Lipotso tse Tsoang ho Babali

Ba-Heberu 9:16, (“NW”) e re mothehi oa selekane o tlameha ho shoa e le hore selekane se sebetse. Empa Molimo o entse selekane se secha, ’me ha oa ka oa shoa. Kahoo re ka utloisisa temana ee ka tsela efe?

Ho Ba-Heberu 9:15-17, (NW) rea bala: “Ke kahoo eena [Kreste] e leng ’muelli oa selekane se secha, e le hore, ka baka la lefu le ileng la hlaha bakeng sa topollo ea bona ea thekollo litlōlong tlas’a selekane sa pele, ba bitsitsoeng ba ka fumanang tšepiso ea lefa le sa feleng. Hobane moo ho nang le selekane, lefu la [motho] ea entseng selekane le lokela ho hlaha. Hobane selekane se sebetsa ha moetsi oa sona a shoele, kaha ha se sebetse ka nako leha e le efe eo ka eona moetsi oa sona [oa motho] a ntseng a phela.”a

Ha e le hantle Jehova ke eena Moetsi oa selekane se secha. Ho Jeremia 31:31-34, Molimo o ile oa bolela ka ho toba e sa le pele hore oona ka booona o ne o tla etsa selekane se secha le sechaba sa oona. Moapostola Pauluse o qotsa lengolo lena ho Ba-Heberu 8:8-13, e leng se bontšang hore Pauluse o ne a utloisisa hore ke Molimo o thehileng selekane sena sa bomolimo.

Leha ho le joalo, ho Ba-Heberu khaolo 9, Pauluse o ile a tsoela pele ho bua ka likarolo tse fapa-fapaneng tseo Jesu a ileng a li phetha mabapi le selekane se secha. Kreste o ile a tla e le Moprista e Moholo oa selekane sena. Ka lehlakoreng le leng, Jesu e ne e le sehlabelo sa selekane se secha; ke “mali a Kreste” feela a tla “hloekisa matsoalo a rōna mesebetsing e shoeleng.” Kreste e ne e boetse e le ’Muelli oa selekane sena, joalokaha Moshe e ne e le ’muelli oa selekane sa Molao.—Ba-Heberu 9:11-15, NW.

Pauluse o ile a bolela hore lefu lea hlokahala e le hore lilekane tse entsoeng pakeng tsa Molimo le batho li ka sebetsa. Selekane sa Molao ke mohlala. Moshe e ne e le ’muelli oa sona, eena ea ileng a etsa hore tumellano ena e pakeng tsa Molimo le Iseraele oa tlhaho e be teng. Kahoo Moshe o ile a phetha karolo ea bohlokoa ’me e ne e le eena motho ea ileng a sebetsana le taba ea hore Baiseraele ba kene selekaneng sena. Kahoo Moshe o ne a ka talingoa e le moetsi oa motho oa selekane sa Molao seo Jehova e leng eena ea se thehileng. Empa na mali a bophelo ba Moshe a ile a tlameha ho tšolloa bakeng sa hore selekane sa Molao se sebetse? Che. Ho e-na le hoo ho ile ha nehelanoa ka liphoofolo, mali a tsona a ne a emela mali a Moshe.—Ba-Heberu 9:18-22.

Ho thoe’ng ka selekane se secha pakeng tsa Jehova le sechaba sa Iseraele oa moea? Jesu Kreste o ne a e-na le karolo e khanyang ea ho ba mokena-lipakeng, ’Muelli pakeng tsa Jehova le Iseraele oa moea. Le hoja Jehova a ile a theha selekane sena, se likoloha ho Jesu Kreste. Ka ntle le ho ba ’Muelli oa sona, ha a ne a le nameng Jesu o bile le litšebelisano tse tobileng le bao e neng e tla ba ba pele ba ho nkeloa selekaneng sena. (Luka 22:20, 28, 29) Ho feta moo, o ne a tšoaneleha ho fana ka sehlabelo se hlokahalang se ka etsang hore selekane sena se sebetse. Sehlabelo sena e ne e se sa liphoofolo feela tjee empa e ne e le sa bophelo bo phethahetseng ba motho. Kahoo Pauluse o ne a ka bolela hore Kreste ke moetsi oa selekane se secha. Ka mor’a hore “Kreste [a] . . . kene leholimong la sebele, a tle a hlahe joale pel’a sefahleho sa Molimo, sebakeng sa rōna,” selekane se secha se ile sa sebetsa.—Ba-Heberu 9:12-14, 24.

Ha a bua ka Moshe le Jesu e le baetsi ba batho ba lilekane, Pauluse o ne a sa etse tlhahiso ea hore e mong oa bona o ne a ile a theha lilekane tseo, tseo ha e le hantle li neng li entsoe ke Molimo. Ho fapana le hoo, batho bao ba babeli ba ne ba ameha ka mokhoa o tobileng joaloka babuelli tabeng ea ho theha lilekane tsena. ’Me boemong bo bong le bo bong, lefu le ne le hlokahala—lefu la liphoofolo le ne le emela lefu la Moshe, ’me Jesu o ile a fana ka mali a bophelo ba hae bakeng sa ba leng selekaneng se secha.

[Mongolo o botlaaseng ba leqephe]