Kumaha Pandangan Alkitab ngeunaan Pornografi? Cybersex téh Salah Teu?

Jawaban Alkitab

Alkitab teu ngajelaskeun langsung ngeunaan pornografi, cybersex, atawa nu sarupa kitu. Tapi, Alkitab jelas-jelas ngajéntrékeun kumaha parasaan Allah ngeunaan hubungan séks saacan nikah sarta kumaha parasaan Allah waktu ningali jalma-jalma boga pandangan nu salah ngeunaan séks. Pikirkeun sababaraha ayat ieu:

• ”Kudu maehkeun kahayang-kahayang jasmani anu datang ngarobeda, kayaning lacur, nyieun kaaeban, ngumbar birahi.” (Kolosa 3:5) Mun ningali pornografi, boro-boro bisa maéhkeun kahayang nu salah, nu aya kahayang éta kalah ka beuki ngagedur. Éta ngalantarankeun saurang jalma jadi najis atawa kotor dina pandangan Allah.

• ”Sing saha anu nelek-nelek awewe bari aya sir napsu birahi, geus kaasup jinah dina hatena.” (Mateus 5:28, Sunda Formal) Gambar-gambar cabul ngalantarankeun jalma mikiran hal-hal nu salah, nu tungtungna ngajurung manéhna ngalakukeun tindakan nu salah.

• ”Kalakuan anu cabul, atawa anu aeb, atawa sarakah, teu pantes aya di aranjeun, kecapna ge ulah disebut-sebut acan.” (Epesus 5:3) Urang teu meunang ngomong jorang, komo deui maca atawa nongton hal-hal nu cabul.

• ”Napsu badan ngajakna kana rucah, aeb, . . . jeung salian ti eta. Sim kuring rek ngingetan deui cara nu enggeus-enggeus yen anu kalakuanana kitu moal meunang tempat di Karajaan Allah.” (Galata 5:19-21) Dina pandangan Allah, jalma nu ningali pornografi atawa nu sok ngalakukeun cybersex, telepon séks, jeung SMS séks, mangrupa jalma nu najis atawa ruksak ahlakna. Lamun urang osok ngalakukeun hal-hal éta, urang moal kamanah deui ku Allah.