Kutoka Maisha ya Uhalifu Hadi Maisha Yenye Tumaini

KAMA ILIVYOSIMULIWA NA COSTA KOULLAPIS

NILIKODOLEA MACHO KUTA CHAFU ZA SELI YANGU. NILIAZIMIA KWAMBA NILIHITAJI FEDHA NYINGI SANA ILI NIWEZE KUKOMESHA MTINDO-MAISHA WA UHALIFU NILIOKUWA NAO NA KUANZA MAISHA MAPYA.

NILIPOKUWA nimeketi hapo—nikiwa na taabu na majonzi—nilikumbuka kwamba mwaka uliokuwa umetangulia, rafiki zangu 11 walikuwa wamekufa. Mmoja alinyongwa kwa sababu ya uuaji wa kimakusudi, mwingine alijiua alipokuwa akingoja hukumu ya uuaji kimakusudi, watatu walikufa kutokana na kutumia dawa za kulevya kupita kiasi, wawili walipigwa mpaka wakafa katika ghasia za barabarani, na wanne wakafa katika aksidenti za gari. Pia, rafiki zangu kadhaa wengine walikuwa katika magereza mbalimbali wakiwa wamefungwa kwa uhalifu mbaya sana.

Basi nikiwa nimehuzunika katika seli yangu, nilisali kwa bidii kwa Mungu, awaye yote yule, anionyeshe njia ya kutoka katika maisha haya ya uhalifu. Ulipita muda fulani ndipo sala yangu ikajibiwa baadaye. Wakati huohuo, niliweza kuepuka shtaka kali la shambulizi lililokusudia kusababisha madhara mabaya ya kimwili. Majadiliano ya kupunguziwa shtaka yalisaidia, nami nikaweza kupunguziwa shtaka na kifungo. Lakini acha kwanza nieleze jinsi nilivyojikuta katika mashaka hayo.

Nilizaliwa katika Pretoria, Afrika Kusini, mwaka wa 1944 na kukulia huko. Sikuwa na furaha miaka yangu ya kwanza-kwanza, na maisha ya familia yetu yalifanywa yawe yenye taabu na hasira zenye jeuri za Baba, ambazo mara nyingi zilizidishwa na unywaji wa kupindukia. Pia alikuwa na zoea la kucheza kamari, na hali yake ya kihisia-moyo ilibadilika-badilika ikisababisha atutende sisi sote vibaya kwa maneno na kimwili, hasa mama yangu. Ili kuhepa kupigwa daima, nilitorokea mitaani.

Njia Yangu ya Uhalifu

Tokeo ni kwamba, nikawa mjanja nikiwa na umri mchanga sana. Kwa mfano, nilipokuwa na umri wa miaka minane, nilijifunza mambo mawili. Jambo la kwanza lilikuwa wakati niliposhikwa na vichezeo nilivyoiba kutoka kwenye nyumba ya jirani. Nilipigwa vibaya sana na baba yangu. Bado nakumbuka tisho lake lenye hasira: “Nikikushika na vitu vilivyoibwa tena, nitakuua!” Niliazimia, si kutoiba tena, bali kwamba sitashikwa tena. ‘Wakati mwingine nitavificha na sitashikwa,’ ndivyo nilivyojiambia.

Jambo la pili nililojifunza nilipokuwa mchanga halikuhusiana na uhalifu. Wakati wa somo la Maandiko shuleni, mwalimu wetu alitufunza kwamba Mungu ana jina la kibinafsi. “Jina la Mungu ni Yehova,” tukashangaa alipotuambia, “naye husikiliza sala yoyote utakayotoa, maadamu wamwomba kupitia kwa jina la Mwana wake, Yesu.” Jambo hilo lilibaki kwenye akili yangu changa, ijapokuwa halikunizuia kugeukia maisha ya uhalifu. Kwa kweli nilikuwa mwenye ustadi wa kuiba madukani na kuvunja nyumba kufikia wakati nilipofika shule ya sekondari. Rafiki zangu shuleni hawakunisaidia, kwa kuwa wengi wao walikuwa tayari wamekuwa katika shule za kurekebishia tabia kwa sababu ya uhalifu mbalimbali.

Miaka ilipopita, nikawa mhalifu sugu. Nilihusika na mashambulizi mengi ya kupokonya watu vitu, uvunjaji wa nyumba, uibaji wa magari, na mashambulizi mengine yenye jeuri kabla ya hata kumaliza umri wangu wa utineja. Kwa kuwa sikuzote nilikuwa kwenye vyumba vya biliadi (mchezo wa kupiga mipira midogo kwenye meza maalum) na baa, nikitekeleza shughuli mbalimbali kwa ajili ya makuwadi, malaya, na wahalifu, hata sikumaliza mwaka wangu wa kwanza kwenye shule ya sekondari ya ufundi.

Nilishirikiana kwa ukawaida na wahalifu sugu, ambao hawakusita kulemaza yeyote aliyewasaliti. Nilijifunza kwamba ilifaa kunyamaza na kutojisifu kamwe kuhusu mambo niliyotimiza au kuonyesha pesa zangu ovyoovyo. Kufanya hivyo kungekuwa kama kutangaza kwamba uhalifu umefanywa, ambako kungefanya polisi wajue na kuuliza maswali yasiyo rahisi kujibu. Na vibaya hata zaidi, kungeweza kufanya wahalifu wengine waje wakitaka kugawiwa sehemu fulani ya mali iliyoibwa.

Hata hivyo, zijapokuwa tahadhari hizo, nyakati nyingine nilijikuta chini ya upelelezi wa polisi kwa sababu ya kutuhumiwa kuwa nilihusika katika matendo ya uvunjaji wa sheria. Lakini nilijihadhari nisiwe kamwe na kitu chochote ambacho kingenihusisha na uhalifu au ambacho kingenitia hatarini. Wakati mmoja, polisi walivamia nyumba yetu saa tisa za usiku. Walisaka nyumba yote mara mbili, wakitafuta vyombo vinavyotumia umeme, kwa kuwa bidhaa za muuza-jumla wa mahali hapo zilikuwa zimeibwa. Hawakupata kitu. Nilipelekwa kwenye kituo cha polisi ili alama za vidole zichukuliwe lakini sikushtakiwa.

Nahusika na Dawa za Kulevya

Kuanzia umri wa miaka 12, nilianza kutumia kwa ukawaida dawa za kulevya za kubadili akili. Afya yangu ikaanza kudhoofika kutokana na matumizi hayo mabaya, na katika pindi kadhaa karibu nizitumie kupita kiasi. Muda si muda nilijulishwa kwa daktari ambaye alikuwa na uhusiano na wahalifu. Hiyo ilinifanya niwe muuzaji wa dawa za kulevya, na punde nikatambua kwamba kuwapelekea wachuuzi wachache kulinifanya nisiwe katika hatari kubwa kwa sababu singejulikana ilhali wale wengine walijihatarisha.

Kwa kusikitisha, baadhi ya watu niliokuwa nikiwauzia dawa za kulevya walizitumia kupita kiasi nao wakafa au wakatenda uhalifu mbaya zaidi walipokuwa wakichochewa na dawa za kulevya. “Rafiki” mmoja aliua kimakusudi daktari mmoja mashuhuri. Hilo lilikuwa jambo kuu katika habari nchini. Kisha akajaribu kunitia hatarini, lakini sikuwa hata nimesikia juu ya kisa hicho mpaka polisi walipofika mlangoni pangu. Kwa kweli, mara nyingi polisi walikuja na kuniuliza juu ya uhalifu mbalimbali uliokuwa umefanywa.

Hata hivyo, siku moja, nilifanya jambo moja la kipumbavu. Baada ya kutumia dawa za kulevya na kileo kwa juma moja, nilishambulia watu wawili kwa hasira kali baada ya kutoelewana na kuwaumiza vibaya. Asubuhi iliyofuata walinitambua kuwa ndiye niliyewashambulia, nami nikakamatwa kwa shtaka la shambulizi kwa kusudi la kusababisha madhara mabaya ya mwili. Hivyo ndivyo nilivyojikuta gerezani.

Niwe Tajiri Kisha Niishi Maisha Mazuri

Baada ya kufunguliwa gerezani, nilisikia juu ya nafasi ya kuwa msimamizi wa bidhaa kwenye kampuni moja ya madawa. Nilijaza ombi na kumsadikisha mwajiri kwamba nilifaa kwa kazi hiyo. Kwa pendekezo la rafiki ambaye tayari alikuwa katika kampuni hiyo, nilipata kazi hiyo. Niliwaza kwamba, hiyo ilikuwa njia yangu ya kupata fedha nyingi na kwenda kwingine nianze maisha upya. Kwa hiyo, nilijifunza mambo yote ya biashara haraka iwezekanavyo na kulala nikiwa nimechelewa sana ili nijifunze majina ya dawa zote. Nilikuwa na hakika kwamba hiyo ilikuwa njia ya kupata maisha mapya.

Mpango wangu ulikuwa kungoja wakati wangu ufike ili nitumainiwe na waajiri wangu. Kisha kwa wakati unaofaa, ningejipenyeza na kuiba dawa nyingi mno ambazo nilijua zilikuwa zenye thamani sana katika magendo, niziuze, ili kwa kadiri fulani niwe tajiri mara moja. Nilibuni ule nilioamini kuwa udhuru thabiti ili nijihakikishie uhuru na maisha mapya.

Wakati ulifika wa kutekeleza mpango wangu. Usiku mmoja, baada ya kuingia kwa uangalifu kwenye hifadhi hiyo, nilitazama safu zilizojazwa dawa zenye thamani ya mamia ya maelfu ya dola. Hapo ndipo nilipoona uwezekano wangu wa kuanza maisha yasiyo na uhalifu na jeuri. Lakini, kwa mara ya kwanza, dhamiri yangu ikaanza kunisumbua. Ni nini kilichosababisha mchomo huo wa ghafula wa dhamiri wakati ambapo nilikuwa nimesahau kwamba nilikuwa na dhamiri? Acha nikuambie jinsi ilivyokuwa.

Majuma kadhaa kabla ya jambo hilo, mimi na meneja tulikuwa na mazungumzo juu ya maana ya uhai. Kufuatia jambo fulani alilosema, nilijibu kwamba mambo yote yasipowezekana, mtu angeweza kusali. “Kwa nani?” akauliza. “Kwa Mungu,” nikajibu. “Lakini kuna miungu mingi ambayo watu huiomba,” akasema, “kwa hiyo, ungeweza kumwomba yupi?” Nikasema: “Mungu Mweza Yote.” “Oh,” akaendelea, “na jina lake ni jina gani?” “Wamaanisha nini?” nikauliza. “Kama vile wewe na mimi na kila mtu, Mungu Mweza Yote ana jina la kibinafsi,” ndilo lililokuwa jibu lake. Hilo lilikuwa jambo la kiakili, lakini nilikuwa nimeanza kuudhika. Kwa hiyo nikauliza nikiwa nimekasirika: “Basi, jina la Mungu ni jina gani?” “Jina la Mungu Mweza Yote ni Yehova!” akajibu.

Kwa ghafula kumbukumbu la miaka iliyopita likawa wazi, nikakumbuka somo lile darasani nilipokuwa na umri wa miaka minane. Kwa kushangaza, mazungumzo niliyokuwa nayo pamoja na meneja yalikuwa na uvutano mkubwa sana kwangu. Tuliketi kwa muda wa saa nyingi tukiwa na mazungumzo ya maana. Siku iliyofuata aliniletea kitabu Kweli Iongozayo Kwenye Uzima wa Milele.a Nilikisoma kitabu kizima usiku huohuo nami nikasadikishwa mara hiyo kwamba nilikuwa nimeipata kweli na maana ya uhai. Kwa majuma mawili yaliyofuata, hatukufanya mengi ila tu kuzungumzia habari mbalimbali katika kitabu hicho cha buluu chenye kustaajabisha.

Kwa hiyo, nilipokuwa nimeketi kwenye hifadhi yenye giza na utulivu, dhamiri yangu ikaniambia kwamba mipango yangu ya kuiba na kuuza dawa za kulevya ilikuwa kosa. Niliondoka kwa utulivu na kwenda nyumbani, nikiazimia kwamba kuanzia wakati huo na kuendelea sitaiba tena.

Badiliko Kamili

Siku zilizofuata, niliambia familia yangu kwamba niliamua kuanza maisha mapya, na nikaanza kuwaambia baadhi ya kweli za Biblia nilizojifunza. Baba yangu alitaka kunifukuza nyumbani. Lakini ndugu yangu John akanitetea, akimwambia baba yangu: “Hii ni mara ya kwanza maishani mwake Costa kujiingiza katika jambo lisilo la uhalifu, nawe wataka kumfukuza? Lazima nichunguze zaidi jambo hilo.” Nilishangaa kwa furaha, John aliponiomba ajifunze Biblia nami. Kuanzia wakati huo na kuendelea, kila mtu aliyekuja kwangu kutafuta dawa za kulevya alipata nakala ya kitabu Kweli badala yake! Upesi nikaanza kuongoza mafunzo ya Biblia 11 kwa msaada wa kitabu hicho.

Kisha nikapata kujua kwamba meneja wa kampuni hiyo hakuwa Shahidi. Mke wake alikuwa Shahidi kwa miaka 18, lakini yeye “hakuwa amepata wakati kamwe wa kufanya lolote kuhusu kweli.” Kwa hiyo akapanga Shahidi mzoefu anifunze Biblia kwa ukawaida. Upesi funzo langu likanisaidia kuona uhitaji wa kukabiliana na masuala mengine maishani, na haikuchukua muda mrefu kabla kweli ya Neno la Mungu kuanza kuniweka huru kutoka katika njia zangu za kilimwengu.—Yohana 8:32.

Hata hivyo, kwa ghafula nikaanza kuhisi kuzidiwa nguvu na jinsi mambo yalivyokuwa yakitokea haraka kwa muda wa majuma machache tu. Mabadiliko makubwa yalinikabili, nami nikaanza kutambua kwamba vita kubwa dhidi ya mwili na roho ilikuwa ikiningoja kama ningeendelea kufuata mwelekezo ambao masomo yangu ya Biblia yalikuwa yamesema. Kwa upande mwingine, nilitambua kwamba labda kifo, au kupewa kifungo kirefu gerezani kuliningoja ikiwa ningeendelea kuishi maisha niliyokuwa nayo hadi kufikia hapo. Kwa hiyo baada ya kufikiria kwa uzito na kutoa sala kwa bidii, niliamua kufuata njia ya kweli. Nilionyesha wakfu wangu kwa Yehova Mungu kupitia ubatizo wa maji baada ya miezi sita, Aprili 4, 1971.

Thawabu za Kuishi Maisha Mazuri

Nikumbukapo yaliyopita, nyakati nyingine mimi hushindwa na hisia-moyo nifikiriapo baraka ambazo nimefurahia tangu nilipofanya uamuzi wa kuacha njia ya uhalifu. Kati ya watu 11 nilioanza kujifunza nao wakati wa yale majuma matano ya kwanza ya fujofujo, watano wangali wanatembea katika njia ya ile kweli. Mama yangu pia alikubali funzo la Biblia na akawa Shahidi aliyebatizwa, akaendelea kumtumikia Mungu kwa uaminifu mpaka alipokufa mwaka wa 1991. Ndugu zangu wawili waliweka maisha zao wakfu kwa Yehova na sasa wanatumikia wakiwa wazee. Pia niliweza kusaidia mamangu mdogo ajifunze kweli, naye amekuwa akitumikia kwa wakati wote katika huduma kwa miaka 15 iliyopita.

Meneja wa kampuni ya madawa ambapo nilikuwa nikifanya kazi alitiwa moyo sana na mabadiliko niliyofanya maishani hivi kwamba alianza kuchukulia kweli ya Biblia kwa uzito. Mwaka mmoja baada ya mimi kubatizwa, yeye pia alionyesha wakfu wake kwa Mungu kupitia ubatizo wa maji. Baadaye alitumikia akiwa mzee kwa miaka mingi katika mojawapo ya makutaniko ya Pretoria ya Mashahidi wa Yehova.

Sasa nimeoa dada Mkristo aliye wakfu. Leonie nami tulihamia Australia mwaka wa 1978. Wana wetu wawili, Elijah na Paul, walizaliwa huko. Kitia-moyo cha familia yangu kimekuwa chanzo kikubwa cha nguvu kwangu. Nina pendeleo la kutumikia nikiwa mzee katika Canberra, jiji kuu la Australia. Kila siku shukrani zangu zamwendea Yehova, ambaye aliniokoa kutoka maisha ya uhalifu yasiyo na maana ambayo yalikuwa yakiongoza kwenye taabu na kifo. Zaidi ya hilo, alinipa maana maishani mwangu kwa kuandaa tumaini hakika kwangu na kwa wapendwa wangu.

[Maelezo ya Chini]

[Picha katika ukurasa wa 18]

Nilipokuwa na umri wa miaka 12

[Picha katika ukurasa wa 18]

Nikiwa na mke wangu na wana wawili leo