Jabur
116 Abdi nyaah ka Yéhuwa
Lantaran Anjeunna ngadangukeun sora abdi waktu abdi sasambat ménta tulung.
2 Anjeunna ngadangukeun* abdi,
Ku kituna abdi bakal sasambat ka Anjeunna saumur hirup.
3 Tali-tali pati meulit abdi,
Kuburan ngagenggem abdi.
Abdi jadi nalangsa jeung sedih.
4 Tapi abdi sasambat ka nami Yéhuwa,
”Nun Yéhuwa, salametkeun abdi!”
5 Yéhuwa téh bener jeung welas asih,
Allah urang téh karunyaan.
6 Yéhuwa ngajaga jalma nu can boga pangalaman.
Pas abdi keur teu walakaya, Anjeunna nyalametkeun abdi.
7 Abdi* bakal ngarasa tengtrem deui
Lantaran Yéhuwa tos bageur ka abdi.
8 Gusti tos nyalametkeun abdi tina maot,
Nyusutan cipanon abdi,
Jeung ngajaga suku abdi ngarah teu titajong.
9 Sapanjang hirup, abdi bakal leumpang di hareupeun Yéhuwa.
10 Abdi terus nyarita sabab abdi boga iman,
Sanajan abdi téh sangsara pisan.
11 Basa keur sieun, abdi ngomong,
”Kabéh jalma téh tukang bohong.”
12 Naon atuh pamulang abdi ka Yéhuwa
Kana sagala kasaéana-Na ka abdi?
13 Abdi bakal nginum tina* gelas tanda ngucap sukur
Lantaran Anjeunna tos nyalametkeun abdi.
Abdi bakal sasambat ka nami Yéhuwa.
14 Abdi bakal nedunan ikrar ka Yéhuwa
Di hareupeun sakabéh umat-Na.
15 Yéhuwa leungiteun pisan
Waktu hamba-hamba-Na nu satia maot.
16 Nun Yéhuwa, abdi nyuhunkeun pitulung,
Da abdi téh hamba Gusti.
Abdi ngabdi ka Gusti, sakumaha pun biang ngabdi ka Gusti.
Tali nu ngabeulit abdi tos dileupaskeun ku Gusti.
17 Abdi bakal nyanggakeun korban pikeun ngucap sukur ka Gusti,
Abdi bakal sasambat ka nami Yéhuwa.
18 Abdi bakal nedunan ikrar ka Yéhuwa
Di hareupeun sakabéh umat-Na,
19 Di buruan bumi Yéhuwa,
Di tengah-tengah Yérusalém.
Puji Yah!*