PANANYA BUDAK NGORA
Kumaha Supaya Abdi Teu Boga Pikiran Goréng Terus?
Anjeun téh jalma nu jiga kumaha?
Yakin
”Urang sabisa-bisa bungah jeung teu babari ambek. Urang hayang seuri jeung senang unggal poé.”—Valerie.
Asa-asa
”Unggal aya hal nu alus, abdi langsung mikir pasti aya nu salah. Maenya saalus kitu?”—Rebecca.
Asup akal
”Urang sok kuciwa mun yakin teuing, ari mun asa-asa gé urang moal bungah. Tapi mun asup akal mah, urang bisa ningali kaayaan nu sabenerna.”—Anna.
Ku naon éta penting?
Ceuk Kitab Suci, ”Anu sararenang tara kendat sukan-sukan.” (Siloka 15:15) Jalma nu henteu teterusan boga pikiran goréng jeung nyoba néangan hal positif mah biasana leuwih bagja. Manéhna ogé biasana boga loba babaturan. Mémang aya kitu nu daék nyobat jeung jalma nu sedih waé?
Tapi najan urangna geus positif gé, kasusah mah pasti aya waé. Misalna:
Loba berita ngeunaan perang, téroris, atawa kajahatan.
Anjeun boga masalah kulawarga.
Anjeun boga kakurangan jeung kalemahan.
Batur nganyenyeri haté anjeun.
Anjeun kudu asup akal. Masalah téh tong diantep, tapi ogé tong dipikiran teuing. Mun asup akal, anjeun moal teterusan mikir goréng jeung bakal bisa narima kanyataan. Ku kituna, anjeun moal teterusan leutik haté pas aya masalah.
Anjeun bisa ngaliwatan angin ribut dina kahirupan, sing percaya engké panonpoé bakal bijil deui
Nu bisa dilakukeun ku anjeun
Boga pandangan nu saimbang kana kakurangan sorangan.
Ceuk Kitab Suci, ”Di dunya moal aya jelema anu bener sapapanjangna teu kungsi milampah salah.” (Pandita 7:20) Mun anjeun gagal atawa nyieun kasalahan, lain hartina anjeun euweuh gunana. Tapi da ngaranna gé manusa, wajar mun jiga kitu.
Carana supaya asup akal: Upayakeun sangkan ka hareupna teu nyieun kasalahan nu sarua, tapi inget anjeun téh teu sampurna. Ceuk Caleb, ”Urang mah embung mikiran teuing kasalahan urang, bisi leutik haté. Justru kasalahan téh dijadikeun palajaran supaya ka hareupna urang bisa leuwih hadé.”
Tong sok ngabanding-bandingkeun diri jeung batur.
Ceuk Kitab Suci, ”Ulah adigung, ulah silih nyenyeri, jeung ulah silih dengkian.” (Galata 5:26) Anjeun bisa nyeri haté mun ningali acara-acara babaturan anjeun dina média sosial, tapi anjeun teu diondang. Nu asalna sobat gé bisa dianggap musuh.
Carana supaya asup akal: Kudu bisa narimakeun, lantaran moal mungkin anjeun diondang ka unggal acara. Urang teu bisa ngukur hiji kaayaan ngan tina poto-poto nu aya dina média sosial. Ceuk Alexis, ”Dina média sosial, biasana jalma-jalma ngan nga-post poto-poto nu pangalusna wungkul. Nu biasa-biasa mah tara di-post.”
Sing akur jeung batur, komo jeung kulawarga sorangan.
Ceuk Kitab Suci, ”Sing sabisa-bisa neangan pijalaneun akur jeung saha bae.” (Rum 12:18) Anjeun moal bisa ngadalikeun kalakuan batur, tapi anjeun bisa ngadalikeun réaksi sorangan. Anjeun bisa ngupayakeun akur jeung batur.
Carana supaya asup akal: Mun aya masalah dina kulawarga, tong sok ngomporan. Téangan carana supaya bisa akur jeung anggota kulawarga, sakumaha akur jeung babaturan. Ceuk budak ngora nu ngaranna Melinda, ”Teu aya nu sampurna, sakapeung urang bisa silih nyenyeri jeung batur. Urang kudu milih, rék tetep akur atawa kalah ka paséa jeung maranéhna.”
Ucapkeun sukur.
Ceuk Kitab Suci, ”Aranjeun kudu muji sukur.” (Kolosa 3:15) Mun sering ngucap sukur mah, anjeun moal mikiran teuing hal-hal nu goréng, tapi nu dipikiran téh nu alus-alusna.
Carana supaya asup akal: Kudu mikirkeun masalah nu keur disanghareupan, tapi tong nepi ka poho kana hal-hal hadé dina kahirupan. Ceuk budak ngora nu ngaranna Rebecca, ”Unggal poé, abdi nulis hiji hal positif dina buku catetan. Abdi hayang inget najan keur boga masalah, pasti aya waé hal-hal alus nu bisa dipikirkeun.”
Pikirkeun jiga kumaha babaturan anjeun.
Ceuk Kitab Suci, ”Pergaulan goreng ngaruksak sipat nu hade.” (1 Korinta 15:33) Mun babaturan anjeun resep ngiritik, sinis, jeung resep ngomongkeun batur, anjeun bisa kababawa.
Carana supaya asup akal: Bisa waé babaturan anjeun ngalaman kasusah, maranéhna jadi sedih jeung strés pikeun sababaraha waktu. Anjeun kudu ngadukung maranéhna, tapi ulah nepi ka anjeun nu jadi sedih jeung strés. Ceuk budak ngora nu ngaranna Michelle, ”Tong ngan gaul jeung jalma nu boga pikiran goréng wungkul. Dina matématika gé, mun angka minus ditambah angka minus deui, jadi beuki gedé minusna.”
Baca carana sangkan leuwih positif
Urang hirup dina jaman nu ku Kitab Suci disebut jaman nu ”loba kasukeran”. (2 Timoteus 3:1) Na anjeun sok jadi hésé mikir positif lantaran jalma-jalma lolobana boga pikiran goréng? Baca ”Na Kasangsaraan téh Bakal Leungit?”