Sura 84

Daraka la Uanafunzi

BAADA ya kuondoka kwenye nyumba ya yule Farisayo mashuhuri, ambaye kwa wazi ni mshiriki wa Sanhedrini, Yesu aendelea mbele kuelekea Yerusalemu. Umati mkubwa wamfuata. Lakini makusudi yao ni nini? Ni nini hasa kinachohusika katika kuwa mfuasi wake wa kweli?

Wanapoendelea na safari, Yesu anageukia umati huo na labda anawashtua anaposema: “Ikiwa yeyote ananijia mimi na hachukii baba na mama na mke na watoto na akina ndugu na dada zake, ndiyo, na hata nafsi yake mwenyewe, yeye hawezi kuwa mwanafunzi wangu.”

Yesu anamaanisha nini? Yesu hasemi hapa kwamba wafuasi wake wanapaswa kuwachukia kihalisi watu wa ukoo wao. Badala ya hivyo, ni lazima wao wawachukie katika maana ya kuwapenda kwa kadiri ndogo kuliko vile wanavyompenda yeye. Yakobo babu wa kale wa Yesu anasemwa kuwa ‘alichukia’ Lea na akapenda Raheli, jambo ambalo lilimaanisha kuwa Lea alipendwa kwa kadiri ndogo kuliko Raheli dada yake.

Fikiria, pia, kwamba Yesu alisema kwamba mwanafunzi anapaswa kuchukia “hata nafsi yake mwenyewe,” au uhai. Hapo tena, analomaanisha ni kwamba lazima mwanafunzi wa kweli ampende Yeye hata kuliko vile anavyopenda uhai wake mwenyewe. Hivyo Yesu anakazia kwamba kuwa mwanafunzi wake ni daraka zito. Si jambo la kufuatwa bila ufikirio wa uangalifu.

Magumu na mnyanyaso yanahusika katika kuwa mwanafunzi wa Yesu, kama vile yeye anavyoendelea kuonyesha: “Awaye yote asiyebeba mti wake wa mateso na kunifuata mimi hawezi kuwa mwanafunzi wangu.” Hivyo, mwanafunzi wa kweli lazima awe na nia ya kupatwa na mzigo mzito ule ule wa suto aliovumilia Yesu, hata kutia ndani, ikihitajiwa kabisa, kufa mikononi mwa maadui wa Mungu, jambo ambalo Yesu atafanya karibuni.

Kwa hiyo, kuwa mwanafunzi wa Kristo ni jambo ambalo umati unaomfuata unahitaji kulichanganua kwa uangalifu sana. Yesu anakazia uhakika huo kwa kutumia kielezi. “Kwa kielelezo,” yeye anasema, “ni nani kati yenu nyinyi ambaye anataka kujenga mnara asiyeketi chini kwanza na kuhesabu gharama, aone kama yeye ana vya kutosha kuukamilisha? Ama sivyo, huenda yeye akalaza msingi wao lakini asiweze kuumaliza, na watazamaji wote huenda wakaanza kumdhihaki, wakisema, ‘Mtu huyu alianza kujenga lakini hakuweza kumaliza.’”

Kwa hiyo Yesu anaupa umati huo wenye kumfuata kielezi cha kwamba kabla ya kuwa wanafunzi wake, inawapasa wawe wameamua imara kwamba wanaweza kutimiza yanayohusika, sawa na vile mtu anayetaka kujenga mnara huhakikisha kabla ya kuanza kwamba ana asilimali ya kuukamilisha. Akiandaa kielezi kingine, Yesu anaendelea kusema:

“Au ni mfalme gani, akiwa anapiga miguu kwenda kukutana na mfalme mwingine katika vita, asiyeketi chini kwanza na kufanya shauri kama yeye akiwa na askari elfu kumi anaweza kukabiliana na yule ambaye anakuja dhidi yake akiwa pamoja na elfu ishirini? Ikiwa, kwa uhakika, yeye hawezi kufanya hivyo, basi huyo anapokuwa angali kule mbali yeye hupeleka nje baraza la mabalozi na kusihi akiomba amani.”

Ndipo Yesu anapokazia maana ya vielezi vyake, akisema: “Hivyo, nyinyi mwaweza kuwa na uhakika kwamba hakuna mmoja kati yenu nyinyi ambaye hasemi kwaheri kwa mali zake zote anaweza kuwa mwanafunzi wangu.” Jambo hilo ndilo umati wenye kumfuata, na ndiyo, kila mtu mwingine yeyote anayejifunza habari za Kristo, lazima awe na nia ya kulifanya. Lazima wao wawe tayari kudhabihu kila kitu walicho nacho—mali zao zote, kutia na uhai wenyewe—kama wangetaka kuwa wanafunzi wake. Je! wewe una nia ya kufanya hivyo?

“Chumvi, kwa uhakika, ni safi,” Yesu anaendelea kusema. Katika Mahubiri ya Mlimani yake, yeye alisema kwamba wanafunzi wake ndio “chumvi ya dunia,” kumaanisha kwamba wao wana uvutano wenye hifadhi juu ya watu, sawa na vile chumvi halisi ilivyo kihifadhi. “Lakini ikiwa chumvi inapoteza nguvu yayo, itakolezwa kwa kitu gani? Haifai wala kwa ajili ya udongo wala kwa ajili ya mbolea,” Yesu anamalizia. “Watu huitupa nje. Acheni yule aliye na masikio ya kusikiliza, asikilize.”

Kwa hiyo Yesu anaonyesha kwamba ni lazima hata wale ambao wamekuwa wanafunzi wake kwa muda fulani wasidhoofike katika azimio lao la kuendelea. Wakifanya hivyo, watakuwa bure, wawe kitu cha kudhihakiwa na ulimwengu huu na wasiofaa mbele za Mungu, kwa uhakika, wawe suto juu ya Mungu. Kwa sababu hiyo, kama chumvi isiyo na nguvu, iliyochafuliwa, watatupwa nje, ndiyo, waharibiwe. Luka 14:25-35; Mwanzo 29:30-33; Mathayo 5:13, NW.

◼ Inamaanisha nini ‘kuchukia’ watu wa ukoo na mtu mwenyewe?

◼ Yesu anatoa vielezi gani viwili, navyo vinamaanisha nini?

◼ Ni nini wazo la maelezo ya Yesu ya kumalizia kuhusu chumvi?