Roho Takatifu Yafanya Kazi

“Roho yamwagwa juu yetu kutoka juu.”​—Isa. 32:15.

 1. Kwa sababu gani sasa roho takatifu inatakiwa ichukue hatua haraka ya kusaidia wapendao haki?

SASA roho takatifu yatakiwa ifanye kazi haraka. Chanzo cha roho hiyo ni Yehova, Mungu Aliye Juu Zaidi. Roho hiyo ni nguvu ya utendaji isiyoonekana anayoitendesha mapenzi yake matakatifu. Lakini kwa sababu gani roho takatifu inatakiwa ifanye kazi hasa leo isaidie wapendao yaliyo haki, mema na matakatifu? Ni kwa sababu ya mambo yanayowakabili sasa.

 2. Ni wenzi gani watatu wanaotawala dunia leo, nasi twaweza kuuliza maulizo gani juu ya tunavyohusika?

² Leo “mnyama” wa ajabu, “nabii wa uongo” na “joka” wanatawala dunia. Wenzi hao watatu wanaongoza hata watawala wa kisiasa wa ulimwengu, “wafalme wa ulimwengu wote.” (Ufu. 16:13, 14) Hiyo inatuletea sisi watu wa kawaida hatari kubwa, kwa sababu mambo yawapatayo watawala wa serikali yanatupata sana sisi watu wenye vyeo vidogo. Lakini, je! sisi watu mmoja mmoja tunaweza kujichukulia msimamo wetu wenyewe kuhusu “mnyama,” “nabii wa uongo” na “joka,” bila kujali watawala wetu wa kisiasa watafanya nini? Tutajiacha tuongozwe kadiri gani na wenzi hao watatu, watuumize? Ulinzi wetu ni nini?

 3. Ufunuo, sura ya kumi na tatu, inamsimuliaje “mnyama” huyo. nao wenye kupendezwa naye wanauliza ulizo gani?

³ “Mnyama” huyo anatembea-tembea ulimwenguni pote akiwa huru! Kiumbe huyo mkali sana anaungwa mkono na “joka” yule mwekundu. Joka huyo si mnyama-mwitu wa vivi hivi aliyetokea katika msitu wa Brazil wala katika mwitu wa nchi fulani ya Afrika ya kati. Huyo ni kiumbe mwenye uwezo, mamlaka na hata kiti cha ufalme. Kwa hiyo anatawala katika siasa, si kati ya wanyama. Ana akili kama ile inayoweza kuwa katika vichwa saba. Ana uwezo wa kuogofya, wa kufanya jeuri na wa kujitetea, kama ule unaoweza kuwa katika pembe kumi juu ya vichwa saba. Ndiyo sababu anaelezwa kuwa mnyama mwenye vichwa saba na pembe kumi katika kitabu cha unabii cha Ufunuo. Amefanya wazalendo kila mahali wapendezwe naye. Wanadhani kwamba mnyama huyu mwenye vichwa saba na pembe kumi hashindiki. Waabudu hao wenye kupendezwa naye wanauliza ulizo hili la ukaidi: “Ni nani afananaye na mnyama huyu? Tena ni nani awezaye kufanya vita naye?”​—Ufu. 13:1-4.

 4. “Mnyama” huyo ataendelea kuwa nasi muda gani?

⁴ Muda wote ambao umepita, sisi watu wa kawaida tumemwona “mnyama” huyo akifanya kazi, lakini kufikia hapo kuna wo wote kati yetu waliomtambua? Je! wo wote kati yetu wamejua sababu gani anaonyeshwa kuwa alivyo katika kitabu cha Ufunuo? “Mnyama” huyo yuko pamoja nasi leo, na watu wenye hofu hawajui ataendelea kuwa nasi muda gani. Biblia iliyoongozwa na Mungu inajibu kwamba atakuwa na wanadamu mpaka mwisho, mpaka yule awezaye “kufanya vita naye” atakapokutana naye na kumharibu. Kisha hataabudiwa tena kamwe.

 5. “Mnyama” huyo mwenye vichwa saba anafananisha nini, naye anaongozwa na kitu gani chenye uwezo upitao ule wa kibinadamu?

⁵ “Mnyama” huyo ni wa mfano, kama wale wanyama-mwitu wanaoonyeshwa katika unabii wa Danieli, sura ya saba. Wanyama hao wanne walifananisha serikali fulani za kibinadamu, milki, mamlaka za kisiasa za ulimwengu, kama Milki ya Babeli, Milki ya mwungano wa Wamedi na Waajemi, Milki ya Ugiriki, na Milki ya Rumi, pamoja na mamlaka ya ulimwengu ya mwungano wa Waingereza na Waamerika. Hata hivyo, “mnyama” anayetajwa na Ufunuo, sura za kumi na tatu mpaka kumi na tisa, anafananisha nini? Anafananisha utawala wote wa kisiasa wa wanadamu, katika dunia nzima. Ingawa mnyama huyo anatawala ulimwengu mzima, yeye si mwungano wa serikali zote za kitaifa zikiwa na mji mmoja mkuu wa ulimwengu. Amefanyizwa na sehemu nyingi za kisiasa, ambazo zimetawalwa na mfuatano wa mamlaka saba za ulimwengu. Tena, mnyama huyo ametawalwa na “joka” yule mwekundu mwenye uwezo upitao wa kibinadamu.

 6. (a) Serikali za kidunia za leo zimetoka wapi? (b) Serikali hizo zinanyenyekea utawala gani?

⁶ Serikali zote za Kidunia za leo zilianzwa na wanadamu. Kwa hiyo, Ufunuo 13:1 waonyesha ‘zatoka katika bahari.’ Zimetoka katika “bahari” kubwa sana ambayo ni wanadamu wasiotosheka, kwa sababu wanakataa kunyenyekea Muumba wa mbingu na dunia. (Isa. 57:20, 21) Wanadamu hao wananyenyekea utawala wa “joka” yule mwekundu mwenye uwezo upitao wa kibinadamu. Ndiyo sababu Ufunuo 13:2 watupasha habari kwamba “yule joka akampa [mnyama] nguvu zake na kiti chake cha enzi na uwezo mwingi.” Hakuna fumbo juu ya anayefananishwa na “joka” huyo. Ufunuo, sura ya kumi na mbili, mstari wa tisa, wasema wazi kwamba “joka” ndiye “nyoka wa zamani, aitwaye Ibilisi na Shetani, audanganyaye ulimwengu wote.” Shetani yule “joka” hayuko peke yake anapotawala serikali zote za kisiasa za dunia. Anavyo vikosi vya malaika, roho walio kama yeye mwenyewe wenye uwezo upitao wa kibinadamu, na mashetani hao wanapiga vita wakiwa upande wa “joka” kuhusu suala la enzi kuu ya ulimwengu wote.

 7. Akiwa kama mungu, “joka” ana mnenaji gani duniani?

⁷ Mtume Mkristo Paulo amwita Shetani “mungu wa taratibu hii ya mambo.” (2 Kor. 4:4, NW) Akiwa kama mungu, “joka” huyu ana nabii duniani. Nabii wa namna gani? “Nabii wa uongo,” kwa sababu anakuwa mnenaji wa “joka” “audanganyaye ulimwengu wote.” (Ufu. 12:9) Basi, ni wazi kwamba unabii wake unadanganya watu, na hivyo ni “wa uongo.” Je! sisi leo tunadanganywa naye?

 8. Kwa sababu gani “nabii wa uongo” ameruhusiwa kunena kama mjumbe wa “mnyama” mzima?

⁸ Tusikosee kudhani kwamba “nabii wa uongo” huyo ni mwanadamu mmoja. Yeye ni jamii ya watu, taratibu ya kisiasa ambayo ni kubwa kuliko serikali nyingine zote. Ni kubwa sana hata “mnyama” amemtambua “nabii wa uongo” kuwa serikali iliyo hodari zaidi siku hizi. Sababu gani isiwe? Hiyo ndiyo ikawa mamlaka ya ulimwengu yenye nguvu zaidi katika historia yote ya kibinadamu kulingana na unabii wa Biblia. Kwa hiyo imeruhusiwa inene kama mjumbe wa “mnyama” mzima.

 9. Mpaka sasa “nabii wa uongo” amenena akiwa na mamlaka ya nani, nao unabii wake umekuwa ukidanganya watu kwa njia gani?

⁹ Hasa karne mbili zilizopita “nabii” huyo, ambaye ni Waingereza na Waamerika, amefanya watu wasikie sauti yake yenye mamlaka isiyopinduliwa mpaka sasa. Kwa kuwa ndiyo mamlaka ya saba ya ulimwengu inayotajwa katika unabii wa Biblia, mamlaka hii ya ulimwengu ya Waingereza na Waamerika imefanya “ishara” za kustaajabisha mataifa yote na kuyadanganya yaache kumnyenyekea Muumba wa mbingu na dunia. Ndiyo imekuwa ikitetea na kuunga mkono tengenezo Umoja wa Mataifa la leo, linalokusudiwa kuhakikisha ulimwenguni kuna amani na usalama. (Ufu. 19:20) Mwungano wa kisiasa wa Waingereza na Waamerika umo kati ya majeshi yaliyo na nguvu nyingi zaidi za atomiki duniani. Hautoi unabii ukipendelea dunia yote itawalwe na Muumba, Yehova Mungu, kwa sababu unatumainia nguvu zake wenyewe.

“ROHO TATU ZA UCHAFU ZILIZOFANANA NA VYURA”

10, 11. (a) Ni kwa sababu ya tisho gani kwa wanadamu wote twapaswa kuonywa habari za mwungano wa wenzi watatu, “Joka,” “mnyama” na “nabii wa uongo”? (b) Ufunuo 16:13-16 unatupa onyo gani?

¹⁰ Kwa sababu ya mambo ya hakika yaliyotangulia, je! twaweza kusema kikweli kwamba ulimwengu huu wa karne ya 20 unatawalwa na “mnyama” wa mfano, “nabii wa uongo” na “joka”? Ndiyo! Kwa hiyo sote twapaswa kuonywa habari za wenzi hao watatu wenye kumkaidi Mungu, kwa sababu wanataka kuharibu wanadamu wote. Kwa njia gani? Si kwa vita ya ulimwengu ya tatu ya kutumia makombora ya atomiki, bali kwa vita ya ulimwengu wote katika kiitwacho na Biblia Har–​Magedoni. Kitabu cha mwisho cha Biblia, Ufunuo, kinawapa watu wote onyo hilo. Ingawa kitabu hicho kinatumia usemi wa mfano, inafahamika wazi kwamba vita hiyo ya ulimwengu wote italetea wanadamu msiba. Tusomapo Ufunuo 16:13-16, twaweza kufahamu onyo linavyoeleza kwa usemi wa mfano. Katika The New English Bible mistari hiyo yasema hivi:

¹¹ “Kisha nikaona zikitoka katika kinywa cha yule joka, kinywa cha yule mnyama, na kinywa cha yule nabii wa uongo, roho tatu chafu kama vyura. Roho hizo zilikuwa maibilisi, wenye uwezo wa kufanya miujiza. Walitumwa wakakutanishe wafalme wote wa ulimwengu kwa ajili ya siku ile kuu ya pigano la Mungu Bwana mwenye enzi kuu. . . . Kwa hiyo wakawakusanya wale wafalme katika mahali panapoitwa katika Kiebrania Har–​Magedoni.”

12. (a) Roho hizo tatu zilizo kama vyura ni nini zitokazo katika vinywa vya “joka,” “mnyama” na “nabii wa uongo”? (b) “Roho” hizo zinaelekeza wanadamu wote wapi?

¹² ‘Roho chafu’ zirukazo “kama vyura” kutoka vinywani mwa yule joka, mnyama na nabii wa uongo si viumbe halisi wa kiroho kama maibilisi au mashetani. Kwa kuwa zinatoka katika vinywa vitatu, zinafananisha porojo, yaani porojo zilizo chafu kama vyura wenye kujitutumua na kukoroma kwa njia yenye kuhuzunisha. Porojo hizo zina nguvu, zina nguvu za kusukuma watu au kuwasihi. Kwa hiyo, tafsiri New World Translation of the Holy Scriptures inasema hivi: “Hizo, kwa kweli, ni semi zenye kuongozwa na mashetani.” Ni “semi chafu zenye kuongozwa” zitokazo vinywani mwa joka, mnyama na nabii wa uongo. Semi hizo zenye nguvu zinaelekeza watawala wapi? Kwenye “vita ya siku ile kuu ya Mungu Mwenyezi” katika Har–​Magedoni. Naam, zinawaelekeza wakapigane na Mungu, si na wanadamu wenzao katika vita ya ulimwengu ya tatu ya kutumia makombora ya atomiki. Je! hilo si jambo lenye msiba zaidi? Bila shaka!

13. Ikiwa hatutaki kuelekea kwenye Har–​Magedoni, twapaswa kusaidiwa na nini, na kwa sababu gani?

¹³ Safari ya kuelekea kwenye uwanja wa pigano wa Har–​Magedoni imeanza! Je! porojo chafu zinatusihi mmoja mmoja tusonge mbele pamoja na “wafalme wa ulimwengu wote”? Je! tutajiacha tuongozwe na porojo tukapigane na Mungu Mwenye Nguvu Zote? Ikiwa sisi mmoja mmoja hatutaki kuongozwa nazo twawezaje kuzuia nguvu za “semi chafu zenye kuongozwa” zitokazo kwa yule joka, mnyama na nabii wa uongo? Twaweza kufanya hivyo kwa kusaidiwa na nguvu nyingine tofauti ya roho takatifu ya Mungu Mwenye Nguvu Zote. Hiyo ni nguvu kuu zaidi, isiyo chafu, bali takatifu. Katika Ufunuo 4:5, nguvu zake zinaonyeshwa kuwa mara saba, kama vile vinara saba vya taa vilivyofananisha “roho saba za Mungu.” Roho ya Mungu ni nguvu yake takatifu ya utendaji isiyoonekana. Tukiangazwa na kutiwa nguvu nayo, twaweza kushinda nguvu zenye kusukumiza watu za ‘zile roho tatu chafu za mashetani,’ au “semi zenye kuongozwa na mashetani.”​—Ufu. 16:14, American Standard Version; NW.

14, 15. (a) Ni jambo gani linaloweza kutuogofya zaidi kuliko kukutana na mnyama-mwitu halisi, joka na nabii wa uongo kwa pamoja, tukiwa bila silaha? (b) Ni kwa njia gani upinzani mkali sana waweza kumalizwa?

¹⁴ Huenda mtu akapaza sauti kwa hofu akisema: ‘Hiyo ingemaanisha nipambane na ulimwengu mzima. Hilo linaogofya!’ Naam, inaweza kuwa hivyo kwa mtu asiye na roho ya Mungu. Ingekuwaje kama tungekutana na mnyama-mwitu halisi na joka mwekundu pamoja na nabii wa uongo kwa pamoja, tukiwa bila silaha? Je! hiyo isingetuogofya? Ndiyo! Lakini namna gani juu ya kupambana na vitu ambavyo ni vikubwa zaidi ya hivyo vinavyofananishwa na mnyama na joka mwekundu na nabii wa uongo? Bila shaka ni jambo la kuogofya zaidi kukabiliana na taratibu ya utawala wa kisiasa ya ulimwengu wote iliyo kama mnyama, na kukabiliana na “nabii wa uongo” mwenye nguvu za atomiki pamoja na mtawala wao mwenye nguvu zipitazo za kibinadamu, yule Joka mkuu, Shetani Ibilisi! Je! mwanadamu dhaifu aweza kukabiliana nao bila ulinzi wa kutosha? Hatuwezi kupinga porojo na mikazo ya vitu hivyo vyenye nguvu na kukataa kujiunga navyo kwa uwezo wetu wenyewe. Mwungano wa wenzi hao watatu, unaohusu mbingu na dunia, unajitokeza ututatize sana. Twaweza kuushindaje?

¹⁵ Mungu Mwenye Nguvu Zote akiwa nasi, twaweza kushindana na mkazo na upinzani wa ulimwengu mzima. Karne kumi na tisa zilizopita mtume Mkristo Paulo aliuawa na “mnyama” wa kisiasa kwa ajili ya imani, lakini alisema hivi kwa ushujaa: “Mungu akiwapo upande wetu, ni nani aliye juu yetu?” (Rum. 8:31) Kwa hiyo, Mungu Mwenye Nguvu Zote aweza kutatua matatizo tunayodhani ni makubwa mno. Ndivyo alivyomwambia gavana wa Yerusalemu wa kale, aliyemwagiza ajenge hekalu katika mji huo. Ili kumtia moyo gavana huyo, Zerubabeli, aendelee kujenga bila kujali upinzani mkali sana wa walimwengu, Mungu alimwambia hivi: “‘Si kwa kutumia jeshi, wala uwezo, bali roho yangu,’ Yehova wa majeshi amesema.”​—Zek. 4:6, NW.

16. Kama katika habari ya Gavana Zerubabeli, tunalazimishwa kujaribu nini ikiwa tunataka kuwa upande wenye kushinda katika Har–​Magedoni?

¹⁶ Katika karne ya sita kabla ya Wakati wetu wa Kawaida, gavana wa Yerusalemu aliijaribu roho ya Mungu kwa kufanya alivyoagizwa na Mungu. Kwa sababu ya kuonyesha Mungu ni msema kweli, alifurahi kuona hekalu likimalizwa na kuzinduliwa mwaka wa 515 K.W.K. (Zek. 4:8-10) Vivyo hivyo, leo tunajaribiwa tuonekane kama tunaamini roho ya Mungu, kwa sababu tunapingwa na mwungano wa wenzi watatu, “mnyama,” “nabii wa uongo,” na “joka.” Tunalazimishwa kuijaribu roho ya Mungu, ili tuendelee kumwabudu Yehova Mungu katika hekalu lake la kiroho na kuendelea kujitenga na ulimwengu. Tukifanya hivyo, bila shaka tutakuwa upande wenye ushindi wakati wa “vita ya siku ile kuu ya Mungu Mwenyezi” katika Har–​Magedoni.

ROHO YAMIMINWA KUTOKA JUU

17, 18. (a) Yehova alisaidiaje watu wake kwa roho yake baada ya kukaa katika hali’ ya ukiwa wakati wa Vita ya Ulimwengu ya Kwanza? (b) Yehova alionyeshaje hilo mapema katika Isaya 32:12-16?

¹⁷ Yehova, Chanzo cha roho takatifu, hajakosa kusaidia waabudu wake katika huu “wakati wa mwisho” wenye hatari, ambamo tumekuwa tangu mwaka wa 1914, uliokuwa wa Vita ya Ulimwengu. Ametendesha roho takatifu kwa uaminifu ikawasaidia watu wake walio wakf na waliobatizwa. Alitabiri kwamba angefanya hivyo. Wakati wa Vita ya Ulimwengu ya Kwanza iliyotukia miaka 1914-1918 W.K. ulikuwa na magumu ulimwenguni pote, na wanafunzi hao waaminifu wenye kulitangaza Neno la Mungu lililoandikwa, Biblia Takatifu, walipatwa na mateso wakawa katika hali ya ukiwa. Hatuwezi hata kidogo kusema kwamba Mungu hakuwa na hekima alipoacha wapatwe na jaribu hilo la kuwatia adabu. Hata lilifananishwa na yaliyoupata ufalme wa Yuda wa kale pamoja na mji wake mkuu Yerusalemu. Katika sura ya 32 ya unabii wa Isaya, Yehova alieleza ukiwa wenye kuleta maombolezo ambao ungewapata watu wake waasi, na vile mambo yangekuwa wakiisha kutubu na kumrudia. Alisema:

¹⁸ “Watajipiga vifua kwa ajili ya mashamba mazuri, kwa ajili ya mzabibu uliozaa sana. [Kwa sababu gani?] Juu ya nchi ya watu wangu itamea michongoma na mibigili; naam, juu ya nyumba za furaha katika mji ulio na shangwe [Yerusalemu]; maana jumba la mfalme litaachwa; mji uliokuwa na watu wengi utakuwa hauna mtu; kilima na mnara utakuwa makao ya wanyama milele, furaha ya punda-mwitu, malisho ya makundi ya kondoo; hata roho itakapomwagwa juu yetu kutoka juu; hata jangwa litakapokuwa shamba lizaalo sana; nalo shamba lizaalo sana litakapohesabiwa kuwa msitu. Ndipo hukumu itakaa katika jangwa, na haki itakaa katika shamba lizaalo sana.”​—Isa. 32:12-16.

19. Hapo Isaya alikuwa akitaja msiba gani uliopata taifa hilo?

¹⁹ Je! leo tunaweza kujua nabii Isaya ‘ alikuwa akieleza msiba gani hapa, zaidi ya karne moja kabla haujatukia? Eeh, ndiyo, ni kuharibiwa kwa nchi ya ufalme wa Yuda kwa miaka 70, ambao ndio wakati Waisraeli waliohamishwa walikalishwa katika nchi ya upagani ya Babeli. Wao waliokoka uharibifu wenye kutisha wa mji mtakatifu wa Yerusalemu na hekalu lake, ulioletwa na Wababeli mwaka 607 K.W.K. Bila shaka yaliyotukia yalishusha mioyo ya waokokaji. Hekalu la Yehova la ibada lilikuwa magofu walipokuwa wakisinzia katika nchi yenye kuabudu sanamu, nao Yerusalemu ulikuwa si mji tena, ulikuwa hauna makelele, na nchi yao iliyokuwa na mazao wakati mmoja sasa ilikuwa imekuwa jangwa lenye vichaka vya miiba, na mahali pa kuchezea punda-milia wa mwitu, bila ya kusumbuliwa na mwanadamu.

20. (a) Babeli ya kale ilikosea kwa kuifikiria ilikuwa na uwezo gani wa kufunga watu wa Yehova? (b) Ni kwa nguvu za nini Waisraeli wenye kutubu walirudi, nayo nchi yao ikawaje?

²⁰ Babeli yenye kuabudu sanamu iliendelea kukalisha Waisraeli uhamishoni, kama kwamba walikuwa gerezani, ikiwa na kusudi la kumkaidi Yehova Mungu. Mamlaka hiyo ya Tatu ya Ulimwengu wa kale ilijiona kuwa yenye nguvu za kutosha kuweza kuzuia nchi ya Yuda iliyokuwa ukiwa isikaliwe tena na waabudu wa Mungu mpinzani, Yehova. Haikudhani kwamba Yehova angeweza kumtokeza mshindi Mwajemi, Koreshi, aliyekuwa amemtaja jina mapema sana. Mshindi huyo alijitokea katika wakati wake. Sawa na ilivyokuwa imetabiriwa, Koreshi aliushinda uwezo wa mamlaka hiyo yenye ukatili akawafungua Waisraeli wafungwa. Hivyo, mwaka 539 K.W.K., Mamlaka ya Ulimwengu iliyoharibu makao ya kidunia ya watu wa Yehova iliondolewa katika cheo chake kikuu. Ndipo roho ya Yehova ilipomiminwa kutoka juu ikawaangukia mabaki wa Waisraeli wahamishwa mwaka wa 537 K.W.K. Mabaki ya Waisraeli wenye kutubu waliondoka Babeli warudie nchi yao iliyokuwa ukiwa wakaujenge tena Yerusalemu na hekalu lake takatifu, kwa nguvu na uongozi wa roho hiyo ya utendaji iliyotoka kwa Mungu Aliye Juu Zaidi. Nchi hiyo ilipokaliwa tena, ukiwa wake ulianza kwisha kidogo kidogo walipokuwa wakiigeuza kuwa nchi yenye mazao mengi, hata uzuri wake ukakaribia wa paradiso, Bustani ya Edeni.

21. Tukio hilo huko nyuma lilionyesha nini juu ya kutimizwa kwa unabii wa Isaya, sura ya 32?

²¹ Lakini, je! tukio hilo la zaidi ya miaka 2,500 iliyopita lilitimiza kabisa unabii huo wa Isaya, sura ya 32? Hapana! Yaliyotimizwa kidogo huko nyuma yangekuwa na utimizo mkubwa katika karne yetu ya 20. Utimizo huo mkubwa ambao ndio wa mwisho umekwisha kutukia juu ya wale ambao leo ni watu wanaokubaliwa wa Mungu yule yule, Yehova.

22. Wakati wa Vita ya Ulimwengu ya Kwanza, ni silaha za namna gani zilizotumiwa kupiga mashahidi Wakristo wa Yehova, na kwa sababu gani mataifa yaliwaghadhibikia?

²² Tangu mwaka wa 1931 W.K., Wakristo hao waliorudishwa katika hali inayofaa wamejulikana kama Mashahidi wa Yehova. Lakini miaka mingi kabla ya hapo, walipatwa na mabaya ya kiroho wakati wa Vita ya Ulimwengu ya Kwanza. Wakati ule ule vita hiyo ya umwagaji wa damu ya kutumia silaha za hatari sana ilipokuwa ikiendelea, walifanyiwa vita na “mnyama” wa mfano aliyepewa na “joka,” Shetani Ibilisi, mamlaka na kiti cha ufalme na uwezo mwingi. Lakini, vita hiyo haikuwa ya kutumia silaha za kufisha, kwa maana Wanafunzi Wakristo wa Biblia walikuwa watu wasioumiza wengine, wasiokuwa na silaha. Siasa na kesi za mahakmani ndizo silaha zilizotumiwa kupiga Wakristo wasio na hatia na wenye kutafuta amani, hata wakatiwa gerezani. (Ufu. 13:3-7) Mataifa yenye kutaka vita, ambayo ndiyo yanafanyiza “mnyama,” yalighadhibika kwa sababu mashahidi hao Wakristo wa Yehova walikuwa wakitangaza kwamba ufalme wake unaosimamiwa na Kristo ndio utawala wa pekee ulio na haki ya kutawala dunia yote sasa, kwa maana “nyakati za Mataifa” zilizowekwa zilikwisha mwanzoni mwa vuli ya mwaka wa 1914 W.K.​—Luka 21:24, Authorized Version; Ufu. 11:15-18.

23. Mataifa yenye kutaka vita yalichochewa na nani, nao mabaki wenye kutangaza Ufalme walishindwa nguvu na mwungano wa wenzi gani watatu wenye uwezo mwingi?

²³ Mataifa hayo yenye ghadhabu yalichochewa na viongozi wa dini wa Babeli Mkuu, milki ya ulimwengu ya dini ya uongo ambayo asili yake ni Babeli ya kale. Jumuiya ya Wakristo ndiyo iliyoongoza milki hiyo ya kidini kuchochea mataifa yatese mabaki madogo ya Waisraeli wa kiroho. Kwa kuwa mabaki walikuwa wachache wasioumiza watu, wasio na silaha, walishindwa nguvu na mwungano wa wenzi watatu, “mnyama,” “nabii wa uongo” na “joka.” Wenzi hao watatu waliunganisha majeshi yao yakaingiza mabaki ya watangazaji wa Ufalme utumwani mwa Babeli Mkuu. Tutaona katika kurasa zinazofuata yaliyofuata na jinsi unabii wa Isaya sura ya 32 ulivyotimizwa kwa mara ya mwisho.

[Picha katika ukurasa wa 131]

WENZI WATATU WAKAIDIO MUNGU