Sura 17
Kurudi kwa Kristo Kunaonekanaje?
1. (a) Kristo alitoa ahadi gani? (b) Kuna uhitaji gani wa kurudi kwa Kristo?
“NITAKUJA TENA.” (Yohana 14:3) Yesu Kristo aliwapa mitume wake ahadi hiyo alipokuwa pamoja nao usiku ule uliotangulia kufa kwake. Labda utakubali kwamba haujapata kuwako wakati kama huu wenye uhitaji mkubwa zaidi wa amani, afya na uzima ambavyo kurudi kwa Kristo katika mamlaka ya Ufalme kutaletea wanadamu. Lakini Kristo anarudi namna gani? Ni nani wanaomwona, na kwa njia gani?
2. (a) Anaporudi, Kristo anapeleka wafuasi wake waliopakwa mafuta, kutia na mitume wake, wakaishi wapi? (b) Ni miili ya namna gani wanayokuwa nayo huko?
2 Anaporudi, Kristo haji kuishi duniani. Badala yake, wale watakaotawala wakiwa wafalme pamoja naye wanachukuliwa wakaishi pamoja naye mbinguni. Yesu aliwaambia mitume wake hivi: “Nitakuja tena niwakaribishe kwangu; ili nilipo mimi, nanyi mwepo.” (Yohana 14:3) Hivyo, Kristo anaporudi, wale wanaochukuliwa kwenda mbinguni wanakuwa watu wa kiroho, nao wanamwona Kristo katika mwili wake wa kiroho uliotukuzwa. (1 Wakorintho 15:44) Lakini je! wanadamu wale wengine, ambao hawataenda mbinguni, watamwona Kristo arudipo? SABABU INAYOFANYA ASIWEZE KURUDI AKIWA BINADAMU
3. Ni ushuhuda gani wa Biblia unaoonyesha kwamba wanadamu hawatamwona Kristo tena?
3 Usiku ule ule Yesu aliendelea kuwaambia mitume wake hivi: “Baada ya muda mrefu kidogo ulimwengu hautaniona tena.” T(Yohana 14:19, NW) “Ulimwengu” huo maana yake ni wanadamu. Basi hapo Yesu alisema waziwazi kwamba watu walio duniani hawangemwona tena baada ya kufa kwake. Mtume Paulo aliandika hivi: “Ingawa sisi tumemtambua Kristo kwa jinsi ya mwili, lakini sasa hatumtambui hivi tena.”—2 Wakorintho 5:16.
4. Ni nini kinachoonyesha kwamba Kristo anarudi akiwa mtu wa kiroho mwenye nguvu nyingi na asiyeonekana?
4 Hata hivyo watu wengi wanaamini kwamba Kristo atarudi katika mwili ule ule wa kibinadamu ambao aliuawa nao, na kwa-mba wote wanaoishi duniani watamwona. Walakini, Biblia inasema Kristo anarudi katika utukufu akiwa pamoja na malaika wote, na kwamba anaketi “katika kiti cha utukufu wake.” (Mathayo 25:31) Kama Yesu angekuja akalie kiti cha enzi cha kidunia akiwa mwanadamu, angekuwa mwenye cheo cha chini kuliko kile cha malaika. Lakini yeye anakuja akiwa ndiye mwana aliye na nguvu na utukufu mwingi sana kuliko ule wa wana wote hao wa kiroho wa Mungu na kwa hiyo, kama wao, hata yeye hawezi kuonekana.—Wafilipi 2:8-11.
5. Sababu gani Kristo hangeweza kurudi katika mwili wa kibinadamu?
5 Kwa upande mwingine, miaka zaidi ya 1,900 iliyopita ilikuwa lazima Yesu ajifanye kuwa mdogo zaidi na kuwa mwanadamu. Alihitaji kutoa uhai wake mkamilifu wa kibinadamu uwe ukombozi kwa ajili yetu. Wakati mmoja Yesu alieleza hivi jambo hilo: “Na chakula nitakachotoa mimi ni mwili wangu, kwa ajili ya uzima wa ulimwengu.” (Yohana 6:51) Kwa njia hiyo Yesu aliutoa mwili wake wenye nyama uwe dhabihu kwa ajili ya wanadamu. Dhabihu hiyo ingetumika kwa muda gani? Mtume Paulo anajibu hivi: “Sisi tumetakaswa kupitia kutolewa kwa mwili wa Yesu Kristo mara moja tu kwa wakati wote.” (Waebrania 10:10, NW) Akiisha kutoa mwili wake kwa ajili ya uzima wa ulimwengu, Kristo hangeweza kamwe kuuchukua tena awe mwanadamu tena. Kwa sababu hiyo ya msingi kurudi kwake kusingeweza kamwe kuwa katika mwili wa kibinadamu alioutoa uwe dhabihu mara moja kwa wakati wote.
MWILI WENYE NYAMA HAUPELEKWI MBINGUNI
6. Sababu gani watu wengi wanaamini kwamba Kristo alichukua mwili wake wenye nyama akaenda nao mbinguni?
6 Walakini, watu wengi wanaamini kwamba Kristo alipeleka mwili wake wenye nyama mbinguni. Wanasema kwamba Kristo alipofufuliwa kwa wafu, mwili wake wenye nyama haukupatika-na tena kaburini. (Marko 16:5-7) Vilevile, baada ya kufa kwake Yesu aliwatokea wanafunzi wake akiwa na mwili wenye nyama ili awaonyeshe alikuwa hai. Wakati mmoja hata alimwambia mtume Tomasi aingize mkono wake katika shimo lililokuwa katika ubavu Wake ili Tomasi aamini kwamba kweli alikuwa amefufuliwa. (Yohana 20:24-27) Je! hilo halihakikishi kwamba Kristo alifufuliwa katika mwili ule ule ambao aliuawa nao?
7. Ni nini kinachoonyesha kwamba Kristo alienda mbinguni akiwa mtu wa kiroho?
7 Hapana. Biblia inaonyesha waziwazi inaposema hivi: “Kristo alikufa mara moja tu kwa wakati wote kuhusu dhambi . . . , yeye akiuawa katika mwili, lakini akafanywa hai katika roho.” (1 Petro 3:18, NW) Wanadamu wenye miili yenye nyama na damu hawawezi kuishi mbinguni. Kwa habari ya ufufuo wa kwenda kwenye uzima wa kimbingu, Biblia inasema hivi: “Hupandwa mwili wa asili; hufufuliwa mwili wa roho. . . . nyama na damu haziwezi kuurithi ufalme wa Mungu.” (1 Wakorintho 15:44-50) Watu wa kiroho walio na miili ya kiroho ndio peke yao wanaoweza kuishi mbinguni.
8. Ilikuwaje kwa mwili wa Kristo wa kibinadamu?
8 Basi, ilikuwaje na mwili wenye nyama wa Yesu? Je! wanafunzi hawakukuta kaburi likiwa tupu? Ndiyo, kwa sababu Mungu aliondoa mwili wa Yesu. Sababu gani Mungu alifanya hivyo? Kufanya hivyo kulitimiza yaliyokuwa yameandikwa katika Biblia. (Zaburi 16:10; Matendo 2:31) Hivyo Yehova aliona inafaa aondoe mwili wa Yesu, kama vile alivyokuwa amefanya zamani kuhusu mwili wa Musa. (Kumbukumbu la Torati 34:5, 6) Vilevile, kama mwili huo ungaliachwa kaburini, wanafunzi wa Yesu hawangalifahamu kwamba yeye alikuwa amefufuliwa kwa wafu, maana wakati huo hawakuwa wamethamini sana mambo ya kiroho.
9. Iliwezekanaje Tomasi akaweka mkono wake katika jeraha lililokuwa katika mwili ambao Yesu aliyefufuliwa alifanyiza?
9 Lakini kwa kuwa mtume Tomasi aliweza kuweka mkono wake katika shimo lililokuwa katika ubavu wa Yesu, je! hiyo haionyeshi kwamba Yesu alifufuliwa kwa wafu katika mwili ule ule uliopigiliwa misumari kwenye mti? Hapana, maana Yesu alijivika tu mwili wenye nyama, kama malaika walivyokuwa wamefanya zamani. Ili amsadikishe Tomasi Yeye alikuwa nani, Yesu alitumia mwili uliokuwa na mashimo ya majeraha. Alijifanya aonekane kuwa binadamu kamili, anayeweza kula na kunywa, kama wale malaika ambao Abrahamu alikaribisha safari moja.—Mwanzo 18:8; Waebrania 13:2.
10. Ni nini kinachoonyesha kwamba Yesu alijivika miili tofauti-tofauti yenye nyama?
10 Ijapokuwa Yesu alimtokea Tomasi katika mwili uliofanana na ule aliouawa nao, Yeye alijivika vilevile miili tofauti-tofauti alipowatokea wafuasi Wake. Ndiyo maana Maria Magdalene kwanza alidhani Yesu alikuwa mtunza bustani. Nyakati nyingine wanafunzi wake hawakumtambua kwa mara ya kwanza. Nyakati hizo si sura yake iliyomtambulisha, bali ni neno au tendo fulani walilotambua.—Yohana 20:14-16; 21:6, 7; Luka 24:30, 31.
11, 12. (a) Kristo aliondoka duniani kwa jinsi gani? (b) Basi imetupasa tutazamie kurudi kwa Kristo kuwe kwa jinsi gani?
11 Kwa muda wa siku 40 baada ya kufufuliwa kwake, Yesu aliwatokea mara nyingi wanafunzi wake akiwa katika mwili wenye nyama. (Matendo 1:3) Kisha akaondoka kwenda mbinguni. Lakini huenda wengine wakauliza: ‘Je! wale malaika wawili waliokuwapo hawakuwaambia mitume kwamba Kristo “atakuja jinsi iyo hiyo mlivyomwona akienda zake mbinguni”?’ (Matendo 1:11) Ndiyo, walisema hivyo. Lakini angalia kwamba walisema “jinsi iyo hiyo,” si katika mwili uo huo. Naye Yesu aliondoka jinsi gani? Ni kwa ukimya, bila kujionyesha kwa watu wote. Mitume wake peke yao ndio waliojua habari hiyo. Ulimwengu haukujua.
12 Ebu angalia namna Biblia inavyosimulia jinsi Yesu alivyowaacha mitume wake akienda zake mbinguni: “Walipokuwa wakitazama, akainuliwa, wingu likampokea kutoka machoni pao.” (Matendo 1:9) Basi Yesu alipoanza kwenda katika anga, wingu lilimficha asionwe na macho halisi ya mitume wake. Kwa hiyo, Yesu alipokuwa akiondoka waliacha kumwona. Hawangeweza kumwona. Ndipo akiwa katika mwili wake wa kiroho akapanda mbinguni. (1 Petro 3:18) Basi kurudi kwake pia kungekuwa katika mwili wa kiroho, kusikoonekana.
NAMNA ANAVYOONWA NA KILA JICHO
13. Tutafahamuje usemi wa kwamba “kila jicho litamwona” Kristo anapokuja na mawingu?
13 Basi, tuwe na ufahamu gani juu ya maneno ya Ufunuo 1:7? Humo mtume Yohana anaandika hivi: “Tazama, yuaja na mawingu; na kila jicho litamwona, na hao waliomchoma; na kabila zote za dunia wataomboleza kwa ajili yake.” Hapa Biblia inasema juu ya kuona, si kwa macho ya kimwili, bali katika maana ya kufahamu au kuelewa. Hivyo, mtu anapofahamu au kuelewa jambo fulani, huenda akasema, ‘naona.’ Kwa kweli, Biblia inasema juu ya “macho ya ufahamu wenu.” (Waefeso 1:18, King James Version) Basi usemi “kila jicho litamwona” maana yake ni kwamba kila mtu wakati huo atafahamu au kutambua kwamba Kristo yupo.
14. (a) Ni nani wanaomaanishwa na “waliomchoma”? (b) Sababu gani kutakuwako huzuni kuu wakati kila mtu atakapotambua mwishowe kuwapo kwa Kristo?
14 Wale “waliomchoma” Yesu hawako hai tena hapa duniani. Hivyo wanafananisha watu ambao, kwa kuumiza wafuasi wa Kristo wa siku hizi, wanafuata mwenendo wa watu hao wa karne ya kwanza. (Mathayo 25:40, 45) Upesi wakati wa Kristo kuwaharibu waovu hao utakuja. Wameonywa kimbele juu ya hilo. Wakati huo wa kuuawa, ‘wataona’ au watatambua linalotendeka. Looo, huzuni gani kwao!
JE! KRISTO ANARUDI DUNIANI?
15. Neno “kurudi” linatumiwa mara nyingi kwa njia gani?
15 Nyakati zote kurudi hakumaanishi kwamba mtu ameenda kwenye mahali halisi. Hivyo wagonjwa wanasemwa kuwa ‘wamerudia afya.’ Naye aliyekuwa mtawala zamani huenda akasemwa kuwa ‘amerudia mamlaka.’ Katika njia iyo hiyo, Mungu alimwambia Abrahamu hivi: “Nitarudi kwako, mwaka ujao katika wakati huu, na Sara atakuwa na mwana.” (Mwanzo 18:14; 21:1, NW) Kurudi kwa Yehova hakukuwa na maana ya kurudi kwa njia halisi, bali kugeuza fikira zake zielekee Sara ili afanye alilokuwa ameahidi.
16. (a) Kristo anarudi duniani kwa njia gani? (b) Kristo alirudi wakati gani, na wakati huo kulitukia nini?
16 Kwa njia iyo hiyo, kurudi kwa Kristo hakumaanishi kwamba yeye anarudi kwa njia halisi kwenye dunia hii. Badala yake, kunamaanisha anachukua mamlaka ya Ufalme kuelekea dunia hii na kugeuzia fikira zake huko. Si lazima akiache kiti chake cha enzi cha kimbingu na kushuka duniani ili afanye hivyo. Kama tulivyoona katika sura iliyotangulia, ushuhuda wa Biblia unaonyesha kwamba katika mwaka wa 1914 W.K. ulifika wakati wa Mungu Kristo arudi na kuanza kutawala. Hapo ndipo kelele iliposikiwa mbinguni ikisema: “Sasa kumekuwa wokovu, na nguvu, na ufalme wa Mungu wetu, na mamlaka ya Kristo wake.”—Ufunuo 12:10.
17. Kwa kuwa kurudi kwa Kristo hakuonekani, alitoa nini tuweze kujua amekwisha kurudi?
17 Kwa kuwa kurudi kwa Kristo hakuonekani, je! kuna njia ya kuhakikisha kwamba kweli amerudi? Ndiyo, iko. Kristo mwenyewe alitoa “ishara” inayoonekana ambayo kwa hiyo tunaweza kujua yeye yupo pasipo kuonekana na kwamba mwisho wa ulimwengu uko karibu. Ebu tuichunguze “ishara” hiyo.
[Picha katika ukurasa wa 142]
Kristo alitoa mwili wake uwe dhabihu. Hangeweza kuuchukua tena awe mwanadamu tena
[Picha katika ukurasa wa 144, 145]
Sababu gani Maria Magdalene alidhani Yesu ni mtunza bustani baada ya kufufuliwa kwake?
Yesu aliyefufuliwa alimwomba Tomasi aweke mkono wake katika mwili gani wenye nyama?
[Picha katika ukurasa wa 147]
Kristo alipaswa kurudi kwa jinsi ile ile alivyoondoka duniani. Aliondoka kwa jinsi gani?