Wapanda Farasi wa Kitabu cha Ufunuo​—Jinsi Unavyopatwa na Matokeo ya Upandaji Wao

JUMATATU, Aprili 1, 1985, haikuwa kama siku nyingine kwa wasafiri wengi katika Toronto, Kanada. Watu wenye makombora walikuwa wametisha kulipua reli za magari yanayopita chini ya ardhi. Kwa sababu gani? Ili kuelekeza fikira kwenye lile walilosema lilikuwa jaribio miaka mingi iliyopita la kuwaangamiza watu wa Armenia katika Uturuki, jambo ambalo serikali ya Uturuki imekanusha tena na tena.

Bila shaka, wengi wa wasafiri hao walikuwa na habari chache au hawakuwa na habari zo zote juu ya jambo hilo la miaka mingi iliyopita. Hata hivyo walipatwa na shida na wasiwasi fulani. Mara nyingi tunapatwa na matokeo ya mambo ambayo tuna habari chache kuyahusu.

Wakati wa kumi la pili la miaka la karne ya 20, matukio yenye kutazamisha yalianza kutokea katika kutimiza unabii wa Biblia wenye kutokeza unaopatikana katika Ufunuo 6:1-8. Kama alivyofunuliwa mtume Mkristo Yohana, wapanda farasi wangekimbia katika siku za mwisho. Na ingawa mamilioni hawajui hilo, upandaji wa wapanda farasi hao wa kitabu cha Ufunuo unakuwa na matokeo juu ya kila mtu duniani. Wewe, pia, unapatwa na matokeo hayo. Lakini jinsi gani? Tutaona tunapozungumza juu ya kila mmoja wa wapanda farasi hao.

Farasi wa Rangi Nyekundu

Mmoja wa farasi walioonwa na Yohana alikuwa “mwekundu sana, na yeye aliyempanda alipewa kuiondoa amani katika nchi, ili watu wauane, naye akapewa upanga mkubwa.”​—Ufunuo 6:4.

“Upanga mkubwa” wa mpanda farasi huyu unafananisha vita. Kwa hiyo, tangu 1914 watu milioni 69 hivi walikufa katika vita vya ulimwengu viwili. Hayo yalikuwa mauaji makubwa kama nini! Kweli kweli, umati mkubwa wa wajane, na yatima unashuhudia kwamba mpandaji wa farasi mwekundu, anayefananisha vita vya kimataifa, amekuwa na matokeo ya moja kwa moja maishani mwao.

Zaidi ya hayo, vita vyenye kuendelea na matisho ya vita vinalemeza sana kizazi cha vijana. Katika nchi ambazo kuna mapambano yenye moto, matineja ndio wanaopigana kwa sehemu kubwa. Matokeo ya vita juu ya vijana hawa yanaelezwa kwa maneno machache katika ulizo hili lililotolewa na mwenyekiti wa shirika moja la kutetea haki za kibinadamu: “Wawezeje kukua wakiwa timamu na watu wazima waliosawazika?”

Vijana katika nchi mbalimbali wanaopatwa moja kwa moja na matokeo ya vita wamejifunza kuhesabu wakati kuwa saa na siku badala ya miezi na miaka. Wanauliza: “Baadaye, ni nani anayejali juu ya baadaye? Unaweza kutoa uhakikisho kwamba kombora halitapiga chumba changu usiku wa leo niendapo kulala?”

Namna gani watoto wanaoishi katika nchi zenye amani? Je, wanapatwa na matokeo ya vita vya yule mpanda farasi? Ndiyo, tisho lenye huzuni la vita ya nyukilia limekuwa na matokeo makubwa ya kiakili juu yao. Kuhusu kukata tumaini kulikoonyeshwa na wanafunzi wake, mwalimu mmoja wa kike alitamka hivi: “Niliposikia maelezo hayo tena na tena nilikumbwa na hisia ya kutokuamini. Watoto hawa wachanga walihisi kadiri ya kukata tumaini nisiyojiruhusu mwenyewe kuhisi.” Dakt. Richard Logan wa Quebec, Kanada, aliongeza hivi: “Kujiona hoi na bila uwezo ndio ufafanuzi wa utaalamu wa matatizo ya akili kuhusu kushuka moyo. Hilo ndilo tunaloona katika vijana wengi.”

Lakini namna gani ikiwa huishi katika nchi yenye vita au huhisi tatizo hilo linageuza maono yako ya ndani? Bado mpandaji wa farasi mwekundu anakuwa na matokeo maishani mwako. Kila dakika dola milioni 1.3 zinatumiwa kwa makusudi ya moja kwa moja ya kijeshi​—dola kama elfu milioni 660 kwa mwaka ulimwenguni pote. Ni nani anayelipia hizo zote? Ni wewe. Po pote unapoishi, matokeo ya mpandaji wa farasi mwekundu yanakupata.

Farasi Mweusi

Farasi mwingine wa masimulizi hayo anaelezwa na Yohana kwa maneno haya: “Nikaona, na tazama, farasi mweusi, na yeye aliyempanda ana mizani mkononi mwake. Nikasikia kama sauti katikati ya hao wenye uhai wanne, ikisema, Kibaba cha ngano kwa nusu rupia, na vibaba vitatu vya shayiri kwa nusu rupia, wala usiyadhuru mafuta wala divai.”​—Ufunuo 6:5, 6.

Je, wewe una njaa? Mamilioni wana njaa. Wanapatwa moja kwa moja na matokeo ya mpandaji wa farasi mweusi, anayefananisha njaa kubwa. Kila dakika watoto 30 wanakufa kwa ajili ya ukosefu wa chakula cha kutosha au dawa​—zaidi ya milioni 15 kwa mwaka! Mamia ya mamilioni ya watu wengine wanaishi katika hali za kusikitisha sana. Kulingana na aliyekuwa Mkuu wa Benki ya Ulimwengu Robert McNamara wana ‘vizuizi vingi vya kutokuwa na elimu ya kusoma, kukosa chakula kinachofaa, maradhi, hesabu kubwa ya vifo vya watoto na miaka michache ya maisha na hivyo kuwanyang’anya ule uwezekano wenyewe wa chembe za tabia wanazozaliwa nazo.’

Katika miezi ya karibuni, limekuwa jambo la kawaida kuona picha za wanaume, wanawake, na watoto Waafrika wanaokufa njaa. Akieleza waziwazi mweneo wa taabu hiyo, Katibu-Mkuu wa U.M. Javier Perez de Cuellar, alionya hivi: “Wanadamu wengi zaidi huenda wakafa katika Afrika inayokaribia kuwa jangwa la Sahara zaidi ya kipindi chote cha Vita ya Ulimwengu ya Pili. Hata wale wanaopona huenda wakawa na kasoro maishani mwao mwote, ama ya kimwili au kiakili.” Watu hao wenye kupatwa na shida hiyo wanapatwa na matokeo ya moja kwa moja ya upandaji wa yule farasi mweusi.

Huenda usiwe na njaa, lakini bila shaka umepatwa na matokeo ya picha zenye kusikitisha za watu waliokumbwa na njaa. Kulingana na makala ya mhariri ya New York Times la Mei 20, 1985, dola zaidi ya bilioni moja kufikia wakati huo zilikuwa zimechangwa ili kuwapa msaada wenye njaa. lngawa huenda ikawa hukuchanga moja kwa moja, serikali fulani zimetoa michango mikubwa, zikitumia pesa za kodi. Ndiyo, upandaji wa farasi mweusi una matokeo ya moja kwa moja na yasiyo ya moja kwa moja juu ya watu wote.

Farasi wa Kijivu-jivu

Njozi aliyoona Yohana inaendelea na masimulizi ya farasi mwingine na mpandaji wake: “Nikaona, na tazama, farasi wa rangi ya kijivujivu, na yeye aliyempanda jina lake ni Mauti, na [Kaburi, Hadeze] akafuatana naye. Nao wakapewa mamlaka juu ya robo ya nchi waue kwa upanga na kwa njaa na kwa tauni na kwa hayawani wa nchi.”​—Ufunuo 6:8.

Mauti anampanda farasi wa kijivu-jivu, na ‘tauni inayoua ni moja tu ya njia mbalimbali ambazo uzima unamalizwa wakati wa upandaji huo wa mpanda farasi. Yajapokuwa maendeleo ya kisasa ya sayansi ya tiba, ulimwengu ungali unakabili maradhi pande zote. Ingawa huenda sasa tusiwe tunakabili maradhi ya kuambukia yenye kuenea kama iliyoitwa homa kali ya Hispania ya baada ya Vita ya Ulimwengu ya Kwanza, bado wanaouawa na kansa, matatizo ya moyo, na maradhi mengine mengi inashtua. Kwa mfano, Shirika la Afya Ulimwenguni linakadiri kwamba milioni 5.9 vikiwa ni visa vipya vya kansa vinatokea ulimwenguni pote kila mwaka. Upofu unaoletwa na maji ya mito, maleria, kichocho, kipindupindu na maradhi mengine mengi yanaongezea hesabu ya tauni za wakati huu ambazo zingali zinawapata watu.

Lakini, huenda ukawaza hivi: ‘Mimi sina yo yote la maradhi hayo.’ Huenda ikawa ni kweli, lakini unapatwa na matokeo ya upandaji wa farasi wa kijivujivu. Gharama za hospitali na za tiba ni kubwa sana. Jambo hilo linawafanya watu mmoja mmoja wajipatie namna fulani ya bima ya afya. Nchi nyingi zinatoa utibabu wa kijamii unaolipiwa na kodi. Na ebu fikiria gharama kubwa sana za wakati wa kufanya kazi unaopotezwa, ambao mwishowe wewe unapokezwa kwa bei kuongezwa. Ndiyo, upandaji wa farasi wa kijivujivu una matokeo juu yako.

Yanayoletwa na Farasi Mweupe

Baada ya kufikiria matokeo yenye kuumiza wakati wale wapanda farasi wengine wanakimbia, inatia moyo kuangalia ambayo Yohana alisema juu ya farasi mweupe na mpandaji wake, anayewaongoza wale wengine. Mtume huyo alisema: “Nikaona, na tazama, farasi mweupe, na yeye aliyempanda ana uta, akapewa taji, naye akatoka, ali akishinda tena apate kushinda.”​—Ufunuo 6:2.

Yesu Kristo anampanda farasi mweupe huyo. (Ufunuo 19:11) Utawala wake wa kimbingu ulianza mwaka 1914 kwa matukio yenye kusisimua. Vita mbinguni ilitokeza kutupwa chini duniani kwa Ibilisi na malaika zake. Baada ya hapo sauti kutoka mbinguni ikatangaza: “Ole wa nchi na bahari! kwa maana yule Ibilisi ameshuka kwenu mwenye ghadhabu nyingi, akijua ya kuwa ana wakati mchache tu.” Hiyo ilitia alama mwanzo wa upandaji wa wale wapanda farasi.​—Ufunuo 12:7-12.

Lakini upandaji wa Yesu Kristo una matokeo gani juu yako wewe? Kukamatana na utawala wake, Yesu alitabiri hivi: “Habari njema hizi za ufalme zitahubiriwa katika dunia yote inayokaliwa na watu kwa ushuhuda kwa mataifa yote; na ndipo ule mwisho utakapokuja.” (Mathayo 24:14, NW) Leo katika nchi na visiwa vya bahari zaidi ya 200, Mashahidi wa Yehova wanatangaza Ufalme uliosimamishwa wa Kristo. Je, wametembelea nyumbani kwako? Basi umepatwa na matokeo ya Mpanda farasi huyo.

Katika kutabiri zaidi juu ya jinsi watu wangepatwa na matokeo ya utawala wake, Yesu alitabiri hivi: “Hapo atakapokuja Mwana wa Adamu katika utukufu wake na malaika watakatifu wote pamoja naye, ndipo atakapoketi katika kiti cha utukufu wake; na mataifa yote watakusanyika mbele zake; naye atawabagua kama vile mchungaji abaguavyo kondoo na mbuzi; atawaweka kondoo mkono wake wa kuume, na mbuzi mkono wake wa kushoto.”​—Mathayo 25:31-33.

Yakiwa ni matokeo ya kazi hii ya kutenganisha inayofanywa wakati wa upandaji wa Yesu akiwa juu ya farasi mweupe, wanadamu wote wanatambulishwa kuwa ama “kondoo” ama “mbuzi.” Angalia matokeo. “Mbuzi,” ‘watakwenda zao kuingia katika [kukatiliwa mbali] milele; bali wenye haki [“kondoo”] watakwenda katika uzima wa milele.” (Mathayo 25:46) Kwa hiyo, jinsi unavyoitikia kuhubiriwa kwa ujumbe wa Ufalme itamaanisha ama uzima ama kifo.

Hata ikiwa hapo kwanza hujafikiria jinsi unavyopatwa na matokeo ya wapanda farasi wa Kitabu cha Ufunuo, tunakusihi uitikie habari njema za kwamba upandaji wao karibuni utakwisha. Baadaye, dunia itafurahia baraka nyingi chini ya utawala wa Yesu, mpandaji wa yule farasi mweupe. Hivi ndivyo ambavyo Biblia kwa njia ya kiunabii inaeleza baadhi yake: “Siku zake yeye, mtu mwenye haki atasitawi, na [mpandaji wa farasi mwekundu akiwa amekwenda zake] wingi wa amani hata mwezi utakapokoma. [Bila ya kuwapo mpandaji farasi mweusi] na uwepo wingi wa nafaka katika ardhi juu ya milima.”​—Zaburi 72:7, 16.

Wakati Yesu Kristo alipokuwa duniani, alionyesha uwezo aliopewa na Mungu juu ya mambo kama maradhi ya kuchukiza sana na hata kifo. Ataonyesha uwezo huo kwa kadiri kubwa sana wakati wa utawala wake akiwa Mfalme naye ataondolea dunia tauni zote, njaa kubwa na vita. Hivyo, Mpandaji farasi mweupe atakomesha upandaji wenye kuharibu wa wale wapanda farasi wengine wa Kitabu cha Ufunuo.

[Sanduku katika ukurasa wa 3]

WAPANDA FARASI WATAMBULISHWA

Toleo la Januari 1 la Mnara wa Mlinzi lilionyesha jinsi uendeshaji wa wapanda-farasi wa Kitabu cha Ufunuo ulivyoanza kutimizwa.

FARASI MWEUPE: Yesu Kristo anampanda farasi huyo akiwa Mfalme mpya aliyevikwa taji la ufalme mbinguni. Anafananishwa akienda kama mshindi mwadilifu tangu kutawazwa kwake mwaka 1914W.K.

FARASI MWEKUNDU: Mpandaji farasi huyo anafananisha vita. Amani inaondolewa duniani, na kutokea vita ya ulimwengu kunatiwa alama.

FARASI MWEUSIL: Mpandaji farasi huyo anafananisha upungufu wa chakula na njaa kubwa. Ingawa mamilioni wanakufa njaa, wengine wangali wanaweza kununua chakula cha anasa.

FARASI WA KIJIVUJIVU: Kifo kinampanda farasi wa kijivujivu. Kifo cha mapema ndicho kinachofananishwa. Kinaletwa na maradhi ya kuambukia na mambo mengine.