Sura ya Ishirini
Iweke Karibu Akilini Siku ya Yehova
1. Ulihisije ulipojifunza kwamba hivi karibuni tutakombolewa kutoka kwa matatizo ya ulimwengu huu wa kale?
MOJAWAPO ya mambo uliyojifunza kwanza katika Biblia ni kusudi la Yehova la kuifanya dunia yote kuwa paradiso. Hakutakuwa na vita, uhalifu, umaskini, ugonjwa, kuteseka, na kifo katika dunia hiyo mpya. Hata wafu watafufuliwa. Ni tumaini zuri ajabu! Ahadi hizo zitatimia hivi karibuni kwa sababu matukio yanathibitisha kwamba Kristo alianza kutawala akiwa Mfalme pasipo kuonekana mwaka wa 1914 na kwamba tangu wakati huo tumekuwa tukiishi katika siku za mwisho za ulimwengu huu mwovu. Siku za mwisho zitakapofikia kikomo, Yehova ataharibu ulimwengu huu mwovu na kuleta ulimwengu mpya alioahidi!
2. “Siku ya Yehova” ni nini?
2 Biblia huiita siku ya uharibifu inayokuja “siku ya Yehova.” (2 Petro 3:10) Ni “siku ya hasira ya BWANA” dhidi ya ulimwengu wote wa Shetani. (Sefania 2:3) Siku hiyo itafikia upeo katika ‘vita ya siku kubwa ya Mungu Mweza-Yote, inayoitwa katika Kiebrania Har–Magedoni’ ambamo ‘wafalme wa dunia nzima inayokaliwa’ wataangamizwa. (Ufunuo 16:14, 16) Je, maisha yako yanaonyesha kwamba unaamini ‘siku hiyo ya Yehova’ i karibu?—Sefania 1:14-18; Yeremia 25:33.
3. (a) Siku ya Yehova itakuja lini? (b) Kwa nini inafaa kwamba Yehova hakufunua “siku hiyo au saa”?
3 Biblia haituambii tarehe hususa ambayo Yesu Kristo atakuja kutekeleza hukumu ya Yehova dhidi ya ulimwengu wa Shetani. Yesu alisema kwamba “kuhusu siku hiyo au saa hakuna mtu ajuaye, wala malaika mbinguni wala Mwana, ila Baba.” (Marko 13:32) Mtu yeyote asiyempenda Yehova kwa moyo wote, atakuwa na mwelekeo wa kuiahirisha siku yake akilini mwake na kufuatia vitu vya kimwili. Lakini wale ambao wanampenda Yehova kabisa watamtumikia kwa nafsi yao yote, haidhuru mwisho wa ulimwengu huu mwovu utafika lini.—Zaburi 37:4; 1 Yohana 5:3.
4. Yesu alitoa onyo gani?
4 Yesu awaonya hivi wale wanaompenda Yehova: “Fulizeni kutazama, fulizeni kuwa macho, kwa maana hamjui ni lini ulio wakati uliowekwa rasmi.” (Marko 13:33-37) Anatusihi tusikazie fikira mno kula na kunywa au “mahangaiko ya maisha” hata tukose kuona hatari iliyopo.—Luka 21:34-36; Mathayo 24:37-42.
5. Kulingana na maelezo ya Petro, ni mabadiliko gani yatakayotukia katika siku ya Yehova?
5 Petro pia anatushauri tuweke karibu akilini “kuwapo kwa siku ya Yehova, ambayo kupitia kwayo mbingu zikiwa zimewaka moto zitafumuliwa na elementi zikiwa moto sana zitayeyuka.” Serikali zote za wanadamu—“mbingu”—zitaharibiwa, ndivyo na wanadamu wote waovu—“dunia”—pamoja na “elementi” zake, yaani, mawazo na matendo ya ulimwengu huu mwovu, kama vile mwelekeo wake wa kutomtegemea Mungu na ukosefu wake wa adili na kupenda mno vitu vya kimwili. Mahali pa vitu hivyo patachukuliwa na “mbingu mpya [Ufalme wa mbinguni wa Mungu] na dunia mpya [jamii mpya ya wanadamu]” ambamo “uadilifu utakaa.” (2 Petro 3:10-13) Matukio hayo yatakayoubadili kabisa ulimwengu yataanza ghafula, siku na saa isiyotarajiwa.—Mathayo 24:44.
Uwe Chonjo Ili Uitambue Ishara
6. (a) Jibu la Yesu kwa swali la wanafunzi wake lilihusu mwisho wa mfumo wa Kiyahudi kwa kadiri gani? (b) Ni sehemu gani za jibu la Yesu zinazokazia matukio ya kuanzia mwaka wa 1914?
6 Tunapaswa kujua kinaganaga ishara yenye matukio mengi inayothibitisha kwamba tunaishi katika siku za mwisho—“umalizio wa mfumo wa mambo.” Kumbuka kwamba baadhi ya mambo ambayo Yesu alitaja katika Mathayo 24:4-22 alipojibu swali la wanafunzi wake kwenye mstari wa 3 yalitimia kwa kadiri ndogo kati ya mwaka wa 33 na 70 W.K., katika mfumo wa Kiyahudi. Lakini unabii huo unatimia kwa kadiri kubwa kuanzia mwaka wa 1914, wakati wa ‘kuwapo kwa Kristo na wa umalizio wa mfumo wa mambo.’ Andiko la Mathayo 24:23-28 lataja mambo ambayo yangetukia kuanzia mwaka wa 70 W.K. hadi wakati wa kuwapo kwa Kristo. Matukio yanayoelezwa kwenye Mathayo 24:29–25:46 yanatukia wakati wa mwisho.
7. (a) Kwa nini sisi binafsi tunahitaji kuwa macho ili kuona jinsi matukio ya sasa yanavyotimiza ile ishara? (b) Jibu maswali yaliyo mwishoni mwa fungu hili, ukionyesha jinsi ambavyo ile ishara imetimia tangu mwaka wa 1914.
7 Sisi binafsi tunahitaji kuwa macho ili kuona matukio yanayotimiza ishara hiyo. Kuona jinsi matukio hayo yanavyotimiza unabii wa Biblia kutatusaidia kuweka karibu akilini siku ya Yehova. Kufanya hivyo kutatuwezesha pia tuwaonye wengine kwa usadikisho kuhusu kukaribia kwa siku hiyo. (Isaya 61:1, 2) Tukiwa na mambo hayo akilini, hebu tuchanganue maswali yafuatayo ambayo yanakazia baadhi ya matukio makuu ya ile ishara, yanayotajwa kwenye Mathayo 24:7 na Luka 21:10, 11.
Unabii kuhusu ‘taifa kuinuka dhidi ya taifa na ufalme dhidi ya ufalme’ ulitimizwa kwa njia gani ya pekee kuanzia mwaka wa 1914? Unabii kuhusu vita umetimiaje tangu wakati huo?
Katika mwaka wa 1918, ni ugonjwa gani ulioangamiza watu wengi kuliko Vita ya Kwanza ya Ulimwengu? Licha ya utaalamu wa kitiba, bado mamilioni ya watu wanakufa kutokana na magonjwa gani leo?
Upungufu wa chakula umeathirije dunia licha ya maendeleo ya kisayansi yaliyofanywa katika karne iliyopita?
Ni nini kinachokusadikisha kwamba andiko la 2 Timotheo 3:1-5, 13 halitaji tu jinsi ambavyo hali zimekuwa sikuzote, bali jinsi hali mbaya zinavyozidi kuongezeka kadiri tunavyokaribia kikomo cha siku za mwisho?
Kutenganishwa kwa Watu
8. (a) Katika Mathayo 13:24-30, 36-43, Yesu alitaja jambo gani jingine ambalo linahusiana na mwisho wa ulimwengu huu? (b) Mfano wa Yesu wamaanisha nini?
8 Yesu alitaja mambo mengine muhimu yanayohusiana na mwisho wa ulimwengu huu. Jambo moja ni kutenganishwa kwa “wana wa ufalme” kutoka kwa “wana wa yule mwovu.” Yesu alieleza jambo hilo katika mfano wa adui aliyepanda magugu katikati ya ngano. “Ngano” aliyotaja katika mfano wake yawakilisha Wakristo wa kweli waliotiwa mafuta. “Magugu” ni wale wanaodai kuwa Wakristo lakini wanajithibitisha kuwa “wana wa yule mwovu” kwa sababu wanashikamana mno na ulimwengu ambao unatawaliwa na Ibilisi. Wanatenganishwa kutoka kwa “wana wa ufalme” wa Mungu nao wametiwa alama ya kuangamizwa. (Mathayo 13:24-30, 36-43) Je, utenganishaji huo umefanywa?
9. (a) Baada ya Vita ya Kwanza ya Ulimwengu, wote waliodai kuwa Wakristo walitenganishwaje? (b) Wakristo watiwa-mafuta walithibitishaje kwamba wao ni watumishi waaminifu wa Ufalme?
9 Baada ya Vita ya Kwanza ya Ulimwengu, wote waliodai kuwa Wakristo walitenganishwa kwenye vikundi viwili: (1) Makasisi wa Jumuiya ya Wakristo na wafuasi wao, ambao waliunga mkono kwa dhati Ushirika wa Mataifa (sasa ni Umoja wa Mataifa) huku wakitetea mataifa yao, na (2) Wakristo wa kweli walioishi baada ya vita hiyo, ambao waliunga mkono kwa dhati Ufalme wa Kimesiya wa Mungu, badala ya kuunga mkono mataifa ya ulimwengu huu. (Yohana 17:16) Walithibitisha kwamba wao ni watumishi waaminifu wa Ufalme wa Mungu kwa kuhubiri “habari njema hii ya ufalme” duniani pote. (Mathayo 24:14) Matokeo yamekuwa nini?
10. Kazi ya kuhubiri kuhusu Ufalme ilikuwa na matokeo gani kwanza?
10 Kwanza, mabaki ya wale waliotiwa mafuta kwa roho ya Mungu wenye tumaini la kutawala pamoja na Kristo katika Ufalme wa mbinguni, walianza kukusanywa. Walikusanywa katika tengenezo lenye umoja wajapoishi katika mataifa mbalimbali. Kazi ya kuwatia muhuri watiwa-mafuta inakaribia mwisho.—Ufunuo 7:3, 4.
11. (a) Ni kazi gani ya kukusanya inayoendelea, na kazi hiyo inatimiza unabii gani? (b) Kutimia kwa unabii huo kunaonyesha nini?
11 Kisha “umati mkubwa . . . kutoka katika mataifa yote na makabila na vikundi vya watu na lugha,” ulianza kukusanywa chini ya mwelekezo wa Kristo. Hao ni “kondoo wengine” ambao wataokoka “dhiki kubwa” na kuingia katika ulimwengu mpya wa Mungu. (Ufunuo 7:9, 14; Yohana 10:16) Kazi ya kuhubiri kuhusu Ufalme wa Mungu kabla mwisho haujaja ingali inaendelea leo. Kwa uaminifu, umati mkubwa wa kondoo wengine, ambao sasa idadi yao imefikia mamilioni, wanawasaidia mabaki watiwa-mafuta kuhubiri ujumbe muhimu wa Ufalme. Ujumbe huo unahubiriwa katika mataifa yote.
Ni Mambo Gani Yatakayotukia Wakati Ujao?
12. Kazi ya kuhubiri itafanywa kwa kadiri gani kabla siku ya Yehova haijafika?
12 Mambo yaliyotajwa yanaonyesha kwamba siku za mwisho zinakaribia kumalizika na kwamba siku ya Yehova i karibu. Lakini je, kuna unabii ambao unahitaji kutimia kabla ya siku hiyo yenye kutia hofu kuanza? Ndiyo. Kwanza, kutenganishwa kwa watu kuhusiana na suala la Ufalme hakujamalizika bado. Hivi sasa, katika baadhi ya maeneo ambayo yalikuwa na upinzani mkali kwa miaka mingi, watu wengi wameanza kujifunza Biblia. Hata katika sehemu ambazo watu wanakataa habari njema, rehema ya Yehova inaonekana tunapotoa ushahidi. Kwa hiyo, endelea kuhubiri! Yesu anatuhakikishia kwamba mwisho utakuja tukamilishapo kazi hiyo.
13. Kulingana na 1 Wathesalonike 5:2, 3, ni tukio gani muhimu litakalotukia, na litamaanisha nini kwetu?
13 Unabii mwingine muhimu sana wa Biblia unatabiri hivi: “Wakati wowote ule ambao wanasema: ‘Amani na usalama!’ ndipo uharibifu wa ghafula utakapokuwa hapohapo juu yao kama vile maumivu makali ya ghafula ya taabu juu ya mwanamke mwenye mimba; nao hawataponyoka kwa vyovyote.” (1 Wathesalonike 5:2, 3) Hatujui jinsi tangazo hilo la “amani na usalama” litakavyofanywa. Lakini bila shaka halitamaanisha kwamba viongozi wa ulimwengu wametatua kabisa matatizo ya wanadamu. Wale wanaoweka karibu akilini siku ya Yehova hawatapotoshwa na tangazo hilo. Wanajua kwamba punde baadaye, uharibifu wa ghafula utatukia.
14. Ni mambo gani yatakayotukia wakati wa dhiki kubwa, na yatafuatanaje?
14 Mwanzoni mwa dhiki kubwa, watawala watashambulia na kuharibu Babiloni Mkubwa, miliki ya ulimwenguni pote ya dini isiyo ya kweli. (Mathayo 24:21; Ufunuo 17:15, 16) Kisha, mataifa hayo yatawashambulia wale wanaounga mkono utawala wa Yehova. Shambulio hilo litamkasirisha sana Yehova hivi kwamba ataziharibu kabisa serikali za kisiasa na wale wanaoziunga mkono. Vita hiyo ya Har–Magedoni ndiyo itakayokuwa upeo wa dhiki kubwa. Halafu, Shetani na mashetani wake watatiwa katika abiso, hawataweza kuwadanganya tena wanadamu. Siku ya Yehova itafikia kikomo, siku ambayo atalitakasa jina lake.—Ezekieli 38:18, 22, 23; Ufunuo 19:11–20:3.
15. Kwa nini si jambo lenye hekima kufikiri kwamba siku ya Yehova ingali mbali sana?
15 Mwisho wa ulimwengu huu utakuja kwa wakati barabara, kulingana na ratiba ya Mungu. Hautachelewa. (Habakuki 2:3) Kumbuka kwamba Yerusalemu liliharibiwa ghafula mwaka wa 70 W.K. Wayahudi hawakutarajia uharibifu ungekuja wakati huo, walifikiri kwamba hatari ilikuwa imepita. Vipi Babiloni la kale? Lilikuwa jiji lenye nguvu, lenye usalama, na lilizingirwa kwa kuta kubwa sana. Lakini lilianguka usiku mmoja tu. Vivyo hivyo, ulimwengu huu mwovu utaharibiwa ghafula. Uharibifu utakapokuja, na tupatikane tukiwa na umoja katika ibada ya kweli, tukiwa tumeiweka karibu akilini siku ya Yehova.
Mazungumzo ya Kurudia
• Kwa nini ni muhimu kuiweka karibu akilini siku ya Yehova? Tunaweza kufanyaje hivyo?
• Sisi binafsi tunahusikaje katika kazi ya kuwatenganisha watu inayoendelea sasa?
• Ni mambo gani yatakayotukia kabla ya siku ya Yehova kuanza? Basi tunapaswa kuwa tukifanya nini sasa?
[Picha katika ukurasa wa 180]
Ulimwengu wa Shetani utaharibiwa siku za mwisho zitakapofikia kikomo hivi karibuni