Morero oa Jehova o Tla Phethahala!

1, 2. (a) Jehova o entse hore re tsebe eng? (b) Lengolo la Esaia 46:10, 11 le 55:11 le re fa kholiseho efe?

MANTSOE a qalang ka Bibeleng a re’ng: “Tšimolohong Molimo o ile a bōpa maholimo le lefatše” a bonolo empa ke a bohlokoa. (Gen. 1:1) Ke ’nete hore re na le tsebo e seng kae ka lintho tseo Molimo a li bopileng, joaloka sepakapaka, khanea le khoheli, ’me re se re bone karolo e nyenyane feela ea bokahohle. (Moek. 3:11) Leha ho le joalo, Jehova o entse hore re tsebe seo a se rerileng ka lefatše le ka batho. Molimo o ile a bopa batho ka setšoantšo sa hae ’me a etsa hore lefatše e be lehae le letle bakeng sa bona. (Gen. 1:26) E ne e tla ba bana ba hae ’me Jehova e be Ntate oa bona.

² Joalokaha ho hlalositsoe ho Genese khaolo ea boraro, morero oa Jehova o ile oa sitisoa. (Gen. 3:1-7) Leha ho le joalo, tšitiso eo e ne e ke ke ea hlola Jehova kaha ha ho na ea ka emang ka pel’a hae. (Esa. 46:10, 11; 55:11) Kahoo, re ka kholiseha hore seo Jehova a neng a se rerile se tla fela se phethahale hantle ka nako eo a e behileng.

 3. (a) Ke litaba life tsa bohlokoa tseo re ithutileng tsona ha re ne qala ho ithuta Bibele? (b) Ke hobane’ng ha re ikhopotsa tsona hona joale? (c) Re tl’o bua ka lipotso life?

³ Ha ho pelaelo hore re tloaelane le litaba tsa Bibele tse mabapi le morero oa Molimo ka lefatše le batho le ka karolo eo Jesu a e bapalang ho phethahatsoeng ha morero oa Molimo. Litaba tsena ke tsa bohlokoa, ’me ho ka etsahala hore ke tse ling tsa pele tseo re ileng ra ithuta tsona ha re qala ho ithuta Lentsoe la Molimo. ’Me re batla ho thusa ba bang hore le bona ba tsebe lithuto tsena tsa bohlokoa. Hona joale, re leka ka hohle ho mema batho ba bangata kamoo ho ka khonehang ho tla Sehopotsong sa lefu la Kreste. (Luka 22:19, 20) Ba tla ba teng Sehopotsong ba tla ithuta ho hongata ka morero oa Molimo. Kahoo matsatsing ana a setseng pele ho Sehopotso, a re ke re nahaneng ka lipotso tseo re ka li sebelisang ho holisa thahasello ea batho bao re ithutang Bibele le bona le ba bang ba ka thabelang ho ba teng ketsahalong ena ea bohlokoa. Re tla bua ka lipotso tse tharo: Molimo o ne a rerile eng ka lefatše le ka batho? Ho ile ha seneeha kae? ’Me ke hobane’ng ha sehlabelo sa Jesu sa thekollo e le sona se ka etsang hore morero oa Molimo o phethahale?

 4. Popo e senola eng ka bophahamo ba Jehova?

⁴ Jehova ke ’Mopi ea hlollang. Mesebetsi ea hae ea popo ke ea boleng bo phahameng haholo. (Gen. 1:31; Jer. 10:12) Ho hlophiseha le botle ba popo bo re ruta eng? Ha re sheba popo, rea hlolloa hore mesebetsi eohle ea Jehova ea popo e na le morero, ho sa tsotellehe hore ke e menyenyane kapa ke e meholo. Ke mang ea sa tsoteng ho rarahana ha lisele tsa ’mele oa motho, botle ba lesea le botle ba ha letsatsi le likela? Re khahloa ke mesebetsi ena ea popo hobane ka tlhaho re rata lintho tse ntle.—Bala Pesaleme ea 19:1; 104:24.

 5. Jehova o netefatsa joang hore popo eohle e phela ka tummellano?

⁵ Joalokaha popo e bontša, ka lerato Jehova o behile meeli. O entse melao ea tlhaho le ea boitšoaro ho netefatsa hore ntho e ’ngoe le e ’ngoe e phela ka tumellano. (Pes. 19:7-9) Ka lebaka leo lintho tsohle tse leholimong le tse lefatšeng li fuoe mosebetsi ho ea ka thato ea Molimo. Jehova o behile tsela eo popo ea hae e lokelang ho sebetsa hammoho kateng. Ka tsela eo, molao oa khoheli o etsa hore sepakapaka se be haufi le lefatše, o laola maqhubu le leoatle ebile o etsa hore lintho tse phelang li laolehe. Popo eohle, ho akarelletsa le batho, e phela tumellanong le meeli ena. Ho hlakile hore ho hlophiseha ha popo ke bopaki ba hore Molimo o na le morero ka lefatše le ka batho. Ha re le tšimong, na re ka khona ho thusa batho ho tseba hore na ke mang Moetsi oa lintho tsee tse hlophisehileng?—Tšen. 4:11.

6, 7. Jehova o ne a file Adama le Eva limpho life?

⁶ Morero oa Jehova e ne e le hore batho ba phele ka ho sa feleng mona lefatšeng. (Gen. 1:28; Pes. 37:29) Ka lerato o ile a fa Adama le Eva limpho tse ngata tse neng li tla etsa hore ba thabele bophelo. (Bala Jakobo 1:17.) Jehova o ile a ba fa bolokolohi ba ho ikhethela, bokhoni ba ho nahana, esita le ba ho rata le ho thabela setsoalle. ’Mopi o ile a bua le Adama ’me a mo bolella seo a lokelang ho se etsa ho bontša hore oa mamela. Adama o ile a boela a ithuta ho itlhokomela le ho hlokomela liphohofolo le lefatše. (Gen. 2:15-17, 19, 20) Jehova o ile a boela a bopa Adama le Eva ba e-na le litho tsa kutlo le tsa ho latsoa, ho tšoara, ho bona le ho fofonela. Ba ne ba ka thabela lintho tsohle tse ngata tse neng li le teng Paradeiseng eo ba neng ba lula ho eona. Batho bana ba babeli ba ne ba e-na le monyetla oa ho thabela mosebetsi, empa tseo tsohle li ile tsa fela.

⁷ Molimo o ne a boetse a batla ho etsa’ng? Jehova o bopile Adama le Eva ba e-na le bokhoni ba hore ba be le bana ba phethahetseng. Molimo o ne a batla hore bana ba Adama le bona ba be le bana ho fihlela lefatše le tlala. Kaha o ne a rata bana ba hae e leng Adama le Eva, o ne a batla hore batsoali bohle ba rate bana ba bona. Lefatše le tsohle tse ho lona e ne e tla ba lehae la bona la ka ho sa feleng.—Pes. 115:16.

 8. Ke hobane’ng ha Jehova a ile a fana ka molao o hlahang ho Genese 2:16, 17?

⁸ Lintho ha lia ka tsa tsamaea hantle ka tsela eo Molimo a neng a li rerile. Hobane’ng? Jehova o ile a fa Adama le Eva molao o bonolo ho bona hore na ba ne ba utloisisa moeli oa tokoloho ea bona kapa che. O ile a re: “U ka ja tsa sefate se seng le se seng sa serapa hore u khotsofale. Empa ha e le sefate sa tsebo ea botle le bobe u se ke ua ja tsa sona, etsoe ka letsatsi leo ka lona u jang tsa sona ka sebele u tla shoa.” (Gen. 2:16, 17) Ho ne ho se thata ho Adama le Eva ho utloisisa molao ona le ho o mamela. Ho feta moo, ba ne ba e-na le lijo tse ngata tseo ba neng ba ka li ja.

9, 10. (a) Ke mashano afe ao Satane a ileng a a bolela ka Jehova? (b) Adama le Eva ba ile ba khetha ho etsa’ng? (Sheba setšoantšo se qalong.)

⁹ Satane Diabolose o ile a sebelisa noha ho thetsa Eva hore a se ke a mamela Ntate oa hae Jehova. (Bala Genese 3:1-5; Tšen. 12:9) Satane o ile fetola mantsoe a Molimo a fana ka maikutlo a hore ba ne ba sa lokela ho ja litholoana tsa “sefate se seng le se seng se serapeng.” Ho joalokaha eka o ne a re: ‘Na u bolela hore ha le khone ho etsa seo le se batlang?’ Ka mor’a moo, o ile a bua leshano le letala, a re: “Ka sebele le ke ke la shoa.” O ile a leka ho kholisa Eva hore o ne a sa hloke ho mamela Molimo, ha a re: “Molimo oa tseba hore letsatsing leo ka lona le jang tsa sona mahlo a lōna a tla tutuboloha.” Satane o ile a re Jehova ha a batle ha ba e-ja tholoana ea sefatse seo hobane a tseba hore ba tla hlalefa. Ho feta moo, Satane o ile a etsa tšepiso ena ea bohata: “Le tla ba joaloka Molimo, le tsebe botle le bobe.”

¹⁰ Adama le Eva ba ne ba lokela ho etsa qeto. Na ba ne ba tla mamela Jehova, kapa ba ne ba tla mamela noha? Ba ile ba khetha ho se mamele Molimo. Ka ho etsa joalo, ba ile ba kopanela bofetoheling le Satane. Ba ile ba hana hore Jehova e be Ntate oa bona ’me ba lahla puso ea hae e neng e ba sirelelitse.—Gen. 3:6-13.

11. Ke hobane’ng ha Jehova a sa ka a lumella bofetoheli?

¹¹ Ka ho fetohela Jehova, Adama le Eva ba ile ba lahleheloa ke bophelo bo phethahetseng. Ho feta moo, bofetoheli bona bo ile ba baka karohano pakeng tsa bona le Jehova hobane ‘mahlo a hae a hloekile haholo hore a ka talima se sebe.’ Kahoo, ‘ha a khone ho talima khathatso.’ (Hab. 1:13) Haeba a ne a ile a bo lumella, bokamoso ba libopuoa tsohle—tse leholimong le tse lefatšeng—bo ne bo tla ba kotsing. Ka holimo ho tsohle, haeba Molimo a ne a sa etsa letho ka sebe se etsahetseng Edene, ho ne ho tla tsoha lipelaelo ka bobusi ba hae. Empa Jehova o khomarela litekanyetso tsa hae; ha ho mohla a li fetohelang. (Pes. 119:142) Kahoo ho ba le bolokolohi ba ho ikhethela ho ne ho sa fe Adama le Eva lebaka la ho se mamele molao oa Molimo. Ka lebaka la bofetoheli ba bona, ba ile ba shoa ’me ba khutlela leroleng leo ba neng ba ntšitsoe ho lona.—Gen. 3:19.

12. Ho etsahetse’ng ka bana ba Adama?

¹² Ha Adama le Eva ba ja tholoana e hanetsoeng, ba ile ba lahleheloa ke tokelo ea ho ba karolo ea lelapa la Molimo. Molimo o ile a ba ntša Edene, ’me ba ne ba se na tšepo ea hore ba tla ke ba khutle. (Gen. 3:23, 24) Ka ho etsa joalo, ka toka Jehova o ile a ba tlohella hore ba utloe liphello tsa khetho eo ba e entseng.(Bala Deuteronoma 32:4, 5.) Kaha ba ne ba se ba sa phethahala, ba ne ba ke ke ba hlola ba bontša makhabane a Jehova ka tsela e phethahetseng. Adama ha aa lahleheloa ke bokamoso bo botle feela empa o ile a boela a fetisetsa ho se phethahale, sebe le lefu ho bana ba hae. (Bar. 5:12) O ile a etsa hore litloholo tsa hae li se ke tsa e-ba le monyetla oa ho phela ka ho sa feleng. Ho feta moo, Adama le Eva ba ne ba ke ke ba hlola ba e-ba le bana ba phethahetseng ’me le bana ba bona ba ne ba ke ke ba e-ba le bana ba phethahetseng. Ka mor’a ho khelosa Adama le Eva, Satane Diabolose o ile a tsoela pele ho khelosa batho ho fihlela le kajeno.—Joh. 8:44.

13. Jehova o batla eng ho batho?

¹³ Leha ho le joalo, Molimo o ile a tsoela pele a rata batho. Ho sa tsotellehe bofetoheli ba Adama le Eva, Jehova o batla hore batho ba be le kamano e ntle le eena. Ha a lakatse hore leha e le mang a shoe. (2 Pet. 3:9) Le hoja melao ea Molimo e sa ka ea fetoha, hang feela ka mor’a bofetoheli boo, o ile a etsa litokisetso tsa hore batho ba boele ba be le kamano e ntle le eena. Jehova o ile a finyella see joang?

14. (a) Ho ea ka Johanne 3:16, ke tokisetso efe eo Molimo a e entseng bakeng sa batho? (b) Ke potso efe eo re ka ’nang ra e tšohla le ba thabelang?

¹⁴ Bala Johanne 3:16. Ba bangata ba tla ba teng Sehopotsong ba tseba temana ena ka hlooho. Empa potso ke hore, Ke joang sehlabelo sa Jesu se bulang monyetla oa bophelo bo sa feleng? Phutuho ea ho memela bathong Sehopotso le puo ea Sehopotso li tla khona ho arabela potso ena ho batho ba thabelang ho ithuta ’nete ’me le rona re tla khona ho ba ruta ho eketsehileng ha re khutlela ho bona. Batho bao ba tla thaba ha ba utloisisa haholoanyane tsela eo lerato le bohlale ba Jehova li bonahalang kateng tokisetsong ea sehlabelo sa thekollo. Ke lintlha life tse amanang le thekollo tseo re ka buang ka tsona?

15. Jesu o ne a fapane joang le Adama?

¹⁵ Jehova o ile a fana ka monna ea phethahetseng eo e neng e tla ba morekolli. Monna eo ea phethahetseng o ne a tla lokela hore a tšepahale ho Jehova ’me a ikemisetse ho fana ka bophelo ba hae bakeng sa baetsalibe. (Bar. 5:17-19) Jehova o ile a tlosa mora oa hae oa letsibolo leholimong ’me a mo tlisa lefatšeng. (Johanne 1:14) Kahoo Jesu e ne e le motho ea phethahetseng feela joaloka Adama. Ho fapana le Adama, Jesu o ile a etsa sohle seo Jehova a neng a se lebelletse ho motho ea phethahetseng. Esita le tlas’a liteko tse matla, Jesu ha aa ka a etsa sebe kapa hona ho roba melao ea Molimo.

16. Ke hobane’ng ha thekollo e le mpho ea bohlokoa hakaale?

¹⁶ Kaha Jesu e ne e le motho ea phethahetseng, o ne a ka khona ho pholosa batho sebeng le lefung ka ho ba shoela. Jesu o ile a tšepahala le ho mamela Molimo ka ho feletseng, e leng seo Adama a ileng a hloleha ho se etsa. (1 Tim. 2:6) Jesu e ile ea e-ba sehlabelo sa thekollo se ileng sa bulela “ba bangata” monyetla oa ho phela bophelo bo sa feleng. (Mat. 20:28) Ha e le hantle thekollo ke eona e entseng hore Molimo a phethahatse morero oa hae. (2 Bakor. 1:19, 20) Thekollo e fane ka tšepo ea bophelo bo sa feleng ho batho bohle ba tšepahalang.

17. Thekollo e butse monyetla ofe?

¹⁷ Jehova o ile a itela haholo e le hore a fane ka thekollo. (1 Pet. 1:19) O ile a rata batho haholo hoo a ileng a tela Mora oa hae a le mong feela oa letsibolo hore a re shoele. (1 Joh. 4:9, 10) Ka mantsoe a mang, Jesu o nketse Ntate oa rona oa pele Adama sebaka. (1 Bakor. 15:45) Ka ho etsa joalo, Jesu ha a re fe bophelo feela empa o re fa monyetla oa hore qetellong re boele re be karolo ea lelapa la Molimo. Ruri ka lebaka la sehlabelo sa Jesu, Jehova a ka amohela batho hape lelapeng la hae kantle le ho sekisetsa ho loka ha hae. Na ha ho thabise ho nahana ka nako eo bohle ba tšepahalang ba tla beng ba phethahetse? Ho tla ba le bonngoe karolong e leholimong le e lefatšeng ea lelapa la Molimo. Ka kutloisiso e feletseng, bohle re tla ba bana ba Molimo.—Bar. 8:21.

18. Jehova e tla ba “lintho tsohle ho e mong le e mong” neng?

¹⁸ Bofetoheli ba Satane ha boa ka ba thibela Jehova ho bontša batho lerato, ebile bo ke ke ba thibela batho ba sa phethahalang ho tšepahala ho eena. Jehova o tla sebelisa thekollo ho thusa bana bohle ba hae hore e be ba lokileng ka ho feletseng. Ak’u nahane feela hore bophelo bo tla ba joang ha bohle ba ‘bontšang tumelo ho Mora’ ba se ba phela ka ho sa feleng. (Joh. 6:40) Ka bohlale le lerato la hae, Jehova o tla etsa hore batho e be ba phethahetseng, feela joalokaha a ne a rerile qalong. Ka nako eo, Ntate oa rona Jehova e tla ba “lintho tsohle ho e mong le e mong.”—1 Bakor. 15:28.

19. (a) Haeba re ananela thekollo re tla susumelletseha ho etsa’ng? (Sheba lebokose le reng, “A re Tsoeleng Pele ho Batla ba Tšoanelehang.”) (b) Sehlooho se latelang se tla bua ka eng mabapi le thekollo?

¹⁹ Haeba re ananela thekollo re tla susumelletseha ho etsa sohle se matleng a rona ho thusa ba bang ho tseba hore le bona ba ka rua molemo mphong ena ea bohlokoa. Batho ba lokela ho tseba hore thekollo ke tsela eo Jehova a e sebelisang ho fa batho bohle tšepo ea bophelo bo sa feleng. Leha ho le joalo, thekollo e entse se fetang seo. Sehlooho se latelang se tla hlalosa kamoo sehlabelo sa Jesu sa thekollo se arabang liqoso tseo Satane a ileng a li etsa serapeng sa Edene.