Ambayo 1914 Ungemaanisha Kwako Wewe
VITA ya ulimwengu ya kwanza ilikuwa ndiyo kubwa zaidi na pigano la kibinadamu lenye kuleta uharibifu mkubwa zaidi kufikia wakati huo. Vita ya ulimwengu ya pili—kwa kweli ilikuwa mwendeleo tu wa ile ya kwanza—ilikuwa mbaya zaidi sana. Katika vita hivyo viwili, wanajeshi zaidi ya milioni 25, bila kuhesabu watu wa kawaida, walichinjwa.
Vita ya ulimwengu ya tatu ya kutumia silaha za nyukilia za mataifa yenye nguvu zaidi, kama ingaliweza kutokea, ingekuwa na maana mataifa yote yangeharibiwa. Wenye ufahamu wanatuhakikishia kwamba ingemaanisha angalau mwisho wa ustaarabu tunaojua na uwezekano wa jamii ya kibinadamu kuangamizwa isiwepo tena. Wengine wa kizazi kilichoshuhudia kifo cha mrithi wa kiti cha ufalme wa Austria mwaka 1914 wameishi muda mrefu kutosha wakaweza kushuhudia upeo huu uwezekanao katika vita vya kibinadamu.
Lakini, nyakati zetu ni zenye maana kwa sababu nyingine zisizo za kisiasa. Unabii wa Biblia unatuambia juu ya mambo ambayo yamekuwa yakitokea wakati wa miaka 70 iliyopita ambayo hayakuonekana kwa macho ya kibinadamu. Yalikuwa matukio ambayo yanaweka nafasi nzuri sana mbele yako WEWE. Na tuchunguze yaliyo ya maana zaidi kati yayo.
Yesu na 1914
Wakati mmoja Yesu alipokuwa peke yake na wafuasi wake wanne, walimuuliza hivi: “Ni nini itakayokuwa ishara ya kuwapo kwako na ya umalizio wa mfumo wa mambo?” Yesu hakuwapa tarehe fulani. Badala yake alisimulia mfululizo wa matukio ya ulimwengu na mitindo ambayo ingewezesha wafuasi wake wajue kwamba “kuwapo” kwake kwa kiroho kumeanza. Unabii wake unasema: “Taifa litainuka juu ya taifa na ufalme juu ya ufalme, na kutakuwako upungufu wa chakula na matetemeko ya ardhi mahali hapa na mahali hapa.” Kisha akaongeza: “Mambo hayo yote ni mwanzo wa maumivu makali ya ghafula ya taabu.”—Mathayo 24:3, 7, 8, NW.
Je! sasa unaona sababu yenyewe kwa nini vita vikuu vya karne hii ni vyenye maana sana? Vinatimiza unabii wa Yesu. Hakuna vita vingine vya historia vinavyolingana na vita vya ulimwengu viwili. Ni vita ya ulimwengu ya tatu ya kujiangamiza peke yake ndiyo ingeweza kuwa kubwa zaidi, lakini Yesu hakuwa akitabiri juu ya hiyo, kwa kuwa vita alivyosema juu yake vilikuwa sehemu ya “mwanzo wa maumivu makali ya ghafula.” Taabu zingeendelea na hata kuongezeka baada ya kutokea. Bila shaka, unabii wake umetimizwa katika vile vita vya ulimwengu vilivyoanza mwaka wa 1914.
Umalizio huo unathibitisha tunapofikiria sehemu nyingine za ‘ishara ya kuwapo kwake’ ambayo Yesu alitoa katika Mathayo 24 na sehemu nyingine za Biblia. Jisomee mwenyewe. Matoleo mengine ya Mnara wa Mlinzi yamekwisha kuzizungumza kikamilifu, na utimizo wa sehemu hizo zote pamoja bila kupingwa unathibitisha kwamba karne yetu kweli kweli imejionea “kuwapo” kwa Yesu. Kwa halisi hilo lina maana gani?
“Kuwapo” kwa Yesu kunamaanisha kuanza kwa utawala wake akiwa Mfalme wa Ufalme wa Mungu. Si jambo tunaloweza kuona kwa macho yetu ya halisi kwa sababu Ufalme wa Mungu ni wa kimbingu, si wa kidunia. (Yohana 18:36) Ndiyo sababu “ishara” ikahitajiwa ili tuweze kujua kumetokea. Hata hivyo, ni ukweli wa maana sana kwamba katika siku za mapema za karne hii, wakati mamlaka za ulimwengu zilipokuwa zikianguka na mamlaka mpya kutokea, mamlaka ya ulimwengu iliyo kuu kupita zote—Ufalme wa Mungu—ilitokezwa.
Shetani na 1914
Basi, ikiwa “kuwapo” kwa Yesu hakuonekani, sababu gani ni kwa maana sana? Kwa sababu ya matokeo ya kuwapo huko juu ya wanadamu. Unabii mbalimbali mwingine unatusaidia tufahamu hilo. Kwa mfano, katika kitabu cha Ufunuo, mtume Yohana ameandika njozi ya mambo ambayo yangetokea wakati Yesu angeanza kutawala akiwa Mfalme wa Kimasihi: “Kulikuwa na vita mbinguni; Mikaeli na malaika zake wakapigana na yule joka, yule joka naye akapigana nao pamoja na malaika zake; nao hawakushinda, wala mahali pao hapakuonekana tena mbinguni. Yule joka akatupwa, yule mkubwa, nyoka wa zamani, aitwaye Ibilisi na Shetani, audanganyaye ulimwengu wote; akatupwa hata nchi, na malaika zake wakatupwa pamoja naye.”—Ufunuo 12:7-9.
Kwa hiyo, vita ya ulimwengu ya kwanza haikuwa vita pekee iliyotokea mwaka wa 1914. Vita kubwa zaidi ilipiganwa, ingawa haikuonekana kwa macho ya kibinadamu. Lakini matokeo yake yalisikika hapa duniani: “Nikasikia sauti kuu mbinguni, ikisema, Sasa kumekuwa wokovu, na nguvu, na ufalme wa Mungu wetu, na mamlaka ya Kristo wake . . . Kwa hiyo shangilieni, enyi mbingu, nanyi mkaao humo. Ole wa nchi na bahari! kwa maana yule Ibilisi ameshuka kwenu mwenye ghadhabu nyingi, akijua ya kuwa ana wakati mchache tu.”—Ufunuo 12:10, 12.
Hapo pana ukubwa mpya wa matatizo ya wanadamu katika karne ya 20. Shetani na mashetani wake wamefungiwa katika ujirani wa dunia. Je! inashangaza kwamba baadhi ya watu waovu zaidi katika historia wameishi na kufanikiwa katika wakati wetu? Utendaji wa Shetani utaendelea kwa “wakati mchache tu.” Lakini maadamu wakati huo unaendelea, mambo hayatakuwa afadhali. Haishangazi Yesu alisema kwamba vita ya ulimwengu ya kwanza na matukio yenye kuhusiana yalikuwa ni “mwanzo wa maumivu makali ya ghafula ya taabu” tu!
Lakini, taabu hiyo haingedumu milele. Yesu, kwa kweli, alionyesha kwamba ingeendelea kwa muda mfupi tu. Yeye alitabiri kuhusu wale wenye kuishi mwaka wa 1914 ambao wangeona utimizo wa ‘ishara ya kuwapo kwake’: “Amin, nawaambia, Kizazi hiki hakitapita, hata hayo yote yatakapotimia.” (Mathayo 24:34) Kati ya mambo ambayo karibuni yatatokea katika wakati wa maisha ya kizazi hiki ni utimizo wa unabii mmoja kutoka sehemu ya kale zaidi ya Biblia.
1914 na Serikali ya Ulimwengu
Mamia ya miaka kabla ya wakati wa Yesu, nabii Mwebrania jina lake Danieli alitangulia kutujulisha juu ya mfuatano wa mamlaka za ulimwengu kutoka siku zake mwenyewe mpaka siku zetu. Mwishoni mwa unabii huo, akielekeza kwenye mamlaka zenye kutawala katika siku zetu, yeye alisema: “Katika siku za wafalme hao Mungu wa mbinguni atausimamisha ufalme ambao hautaangamizwa milele, wala watu wengine hawataachiwa enzi yake; bali utavunja falme hizi zote vipande vipande na kuziharibu, nao utasimama milele na milele.”—Danieli 2:44.
Kwa hiyo, kuzaliwa kwa Ufalme wa Mungu mwaka wa 1914 ni jambo lenye umaana mkubwa sana katika historia ya ulimwengu. Kweli kweli hiyo ni serikali ya ulimwengu. Karibuni itanyakua utawala wa kila siku wa dunia hii.
Matokeo yake yataanzisha kipindi kipya. Mwaka wa 1914 ulianzisha kipindi cha mvurugo na jeuri. Baada ya Har–Magedoni, Ufalme wa Mungu utaleta kipindi cha amani na utulivu. Katika kusimulia kwa njia ya kupendeza juu ya umoja wa ulimwengu ambao karibuni utakuwapo chini ya utawala wa Yesu, unabii mmoja wa kale unasema: “Katika siku zake mwadilifu atachipuka, na wingi wa amani mpaka mwezi utakapokuwa haupo. Naye atakuwa na raia kutoka bahari mpaka bahari na kutoka Mto mpaka miisho ya dunia.”—Zaburi 72:7, 8, NW.
Kwa hiyo, mchafuko wa mataifa yote ambao dunia imeuona tangu mwaka wa 1914 unaonekana kuwa ushuhuda wa “umalizio wa mfumo wa mambo.” Ni uthibitisho wa hasira ambayo Shetani anayo kwa sababu anajua wakati wake karibu umekwisha. Ni wonyesho wa uhakika wa kwamba mfumo wa mambo mpya na ulio bora zaidi umekaribia.
1914 na Wakristo
Kwa sababu gani Yesu bado hajaleta amani hiyo na umoja huo kwa wanadamu? Kwa sababu kuna kazi ya maana ya kutimizwa kwanza. Ilitabiriwa na Yesu alipokuwa akitoa ‘ishara ya kuwapo kwake.’ Yeye alisema: “Habari njema hizi za ufalme zitahubiriwa katika dunia yote inayokaliwa na watu kwa ushuhuda kwa mataifa yote; na ndipo ule mwisho utakapokuja.” (Mathayo 24:14, NW) Mwisho hautakuja kabla wanadamu hawajaambiwa ni nini yanayoendelea. Je! wewe unaambiwa?
Ndiyo. Tangu siku za mapema baada ya Vita ya Ulimwengu ya Kwanza, Mashahidi wa Yehova wamehubiri kwa juhudi bila woga juu ya Ufalme wa Mungu uliozaliwa karibuni. Katika nchi zaidi ya 200 leo, wanaendelea kutembelea watu nyumbani mwao na kuwaeleza sababu yenyewe ya matatizo ya karne hii. Wanawaambia juu ya mfumo mpya ambao karibuni utakuwapo chini ya Ufalme wa Mungu, na kwa njia hiyo wanashiriki pamoja nao tumaini lao la wakati ujao. Mwisho hautakuja kabla kazi hiyo ya kuhubiri haijamalizwa.
Zaidi ya kuwaarifu wanadamu kwa ujumla juu ya Ufalme kazi ya kuhubiri imetumikia kusudi jingine: Imewapa watu nafasi ya kuwa raia wa Ufalme wa Mungu. Yehova Mungu anatia moyo mataifa pamoja na watawala wao: “Mtumikieni Yehova kwa woga na muwe wenye furaha kwa kutetema. Mbusuni mwana, ili Yeye asikasirike na msipotee.” (Zaburi 2:11,12, NW) Mataifa kwa ujumla hayajaitikia mwaliko huo, lakini watu wengi mmoja mmoja wameuitikia. Kuuitikia hakukuwafanya wawe wapinzani wa kimapinduzi wa watawala wa dunia wa kisasa. (Warumi 13:1-7) Lakini imewafanya watake kujifunza sheria za Ufalme wa Mungu na kuzitii.
Matokeo yake yamekuwa jambo lenye kutokeza sana, ambalo linatimiza bado unabii mwingine wa nyakati zetu: “Mataifa mengi watakwenda na kusema, Njoni, twende juu mlimani kwa [Yehova], nyumbani kwa Mungu wa Yakobo, naye atatufundisha njia zake, nasi tutakwenda katika mapito yake;... nao watafua panga zao ziwe majembe, na mikuki yao iwe miundu, taifa halitainua upanga juu ya taifa lingine, wala hawatajifunza vita tena kamwe.”—Isaya 2:2-4.
Watu mmoja mmoja sasa wanatimiza unabii huo. Kutoka mataifa na lugha zote, kwa halisi mamilioni wameanza kuishi kupatana na sheria za Ufalme wa Mungu, na wako katika amani mmoja na mwenzake. Mapigano ya karne nyingi ya kikabila na kidini yanatatuliwa kati ya watu mmoja mmoja. Kwa hiyo, kikundi cha watu kinatenganishwa na ulimwengu kiwe chanzo cha mfumo mpya wa ulimwengu utakaokuwapo chini ya Ufalme wa Mungu.—Ufunuo 7:9-17.
1914 na Wewe
Je! sasa wewe unaweza kuona umaana wa tarehe 1914 na matokeo ambayo inaweza kuwa nayo kwako? Katika mwaka huo, matukio yalianzishwa ambayo yatatokeza badiliko kamili la tamasha ya ulimwengu. Kisababishi cha mabadiliko hayo ni Ufalme wa Mungu. Yesu alipoanza kutawala katika Ufalme huo, mambo hayangeweza kuwa vile vile tena. Shetani alitupwa kutoka mbinguni. Utaratibu wa ulimwengu ukaanguka, na watu hawajapata cho chote cha kuweka mahali pa huo. Lakini Ufalme wa Mungu mwishowe “utavunja” mifumo ya kutawala ya kibinadamu na kukaa mahali payo milele.
Kwa hiyo tarehe 1914 ilitokeza wakati wenye uharaka mkubwa lakini pia wenye nafasi nzuri sana. Kungali wakati wa ‘kumbusu mwana’ kuonyesha kujitiisha kwako kwake. Watakaofanya hivyo wataokoka mwisho unaokuja wa huu mfumo wa mambo na kuwa sehemu ya jamii ya kibinadamu yenye umoja katika amani na upatano chini ya Mfalme mmoja tu, Yesu Kristo.
Wakati ujao huo waweza kuwa ndiyo maana yenyewe ya mwaka wa 1914 kwako wewe.
[Blabu katika ukurasa wa 5]
Katika siku za mapema za karne hii, mamlaka ya ulimwengu iliyo kuu kupita zote—Ufalme wa Mungu—ilitokezwa
[Blabu katika ukurasa wa 5]
Mambo yote yaliyotabiriwa na Yesu yatatokea wakati wa maisha ya angalau baadhi ya wale wa kizazi cha 1914