Mwaka 1986—Je! Ni wa “Kulinda Amani”?

UMOJA wa Mataifa umetangaza 1986 kuwa ndio Mwaka wa Amani ya Kimataifa. Kuna maendeleo gani kuelekea kupata amani ya ulimwengu? Maelezo yanayofuata yametoka katika sehemu zote za dunia.

Wakati wa tarehe za Aprili 7-12,1986, watungaji sheria kutoka nchi 103 walishiriki katika mkutano wa 75 wa Muungano wa Mabunge Mbalimbali (IPU), mjini Meksiko.

Katibu Mkuu Javier Pérez de Cuellar aliupa Muungano huo ujumbe huu: “Wakati Mwaka wa Amani ya Kimataifa unapoanza, watu wote na wakumbuke kwamba kichwa cha mwaka wenyewe​—‘Kulinda Amani na Wakati Ujao wa Wanadamu’​—kinakaza fikira za pekee si kuhusu mwaka 1986 tu bali pia kuhusu miaka ya mbele. Acheni tuzitumie nafasi za mwaka 1986 tukiwa tumepiga moyo konde.”

Msimamizi wa ule muungano wa IPU alisema kwamba yeye alikuwa ametembelea nchi kadha “kuuliza kama wabunge wa kule hawangeweza kuwa wabunge wa amani.” Alikata shauri hivi: “Nikakuta kwamba hilo ni jambo gumu sana, kwa kweli katika visa fulani hakuna tumaini.”

Kikundi chenyewe kilichotoka Meksiko kilitoa maoni ya ‘kukata tumaini kwa sababu ijapokuwa watu wanazidi kufanya wasiwasi juu ya hatari zinazoweza kutokana na mashindano ya kuunda silaha na jitihada zilizofanywa na Umoja wa Mataifa, hakuna maendeleo makubwa yamefanywa katika miaka ya majuzi kuhusu upunguzaji wa silaha.”

Kikundi cha Argentina kilitia maanani “kwamba wale watu milioni sitini waliokufa katika vita ya ulimwengu ya pili, wala kombora la nyukilia lililoangushwa katika Hiroshima, wala yale mapigano mia moja na thelathini ya kutumia silaha ambayo yametukia tangu wakati huo hayajatosha kufundisha mwanadamu kwamba yuko katika ukingo wa kujiangamiza mwenyewe.” Kikundi hicho kilihangaika sana kwamba “Serikali Kubwa tano zenye makombora ya nyukilia zimerundika silaha za namna hiyo zaidi ya 50,000, kiasi ambacho ni sawa na kila mkaaji wa dunia yetu kuwa tani tatu za makombora yale ya kawaida yenye kulipuka.”

Yale mataifa yaliyo wanachama wa kudumu wa Baraza la Usalama wa Umoja wa Mataifa yaliwakilishwa, na yalitoa maelezo kama haya yanayofuata:

Kikundi cha Uingereza kilisema: “Shabaha kuu ya mwongozo lazima iwe ni kuzuia mashindano ya kuweka silaha katika anga za juu. Lakini, tunahitaji kuyaona mambo kama yalivyo, . . . anga za juu tayari zimekwisha kufanywa mahali pa kijeshi.” Kikundi cha Ufaransa kilikazia “kwamba kutokuweza kwa Umoja wa Mataifa kudumisha usalama na amani ya ujumla kunatokana hasa na Mataifa fulani yanayozivunja kanuni zile kuu za sheria ya kimataifa na ya maadili.” Kikundi cha Urusi kilieleza kwamba “hangaiko kubwa juu ya hatari ya maangamizi ya nyukilia yanayotisha kupata wanadamu, ambayo yanaweza kumaliza ustaarabu duniani.” Kikundi cha wajumbe kutoka United States kilisemwa kuwa kilitamka kwamba ‘kingejaribu kueleza wengine uhitaji wa kuwa na ushirikiano wa kimataifa ili kupambana na matendo ya uvamizi.’

Upande ule mwingine wa dunia, Mwaka wa Amani ya Kimataifa ulikaziwa fikira siku ya Machi 21 na wakusanyikaji waliokutana katika Jumba Kuu la Watu katika Beijing. Zhao Ziyang aliye waziri mkuu wa China ndiye aliyekuwa na matazamio mazuri kuliko wengine, kwa kusema: “Mradi watu wa ulimwengu hawatapunguza jitihada zao, ni hakika kwamba watafanikiwa kupata amani.”

Kwa habari ya Mwaka wa Amani ya Kimataifa ya Umoja wa Mataifa, Papa John Paul wa Pili amesema kwamba Makao Matakatifu ya Papa yanataka kuona “mataifa yote na dini zote zikihusika katika harakati ya kusali kuwe na amani.”

Amani inauepa ulimwengu huu. Na sababu ni nini? Ni lazima amani ya kweli itegemezwe juu ya upendo; ulimwengu umegawanywa na kiburi na chuki ya kitaifa. Amani ya kweli inahitaji kuwe na utawala wa hekima na haki; watawala wa kibinadamu wasio wakamilifu hawawezi kufikia kiwango hicho. Ni lazima amani ya kweli itegemee ibada yenye umoja ya yule Mungu mmoja wa kweli; dini za ulimwengu zimegawanyika ovyo ovyo katika maelfu ya madhehebu, na hakuna ye yote kati yazo inayoheshimu Yehova kuwa Bwana Mwenye Enzi Kuu. Kupatikana na amani ya kweli kunahitaji aondolewe “Mungu wa ulimwengu huu,” Shetani Ibilisi, na mfumo wake wa utawala; ni Ufalme wa Yehova tu ulio mikononi mwa Kristo Wake unaoweza kuponda Shetani na kazi zake.

[Picha katika ukurasa wa 15]

Dola ya “amani” ya Australia iliyotengenezwa kwa dhahabu

Stampu ya “amani” ya Kenya ya shilingi 10