Maléakhi

2 ”Hé para imam, ieu paréntah keur maranéh:+ 2 Lamun maranéh embung ngadéngékeun jeung teu bener-bener ngamulyakeun ngaran Kuring, maranéh bakal dikutuk ku Kuring.+ Kuring bakal ngaganti berkah maranéh jadi kutuk.+ Malah Kuring geus ngaganti berkah maranéh jadi kutuk, lantaran maranéh teu bener-bener ngajalankeun paréntah Kuring,” ucap Yéhuwa, pangawasa pasukan sorga.

3 ”Ku sabab kalakuan maranéh, binih nu dipelak ku maranéh rék diruksak ku Kuring.+ Kokotor sato nu dikurbankeun ku maranéh waktu perayaan téh ku Kuring rék ditaplokkeun kana beungeut maranéh. Maranéh rék digusur kana tumpukan kokotor éta.* 4 Mun geus kitu mah kakara maranéh bakal nyaho yén Kuring méré ieu paréntah téh supaya perjangjian Kuring jeung Léwi teu batal,”+ ucap Yéhuwa, pangawasa pasukan sorga.

5 ”Perjangjian Kuring jeung manéhna téh ngajaga kahirupan jeung katengtreman manéhna, supaya manéhna hormat* ka Kuring. Harita manéhna mémang hormat* ka Kuring jeung mikagimir ngaran Kuring. 6 Biwirna ngajarkeun hukum* nu bener+ sarta tara ngucapkeun nu jahat. Manéhna rukun jeung Kuring, hirupna gé bener.+ Ku bantuan manéhna, loba jalma eureun ngalampahkeun nu salah. 7 Biwir imam téh kuduna mah ngajarkeun pangarti. Lamun hayang nyaho hukum,* jalma-jalma kudu néangan manéhna,+ sabab manéhna téh utusan Yéhuwa, pangawasa pasukan sorga.

8 ”Tapi maranéh sorangan nu nyimpang ti jalan nu sakuduna. Loba jalma ogé jadi teu ngajalankeun hukum gara-gara maranéh.*+ Maranéh ingkar tina perjangjian Kuring jeung Léwi,”+ ucap Yéhuwa, pangawasa pasukan sorga. 9 Allah ngucap deui, ”Ku Kuring jalma-jalma rék disina nyapirakeun jeung ngarendahkeun maranéh, lantaran maranéh teu nurut kana paréntah Kuring. Maranéh kalah ka beurat sabeulah waktu ngajalankeun hukum.”+

10 ”Bapa urang kabéh téh ngan hiji, pan?+ Nu nyiptakeun urang kabéh téh Allah nu sarua, pan? Jadi ku naon urang silih hianat,+ ngalanggar perjangjian karuhun urang? 11 Urang Yéhuda geus ngahianat sarta ngalampahkeun nu pikaijideun di Israél jeung di Yérusalém. Maranéhna ngahina ka Yéhuwa, nu cinta kana kasucian,*+ tuluy kawin jeung awéwé nu nyembah ka allah séjén.+ 12 Rék saha waé gé, nu ngalampahkeun éta ku Yéhuwa bakal dimusnakeun ti pakémahan Yakub, sanajan manéhna ngabaktikeun kurban ka Yéhuwa, pangawasa pasukan sorga.”+

13 ”Aya deui nu dilampahkeun ku maranéh nu nyababkeun mézbah Yéhuwa kakeueum ku cimata. Di dinya, kadéngé sora nu ceurik jeung udah-aduh, nu matak Anjeunna moal narima deui pangbakti maranéh sarta moal resep kana naon waé nu dibikeun ku maranéh.+ 14 Maranéh nanya, ’Naon sababna?’ Éta téh lantaran Yéhuwa geus jadi saksi waktu maranéh ngahianat ka pamajikan nu dikawin basa keur ngora, padahal manéhna téh batur hirup jeung pamajikan maranéh nu sah.+ 15 Tapi aya sababaraha jalma nu lalampahanana teu kitu, sabab maranéhna masih dibingbing ku kawasa suci. Naon tujuan maranéhna? Maranéhna hayang boga turunan nu bener-bener umat Allah. Jadi jaga haté maranéh, ulah ngahianat ka pamajikan maranéh nu dikawin basa keur ngora, 16 Sabab Kuring geuleuh kana pepegatan,”+ ucap Yéhuwa, Allah Israél, ”sarta geuleuh ka jalma nu telenges,” ucap Yéhuwa, pangawasa pasukan sorga. ”Jaga haté maranéh, ulah ngahianat.+

17 ”Yéhuwa geus bosen ku omongan maranéh.+ Tapi ceuk maranéh, ’Ku naon bet bosen?’ Sabab maranéh ngomong, ’Saha waé nu ngalampahkeun nu goréng téh dianggap hadé ku Yéhuwa. Anjeunna gé resep ka manéhna,’+ sarta ngomong, ’Mana Allah nu adil téh?’”