Kilichonifanya Niache Wazo la Kwenda Mbunguni

—Imesimuliwa na Yuriko Eto

NIKIWA Mmethodisti Mjapani, mimi niliamini sana hakungeweza kuwa na furaha kubwa kuliko kwenda mbinguni. Lingekuwa jambo bora sana kuwa kando ya Mungu na kuweza kuishi pamoja na Bwana Yesu Kristo milele. Kwa sababu gani mimi nilikuwa na tamaa nyingi sana ya kwenda mbinguni? Na kwa sababu gani nikaliacha wazo hilo? Acha nikusimulie hadithi yangu.

Kwa karne nyingi ni dini za Ushinto na Ubuddha zilizokuwa zimeruhusiwa katika nchi yangu, Japani. Nilizaliwa mwaka 1911, miaka 22 tu baada ya kuruhusiwa kuwe na uhuru wa kidini. Jamaa yetu ilikuwa imekuwa ya Wamethodisti. Baba alikuwa katika biashara. Mama alikuwa binti wa kiongozi wa dini. Jambo la kwamba mama aliamini Biblia kikweli lilikuwa baraka kwangu. Hasa nakumbuka kwamba rafiki ya mama, aliyekuwa mkuu wa shule kwenye chuo cha kidini cha wasichana, alikuwa akitutembelea mara nyingi. Sikuzote aliongea juu ya Biblia, nami nilipenda sana kusikiliza. Lakini mwishoni mwa mazungumzo mwanamke huyo alikuwa sikuzote akisema, “Je! si jambo la kusikitisha kwamba bado Biblia haijafunguliwa ieleweke.” Sikuzote nilisumbuliwa na jambo la kwamba kwa kuwa Mungu alikuwa amefanya wanadamu waandike Biblia, mbona hakuwawezesha waielewe?

Nilipokuwa nikifika nyumbani kutoka shuleni, hakuna jambo lililonipendeza zaidi ya kuketi katika kiti cha starehe nikisoma Biblia na kuwaza-waza juu ya mbinguni. Jambo lililouvuta moyo wangu hasa ni kwamba labda Kristo angekuja kutulaki nikiwa ningali hai. Yesu Kristo alijifananisha na bwana-arusi na kutuonya kwamba kati ya wale wanawali kumi, watano walikuwa wamelala sana wakashindwa kumlaki bwana-arusi nao hawakuweza kwenda mbinguni! Kwa hivyo kila siku mimi niliomba siku ifike ambayo Bwana Yesu angekuja kutuita na kwamba kuwapo kwa pili kwa Kristo hakukupasa kusahauliwe. Niliweka moyoni andiko linalosema, “Heri wenye moyo safi; maana hao watamwona Mungu,” nami nikangoja na kutumainia. Kwa kweli, nilikuwa nikiishi kama msafiri asiyejali katika ulimwengu huu.​—Mathayo 25:1-12; 5:8.

Mwaka 1933 niliolewa, na kwa sababu sikuzote nilikuwa nikiingiza habari za mbinguni katika maongezi yetu, mume wangu alikuwa akinicheka kwa kusema, “Wewe ni wa mbinguni, lakini mimi ni wa ulimwengu huu.” Lakini, baba ya mume wangu alikuwa amejitoa sana kufuata Biblia na mara nyingi alikuwa akisema, “karibu miaka 2,000 imepita tangu Bwana Yesu alipokuja, kwa hiyo tunaweza kudhania kwamba kuwapo kwa pili kwa Kristo ku karibu.” Moyo wangu ukawaka shauku zaidi na zaidi.

Ndipo Vita ya Ulimwengu ya Pili ilipoanza, na katika mwaka wa mwisho wa vita hiyo mume wangu akafa. Wakati huo mimi niliwaza kwamba ikiwa kuna mahali pa moto wa mateso unaoogopesha, hakika mahali hapo ni ulimwengu huu. Baada ya vita, nilichukua watoto wangu wanne (yule mdogo zaidi alikuwa na umri wa miezi saba) nasi tukahama mara nyingi, kwa kuwa mji wa Tokyo ulikuwa ungali katika hali ya mvurugo. Mimi sikuweza kuvumilia kukaa Jumapili nzima bila kwenda kanisani, kwa hiyo kila mara tulipohama, nilihudhuria kanisa lililokuwa karibu zaidi na nyumba yetu. Sikujali lilikuwa kanisa gani, kwa kuwa maoni yangu yalikuwa kwamba kuna Mungu mmoja tu na Biblia moja. Sikupenda lile wazo la kushikamana na dhehebu moja.

Kutafuta Tengenezo la Mungu

Kwa sababu ya kuona tofauti mbalimbali, nilianza pole kwa pole kujiuliza Mungu mwenyewe ana maoni gani juu ya madhehebu hayo. Nikakata shauri kwamba Mungu anajua zaidi ya mtu ye yote kwamba makosa yanapatikana sana katika dini hizi nyingi. Kwa njia ile ile ambayo mwalimu anaweka maksi katika karatasi ya mtihani ya mwanafunzi, nikawaza ndivyo Mungu angelipa maksi tengenezo lenye kuifahamu Biblia kwa usahihi zaidi. Nikaanza kuona kwamba ni lazima nitafute tengenezo linalofaa machoni pa Mungu. Halafu andiko la Mathayo 7:9 likaingia upesi akilini mwangu. Linasema: “Kuna mtu yupi kwenu, ambaye mwanawe akimwomba mkate, atampa jiwe?” Kwa sababu mimi nilikuwa nikitafuta “mkate” wa kweli, nililiamini andiko hilo nikaanza kusali kizito siku baada ya siku: “Tafadhali uniruhusu nishirikiane na tengenezo lililo na ufahamu zaidi wa Biblia.” Mwaka mmoja baada ya kuanza kusali hivyo, nilihamia Yokohama. Hapa ndipo niliposisimuliwa na maongezi fulani.

Nilipokutana na watu wenye kusema walikuwa wanahudhuria kanisa, nilikuwa nikiwauliza upesi hivi: “Sijui kama ninyi mnajua mtu ye yote anayeifahamu Biblia kwa urefu?” Siku moja nikakutana na mwanamke aliye mshiriki wa kanisa moja katika mji wa karibu nami nikamwuliza ulizo lile lile. Ingawa kufikia wakati huo sikuwa nimepokea jibu lenye kufaa, yeye alinijibu kwa sauti yenye kusadikisha, akasema: “Ndiyo. Kuna mtu wa namna hiyo. Hivi juzi mwanamke mmisionari alitembelea hapa. Nikamkaribisha aingie nyumbani, na bila kukawia akafungua Biblia na kunieleza mambo mengi, mfululizo. Alitaja kabla hajaondoka kwamba yeye anaishi juu ya kilima ambako wewe unaishi.” Kusikia hivyo, nikaondoka nyumbani kwake nikiwa nimesisimuka. Siku ile ile iliyofuata nikatembelea makao ya wamisionari ya Mashahidi wa Yehova.

Wakati wa Uamuzi Mkubwa

Sasa mwishowe ningeweza kujifunza Biblia kwa urefu. Karibu mwezi mmoja ulipita​—halafu nikagutuka wee! mwalimu wangu mmisionari, Jean Hyde (sasa Nisbet) alitabasamu akasema: “Wakati ujao labda wewe hutaishi mbinguni bali duniani.” Nilishtuka kwa sababu nilijisikia kama kwamba nilikuwa nimesukumwa nikaondolewa mbinguni. Nilikasirika kweli kweli. “Ndiyo mara ya kwanza mimi kukutana na mmisionari anayenena kwa ufidhuli kama wewe,” nikamrushia maneno. “Ni aibu sana kwamba ingawa mimi nilikutazamia wewe unifundishe Biblia, sasa sijisikii hivyo tena. Lakini, kwa kuwa ninatafuta tengenezo lililo la kweli wakati huu na nimeandikisha niwe nikipata gazeti Mnara wa Mlinzi na pia nina kile kitabu ‘Let God Be True mimi mwenyewe nitajifanyia uchunguzi wa uangalifu. Nikiisha kuthibitisha tena kwamba huu ndiyo ukweli, nitakubali kujiweka chini yako nije kukuomba msaada tena.”

Jean hakukasirika. Uso wake uling’aa naye akasema, “Ni sawa, tafadhali uchunguze ukweli.” Basi, yeye akaenda zake. Baada ya hapo alikuwa akifanya fadhili kwa kunipitia-pitia na kuuliza: “Je! unaendelea kufanya uchunguzi wako?” Ijapokuwa nilikuwa nimejifunza nikitumaini kwamba tengenezo hili ndilo lililokuwa jibu la Mungu kwa sala zangu, sasa maoni yangu yalivurugika kabisa. Sikuwa nimepata kusikia tofauti ikifanywa kati ya wale watakaoenda mbinguni na wale watakaoishi milele duniani.

Baada ya hapo, nilichunguza kwa bidii vichapo vya Watchtower kila siku. Baada ya muda, mwangalizi mwenye kusafiri wa Mashahidi wa Yehova, Adrian Thompson, akanitembelea. Nikiwa na ukaidi kidogo, nilimwuliza bila kukawia: “Hata ikiwa wakati ujao kutakuwa na vikundi viwili, kimoja cha kimbingu na kile kingine cha kidunia, kwani si Mungu atakayeamua? Ingekuwa ni kimbelembele wanadamu kuamua, sivyo?” Yeye akajibu: “Ndivyo kabisa! Mwenye kuamua ni Mungu.” Ingawa sikuyafahamu mambo hayo kwa urefu, hangaiko langu lilipungua kidogo. ‘Kwa hiyo,‘ mimi nikawaza, ‘mataraja yangu ya kwenda mbinguni hayakuondolewa.’ Baada ya hapo, nilisali nikaendelea kujifunza mimi mwenyewe.

Mwaka 1954 nilihudhuria Ukumbusho wa kifo cha Kristo. Lloyd Barry ndiye aliyekuwa msemaji. Katika hotuba yake alisema kwamba wale walio katika “mapatano ya agano” ndio waliopaswa kushiriki mkate na divai. Baada ya Ukumbusho nilitembea njia yote kwenda nyumbani nikiwa pamoja na Shizue Seki, Shahidi mwenye bidii, kwa kuwa nilikuwa na maulizo mengi. Mwanamke huyo alinihangaikia sana na akatumia wakati anitie moyo nisiache kwa sababu tu nilitatizwa na jambo moja, bali nihakikishe kama msingi wa mafundisho yale mengine yote ni Biblia au sivyo.

Siku moja, baada ya watoto kwenda shuleni, nilikuwa nikipamba nyumba ipatikane na wageni katika hali nzuri, nilisali kwa unyamavu, ‘Nitajifunza tena na Mashahidi wa Yehova.’ Kufungua macho, nilistaajabu kuona, si wale wageni niliokuwa nikingoja, bali Mashahidi wa Yehova watatu Wajapani. Kwa kushangaa, nikawaambia kwamba nilikuwa nimetoka tu kusali. Fumiko Seki akaruka-ruka kwa kusisimuka, akipiga-piga makofi na kusema, “Ni vema! Ni vema!” Baada ya muda mfupi, mmisionari mwingine Sonny Dearn, alianza funzo lenye kufurahika huku Fumiko akimsaidia kutafsiri. Safari hii wawili wa watoto wangu walijifunza pamoja nami. Lakini mgawo wa Sonny ukabadilishwa Ndipo Leon Pettitt, mtu mwingine wa kutoka nchi za nje akaja. Sikuzote sisi tulimrushia-rushia maulizo. Yeye alituonyesha maandiko kwa utulivu tuweze kukata shauri inavyofaa na kufanya maendeleo katika maarifa ya Kimaandiko.

Kujifunza Kusudi la Kwenda Mbinguni

Kinyume cha matazamio yangu binafsi, nikajifunza kwamba kuna kusudi la kwenda mbinguni lililo la maana sana kuliko ile hamu ya kutaka tu kukaa karibu na yule Mungu mtukufu na kuishi pamoja na Bwana Yesu milele. Nilipozoea kweli fulani fulani, moyo wangu uliweza kuzikubali kwa kiasi kianachofaa.

Kwanza, kama yule mtu wa kwanza Adamu hangalitenda dhambi, hakungalikuwa na uhitaji wo wote kati ya wanadamu kwenda mbinguni. Hiyo ni kwa sababu kabla ulimwengu haujaumbwa walikuwako maelfu kwa maelfu ya malaika mbinguni.​—Ayubu 38:4-7; Danieli 7:9, 10.

Funzo lilipoendelea, nikajifunza kutokana na Luka 12:32 kwamba ni kikundi kidogo tu, kinachoitwa na Biblia “kundi dogo” kinachoenda mbinguni. Yesu alisema: “Msiogope, enyi kundi dogo; kwa kuwa Baba yenu ameona vema kuwapa ule ufalme.” Kwa habari ya kusudi la kwenda kule, je! kwani haikuandikwa katika Ufunuo 20:6 kwamba “watatawala pamoja [na Kristo] hiyo miaka elfu”? Na katika Ufunuo 5:10 (NW) kwamba “watatawala wakiwa wafalme juu ya dunia”?

Nilijifunza pia maana ya Sala ya Bwana. Yesu alisema hivi: “Ufalme wako uje, mapenzi yako yatimizwe, hapa duniani kama huko mbinguni.” (Mathayo 6:9, 10) Nilipoelewa kwamba maneno hayo yanamaanisha serikali ya Ufalme wa kimbingu wenye watu waliotolewa duniani wakatawale pamoja na Mfalme Kristo, nilistaajabia hekima ya Mungu. Nilisadiki kwamba hicho ndicho kitu tunachokihitaji hasa, serikali mpya isiyo na kifani itakayoweka wanadamu huru wasiwe na taabu, huzuni, mikazo inayoletwa na Shetani. Nilishindwa kujizuia kumpa Yehova sifa.

Zaidi ya hilo, nilipojifunza kwamba hesabu ya wenye kwenda mbinguni ina kikomo cha 144,000 tu, nilikubali moja kwa moja kwamba jambo hilo linafaa. (Ufunuo 14:1, 3) Kwa njia iyo hiyo, hata hesabu ya maafisa katika serikali ya duniani ina kikomo. Nilikuja kuthamini kwamba kuna kazi fulani za maana kwa ajili ya wale wanaoenda mbinguni. Kazi yao ndani ya mpango wa Mungu wenye upendo inatia ndani kufurahisha wale wote wanaoishi duniani na kurudisha dunia hii kwenye hali za paradiso.

Sasa nilijawa sana uthamini hata nikafurahi kuyaacha mawazo yangu ya kwenda mbinguni. Sasa nimejawa na tumaini la kuishi katika paradiso duniani. Bila shaka, Mungu ameifunua maana ya Biblia kwa kutumia tengenezo lake. Mimi nilikuwa nimekuwa nikitafuta ukweli. Ninalazimika kumpa Mungu asante kwamba amenisaidia nishirikiane na tengenezo analolikubali.

Huduma Yenye Mazao na Furaha

Nilibatizwa Oktoba 1954. Tangu mwaka 1955, wawili wa watoto wangu wamekuwa wakishiriki wakati wote katika utendaji wa kutangaza Ufalme pamoja nami. Keijiro mwanangu alitumikia akiwa mwangalizi mwenye kusafiri kwa miaka saba. Sasa ana baraka ya kuwa na watoto wawili, naye pamoja na mkeye wanafanya kazi kwa bidii wakiwa wahubiri wa wakati wote (mapainia). Nikiwa painia wa pekee, mimi nimeshiriki katika kuanzisha makundi ya Mashahidi wa Yehova katika miji sita.a Hivi majuzi nilifurahi kuhubiri kwa miaka kadha pamoja na binti yangu aliye mkubwa zaidi Hiroko, katika Kisiwa cha Hachijo, ambacho kiko kilometa 300 kule nje katika Bahari Kuu ya Pasifiki kutoka Tokyo.

Tangu niliporidhika na tumaini la kuwa na wakati ujao mzuri sana duniani, maoni yangu juu ya dunia yamebadilika sana. Katika Kisiwa Hachijo hasa, tulizungukwa na maua yasio kama yale ya kawaida, nasi tulipokuwa tukienda nyumba kwa nyumba, yalituvutia tulipokuwa tukiongea na wenye nyumba katika bustani zao za kupendeza. Siku moja tulikuta mwanamke mzee-mzee akitunza maua yake. Tulisifu maua hayo, lakini akaomboleza hivi: “Mimi siogopi kufa, lakini najisikia vibaya kwamba nitalazimika kuyaacha maua haya nitakapoenda ulimwengu ule mwingine.” Nikamweleza kwamba chini ya utawala wa Ufalme wa Mungu yeye atafufuliwa kutoka kifo aingie katika dunia-paradiso ambamo maua yatafurahiwa milele. Macho yake yaling’aa, na funzo la Biblia likapangwa.

Nilivutiwa pia na jambo la kwamba watu wa Kisiwa kile wana mtindo wa maisha usio wa mambo mengi. Wao wanajali sana hasa lile jambo la kuheshimu wazazi wao waliokufa. Mtu anapokufa, kila mtu katika mtaa anaona wajibu wa kuhudhuria maziko. Laiti watu wote hawa wangepata kumjua Yehova, yule Baba wa uhai, na kufahamu kwamba yeye ndiye Mungu atakayewafanya babu zao waishi tena wakati dunia itakaporudishwa iwe paradiso. Ningependa wajue kwamba pana tofauti ya maana kati ya kuheshimu na kuabudu wazazi wetu waliokufa. Inatupasa tuabudu Baba wa uhai tu, Yehova. Ni kama vile Yesu alivyosema: “Lakini saa inakuja, nayo sasa ipo, ambayo waabuduo halisi watamwabudu Baba katika roho na kweli. Kwa maana Baba awatafuta watu kama hao wamwabudu. Mungu ni Roho nao wamwabuduo yeye imewapasa kumwabudu katika roho na kweli.”​—Yohana 4:23, 24.

Sasa, nikiwa katika mgawo wa eneo la saba, nampigia Yehova asante ninapoendelea kueleza watu juu ya kusudi la serikali ya Ufalme wa kimbingu wa Yehova na baraka zuri ajabu itakazoletea wale kati yetu watakaokuwa na pendeleo zuri sana la kuishi milele duniani.​—2 Petro 3:13; Ufunuo 21:3, 4.

[Maelezo ya Chini]

[Picha katika ukurasa wa 12]

Yuriko Eto akijifunza na wengine juu ya ahadi ya Biblia ya Paradiso ya kidunia