Sura ya Kumi na Sita
“Iweni na Upendo Wenye Juhudi Nyingi Nyinyi kwa Nyinyi”
1. Mara nyingi ni nini kinachowavutia wageni kwenye mikutano ya Mashahidi wa Yehova?
WATU wanapohudhuria mikutano ya Mashahidi wa Yehova kwa mara ya kwanza, mara nyingi wao huvutiwa kuona jinsi wanavyopendana sana. Wao hukaribishwa kwa upendo na kufurahia ushirika mchangamfu. Wageni wanaokuja kwenye makusanyiko yetu wanaona upendo huo pia. Mwandishi fulani wa habari aliandika hivi kuhusu kusanyiko moja: ‘Hakuna mtu anayetumia dawa za kulevya au pombe. Hakuna mtu anayepiga mayowe wala kelele. Hakuna kusukumana. Hakuna vurugu. Hakuna mtu anayemtukana mwingine. Hakuna mizaha michafu au matusi. Hakuna anayevuta sigara. Hakuna wizi. Hakuna mtu anayetupa takataka uwanjani. Hali ilikuwa tofauti kabisa.’ Yote hayo yanaonyesha upendo, upendo ambao “haujiendeshi bila adabu, hautafuti masilahi yao wenyewe.”—1 Wakorintho 13:4-8.
2. (a) Upendo wetu unapasa kuwaje kadiri muda unavyopita? (b) Tunapaswa kumwiga Kristo kwa kukuza upendo wa aina gani?
2 Upendo wa kidugu ndiyo sifa inayowatambulisha Wakristo wa kweli. (Yohana 13:35) Kadiri tunavyokua kiroho ndivyo tunavyojifunza kuwapenda wengine kwa moyo wetu wote. Mtume Paulo alisali kwamba upendo wa Wakristo wenzake upate “kuzidi bado hata zaidi na zaidi.” (Wafilipi 1:9) Mtume Yohana alisema kwamba tunapaswa kuonyesha upendo kwa kujidhabihu. Aliandika hivi: “Kwa hili tumekuja kujua upendo, kwa sababu huyo [Mwana wa Mungu] alitoa nafsi yake kwa ajili yetu; na sisi tuko chini ya wajibu kutoa nafsi zetu kwa ajili ya ndugu zetu.” (1 Yohana 3:16; Yohana 15:12, 13) Je, tunaweza kweli kutoa uhai wetu kwa ajili ya ndugu zetu? Ingawa mara nyingi hatuhitaji kufanya hivyo, sisi hujitahidi kwa kadiri gani kuwasaidia sasa, hata katika hali zisizotufaa?
3. (a) Tunawezaje kuwapenda wengine kwa moyo wetu wote? (b) Kwa nini ni muhimu tupendane kwa juhudi nyingi sasa?
3 Pamoja na matendo yanayoonyesha roho ya kujidhabihu, tunapaswa kuwapenda ndugu zetu kwa moyo wetu wote. Neno la Mungu linatuhimiza hivi: “Katika upendo wa kidugu iweni wenye shauku nyororo kwa mtu na mwenzake.” (Waroma 12:10) Sote huwapenda watu fulani kwa njia hiyo. Lakini mbona tusijizoeze kuwapenda watu wengi zaidi vivyo hivyo? Mwisho wa ulimwengu huu unapokaribia, ni muhimu tuwe na uhusiano wa karibu zaidi na Wakristo wenzetu. Biblia yasema: “Mwisho wa mambo yote umekaribia. . . . Juu ya mambo yote, iweni na upendo wenye juhudi nyingi nyinyi kwa nyinyi, kwa sababu upendo hufunika wingi wa dhambi.”—1 Petro 4:7, 8.
Matatizo Yanapotokea
4. (a) Kwa nini matatizo yanaweza kutokea kati ya washiriki wa kutaniko? (b) Ingawa huenda tusiwe na nia ya kufuata shauri la Biblia nyakati zote, tutafaidikaje tukifanya hivyo?
4 Maadamu hatujakamilika, nyakati nyingine tutawaudhi wengine. Ndugu zetu wanaweza pia kutukosea kwa njia mbalimbali. (1 Yohana 1:8) Ufanye nini unapokosewa au kumkosea mwingine? Maandiko yanatoa maagizo yanayofaa. Lakini huenda yale yanayosemwa na Maandiko yasipatane na mielekeo yetu tukiwa wanadamu wasiokamilika. (Waroma 7:21-23) Hata hivyo, tukijitahidi kabisa kufuata shauri la Biblia tutaonyesha kwamba tunataka sana kumpendeza Yehova. Na upendo wetu kwa wengine utaboreka tukifanya hivyo.
5. Kwa nini hatupaswi kulipiza kisasi tunapokosewa?
5 Nyakati nyingine watu wanapokosewa wanatafuta njia za kulipiza kisasi. Lakini kufanya hivyo kunaharibu mambo tu. Tumwachie Mungu alipize kisasi. (Mithali 24:29; Waroma 12:17-21) Watu wengine hujaribu kumwepa yule aliyewakosea. Lakini hatupaswi kuwaepa waabudu wenzetu, kwa sababu Mungu atakubali ibada yetu ikiwa tu tunawapenda ndugu zetu. (1 Yohana 4:20) Kwa hiyo, Paulo aliandika hivi: “Endeleeni kuchukuliana mtu na mwenzake na kusameheana kwa hiari mtu na mwenzake ikiwa yeyote ana sababu ya kulalamika dhidi ya mwingine. Kama vile Yehova alivyowasamehe nyinyi kwa hiari, fanyeni hivyo nyinyi pia.” (Wakolosai 3:13) Je, unaweza kufanya hivyo?
6. (a) Tunapaswa kumsamehe ndugu yetu mara ngapi? (b) Itakuwa rahisi kuwasamehe wale wanaotukosea tukikumbuka nini kuhusu hali yetu?
6 Vipi ikiwa mtu anatukosea mara nyingi katika mambo madogo ambayo hayawezi kufanya atengwe na ushirika wa kutaniko? Mtume Petro alipendekeza kwamba tuwasamehe wale wanaotukosea katika mambo madogo-madogo “mpaka mara saba.” Lakini Yesu alisema: “Si Mpaka mara saba, bali, Mpaka mara sabini na saba.” Alikazia kwamba tumemkosea Mungu mara nyingi sana kuliko mwanadamu yeyote anavyoweza kutukosea. (Mathayo 18:21-35) Kila siku sisi humkosea Mungu kwa njia nyingi—nyakati nyingine tunatenda kwa ubinafsi, tunasema au kufikiri isivyofaa, au tunakosa kufanya mambo fulani—na nyakati nyingine hata hatujui kwamba tunatenda dhambi. (Waroma 3:23) Lakini, bado Mungu hutusamehe. (Zaburi 103:10-14; 130:3, 4) Anataka tuwasamehe wengine vivyo hivyo. (Mathayo 6:14, 15; Waefeso 4:1-3) Tukifanya hivyo tutakuwa tukionyesha upendo ambao “hauweki hesabu ya ubaya.”—1 Wakorintho 13:4, 5; 1 Petro 3:8, 9.
7. Twapaswa kufanya nini ikiwa ndugu ametuwekea kinyongo?
7 Huenda nyakati nyingine tukaona kwamba ndugu yetu ametuwekea kinyongo ingawa hatujamkosea. Tunaweza kuamua ‘kufunika jambo hilo kwa upendo,’ kama andiko la 1 Petro 4:8 linavyopendekeza. Au tunaweza kuchukua hatua ya kuzungumza naye na kujaribu kurudisha uhusiano mzuri pamoja naye.—Mathayo 5:23, 24.
8. Twaweza kufanya nini mwamini mwenzetu akitenda jambo linalotuudhi?
8 Mwamini mwenzetu anaweza kutenda jambo ambalo linakuudhi wewe na watu wengine pia. Je, isingefaa kuzungumza naye? Labda, ukizungumza naye kwa fadhili huenda ukasuluhisha tatizo hilo. Lakini kwanza unapaswa kujiuliza hivi: ‘Je, kweli anatenda jambo lisilo la kimaandiko? Au hatupatani hasa kwa sababu malezi yangu na yake ni tofauti?’ Uwe mwangalifu usitunge sheria zako mwenyewe na kuwahukumu wengine kulingana na sheria hizo. (Yakobo 4:11, 12) Yehova huwakubali bila ubaguzi watu wa malezi mbalimbali naye huwaonyesha subira wanapofanya maendeleo ya kiroho.
9. (a) Ni nani wanaoshughulikia visa vya dhambi nzito kutanikoni? (b) Mtu anayekosewa anahitaji kuchukua hatua ya kwanza katika hali gani, na apaswa kuwa na kusudi gani?
9 Mshiriki wa kutaniko akifanya dhambi nzito, kama vile kutenda mambo machafu ya kingono, jambo hilo linapasa kushughulikiwa mara moja. Na nani? Na Wazee. (Yakobo 5:14, 15) Hata hivyo, ikiwa mtu amekosewa labda katika biashara au kwa sababu mwingine ameeneza porojo kumhusu, basi yule aliyekosewa anapaswa kwanza kujaribu kuzungumza na mkosaji akiwa peke yake. (Mathayo 18:15) Wakishindwa kusuluhisha tatizo hilo, hatua nyingine zinazotajwa kwenye Mathayo 18:16, 17 zinaweza kuchukuliwa. Tutajitahidi kuufikia moyo wa ndugu yetu aliyetukosea kwa sababu tunampenda na tunataka ‘kumpata.’—Mithali 16:23.
10. Tatizo linapotokea, ni nini kitakachotusaidia kuwa na maoni yanayofaa?
10 Tatizo kubwa au dogo linapotokea, tunafaidika tunapofahamu maoni ya Yehova kuhusu jambo hilo. Hakubali dhambi yoyote, na wale wanaoendelea kutenda dhambi nzito bila kutubu huondolewa katika tengenezo lake kwa wakati wake. Hata hivyo, hatupaswi kusahau kamwe kwamba tunahitaji rehema na ustahimilivu wa Yehova kwa sababu sote hutenda dhambi kwa njia ndogo-ndogo. Kwa hiyo, Yehova anatuwekea mfano tunaopaswa kuiga tunapokosewa na wengine. Tunapowaonyesha wengine rehema, tunaiga upendo wa Yehova.—Waefeso 5:1, 2.
Tafuta Njia za ‘Kupanuka’
11. Kwa nini Paulo aliwatia moyo Wakorintho ‘wapanuke’?
11 Paulo alitumia miezi mingi kuliimarisha kutaniko la Korintho huko Ugiriki. Alijitahidi sana kuwasaidia akina ndugu wa kutaniko hilo, naye aliwapenda. Lakini baadhi yao hawakumpenda. Walimchambua sana. Aliwasihi ‘wapanuke’ katika kuonyesha upendo. (2 Wakorintho 6:11-13; 12:15) Inafaa tufikirie kadiri tunavyowapenda wengine na kujitahidi kupanuka.—1 Yohana 3:14.
12. Ni nini kinachoweza kutusaidia tuwapende zaidi watu wote kutanikoni?
12 Je, kuna watu wengine kutanikoni ambao tunaona vigumu kuwa na urafiki nao? Tukijitahidi kutotilia maanani sifa zao mbaya—kama ambavyo tungependa watutendee—tunaweza kuwa na uhusiano wa karibu sana nao. Tunaweza kuwapenda zaidi tukijitahidi kuona na kuzingatia sifa zao nzuri. Hapana shaka kwamba tutawapenda zaidi tukifanya hivyo.—Luka 6:32, 33, 36.
13. Tunawezaje kupanuka katika kuwaonyesha upendo washiriki wa kutaniko letu?
13 Ni kweli kwamba hatuwezi kuwafanyia wengine kila jambo. Huenda tusiweze kumsalimu kila mtu anayehudhuria mkutano. Huenda tusiweze kumkaribisha kila mtu tunapowakaribisha marafiki kwa chakula. Lakini je, tunaweza kupanuka kwa kumfahamu zaidi mtu fulani kutanikoni? Je, pindi kwa pindi tunaweza kuhubiri na mtu fulani tusiyemfahamu vizuri?
14. Tunapokutana na Wakristo ambao hatuwajui, tunawezaje kuonyeshana upendo mwingi?
14 Makusanyiko ya Kikristo huandaa fursa nzuri za kupanuka katika upendo wetu. Huenda maelfu wakahudhuria. Hatuwezi kuzungumza nao wote, lakini tunaweza kujiendesha kwa njia inayoonyesha kwamba tunatanguliza masilahi yao wala si yetu. Wakati wa mapumziko, tunaweza kuonyesha kwamba tunapendezwa nao kwa kuchukua hatua ya kuzungumza na baadhi ya wale walio karibu nasi. Siku moja wakazi wote wa dunia watakuwa ndugu na dada. Watamwabudu kwa umoja Mungu wa kweli na Baba ya wote. Itakuwa furaha iliyoje kuwajua wote! Tutachochewa kufanya hivyo kwa sababu tunawapenda sana. Mbona usianze sasa?
Mazungumzo ya Kurudia
• Matatizo yanapotokea kati ya Wakristo yanapaswa kutatuliwaje, na kwa nini?
• Tunapofanya maendeleo ya kiroho, upendo wetu unapasa kuongezeka katika njia gani?
• Tunawezaje kuwapenda kwa moyo wote watu wengine ambao si rafiki zetu wa karibu?
[Picha katika ukurasa wa 148]
Upendo wa Kikristo huonyeshwa katika njia nyingi, kama vile kwenye mikutano ya kutaniko