Sura 17
Pata Usalama Miongoni mwa Watu wa Mungu
1, 2. Hali ya wanadamu ikoje kama ile ya watu walio katika eneo lililokumbwa na dhoruba?
EBU wazia kwamba dhoruba yenye nguvu imekumba eneo unakoishi. Nyumba yako imeharibiwa, na mali zako zote zimepotea. Chakula ni haba. Hali inaonekana kuwa bila tumaini. Kisha, ugavi wa kupunguza shida usiotazamiwa wawasili. Chakula na mavazi vyaandaliwa kwa wingi. Unajengewa nyumba mpya. Kwa hakika ungemshukuru yule mtu aliyetoa maandalizi hayo yote.
2 Jambo linalofanana na hilo linatendeka leo. Kama vile dhoruba, uasi wa Adamu na Hawa ulisababisha madhara makubwa kwa jamii ya kibinadamu. Paradiso iliyokuwa makao ya wanadamu ilipotea. Tangu wakati huo, serikali za kibinadamu zimeshindwa kulinda watu dhidi ya vita, uhalifu, na ukosefu wa haki. Dini imeacha watu wengi sana wakiwa na njaa kali ya kupata chakula cha kiroho chenye kujenga. Hata hivyo, sasa, Yehova Mungu hutoa chakula, mavazi, na banda la kujikinga, kwa njia ya kiroho. Yeye hufanyaje hivyo?
“MTUMWA MWAMINIFU MWENYE AKILI”
3. Yehova hutoleaje wanadamu maandalizi, kama vile ionyeshwavyo na vielelezo vipi?
3 Kwa kawaida ugavi wa kusaidia wenye shida hutolewa kupitia njia iliyopangwa kitengenezo, na Yehova amewatolea watu wake uandalizi wa kiroho kwa njia iyo hiyo. Kwa kielelezo, Waisraeli walikuwa “kutaniko la Yehova” kwa miaka ipatayo 1,500. Miongoni mwao kulikuwa na wale waliotumikia wakiwa njia ya Mungu ya kufundisha Sheria yake. (1 Mambo ya Nyakati 28:8, NW; 2 Mambo ya Nyakati 17:7-9, NW) Katika karne ya kwanza W.K., Yehova alitokeza tengenezo la Kikristo. Makutaniko yalifanyizwa, nayo yalifanya kazi chini ya mwelekezo wa baraza linaloongoza lililotia ndani mitume na wanaume wazee. (Matendo 15:22-31) Vivyo hivyo leo, Yehova hushughulika na watu wake kupitia kikundi kilichopangwa kitengenezo. Tunajuaje hilo?
4. “Mtumwa mwaminifu mwenye akili” amethibitika kuwa nani katika nyakati za kisasa, na maandalizi ya kiroho ya Mungu yanatolewaje?
4 Yesu alisema kwamba katika wakati wa kuwapo kwake katika utawala wa Ufalme, “mtumwa mwaminifu mwenye akili” angepatikana akiwaandalia wafuasi Wake “chakula kwa wakati wake.” (Mathayo 24:45-47) Yesu alipotawazwa kuwa Mfalme wa kimbingu katika 1914, “mtumwa” huyo alithibitika kuwa nani? Kwa hakika si makasisi wa Jumuiya ya Wakristo. Kwa sehemu kubwa, wao walikuwa wakilisha makundi yao propaganda zilizounga mkono serikali zao wenyewe za kitaifa katika Vita ya Ulimwengu 1. Lakini chakula cha kiroho chenye kufaa na cha wakati wake kilikuwa kikitolewa na kikundi cha Wakristo wa kweli waliotiwa mafuta kwa roho takatifu ya Mungu na waliokuwa sehemu ya lile ambalo Yesu aliita “kundi dogo.” (Luka 12:32) Wakristo hao watiwa-mafuta walihubiri Ufalme wa Mungu kuliko serikali za mwanadamu. Likiwa tokeo, muda wa miaka ambayo imepita mamilioni ya “kondoo wengine” wenye mwelekeo mwadilifu wamejiunga na “mtumwa” mtiwa-mafuta katika kuizoea dini ya kweli. (Yohana 10:16) Kwa kutumia ‘mtumwa mwaminifu’ na Baraza Linaloongoza lake siku hii, Mungu huelekeza watu wake waliopangwa kitengenezo ili kutoa chakula, mavazi, na banda la kujikinga kiroho kwa wote wanaotaka kuwa na maandalizi haya.
“CHAKULA KWA WAKATI WAKE”
5. Ni hali gani ya kiroho ambayo imo ulimwenguni leo, lakini Yehova anafanyaje juu ya jambo hili?
5 Yesu alisema hivi: “Mtu hataishi kwa mkate tu, ila kwa kila neno litokalo katika kinywa cha Mungu.” (Mathayo 4:4) Lakini, kwa kusikitisha, watu walio wengi sana hawaelekezi uangalifu kwenye maneno ya Mungu. Kama ilivyotabiriwa na Amosi, nabii wa Yehova, kuna “njaa katika nchi; si njaa ya kukosa chakula, wala kiu ya kukosa maji, bali ya kukosa kuyasikia maneno ya BWANA.” (Amosi 8:11) Hata watu wafuatao dini sana husumbuliwa na njaa ya kiroho. Hata hivyo, mapenzi ya Yehova ni kwamba “watu wote waokolewe, na kupata kujua yaliyo kweli [“ujuzi sahihi juu ya kweli,” NW].” (1 Timotheo 2:3, 4) Kwa hiyo, yeye anaandaa chakula cha kiroho kwa wingi. Lakini kinaweza kupatikana wapi?
6. Yehova amewalishaje watu wake kiroho katika nyakati zilizopita?
6 Muda wote wa historia, Yehova amewatolea watu wake chakula cha kiroho wakiwa kikundi. (Isaya 65:13) Kwa mfano, makuhani Waisraeli walikusanya wanaume, wanawake, na watoto ili kuwafundisha Sheria ya Mungu wakiwa kikundi. (Kumbukumbu la Torati 31:9, 12) Chini ya mwelekezo wa baraza linaloongoza, Wakristo wa karne ya kwanza walipanga makutaniko kitengenezo na kufanya mikutano ili kufundisha na kutia moyo wote. (Warumi 16:5; Filemoni 1, 2) Mashahidi wa Yehova hufuata kiolezo hicho. Unaalikwa kwa uchangamfu kuhudhuria mikutano yao yote.
7. Kuhudhuria mikutano ya Kikristo kwa ukawaida kunahusianaje na ujuzi na imani?
7 Bila shaka, huenda ukawa umejifunza mambo mengi tayari katika funzo lako la kibinafsi la Biblia. Labda mtu fulani amekusaidia. (Matendo 8:30-35) Lakini imani yako inaweza kufananishwa na mmea utakaonyauka na kufa ikiwa hautunzwi vya kutosha. Kwa sababu hiyo, ni lazima upokee lishe ya kiroho inayofaa. (1 Timotheo 4:6) Mikutano ya Kikristo huandaa programu yenye kuendelea ya mafundisho yanayokusudiwa kukulisha kiroho na kukusaidia uendelee kukua katika imani uongezekapo katika ujuzi juu ya Mungu.—Wakolosai 1:9, 10.
8. Sababu gani twatiwa moyo kuihudhuria mikutano ya Mashahidi wa Yehova?
8 Mikutano ina kusudi jingine la muhimu. Paulo aliandika hivi: “Acheni tufikiriane ili kuchocheana kwenye upendo na matendo yaliyo bora, si kuacha kule kukusanyika pamoja sisi wenyewe.” (Waebrania 10:24, 25, NW) Neno la Kigiriki linalotafsiriwa “kuchocheana” linaweza kumaanisha pia “kunoa.” Mithali moja ya Biblia husema hivi: “Chuma hunoa chuma; ndivyo mtu aunoavyo uso wa rafiki yake.” (Mithali 27:17) Sisi sote twahitaji ‘kunolewa’ daima. Misongo ya kila siku kutoka ulimwenguni inaweza kudhoofisha imani yetu. Tunapohudhuria mikutano ya Kikristo, kuna badilishano la kitia-moyo. (Warumi 1:11, 12) Washiriki wa kutaniko hufuata himizo la mtume Paulo la ‘kufarijiana na kujengana kila mtu na mwenzake,’ na mambo hayo yananoa imani yetu. (1 Wathesalonike 5:11) Kuwapo kwa ukawaida kwenye mikutano ya Kikristo huonyesha pia kwamba twampenda Mungu na kwatupa fursa za kumsifu.—Zaburi 35:18.
“JIVIKENI UPENDO”
9. Yehova amewekaje kielelezo katika kuonyesha upendo?
9 Paulo aliandika hivi: “Jivikeni upendo, ndio kifungo cha ukamilifu.” (Wakolosai 3:14) Kwa fadhili Yehova ametuandalia vazi hili. Kwa njia gani? Wakristo wanaweza kuonyesha upendo kwa sababu ni mojapo matunda ya roho takatifu ya Yehova yaliyopewa na Mungu. (Wagalatia 5:22, 23) Yehova mwenyewe ameonyesha upendo mkuu zaidi kwa kumtuma Mwana wake mzaliwa-pekee ili tuweze kuwa na uhai udumuo milele. (Yohana 3:16) Huo wonyesho mkuu zaidi wa upendo ulituandalia kigezo katika kuonyesha sifa hiyo. “Ikiwa Mungu alitupenda sisi hivi,” akaandika mtume Yohana, “imetupasa na sisi kupendana.”—1 Yohana 4:11.
10. Tunaweza kunufaikaje na “ushirika wote wa akina ndugu”?
10 Kuhudhuria kwako mikutano kwenye Jumba la Ufalme kutakupa wewe fursa bora zaidi ya kuonyesha upendo. Ukiwa huko wewe utakutana na watu wa namna nyingi. Bila shaka utavutiwa na wengi wao mara iyo hiyo. Bila shaka, nyutu hutofautiana hata miongoni mwa wale wanaomtumikia Yehova. Labda wakati uliopita uliepuka tu watu ambao hawakuwa na mapendezi au tabia zako. Lakini, Wakristo wanapaswa “[kuwa] na upendo kwa [ajili ya] ushirika wote wa akina ndugu.” (1 Petro 2:17, NW) Kwa hiyo, fanya lengo lako liwe kufahamiana na wale walio kwenye Jumba la Ufalme—hata watu mmoja-mmoja ambao umri, utu, rangi, au kiwango chao cha elimu huenda kikatofautiana na chako. Yaelekea utagundua kwamba kila mmoja anazidi katika sifa fulani yenye kupendezesha.
11. Sababu gani usisumbuliwe na nyutu mbalimbali miongoni mwa watu wa Yehova?
11 Utofautiano wa nyutu kutanikoni haupasi kukusumbua. Kutoa kielezi, ebu wazia kwamba magari mengi sana yanasafiri kando yako barabarani. Yote hayaendi kwa mwendo uleule, wala hayana hali ileile kimitambo. Mengine yamesafiri kilometa nyingi, lakini kama vile wewe, mengine ndipo yameanza tu safari. Hata hivyo, tofauti ziwe ni nini magari yote yanasafiri katika barabara. Ni vivyo hivyo kwa habari ya wale wanaofanyiza kutaniko. Si wote wakuzao sifa za Kikristo kwa mwendo uleule. Zaidi ya hayo, si wote walio na hali ileile ya kimwili au ya kihisiamoyo. Wengine wamekuwa wakimwabudu Yehova kwa miaka mingi; wengine ndipo wameanza tu. Hata hivyo, wote wanasafiri katika barabara iongozayo kwenye uhai udumuo milele, “katika nia moja na shauri moja.” (1 Wakorintho 1:10) Kwa hiyo, tafuta sifa bora badala ya udhaifu wa wale waliomo kutanikoni. Kufanya hivyo kutachangamsha moyo wako, kwani utatambua kwamba Mungu kwa kweli yu kati ya watu hawa. Na kwa hakika hapa ndipo mahali unapotaka kuwa.—1 Wakorintho 14:25.
12, 13. (a) Mtu fulani kutanikoni akikuudhi, unaweza kufanya nini? (b) Sababu gani ni jambo la maana kutokuweka kinyongo?
12 Kwa kuwa wanadamu wote ni wasio wakamilifu, nyakati nyingine mtu fulani kutanikoni huenda akasema au kufanya jambo linalokuudhi. (Warumi 3:23) Mwanafunzi Yakobo aliandika hivi kwa uhalisi: “Twajikwaa sisi sote pia katika mambo mengi. Mtu asiyejikwaa katika kunena, huyo ni mtu mkamilifu.” (Yakobo 3:2) Utaitikiaje ukiudhiwa na mtu fulani? Mithali moja ya Biblia husema hivi: “Busara ya [“ufahamu wenye kina wa,” NW] mtu huiahirisha hasira yake; nayo ni fahari yake kusamehe makosa.” (Mithali 19:11) Kuwa na ufahamu wenye kina kwamaanisha kuona chini-chini kuliko juu-juu tu ya hali fulani, kuelewa mambo ya msingi yanayomfanya mtu aongee au kutenda kwa njia fulani. Wengi wetu huwa tunatumia ufahamu wenye kina katika kutetea makosa yetu wenyewe. Sababu gani tusiutumie ili tuelewe na kufunika pia kutokukamilika kwa wengine?—Mathayo 7:1-5; Wakolosai 3:13.
13 Usisahau kamwe kwamba ni lazima tusamehe wengine ikiwa sisi wenyewe tutapokea msamaha wa Yehova. (Mathayo 6:9, 12, 14, 15) Tukiizoea kweli, tutatendea wengine kwa njia yenye upendo. (1 Yohana 1:6, 7; 3:14-16; 4:20, 21) Kwa hiyo, ukikabili tatizo pamoja na mtu mwingine kutanikoni, piga vita dhidi ya kuweka kinyongo. Ikiwa umejivika upendo, utajitahidi kusuluhisha tatizo hilo, na hutasita kuomba radhi ikiwa umemuudhi mtu.—Mathayo 5:23, 24; 18:15-17.
14. Tunapaswa kujivika sifa zipi?
14 Mavazi yetu ya kiroho yanapaswa kutia ndani sifa nyingine zinazohusiana kwa ukaribu na upendo. Paulo aliandika hivi: “Jivikeni moyo wa rehema, utu wema, unyenyekevu, upole, uvumilivu.” Sifa hizi, kutia na upendo, ni sehemu ya “utu mpya” wa kimungu. (Wakolosai 3:10, 12) Je, utajitahidi kujivika kwa njia hiyo? Ukijivika upendo wa kidugu ndipo hasa utakapokuwa na alama ya kutambulisha wanafunzi wa Yesu, kwani yeye alisema hivi: “Hivyo watu wote watatambua ya kuwa ninyi mmekuwa wanafunzi wangu, mkiwa na upendo ninyi kwa ninyi.”—Yohana 13:35.
MAHALI PA USALAMA
15. Kutaniko ni kama banda la kujikinga kwa jinsi gani?
15 Kutaniko hutumika likiwa banda la kujikinga pia, kimbilio lenye ulinzi ambako unaweza kuhisi ukiwa salama. Ndani yalo utapata watu wenye mioyo ya kufuatia haki wanaojitahidi kufanya yaliyo sawa machoni pa Mungu. Wengi wao wameondolea mbali mazoea na mitazamo ileile mibaya ambayo huenda ukawa unajitahidi kushinda. (Tito 3:3) Wanaweza kukusaidia, kwani twaambiwa ‘tuchukuliane mizigo.’ (Wagalatia 6:2) Kwa asili, hatimaye kufuatia mwendo uongozao kwenye uhai udumuo milele ni daraka lako mwenyewe. (Wagalatia 6:5; Wafilipi 2:12) Hata hivyo, Yehova ameandaa kutaniko la Kikristo likiwa njia nzuri ajabu ya kusaidia na ya kutegemeza. Hata matatizo yako yawe ni yenye kutaabisha jinsi gani, wewe unaweza kupata msaada wenye thamani—kutaniko lenye upendo litakalokutegemeza katika nyakati za kuteseka au za uhitaji.—Linganisha Luka 10:29-37; Matendo 20:35.
16. Wazee wa kutaniko huandaa msaada gani?
16 Miongoni mwa wale watakaoweza kukusaidia ni “zawadi zikiwa wanaume”—wazee wa kutaniko waliowekwa rasmi, au waangalizi, wanaochunga kundi kwa hiari na kwa bidii. (Waefeso 4:8, 11, 12, NW; Matendo 20:28, NW; 1 Petro 5:2, 3, NW) Kuhusu wao, Isaya alitoa unabii hivi: “Mwanadamu atakuwa kama mahali pa kujificha na upepo, na mahali pa kujisitiri na dhoruba; kama mito ya maji mahali pakavu, kama kivuli cha mwamba mkubwa katika nchi yenye uchovu.”—Isaya 32:2.
17. (a) Yesu alitaka kutoa hasa msaada wa aina gani? (b) Mungu aliahidi kuwatolea watu wake uandalizi gani?
17 Kwa kusikitisha uangalizi wenye upendo ulikosekana katika viongozi wa kidini, wakati Yesu alipokuwa duniani. Hali ya watu ilimwathiri kwa kina sana, naye alitaka sana kuwasaidia kiroho. Yesu aliwahurumia kwa sababu wao “walikuwa wamechunwa ngozi na kutupwa huku na huku kama kondoo wasio na mchungaji.” (Mathayo 9:36, NW) Hilo lafafanua vizuri kama nini hali ya wengi katika siku ya leo wanaovumilia matatizo yenye kutia uchungu sana wakiwa hawana mtu wa kuendea ili kupata msaada wa kiroho na faraja! Lakini watu wa Yehova wana msaada wa kiroho, kwani aliahidi hivi: “Nami nitaweka juu yao wachungaji watakaowalisha; wala hawataona hofu tena, wala kufadhaika, wala hatapotea hata mmoja wao.”—Yeremia 23:4.
18. Sababu gani tumfikie mzee tukihitaji msaada wa kiroho?
18 Pata kuwajua wazee wa kutaniko waliowekwa rasmi. Wao wana uzoefu mwingi katika kutumia ujuzi juu ya Mungu, kwani wametimiza sifa za waangalizi zilizoandikwa katika Biblia. (1 Timotheo 3:1-7; Tito 1:5-9) Usisite kumfikia mmoja wao ikiwa unahitaji msaada wa kiroho ili kushinda tabia au mazoea yanayopingana na matakwa ya Mungu. Utagundua kwamba wazee wanafuata himizo hili la Paulo: “Watieni moyo walio dhaifu; watieni nguvu wanyonge; vumilieni na watu wote.”—1 Wathesalonike 2:7, 8; 5:14.
FURAHIA USALAMA PAMOJA NA WATU WA YEHOVA
19. Yehova amewabarikije wale ambao hutafuta usalama katika tengenezo lake?
19 Ingawa sasa tunaishi miongoni mwa hali zisizo kamilifu, Yehova anatuandalia chakula, mavazi, na banda la kujikinga la kiroho. Bila shaka, ni lazima tungojee ulimwengu mpya ulioahidiwa na Mungu ili tupate manufaa za paradiso halisi. Lakini kwa sasa wale walio sehemu ya tengenezo la Yehova wanafurahia usalama wa paradiso ya kiroho. Kuhusu wao, Ezekieli alitoa unabii hivi: “Watakaa salama salimini, wala hapana mtu atakayewatia hofu.”—Ezekieli 34:28; Zaburi 4:8.
20. Yehova atalipiaje chochote kile ambacho huenda tukadhabihu kwa ajili ya ibada yake?
20 Tunaweza kushukuru kama nini kwamba Yehova hutoa maandalizi ya kiroho yenye upendo kupitia Neno na tengenezo lake! Wakaribie watu wa Mungu. Usisite kufanya hivyo kwa kuhofu yale ambayo marafiki au watu wa ukoo huenda wakafikiri juu yako kwa sababu ya kupata ujuzi juu ya Mungu. Huenda wengine wakapinga kwa sababu unashirikiana na Mashahidi wa Yehova na kuhudhuria mikutano kwenye Jumba la Ufalme. Lakini Mungu atalipia hata zaidi ya chochote kile unachodhabihu kwa ajili ya ibada yake. (Malaki 3:10) Zaidi ya hayo Yesu alisema hivi: “Hakuna mtu aliyeacha nyumba, au ndugu waume, au ndugu wake, au mama, au baba, au watoto, au mashamba, kwa ajili yangu, na kwa ajili ya Injili, ila atapewa mara mia sasa wakati huu, nyumba, na ndugu waume, na ndugu wake, na mama, na watoto, na mashamba, pamoja na udhia, na katika ulimwengu ujao uzima wa milele.” (Marko 10:29, 30) Ndiyo, hata iwe ni nini ambacho umeacha nyuma au ambacho ni lazima uvumilie, unaweza kupata ushirika wenye kufurahisha na usalama wa kiroho miongoni mwa watu wa Mungu.
TAHINI UJUZI WAKO
Ni nani aliye “mtumwa mwaminifu mwenye akili”?
Yehova ametoa uandalizi upi ili kutulisha kiroho?
Wale walio katika kutaniko la Kikristo wanaweza kutusaidiaje?
[Picha ya ukurasa mzima katika ukurasa wa 165]