PANANYA BUDAK NGORA
Ngan Babaturan atawa Leuwih?—Bagian 1: Manéhna téh Bogoh Kitu ka Abdi?
Anjeun bogoh ka saurang jalma. Anjeun yakin manéhna gé bogoh ka anjeun. Anjeun sering chatting jeung manéhna. Mun aya acara kumpul-kumpul, anjeun sok duduaan waé jeung manéhna. Terus mun keur chat, asana manéhna téh perhatian pisan.
Jadi, anjeun hayang mastikeun kumaha sabenerna parasaan manéhna ka anjeun. Ari pék téh, manéhna ngajawab, ”Abdi mah ngan nganggap manéh sabagé babaturan, teu leuwih.”
Kumaha rasana?
”Abdi téh keuheul pisan. Keuheul ka manéhna jeung ka diri sorangan! Da urang téh chatting-an unggal poé. Terus, manéhna gé perhatian pisan ka abdi. Nya, wajar wéh atuh abdi jadi bogoh ka manéhna.”—Jasmine.
”Abdi jeung manéhna sok maturan babaturan urang nu bobogohan. Jadi, urang opatan téh jiga dua pasang budak ngora nu keur bobogohan. Abdi jeung manéhna sering ngobrol sarta chatting. Sakali waktu, manéhna ngomong manéhna mah ngan nganggap abdi babaturan hungkul. Terus, geuningan manéhna téh geus boga kabogoh. Meni nyérédét pisan kana haté.”—Richard.
”Aya lalaki nu unggal poé chat ka abdi. Kadang mun urang ngobrol, meni romantis téh. Tapi waktu abdi méré nyaho abdi bogoh ka manéhna, manéhna kalah ka seuri, terus ngajawab, ”Ayeuna mah abdi can hayang bobogohan heula. Abdi ceurik teu eureun-eureun.”—Tamara.
Palajaran penting: Mun anjeun ngarasa boga hubungan nu istiméwa tapi nyatana manéhna teu bogoh ka anjeun, wajar mun anjeun éra, ambek, jeung ngarasa dihianatan. Saurang budak ngora nu ngaranna Steven nyarita, ”Abdi téh putus asa jeung ngarasa nyeri haté pisan. Keur sababaraha waktu mah abdi jadi teu percaya ka sasaha.”
Ku naon bisa salah paham?
Mun anjeun sering ngobrol jeung batur liwat chat atawa média sosial, anjeun bakal leuwih gampang pikeun bogoh ka manéhna, padahal bisa waé manéhna teu boga parasaan nanaon ka anjeun. Perhatikeun koméntar sababaraha budak ngora.
”Bisa waé batur chat urang téh lantaran keur bosen atawa euweuh gawé, tapi urang nganggap manéhna perhatian ka urang. Komo mun manéhna chat urang unggal poé, urang bisa ngarasa manéhna téh boga parasaan ka urang.”—Jennifer.
”Bisa waé nu hiji boga parasaan, tapi nu hijina deui ngan néangan babaturan nu bisa diajak ngobrol sarta bisa méré sumanget.”—James.
”Aya nu ngirim ucapan atawa pesen singget jang basa-basi hungkul, tapi urangna ngarasa manéhna boga parasaan ka urang.”—Hailey.
”Mun aya nu ngirim emoticon seuri dina chat, urang bisa salah paham. Urang bisa ngarasa manéhna téh bogoh ka urang, padahal sabenerna mah teu kitu. Manéhna mémang bageur wéh.”—Alicia.
Palajaran penting: Mun aya nu merhatikeun anjeun, ulah gancang salah sangka.
Téori mah gampang, ari praktékna hésé. Ceuk Alkitab, haté manusa téh ”pinuh ku tipu daya, taya papadana; hese dicageurkeunana, geus kacida parnana”. (Yermia 17:9) Anjeun bisa waé ngarasa boga hubungan nu istiméwa jeung manéhna, tapi geuningan éta téh ngan parasaan anjeun hungkul. Pas nyaho kanyataanana, anjeun jadi nyeri haté.
Nu bisa dilakukeun ku anjeun
Kudu asup akal. Pikirkeun deui kumaha sabenerna hubungan anjeun jeung manéhna. Pék pikirkeun, ’Bener kitu abdi téh mémang diistiméwakeun ku manéhna?’ Ulah kabawa teuing ku parasaan, tapi gunakeun ”daya pikir” anjeun.—Roma 12:1.
Ulah gancang nyieun kasimpulan. Nu dipikirkeun téh ulah ngan perhatianana hungkul. Tapi pikirkeun ogé, aya teu tindakan manéhna nu nunjukkeun yén manéhna téh teu bogoh ka anjeun? Mun anjeun bogoh ka manéhna, tong langsung mikir manéhna gé pasti bogoh ka anjeun.
Kudu sabar. Mun manéhna can ngomong langsung yén manéhna hayang bobogohan jeung anjeun, ulah ngarep teuing. Engké anjeun bisa nyeri haté.
Kudu terus terang. Ceuk Alkitab, ”Aya waktuna nyarita.” (Pandita 3:7) Lamun anjeun hayang nyaho kumaha sabenerna parasaan manéhna ka anjeun, pék tanyakeun langsung. Ceuk Valerie, ”Leuwih leuheung nyeri haté ayeuna, tibatan engké geus ngadagoan lila, tungtungna sarua waé manéhna teu bogoh ka urang.”
Palajaran penting: Siloka 4:23 (Terjemahan Dunia Baru) nyebutkeun, ”Jaga haté anjeun.” Lamun anjeun bogoh ka saurang jalma, pastikeun manéhna bogoh ogé ka anjeun atawa henteu. Mun anjeun bogoh ka jalma nu teu bogoh ka anjeun, éta sarua jiga melak binih dina batu, nya moal jadi-jadi atuh.
Tapi mun manéhna gé boga parasaan ka anjeun, terus anjeun geus cukup umur sarta siap pikeun bobogohan, nah anjeun bisa mutuskeun rék bobogohan atawa henteu. Sing inget, perkawinan téh bisa kuat lamun salaki jeung pamajikan boga tujuan hirup nu sarua, jujur, jeung terus terang. (1 Korintus 7:39) Lamun ti mimiti duanana geus nyobat, engké sanggeus kawin gé maranéhna bisa terus nyobat.—Siloka 5:18.