Jina la Mungu na Lako

KWA kufaa, unapendezwa na jina lako. Linapotajwa, unatega sikio. Lakini zaidi ya jina ulilopewa​—liwe Otieno, Nyambura, Kioko au jingine​—“jina” lako vilevile laweza kumaanisha sifa yako. Kulingana na maoni haya jina lako lakupasa wewe kama mtu bi nafsi na vile umejionyesha kuwa.

Huenda rafiki zako wanakuita kwa jina lako ulilopewa au la kwanza, wala si lile la ukoo. Na unafurahi zaidi wanapokuona kuwa mtu mwenye “jina jema.” (Mit. 22:1) Sote tuna sababu ya kuhangaikia jina letu.

Ikiwa hivyo ndivyo ilivyo kwa wanadamu, bila shaka ndivyo ilivyo hata zaidi kuhusu Muumba wa ulimwengu wote. Yeye alichagua kujifunua kwa wanadamu kuwa ana jina la pekee, lenye maana ambalo linamtambulisha yeye kama Mtimizaji wa makusudi na ahadi zake. Hivyo kwa kufaa Mungu angeweza kutaja jina lake Yehova kuwa “kumbukumbu” lake. (Kut. 3:14, 15; Hos. 12:5; Zab. 135:13) Jina hilo linahusiana na yote ambayo amefanya na anayokusudia kufanya.

Kwa hiyo, je! hatupaswi kulitumia na kulithamini jina la Mungu? Na zaidi ya hayo, je! Mungu anatujua sisi kwa jina letu​—kwa jina letu la pekee pamoja na uhusiano wetu kama watu wanaokubaliwa naye?

Maelekeo kati ya viongozi wengi wa kidini, na hata katika tafsiri nyingi za Biblia, ya kutojali au kulishusha jina la Mungu la pekee yanazuia watu wasiwe na uhusiano kama huo pamoja naye. Akiandika juu ya kuacha kuandika jina la Mungu katika Biblia nyingine, Dakt. Walter Lowrie aliandika katika Anglican Theological Review hivi:

“Katika uhusiano (ushirikiano) wa kibinadamu ni jambo la maana sana kujua jina halisi, jina la Pekee, la yule tumpendaye, ambaye tunasema naye, au hata yule tunayesema juu yake. Ndivyo ilivyo kabisa katika uhusiano wa mwanadamu na Mungu. Mtu asiyemjua Mungu kwa jina kwa kweli yeye hamjui kwamba ni Mtu, haongei naye kwa kufahamiana (ambayo ndiyo sala), na hawezi kumpenda, ikiwa anamjua tu kama nguvu isiyo na utu.”

Mwandikaji huyo sana sana alikuwa akikumbuka uhakika wa kwamba katika tafsiri ya karibuni ya Biblia jina la Mungu linaonekana mara nne tu. Ndiyo, ingawa viongozi wengi wa kidini wamefundisha wafuasi wao kusali, “Jina lako litukuzwe,” wao hawakuweka mfano katika kutumia jina hilo au kusisitiza litiwe katika Biblia.​—Luka 11:2.

Kwa mfano, ebu angalia tafsiri ya Kiingereza Common Bible (1973) iliyokubaliwa itumiwe na Waprotestanti na Wakatoliki. Dibaji yake inasema kwa wazi kwamba haitafuata mfano wa American Standard Version (1901), iliyotumia jina la Mungu mara elfu nyingi. Kwa sababu gani watupilie mbali jina hilo? Sababu moja iliyotolewa ilikuwa maoni mbalimbali juu ya matamshi yake. Ya pili ilikuwa: “Matumizi ya jina halisi la Mungu yule yule mmoja wa pekee, kama kwamba kulikuwako na miungu mingine ambayo Yeye anahitaji kutofautishwa nayo, yalikomeshwa katika dini ya Kikristo na hayana maana kabisa kwa imani ya ulimwengu wote ya Kanisa la Kikristo.”​—Uku. wa 7.

Walakini, kama tulivyokwisha kuona, kuna ushuhuda unaoongezeka wa kwamba Wayahudi wa wakati wa Yesu na Wakristo wa kwanza walilitumia jina la Mungu. Na ikiwa Mungu wa mbinguni mwenyewe anasema kwamba anataka ajulikane kwa jina lake ambalo ni “kumbukumbu,” je! sisi hatupaswi kukubali uamuzi wake?

JINA LAKE​—NA JINA LETU

Hata hivyo, kuna mambo mengi juu ya kujua kwetu jina la Mungu. Si jambo tu la kujua kwamba jina la Muumba pekee ni “Yehova”​—⁠au jingine linalofanana na hilo. Tunahitaji kujua vilevile Mtu ambaye jina hilo linawakilisha​—makusudi yake, utendaji, sifa na matakwa yake kama yanavyofunuliwa katika Biblia. (Neh. 9:10; 1 Fal. 8:41-43) Kwa hiyo, Yesu aliposema, “naliwajulisha jina lako,” alimaanisha zaidi ya kwamba alilitumia tu jina hilo. (Yohana 17:26) Bila shaka Kristo alifanya hivyo alipokuwa akisoma Maandiko ya Kiebrania yaliyokuwa na jina la Mungu. Lakini zaidi ya hayo, alilitangaza na kufanya kazi ya kuendeleza makusudi yanayofungamanishwa na jina hilo. Wale waliofundishwa na Yesu walikuja kumthamini Yehova vizuri zaidi, kwa kuongeza uhakika wao kwamba “kusudi la milele” la Mungu litatimizwa.​—Yohana 14:10; 6:38; Efe. 3:11.

Tukija kumjua Yehova katika maana hiyo, sisi vilevile tutajulikana naye. (Yohana 17:3) Yeye atatujua na kutukubali; tutakuwa na jina jema kwake. (Mhu. 7:1) Kwa hiyo kujua kwetu Mungu na jina lake kunaweza kuongoza katika kujulikana kwa jina letu naye, akitukubali sisi. Malaki 3:16 linaonyesha hili:

“Ndipo wale waliomcha [Yehova] waliposemezana wao kwa wao. Naye [Yehova] akasikiliza, akasikia; na kitabu cha ukumbusho kikaandikwa mbele zake, kwa ajili ya hao waliomcha [Yehova], na kulitafakari jina lake.”

Kwa kweli, basi, unapaswa kulihangaikia jina la Mungu na lako. Tunahitaji kupendezwa na kulijua, kulitumia na kuliheshimu jina hilo. Hii inatulazimu tuishi kulingana na makusudi yanayofungamanishwa na jina hilo.

Kwa mfano, Malaki alitaja kwamba ‘watu wanaomwogopa Yehova’ walisemezana. Hivyo wao walichagua kama rafiki zao watu ambao vilevile walipendezwa na kulitukuza jina la Mungu. Tunaweza kujiuliza hivi, ‘Katika kuchagua mashirika yangu, je! mimi ninafikiria kama wao ni watu wanaomjua Yehova na wanaoshirikiana na makusudi yake? Je! tamaa yangu ya kumjua Mungu na kujulikana naye inapasa hata sehemu hizi za maisha yangu ya kila siku?’

Na katika maisha yetu ya kawaida​—kazini, mtaani, shuleni​—tukutanapo na watu wasiomfahamu Yehova, je! sisi tunakuwa macho tutumie nafasi zinazofaa tuseme habari Zake? Zaidi ya yote, je! sisi tuna juhudi ya ‘kulijulisha jina la Mungu’ kwa kushiriki kabisa katika kazi kubwa aliyoitabiri Yesu kwa siku zetu aliposema: “Habari njema hizi za ufalme [wa Mungu] zitahubiriwa katika dunia yote inayokaliwa na watu kwa ushuhuda kwa mataifa yote”? (Yohana 17:6, 26; Mt. 24:14, NW) Kufanya hivyo kwa furaha kunaonyesha kwamba, kwetu, jina Yehova si jina tu lililoandikwa katika kitabu. Ni sehemu ya maisha yetu.

Makala inayofuata, “Jina la Mungu na Litukuzwe,” inaonyesha njia nyingine nzuri ambazo katika hizo tunaweza kuonyesha kwamba tunalijua jina la Mungu na kwamba tunatamani yeye atujue kwa jina letu.

Kuwa na uhusiano unaokubaliwa na Yehova, na kumjua kama Mtu halisi, kutakuwa na matokeo ya yeye kutukumbuka, kwa faida yetu ya milele. Kama alivyosema Malaki, itakuwa kama kwamba Yeye ameandika majina yetu katika ‘‘kitabu cha ukumbusho,”‏ tukiwa na zawadi ya uzima wa milele.​—Yohana 17:3.