BACHA BAA BOTSA
Bibele e ka Nthusa Joang?—Karolo ea 1: Ithute Bibele Haholoanyane
Briana ea lilemo li 15 o re: “Ke lekile ho bala Bibele empa ke nyahamisoa ke kamoo e leng kholo kateng.”
Na le uena u ikutloa ka tsela eo? Sehlooho sena se ka u thusa.
Ke hobane’ng ha u lokela ho bala Bibele?
Na ha u rate ho bala Bibele? Haeba ho joalo hoa utloahala. U ka ’na oa nka Bibele e le buka e se nang litšoantšo e nang le maqephe a fetang sekete e ngotsoeng ka mongolo o mosesaane. Kahoo u ka ’na oa nka e sa thahasellise ha e bapisoa le thelevishene le livideo.
Leha ho le joalo, nahana ka eona ka tsela ena. Ak’u nahane u feta lebokose le leholo la mehleng ea khale le tšetseng matlotlo. Na u ka se batle ho tseba hore na ke eng ka moo?
Bibele e joaloka lebokose le tšetseng matlotlo. E na le matlotlo a mangata a ka u thusang hore u be le bohlale ba hore
U etse liqeto tse nepahetseng
U utloane le batsoali ba hao
U fumane metsoalle e nepahetseng
U sebetsane le ho tšoenyeha
Ke joang buka ea khale hakaale e ka re thusang kajeno? Lebaka ke hobane “lengolo lohle le bululetsoe ke Molimo.” (2 Timothea 3:16) Sena se bolela hore keletso e ka Bibeleng e tsoa mohloling o nepahetseng.
Bibele e tšoana le lebokose le nang le matlotlo a bohlokoa ka ho fetisisa kaha e re thusa hore re etse lintho ka bohlale.
Nka bala Bibele joang?
Tsela e ’ngoe ke ho bala Bibele ho tloha qalong ho ea fihla qetellong. Sena se tla etsa hore u tsebe seo Bibele e se rutang. Ho na le mekhoa e mengata eo u ka balang Bibele ka eona. Nahana ka mehlala ena:
U ka bala libuka tse 66 tsa Bibele ka tatellano ho tloha ho Genese ho ea ho Tšenolo.
U ka bala litlaleho tsa Bibele ho ea ka hore na li etsahetse ka tatellano efe.
Seo u ka se etsang: Karolo ea 4 ho Tataiso ea ho Ithuta Lentsoe la Molimo e re fa tatellano ea liketsahalo tsa bophelo ba Jesu ha a ne a le lefatšeng.
Tsela ea bobeli eo u ka balang Bibele ka eona ke ka ho khetha litlaleho tse ka u thusang litekong tseo u kopanang le tsona. Ka mohlala:
Na u batla ho fumana metsoalle e tšepahalang? Bala pale ea Jonathane le Davida. (1 Samuele, likhaolo 18-20) Ka mor’a moo, sebelisa leqephe la ho ngolla le nang le sehlooho se reng “Kamoo U ka Fumanang Metsoalle e Tšepahalang” ho ithuta lintlha tseo u ka li sebelisang.
Na u batla ho matlafatsa bokhoni ba hao ba ho hlola liteko? Bala pale e bontšang kamoo Josefa a ileng a hlola liteko kateng. (Genese, khaolo ea 39) Ka mor’a moo, sebelisa leqephe la ho ngolla le nang le sehlooho se reng “Kamoo u ka Hlolang Liteko . . . Josefa—Karolo ea 1” le “O Qosoa ka Bohata! Josefa—Karolo ea 2” ho ithuta lintlha tseo u ka li sebelisang.
Na u batla ho ithuta hore na thapelo e ka u thusa joang? Bala tlaleho ea Nehemia. (Nehemia, khaolo ea 2) Ka mor’a moo, sebelisa leqephe la ho ngolla le nang le sehlooho se reng “Molimo o ile a Arabela Thapelo ea Hae” ho ithuta lintlha tseo u ka li sebelisang.
Seo u ka se etsang: Ha u bala Bibele, e-ea sebakeng se khutsitseng e le hore u ka khona ho nahanisisa ka seo u se balang.
Tsela ea boraro eo u ka balang Bibele ka eona ke ka ho khetha tlaleho kapa pesaleme, u e bale ebe oa ipotsa hore na e ka u thusa joang. Ka mor’a ho bala, ipotse lipotso tse kang tsena:
Ke hobane’ng ha Jehova a ile a etsa hore see se ngoloe ka Bibeleng?
Taba ee e bontša’ng ka Jehova kapa tsela eo a etsang lintho ka eona?
Nka sebelisa seo ke ntseng ke ithuta sona joang bophelong ba ka?
Seo u ka se etsang: Ngola hore na u batla ho etsa’ng. Ngola letsatsi leo u batlang ho qala ho bala Bibele ka lona.