Sura 7

Kufanya Hesabu Juu ya Matumizi ya Hazina za Kristo

 1. Ni serikali gani ambayo haina matatizo ya kiuchumi, na ni nani ambao sasa lazima watoe hesabu kwa serikali hiyo?

HAKUNA serikali isiyo na matatizo ya kiuchumi, isipokuwa moja tu. Serikali nyingi zina madeni makubwa. Ile serikali moja ambayo haina matatizo ya kiuchumi ni “ufalme wa mbinguni” ambao sasa umetangazwa kwa mapana na marefu. (Mathayo 25:1) Duniani wangali wapo wale wanaotazamiwa kuwa washiriki wa Ufalme huo wa kimbingu wanaotumikia serikali hiyo. Katika kipindi hiki chenye hatari sana cha historia yote ya kibinadamu, watumishi hao wa “ufalme wa mbinguni” wanaitwa watoe hesabu. Lazima wafanye hesabu na serikali hiyo kwa habari ya namna wametumia vitu vyenye thamani walivyokabidhiwa.

 2. Kwa sababu gani inatupasa tupendezwe sana na mfano fulani uliotolewa na “Mwana-Mfalme wa Amani”?

² Ili kuonyesha mfano wa jambo hilo, yule mwakilishi mwenye kutokeza zaidi wa huo “ufalme wa mbinguni” zamani sana alitoa mfano. Huo unapasa utupendeze leo, kwa sababu yule “Mwana-Mfalme wa Amani” aliutia katika unabii wake wenye kufika mbali kuhusu “ishara” ambayo ingetia alama “kuwapo” kwake katika Ufalme akiwa na uwezo kamili wa kutawala. (Mathayo 24:3, NW) Sisi leo hatuwezi kuepuka matokeo yatakayofuata kutimizwa kwa mfano huu wa kiunabii, kwa kuwa kuendelea kuwapo kwetu, maisha zetu zenyewe, zinahusika. Kwa hiyo, sasa, hivi ndivyo yule “Mwana-Mfalme wa Amani” alivyosimulia mfano huo kwa mitume wake siku chache tu kabla ya kifo chake cha dhabihu huko Kalvari.

Ule Mfano wa Talanta

 3. Wale watumwa waliopokea talanta kutoka kwa bwana-mkubwa kabla ya kuondoka walizitumiaje wakati wa kutokuwapo kwake?

³ “Basi kesheni [endeleeni kulinda, NW], kwa sababu hamwijui siku wala saa. Maana ni mfano wa mtu atakaye kusafiri, aliwaita watumwa wake, akaweka kwao mali zake. Akampa mmoja talantaa tano, na mmoja talanta mbili, na mmoja talanta moja; kila mtu kwa kadiri ya uwezo wake; akasafiri. Mara yule aliyepokea talanta tano akaenda, akafanya biashara nazo, akachuma faida talanta nyingine tano. Vilevile na yule mwenye mbili, yeye naye akachuma nyingine mbili faida. Lakini yule aliyepokea moja alikwenda akafukua chini, akaificha fedha ya bwana wake.

 4. Bwana-mkubwa aliwaambiaje wale watumwa walioongeza hesabu ya zile talanta?

⁴ “Baada ya siku nyingi akaja bwana wa watumwa wale, akafanya hesabu nao. Akaja yule aliyepokea talanta tano, akaleta talanta nyingine tano, akisema, Bwana, uliweka kwangu talanta tano; tazama, talanta nyingine tano nilizopata faida. Bwana wake akamwambia, Vema, mtumwa mwema na uaminifu; ulikuwa mwaminifu kwa machache, nitakuweka juu ya mengi; ingia katika furaha ya bwana wako. Akaja na yule aliyepokea talanta mbili, akasema, Bwana, uliweka kwangu talanta mbili; tazama, talanta nyingine mbili nilizopata faida. Bwana wake akamwambia, Vema, mtumwa mwema na uaminifu; ulikuwa mwaminifu kwa machache, nitakuweka juu ya mengi; ingia katika furaha ya bwana wako.

 5, 6. Yule mtumwa wa tatu alitoa udhuru gani kwa kuficha talanta, naye bwana-mkubwa alimfanyia nini?

⁵ “Akaja na yule aliyepokea talanta moja, akasema, Bwana, nalitambua ya kuwa wewe u mtu mgumu, wavuna usipopanda, wakusanya usipotawanya; basi nikaogopa, nikaenda nikaificha talanta yako katika ardhi; tazama, unayo iliyo yako. Bwana wake akajibu, akamwambia, Wewe mtumwa mbaya na ulegevu, ulijua ya kuwa navuna nisipopanda, nakusanya nisipotawanya; basi, ilikupasa kuiweka fedha yangu kwa watoao riba; nami nikija ningalipata iliyo yangu na faida yake.

⁶ “Basi, mnyang’anyeni talanta hiyo, mpeni yule aliye nazo talanta kumi. Kwa maana kila mwenye kitu atapewa, na kuongezewa tele; lakini asiye na kitu, hata kile alicho nacho atanyang’anywa. Na mtumwa yule asiyefaa, mtupeni mbali katika giza la nje; ndiko kutakuwako kilio na kusaga meno.”—Mathayo 25:13-30.

 7. Talanta hizo zinafananisha nini?

⁷ Katika mfano huu, zile talanta zinafananisha nini? Kitu chenye thamani kubwa, si kwa maana ya kifedha bali kwa maana ya kiroho. Zile talanta zinafananisha agizo la kufanya wanafunzi wa Kristo. Pamoja na agizo hilo kuna nafasi ile yenye pendeleo kubwa ya kutenda kama mabalozi kwa niaba ya Kristo, Mfalme, kuuwakilisha ule Ufalme kwa mataifa yote ya ulimwengu.—Waefeso 6:19, 20; 2 Wakorintho 5:20, NW.

 8. (a) Ile jamii ya mtumwa mwenye “ulegevu” imetupwa katika giza gani katika wakati wa huu “umalizio wa mfumo wa mambo”? (b) Ni kwa sababu gani ulimwengu wa wanadamu haufurahii nuru ya kibali na baraka ya Mungu?

⁸ Pasipo shaka lo lote, sisi leo tumefikia upeo wa utimizo wa mfano huu wa kiunabii! Kipindi chenye giza zaidi kuliko kinginecho chote katika historia yote ya kibinadamu kimeshukia kizazi hiki! Kweli kweli, kuna giza lenye kufaa nje ya sehemu ionekanayo ya tengenezo la Yehova ambayo katika hiyo ile jamii ya mtumwa mwenye “ulegevu” na “asiyefaa” kitu anaweza kutupwa kwa agizo la Bwana-Mkubwa. Hilo “giza la nje” linaonyesha hali yenye kutiwa giza ya ulimwengu wa wanadamu, sana sana katika maana ya kidini. Ulimwengu wa wanadamu haufurahii nuru ya kibali na baraka ya Mungu. Hauna nuru ya maarifa ya Ufalme wa Mungu. Uko chini ya “mungu wa huu mfumo wa mambo,” ambaye “amepofusha akili za wasioamini, ili mwangaza wa habari njema zenye utukufu juu ya Kristo, ambaye ni mfano wa Mungu usipate kung’aa kwa kupenya.”—2 Wakorintho 4:4, NW.

 9. (a) Katika utimizo wa mfano huo, ni nani anayefananishwa na yule “mtu,” na alisafiri kwenda umbali gani? (b) Kuna ushuhuda gani unaoonyesha kurudi kwake?

⁹ Leo ushuhuda ni mwingi sana kwamba aliyefananishwa na yule “mtu,” aliyekuwa na angalau talanta nane za fedha amerudi kutoka safari zake za ng’ambo. “Mtu” huyo ni Kristo Yesu. Kusafiri kwake kwenda ng’ambo kulimleta kwenye kuwapo kwa Muumba wa jua, mwezi, na nyota za ulimwengu mzima wetu. Kuonyesha kurudi kwake, vita viwili vya kadiri ya kuenea ulimwenguni pote, vikifuatwa sasa na vita vingine vya kadiri ndogo, vimeitia dunia yetu madoa ya damu. Kama ilivyotabiriwa, hivyo vimeambatana na njaa, magonjwa ya kipuku, na matetemeko ya ardhi, na kuongezeka kwa kutokutii sheria na kuhubiriwa kwa “habari njema hizi za ufalme” katika dunia yote inayokaliwa na watu. Hayo yametimiza yale mambo madogo madogo aliyosema Yesu kuwa yangekuwa “ishara ya kuwapo [kwake] na ya umalizio wa mfumo wa mambo.”—Mathayo 24:3-15, NW.

10. (a) Ni kwa sababu gani mtu huyo alisafiri kwenda ng’ambo? (b) Ni kwa sababu gani ulimwengu wa wanadamu haukuona kurudi kwake kwa macho ya asili?

¹⁰ Ijapokuwa haikuonyeshwa waziwazi katika mfano wa Yesu, yule mtu aliyesafiri kwenda ng’ambo, asiwepo kwa muda mrefu, kwa kweli alifanya safari hiyo ili akaupate “ufalme wa mbinguni” uliotajwa mapema kwenye Mathayo 25:1. Ijapotokea Vita ya Ulimwengu ya Kwanza, Yehova Mungu, ambaye ufalme wake juu ya Israeli ulipinduliwa mwaka wa 607 K.W.K., alimtawaza yule Mrithi aliyekuwa na haki ya Ufalme 1914 W.K., wakati ule kukanyagwa-kanyagwa kulipotazamiwa kukomeshwe. Hapana, mataifa hayakuona kwa macho yao ya asili kutawazwa kwa Yule ambaye Mfalme Daudi alimwita “Bwana wangu.” (Zaburi 110:1) Hawangeweza kufanya hivyo kwa sababu yule mtu wa ule mfano, Yesu Kristo, alikuwa amewaambia wanafunzi wake, kabla ya kusafiri kwenda ng’ambo hivi: “Bado kitambo kidogo na ulimwengu haunioni tena.”—Yohana 14:19.

11. (a) Ni nini ingekuwa sehemu ya ishara ya kuonyesha kurudi na kuwapo kwake? (b) Hilo lingetukia wakati gani?

¹¹ Kwa kuwa kuja kwa Kristo kwenye mamlaka ya Ufalme wa kimbingu kungekuwa kusikoonekana kwa macho ya kibinadamu, ilikuwa lazima aonyeshe wazi kuwapo kwake katika Ufalme wa kimbingu kwa njia ya ile ishara ambayo mitume wake walimwomba siku tatu kabla ya kifo chake cha kufia imani. Sehemu ya ishara hiyo yenye kusadikisha ilikuwa iwe kwamba yule mtu angerudi kutoka ng’ambo na kufanya hesabu na watumwa wake ambao alikuwa amekabidhi zile talanta zenye thamani kubwa. Ikiwa hivyo, kufanya hesabu huko pamoja na hao waliopendelewa kutumia talanta kulitazamiwa kutukie baada ya mwaka wa 1914.

12. (a) Ni nani walioangukiwa na wajibu wa kuchukua uongozi katika kutoa ushuhuda wa Ufalme? (b) Kuokolewa kwao kabisa kunategemea nini?

¹² Hilo lingemaanisha kufanya hesabu pamoja na wale ambao wangekuwa warithi wa “ufalme wa mbinguni.” Hilo lingeonyesha kufanya hesabu na mabaki ya lile kundi la Kikristo, ambalo lilikuwa limezaliwa kwa roho ya Mungu tokea siku ya Pentekoste ya mwaka 33 W.K. (Matendo, sura 2) Ilitazamiwa waweko mabaki ya hao duniani wakati wa huu “umalizio wa mfumo wa mambo” tokea 1914. Hao ndio wangeangukiwa na wajibu wa kuchukua uongozi katika kutimiza unabii wa Yesu kwa wakati huo: “Habari njema hizi za ufalme zitahubiriwa katika dunia yote inayokaliwa na watu kwa ushuhuda kwa mataifa yote; na ndipo ule mwisho utakapokuja.” (Mathayo 24:14, NW; Marko 13:10) Wao ndio wenye daraka la kuwa waaminifu mpaka mwisho, ili waokolewe kuingia katika Ufalme wa mbinguni. (Mathayo 24:13) Kusudi waokolewe mwishowe, Mungu Mwenye Nguvu Zote anawatia nguvu wavumilie mpaka sasa, ijapokuwa mateso ya ulimwenguni pote. Uhakika huo unashuhudia wana kibali chake!

Wenye Kudai kwa Uwongo kuwa Wana Zile Talanta

13. (a) Ni nani anayedai kuwa amepokea zile talanta? (b) Tunafikia uamuzi gani kuhusu yeye?

¹³ Jumuiya ya Wakristo inadai ina heshima ya kukabidhiwa zile talanta za yule mtu tajiri katika mfano wa Yesu. Lakini tunapofikiria mwendo wake wa tendo tangu 1914, tunafikia uamuzi gani? Huu: Yeye hakutenda kulingana na madai yake. Akiwa asiyeaminika kwa yule mtu wa ule mfano, yeye amejipanga upande wa falme za ulimwengu huu; wanasiasa wa serikali za kilimwengu ndio hawara zake. Yeye angali anaunga mkono Umoja wa Mataifa, yule mrithi wa Ushirika wa Mataifa ambao sasa umekufa.

14. Leo tunaipata Jumuiya ya Wakristo wapi?

¹⁴ Yeye hata halingani na yule mtumwa mwenye talanta moja, ambaye alijionyesha kuwa mlegevu na ambaye hakuongeza mali za bwana-mkubwa wake. Kwa hiyo katika kipindi hiki tangu upeo wa Vita ya Ulimwengu ya Kwanza 1918, bila shaka Jumuiya ya Wakristo imefunuliwa kuwa sikuzote imekuwa katika giza la nje ya nyumba yenye kuangazwa vizuri ya Bwana-Mkubwa. Katika usiku wa manane nje huko ulimwenguni ndiko, kwa njia ya mfano, kulia kwake na kusaga meno kwake kumeanza kutukia. Kulia na kusaga meno kwingi zaidi kungali kutatukia wakati hawara zake za kisiasa watakapomgeukia na kumvua mavazi yake na kumwacha uchi akiwa ile sehemu yenye kulaumika zaidi ya Babuloni Mkuu, ile milki ya ulimwengu ya dini ya uwongo.

Jamii ya “Mtumwa Yule Mbaya” Yatupwa Nje

15. Ni nani waliotimiza mfano wa yule mtumwa mlegevu, nao sasa wanajikuta wapi?

¹⁵ Wale ambao kwa kweli wamekuwa sehemu ya mabaki yaliozaliwa kwa roho na waliokabidhiwa vitu vyenye thamani vya Ufalme, lakini ambao wameacha kufanya jitihada ya kuongeza faida za yule Bwana-Mkubwa aliyerudi, wametupwa nje ya utumishi wa kifalme wa Bwana-Mkubwa. (Mathayo 24:48-51) Hatuioni tena jamii ya “mtumwa yule mbaya” ikihubiri “habari njema hizi za ufalme.” Badala yake, wao wanahangaikia tu wokovu wao binafsi badala ya faida ya Ufalme wa Mungu. Sasa wao wanajikuta wamo katika “giza la nje,” ulimo ulimwengu wa wanadamu. Talanta yao ya mfano imechukuliwa kutoka kwao na kupewa jamii ile inayoonyesha nia ya kutumia talanta hiyo wakati wa sehemu inayobaki ya huu “umalizio wa mfumo wa mambo.”

16. (a) Huu ni wakati unaofaa kabisa wa kutumiaje zile talanta za mfano? (b) Ni wajibu gani ambao sasa unaangukia ule “mkutano mkubwa” wa “kondoo wengine”?

¹⁶ Hakujapata kamwe kuwa na wakati wenye kufaa zaidi kama huu wa kutangaza ‘habari njema za ufalme’ kwa kutumia ile “talanta,” yaani, ile nafasi, lile pendeleo, la kutenda kama “mabalozi badala ya Kristo,” yule Mfalme anayetawala, na kumfanyia wanafunzi. (2 Wakorintho 5:20, NW) Na mwisho ukaribiapo kwa haraka, inawalazimu “mkutano mkubwa” wa “kondoo wengine” kuwasaidia hao mabalozi waliozaliwa kwa roho wanaobaki wanapotumia kikamilifu na kwa bidii ile “talanta” yenye thamani waliyokabidhiwa.

[Maelezo ya Chini]

[Picha katika ukurasa wa 59]

Wale wanaoonyesha tabia za mtumwa yule mbaya wanatolewa kwenye utumishi wa Bwana-Mkubwa na kutupwa nje katika giza