PANANYA BUDAK NGORA
Ngan Babaturan atawa Leuwih?—Bagian 2: Kumaha Sikep Abdi ka Manéhna?
Lamun aya batur nu rék curhat, anjeun téh pasti daék ngadéngékeun manéhna. Tapi, ahir-ahir ieu aya saurang babaturan nu sering ngobrol jeung anjeun. Masalahna, manéhna téh lawan jenis. Bisa jadi anjeun mikir, ’Ah, urang mah ngan babaturan hungkul.’ Anjeun gé yakin manéhna ngarasa kitu. Tapi, éta téh bener teu?
Mun kitu terus, engkéna bakal kumaha?
Mémang teu salah anjeun boga babaturan nu lawan jenis. Tapi, kumaha lamun anjeun jadi akrab teuing jeung salah saurang ti maranéhna? Mun kitu, manéhna bisa jadi nganggap anjeun téh bogoh ka manéhna.
Mémangna éta nu dipikahayang ku anjeun? Meureun anjeun teu boga niat kitu, tapi ku naon manéhna bisa mikir kitu? Pikirkeun sababaraha hal ieu.
Anjeun perhatian teuing ka manéhna.
”Mémang urang teu bisa ngatur parasaan batur. Tapi, nya urang gé ulah nyieun batur jadi salah paham. Piraku urang sering telepon sarta ngobrol jeung manéhna, tapi urang ngan nganggap manéhna babaturan hungkul?”—Sierra.
Anjeun terus ngaladénan manéhna.
”Abdi mah teu pernah nga-chat ti heula, tapi mun manéhna nga-chat, ku abdi pasti dibales. Éh tungtungna abdi jadi bingung, kumaha cara ngajelaskeun ka manéhna, abdi mah teu boga parasaan nanaon ka manéhna.”—Richard.
Anjeun resep néang perhatian.
”Aya sababaraha jalma nu resep mun meunang perhatian ti batur. Tapi, manéhna téh teu mikirkeun parasaan batur jeung teu boga niat pikeun bobogohan. Abdi ningali loba nu siga kitu, jeung pasti aya wéh nu nyeri haté.”—Tamara.
Palajaran penting: Lamun anjeun sering ngobrol jeung sering méré perhatian ka saurang babaturan, engké manéhna bisa nganggap anjeun bogoh ka manéhna.
Ku naon kudu dipikirkeun?
Éta bisa nganyenyeri haté batur.
Ceuk Alkitab, ”Estu nalangsa lamun pangharepan gagal.” (Siloka 13:12) Lamun aya nu terus ngajak ngobrol jeung merhatikeun anjeun, naon nu bakal dipikirkeun ku anjeun?
”Aya nu disebut harepan palsu. Éta téh ibarat lauk nu geus ngégél eupan tapi ku urang laukna dileupaskeun henteu ditéwak henteu. Kitu deui jeung parasaan jelema. Lamun anjeun teu boga niat pikeun bobogohan tapi terus méré harepan ka manéhna, manéhna bisa nyeri haté.”—Jessica.
Éta téh ngagogoréng ngaran sorangan.
Ceuk Alkitab, ”Tong mikirkeun kapentingan diri sorangan baé, tapi pikirkeun ogé kapentingan batur.” (Filipi 2:4) Kumaha pandangan anjeun ka jalma nu ngan mikirkeun kapentinganana sorangan? Kira-kira, kumaha pandangan batur ka manéhna?
”Abdi mah teu resep ka lalaki nu sok ngagoda awéwé. Biasana nu kitu téh moal satia ka pamajikanana mun engké geus nikah. Éta téh égois pisan, sabab manéhna ngamangpaatkeun parasaan batur pédah hayang katingali hébat.”—Julia.
Palajaran penting: Jalma nu sok méré perhatian ka batur tapi embung bobogohan téh nganyenyeri batur sarta ngarugikeun diri sorangan.
Nu bisa dilakukeun ku anjeun
Ceuk Alkitab, ”Ka priya nu ngora kudu siga ka adi atawa lanceuk . . . ka wanita nu ngora kudu siga ka adi atawa lanceuk, bari boga haté nu murni.” (1 Timotius 5:1, 2) Lamun anjeun nuturkeun naséhat éta, anjeun bakal bisa ngajaga sosobatan anjeun jeung lawan jenis.
”Lamun abdi geus nikah, abdi embung ngagoda pasangan batur. Jadi, ti saacan nikah, abdi embung ngagoda lawan jenis.”—Leah.
Ceuk Alkitab, ”Beuki loba omong beuki loba masiat.” (Siloka 10:19) Prinsip éta bisa dipaké dina obrolan sarta dina chat. Sakumaha sering anjeun nga-chat manéhna sarta naon waé nu diomongkeun?
”Mun teu boga niat pikeun bobogohan mah tong nga-chat unggal poé.”—Brian.
Ceuk Alkitab, ”Kabijaksanaan nu asalna ti sorga mah mimitina ngalantarankeun saurang jalma jadi murni.” (Yakobus 3:17) Saurang jalma bisa waé ngarangkul batur téh ku niat nu murni, tapi éta gé bisa nyieun batur jadi salah paham.
”Mun keur ngobrol, abdi ngusahakeun supaya soméah, tapi tetep ngajaga jarak jeung obrolanana gé aya watesna.”—Maria.
Palajaran penting: Pék pikirkeun tindakan anjeun ka lawan jenis. ”Sobat nu hadé téh hésé ditéangna, jadi ulah nyieun batur jadi salah paham. Engké sosobatan urang bisa ruksak,” ceuk saurang budak ngora nu ngaranna Jennifer.
Saran
Pikirkeun kumaha pandangan batur. Lamun aya nu nanya, ”Manéh jeung si éta bobogohan?” Nah, éta hartina anjeun jeung babaturan anjeun téh akrab teuing dina pandangan batur.
Béré perhatian nu sarua ka kabéh lawan jenis, ulah ngan méré perhatian husus ka saurang jalma hungkul.
Ati-ati waktu nga-chat. Pikirkeun sakumaha sering anjeun nga-chat, naon anu diobrolkeun, sarta jam sabaraha anjeun ngirim pesenna. Ceuk budak ngora nu ngaranna Alyssa, ”Lamun geus penting mah ulah nga-chat lawan jenis.”