Kumjia Msikiaji wa Sala

“Ee Msikiaji wa sala, hata kwako wewe watu wa kila namna ya mwili watakuja.”​—Zab. 65:2, NW.

1, 2. (a) Kila mtu anatolewa ukaribishaji gani? (b) Je! ni vigumu kwa Mungu kusikia sala, naye atasikia sala ya nani?

NI KWA kadiri gani wewe unavyotumia uwezo wako wa kusema? Bila shaka unaweza kuwa baraka kubwa kwa wengine ukiwa na uwezo mzuri sana wa kusema. Lakini, zaidi ya hilo, Mfanyi wa usemi na sauti anakutolea ukaribishaji mzuri sana umjie katika sala. Wenye kushukuru wanaukubali ukaribishaji huo na kupaza sauti zao kwa kumsifu na kumwomba Mfanyi wa lugha.​—Zab. 150:6.

² Unaposali kwa Mungu aitwaye Yehova, huenda ikawa ulipo pana kelele nyingine, muziki au makelele ya namna mbalimbali. Hata hivyo, yeye aliyewezesha kuwe na usemi anaweza kufahamu maana ya sala za wale wanaokubali ukaribishaji wake kumfikia na maombi yao. Yeye hategemei mawimbi ya sauti ndio asikie wala hatatizwi wakati mawimbi ya hewa yanapojawa na kelele kelele za upuzi za wasiomcha Mungu. Kwa habari ya uwezo wa Mungu wa kusikiliza, tunahakikishiwa hivi: “Bila shaka utaisikia tamaa ya wapole, Ee Yehova. . . . Utasikiliza kwa sikio lako.”​—Zab. 10:17, NW.

 3. Je! iko njia inayofaa ya kusali? Wajuaje?

³ Sala ni mazoea ya kidini yanayopendwa na watu wengi ulimwenguni, nao wanafuata utaratibu wa mawazo mengi. Pengine wewe ni mmoja wa watu hao wengi ambao wamesali, hata hivyo ukakosa kujua kama unamfikia Mungu wa kweli kwa njia inayofaa. Kwa wazi, kuna njia ya heshima ya kusema naye. Yeye akiwa ni Mungu mwenye kupashana habari na watu na mwenye upendo mkuu, ametoa habari za kutosha katika Neno lake aliloliongoza kwa roho yake ili watu wa mataifa yote wajue namna ya ‘kumkaribia Mungu’ katika sala kwa njia inayofaa na yenye heshima.​—Yak. 4:8.

 4. Ni mengine gani kati ya mambo yanayotakiwa ili sala zisikiwe na Mungu?

⁴ Unaposali, husemi na ye yote tu bali unasema na “Mwenyezi aliye katika mbingu.” (Ebr. 8:1, NW) Hiyo peke yake inatilia mkazo uhitaji wa kukubali mtu si mkamilifu. Unyofu na imani yanaweza kupangwa pia kati ya mambo yanayotakiwa. Angalia katika maneno ya Yesu namna imani na sala zinavyokamatanishwa sana: “Kwa sababu hiyo nawaambia, Yo yote myaombayo mkisali, aminini ya kwamba mnayapokea, nayo yatakuwa yenu.” (Marko 11:24) Unapojaribu kueleza mambo unayotaka kwa kuyawaza na kuyasema, fanya hivyo kwa ‘moyo wako wote.’​—Zab. 119:145.

NJIA YA KUJA

5, 6. (a) Hapo kwanza Yehova aliruhusu nani wasali kwake? (b) Sala za Kornelio zilijibiwaje?

⁵ “Watu wa kila namna ya mwili” na wa mataifa yote wanaweza kumjia Mungu wanapoona uhitaji wa msaada wa kiroho. Hata wakati taifa la Israeli lilipokuwa ‘mali ya kipekee’ ya Mungu, wageni pia wangeweza kumfikia Yehova. Wangeweza kuja na kusali kuelekea nyumba ya Yehova katika Yerusalemu, wakiwa na hakika kwamba Mungu angesikia akiwa katika mbingu. (2 Nya. 6:32, 33) Mtume Petro alikubali uhakika huo nyumbani kwake Kornelio, akisema hivi: “Mungu hana upendeleo; bali katika kila taifa mtu amchaye na kutenda haki hukubaliwa na yeye.”​—Matendo 10:34, 35.

⁶ Kornelio alikuwa mtu wa mataifa, “akida . . . mtu mtauwa, mchaji wa Mungu,” aliyeonyesha imani yake. Ebu wazia furaha aliyokuwa nayo Kornelio malaika alipomhakikishia kwamba sala zake na zawadi za rehema (alizokuwa akiwapa watu) zilimfanya Mungu aitikie kwa upendeleo! Aliukubali ushuhuda alioutoa Petro, kisha yeye na nyumba wake wakabatizwa.​—Matendo 10:1-4.

 7. Mungu awapa nani ujuzi?

⁷ Kama Kornelio, wale wanaokufa njaa ya kiroho leo wamepaswa kuwa wakipapasa-papasa wakimtafuta Mungu kwa bidii. (Matendo 17:27) Imewapasa wawe wakijitahidi sana kujua mapenzi yake na mambo ambayo Mungu anataka kwa mtu ndiyo ampendeze. Naye Mungu ni mwenye neema na rehema, akitoa ujuzi huo kwa kuwajibu wale wenye mioyo inayoelekea haki na wanaoonyesha imani ya unyofu.

 8. (a) Yehova ametufanyia mpango gani tumjie? (b) Kwa sababu gani Yesu aliagiza sala ipitishwe katika jina lake?

⁸ Ili apashane habari kwa hiari na Baba wa kimbinguni, lazima mtu akubali Kristo Yesu ni Bwana. Kuwa na amani na Mungu kwaweza kupatikana kwa njia iliyowekwa tu, mpango wa ukombozi kupitia kwa Bwana Yesu. (Mt. 20:28; 1 Tim. 2:5, 6) Yeye ndiye mpango wa kumfikia Mungu katika sala na kupatanishwa naye. Kwa haki Yesu alisema hivi: “Mtu haji kwa Baba, ila kwa njia ya mimi.” (Yohana 14:6) Yeye ndiye “mwombezi” anayetusaidia sana tumfikie Msikiaji wa sala. (1 Yohana 2:1, 2) Kwa hiyo, njia ya kumjia Mungu ni msingi wa utumishi rasmi wa Kristo akiwa kuhani mkuu na pia ukombozi aliotolea wanadamu. Kwa hiyo, tunapoomba kwa jina lake na kumjia Baba tunatambua cheo chake kama ‘Wakili Mkuu wa Mungu wa uzima.’ Hakuna mtu mwingine anayehitajiwa kuwa katikati tunapotoa sala zetu kwa Mungu.​—Matendo 3:15, NW; Yohana 14:13, 14; Ebr. 10:19-22.

 9. Tukimtazamia Mungu asikie maombi yetu, imetupasa tusalije?

⁹ Nyakati zote lazima tujione huru kutoa maombi yetu kwa Mungu. Hilo ni jambo zuri, lakini imepaswa ikumbukwe kwamba si takwa wala lazima kwake ajibu yote. Sababu gani asikilize au kujibu sala ambazo hazihusu faida zake wala faida za watu wake, au pengine hata zinazoweza kumdhuru mwenye kuomba? Yeye hatendi kinyume cha makusudi yake mwenyewe wala hatendi kinyume cha faida za wanaomwabudu yeye. Lazima kila ombi limpendeze Msikiaji wa sala ndio alitimize. Hiyo yatuonyesha imetupasa tuombe sawasawa na mapenzi ya Mungu ikiwa tunatazamia asikilize sala zetu, kama vile ilivyoandikwa: “Huu ndio ujasiri tulio nao kwake, ya kuwa, tukiomba kitu sawasawa na mapenzi yake, atusikia.” (1 Yohana 5:14) Kujua mapenzi yake kumepaswa kuongoze mambo tutakayomwomba.

SALI KWA IMANI

10. Kwa sababu gani imani ni ya lazima ili kusema na Mungu kwa uhuru?

¹⁰ Mwendo mzima wa maisha ya Mkristo wa kweli unaongozwa na imani, ikimwezesha ashinde vipingamizi katika utumishi wake kwa Mungu. Kwa hiyo pia sala inapohusika, kuamini kwamba yuko Mungu halisi aliye hai anayeweza kusikia sala na anayezisikia kunatusaidia kusema naye kwa hiari. Kwa kweli, ni jambo la maana kuwa na imani kabisa kwamba ‘Mungu yuko, na kwamba huwapa thawabu wale wamtafutao kwa bidii.’ (Ebr. 11:6) Yeye ajuaye mambo vizuri zaidi na kujali zaidi anayajua mahitaji yetu sikuzote, hata ingawa huenda yakatofautiana sana kwa watu wanaoishi katika sehemu mbalimbali za ulimwengu. Katika maana ya mfano ‘Yehova yu karibu na wote wamwitao kwa imani,’ naye ni mwepesi wa kuitikia haja yao ya msaada.​—Zab. 145:18.

11. (a) Je! Mungu ayajua mahitaji yetu? (b) Basi sababu gani tuyaombe?

¹¹ Tunaposema na Yeye ambaye masikio yake yako wazi kusikia sala za wenye haki, tunakumbushwa kwamba yeye anajua kabisa tunayohitaji kabla hatujayaomba. Kwa habari ya chakula, vinywaji na mavazi, Mwana wake mwenyewe alisema hivi: “Baba yenu wa mbinguni anajua ya kuwa mnahitaji hayo yote.” (Mt. 6:32) Lakini ingawa Mungu anajua yote hayo, anataka tumwombe atutimizie mahitaji yetu na mambo tunayotaka. Kwa sababu anaendelea kutukaribisha tumjie, ingeonyesha hatuthamini tukidhani haitupasi kumsumbua kwa kumwomba mahitaji yetu ya kila siku. Akiwa ndiye mwangalizi wa mwanadamu, ‘Mungu aonaye’ anawatazama wema na wabaya pia duniani, naye hakuwaacha wanaompenda, hata kuwalazimisha wajitatulie matatizo yao peke yao. Bila shaka Yehova Mungu anafurahi kuwasikiliza wanaomtegemea yeye, wanapomwambia kwa maneno yao wenyewe kwamba wanamtambua yeye kuwa Baba yao na kimbilio lao, na chemchemi ya nguvu zao.​—Mwa. 16:13; Zab. 46:1; Mit. 15:3.

12. (a) Wengine wana maoni gani mabaya juu ya sala? (b) Kwa sababu gani hata hivyo ni jambo la faida kusali?

¹² Wale wasio na imani nyingi huenda wakadhani Mungu ameacha wanadamu peke yao. Au huenda wakadhani sala ni njia ya kujidanganya tu. Huenda wengine wakadhani ni msaada wa akili kuwezesha mtu atulie akilini, ili mawazo yake yawe juu ya mambo ya kiroho. Walakini, mawazo hayo ya moyoni siyo yanayohusika peke yake. Hujisemeshi bali unasema na Baba aliye hai wa kimbinguni, ambaye anaweza “kufanya mambo ya ajabu mno kuliko yote tuyaombayo au tuyawazayo.” (Efe. 3:20) Maamuzi yanapofanywa, yawe ni makubwa au madogo, roho ya Yehova na uongozi wake ndio unaoweza kuonyesha njia ya kufuata. Ingawa Mungu hana ukosefu wa kitu cho chote, yeye anafikiria sana mahitaji ya watu wake, nao wanakaribishwa ‘wamtwike yeye fadhaa zao zote za maisha ya kila siku, kwa maana yeye hujishughulisha sana kwa mambo hayo.’​—1 Pet. 5:7.

SALA INASAIDIA

13. Sala ilimsaidiaje Eliya?

¹³ Ni kupitia kwa nabii wa Israeli nguvu na matokeo ya sala yalivyoonyeshwa. Baada ya kutangaza kwamba ukavu wa muda mrefu juu ya Israeli ulikuwa unakaribia kukoma, Eliya alisali akiwa juu ya Mlima Karmeli mvua ipate kunya tena. Mtumishi wake akiwa huko juu mlimani akaona sala hiyo ikijibiwa​—kwanza kikatokea kiwingu kidogo, ambayo ndiyo dalili ya mvua, kisha bubujiko likafuata. Mwandikaji wa Biblia Yakobo aeleza juu ya uwezo wa Yehova wa kujibu sala za watumishi wake wanaosali kulingana na kusudi lake, anapokaza fikira juu ya tukio hilo. Twasoma hivi: “Kuomba kwake mwenye haki kwafaa sana, akiomba kwa bidii.”​—Yak. 5:16-18; 1 Wafalme, sura 17, 18.

14. Kwa sababu gani imempasa mtu aendelee kuomba mahitaji yake yatimizwe?

¹⁴ Baba ya jamaa ya kibinadamu amefanya mpango wote wapashane habari naye, mchana na usiku, maana anapendezwa kweli kuona wakiwa na hali njema na furaha. Wazazi wanafurahi watoto wao wanapowategemea nyakati zote kwa mahitaji yao; Yehova ajua hata zaidi namna ya kuruzuku wale wanaoendelea kumwomba. Alipokuwa akieleza jambo ilo hilo, Yesu aliwapa wanafunzi wake mfano “ya kwamba imewapasa kumwomba Mungu sikuzote, wala wasikate tamaa.” (Luka 18:1-8) Kuombaomba unachohitaji kwaonyesha unakitaka, nawe unathawabishwa kwa kuendelea kusali wakati sala zako zinapojibiwa.

15. Sala ina ubora gani wakati wa upinzani?

¹⁵ Uenezaji wa habari njema unapokatizwa wenye kuzieneza baadaye wanapatwa na mabadiliko ya sikuzote. Huenda wakataabishwa au kuteswa, kama vile Kristo Yesu alivyofanyiwa. Imeandikwa: “Wote wale wanaotaka kuishi kwa utawa kwa kushirikiana na Kristo Yesu watateswa pia.” (2 Tim. 3:12, NW) Walakini, sala na maombi kwa Mungu, pamoja na kumpenda na kumtumaini yeye, yanasaidia mashahidi wa Yehova wa Kikristo katika mwendo wao wa uaminifu, hata iweje. (Zab. 34:15) Warumi 12:12 inashauri hivi: “Katika dhiki, mkisubiri” na pia, “katika kusali, mkidumu.”

16, 17. (a) Tunawezaje kuonyesha tunafikiria ndugu zetu wanaopatwa na mateso? (b) Hii nayo inaonyesha nini kwa upande wa mwombaji?

¹⁶ Marufuku zinawekwa mara kwa mara kuzuia kuhubiriwa kwa habari njema, kisha kesi zinatokea mahakmani, mateso yanatokea na nyakati nyingine wahubiri wenyewe wanafungwa. Tunapopata habari za mambo hayo tunaona fahari juu ya ndugu zetu wanaosimama imara, wasiache yaliyo haki hata kwa ajili ya kupata faraja ya muda. Tunaweza kutiwa nguvu wanaposimamia haki kwa njia yenye fahari wakati wa mikazo, nao pia wanaweza kutiwa moyo na kusaidiwa na sala zetu. Naam, inafaa kuombea wale walio na vyeo serikalini ili Wakristo waweze kuendeleza maisha yao ya Kikristo na utendaji wao bila kusumbuliwa.​—1 Tim. 2:1, 2.

¹⁷ Ndugu zetu wanapokuwa katika magumu, kama vile katika kesi kubwa mahakmani, tunaweza kuonyesha tunawafikiria kwa kuendelea kuwaombea. Ni wazi kwamba Mungu anaruhusu waombaji waonyeshe wingi wa upendo wao, ukweli wa makusudi yao, wanapoomba faraja. Umbali wala kuta za gereza hazizuii maombi yao. Bila shaka, Maandiko yanaonyesha kwamba kuendelea kusali kunaweza kusaidia kuleta faraja kwa wale waliomo katika hali mbaya sana.​—2 Kor. 1:8-11.

SABURI NA UENDELEVU WA KUSALI

18. Kwa sababu gani saburi ni ya lazima katika kusali?

¹⁸ Lakini imetupasa tutambue sikuzote uhitaji wa kumngoja Yehova, ndiyo ajibu sala zinazohusu marufuku na mateso. Nyakati nyingine inapoelekea Mungu amekawia isidhaniwe hana uwezo wa kuchukua hatua kwa ajili ya wale awapendao. Pengine huo sio wakati wake wa kuleta ushindi katika mahakma au faraja kwa njia nyingine, kwa maana huenda ushuhuda mkubwa hata zaidi ukatolewa kwa ufalme wa Mungu faraja ikija baadaye. Usiseme Mungu ni ‘mkawivu’ kamwe bali tambua kwamba yeye anao ‘wakati wake unaofaa’ kwa kila jambo. Kwa sasa, anaweza kutoa ulinzi wa kimalaika. Faraja inaweza kupatikana pia kutokana na aliyosema mtume Petro: “[Yehova] ajua kuwaokoa watauwa na majaribu . . . [Yehova] hakawii kuitimiza ahadi yake, kama wengine wanavyokudhani kukawia.” (2 Pet. 2:9; 3:9) Naam, Msikiaji wa sala aweza kuwatia nguvu wale walio na saburi na wanaodumu kufanya mapenzi yake.

19. (a) Je! tusali kwamba Mungu azuie mateso? (b) Yehova aweza kufanya nini sikuzote akitaka?

¹⁹ Uwezo wa sala inayotolewa kwa ajili ya wengine usisahauliwe, iwe inatolewa na mtu mmoja au na wengi. Yehova halazimishwi kuchukua hatua na wingi tu wa wenye kusali. Wenye kuomba wanaomba mapenzi ya Yehova yatendeke, nao wanapowafikiria wahubiri wenzao wa habari njema kwa umoja na kwa upendo wanafanya hivyo ili wapate msaada na ulinzi. Pengine mapenzi ya Mungu ni kuleta faraja kwa njia wasiyoiona wanaohusika. Utegemee uhakika huu kwa matumaini: Yehova atawategemeza wale wanaoendeleza ukamilifu wakiwa katika magumu!

20. Je! wakati wo wote tudhani kwamba maombi yetu kwa ajili ya wengine ni ya bure?

²⁰ Kwa hiyo mtu asidhani kamwe kwamba maombi yake ni ya bure au pengine hakusali sawasawa ili wenye kuteswa waweze kusaidiwa. Atakayofanya Mungu kwa kujibu ni yale ambayo ingalitupasa kuomba kama tungalijua kufanya hivyo. (Rum. 8:26, 27) Imempasa kila mmoja awe na matumaini kwamba katika karne zote uwezo wa Yehova haukupungua wala yeye hakuwa kiziwi, asiweze kusikia sala za waabudu wake.

UHURU KATIKA SALA

21. (a) Kwa sababu gani haimpasi mtu kusita kusali? (b) Ni sifa gani nzuri zinazovuta mtu kwa Yehova?

²¹ Mtu anayeonyeshwa upendo kamili na Mungu anajiona huru kumjia kwa matumaini kamili. Sababu gani mtu ye yote asite kutoa sala ya shukrani, ya sifa au ya kumwomba jambo fulani Mungu mwenye sifa nyingi sana zilizo nzuri ajabu, kutia na rehema, ustahimilivu na fadhili za upendo? (Zab. 36:7) Wakiisha kuzifahamu sifa hizo za utu wake, imewapasa watu wasiokamilika wajipe moyo wamjie Yehova, “Mungu wa utukufu,” wakiwa na habari yo yote na kumwomba msaada wa kufanya mapenzi yake ya kimungu. (Matendo 7:2) Tukiwa tunaishi katika ulimwengu wenye chuki na choyo, inatuburudishaje kuja na kusali kwa baba mwenye huruma na rehema juu yetu tunapokuwa katika magumu au tunapopatwa na ubaya fulani. Kama vile yeye mwenyewe alivyomtangazia Musa: “Yehova, Mungu mwenye rehema na neema, mpole wa hasira na mwenye wingi wa fadhili za upendo na kweli.”​—⁠Kut. 34:6, NW.

22. Sababu nyingine ya kumjia Yehova kwa uhuru ni nini?

²² Iko sababu nyingine pia ya kumfikia Mungu wa namna hiyo tukiwa na uhuru wa kusema katika sala baada ya kujua namna Kristo Yesu anavyohusika katika mpango huo. Mtume Paulo anakaza fikira zetu kwake anaposema hivi katika Waebrania 4:15, 16: “Kwa kuwa hatuna kuhani mkuu asiyeweza kuchukuana nasi katika mambo yetu ya udhaifu; bali yeye alijaribiwa sawasawa na sisi katika mambo yote, bila kufanya dhambi. Basi na tukikaribie kiti cha neema kwa ujasiri [“kwa uhuru wa kusema,” NW], ili tupewe rehema, na kupata neema ya kutusaidia wakati wa mahitaji.” Tukijua kwamba alipatwa na mambo yale yale ambayo lazima tupatwe nayo na kuyavumilia, tunafahamu namna anavyoweza kuwa mwenye huruma na msaada kwetu sisi viumbe vyenye dhambi tunapojaribu kupatanishwa na Mungu kupitia kwake kama mkombozi na mpatanishi wetu.​—Ebr. 7:25.

23. (a) Kwa sababu gani Yesu alijiona huru kuzungumza na Baba yake? (b) Ni nyakati gani hasa aliposali?

²³ Yesu alijiona huru kupashana habari na Baba yake wa mbinguni alipokuwa duniani. Wakati huo alipokuwa mbali na Yehova, yeye alifurahi sana kusema na Mungu kwa sala. Alikuwa na mambo ya maana ya kusema, kwa hiyo akaenda sehemu za faragha kumwezesha kutafakari. Masimulizi yote ya Injili yaonyesha wazi kawaida ya Yesu ilikuwa kusali​—wakati wa ubatizo wake alikuwa akisali; alipolisha umati wa watu alisali pia; tena kabla ya kuchagua mitume wake alisali; pia katika kijio cha Ukumbusho alisali, na alipokuwa katika mti wa mateso. Nyakati hizo na pindi nyingine Yesu alikuwa akipashana habari na Baba yake wa kimbinguni. Alitaka kumpendeza Baba yake katika mambo yote na kufanya mapenzi Yake, si yake yeye mwenyewe. (Yohana 5:30) Alikuwa akiendelea kufanya kazi aliyogawiwa, akijua kwamba maombi yake na dua yalikuwa yakisikiwa kwa upendeleo. (Ebr. 5:7-10) Yeye hakuacha yaliyo haki kamwe ndiyo asiteswe bali alifuata mwendo wa maisha ya ukamilifu, akaiunga mkono enzi kuu ya Yehova. Kwa sababu hiyo, hata viumbe vya kimbinguni vilimtangaza kuwa anastahili heshima na utukufu aliopata.​—Ufu. 5:11, 12.

24. Ili tuifanikishe njia yetu, twaweza kufanya nini?

²⁴ Kiongozi na Bwana huyu aliyefanikisha njia yake kwa sala ni mfano mwema kama nini wa kufuatwa na Wakristo wote! Wote wanaotaka kufanikiwa kama yeye wamepaswa wafuate mfano wa huyu aliyekuwa na hamu nyingi sana kufanya aliyotaka Baba yake kila siku. Kusema na Mungu kwa unyofu wa yaliyomo moyoni, kuomba nguvu na tegemezo la kufanya mapenzi yake, kunamsaidia mwombaji atembee na kuzungumza katika njia inayompendeza Muumba. Kumkaribia Mungu, kumsihi sana kwa roho ya kumtegemea, na kutafuta uongozi wake kunaweza kutufariji. Tunatiwa moyo tumtwike Mungu fadhaa zetu zote. (1 Pet. 5:7) Unaweza kukumbuka kwamba Yesu alishauri tusali wala tusiache kumwomba Mungu cho chote tunachoweza kuhitaji.​—Luka 18:1-7.

ENDELEA KUSALI

25. Unawezaje kuonyesha nia ya kungoja?

²⁵ Kuwa na makadirio yanayofaa juu ya kupashana habari na Yehova kutasaidia mwombaji afuate mwendo wenye haki, bila kutazamia atimiziwe kila ombi papo hapo. Kwa kweli, huenda ikampasa mtu kuonyesha saburi nyingi anapongoja jibu, anapojaribiwa au kuadhibiwa. Mtu asidharau kamwe uwezo wa sala, bali aonyeshe ‘nia ya kungoja’ akiwa na matumaini kabisa, kama aliyoonyesha Mika, kwamba “Mungu wangu atanisikia.”​—Mik. 7:7.

26, 27. (a) Wawezaje kuonyesha unauamini uwezo wa sala? (b) Kumpenda Mungu kumepaswa kukuvute ufanye nini?

²⁶ Ukiisha kufanya ubaya fulani, huo sio wakati wa kuacha kumsihi sana Mungu upate upendeleo wake, kama kwamba hujioni unastahili kusali. Mtu hapaswi ‘kuficha’ makosa yake. (Mit. 28:13) Ukitaka rehema, mwambie Yehova Mungu wako namna unavyosikitikia ulilofanya, pengine bila kufikiri wakati huo. Ukiisha kulisahihisha jambo hilo kwa kadiri unavyoweza, onyesha kwamba unaamini sala ina uwezo na kwamba Mungu ana nia ya kusamehe, kwa kumwomba msamaha. Kwa njia hiyo unaweza kuonyesha una matumaini kwamba Yehova asikia maombi yako ya msaada na kufahamu mambo unayoyahitaji hasa.​—Zab. 5:1, 2.

²⁷ Je! unafahamu kabisa maana ya ukaribishaji unaotolewa kwa watu wa kila namna ya mwili wamjie Msikiaji wa sala? Ikiwa kwa kadiri fulani mtu anaona woga kumfikia Mungu, je! hiyo haionyeshi ukosefu fulani wa kumpenda, hata ukosefu wa kuthamini mpango wa ukombozi? Kwa hakika makosa ya mtu ya kutokamilika hayapaswi kuwa kizuizi cha kumfikia Muumba mwenye upendo kwa hiari. Kwa kweli, kumpenda Mungu kumepaswa kumvute mtu aseme na Muumba wake mwenye rehema kwa uhuru.​—1 Yohana 4:16-18.

28. (a) Wanaume wazee wanawezaje kuwa baraka kwako? (b) Kuna mfano gani wa mtu mwenye dhambi nzito aliyemwomba Mungu amrehemu?

²⁸ Walakini, inawezekana mtu akaacha kuwa na matumaini ya kumwomba Yehova msaada. Pengine dhamiri mbaya au kasoro fulani iliyotokea maishani mwako ilikufanya ujione hustahili. Katika hali kama hiyo iko hatari kubwa ukiacha kumwomba Mungu msaada. Sababu gani uongeze uzito wa jambo lenyewe kwa kuacha kusali? Kwa watu wa namna hiyo wanaosita kumjia Mungu wao wenyewe na kusema naye kwa uhuru, sala za kuwaombea za wanaume wazee kundini zinaweza kuwa baraka. Watu hao wanaostahili kundini wamo kukusaidia ukiona kuna “wingu” linalokuzuia usimfikie Mungu na kuzuia sala zako zisipite. (Omb. 3:44) Ni kwa habari ya kuombeana Yakobo aliandika hivi: “Kuomba kwake mwenye haki kwafaa sana, akiomba kwa bidii.” (Yak. 5:16) Kuomba msaada hivyo ni mpango wenye upendo wa kutoa shauri na kusali kwa ajili ya wale wanaosita kumweleza Mungu ambaye ni mwenye haki, mwema na mtakatifu kabisa, yote yaliyomo mioyoni mwao wakiwa peke yao. Kwa upande mwingine, mtenda dhambi anayemfikia Mungu yeye mwenyewe anaweza kubarikiwa kweli kweli kwa kumsihi Mungu amrehemu. Hiyo ilimsaidia Mfalme Manase wa Yuda. Aliendelea kusali, na mwishowe ombi lake likasikiwa.​—2 Nya. 33:12, 13.

29. Kwa sababu gani imewapasa wote wawe wanyofu katika sala zao?

²⁹ Imewapasa watu wote waseme mambo waziwazi na kuwa wanyofu wa moyo kwa Yehova Mungu wakitaka awatimizie maombi yao. Sababu gani mtu ye yote ajaribu kumficha lo lote? Yeye hata ‘aijua mioyo ya watu wote.’ Kwa hiyo usijaribu kamwe kumdanganya. (Matendo 1:24; Yer. 17:10) Sema mambo waziwazi katika sala zako, ukikubali kwa bidii dhambi zako na makosa uliyomfanyia Baba yako wa kimbinguni. Uwe na shukrani nyingi kama Daudi mwaminifu na kumwomba Mungu akuchunguze kabisa aujue moyo wako. Mwombe sana asikie sala yako na kusikiliza haja zako. (Zab. 139:23; 86:6) Kumbuka, sala ya mnyofu inafurahisha. Kwa hiyo zifikirie sababu nyingi zinazokupasa uendelee kusali kwa uhuru, ukimtazamia Mungu kwa matumaini akusikie na kukusaidia.​—Mit. 15:8.

30. Imekupasa umjie nani bila kusita?

³⁰ Yuko Mtu uwezaye kuja kwake bila kusita. Yeye ndiye “Msikiaji wa sala.” Kwa hiyo sababu gani usimfurahishe ‘unapomjulisha Mungu haja zako kwa kusali na kuomba’? (Flp. 4:6) Kwa kufanya hivyo unaweza kusonga mbele ukionyeshwa upendo ambao Mungu anao kwa wale wanaomjia yeye.