Biblia na Wakati Ujao Wako

KWA sababu gani Mtungaji wa Biblia, Yehova Mungu, anaweza kuutabiri kwa usahihi wakati ujao hali mwanadamu hawezi? Kwa sababu mbili. Yehova ni mweza yote. Yeye pia ni mjua yote. Sivyo alivyo mwanadamu.

“Mimi ni Mungu Mwenyezi,” Yehova akamwambia Abramu (Abrahamu) karibu miaka 4,000 iliyopita.a “Uende mbele yangu, ukawe mkamilifu. Nami nitafanya agano langu kati ya mimi na wewe, nami nitakuzidisha sana sana.” Abrahamu alipokuwa na umri wa miaka 99 naye Sara mke wake tasa akiwa mdogo kwake kwa miaka 10, Yehova alitabiri kwamba Abrahamu angekuwa baba wa “mataifa mengi.” (Mwanzo 17:1-4) Kwa kuwa ni mwenyezi—mweza yote—Yehova alitumia uwezo wake kushinda kipingamizi cho chote ambacho kingeweza kuzuia utimizo wa ahadi yake kwa Abrahamu, akamwezesha huyo mzee wa ukoo kuwa baba ya Isaka. Baadaye, kweli Abrahamu akawa babu mzaa Waisraeli na wengine.—Mwanzo 21:1-3; 25:1-4.

Pia Yehova ni mwenye kujua yote, mwenye hekima yote. Anaweza kutangulia kuona jambo lo lote analotaka kutangulia kuona. Juu yake inasemwa hivi: “Wala hakuna kiumbe kisichokuwa wazi mbele zake, lakini vitu vyote vi utupu na kufunuliwa machoni pake yeye aliye na mambo yetu.”—Waebrania 4:13.

Hali ya Mungu ya kuweza na kujua mambo yote inafanya isiwezekane yeye kushindwa na jambo. Sikuzote yeye anatabiri wakati ujao kwa usahihi. Kwa hiyo, angeweza kusema hivi: “Hakika yangu kama vile [n]ilivyoazimia, ndivyo itakavyokuwa; na kama nilivyokusudia, ndivyo itakavyotokea.” (Isaya 14:24) Acheni tuchunguze machache kati ya mengi ya unabii wa Biblia ambayo yamekwisha kutimia.

Mambo ya Unabii Yaliyotimizwa Wakati Uliopita

Wakati mmoja Babeli ulikuwa mji wenye kutegemea Milki ya Ashuri. Lakini kufikia karne ya saba K.W.K., ukawa umekuwa mji mkuu wa Milki ya Kibabeli ulioonekana kama kwamba haungeweza kushindwa. Lakini ni jambo gani lingeupata? “Babeli . . . utakuwa kama Sodoma na Gomora hapo Mungu alipoiangamiza. Hautakaliwa na watu tena kabisa, wala watu hawatakaa ndani yake tangu kizazi hata kizazi.” Ndivyo lilivyotoa unabii Neno la Mungu karibu miaka 100 kabla Babeli haijawa serikali kubwa ya ulimwengu yenye nguvu na yapata miaka 200 kabla ya kuangushwa kwayo na Wamedi na Waajemi. Hakuna mtu leo anayeweza kukana akisema maneno hayo hayakutimizwa. Kwa muda wa karne nyingi, mji wa Babeli umekuwa marundo ya mawe tu. Babeli umekoma kabisa.—Isaya 13:19, 20.

Yerusalemu wa karne ya kwanza W.K, ulikuwa mahali pa hekalu tukufu lililojengwa kwa ajili ya ibada ya Yehova. Hata hivyo, Biblia ina kumbukumbu la maneno haya ya Yesu Kristo kuhusu Yerusalemu na kizazi kilichoyasikia maneno yake: “Kwa kuwa siku zitakuja, adui zako watakapokujengea boma, likuzunguke; watakuzingira na kukuhusuru pande zote; watakuangusha chini wewe na watoto wako ndani yako, wasikuachie jiwe juu ya jiwe.” (Luka 19:43, 44) Yesu alisema hayo katika mwaka 33 W.K., lakini ulipofika mwaka 66 W.K. ndipo majeshi ya Kiroma yalipopiga miguu kuuinukia Yerusalemu. Ingawa ilionekana kwamba wangepata ushindi karibuni, ajabu ikawa kwamba Waroma walijiondoa. Lakini, mwaka 70 W.K. jeshi la Kiroma liliuzingira tena mji huo, uliokuwa umesongamana washerehekeaji wa sikukuu ya Kupitwa wakati huo, kisha wakauzungushia boma la miti. Karibu miezi mitano baadaye, Yerusalemu ulibomolewa, na wakaaji wao wanaokadiriwa kuwa 1,100,000 wakafa.

Mambo ya Unabii Yanayotimizwa Sasa

Je, wewe ungependelea kupata mifano ya kisasa juu ya utimizo wa matabiri ya Biblia? Basi, Yesu alitabiri matukio ambayo yangetambulisha kipindi kinachojulikana kuwa “siku za mwisho.” (2 Timotheo 3:1) Mambo hayo ya unabii yanakuwa “ishara” yenye sehemu nyingi—ishara ya siku za mwisho za mfumo mbovu wa mambo uliopo sasa. (Mathayo 24:3, NW) Ushahidi wa kwamba unabii wa Yesu unatimizwa umekuwa ukiongezeka tangu mwaka 1914. Kwa kweli, wewe binafsi umeona utimizo huo. Zifuatazo ni sehemu chache za kutokeza juu ya ile “ishara.”

Wakati Ujao wa Dunia—Je, Wewe Utakuwako?

Ni mambo gani yaliyoko mbele? Biblia ina mambo mengine ya unabii ambayo bado hayajatimizwa. Kati yayo kuna yale yanayohusu kufagiwa kwa dunia isiwe na uovu na kuachwa iking’aa uadilifu. Je, wakati ujao huo unakuvutia wewe? Je, unaamini kwamba Yehova ana hekima na uwezo wa kunyoosha mambo katika sayari yake? Ikiwa ndivyo, utataka kufikiria mambo ambayo Biblia inatabiri juu ya wakati ujao wa dunia.

Ufanye Huu Uwe Ndio Wakati Ujao Wako

Ili huu uwe ndio wakati ujao wako, ni lazima uchukue hatua sasa. Karibuni, kabla ya mambo ya unabii yaliyotangulia kutajwa hayajatimizwa kabisa, Yehova ‘atawaharibu hao waiharibuo nchi.’ (Ufunuo 11:18) Kwenye Sefania 2:3 Biblia inashauri hivi: “Mtafuteni [Yehova], enyi nyote mlio wanyenyekevu wa dunia, ninyi mliozitenda hukumu zake; itafuteni haki, utafuteni unyenyekevu; huenda mtafichwa katika siku ya hasira ya [Yehova].” Basi, tumia wakati wako kwa hekima sasa ukipata ufahamu sahihi wa Biblia na mambo yayo ya unabii ili utende kwa njia itakayokufaidi wewe na wapendwa wako. Mashahidi wa Yehova wako tayari kukusaidia upate maarifa zaidi juu ya wakati ujao kama unavyofunuliwa katika Neno la Mungu, Biblia.

[Maelezo ya Chini]

[Sanduku/Picha katika ukurasa wa 5]

“Taifa litainuka juu ya taifa na ufalme juu ya ufalme.” (Mathayo 24:7, NW) Vita ya Ulimwengu ya Kwanza ilianza katika mwaka 1914 na mwishowe ikahusisha ndani asilimia inayokadiriwa kuwa 93 ya watu wa ulimwengu. Leo, wanajeshi wa ulimwengu ni 106,000,000, au askari mmoja kwa kila watu 43. Habari moja ilisema: “Hakuna lo lote katika historia iliyopita cha kulingana na ongezeko la sasa la nguvu za uharibifu zilizo katika ulimwengu, na lile tisho ambalo ongezeko hilo linaelekezea wanadamu.”— Kichapo World Military and Social Expenditures 1985.

[Credit Line]

U.S. Army photo

“Kutakuwako upungufu wa chakula . . . mahali hapa na mahali hapa.” (Mathayo 24:7, NW) Kwa habari ya ukosefu mkubwa wa chakula, ripoti moja ya 1985 iliyotolewa kwa niaba ya Tume Yenye Kujitegemea Kuhusu Masuala ya Kimataifa ya Kuhurumia Wanadamu inasema: “Wakati wa kisa kile cha mwisho cha njaa Afrika katika miaka ya 1970, ilifikiriwa kwamba njaa ya daima na ukosefu wa chakula cha kujenga mwili ni hali ya kawaida ya Waafrika milioni nane. Sasa hesabu yenyewe ni milioni 100.”

[Credit Line]

FAO photo/B. Imevbore

“Kutakuwako matetemeko ya ardhi makubwa.” (Luka 21:11, NW) Hakika imekuwa hivyo tangu mwaka 1914. Kwa mfano, lile tetemeko la ardhi lililotukia Kanto katika Japani liliua watu 142,800 mwaka 1923. Wenye kuhusika katika tetemeko la ardhi kule Quetta, Pakistan, mwaka 1935 walikuwa watu wapatao 60,000. Vifo vyenye kutokana na matetemeko ya ardhi vilikuwa 66,700 katika Kaskazini ya Peru mwaka 1970. Na katika mwaka 1976 watu wapatao 800,000 wakawa majeruhi wa tetemeko la ardhi katika Tangshan, China.

“Katika mataifa yote ni lazima habari njema zihubiriwe Kwanza.”(Marko 13:10, NW) Mwaka 1985, Mashahidi wa Yehova walitumia saa zinazojumlika kuwa zaidi ya 590, 000,000 wakizihubiri habari njema za Ufalme wa Mungu katika jumla ya nchi na vikundi vya visiwa 205. Waliongoza mafunzo ya nyumbani ya Biblia 2,379,000 na kuachia watu wenye kupendezwa jumla ya nakala 350,000,000 za Biblia na vichapo vinavyoieleza Biblia.

[Sanduku/Picha katika ukurasa wa 6]

“Watafua panga zao ziwe majembe, na mikuki yao iwe miundu; taifa halitainua upanga juu ya taifa lingine, wala hawatajifunza vita tena kamwe.” (Isaya 2:4) Ufalme wa Mungu wa kimbingu utaandaa msingi wa kuondoa kabisa silaha duniani. Amani itatawala!

“[Yehova] wa majeshi atawafanyia mataifa yote karamu . . . ya vinono vilivyojaa mafuta, karamu ya divai iliyokaa juu ya urojorojo wake, iliyochujwa sana.” (Isaya 25:6) Chini ya mwelekezo na baraka ya Mungu, dunia itazaa kwa wingi sana. Njaa haitakuwako tena!

“Amemeza mauti hata milele; na Bwana [Yehova] atafuta machozi katika nyuso zote.” “Hapana mwenyeji atakayesema, Mimi mgonjwa.” (Isaya 25:8; 33:24) Hakuna ugonjwa wala tatizo la kiafya litakalozuia maponyo yenye kutolewa na Mungu. Yeye hata anakusudia kuondoa walio ndani ya makaburi ili yawe matupu. Itapendeza kama nini kukaribisha wapendwa wenye kufufuliwa!