethahatsoa ka botlalo ho e mong le e mong oa ho qetela oa litho tse 144 000 tsa mohlatsoana ka tekanyo eo re sitoang ho e nahana. Rōna ba masala ba neng ba le teng selemong sa 1914, ha re ne re lebelletse hore kaofela ha rōna re tla ea leholimong, ha rea lahleheloa ke bohlokoa ba tšepo eo. Empa re sa ntse re le matla ho eona joaloka pele, ’me re e ananela haholoanyane ha re lokela ho e emela haleletsana. Ke ntho eo re lokelang ho e emela, le haeba e ka hloka hore re eme lilemo tse millione. Ke nka tšepo ea rōna e le ea bohlokoa haholo ho feta leha e le neng pele, ’me ha ho mohla ke batlang ho lahleheloa ke kananelo ea ka bakeng sa eona. Tšepo ea mohlatsoana e boetse e fana ka tiiso ea hore joang kapa joang tebello ea bongata bo boholo ba batho ba linku tse ling e tla phethahatsoa ho feta kamoo re ka nahanang ka teng. Ke ka hona re tiiselitseng ho tla fihlela hona joale, ’me re tla ’ne re tiisetse ho fihlela ha Molimo o ipakile ka sebele hore o tšepahalla ‘litšepiso tsa oona tsa bohlokoa le tse hlollang.’”—2 Petrose 1:4; Numere 23:19; Ba-Roma 5:5.

Ho Ithabela Tšepong ea Paradeise Hona Joale

14. Bongata bo boholo ba batho bo lokela ho hopola tšepo efe?

¹⁴ Pontšo e joalo ea tumelo e tletseng nyakallo e fana ka mabaka a maholo a ho thaba ho batho ba bongata bo boholo ba linku tse ling. (Tšenolo 7:15, 16) Ho hlokahala hore ba lule ba hopotse tšepo ea ho phonyoha Harmagedone. E, ba lebelle ho bona ha ’Muso oa Molimo o tlotlisa bobusi ba bokahohle ba Jehova Molimo ’me o halaletsa lebitso la hae le khanyang ka ho tlisa mahlomola a maholo, a tlang ho hloekisa lefatše ka ho tlosa ba khopo bao Diabolose e ’nileng ea e-ba molimo oa bona. E tla ba thabo e kaakang ho phonyoha mahlomola ao a maholo!—Daniele 2:44; Tšenolo 7:14.

15. (a) Jesu o ile a etsa mosebetsi ofe oa ho phekola ha a sa le lefatšeng, hona hobane’ng? (b) Baphonyohi ba Harmagedone ba tla ba le litlhoko life ’meleng, ’me ke hobane’ng ha ba fapane le ba tsosoang?

¹⁵ Mabapi le batho ba bongata bo boholo, Tšenolo 7:17 e re: “Konyana . . . e tla ba alosa, ’me e tla ba isa lilibeng tsa metsi a bophelo; ’me Molimo o tla hlakola meokho eohle mahlong a bona.” Le hoja hona joale boprofeta bona bo phethahala ka tsela ea moea, baphonyohi ba Harmagedone ba tla bo bona ha bo phethahala ka tsela ea sebele. Joang? Jesu o ile a etsa eng ha a sa le lefatšeng? O ile a phekola ba holofetseng, a etsa hore liqhoala li tsamaee, a thibolla litsebe tsa ba thibaneng litsebe ’me a tutubolla lifofu mahlo, ’me o ile a phekola lepera, kholofalo ea litho, le “maloetse ’ohle le mefokolo eohle.” (Mattheu 9:35; 15:30, 31) Na hase sona seo Bakreste ba se hlokang kajeno? Bongata bo boholo ba batho bo tla fetela lefatšeng le lecha bo na le maloetse le mefokolo ea lefatše la khale. Re lebelletse hore Konyana e etse eng ka hoo? Litlhoko tsa baphonyohi ba Harmagedone li tla fapana haholo le litlhoko tsa ba tlang ho tsosoa. Mohlomong ba tsositsoeng ba tla tsosoa ba na le ’mele e felletseng, e phetseng hantle, le hoja e tla be e ntse e e-s’o fumane phetheho ea botho. Ka baka la mohlolo oa tsoho, ka ho hlakileng ka mor’a moo ho ke ke ha hlokahala hore ba folisoe maloetse leha e le afe a nako e fetileng ka phekolo ea mohlolo. Ka lehlakoreng le leng, ka baka la phihlelo ea bona e ikhethang ea ho phonyoha Harmagedone, phekolo ea mohlolo ke seo ba bangata ho bongata bo boholo ba tla se hloka le seo ba tla se fumana. Kamoo ho bonahalang ka teng, morero o ka sehloohong oa liphekolo tseo Jesu a ileng a li etsa e ne e le bakeng sa ho khothatsa bongata bo boholo ba batho le ho bo bontša tebello e thabisang ea hore hase feela hore bo tla phonyoha empa ka mor’a moo bo tla phekoloa.

16. (a) Ho phekoloa ha mohlolo ha baphonyohi ba Harmagedone ho tla etsahala neng, ’me phello e tla ba efe? (b) Re tla tsoela pele ho ithabela tšepong efe nakong ea Lilemo tse Sekete?

¹⁶ Ka ho utloahalang, phekolo e joalo ea mohlolo e tla etsahala har’a baphonyohi ba Harmagedone hoo e ka bang kapele ka mor’a Harmagedone le pele tsoho e qala. (Esaia 33:24; 35:5, 6; Tšenolo 21:4; bapisa le Mareka 5:25-29.) Nakong eo batho ba tla lahla likhalase tsa bona tsa mahlo, mare, liikokotlelo, litulo tsa liqhoala, meno a maiketsetso, lithuso tsa ho utloa, le tse ling tse tšoanang le tsona. Leo ke lebaka le leholo hakaakang la ho thaba! Ketso e joalo eo Jesu a e entseng pele ea tsosoloso e lumellana hantle hakaakang le mosebetsi oa baphonyohi ba Harmagedone joaloka motheo oa lefatše le lecha! Maloetse a qhoalisang a tla felisoa e le hore baphonyohi bana ba ka tsoela pele ba nyakalletse, ba lebelletse ka cheseho mosebetsi o hlollang o tla etsoa Lilemong tse Sekete tse larileng ka pel’a bona, ba sa utloisoe bohloko ke mahloriso a fetelletseng ao lefatše la khale le ka ’nang la ba tlisetsa ’ona. ’Me nakong eohle ea Lilemo tse Sekete, ba tla ithabela tšepong ea ho finyella bophelo bo phethahetseng ba botho ka ho felletseng bofelong ba lilemo tsena tse sekete.

17. Ho tla ba le thabo ea mofuta ofe ha mosebetsi oa ho tsosolosa Paradeise o ntse o tsoela pele?

¹⁷ Haeba ke sona seo u se tšepileng, hape nahana ka thabo ea ho kopanela ho khutlisetsoeng ha Paradeise lefatšeng. (Luka 23:42, 43, NW) Ntle ho pelaelo baphonyohi ba Harmagedone ba tla thusa ka ho hloekisa lefatše ’me ba tla etsa hore ho be le libaka tse ntle tseo bafu ba tla tsosetsoa ho tsona. Litšebeletso tsa lepato li tla nkeloa sebaka ke mananeo a ho amohela ba tsositsoeng, ho akarelletsa le baratuoa ba rōna ba shoeleng. ’Me ak’u nahane ka ho thabela botsoalle bo enneng le banna le basali ba tšepahalang ba phetseng makholong a fetileng a lilemo. Ke mang eo u batlang ho bua le eena ka ho khetheha? Na ke Abele, Henoke, Noe, Jobo, Abrahama, Sara, Isaaka, Jakobo, Josefa, Moshe, Joshua, Rahaba, Debora, Samsone, Davida, Elia, Elisha, Jeremia, Ezekiele, Daniele, kapa Johanne Mokolobetsi? Ka hona, tebello ena e thabisang le eona ke karolo ea tšepo ea hao. U tla khona ho buisana le bona, ho ithuta lintho tse itseng ho bona, le ho sebetsa hammoho le bona ho etseng hore lefatše lohle e be paradeise.

18. Re ka nahanisisa ka thabo efe e eketsehileng?

¹⁸ Hape, nahana ka lijo tse monate, metsi a hloekileng, le moea o hloekileng, hammoho le lefatše la rōna le khutliselitsoeng boemong ba lona bo phethahetseng le bo leka-lekaneng pakeng tsa lintho tse phelang le tikoloho ho latela tsela eo Jehova a neng a le bōpile ka eona. Ka nako eo, bophelo e ke ke ea e-ba feela ho thabela phetheho ea motsotsoana, empa e tla ba ho kopanela mesebetsing e thabisang ka mafolo-folo le ka tsela e nang le morero. Nahana ka mokhatlo o lefatšeng ka bophara oa batho ba phelang moo ho se nang tlōlo ea molao, boikhohomoso, mōna, liqhoebeshano—boena boo ho bona batho bohle ba hlaolelang litholoana tsa moea le ho li hlahisa. Ke ho hlasimollang hakaakang!—Ba-Galata 5:22, 23.

Tšepo e Etsang Hore Bophelo bo be le Morero

19. (a) Thabo e boletsoeng ho Ba-Roma 12:12, (NW) e tla fumanoa neng? (b) Ke hobane’ng ha re lokela ho ikemisetsa ho se lumelle likhatello tsa bophelo ho suthisetsa tšepo ea rōna ka thōko?

¹⁹ Tebello ha e phethahalitsoe ha e sa le tšepo, ka hona ho thaba hoo Pauluse a ho khothalletsang ho Ba-Roma 12:12, (NW) ho lokela ho fumanoa hona joale. (Ba-Roma 8:24) Ho nahana feela ka mahlohonolo a nako e tlang ao ’Muso oa Molimo o tla a tlisa ke hona ho etsang hore re ithabele tšepong eo hona joale. Kahoo ikemisetse hore u se ke ua lumella likhatello tsa bophelo lefatšeng lena le hlephileng boitšoarong li suthisetse tšepo ea hao e khanyang ka thōko. U se ke ua tepella le ho nyahama, ua lebala tšepo e larileng ka pele. (Ba-Heberu 12:3) Ho tlohela tsela ea Bokreste ho ke ke ha rarolla mathata a hao. Hopola, haeba motho ea itseng a khaotsa ho sebeletsa Molimo ka baka la likhatello tsohle tse teng bophelong hona joale, likhatello tseo li tla ’ne li mo maname, empa o lahleheloa ke tšepo ’me o lahleheloa ke monyetla oa ho ithabela litebellong tse hlollang tse larileng ka pele.

20. Tšepo ea ’Muso e ba le phello efe ho ba e amohelang, hona hobane’ng?

²⁰ Batho ba Jehova ba na le mabaka ’ohle a hore ba phele bophelo bo thabileng. Tšepo ea bona e khanyang, e thabisang e etsa hore bophelo bo be le morero. ’Me ha ba ipolokele tšepo ena e thabisang. Che, ba chesehela ho e arolelana le ba bang. (2 Ba-Korinthe 3:12) Ka hona ba amohelang tšepo ea ’Muso ke batho ba kholisehileng, ’me ba batla ho khothatsa ba bang ka ho ba bolella litaba tse molemo tse tsoang ho Molimo. Sena se tlatsa bophelo ba batho ba amohelang molaetsa ka tšepo e hlollang ka ho fetisisa e kileng ea nehoa batho ka kakaretso—tšepo ea ’Muso o tlang ho khutlisetsa Paradeise lefatšeng. Haeba batho ba sa o amohele, re tla ’ne re tsoele pele re thabile hobane re na le tšepo. Ba sa mameleng ke bona ba lahleheloang; rōna ha re lahleheloe ke letho.—2 Ba-Korinthe 4:3, 4.

21. Ke eng e seng e atametse, ’me re lokela ho nka tšepo ea rōna ka tsela efe?

²¹ Tšepiso ea Molimo ke ena: “Bonang, ntho tsohle ke li etsa tse ncha.” (Tšenolo 21:5) Lefatše le lecha hammoho le mahlohonolo ’ohle a lona a thabisang le a ka ho sa feleng le haufi. Tšepo ea rōna—ea ho fumana bophelo leholimong kapa lefatšeng la paradeise—ke ea bohlokoa; e khomarele. Mehleng ena ea qetello e mahlonoko, ho feta leha e le neng pele, e talime joaloka “ankora ea moea [“sephefumolohi,” NW], e tieang, e sa sisinyeheng.” Kaha tšepo ea rōna e itšetlehile ka Jehova, “lefika la ka ho sa feleng—Lefika la ka mehla,” ruri re na le lebaka le matla le le thabisang hona joale la ho ‘ithabela tšepong’ e behiloeng ka pel’a rōna.—Ba-Heberu 6:19; Esaia 26:4, The Amplified Bible.

[Mongolo o botlaaseng ba leqephe]

Lipotso tsa Tlhahlobo

◻ Tšepo e khōlō ea batho ke efe?

◻ Thabo ea ’nete ke eng?

◻ Ho phekoloa ha baphonyohi ba Harmagedone ka mohlolo ho ka ’na ha etsahala neng?

◻ Ke hobane’ng ha re sa lokela ho lumella likhatello tsa bophelo ho suthisetsa tšepo ea rōna ka thōko?

◻ Ke thabo efe eo u lebelletseng ho e latsoa lefatšeng le lecha?

[Setšoantšo se leqepheng la 9]

Na pelo ea hao e ne e ke ke ea tlala thabo ha u bona bopaki ba liphekolo tseo Jesu a li entseng?

[Setšoantšo se leqepheng la 10]

Ba ithabelang ’Musong ba khothatsa ba bang ka ho arolelana le bona tšepo eo ba nang le eona