Sura 81

Majaribio Zaidi ya Kumuua Yesu

KWA kuwa ni wakati wa kipupwe, Yesu anatembea eneo lenye kinga linalojulikana kuwa ukumbi wa Solomoni. Liko kandokando ya hekalu. Hapa Wayahudi wanamzingira na kuanza kusema: “Ni muda mrefu kadiri gani wewe utaendelea kuweka nafsi zetu katika hali ya mashaka-mashaka? Kama wewe ndiwe Kristo, twambie waziwazi.”

“Niliwaambia,” Yesu anajibu, “na bado nyinyi hamkuamini.” Yesu hakuwa amewaambia moja kwa moja kwamba yeye ndiye Kristo, kama vile alivyokuwa amemwambia yule mwanamke Msamaria kisimani. Lakini yeye ni kana kwamba alikuwa amefunua utambulisho wake alipowaeleza kwamba alikuwa ametoka kwenye makao ya juu na alikuwa amekuwapo kabla ya Abrahamu.

Hata hivyo, Yesu anataka watu wakate shauri wenyewe la kwamba yeye ndiye Kristo kwa kulinganisha utendaji wake pamoja na yale ambayo Biblia ilitabiri Kristo angefanya. Ndiyo sababu hapo mapema kidogo aliagiza wanafunzi wake wasiambie yeyote kwamba yeye ndiye Kristo. Na ndiyo sababu sasa yeye anaendelea kuwaambia hivi Wayahudi hao wenye uhasama: “Zile kazi ambazo mimi ninafanya katika jina la Baba yangu, hizi zinatoa ushahidi kwa habari yangu. Lakini nyinyi hamwamini.”

Kwa nini wao hawaamini? Je! ni kwa sababu ya kukosa uthibitisho kwamba Yesu ndiye Kristo? Hapana, bali kwa sababu ambayo Yesu anatoa anapowaambia: “Nyinyi si wowote wa kondoo wangu. Kondoo wangu husikiliza sauti yangu, nami nawajua, nao wanifuata. Nami nawapa uhai wa milele, nao kwa vyovyote hawataangamia, na hakuna yeyote atakayewapokonya kutoka mkononi mwangu. Kile ambacho Baba yangu amenipa ni kitu kikubwa zaidi ya vitu vingine vyote, na hakuna yeyote awezaye kuwapokonya kutoka katika mkono wa Baba.”

Ndipo Yesu anapofasili uhusiano wake wa karibu pamoja na Baba yake, akieleza hivi: “Mimi na Baba tu mmoja.” Kwa kuwa Yesu yupo duniani na Baba yake yuko mbinguni, kwa uwazi yeye hasemi kwamba yeye na Baba yake ni mmoja kihalisi, au kimwili. Badala ya hivyo, anamaanisha kwamba wao ni mmoja katika kusudi, kwamba wao wana umoja.

Wakikasirishwa na maneno ya Yesu, Wayahudi wanaokota mawe wamuue, hata kama vile walivyokuwa wamefanya mapema kidogo, wakati wa Sikukuu ya Mahema, au Vibanda. Akiwaelekea uso kwa uso kishujaa hao wanaotaka kumuua, Yesu anasema: “Mimi niliwaonyesha kazi nyingi njema kutoka kwa Baba. Nyinyi mwanipiga kwa mawe kwa ajili ya kazi gani kati ya hizo?”

“Sisi tunakupiga kwa mawe, si kwa ajili ya kazi njema,” wanajibu, “bali kwa ajili ya kufuru, ndiyo kwa sababu wewe, ujapokuwa binadamu, wajifanya mwenyewe kuwa mungu.” Kwa kuwa Yesu hakudai kamwe kuwa mungu, ni kwa nini Wayahudi wanasema hivyo?

Kwa wazi ni kwa sababu Yesu anajihesabu mwenyewe kuwa na nguvu ambazo wao wanaamini ni za Mungu peke yake. Kwa kielelezo, sasa hivi tu ndipo yeye amesema kwa habari ya “kondoo,” “nami nawapa uhai wa milele,” jambo ambalo hakuna binadamu awezaye kufanya. Hata hivyo, Wayahudi hao wanasahau uhakika wa kwamba Yesu anakiri kwamba amepokea mamlaka kutoka kwa Baba yake.

Kwamba Yesu anadai kuwa mdogo kuliko Mungu, anaonyesha kwa kuuliza: “Haikuandikwa katika Sheria yenu [kwenye Zaburi 82:6], ‘Mimi nilisema: “Nyinyi ni miungu”’? Ikiwa aliwaita ‘miungu’ wale ambao dhidi yao neno la Mungu lilikuja, . . . je! nyinyi mwasema kwangu mimi ambaye Baba alitakasa akanituma ulimwenguni, ‘Wakufuru,’ kwa sababu nilisema, Mimi ni Mwana wa Mungu?”

Kwa kuwa Maandiko huita hata mahakimu wa kibinadamu wasio haki “miungu,” Wayahudi hawa wangepata kosa gani kwa Yesu kwa kusema, “Mimi ni Mwana wa Mungu”? Yesu aongeza: “Ikiwa sifanyi kazi za Baba yangu, msiniamini. Lakini ikiwa nazifanya, hata kama nyinyi hamniamini, ziaminini kazi, ili kwamba nyinyi mpate kujua na mwendelee kujua kwamba Baba yu katika muungano pamoja nami nami nimo katika muungano pamoja na Baba.”

Yesu anaposema hilo, Wayahudi wanajaribu kumkamata. Lakini yeye anakimbia, kama vile alivyofanya mapema kidogo kwenye Sikukuu ya Mahema. Yeye anaondoka Yerusalemu na kusafiri kuvuka Mto Yordani kwenda mahali Yohana alipoanza kubatiza karibu miaka minne mapema. Yaonekana mahali hapa si mbali na ufuo wa kusini wa Bahari ya Galilaya, safari ya siku mbili hivi kutoka Yerusalemu.

Watu wengi wanamjia Yesu mahali hapo na kuanza kusema: “Yohana, kwa kweli hakufanya ishara hata moja, lakini mambo mengi sawa na vile Yohana alisema kwa habari za mtu huyu yote yalikuwa kweli.” Hivyo wengi wanaweka imani katika Yesu hapo. Yohana 10:22-42; 4:26; 8:23, 58; Mathayo 16:20, NW.

▪ Ni kwa njia gani Yesu anataka watu wamtambue kuwa yeye ndiye Kristo?

▪ Yesu na Baba yake ni mmoja jinsi gani?

▪ Kwa wazi, ni kwa nini, Wayahudi wanasema kwamba Yesu anajifanya mwenyewe kuwa mungu?

▪ Nukuu la Yesu kutoka kwenye Zaburi linaonyeshaje kwamba yeye hadai kuwa sawa na Mungu?