Sura 18

Ushikamanifu kwa Tengenezo Lionekanalo la Mungu Leo

 1, 2. Andiko la Zaburi 50:5 litaelewekaje?

KATIKA Zaburi 16:10, NW imeandikwa hivi: “Wewe hutaacha nafsi yangu katika Sheoli. Wewe hutaruhusu mshikamanifu wako aone shimo.” Na katika Zaburi 50:5, NW imeandikwa hivi: “Nikusanyie washikamanifu wangu uwalete nilipo, wale wanaokata kauli ya agano langu juu ya dhabihu.” Je! Hao wanaokata kauli ya agano la Yehova ndio wanaotoa “dhabihu”? Hapana, washikamanifu hao hawajitoi “dhabihu” wao wenyewe, kutoa miili yao ya nyama ili kufanya mapatano pamoja na Mungu.

² Basi, kauli ya agano hilo inakatwaje? Juu ya “dhabihu” ya yule “mshikamanifu” ambaye nafsi yake haikuachwa Sheoli lakini alifufuliwa kutoka kwa wafu. Mtume Petro alitumia maneno hayo ya Zaburi 16:10 juu ya Yesu Kristo akaendelea kusema: “Yeye [Daudi] aliona kimbele akasema kuhusu ufufuo wa Kristo, kwamba yeye hakuachwa katika Hadesi wala mwili wake haukuona kuoza. Yesu huyu Mungu alifufua.”—Matendo 2:25, 27, 31, 32, NW.

 3. Ni nani hao wanaokusanywa kulingana na amri katika Zaburi 50:5, na kwa sababu gani wanapaswa kusukumwa wajithibitishe kuwa washikamanifu kwa Mungu?

³ Yesu huyu aliyefufuliwa ndiye Mpatanishi wa lile agano jipya, na ni juu ya msingi wa dhabihu yake kwamba lile agano jipya linahalalishwa. (Waebrania 9:15, 17) Kwa hiyo ni nani hao wanaokusanywa kulingana na amri katika Zaburi 50:5? Wao ni wanafunzi wa Yesu walio katika lile agano jipya kwa sababu ya dhabihu yake. Kwa kuwa na shukrani kwa Yehova kwa ajili ya dhabihu hiyo isiyolinganika, wanapaswa kusukumwa wajithibitishe kuwa washikamanifu kwake.

 4, 5. (a) Shetani Ibilisi alikuwa na fanikio gani wakati wa vita ya kwanza ya ulimwengu katika jitihada zake za kuharibu tengenezo lionekanalo la Yehova? (b) Makao makuu ya Sosaiti yalihamishwa yakapelekwa wapi, na kwa sababu gani? (c) Katika ulinganifu wa kisasa wa Zaburi 137:1, ni nini iliyokuwa hali ya moyoni, au nia, ya mabaki washikamanifu walipoifikiria hali iliyolemazwa ya tengenezo la Mungu?

⁴ Ufalme wa Yehova uliposimamishwa katika mbingu 1914, mataifa yalikasirika yakaanza kupinga Ufalme huo kwa kupigana vita ya kwanza ya ulimwengu, na Mungu aliruhusu hilo. (Zaburi 2:1, 2) Shetani Ibilisi alijaribu kutumia pigano hilo la ulimwengu kuharibu sehemu ionekanayo ya tengenezo la Yehova. Yeye alifanikiwa kufanya msimamizi wa Sosaiti ya Mnara wa Mlinzi afungwe katika gereza la kitaifa huko Atlanta, Georgia. Wawakilishi wengine saba wa Sosaiti hiyo walifungwa pamoja naye.

⁵ Kwa sababu ya mateso, makao makuu ya Sosaiti huko Brooklyn, New York, yalihamishwa yakapelekwa kwenye nyumba iliyokodishwa huko Pittsburgh, Pennsylvania. Hilo lilifanywa ili kuendeleza uchapaji wa gazeti Mnara wa Mlinzi. Kutukuzwa mbinguni kwa waaminifu kulitazamiwa karibuni. Lakini yale mabaki yalielekea kulia yalipofikiria hali ya tengenezo la Yehova ya kudhulumiwa na kulemazwa.—Zaburi 137:1.

Ushikamanifu Wakati wa Kufungwa Gerezani

 6-8. Wakati wa kufungwa kwake gerezani, msimamizi wa sosaiti, J. F. Rutherford, alionyeshaje ushikamanifu kwa tengenezo la Yehova?

⁶ Akionyesha ushikamanifu kwa tengenezo la Yehova wakati wa kifungo chake gerezani, msimamizi wa Sosaiti ya Mnara wa Mlinzi, J. F. Rutherford, Desemba 25, 1918, aliandika barua ya pekee kwa J. A. Bohnet, mtumishi mwenzake wa Yehova mwenye kutumainiwa. Alipelekewa kwa kutumia anwani ya afisi ya Sosaiti katika Pittsburgh. Rutherford aliandika yafuatayo:

⁷ “Kwa sababu mimi nilikataa kukubaliana na Babuloni, lakini kwa uaminifu nikajaribu kumtumikia Bwana yangu, nimo gerezani, [na] kwa ajili ya hilo nashukuru. . . . Mimi ningependelea zaidi kibali Chake na tabasamu na kuwa gerezani, kuliko kukubaliana au kukubali kushindwa na yule Mnyama na kuwa huru na kusifiwa na ulimwengu wote. Ni jambo lenye baraka, [na] tamu kuteseka kwa ajili ya utumishi wa uaminifu kwa Bwana. Katika ule Ufalme tutaiona kuwa yenye thamani kubwa kuliko vitu vingine vyote ile tabasamu ya Baba. Hilo lapasa kuwa juu zaidi katika akili ya kila mtoto wa Mungu. Tunatamani sana ule muungano utakaotufanya kuwa Mmoja huko. Mimi nina furaha, hata hivyo mimi ninatamani sana kuwaona ninyi nyote tena. Ule mkusanyiko na mkutano wa kila mwaka unakaribia. Roho ya Kristo na ijae moyo wa kila mhudhuriaji . . . ”

⁸ “Kungali kuna mengi ya kufanya. Litakuwa pendeleo kubwa kushiriki. Ni wale tu wanaompenda Yeye sana walio waaminifu na watakaoheshimiwa hivyo. . . . Kabla ya siku hiyo ya furaha lazima ushuhuda wa juhudi utolewe. . . . Njia zilizotumiwa wakati uliopita hazitatimiza matakwa, lakini Bwana katika njia Yake mwenyewe iliyo njema ataandaa. . . . Mimi ninafurahi kwamba sisi tuliwekewa kifungo hiki badala ya Ndugu Russell. Sijapata kamwe kuchukia sana uovu na kupenda uadilifu kama sasa na kutamani sana kuwasaidia wengine. . . . Ushindi wenye shangwe ya Sayuni unakaribia.”

Tengenezo la Mungu “Sababu Kuu ya Kufurahi” Kwao

 9. Ni mwelekeo gani wa mtunga zaburi waliouonyesha wawakilishi wa Sosaiti waliofungwa?

⁹ Ijapokuwa watumishi wa Yehova waliitwa kwa dharau katika ulimwengu kuwa wasio washikamanifu, wahaini, na wasiopenda nchi yao, wao hawakulikana tengenezo la Yehova. Walikataa kuacha msimamo wao chini ya mkazo huo. Ingekuwa afadhali wapoteze mkono wao wa kuume wasiweze kuutumia au wawe bubu kuliko kulisahau tengenezo la Mungu na kuacha kulifanya liwe “sababu kuu ya kufurahi” kwao.—Zaburi 137:5, 6, NW.

10, 11. (a) Mabaki washikamanifu walisali nini, na ni maneno gani ya mtunga zaburi waliyotumia kuhusu Edomu? (b) Maadui wa tengenezo la Yehova lionekanalo walifaulu kufanya nini, na maadui hao hawakutazamia nini kamwe?

¹⁰ Maadui wa Yehova wakiwa na nia yenye madhara walifurahia tendo walilofanyiwa wawakilishi wa kidunia wa tengenezo lake la ulimwengu mzima. Lakini watumishi wa Yehova waliomba siku yake ya kisasi ije kwa sababu ya aibu yote hiyo iliyorundikwa juu ya tengenezo lake. Walitumia maneno ambayo mtunga zaburi alisema kwa habari ya Edomu wa kale: “Ee [Yehova], uwakumbuke wana wa Edomu, siku ya Yerusalemu. Waliosema, Bomoeni! Bomoeni hata misingini!” (Zaburi 137:7; Wagalatia 4:26) Hasha, Yehova anapenda sana tengenezo lake lililo mfano wa mke hivi kwamba hawezi kusahau yale ambayo wale walio sehemu ya tengenezo la Ibilisi wamesema na kutenda dhidi ya washikamanifu wa tengenezo lake la kidunia.

¹¹ Kwa kuonekana kote kwa nje-nje wakati huo, washirika hao wa kisiasa wa Babuloni Mkuu ‘walibomoa hata misingini’ tengenezo lionekanalo la Yehova. Wao hawakutazamia kamwe kuliona likiinuka kutoka mavumbini na kuwa tengenezo la ulimwenguni pote kama lilivyo leo.

Ile Furaha ya Mlipa Kisasi Wake

12. (a) Ni nani aliyethibitika kuwa mkombozi wa watu wa Yehova waliokuwa mateka katika Babuloni ya kale, na je! Zaburi 137:8, 9 inamtaja yeye katika maana kamili? (b) Mistari hiyo ilitabiri nini juu ya mlipiza kisasi wa tengenezo la Mungu la kidunia?

¹² Yehova alimtumia Koreshi mtawala Mwajemi kuwakomboa watu wake kutoka mamlaka ya ulimwengu ya kale Babuloni. Lakini katika maana kamili, Koreshi siye aliyemaanishwa katika maneno ya kufunga ya Zaburi 137, yanayomtaja Babuloni Mkuu, ile milki ya ulimwengu ya dini ya uwongo: “Ee binti Babuloni utakayeporwa, mwenye furaha atakuwa yeye atakayethawabisha wewe kwa matendo yako mwenyewe uliyotutenda sisi. Mwenye furaha atakuwa yeye akamataye na kuwaseta vipande vipande watoto wako kwenye mwamba mchongofu.”—Zaburi 137:8, 9, NW.

13, 14. Kwa sababu gani “mwenye furaha” huyo wa Zaburi 137:8, 9 hangekuwa zile mamlaka za kisiasa zitakazomharibu Babuloni Mkuu?

¹³ Ni nani atakayekuwa huyo “mwenye furaha”? Je! Huyo “mwenye furaha” anawakilisha zile “pembe kumi” zilizo juu ya kichwa cha yule “mnyama,” ambaye juu ya mgongo wake mfumo wa kidini wa kale wenye ukahaba umepanda kwa sherehe nyingi kwa muda mrefu sana? Hapana, kwa sababu waharabu hao wa kisiasa wa milki ya ulimwengu ya dini ya uwongo hawaiharibu ili kuweka njia tayari kwa ajili ya ibada safi ya Mungu wa kweli. Wao hawafanyi hivyo kwa ajili ya utukufu wa Mungu wa Biblia. Hivyo, basi, hao wangewezaje kwa kweli kuwa yule “mwenye furaha” anayeonyeshwa na mtunga zaburi.

¹⁴ Mamlaka za kisiasa za ulimwengu huu hazitimizi kazi hiyo ya kupinga dini kwa sababu ya kuwapenda waabudu wa Yehova. Kwa nini sivyo? Kwa sababu Mashahidi wa Yehova watakuwa kama kizuizi chao cha kutokeza ulimwengu unaomkana Mungu kabisa. Kwa hiyo mamlaka hizo za kisiasa ni vyombo tu vinavyotumiwa na Mungu wa wale Mashahidi kutimiza kusudi lake mwenyewe.—Ufunuo 17:17.

15. Kwa kweli ni nani anayezisukuma mamlaka za kisiasa, na kupitia nani?

¹⁵ Hivyo, ijapokuwa mamlaka hizo za kisiasa huenda zikatumiwa moja kwa moja kuiangamiza milki ya ulimwengu ya dini ya uwongo, kwa kweli Yehova Mungu ndiye anayezisukuma. Jinsi gani? Yeye anamtumia Mwanaye wa kifalme, Koreshi Mkubwa Zaidi, Yesu Kristo. Hivyo, Yesu Kristo akiwa na mamlaka ya Ufalme ndiye yule “mwenye furaha” aliyetabiriwa na mtunga zaburi!

16. Yehova anawaangamizaje “watoto” wa Babuloni?

¹⁶ Ijapokuwa Yehova atawalinda washikamanifu wake, yeye kwa maana ya mfano, atakamata kila mmoja wa “watoto” wa kidini wa ule mfumo wa fundisho la uwongo ulio mfano wa kahaba na kuwaseta vipande vipande juu ya kile kinachoonekana kikubwa kama “mwamba mchongofu”—ule ufalme wa Yehova Mungu usioshindwa kupitia Yesu Kristo.

17. (a) Kulingana na Isaya 61:1, 2, Yesu angetangaza nini baada ya kupakwa mafuta kwa roho ya Mungu? (b) Tangazo hilo linatimizwaje leo?

¹⁷ Alipokuwa duniani, Yesu alipakwa mafuta kwa roho ya Mtegemezaji wake wa kimungu si ili ‘autangaze tu mwaka wa nia njema upande wa Yehova’ bali pia ‘aitangaze siku ya kisasi upande wa Mungu wetu.’ (Isaya 61:1, 2, NW; Luka 4:16-21) Katika wakati wetu, “siku za mwisho” za huu mfumo wa mambo, Yehova kwa kutumia watumishi wake waaminifu anatangaza ile “siku ya kisasi upande wa Mungu wetu” katika dunia yote inayokaliwa na watu kuwa onyo kwa mataifa yote. Katika kutoa tangazo hilo “mkutano mkubwa” unaoendelea kuongezeka wa wanafunzi wa Yesu Kristo wenye mfano wa kondoo, kama ulivyotangulia kuonwa katika Ufunuo 7:9-17 umejiunga na yale mabaki.

18. Ni furaha gani watakayoishiriki washikamanifu wa Mungu?

¹⁸ Wote hao, wale mabaki na ule “mkutano mkubwa,” wametii lile agizo la kimalaika kwenye Ufunuo 18:4. Wao wametoka katika Babuloni Mkuu. Kwa sababu gani tendo hilo ni la uharaka? Kwa sababu ni lazima wamkimbie Babuloni Mkuu kabla “watoto” wake wa kidini hawajasetwa vipande vipande na kuharibiwa na “yule mnyama” na zile “pembe kumi” zake kabla tu ya Har–Magedoni. Washikamanifu hao watashiriki ile furaha ya yule Koreshi Mkubwa Zaidi, Yesu Kristo. Watajiunga na mbingu katika kusema: “Msifuni Yah, enyi watu! Wokovu na utukufu na uweza ni wa Mungu wetu kwa sababu hukumu zake ni za kweli na uadilifu. Kwa maana ametekeleza hukumu juu ya kahaba mkubwa aliyeiharibu dunia kwa uasherati wake.”—Ufunuo 19:1, 2, NW; linganisha Yeremia 51:8-11.

19. Ni furaha gani wanayofurahia sasa mabaki washikamanifu, na ni furaha gani kubwa zaidi inayowangojea?

¹⁹ Tangu 1919 Yehova amewatendea ‘jambo kuu’ watu wake. (Zaburi 126:1-3) Kwa huku kukuza uweza wake wa kuokoa, akionyesha kwamba yeye ni “Mungu mwaminifu,” mabaki yaliyokombolewa yangali na furaha ya moyoni. (Kumbukumbu la Torati 7:9) Wana furaha nyingi sana, lakini kuna ile furaha kubwa zaidi inayowangojea. Itakuwa wakati wanaposhiriki ile furaha ya yule Koreshi Mkubwa Zaidi, yule Mfalme anayetawala, Yesu Kristo, wakati anapowaseta vipande vipande “watoto” wote wa lile tengenezo la kiibilisi.

20. Ni nani wengine wanaoishiriki furaha ya mabaki wapakwa mafuta, na kwa sababu gani?

²⁰ Mamilioni ya wale ambao hapo kwanza walikuwa “mateka” wa Babuloni Mkuu tayari yamesaidiwa kulikimbia tengenezo hilo la kidini lililohukumiwa maangamizi kabla ya uharibifu walo wenye jeuri. Matokeo yamekuwa ule “mkutano mkubwa” wa “kondoo wengine.” Hesabu yao sasa, duniani pote ni zaidi ya 3,000,000, bila kuwa na kikomo cha hesabu ambayo itaokolewa isipatwe na uharibifu utakaoipata ile milki ya ulimwenguni pote ya dini ya uwongo. Katika kuonyesha ushikamanifu wao kwa tengenezo la Yehova, wanaishiriki furaha ya mabaki kwa kujiunga nayo katika kuitangaza siku ya Yehova ya kisasi juu ya Babuloni Mkuu wa kidini.

21. Inatupasa tuwe na mwelekeo gani juu ya Babuloni Mkuu na mateka wake?

²¹ Basi, acheni kusiwe na kukubaliana na hiyo milki ya ulimwengu ya dini ya uwongo. Acheni kusiwe na kuirudia katika hizi siku za kupunguka kwayo. Na tuendelee kuwasaidia mateka wengi iwezekanavyo wa Babuloni Mkuu watoke katika huo mfumo uliohukumiwa maangamizi kabla Koreshi Mkubwa Zaidi hajajipatia ushindi wake wenye kufurahisha.