BAB 26
Ku Naon Aya Loba Kajahatan jeung Kasangsaraan?
Lamun urang keur boga kasusah, biasana urang sok nanya, ”Ku naon bet kieu?” Tapi urang bisa tenang, sabab Alkitab geus méré nyaho jawabanana.
1. Naon nu dilakukeun ku Sétan nepi ka aya kajahatan di dunya ieu?
Sétan si Iblis téh barontak ngalawan Allah. Sétan hayang jadi pamingpin. Ku kituna, manéhna mangaruhan pasangan manusa nu mimiti, nyaéta Adam jeung Hawa, pikeun milu barontak ogé. Sétan ngabohong ka Hawa. Ceuk manéhna, Hawa moal bakal paéh. (Kajadian 3:1-5) Sétan nyieun Hawa mikir yén Yéhuwa téh nahan-nahan hal nu hadé keur manéhna. Sétan gé saolah-olah ngomong yén manusa bakal leuwih bagja lamun teu nuturkeun paréntah Allah. Manéhna nu mimiti ngabohong di dunya ieu. Ku kituna, Alkitab nyebut Sétan téh ”tukang bohong jeung bapana tukang bohong”.—Yahya 8:44.
2. Adam jeung Hawa ngalakukeun naon?
Yéhuwa téh teu pedit. Ceuk Anjeunna, Adam jeung Hawa meunang ngadahar buah ti tangkal mana waé nu aya di Taman Éden. Ngan hiji tangkal nu buahna teu meunang didahar. (Kajadian 2:15-17) Sangkilang geus dibéjaan gé, angger wéh maranéhna ngadahar buah ti tangkal éta. Hawa ’metik jeung ngadahar’ éta buah. Adam gé ”milu ngadahar” buahna. (Kajadian 3:6) Sabenerna, Adam jeung Hawa téh manusa nu sampurna, jadi maranéhna boga sipat bawaan pikeun ngalakukeun nu bener. Ku kituna, waktu ngalanggar paréntah Allah, maranéhna téh ngahaja nyieun dosa sarta nunjukkeun yén maranéhna embung dipingpin ku Allah. Lantaran nyieun putusan nu salah éta, maranéhna jadi sangsara pisan.—Kajadian 3:16-19.
3. Naon pangaruh tina putusan Adam jeung Hawa keur urang?
Waktu Adam jeung Hawa nyieun dosa, maranéhna jadi teu sampurna. Terus, maranéhna ngawariskeun kateusampurnaan ka kabéh turunanana. Alkitab nyebutkeun kieu ngeunaan Adam, ”Dosa asup ka dunya ku lantaran saurang jalma. Éta dosa mawa maot, ku kituna maot téh nyebar ka sakabéh manusa.”—Roma 5:12.
Kadang, urang sangsara lantaran urang salah nyieun putusan, atawa batur nu salah nyieun putusan. Terus, kadang urang gé sangsara lantaran aya kajadian nu teu kasangka-sangka.—Baca Pandita 9:11.
HAYU NGULIK
Tingali ku naon urang teu bisa nyalahkeun Allah lantaran di dunya ieu loba kajahatan jeung kasangsaraan. Terus, perhatikeun kumaha parasaan Anjeunna waktu ningali urang sangsara.
4. Saha nu nyababkeun urang sangsara?
Loba jalma mikir, nu ngawasaan dunya ieu téh Allah. Na éta téh bener? Setél VIDÉO.
Baca Yakobus 1:13 jeung 1 Yahya 5:19, terus bahas:
Na Allah nu nyababkeun kasangsaraan jeung kajahatan?
5. Kumaha kaayaan dunya sanggeus dikawasaan ku Sétan?
Baca Kajadian 3:1-6, terus bahas:
Kabohongan naon nu diucapkeun ku Sétan?—Tingali ayat 4 jeung 5.
Omongan Sétan nu mana anu nunjukkeun yén Yéhuwa téh nahan-nahan hal nu hadé keur manusa?
Ceuk Sétan, na manusa butuh Yéhuwa sabagé Pangawasa supaya bisa bagja?
Baca Pandita 8:9, terus bahas:
Ku lantaran lain Yéhuwa nu ngawasaan dunya ieu, kumaha kaayaan dunya ayeuna?
Mimitina, Adam jeung Hawa téh sampurna sarta hirup di Pirdaus. Tapi maranéhna kalah ka ngadéngékeun Sétan jeung ngalawan ka Yéhuwa
Sanggeus aya nu barontak ka Allah, dunya jadi pinuh ku dosa, kasangsaraan, jeung maot
Yéhuwa bakal nyingkirkeun dosa, kasangsaraan, jeung maot. Engké manusa bakal sampurna jeung hirup di Pirdaus deui
6. Yéhuwa téh prihatin ningali urang sangsara
Na Allah téh teu paduli waktu urang sangsara? Perhatikeun naon nu ditulis ku Raja Daud jeung Rasul Pétrus. Baca Jabur 31:8 jeung 1 Pétrus 5:7, terus bahas:
Sanggeus apal yén Allah téh merhatikeun jeung prihatin waktu urang sangsara, kumaha parasaan anjeun?
7. Allah bakal nyingkirkeun kabéh kasangsaraan manusa
Baca Yesaya 65:17 jeung Wahyu 21:3, 4, terus bahas:
Allah bakal nyingkirkeun kabéh kasangsaraan manusa. Ku naon hal ieu bisa negerkeun urang?
Anjeun apal teu?
Waktu ngucapkeun kabohongan nu pangmimitina, Sétan téh mitnah Yéhuwa. Sétan nyababkeun jalma-jalma mikir yén Yéhuwa téh Pangawasa anu kejem jeung teu adil. Tapi, sakeudeung deui Yéhuwa bakal nyucikeun nami-Na ku cara nyingkirkeun kabéh kasangsaraan manusa. Yéhuwa bakal ngabuktikeun yén cara Anjeunna maréntah téh nu panghadéna. Disucikeunana nami Yéhuwa téh salah sahiji hal nu pangpentingna di jagat raya.—Matius 6:9, 10.
AYA NU NGOMONG: ”Kasangsaraan nu kaalaman ku urang téh cocoba ti Allah.”
Kumaha ceuk anjeun?
INTI BAB
Kajahatan nu aya di dunya ieu téh utamana disababkeun ku Sétan si Iblis jeung pasangan manusa nu mimiti. Yéhuwa prihatin pisan ningali urang sangsara. Sakeudeung deui, Anjeunna gé bakal nyingkirkeun kabéh kasangsaraan urang.
Nu geus dibahas
Naon kabohongan nu diucapkeun ku Sétan si Iblis ka Hawa?
Naon pangaruh tina tindakan Adam jeung Hawa keur urang kabéh?
Ti mana urang apal yén Yéhuwa prihatin ningali urang sangsara?
TINGALI OGÉ
Alkitab ngajelaskeun naon hartina dosa.
Tingali leuwih rinci ngeunaan hal nu diributkeun ku Sétan si Iblis di Taman Éden.
”Ku Naon Allah Ngantep Kasangsaraan?” (Warta Hadé 1 Januari 2014)
Perhatikeun jawaban nu nengtremkeun haté pikeun pananya nu sulit.
”Ku Naon Allah Teu Ngahalangan Nazi Maéhan Loba Jalma?” (Artikel dina jw.org)
Naon nu dipikirkeun ku saurang lalaki waktu ningali jalma-jalma sangsara pisan.